ଚଂଡମୁଂଡ ଵଧୋ ନାମ ସପ୍ତମୋଧ୍ୟାୟଃ ॥
ଧ୍ୟାନଂ
ଧ୍ୟାୟେଂ ରତ୍ନ ପୀଠେ ଶୁକକଲ ପଠିତଂ ଶ୍ରୁଣ୍ଵତୀଂ ଶ୍ୟାମଲାଂଗୀଂ।
ନ୍ୟସ୍ତୈକାଂଘ୍ରିଂ ସରୋଜେ ଶଶି ଶକଲ ଧରାଂ ଵଲ୍ଲକୀଂ ଵାଦ ୟଂତୀଂ
କହଲାରାବଦ୍ଧ ମାଲାଂ ନିୟମିତ ଵିଲସଚ୍ଚୋଲିକାଂ ରକ୍ତ ଵସ୍ତ୍ରାଂ।
ମାତଂଗୀଂ ଶଂଖ ପାତ୍ରାଂ ମଧୁର ମଧୁମଦାଂ ଚିତ୍ରକୋଦ୍ଭାସି ଭାଲାଂ।
ଋଷିରୁଵାଚ।
ଆଜ୍ଞପ୍ତାସ୍ତେ ତତୋଦୈତ୍ୟା-ଶ୍ଚଂଡମୁଂଡପୁରୋଗମାଃ।
ଚତୁରଂଗବଲୋପେତା ୟୟୁରଭ୍ୟୁଦ୍ୟତାୟୁଧାଃ॥1॥
ଦଦୃଶୁସ୍ତେ ତତୋ ଦେଵୀ-ମୀଷଦ୍ଧାସାଂ ଵ୍ୟଵସ୍ଥିତାମ୍।
ସିଂହସ୍ୟୋପରି ଶୈଲେଂଦ୍ର-ଶୃଂଗେ ମହତିକାଂଚନେ॥2॥
ତେଦୃଷ୍ଟ୍ଵାତାଂସମାଦାତୁ-ମୁଦ୍ୟମଂଂଚକ୍ରୁରୁଦ୍ୟତାଃ
ଆକୃଷ୍ଟଚାପାସିଧରା-ସ୍ତଥାଽନ୍ୟେ ତତ୍ସମୀପଗାଃ॥3॥
ତତଃ କୋପଂ ଚକାରୋଚ୍ଚୈ-ରଂବିକା ତାନରୀନ୍ପ୍ରତି।
କୋପେନ ଚାସ୍ୟା ଵଦନଂ ମଷୀଵର୍ଣମଭୂତ୍ତଦା॥4॥
ଭ୍ରୁକୁଟୀକୁଟିଲାତ୍ତସ୍ୟା ଲଲାଟଫଲକାଦ୍ଦ୍ରୁତମ୍।
କାଳୀ କରାଳ ଵଦନା ଵିନିଷ୍କ୍ରାଂତାଽସିପାଶିନୀ ॥5॥
ଵିଚିତ୍ରଖଟ୍ଵାଂଗଧରା ନରମାଲାଵିଭୂଷଣା।
ଦ୍ଵୀପିଚର୍ମପରୀଧାନା ଶୁଷ୍କମାଂସାଽତିଭୈରଵା॥6॥
ଅତିଵିସ୍ତାରଵଦନା ଜିହ୍ଵାଲଲନଭୀଷଣା।
ନିମଗ୍ନାରକ୍ତନୟନା ନାଦାପୂରିତଦିଙ୍ମୁଖା ॥6॥
ସା ଵେଗେନାଽଭିପତିତା ଘୂତୟଂତୀ ମହାସୁରାନ୍।
ସୈନ୍ୟେ ତତ୍ର ସୁରାରୀଣା-ମଭକ୍ଷୟତ ତଦ୍ବଲମ୍ ॥8॥
ପାର୍ଷ୍ଣିଗ୍ରାହାଂକୁଶଗ୍ରାହି-ୟୋଧଘଂଟାସମନ୍ଵିତାନ୍।
ସମାଦାୟୈକହସ୍ତେନ ମୁଖେ ଚିକ୍ଷେପ ଵାରଣାନ୍ ॥9॥
ତଥୈଵ ୟୋଧଂ ତୁରଗୈ ରଥଂ ସାରଥିନା ସହ।
ନିକ୍ଷିପ୍ୟ ଵକ୍ତ୍ରେ ଦଶନୈଶ୍ଚର୍ଵୟତ୍ୟତିଭୈରଵଂ ॥10॥
ଏକଂ ଜଗ୍ରାହ କେଶେଷୁ ଗ୍ରୀଵାୟାମଥ ଚାପରଂ।
ପାଦେନାକ୍ରମ୍ୟଚୈଵାନ୍ୟମୁରସାନ୍ୟମପୋଥୟତ୍ ॥11॥
ତୈର୍ମୁକ୍ତାନିଚ ଶସ୍ତ୍ରାଣି ମହାସ୍ତ୍ରାଣି ତଥାସୁରୈଃ।
ମୁଖେନ ଜଗ୍ରାହ ରୁଷା ଦଶନୈର୍ମଥିତାନ୍ୟପି ॥12॥
ବଲିନାଂ ତଦ୍ବଲଂ ସର୍ଵମସୁରାଣାଂ ଦୁରାତ୍ମନାଂ
