ಶ್ರೀಸದಾಶಿವ ಉವಾಚ
ಶೃಣು ದೇವಿ ಜಗದ್ವನ್ದ್ಯೇ ಸ್ತೋತ್ರಮೇತದನುತ್ತಮಮ್ ।
ಪಠನಾಚ್ಛ್ರವಣಾದ್ಯಸ್ಯ ಸರ್ವಸಿದ್ಧೀಶ್ವರೋ ಭವೇತ್ ॥ 1 ॥
ಅಸೌಭಾಗ್ಯಪ್ರಶಮನಂ ಸುಖಸಮ್ಪದ್ವಿವರ್ಧನಮ್ ।
ಅಕಾಲಮೃತ್ಯುಹರಣಂ ಸರ್ವಾಪದ್ವಿನಿವಾರಣಮ್ ॥ 2 ॥
ಶ್ರೀಮದಾದ್ಯಾಕಾಳಿಕಾಯಾಃ ಸುಖಸಾನ್ನಿಧ್ಯಕಾರಣಮ್ ।
ಸ್ತವಸ್ಯಾಸ್ಯ ಪ್ರಸೀದೇನ ತ್ರಿಪುರಾರಿರಹಂ ಪ್ರಿಯೇ ॥ 3 ॥
ಸ್ತೋತ್ರಸ್ಯಾಸ್ಯ ಋಷಿರ್ದೇವಿ ಸದಾಶಿವ ಉದಾಹೃತಃ ।
ಛನ್ದೋಽನುಷ್ಟುಬ್ದೇವತಾದ್ಯಾ ಕಾಳಿಕಾ ಪರಿಕೀರ್ತಿತಾ ।
ಧರ್ಮಕಾಮಾರ್ಥಮೋಕ್ಷೇಷು ವಿನಿಯೋಗಃ ಪ್ರಕೀರ್ತಿತಃ ॥ 4 ॥
ಅಥ ಸ್ತೋತ್ರಮ್
ಹ್ರೀಂ ಕಾಳೀ ಶ್ರೀಂ ಕರಾಳೀ ಚ ಕ್ರೀಂ ಕಳ್ಯಾಣೀ ಕಳಾವತೀ ।
ಕಮಲಾ ಕಲಿದರ್ಪಘ್ನೀ ಕಪರ್ದೀಶಕೃಪಾನ್ವಿತಾ ॥ 5 ॥
ಕಾಳಿಕಾ ಕಾಲಮಾತಾ ಚ ಕಾಲಾನಲಸಮದ್ಯುತಿಃ ।
ಕಪರ್ದಿನೀ ಕರಾಳಾಸ್ಯಾ ಕರುಣಾಮೃತಸಾಗರಾ ॥ 6 ॥
ಕೃಪಾಮಯೀ ಕೃಪಾಧಾರಾ ಕೃಪಾಪಾರಾ ಕೃಪಾಗಮಾ ।
ಕೃಶಾನುಃ ಕಪಿಲಾ ಕೃಷ್ಣಾ ಕೃಷ್ಣಾನನ್ದವಿವರ್ಧಿನೀ ॥ 7 ॥
ಕಾಲರಾತ್ರಿಃ ಕಾಮರೂಪಾ ಕಾಮಪಾಶವಿಮೋಚಿನೀ ।
ಕಾದಮ್ಬಿನೀ ಕಳಾಧಾರಾ ಕಲಿಕಲ್ಮಷನಾಶಿನೀ ॥ 8 ॥
ಕುಮಾರೀಪೂಜನಪ್ರೀತಾ ಕುಮಾರೀಪೂಜಕಾಲಯಾ ।
ಕುಮಾರೀಭೋಜನಾನನ್ದಾ ಕುಮಾರೀರೂಪಧಾರಿಣೀ ॥ 9 ॥
ಕದಮ್ಬವನಸಞ್ಚಾರಾ ಕದಮ್ಬವನವಾಸಿನೀ ।
ಕದಮ್ಬಪುಷ್ಪಸನ್ತೋಷಾ ಕದಮ್ಬಪುಷ್ಪಮಾಲಿನೀ ॥ 10 ॥
ಕಿಶೋರೀ ಕಲಕಣ್ಠಾ ಚ ಕಲನಾದನಿನಾದಿನೀ ।
ಕಾದಮ್ಬರೀಪಾನರತಾ ತಥಾ ಕಾದಮ್ಬರೀಪ್ರಿಯಾ ॥ 11 ॥
