ಆನನ್ದಮನ್ಥರಪುರನ್ದರಮುಕ್ತಮಾಲ್ಯಂ
ಮೌಲೌ ಹಠೇನ ನಿಹಿತಂ ಮಹಿಷಾಸುರಸ್ಯ ।
ಪಾದಾಮ್ಬುಜಂ ಭವತು ಮೇ ವಿಜಯಾಯ ಮಞ್ಜು-
-ಮಞ್ಜೀರಶಿಞ್ಜಿತಮನೋಹರಮಮ್ಬಿಕಾಯಾಃ ॥ 1 ॥
ದೇವಿ ತ್ರ್ಯಮ್ಬಕಪತ್ನಿ ಪಾರ್ವತಿ ಸತಿ ತ್ರೈಲೋಕ್ಯಮಾತಃ ಶಿವೇ
ಶರ್ವಾಣಿ ತ್ರಿಪುರೇ ಮೃಡಾನಿ ವರದೇ ರುದ್ರಾಣಿ ಕಾತ್ಯಾಯನಿ ।
ಭೀಮೇ ಭೈರವಿ ಚಣ್ಡಿ ಶರ್ವರಿಕಲೇ ಕಾಲಕ್ಷಯೇ ಶೂಲಿನಿ
ತ್ವತ್ಪಾದಪ್ರಣತಾನನನ್ಯಮನಸಃ ಪರ್ಯಾಕುಲಾನ್ಪಾಹಿ ನಃ ॥ 2 ॥
ದೇವಿ ತ್ವಾಂ ಸಕೃದೇವ ಯಃ ಪ್ರಣಮತಿ ಕ್ಷೋಣೀಭೃತಸ್ತಂ ನಮ-
-ನ್ತ್ಯಾಜನ್ಮಸ್ಫುರದಙ್ಘ್ರಿಪೀಠವಿಲುಠತ್ಕೋಟೀರಕೋಟಿಚ್ಛಟಾಃ ।
ಯಸ್ತ್ವಾಮರ್ಚತಿ ಸೋಽರ್ಚ್ಯತೇ ಸುರಗಣೈರ್ಯಃ ಸ್ತೌತಿ ಸ ಸ್ತೂಯತೇ
ಯಸ್ತ್ವಾಂ ಧ್ಯಾಯತಿ ತಂ ಸ್ಮರಾರ್ತಿವಿಧುರಾ ಧ್ಯಾಯನ್ತಿ ವಾಮಭ್ರುವಃ ॥ 3 ॥
ಉನ್ಮತ್ತಾ ಇವ ಸಗ್ರಹಾ ಇವ ವಿಷವ್ಯಾಸಕ್ತಮೂರ್ಛಾ ಇವ
ಪ್ರಾಪ್ತಪ್ರೌಢಮದಾ ಇವಾರ್ತಿವಿರಹಗ್ರಸ್ತಾ ಇವಾರ್ತಾ ಇವ ।
ಯೇ ಧ್ಯಾಯನ್ತಿ ಹಿ ಶೈಲರಾಜತನಯಾಂ ಧನ್ಯಾಸ್ತ ಏವಾಗ್ರತಃ
ತ್ಯಕ್ತೋಪಾಧಿವಿವೃದ್ಧರಾಗಮನಸೋ ಧ್ಯಾಯನ್ತಿ ತಾನ್ಸುಭ್ರುವಃ ॥ 4 ॥
ಧ್ಯಾಯನ್ತಿ ಯೇ ಕ್ಷಣಮಪಿ ತ್ರಿಪುರೇ ಹೃದಿ ತ್ವಾಂ
ಲಾವಣ್ಯಯೌವನಧನೈರಪಿ ವಿಪ್ರಯುಕ್ತಾಃ ।
ತೇ ವಿಸ್ಫುರನ್ತಿ ಲಲಿತಾಯತಲೋಚನಾನಾಂ
ಚಿತ್ತೈಕಭಿತ್ತಿಲಿಖಿತಪ್ರತಿಮಾಃ ಪುಮಾಂಸಃ ॥ 5 ॥
