(ప్రహర్షణీవృత్తమ్ -)
తజ్జ్ఞానం ప్రశమకరం యదిన్ద్రియాణాం
తజ్జ్ఞేయం యదుపనిషత్సు నిశ్చితార్థమ్ ।
తే ధన్యా భువి పరమార్థనిశ్చితేహాః
శేషాస్తు భ్రమనిలయే పరిభ్రమన్తః ॥ 1॥
(వసన్తతిలకావృత్తమ్ -)
ఆదౌ విజిత్య విషయాన్మదమోహరాగ-
ద్వేషాదిశత్రుగణమాహృతయోగరాజ్యాః ।
జ్ఞాత్వా మతం సమనుభూయపరాత్మవిద్యా-
కాన్తాసుఖం వనగృహే విచరన్తి ధన్యాః ॥ 2॥
త్యక్త్వా గృహే రతిమధోగతిహేతుభూతామ్
ఆత్మేచ్ఛయోపనిషదర్థరసం పిబన్తః ।
వీతస్పృహా విషయభోగపదే విరక్తా
ధన్యాశ్చరన్తి విజనేషు విరక్తసఙ్గాః ॥ 3॥
త్యక్త్వా మమాహమితి బన్ధకరే పదే ద్వే
మానావమానసదృశాః సమదర్శినశ్చ ।
కర్తారమన్యమవగమ్య తదర్పితాని
కుర్వన్తి కర్మపరిపాకఫలాని ధన్యాః ॥ 4॥
త్యక్త్వీషణాత్రయమవేక్షితమోక్షమర్గా
భైక్షామృతేన పరికల్పితదేహయాత్రాః ।
జ్యోతిః పరాత్పరతరం పరమాత్మసఞ్జ్ఞం
ధన్యా ద్విజారహసి హృద్యవలోకయన్తి ॥ 5॥
నాసన్న సన్న సదసన్న మహసన్నచాణు
న స్త్రీ పుమాన్న చ నపుంసకమేకబీజమ్ ।
యైర్బ్రహ్మ తత్సమముపాసితమేకచిత్తైః
ధన్యా విరేజురిత్తరేభవపాశబద్ధాః ॥ 6॥
అజ్ఞానపఙ్కపరిమగ్నమపేతసారం
దుఃఖాలయం మరణజన్మజరావసక్తమ్ ।
సంసారబన్ధనమనిత్యమవేక్ష్య ధన్యా
జ్ఞానాసినా తదవశీర్య వినిశ్చయన్తి ॥ 7॥
శాన్తైరనన్యమతిభిర్మధురస్వభావైః
ఏకత్వనిశ్చితమనోభిరపేతమోహైః ।
సాకం వనేషు విజితాత్మపదస్వరుపం
తద్వస్తు సమ్యగనిశం విమృశన్తి ధన్యాః ॥ 8॥
(మాలినీవృత్తమ్ -)
అహిమివ జనయోగం సర్వదా వర్జయేద్యః
కుణపమివ సునారీం త్యక్తుకామో విరాగీ ।
విషమివ విషయాన్యో మన్యమానో దురన్తాన్
జయతి పరమహంసో ముక్తిభావం సమేతి ॥ 9॥
(శార్దూలవిక్రీడితవృత్తమ్ -)
సమ్పూర్ణం జగదేవ నన్దనవనం సర్వేఽపి కల్పద్రుమా
గాఙ్గం వరి సమస్తవారినివహః పుణ్యాః సమస్తాః క్రియాః ।
వాచః ప్రాకృతసంస్కృతాః శ్రుతిశిరోవారాణసీ మేదినీ
సర్వావస్థితిరస్య వస్తువిషయా దృష్టే పరబ్రహ్మణి ॥ 10॥
॥ ఇతి శ్రీమద్ శఙ్కరాచార్యవిరచితం ధన్యాష్టకం సమాప్తమ్ ॥
