ಅಮ್ಬಾಶಮ್ಬರವೈರಿತಾತಭಗಿನೀ ಶ್ರೀಚನ್ದ್ರಬಿಮ್ಬಾನನಾ
ಬಿಮ್ಬೋಷ್ಠೀ ಸ್ಮಿತಭಾಷಿಣೀ ಶುಭಕರೀ ಕಾದಮ್ಬವಾಟ್ಯಾಶ್ರಿತಾ ।
ಹ್ರೀಙ್ಕಾರಾಕ್ಷರಮನ್ತ್ರಮಧ್ಯಸುಭಗಾ ಶ್ರೋಣೀನಿತಮ್ಬಾಙ್ಕಿತಾ
ಮಾಮಮ್ಬಾಪುರವಾಸಿನೀ ಭಗವತೀ ಹೇರಮ್ಬಮಾತಾವತು ॥ 1 ॥
ಕಲ್ಯಾಣೀ ಕಮನೀಯಸುನ್ದರವಪುಃ ಕಾತ್ಯಾಯನೀ ಕಾಲಿಕಾ
ಕಾಲಾ ಶ್ಯಾಮಲಮೇಚಕದ್ಯುತಿಮತೀ ಕಾದಿತ್ರಿಪಞ್ಚಾಕ್ಷರೀ ।
ಕಾಮಾಕ್ಷೀ ಕರುಣಾನಿಧಿಃ ಕಲಿಮಲಾರಣ್ಯಾತಿದಾವಾನಲಾ
ಮಾಮಮ್ಬಾಪುರವಾಸಿನೀ ಭಗವತೀ ಹೇರಮ್ಬಮಾತಾವತು ॥ 2 ॥
ಕಾಞ್ಚೀಕಙ್ಕಣಹಾರಕುಣ್ಡಲವತೀ ಕೋಟೀಕಿರೀಟಾನ್ವಿತಾ
ಕನ್ದರ್ಪದ್ಯುತಿಕೋಟಿಕೋಟಿಸದನಾ ಪೀಯೂಷಕುಮ್ಭಸ್ತನಾ ।
ಕೌಸುಮ್ಭಾರುಣಕಾಞ್ಚನಾಮ್ಬರವೃತಾ ಕೈಲಾಸವಾಸಪ್ರಿಯಾ
ಮಾಮಮ್ಬಾಪುರವಾಸಿನೀ ಭಗವತೀ ಹೇರಮ್ಬಮಾತಾವತು ॥ 3 ॥
ಯಾ ಸಾ ಶುಮ್ಭನಿಶುಮ್ಭದೈತ್ಯಶಮನೀ ಯಾ ರಕ್ತಬೀಜಾಶನೀ
ಯಾ ಶ್ರೀ ವಿಷ್ಣುಸರೋಜನೇತ್ರಭವನಾ ಯಾ ಬ್ರಹ್ಮವಿದ್ಯಾಽಽಸನೀ ।
ಯಾ ದೇವೀ ಮಧುಕೈಟಭಾಸುರರಿಪುರ್ಯಾ ಮಾಹಿಷಧ್ವಂಸಿನೀ
ಮಾಮಮ್ಬಾಪುರವಾಸಿನೀ ಭಗವತೀ ಹೇರಮ್ಬಮಾತಾವತು ॥ 4 ॥
ಶ್ರೀವಿದ್ಯಾ ಪರದೇವತಾಽಽದಿಜನನೀ ದುರ್ಗಾ ಜಯಾ ಚಣ್ಡಿಕಾ
ಬಾಲಾ ಶ್ರೀತ್ರಿಪುರೇಶ್ವರೀ ಶಿವಸತೀ ಶ್ರೀರಾಜರಾಜೇಶ್ವರೀ ।
ಶ್ರೀರಾಜ್ಞೀ ಶಿವದೂತಿಕಾ ಶ್ರುತಿನುತಾ ಶೃಙ್ಗಾರಚೂಡಾಮಣಿಃ
ಮಾಮಮ್ಬಾಪುರವಾಸಿನೀ ಭಗವತೀ ಹೇರಮ್ಬಮಾತಾವತು ॥ 5 ॥
ಅಮ್ಬಾಪಞ್ಚಕಮದ್ಭುತಂ ಪಠತಿ ಚೇದ್ಯೋ ವಾ ಪ್ರಭಾತೇಽನಿಶಂ
ದಿವ್ಯೈಶ್ವರ್ಯಶತಾಯುರುತ್ತಮಮತಿಂ ವಿದ್ಯಾಂ ಶ್ರಿಯಂ ಶಾಶ್ವತಮ್ ।
ಲಬ್ಧ್ವಾ ಭೂಮಿತಲೇ ಸ್ವಧರ್ಮನಿರತಾಂ ಶ್ರೀಸುನ್ದರೀಂ ಭಾಮಿನೀಂ
ಅನ್ತೇ ಸ್ವರ್ಗಫಲಂ ಲಭೇತ್ಸ ವಿಬುಧೈಃ ಸಂಸ್ತೂಯಮಾನೋ ನರಃ ॥ 6 ॥
ಇತಿ ಶ್ರೀ ಅಮ್ಬಾ ಪಞ್ಚರತ್ನ ಸ್ತೋತ್ರಮ್ ।
