පාංඩිත්යං පරමේශ්වරි ස්තුතිවිධෞ නෛවාශ්රයංතේ ගිරාං
වෛරිංචාන්යපි ගුංඵනානි විගලද්ගර්වාණි ශර්වාණි තේ ।
ස්තෝතුං ත්වාං පරිඵුල්ලනීලනලිනශ්යාමාක්ෂි කාමාක්ෂි මාං
වාචාලීකුරුතේ තථාපි නිතරාං ත්වත්පාදසේවාදරඃ ॥1॥

තාපිංඡස්තබකත්විෂේ තනුභෘතාං දාරිද්ර්යමුද්රාද්විෂේ
සංසාරාඛ්යතමෝමුෂේ පුරරිපෝර්වාමාංකසීමාජුෂේ ।
කංපාතීරමුපේයුෂේ කවයතාං ජිහ්වාකුටීං ජග්මුෂේ
විශ්වත්රාණපුෂේ නමෝऽස්තු සතතං තස්මෛ පරංජ්යෝතිෂේ ॥2॥

යේ සංධ්යාරුණයංති ශංකරජටාකාංතාරචන්රාර්භකං
සිංදූරංති ච යේ පුරංදරවධූසීමංතසීමාංතරේ ।
පුණ්ය.ං යේ පරිපක්කයංති භජතාං කාංචීපුරේ මාමමී
පායාසුඃ පරමේශ්වරප්රණයිනීපාදෝද්භවාඃ පාංසවඃ ॥3॥

කාමාඩංබරපූරයා ශශිරුචා කම්රස්මිතානාං ත්විෂා
කාමාරේරනුරාගසිංධුමධිකං කල්ලෝලිතං තන්වතී ।
කාමාක්ෂීති සමස්තසජ්ජනනුතා කල්යාණදාත්රී නෘණාං
කාරුණ්යාකුලමානසා භගවතී කංපාතටේ ජෘංභතේ ॥4॥

කාමාක්ෂීණපරාක්රමප්රකටනං සංභාවයංතී දෘශා
ශ්යාමා ක්ෂීරසහෝදරස්මිතරුචිප්රක්ෂාලිතාශාංතරා ।
කාමාක්ෂීජනමෞලිභූෂණමණිර්වාචාං පරා දේවතා
කාමාක්ෂීති විභාති කාපි කරුණා කංපාතටින්යාස්තටේ ॥5॥

ශ්යාමා කාචන චංද්රිකා ත්රිභුවනේ පුණ්යාත්මනාමානනේ
සීමාශූන්යකවිත්වවර්ෂජනනී යා කාපි කාදංබිනී ।
මාරාරාතිමනෝවිමෝහනවිධෞ කාචිතත්තමඃකංදලී
කාමාක්ෂ්යාඃ කරුණාකටාක්ෂලහරී කාමාය මේ කල්පතාම් ॥6॥

ප්රෞඪධ්වාංතකදංබකේ කුමුදිනීපුණ්යාංකුරං දර්ශයන්
ජ්යෝත්ස්නාසංගමනේऽපි කෝකමිථුනං මිශ්රං සමුද්භාවයන් ।
කාලිංදීලහරීදශාං ප්රකටයන්කම්රාං නභස්යද්භුතාං
කශ්චින්නේත්රමහෝත්සවෝ විජයතේ කාංචීපුරේ ශූලිනඃ ॥7॥

තංද්රාහීනතමාලනීලසුෂමෛස්තාරුණ්යලීලාගෘහෛඃ
තාරානාථකිශෝරලාංඡිතකචෛස්තාම්රාරවිංදේක්ෂණෛඃ ।
මාතඃ සංශ්රයතාං මනෝ මනසිජප්රාගල්භ්යනාඩිංධමෛඃ
කංපාතීරචරෛර්ඝනස්තනභරෛඃ පුණ්යාංකරෛඃ ශාංකරෛඃ ॥8॥

නිත්යං නිශ්චලතාමුපේත්ය මරුතාං රක්ෂාවිධිං පුෂ්ණතී
තේජස්සංචයපාටවේන කිරණානුෂ්ණද්යුතේර්මුෂ්ණතී ।
කාංචීමධ්යගතාපි දීප්තිජනනී විශ්වාංතරේ ජෘංභතේ
කාචිච්චිත්රමහෝ ස්මෘතාපි තමසාං නිර්වාපිකා දීපිකා ॥9॥

