కలితకనకచేలం ఖణ్డితాపత్కుచేలం
గళధృతవనమాలం గర్వితారాతికాలమ్ ।
కలిమలహరశీలం కాన్తిధూతేన్ద్రనీలం
వినమదవనశీలం వేణుగోపాలమీడే ॥ 1 ॥
వ్రజయువతివిలోలం వన్దనానన్దలోలం
కరధృతగురుశైలం కఞ్జగర్భాదిపాలమ్ ।
అభిమతఫలదానం శ్రీజితామర్త్యసాలం
వినమదవనశీలం వేణుగోపాలమీడే ॥ 2 ॥
ఘనతరకరుణాశ్రీకల్పవల్ల్యాలవాలం
కలశజలధికన్యామోదకశ్రీకపోలమ్ ।
ప్లుషితవినతలోకానన్తదుష్కర్మతూలం
వినమదవనశీలం వేణుగోపాలమీడే ॥ 3 ॥
శుభదసుగుణజాలం సూరిలోకానుకూలం
దితిజతతికరాలం దివ్యదారాయితేలమ్ ।
మృదుమధురవచఃశ్రీ దూరితశ్రీరసాలం
వినమదవనశీలం వేణుగోపాలమీడే ॥ 4 ॥
మృగమదతిలకశ్రీమేదురస్వీయఫాలం
జగదుదయలయస్థిత్యాత్మకాత్మీయఖేలమ్ ।
సకలమునిజనాళీమానసాన్తర్మరాళం
వినమదవనశీలం వేణుగోపాలమీడే ॥ 5 ॥
అసురహరణఖేలనం నన్దకోత్క్షేపలీలం
విలసితశరకాలం విశ్వపూర్ణాన్తరాళమ్ ।
శుచిరుచిరయశశ్శ్రీధిక్కృత శ్రీమృణాలం
వినమదవనశీలం వేణుగోపాలమీడే ॥ 6 ॥
స్వపరిచరణలబ్ధ శ్రీధరాశాధిపాలం
స్వమహిమలవలీలాజాతవిధ్యణ్డగోళమ్ ।
గురుతరభవదుఃఖానీక వాఃపూరకూలం
వినమదవనశీలం వేణుగోపాలమీడే ॥ 7 ॥
చరణకమలశోభాపాలిత శ్రీప్రవాళం
సకలసుకృతిరక్షాదక్షకారుణ్య హేలమ్ ।
రుచివిజితతమాలం రుక్మిణీపుణ్యమూలం
వినమదవనశీలం వేణుగోపాలమీడే ॥ 8 ॥
శ్రీవేణుగోపాల కృపాలవాలాం
శ్రీరుక్మిణీలోలసువర్ణచేలామ్ ।
కృతిం మమ త్వం కృపయా గృహీత్వా
స్రజం యథా మాం కురు దుఃఖదూరమ్ ॥ 9 ॥
ఇతి శ్రీ వేణుగోపాలాష్టకమ్ ।
