ಬ್ರಹ್ಮೋವಾಚ
ಶೃಣು ವತ್ಸ ಪ್ರವಕ್ಷ್ಯಾಮಿ ಆದ್ಯಾಸ್ತೋತ್ರಂ ಮಹಾಫಲಮ್ ।
ಯಃ ಪಠೇತ್ ಸತತಂ ಭಕ್ತ್ಯಾ ಸ ಏವ ವಿಷ್ಣುವಲ್ಲಭಃ ॥ 1 ॥
ಮೃತ್ಯುರ್ವ್ಯಾಧಿಭಯಂ ತಸ್ಯ ನಾಸ್ತಿ ಕಿಞ್ಚಿತ್ ಕಲೌ ಯುಗೇ ।
ಅಪುತ್ರಾ ಲಭತೇ ಪುತ್ರಂ ತ್ರಿಪಕ್ಷಂ ಶ್ರವಣಂ ಯದಿ ॥ 2 ॥
ದ್ವೌ ಮಾಸೌ ಬನ್ಧನಾನ್ಮುಕ್ತಿ ವಿಪ್ರವಕ್ತ್ರಾತ್ ಶ್ರುತಂ ಯದಿ ।
ಮೃತವತ್ಸಾ ಜೀವವತ್ಸಾ ಷಣ್ಮಾಸಂ ಶ್ರವಣಂ ಯದಿ ॥ 3 ॥
ನೌಕಾಯಾಂ ಸಙ್ಕಟೇ ಯುದ್ಧೇ ಪಠನಾಜ್ಜಯಮಾಪ್ನುಯಾತ್ ।
ಲಿಖಿತ್ವಾ ಸ್ಥಾಪಯೇದ್ಗೇಹೇ ನಾಗ್ನಿಚೌರಭಯಂ ಕ್ವಚಿತ್ ॥ 4 ॥
ರಾಜಸ್ಥಾನೇ ಜಯೀ ನಿತ್ಯಂ ಪ್ರಸನ್ನಾಃ ಸರ್ವದೇವತಾ ।
ಓಂ ಹ್ರೀಮ್ ।
ಬ್ರಹ್ಮಾಣೀ ಬ್ರಹ್ಮಲೋಕೇ ಚ ವೈಕುಣ್ಠೇ ಸರ್ವಮಙ್ಗಳಾ ॥ 5 ॥
ಇನ್ದ್ರಾಣೀ ಅಮರಾವತ್ಯಾಮಮ್ಬಿಕಾ ವರುಣಾಲಯೇ ।
ಯಮಾಲಯೇ ಕಾಲರೂಪಾ ಕುಬೇರಭವನೇ ಶುಭಾ ॥ 6 ॥
ಮಹಾನನ್ದಾಗ್ನಿಕೋಣೇ ಚ ವಾಯವ್ಯಾಂ ಮೃಗವಾಹಿನೀ ।
ನೈರೃತ್ಯಾಂ ರಕ್ತದನ್ತಾ ಚ ಐಶಾನ್ಯಾಂ ಶೂಲಧಾರಿಣೀ ॥ 7 ॥
ಪಾತಾಳೇ ವೈಷ್ಣವೀರೂಪಾ ಸಿಂಹಲೇ ದೇವಮೋಹಿನೀ ।
ಸುರಸಾ ಚ ಮಣಿದ್ವಿಪೇ ಲಙ್ಕಾಯಾಂ ಭದ್ರಕಾಳಿಕಾ ॥ 8 ॥
ರಾಮೇಶ್ವರೀ ಸೇತುಬನ್ಧೇ ವಿಮಲಾ ಪುರುಷೋತ್ತಮೇ ।
ವಿರಜಾ ಔಡ್ರದೇಶೇ ಚ ಕಾಮಾಕ್ಷ್ಯಾ ನೀಲಪರ್ವತೇ ॥ 9 ॥
ಕಾಳಿಕಾ ವಙ್ಗದೇಶೇ ಚ ಅಯೋಧ್ಯಾಯಾಂ ಮಹೇಶ್ವರೀ ।
ವಾರಾಣಸ್ಯಾಮನ್ನಪೂರ್ಣಾ ಗಯಾಕ್ಷೇತ್ರೇ ಗಯೇಶ್ವರೀ ॥ 10 ॥