ಏತಂ ಕಿಂ ನು ದೃಶಾ ಪಿಬಾಮ್ಯುತ ವಿಶಾಮ್ಯಸ್ಯಾಙ್ಗಮಙ್ಗೈರ್ನಿಜೈಃ
ಕಿಂ ವಾಽಮುಂ ನಿಗರಾಮ್ಯನೇನ ಸಹಸಾ ಕಿಂ ವೈಕತಾಮಾಶ್ರಯೇ ।
ಯಸ್ಯೇತ್ಥಂ ವಿವಶೋ ವಿಕಲ್ಪಲಲಿತಾಕೂತೇನ ಯೋಷಿಜ್ಜನಃ
ಕಿಂ ತದ್ಯನ್ನ ಕರೋತಿ ದೇವಿ ಹೃದಯೇ ಯಸ್ಯ ತ್ವಮಾವರ್ತಸೇ ॥ 6 ॥
ವಿಶ್ವವ್ಯಾಪಿನಿ ಯದ್ವದೀಶ್ವರ ಇತಿ ಸ್ಥಾಣಾವನನ್ಯಾಶ್ರಯಃ
ಶಬ್ದಃ ಶಕ್ತಿರಿತಿ ತ್ರಿಲೋಕಜನನಿ ತ್ವಯ್ಯೇವ ತಥ್ಯಸ್ಥಿತಿಃ ।
ಇತ್ಥಂ ಸತ್ಯಪಿ ಶಕ್ನುವನ್ತಿ ಯದಿಮಾಃ ಕ್ಷುದ್ರಾ ರುಜೋ ಬಾಧಿತುಂ
ತ್ವದ್ಭಕ್ತಾನಪಿ ನ ಕ್ಷಿಣೋಷಿ ಚ ರುಷಾ ತದ್ದೇವಿ ಚಿತ್ರಂ ಮಹತ್ ॥ 7 ॥
ಇನ್ದೋರ್ಮಧ್ಯಗತಾಂ ಮೃಗಾಙ್ಕಸದೃಶಚ್ಛಾಯಾಂ ಮನೋಹಾರಿಣೀಂ
ಪಾಣ್ಡೂತ್ಫುಲ್ಲಸರೋರುಹಾಸನಗತಾ ಸ್ನಿಗ್ಧಪ್ರದೀಪಚ್ಛವಿಮ್ ।
ವರ್ಷನ್ತೀಮಮೃತಂ ಭವಾನಿ ಭವತೀಂ ಧ್ಯಾಯನ್ತಿ ಯೇ ದೇಹಿನಃ
ತೇ ನಿರ್ಮುಕ್ತರುಜೋ ಭವನ್ತಿ ರಿಪವಃ ಪ್ರೋಜ್ಝನ್ತಿ ತಾನ್ದೂರತಃ ॥ 8 ॥
ಪೂರ್ಣೇನ್ದೋಃ ಶಕಲೈರಿವಾತಿಬಹಲೈಃ ಪೀಯೂಷಪೂರೈರಿವ
ಕ್ಷೀರಾಬ್ಧೇರ್ಲಹರೀಭರೈರಿವ ಸುಧಾಪಙ್ಕಸ್ಯ ಪಿಣ್ಡೈರಿವ ।
ಪ್ರಾಲೇಯೈರಿವ ನಿರ್ಮಿತಂ ತವ ವಪುರ್ಧ್ಯಾಯನ್ತಿ ಯೇ ಶ್ರದ್ಧಯಾ
ಚಿತ್ತಾನ್ತರ್ನಿಹಿತಾರ್ತಿತಾಪವಿಪದಸ್ತೇ ಸಮ್ಪದಂ ಬಿಭ್ರತಿ ॥ 9 ॥
ಯೇ ಸಂಸ್ಮರನ್ತಿ ತರಲಾಂ ಸಹಸೋಲ್ಲಸನ್ತೀಂ
ತ್ವಾಂ ಗ್ರನ್ಥಿಪಞ್ಚಕಭಿದಂ ತರುಣಾರ್ಕಶೋಣಾಮ್ ।
ರಾಗಾರ್ಣವೇ ಬಹಲರಾಗಿಣಿ ಮಜ್ಜಯನ್ತೀಂ