ಕಪಾಲಪಾತ್ರನಿರತಾ ಕಙ್ಕಾಲಮಾಲ್ಯಧಾರಿಣೀ ।
ಕಮಲಾಸನಸನ್ತುಷ್ಟಾ ಕಮಲಾಸನವಾಸಿನೀ ॥ 12 ॥
ಕಮಲಾಲಯಮಧ್ಯಸ್ಥಾ ಕಮಲಾಮೋದಮೋದಿನೀ ।
ಕಲಹಂಸಗತಿಃ ಕ್ಲೈಬ್ಯನಾಶಿನೀ ಕಾಮರೂಪಿಣೀ ॥ 13 ॥
ಕಾಮರೂಪಕೃತಾವಾಸಾ ಕಾಮಪೀಠವಿಲಾಸಿನೀ ।
ಕಮನೀಯಾ ಕಲ್ಪಲತಾ ಕಮನೀಯವಿಭೂಷಣಾ ॥ 14 ॥
ಕಮನೀಯಗುಣಾರಾಧ್ಯಾ ಕೋಮಲಾಙ್ಗೀ ಕೃಶೋದರೀ ।
ಕಾರಣಾಮೃತಸನ್ತೋಷಾ ಕಾರಣಾನನ್ದಸಿದ್ಧಿದಾ ॥ 15 ॥
ಕಾರಣಾನನ್ದಜಾಪೇಷ್ಟಾ ಕಾರಣಾರ್ಚನಹರ್ಷಿತಾ ।
ಕಾರಣಾರ್ಣವಸಮ್ಮಗ್ನಾ ಕಾರಣವ್ರತಪಾಲಿನೀ ॥ 16 ॥
ಕಸ್ತೂರೀಸೌರಭಾಮೋದಾ ಕಸ್ತೂರೀತಿಲಕೋಜ್ಜ್ವಲಾ ।
ಕಸ್ತೂರೀಪೂಜನರತಾ ಕಸ್ತೂರೀಪೂಜಕಪ್ರಿಯಾ ॥ 17 ॥
ಕಸ್ತೂರೀದಾಹಜನನೀ ಕಸ್ತೂರೀಮೃಗತೋಷಿಣೀ ।
ಕಸ್ತೂರೀಭೋಜನಪ್ರೀತಾ ಕರ್ಪೂರಾಮೋದಮೋದಿತಾ ॥ 18 ॥
ಕರ್ಪೂರಮಾಲಾಭರಣಾ ಕರ್ಪೂರಚನ್ದನೋಕ್ಷಿತಾ ।
ಕರ್ಪೂರಕಾರಣಾಹ್ಲಾದಾ ಕರ್ಪೂರಾಮೃತಪಾಯಿನೀ ॥ 19 ॥
ಕರ್ಪೂರಸಾಗರಸ್ನಾತಾ ಕರ್ಪೂರಸಾಗರಾಲಯಾ ।
ಕೂರ್ಚಬೀಜಜಪಪ್ರೀತಾ ಕೂರ್ಚಜಾಪಪರಾಯಣಾ ॥ 20 ॥
ಕುಲೀನಾ ಕೌಲಿಕಾರಾಧ್ಯಾ ಕೌಲಿಕಪ್ರಿಯಕಾರಿಣೀ ।
ಕುಲಾಚಾರಾ ಕೌತುಕಿನೀ ಕುಲಮಾರ್ಗಪ್ರದರ್ಶಿನೀ ॥ 21 ॥
ಕಾಶೀಶ್ವರೀ ಕಷ್ಟಹರ್ತ್ರೀ ಕಾಶೀಶವರದಾಯಿನೀ ।
ಕಾಶೀಶ್ವರಕೃತಾಮೋದಾ ಕಾಶೀಶ್ವರಮನೋರಮಾ ॥ 22 ॥
ಕಲಮಞ್ಜೀರಚರಣಾ ಕ್ವಣತ್ಕಾಞ್ಚೀವಿಭೂಷಣಾ ।
ಕಾಞ್ಚನಾದ್ರಿಕೃತಾಗಾರಾ ಕಾಞ್ಚನಾಚಲಕೌಮುದೀ ॥ 23 ॥
ಕಾಮಬೀಜಜಪಾನನ್ದಾ ಕಾಮಬೀಜಸ್ವರೂಪಿಣೀ ।
ಕುಮತಿಘ್ನೀ ಕುಲೀನಾರ್ತಿನಾಶಿನೀ ಕುಲಕಾಮಿನೀ ॥ 24 ॥