ಕುರುಕ್ಷೇತ್ರೇ ಭದ್ರಕಾಳೀ ವ್ರಜೇ ಕಾತ್ಯಾಯನೀ ಪರಾ ।
ದ್ವಾರಕಾಯಾಂ ಮಹಾಮಾಯಾ ಮಥುರಾಯಾಂ ಮಹೇಶ್ವರೀ ॥ 11 ॥
ಕ್ಷುಧಾ ತ್ವಂ ಸರ್ವಭೂತಾನಾಂ ವೇಲಾ ತ್ವಂ ಸಾಗರಸ್ಯ ಚ ।
ನವಮೀ ಶುಕ್ಲಪಕ್ಷಸ್ಯ ಕೃಷ್ಣಸ್ಯೈಕಾದಶೀ ಪರಾ ॥ 12 ॥
ದಕ್ಷಸಾ ದುಹಿತಾ ದೇವೀ ದಕ್ಷಯಜ್ಞವಿನಾಶಿನೀ ।
ರಾಮಸ್ಯ ಜಾನಕೀ ತ್ವಂ ಹಿ ರಾವಣಧ್ವಂಸಕಾರಿಣೀ ॥ 13 ॥
ಚಣ್ಡಮುಣ್ಡವಧೇ ದೇವೀ ರಕ್ತಬೀಜವಿನಾಶಿನೀ ।
ನಿಶುಮ್ಭಶುಮ್ಭಮಥಿನೀ ಮಧುಕೈಟಭಘಾತಿನೀ ॥ 14 ॥
ವಿಷ್ಣುಭಕ್ತಿಪ್ರದಾ ದುರ್ಗಾ ಸುಖದಾ ಮೋಕ್ಷದಾ ಸದಾ ।
ಆದ್ಯಾಸ್ತವಮಿಮಂ ಪುಣ್ಯಂ ಯಃ ಪಠೇತ್ ಸತತಂ ನರಃ ॥ 15 ॥
ಸರ್ವಜ್ವರಭಯಂ ನ ಸ್ಯಾತ್ ಸರ್ವವ್ಯಾಧಿವಿನಾಶನಮ್ ।
ಕೋಟಿತೀರ್ಥಫಲಂ ತಸ್ಯ ಲಭತೇ ನಾತ್ರ ಸಂಶಯಃ ॥ 16 ॥
ಜಯಾ ಮೇ ಚಾಗ್ರತಃ ಪಾತು ವಿಜಯಾ ಪಾತು ಪೃಷ್ಠತಃ ।
ನಾರಾಯಣೀ ಶೀರ್ಷದೇಶೇ ಸರ್ವಾಙ್ಗೇ ಸಿಂಹವಾಹಿನೀ ॥ 17 ॥
ಶಿವದೂತೀ ಉಗ್ರಚಣ್ಡಾ ಪ್ರತ್ಯಙ್ಗೇ ಪರಮೇಶ್ವರೀ ।
ವಿಶಾಲಾಕ್ಷೀ ಮಹಾಮಾಯಾ ಕೌಮಾರೀ ಶಙ್ಖಿನೀ ಶಿವಾ ॥ 18 ॥
ಚಕ್ರಿಣೀ ಜಯದಾತ್ರೀ ಚ ರಣಮತ್ತಾ ರಣಪ್ರಿಯಾ ।
ದುರ್ಗಾ ಜಯನ್ತೀ ಕಾಳೀ ಚ ಭದ್ರಕಾಳೀ ಮಹೋದರೀ ॥ 19 ॥
ನಾರಸಿಂಹೀ ಚ ವಾರಾಹೀ ಸಿದ್ಧಿದಾತ್ರೀ ಸುಖಪ್ರದಾ ।
ಭಯಙ್ಕರೀ ಮಹಾರೌದ್ರೀ ಮಹಾಭಯವಿನಾಶಿನೀ ॥ 20 ॥
ಇತಿ ಶ್ರೀಬ್ರಹ್ಮಯಾಮಲೇ ಬ್ರಹ್ಮನಾರದಸಂವಾದೇ ಶ್ರೀ ಆದ್ಯಾ ಸ್ತೋತ್ರಮ್ ॥
