భగవతి తవ తీరే నీరమాత్రాశనోఽహమ్
విగతవిషయతృష్ణః కృష్ణమారాధయామి ।
సకల కలుషభఙ్గే స్వర్గసోపానసఙ్గే
తరలతరతరఙ్గే దేవి గఙ్గే ప్రసీద ॥ 1 ॥

భగవతి భవలీలా మౌళిమాలే తవామ్భః
కణమణుపరిమాణం ప్రాణినో యే స్పృశన్తి ।
అమరనగరనారీ చామర గ్రాహిణీనాం
విగత కలికలఙ్కాతఙ్కమఙ్కే లుఠన్తి ॥ 2 ॥

బ్రహ్మాణ్డం ఖణ్డయన్తీ హరశిరసి జటావల్లిముల్లాసయన్తీ
స్వర్లోకాదాపతన్తీ కనకగిరిగుహాగణ్డశైలాత్ స్ఖలన్తీ ।
క్షోణీపృష్ఠే లుఠన్తీ దురితచయచమూర్నిర్భరం భర్త్సయన్తీ
పాథోధిం పూరయన్తీ సురనగరసరిత్పావనీ నః పునాతు ॥ 3 ॥

మజ్జన్మాతఙ్గ కుమ్భచ్యుత మదమదిరామోదమత్తాలిజాలం
స్నానైః సిద్ధాఙ్గనానాం కుచయుగ విలసత్కుఙ్కుమాసఙ్గపిఙ్గమ్ ।
సాయం ప్రాతర్మునీనాం కుశకుసుమచయైశ్ఛిన్నతీరస్థనీరం
పాయాన్నో గాఙ్గమమ్భః కరికలభ కరాక్రాన్త రఙ్గస్తరఙ్గమ్ ॥ 4 ॥

ఆదావాది పితామహస్య నియమ వ్యాపార పాత్రే జలం
పశ్చాత్పన్నగశాయినో భగవతః పాదోదకం పావనమ్ ।
భూయః శమ్భుజటావిభూషణ మణిర్జహ్నోర్మహర్షేరియం
కన్యా కల్మషనాశినీ భగవతీ భాగీరథీ దృశ్యతే ॥ 5 ॥

శైలేన్ద్రాదవతారిణీ నిజజలే మజ్జజ్జనోత్తారిణీ
పారావారవిహారిణీ భవభయశ్రేణీ సముత్సారిణీ ।
శేషాఙ్గైరనుకారిణీ హరశిరోవల్లీదళాకారిణీ
కాశీప్రాన్తవిహారిణీ విజయతే గఙ్గా మనోహారిణీ ॥ 6 ॥

కుతో వీచిర్వీచిస్తవ యది గతా లోచనపథం
త్వమాపీతా పీతామ్బరపురవాసం వితరసి ।
త్వదుత్సఙ్గే గఙ్గే పతతి యది కాయస్తనుభృతాం
తదా మాతః శాన్తక్రతవపదలాభోఽప్యతిలఘుః ॥ 7 ॥

గఙ్గే త్రైలోక్యసారే సకలసురవధూధౌతవిస్తీర్ణతోయే
పూర్ణబ్రహ్మస్వరూపే హరిచరణరజోహారిణి స్వర్గమార్గే ।
ప్రాయశ్చితం యది స్యాత్తవ జలకణికా బ్రహ్మహత్యాది పాపే
కస్త్వాం స్తోతుం సమర్థః త్రిజగదఘహరే దేవి గఙ్గే ప్రసీద ॥ 8 ॥

మాతర్జాహ్నవీ శమ్భుసఙ్గమిలితే మౌళౌ నిధాయాఞ్జలిం
త్వత్తీరే వపుషోఽవసానసమయే నారాయణాఙ్ఘ్రిద్వయమ్ ।
సానన్దం స్మరతో భవిష్యతి మమ ప్రాణప్రయాణోత్సవే
భూయాద్భక్తిరవిచ్యుతా హరిహరాద్వైతాత్మికా శాశ్వతీ ॥ 9 ॥

గఙ్గాష్టకమిదం పుణ్యం యః పఠేత్ప్రయతో నరః ।
సర్వపాపవినిర్ముక్తో విష్ణులోకం స గచ్ఛతి ॥ 10 ॥