ಕ್ರೀಂ ಹ್ರೀಂ ಶ್ರೀಂ ಮನ್ತ್ರವರ್ಣೇನ ಕಾಲಕಣ್ಟಕಘಾತಿನೀ ।
ಇತ್ಯಾದ್ಯಾಕಾಳಿಕಾದೇವ್ಯಾಃ ಶತನಾಮ ಪ್ರಕೀರ್ತಿತಮ್ ॥ 25 ॥
ಕಕಾರಕೂಟಘಟಿತಂ ಕಾಳೀರೂಪಸ್ವರೂಪಕಮ್ ।
ಪೂಜಾಕಾಲೇ ಪಠೇದ್ಯಸ್ತು ಕಾಳಿಕಾಕೃತಮಾನಸಃ ॥ 26 ॥
ಮನ್ತ್ರಸಿದ್ಧಿರ್ಭವೇದಾಶು ತಸ್ಯ ಕಾಳೀ ಪ್ರಸೀದತಿ ।
ಬುದ್ಧಿಂ ವಿದ್ಯಾಂ ಚ ಲಭತೇ ಗುರೋರಾದೇಶಮಾತ್ರತಃ ॥ 27 ॥
ಧನವಾನ್ ಕೀರ್ತಿಮಾನ್ ಭೂಯಾದ್ದಾನಶೀಲೋ ದಯಾನ್ವಿತಃ ।
ಪುತ್ರಪೌತ್ರಸುಖೈಶ್ವರ್ಯೈರ್ಮೋದತೇ ಸಾಧಕೋ ಭುವಿ ॥ 28 ॥
ಭೌಮಾವಾಸ್ಯಾನಿಶಾಭಾಗೇ ಮಪಞ್ಚಕಸಮನ್ವಿತಃ ।
ಪೂಜಯಿತ್ವಾ ಮಹಾಕಾಳೀಮಾದ್ಯಾಂ ತ್ರಿಭುವನೇಶ್ವರೀಮ್ ॥ 29 ॥
ಪಠಿತ್ವಾ ಶತನಾಮಾನಿ ಸಾಕ್ಷಾತ್ಕಾಳೀಮಯೋ ಭವೇತ್ ।
ನಾಸಾಧ್ಯಂ ವಿದ್ಯತೇ ತಸ್ಯ ತ್ರಿಷು ಲೋಕೇಷು ಕಿಞ್ಚನ ॥ 30 ॥
ವಿದ್ಯಾಯಾಂ ವಾಕ್ಪತಿಃ ಸಾಕ್ಷಾತ್ ಧನೇ ಧನಪತಿರ್ಭವೇತ್ ।
ಸಮುದ್ರ ಇವ ಗಾಮ್ಭೀರ್ಯೇ ಬಲೇ ಚ ಪವನೋಪಮಃ ॥ 31 ॥
ತಿಗ್ಮಾಂಶುರಿವ ದುಷ್ಪ್ರೇಕ್ಷ್ಯಃ ಶಶಿವಚ್ಛುಭದರ್ಶನಃ ।
ರೂಪೇ ಮೂರ್ತಿಧರಃ ಕಾಮೋ ಯೋಷಿತಾಂ ಹೃದಯಙ್ಗಮಃ ॥ 32 ॥
ಸರ್ವತ್ರ ಜಯಮಾಪ್ನೋತಿ ಸ್ತವಸ್ಯಾಸ್ಯ ಪ್ರಸಾದತಃ ।
ಯಂ ಯಂ ಕಾಮಂ ಪುರಸ್ಕೃತ್ಯ ಸ್ತೋತ್ರಮೇತದುದೀರಯೇತ್ ॥ 33 ॥
ತಂ ತಂ ಕಾಮಮವಾಪ್ನೋತಿ ಶ್ರೀಮದಾದ್ಯಾಪ್ರಸಾದತಃ ।
ರಣೇ ರಾಜಕುಲೇ ದ್ಯೂತೇ ವಿವಾದೇ ಪ್ರಾಣಸಙ್ಕಟೇ ॥ 34 ॥
ದಸ್ಯುಗ್ರಸ್ತೇ ಗ್ರಾಮದಾಹೇ ಸಿಂಹವ್ಯಾಘ್ರಾವೃತೇ ತಥಾ ।
ಅರಣ್ಯೇ ಪ್ರಾನ್ತರೇ ದುರ್ಗೇ ಗ್ರಹರಾಜಭಯೇಽಪಿ ವಾ ॥ 35 ॥
