సత్యం జ్ఞానమనన్తం నిత్యమనాకాశం పరమాకాశం
గోష్ఠప్రాఙ్గణరిఙ్ఖణలోలమనాయాసం పరమాయాసమ్ ।
మాయాకల్పితనానాకారమనాకారం భువనాకారం
క్ష్మామానాథమనాథం ప్రణమత గోవిన్దం పరమానన్దమ్ ॥ 1 ॥
మృత్స్నామత్సీహేతి యశోదాతాడనశైశవసన్త్రాసం
వ్యాదితవక్త్రాలోకితలోకాలోకచతుర్దశలోకాలిమ్ ।
లోకత్రయపురమూలస్తమ్భం లోకాలోకమనాలోకం
లోకేశం పరమేశం ప్రణమత గోవిన్దం పరమానన్దమ్ ॥ 2 ॥
త్రైవిష్టపరిపువీరఘ్నం క్షితిభారఘ్నం భవరోగఘ్నం
కైవల్యం నవనీతాహారమనాహారం భువనాహారమ్ ।
వైమల్యస్ఫుటచేతోవృత్తివిశేషాభాసమనాభాసం
శైవం కేవలశాన్తం ప్రణమత గోవిన్దం పరమానన్దమ్ ॥ 3 ॥
గోపాలం ప్రభులీలావిగ్రహగోపాలం కులగోపాలం
గోపీఖేలనగోవర్ధనధృతిలీలాలాలితగోపాలమ్ ।
గోభిర్నిగదితగోవిన్దస్ఫుటనామానం బహునామానం
గోధీగోచరదూరం ప్రణమత గోవిన్దం పరమానన్దమ్ ॥ 4 ॥
గోపీమణ్డలగోష్ఠీభేదం భేదావస్థమభేదాభం
శశ్వద్గోఖురనిర్ధూతోద్గతధూళీధూసరసౌభాగ్యమ్ ।
శ్రద్ధాభక్తిగృహీతానన్దమచిన్త్యం చిన్తితసద్భావం
చిన్తామణిమహిమానం ప్రణమత గోవిన్దం పరమానన్దమ్ ॥ 5 ॥
స్నానవ్యాకులయోషిద్వస్త్రముపాదాయాగముపారూఢం
వ్యాదిత్సన్తీరథ దిగ్వస్త్రా దాతుముపాకర్షన్తం తాః ।
నిర్ధూతద్వయశోకవిమోహం బుద్ధం బుద్ధేరన్తఃస్థం
సత్తామాత్రశరీరం ప్రణమత గోవిన్దం పరమానన్దమ్ ॥ 6 ॥
కాన్తం కారణకారణమాదిమనాదిం కాలఘనాభాసం
కాళిన్దీగతకాళియశిరసి సునృత్యన్తం ముహురత్యన్తమ్ ।
కాలం కాలకలాతీతం కలితాశేషం కలిదోషఘ్నం
కాలత్రయగతిహేతుం ప్రణమత గోవిన్దం పరమానన్దమ్ ॥ 7 ॥
బృన్దావనభువి బృన్దారకగణబృన్దారాధితవన్ద్యాయాం
కున్దాభామలమన్దస్మేరసుధానన్దం సుమహానన్దమ్ ।
వన్ద్యాశేషమహామునిమానసవన్ద్యానన్దపదద్వన్ద్వం
నన్ద్యాశేషగుణాబ్ధిం ప్రణమత గోవిన్దం పరమానన్దమ్ ॥ 8 ॥
గోవిన్దాష్టకమేతదధీతే గోవిన్దార్పితచేతా యో
గోవిన్దాచ్యుత మాధవ విష్ణో గోకులనాయక కృష్ణేతి ।
గోవిన్దాఙ్ఘ్రిసరోజధ్యానసుధాజలధౌతసమస్తాఘో
గోవిన్దం పరమానన్దామృతమన్తఃస్థం స తమభ్యేతి ॥ 9 ॥
ఇతి శ్రీమత్పరమహంసపరివ్రాజకాచార్యస్య శ్రీగోవిన్దభగవత్పూజ్యపాదశిష్యస్య శ్రీమచ్ఛఙ్కరభగవతః కృతౌ శ్రీ గోవిన్దాష్టకమ్ ।