ಕೃತ್ಸ್ನಂ ಜಗದ್ದಧತಿ ಚೇತಸಿ ತಾನ್ಮೃಗಾಕ್ಷ್ಯಃ ॥ 10 ॥
ಲಾಕ್ಷಾರಸಸ್ನಪಿತಪಙ್ಕಜತನ್ತುತನ್ವೀಂ
ಅನ್ತಃ ಸ್ಮರತ್ಯನುದಿನಂ ಭವತೀಂ ಭವಾನಿ ।
ಯಸ್ತಂ ಸ್ಮರಪ್ರತಿಮಮಪ್ರತಿಮಸ್ವರೂಪಾಃ
ನೇತ್ರೋತ್ಪಲೈರ್ಮೃಗದೃಶೋ ಭೃಶಮರ್ಚಯನ್ತಿ ॥ 11 ॥
ಸ್ತುಮಸ್ತ್ವಾಂ ವಾಚಮವ್ಯಕ್ತಾಂ ಹಿಮಕುನ್ದೇನ್ದುರೋಚಿಷಮ್ ।
ಕದಮ್ಬಮಾಲಾಂ ಬಿಭ್ರಾಣಾಮಾಪಾದತಲಲಮ್ಬಿನೀಮ್ ॥ 12 ॥
ಮೂರ್ಧ್ನೀನ್ದೋಃ ಸಿತಪಙ್ಕಜಾಸನಗತಾಂ ಪ್ರಾಲೇಯಪಾಣ್ಡುತ್ವಿಷಂ
ವರ್ಷನ್ತೀಮಮೃತಂ ಸರೋರುಹಭುವೋ ವಕ್ತ್ರೇಽಪಿ ರನ್ಧ್ರೇಽಪಿ ಚ ।
ಅಚ್ಛಿನ್ನಾ ಚ ಮನೋಹರಾ ಚ ಲಲಿತಾ ಚಾತಿಪ್ರಸನ್ನಾಪಿ ಚ
ತ್ವಾಮೇವಂ ಸ್ಮರತಃ ಸ್ಮರಾರಿದಯಿತೇ ವಾಕ್ಸರ್ವತೋ ವಲ್ಗತಿ ॥ 13 ॥
ದದಾತೀಷ್ಟಾನ್ಭೋಗಾನ್ ಕ್ಷಪಯತಿ ರಿಪೂನ್ಹನ್ತಿ ವಿಪದೋ
ದಹತ್ಯಾಧೀನ್ವ್ಯಾಧೀನ್ ಶಮಯತಿ ಸುಖಾನಿ ಪ್ರತನುತೇ ।
ಹಠಾದನ್ತರ್ದುಃಖಂ ದಲಯತಿ ಪಿನಷ್ಟೀಷ್ಟವಿರಹಂ
ಸಕೃದ್ಧ್ಯಾತಾ ದೇವೀ ಕಿಮಿವ ನಿರವದ್ಯಂ ನ ಕುರುತೇ ॥ 14 ॥
ಯಸ್ತ್ವಾಂ ಧ್ಯಾಯತಿ ವೇತ್ತಿ ವಿನ್ದತಿ ಜಪತ್ಯಾಲೋಕತೇ ಚಿನ್ತಯ-
-ತ್ಯನ್ವೇತಿ ಪ್ರತಿಪದ್ಯತೇ ಕಲಯತಿ ಸ್ತೌತ್ಯಾಶ್ರಯತ್ಯರ್ಚತಿ ।
ಯಶ್ಚ ತ್ರ್ಯಮ್ಬಕವಲ್ಲಭೇ ತವ ಗುಣಾನಾಕರ್ಣಯತ್ಯಾದರಾತ್
ತಸ್ಯ ಶ್ರೀರ್ನ ಗೃಹಾದಪೈತಿ ವಿಜಯಸ್ತಸ್ಯಾಗ್ರತೋ ಧಾವತಿ ॥ 15 ॥
ಕಿಂ ಕಿಂ ದುಃಖಂ ದನುಜದಲಿನಿ ಕ್ಷೀಯತೇ ನ ಸ್ಮೃತಾಯಾಂ