ମମର୍ଦାଭକ୍ଷୟଚ୍ଚାନ୍ୟାନନ୍ୟାଂଶ୍ଚାତାଡୟତ୍ତଥା ॥13॥
ଅସିନା ନିହତାଃ କେଚିତ୍କେଚିତ୍ଖଟ୍ଵାଂଗତାଡିତାଃ।
ଜଗ୍ମୁର୍ଵିନାଶମସୁରା ଦଂତାଗ୍ରାଭିହତାସ୍ତଥା ॥14॥
କ୍ଷଣେନ ତଦ୍ଭଲଂ ସର୍ଵ ମସୁରାଣାଂ ନିପାତିତଂ।
ଦୃଷ୍ଟ୍ଵା ଚଂଡୋଽଭିଦୁଦ୍ରାଵ ତାଂ କାଳୀମତିଭୀଷଣାଂ ॥15॥
ଶରଵର୍ଷୈର୍ମହାଭୀମୈର୍ଭୀମାକ୍ଷୀଂ ତାଂ ମହାସୁରଃ।
ଛାଦୟାମାସ ଚକ୍ରୈଶ୍ଚ ମୁଂଡଃ କ୍ଷିପ୍ତୈଃ ସହସ୍ରଶଃ ॥16॥
ତାନିଚକ୍ରାଣ୍ୟନେକାନି ଵିଶମାନାନି ତନ୍ମୁଖମ୍।
ବଭୁର୍ୟଥାର୍କବିଂବାନି ସୁବହୂନି ଘନୋଦରଂ ॥17॥
ତତୋ ଜହାସାତିରୁଷା ଭୀମଂ ଭୈରଵନାଦିନୀ।
କାଳୀ କରାଳଵଦନା ଦୁର୍ଦର୍ଶଶନୋଜ୍ଜ୍ଵଲା ॥18॥
ଉତ୍ଥାୟ ଚ ମହାସିଂହଂ ଦେଵୀ ଚଂଡମଧାଵତ।
ଗୃହୀତ୍ଵା ଚାସ୍ୟ କେଶେଷୁ ଶିରସ୍ତେନାସିନାଚ୍ଛିନତ୍ ॥19॥
ଅଥ ମୁଂଡୋଽଭ୍ୟଧାଵତ୍ତାଂ ଦୃଷ୍ଟ୍ଵା ଚଂଡଂ ନିପାତିତମ୍।
ତମପ୍ୟପାତ ୟଦ୍ଭମୌ ସା ଖଡ୍ଗାଭିହତଂରୁଷା ॥20॥
ହତଶେଷଂ ତତଃ ସୈନ୍ୟଂ ଦୃଷ୍ଟ୍ଵା ଚଂଡଂ ନିପାତିତମ୍।
ମୁଂଡଂଚ ସୁମହାଵୀର୍ୟଂ ଦିଶୋ ଭେଜେ ଭୟାତୁରମ୍ ॥21॥
ଶିରଶ୍ଚଂଡସ୍ୟ କାଳୀ ଚ ଗୃହୀତ୍ଵା ମୁଂଡ ମେଵ ଚ।
ପ୍ରାହ ପ୍ରଚଂଡାଟ୍ଟହାସମିଶ୍ରମଭ୍ୟେତ୍ୟ ଚଂଡିକାମ୍ ॥22॥
ମୟା ତଵା ତ୍ରୋପହୃତୌ ଚଂଡମୁଂଡୌ ମହାପଶୂ।
ୟୁଦ୍ଧୟଜ୍ଞେ ସ୍ଵୟଂ ଶୁଂଭଂ ନିଶୁଂଭଂ ଚହନିଷ୍ୟସି ॥23॥
ଋଷିରୁଵାଚ॥
ତାଵାନୀତୌ ତତୋ ଦୃଷ୍ଟ୍ଵା ଚଂଡ ମୁଂଡୌ ମହାସୁରୌ।
ଉଵାଚ କାଳୀଂ କଳ୍ୟାଣୀ ଲଲିତଂ ଚଂଡିକା ଵଚଃ ॥24॥
ୟସ୍ମାଚ୍ଚଂଡଂ ଚ ମୁଂଡଂ ଚ ଗୃହୀତ୍ଵା ତ୍ଵମୁପାଗତା।
ଚାମୁଂଡେତି ତତୋ ଲୋକେ ଖ୍ୟାତା ଦେଵୀ ଭଵିଷ୍ୟସି ॥25॥
॥ ଜୟ ଜୟ ଶ୍ରୀ ମାର୍କଂଡେୟ ପୁରାଣେ ସାଵର୍ନିକେ ମନ୍ଵଂତରେ ଦେଵି ମହତ୍ମ୍ୟେ ଚଂଡମୁଂଡ ଵଧୋ ନାମ ସପ୍ତମୋଧ୍ୟାୟ ସମାପ୍ତମ୍ ॥
ଆହୁତି
ଓଂ କ୍ଲୀଂ ଜୟଂତୀ ସାଂଗାୟୈ ସଶକ୍ତିକାୟୈ ସପରିଵାରାୟୈ ସଵାହନାୟୈ କାଳୀ ଚାମୁଂଡା ଦେଵ୍ୟୈ କର୍ପୂର ବୀଜାଧିଷ୍ଠାୟୈ ମହାହୁତିଂ ସମର୍ପୟାମି ନମଃ ସ୍ଵାହା ॥
