ప్రతిభటశ్రేణిభీషణ వరగుణస్తోమభూషణ
జనిభయస్థానతారణ జగదవస్థానకారణ ।
నిఖిలదుష్కర్మకర్శన నిగమసద్ధర్మదర్శన
జయ జయ శ్రీసుదర్శన జయ జయ శ్రీసుదర్శన ॥ 1 ॥
శుభజగద్రూపమణ్డన సురజనత్రాసఖణ్డన
శతమఖబ్రహ్మవన్దిత శతపథబ్రహ్మనన్దిత ।
ప్రథితవిద్వత్సపక్షిత భజదహిర్బుధ్న్యలక్షిత
జయ జయ శ్రీసుదర్శన జయ జయ శ్రీసుదర్శన ॥ 2 ॥
నిజపదప్రీతసద్గణ నిరుపథిస్ఫీతషడ్గుణ
నిగమనిర్వ్యూఢవైభవ నిజపరవ్యూహవైభవ ।
హరిహయద్వేషిదారణ హరపురప్లోషకారణ
జయ జయ శ్రీసుదర్శన జయ జయ శ్రీసుదర్శన ॥ 3 ॥
స్ఫుటతటిజ్జాలపిఞ్జర పృథుతరజ్వాలపఞ్జర
పరిగతప్రత్నవిగ్రహ పరిమితప్రజ్ఞదుర్గ్రహ ।
ప్రహరణగ్రామమణ్డిత పరిజనత్రాణపణ్డిత
జయ జయ శ్రీసుదర్శన జయ జయ శ్రీసుదర్శన ॥ 4 ॥
భువననేతస్త్రయీమయ సవనతేజస్త్రయీమయ
నిరవధిస్వాదుచిన్మయ నిఖిలశక్తేజగన్మయ ।
అమితవిశ్వక్రియామయ శమితవిశ్వగ్భయామయ
జయ జయ శ్రీసుదర్శన జయ జయ శ్రీసుదర్శన ॥ 5 ॥
మహితసమ్పత్సదక్షర విహితసమ్పత్షడక్షర
షడరచక్రప్రతిష్ఠిత సకలతత్త్వప్రతిష్ఠిత ।
వివిధసఙ్కల్పకల్పక విబుధసఙ్కల్పకల్పక
జయ జయ శ్రీసుదర్శన జయ జయ శ్రీసుదర్శన ॥ 6 ॥
ప్రతిముఖాలీఢబన్ధుర పృథుమహాహేతిదన్తుర
వికటమాలాపరిష్కృత వివిధమాయాబహిష్కృత ।
స్థిరమహాయన్త్రయన్త్రిత దృఢదయాతన్త్రయన్త్రిత
జయ జయ శ్రీసుదర్శన జయ జయ శ్రీసుదర్శన ॥ 7 ॥
దనుజవిస్తారకర్తన దనుజవిద్యావికర్తన
జనితమిస్రావికర్తన భజదవిద్యానికర్తన ।
అమరదృష్టస్వవిక్రమ సమరజుష్టభ్రమిక్రమ
జయ జయ శ్రీసుదర్శన జయ జయ శ్రీసుదర్శన ॥ 8 ॥
ద్విచతుష్కమిదం ప్రభూతసారం
పఠతాం వేఙ్కటనాయకప్రణీతమ్ ।
విషమేఽపి మనోరథః ప్రధావన్
న విహన్యేత రథాఙ్గధుర్యగుప్తః ॥ 9 ॥
ఇతి శ్రీ వేదాన్తాచార్యస్య కృతిషు సుదర్శనాష్టకమ్ ।