ಜ್ವರದಾಹೇ ಚಿರವ್ಯಾಧೌ ಮಹಾರೋಗಾದಿಸಙ್ಕುಲೇ ।
ಬಾಲಗ್ರಹಾದಿ ರೋಗೇ ಚ ತಥಾ ದುಃಸ್ವಪ್ನದರ್ಶನೇ ॥ 36 ॥
ದುಸ್ತರೇ ಸಲಿಲೇ ವಾಪಿ ಪೋತೇ ವಾತವಿಪದ್ಗತೇ ।
ವಿಚಿನ್ತ್ಯ ಪರಮಾಂ ಮಾಯಾಮಾದ್ಯಾಂ ಕಾಳೀಂ ಪರಾತ್ಪರಾಮ್ ॥ 37 ॥
ಯಃ ಪಠೇಚ್ಛತನಾಮಾನಿ ದೃಢಭಕ್ತಿಸಮನ್ವಿತಃ ।
ಸರ್ವಾಪದ್ಭ್ಯೋ ವಿಮುಚ್ಯೇತ ದೇವಿ ಸತ್ಯಂ ನ ಸಂಶಯಃ ॥ 38 ॥
ನ ಪಾಪೇಭ್ಯೋ ಭಯಂ ತಸ್ಯ ನ ರೋಗೋಭ್ಯೋ ಭಯಂ ಕ್ವಚಿತ್ ।
ಸರ್ವತ್ರ ವಿಜಯಸ್ತಸ್ಯ ನ ಕುತ್ರಾಪಿ ಪರಾಭವಃ ॥ 39 ॥
ತಸ್ಯ ದರ್ಶನಮಾತ್ರೇಣ ಪಲಾಯನ್ತೇ ವಿಪದ್ಗಣಾಃ ।
ಸ ವಕ್ತಾ ಸರ್ವಶಾಸ್ತ್ರಾಣಾಂ ಸ ಭೋಕ್ತಾ ಸರ್ವಸಮ್ಪದಾಮ್ ॥ 40 ॥
ಸ ಕರ್ತಾ ಜಾತಿಧರ್ಮಾಣಾಂ ಜ್ಞಾತೀನಾಂ ಪ್ರಭುರೇವ ಸಃ ।
ವಾಣೀ ತಸ್ಯ ವಸೇದ್ವಕ್ತ್ರೇ ಕಮಲಾ ನಿಶ್ಚಲಾ ಗೃಹೇ ॥ 41 ॥
ತನ್ನಾಮ್ನಾ ಮಾನವಾಃ ಸರ್ವೇ ಪ್ರಣಮನ್ತಿ ಸಸಮ್ಭ್ರಮಾಃ ।
ದೃಷ್ಟ್ಯಾ ತಸ್ಯ ತೃಣಾಯನ್ತೇ ಹ್ಯಣಿಮಾದ್ಯಷ್ಟಸಿದ್ಧಯಃ ॥ 42 ॥
ಆದ್ಯಾಕಾಳೀಸ್ವರೂಪಾಖ್ಯಂ ಶತನಾಮ ಪ್ರಕೀರ್ತಿತಮ್ ।
ಅಷ್ಟೋತ್ತರಶತಾವೃತ್ಯಾ ಪುರಶ್ಚರ್ಯಾಽಸ್ಯ ಗೀಯತೇ ॥ 43 ॥
ಪುರಸ್ಕ್ರಿಯಾನ್ವಿತಂ ಸ್ತೋತ್ರಂ ಸರ್ವಾಭೀಷ್ಟಫಲಪ್ರದಮ್ ।
ಶತನಾಮಸ್ತುತಿಮಿಮಾಮಾದ್ಯಾಕಾಳೀಸ್ವರೂಪಿಣೀಮ್ ॥ 44 ॥
ಪಠೇದ್ವಾ ಪಾಠಯೇದ್ವಾಪಿ ಶೃಣುಯಾಚ್ಛ್ರಾವಯೇದಪಿ ।
ಸರ್ವಪಾಪವಿನಿರ್ಮುಕ್ತೋ ಬ್ರಹ್ಮಸಾಯುಜ್ಯಮಾಪ್ನುಯಾತ್ ॥ 45 ॥
ಇತಿ ಮಹಾನಿರ್ವಾಣತನ್ತ್ರೇ ಸಪ್ತಮೋಲ್ಲಾಸಾನ್ತರ್ಗತಂ ಶ್ರೀ ಆದ್ಯಾ ಕಾಳಿಕಾ ಶತನಾಮ ಸ್ತೋತ್ರಮ್ ॥