කාංතෛඃ කේශරුචාං චයෛර්භ්රමරිතං මංදස්මිතෛඃ පුෂ්පිතං
කාංත්යා පල්ලවිතං පදාංබුරුහයෝර්නේත්රත්විෂා පත්රිතම් ।
කංපාතීරවනාංතරං විදධතී කල්යාණජන්මස්ථලී
කාංචීමධ්යමහාමණිර්විජයතේ කාචිත්කෘපාකංදලී ॥10॥

රාකාචංද්රසමානකාංතිවදනා නාකාධිරාජස්තුතා
මූකානාමපි කුර්වතී සුරධනීනීකාශවාග්වෛභවම් ।
ශ්රීකාංචීනගරීවිහාරරසිකා ශෝකාපහංත්රී සතාම්
ඒකා පුණ්යපරංපරා පශුපතේරාකාරිණී රාජතේ ॥11॥

ජාතා ශීතලශෛලතඃ සුකෘතිනාං දෘශ්යා පරං දේහිනාං
ලෝකානාං ක්ෂණමාත්රසංස්මරණතඃ සංතාපවිච්ඡේදිනී ।
ආශ්චර්යං බහු ඛේලනං විතනුතේ නෛශ්චල්යමාබිභ්රතී
කංපායාස්තටසීම්නි කාපි තටිනී කාරුණ්යපාථෝමයී ॥12॥

ඓක්යං යේන විරච්යතේ හරතනෞ දංභාවපුංභාවුකේ
රේඛා යත්කචසීම්නි ශේඛරදශාං නෛශාකරී ගාහතේ ।
ඖන්නත්යං මුහුරේති යේන ස මහාන්මේනාසඛඃ සානුමාන්
කංපාතීරවිහාරිණා සශරණාස්තේනෛව ධාම්නා වයම් ॥13॥

අක්ෂ්ණෝශ්ච ස්තනයෝඃ ශ්රියා ශ්රවණයෝර්බාහ්වෝශ්ච මූලං ස්පෘශන්
උත්තංසේන මුඛේන ච ප්රතිදිනං ද්රුහ්යන්පයෝජන්මනේ ।
මාධුර්යේණ ගිරාං ගතේන මෘදුනා හංසාංගනාං හ්රේපයන්
කාංචීසීම්නි චකාස්ති කෝऽපි කවිතාසංතානබීජාංකුරඃ ॥14॥

ඛංඩං චාංද්රමසං වතංසමනිශං කාංචීපුරේ ඛේලනං
කාලායශ්ඡවිතස්කරීං තනුරුචිං කර්ණජපේ ලෝචනේ ।
තාරුණ්යෝෂ්මනඛංපචං ස්තනභරං ජංඝාස්පෘශං කුංතලං
භාග්යං දේශිකසංචිතං මම කදා සංපාදයේදංබිකේ ॥15॥

තන්වානං නිජකේලිසෞධසරණිං නෛසර්ගිකීණාං ගිරාං
කේදාරං කවිමල්ලසූක්තිලහරීසස්යශ්රියාං ශාශ්වතම් ।
අංහෝවංචනචුංචු කිංචන භජේ කාංචීපුරීමංඩනං
පර්යායච්ඡවි පාකශාසනමණේඃ පෞෂ්පේෂවං පෞරුෂම් ॥16॥

ආලෝකේ මුඛපංකජේ ච දධතී සෞධාකරීං චාතුරීං
චූඩාලංක්රියමාණපංකජවනීවෛරාගමප්රක්රියා ।
මුග්ධස්මේරමුඛී ඝන්සතනතටීමූර්ච්ඡාලමධ්යාංචිතා
කාංචීසීමනි කාමිනී විජයතේ කාචිජ්ජගන්මෝහිනී ॥17॥

යස්මින්නංබ භවත්කටාක්ෂරජනී මංදේऽපි මංදස්මිත-
ජ්යෝත්ස්නාසංස්නපිතා භවත්යභිමුඛී තං ප්රත්යහෝ දේහිනම් ।
ද්රක්ෂාමාක්ෂිකමාධුරීමදභරව්රීඩාකරී වෛඛරී
කාමාක්ෂි ස්වයමාතනෝත්යභිසෘතිං වාමේක්ෂණේව ක්ෂණම් ॥18॥

