రామానుజాయ మునయే నమ ఉక్తి మాత్రం
కామాతురోఽపి కుమతిః కలయన్నభీక్షమ్ ।
యామామనన్తి యమినాం భగవజ్జనానాం
తామేవ విన్దతి గతిం తమసః పరస్తాత్ ॥ 1 ॥

సోమావచూడసురశేఖరదుష్కరేణ
కామాతిగోఽపి తపసా క్షపయన్నఘాని ।
రామానుజాయ మునయే నమ ఇత్యనుక్త్వా
కోవా మహీసహచరే కురుతేఽనురాగమ్ ॥ 2 ॥

రామానుజాయ నమ ఇత్యసకృద్గృణీతే
యో మాన మాత్సర మదస్మర దూషితోఽపి ।
ప్రేమాతురః ప్రియతమామపహాయ పద్మాం
భూమా భుజఙ్గశయనస్తమనుప్రయాతి ॥ 3 ॥

వామాలకానయనవాగురికాగృహీతం
క్షేమాయ కిఞ్చిదపి కర్తుమనీహమానమ్ ।
రామానుజో యతిపతిర్యది నేక్షతే మాం
మా మామకోఽయమితి ముఞ్చతి మాధవోఽపి ॥ 4 ॥

రామానుజేతి యదితం విదితం జగత్యాం
నామీపి న శ్రుతిసమీపముపైతి యేషామ్ ।
మా మా మదీయ ఇతి సద్భిరుపేక్షితాస్తే
కామానువిద్ధమనసో నిపతన్త్యధోఽధః ॥ 5 ॥

నామానుకీర్త్య నరకార్తిహరం యదీయం
వ్యోమాధిరోహతి పదం సకలోఽపి లోకః ।
రామానుజో యతిపతిర్యది నావిరాసీత్
కో మాదృశః ప్రభవితా భవముత్తరీతుమ్ ॥ 6 ॥

సీమామహీధ్రపరిధిం పృథివీమవాప్తుం
వైమానికేశ్వరపురీమధివాసితుం వా ।
వ్యోమాధిరోఢుమపి న స్పృహయన్తి నిత్యం
రామానుజాఙ్ఘ్రియుగళం శరణం ప్రపన్నాః ॥ 7 ॥

మా మా ధునోతి మనసోఽపి న గోచరం యత్
భూమాసఖేన పురుషేణ సహానుభూయ ।
ప్రేమానువిద్ధహృదయప్రియభక్తలభ్యే
రామానుజాఙ్ఘ్రికమలే రమతాం మనో మే ॥ 8 ॥

శ్లోకాష్టకమిదం పుణ్యం యో భక్త్యా ప్రత్యహం పఠేత్ ।
ఆకారత్రయసమ్పన్నః శోకాబ్ధిం తరతి ద్రుతమ్ ॥