ಕಾ ಕಾ ಕೀರ್ತಿಃ ಕುಲಕಮಲಿನಿ ಖ್ಯಾಪ್ಯತೇ ನ ಸ್ತುತಾಯಾಮ್ ।
ಕಾ ಕಾ ಸಿದ್ಧಿಃ ಸುರವರನುತೇ ಪ್ರಾಪ್ಯತೇ ನಾರ್ಚಿತಾಯಾಂ
ಕಂ ಕಂ ಯೋಗಂ ತ್ವಯಿ ನ ಚಿನುತೇ ಚಿತ್ತಮಾಲಮ್ಬಿತಾಯಾಮ್ ॥ 16 ॥
ಯೇ ದೇವಿ ದುರ್ಧರಕೃತಾನ್ತಮುಖಾನ್ತರಸ್ಥಾಃ
ಯೇ ಕಾಲಿ ಕಾಲಘನಪಾಶನಿತಾನ್ತಬದ್ಧಾಃ ।
ಯೇ ಚಣ್ಡಿ ಚಣ್ಡಗುರುಕಲ್ಮಷಸಿನ್ಧುಮಗ್ನಾಃ
ತಾನ್ಪಾಸಿ ಮೋಚಯಸಿ ತಾರಯಸಿ ಸ್ಮೃತೈವ ॥ 17 ॥
ಲಕ್ಷ್ಮೀವಶೀಕರಣಚೂರ್ಣಸಹೋದರಾಣಿ
ತ್ವತ್ಪಾದಪಙ್ಕಜರಜಾಂಸಿ ಚಿರಂ ಜಯನ್ತಿ ।
ಯಾನಿ ಪ್ರಣಾಮಮಿಲಿತಾನಿ ನೃಣಾಂ ಲಲಾಟೇ
ಲುಮ್ಪನ್ತಿ ದೈವಲಿಖಿತಾನಿ ದುರಕ್ಷರಾಣಿ ॥ 18 ॥
ರೇ ಮೂಢಾಃ ಕಿಮಯಂ ವೃಥೈವ ತಪಸಾ ಕಾಯಃ ಪರಿಕ್ಲಿಶ್ಯತೇ
ಯಜ್ಞೈರ್ವಾ ಬಹುದಕ್ಷಿಣೈಃ ಕಿಮಿತರೇ ರಿಕ್ತೀಕ್ರಿಯನ್ತೇ ಗೃಹಾಃ ।
ಭಕ್ತಿಶ್ಚೇದವಿನಾಶಿನೀ ಭಗವತೀಪಾದದ್ವಯೀ ಸೇವ್ಯತಾಂ
ಉನ್ನಿದ್ರಾಮ್ಬುರುಹಾತಪತ್ರಸುಭಗಾ ಲಕ್ಷ್ಮೀಃ ಪುರೋ ಧಾವತಿ ॥ 19 ॥
ಯಾಚೇ ನ ಕಞ್ಚನ ನ ಕಞ್ಚನ ವಞ್ಚಯಾಮಿ
ಸೇವೇ ನ ಕಞ್ಚನ ನಿರಸ್ತಸಮಸ್ತದೈನ್ಯಃ ।
ಶ್ಲಕ್ಷ್ಣಂ ವಸೇ ಮಧುರಮದ್ಮಿ ಭಜೇ ವರಸ್ತ್ರೀಃ
ದೇವೀ ಹೃದಿ ಸ್ಫುರತಿ ಮೇ ಕುಲಕಾಮಧೇನುಃ ॥ 20 ॥
ನಮಾಮಿ ಯಾಮಿನೀನಾಥಲೇಖಾಲಙ್ಕೃತಕುನ್ತಲಾಮ್ ।
ಭವಾನೀಂ ಭವಸನ್ತಾಪನಿರ್ವಾಪಣಸುಧಾನದೀಮ್ ॥ 21 ॥
ಇತಿ ಶ್ರೀಕಾಳಿದಾಸ ವಿರಚಿತ ಪಞ್ಚಸ್ತವ್ಯಾಂ ತೃತೀಯಃ ಘಟಸ್ತವಃ ।
