චංඩමුංඩ වධෝ නාම සප්තමෝධ්යායඃ ॥
ධ්යානං
ධ්යායේං රත්න පීඨේ ශුකකල පඨිතං ශ්රුණ්වතීං ශ්යාමලාංගීං।
න්යස්තෛකාංඝ්රිං සරෝජේ ශශි ශකල ධරාං වල්ලකීං වාද යංතීං
කහලාරාබද්ධ මාලාං නියමිත විලසච්චෝලිකාං රක්ත වස්ත්රාං।
මාතංගීං ශංඛ පාත්රාං මධුර මධුමදාං චිත්රකෝද්භාසි භාලාං।
ඍෂිරුවාච।
ආජ්ඤප්තාස්තේ තතෝදෛත්යා-ශ්චංඩමුංඩපුරෝගමාඃ।
චතුරංගබලෝපේතා යයුරභ්යුද්යතායුධාඃ॥1॥
දදෘශුස්තේ තතෝ දේවී-මීෂද්ධාසාං ව්යවස්ථිතාම්।
සිංහස්යෝපරි ශෛලේංද්ර-ශෘංගේ මහතිකාංචනේ॥2॥
තේදෘෂ්ට්වාතාංසමාදාතු-මුද්යමංංචක්රුරුද්යතාඃ
ආකෘෂ්ටචාපාසිධරා-ස්තථාऽන්යේ තත්සමීපගාඃ॥3॥
තතඃ කෝපං චකාරෝච්චෛ-රංබිකා තානරීන්ප්රති।
කෝපේන චාස්යා වදනං මෂීවර්ණමභූත්තදා॥4॥
භ්රුකුටීකුටිලාත්තස්යා ලලාටඵලකාද්ද්රුතම්।
කාළී කරාළ වදනා විනිෂ්ක්රාංතාऽසිපාශිනී ॥5॥
විචිත්රඛට්වාංගධරා නරමාලාවිභූෂණා।
ද්වීපිචර්මපරීධානා ශුෂ්කමාංසාऽතිභෛරවා॥6॥
අතිවිස්තාරවදනා ජිහ්වාලලනභීෂණා।
නිමග්නාරක්තනයනා නාදාපූරිතදිඞ්මුඛා ॥6॥
සා වේගේනාऽභිපතිතා ඝූතයංතී මහාසුරාන්।
සෛන්යේ තත්ර සුරාරීණා-මභක්ෂයත තද්බලම් ॥8॥
පාර්ෂ්ණිග්රාහාංකුශග්රාහි-යෝධඝංටාසමන්විතාන්।
සමාදායෛකහස්තේන මුඛේ චික්ෂේප වාරණාන් ॥9॥
තථෛව යෝධං තුරගෛ රථං සාරථිනා සහ।
නික්ෂිප්ය වක්ත්රේ දශනෛශ්චර්වයත්යතිභෛරවං ॥10॥
ඒකං ජග්රාහ කේශේෂු ග්රීවායාමථ චාපරං।
පාදේනාක්රම්යචෛවාන්යමුරසාන්යමපෝථයත් ॥11॥
තෛර්මුක්තානිච ශස්ත්රාණි මහාස්ත්රාණි තථාසුරෛඃ।
මුඛේන ජග්රාහ රුෂා දශනෛර්මථිතාන්යපි ॥12॥
බලිනාං තද්බලං සර්වමසුරාණාං දුරාත්මනාං
මමර්දාභක්ෂයච්චාන්යානන්යාංශ්චාතාඩයත්තථා ॥13॥
අසිනා නිහතාඃ කේචිත්කේචිත්ඛට්වාංගතාඩිතාඃ।
ජග්මුර්විනාශමසුරා දංතාග්රාභිහතාස්තථා ॥14॥
ක්ෂණේන තද්භලං සර්ව මසුරාණාං නිපාතිතං।
දෘෂ්ට්වා චංඩෝऽභිදුද්රාව තාං කාළීමතිභීෂණාං ॥15॥
ශරවර්ෂෛර්මහාභීමෛර්භීමාක්ෂීං තාං මහාසුරඃ।
ඡාදයාමාස චක්රෛශ්ච මුංඩඃ ක්ෂිප්තෛඃ සහස්රශඃ ॥16॥
තානිචක්රාණ්යනේකානි විශමානානි තන්මුඛම්।
බභුර්යථාර්කබිංබානි සුබහූනි ඝනෝදරං ॥17॥
තතෝ ජහාසාතිරුෂා භීමං භෛරවනාදිනී।
කාළී කරාළවදනා දුර්දර්ශශනෝජ්ජ්වලා ॥18॥
උත්ථාය ච මහාසිංහං දේවී චංඩමධාවත।
ගෘහීත්වා චාස්ය කේශේෂු ශිරස්තේනාසිනාච්ඡිනත් ॥19॥
අථ මුංඩෝऽභ්යධාවත්තාං දෘෂ්ට්වා චංඩං නිපාතිතම්।
තමප්යපාත යද්භමෞ සා ඛඩ්ගාභිහතංරුෂා ॥20॥
හතශේෂං තතඃ සෛන්යං දෘෂ්ට්වා චංඩං නිපාතිතම්।
මුංඩංච සුමහාවීර්යං දිශෝ භේජේ භයාතුරම් ॥21॥
ශිරශ්චංඩස්ය කාළී ච ගෘහීත්වා මුංඩ මේව ච।
ප්රාහ ප්රචංඩාට්ටහාසමිශ්රමභ්යේත්ය චංඩිකාම් ॥22॥
මයා තවා ත්රෝපහෘතෞ චංඩමුංඩෞ මහාපශූ।
යුද්ධයජ්ඤේ ස්වයං ශුංභං නිශුංභං චහනිෂ්යසි ॥23॥
ඍෂිරුවාච॥
තාවානීතෞ තතෝ දෘෂ්ට්වා චංඩ මුංඩෞ මහාසුරෞ।
උවාච කාළීං කළ්යාණී ලලිතං චංඩිකා වචඃ ॥24॥
යස්මාච්චංඩං ච මුංඩං ච ගෘහීත්වා ත්වමුපාගතා।
චාමුංඩේති තතෝ ලොකේ ඛ්යාතා දේවී භවිෂ්යසි ॥25॥
॥ ජය ජය ශ්රී මාර්කංඩේය පුරාණේ සාවර්නිකේ මන්වංතරේ දේවි මහත්ම්යේ චංඩමුංඩ වධෝ නාම සප්තමෝධ්යාය සමාප්තම් ॥
ආහුති
ඕං ක්ලීං ජයංතී සාංගායෛ සශක්තිකායෛ සපරිවාරායෛ සවාහනායෛ කාළී චාමුංඩා දේව්යෛ කර්පූර බීජාධිෂ්ඨායෛ මහාහුතිං සමර්පයාමි නමඃ ස්වාහා ॥