කාලිංදීජලකාංතයඃ ස්මිතරුචිස්වර්වාහිනීපාථසි
ප්රෞඪධ්වාංතරුචඃ ස්ඵුටාධරමහෝලෞහිත්යසංධ්යෝදයේ ।
මණික්යෝපලකුංඩලාංශුශිඛිනි ව්යාමිශ්රධූමශ්රියඃ
කල්යාණෛකභුවඃ කටාක්ෂසුෂමාඃ කාමාක්ෂි රාජංති තේ ॥19॥

කලකලරණත්කාංචී කාංචීවිභූෂණමාලිකා
කචභරලසච්චංද්රා චංද්රාවතංසසධර්මිණී ।
කවිකුලගිරඃ ශ්රාවංශ්රාවං මිලත්පුලකාංකුරා
විරචිතශිරඃකංපා කංපාතටේ පරිශෝභතේ ॥20॥

සරසවචසාං වීචී නීචීභවන්මධුමාධුරී
භරිතභුවනා කීර්තිර්මූර්තිර්මනෝභවජිත්වරී ।
ජනනි මනසෝ යෝග්යං භෝග්යං නෘණාං තව ජායතේ
කථමිව විනා කාංචීභූෂේ කටාක්ෂතරංගිතම් ॥21॥

භ්රමරිතසරිත්කූලෝ නීලෝත්පලප්රභයාऽऽභයා
නතජනතමඃඛංඩී තුංඩීරසීම්නි විජෘංභතේ ।
අචලතපසාමේකඃ පාකඃ ප්රසූනශරාසන-
ප්රතිභටමනෝහාරී නාරීකුලෛකශිඛාමණිඃ ॥22॥

මධුරවචසෝ මංදස්මේරා මතංගජගාමිනඃ
තරුණිමජුෂස්තාපිච්ඡාභාස්තමඃපරිපංථිනඃ ।
කුචභරනතාඃ කුර්යුර්භද්රං කුරංගවිලෝචනාඃ
කලිතකරුණාඃ කාංචීභාජඃ කපාලිමහෝත්සවාඃ ॥23॥

කමලසුෂමාක්ෂ්යාරෝහේ විචක්ෂණවීක්ෂණාඃ
කුමුදසුකෘතක්රීඩාචූඩාලකුංතලබංධුරාඃ ।
රුචිරරුචිභිස්තාපිච්ඡශ්රීප්රපංචනචුංචවඃ
පුරවිජයිනඃ කංපාතීරේ ස්ඵුරංති මනෝරථාඃ ॥24॥

කලිතරතයඃ කාංචීලීලාවිධෞ කවිමංඩලී-
වචනලහරීවාසංතීනාං වසංතවිභූතයඃ ।
කුශලවිධයේ භූයාසුර්මේ කුරංගවිලෝචනාඃ
කුසුමවිශිඛාරාතේරක්ෂ්ණාං කුතූහලවිභ්රමාඃ ॥25॥

කබලිතතමස්කාංඩාස්තුංඩීරමංඩලමංඩනාඃ
සරසිජවනීසංතානානාමරුංතුදශේඛරාඃ ।
නයනසරණේර්නේදීයංසඃ කදා නු භවංති මේ
තරුණජලදශ්යාමාඃ ශංභෝස්තපඃඵලවිභ්රමාඃ ॥26॥

අචරමමිෂුං දීනං මීනධ්වජස්ය මුඛශ්රියා
සරසිජභුවෝ යානං ම්ලානං ගතේන ච මංජුනා ।
ත්රිදශසදසාමන්නං ඛින්නං ගිරා ච විතන්වතී
තිලකයති සා කංපාතීරං ත්රිලෝචනසුංදරී ॥27॥

ජනනි භුවනේ චංක්රම්යේऽහං කියංතමනේහසං
කුපුරුෂකරභ්රෂ්ටෛර්දුෂ්ටෛර්ධනෛරුදරංභරිඃ ।
තරුණකරුණේ තංද්රාශූන්යේ තරංගය ලෝචනේ
නමති මයි තේ කිංචිත්කාංචීපුරීමණිදීපිකේ ॥28॥

මුනිජනමනඃපේටීරත්නං ස්ඵුරත්කරුණානටී-
විහරණකලාගේහං කාංචීපුරීමණිභූෂණම් ।
ජගති මහතෝ මෝහව්යාධේර්නෘණාං පරමෞෂධං
පුරහරදෘශාං සාඵල්යං මේ පුරඃ පරිජෘංභතාම් ॥29॥

මුනිජනමෝධාම්නේ ධාම්නේ වචෝමයජාහ්නවී-
හිමගිරිතටප්රාග්භාරායාක්ෂරාය පරාත්මනේ ।
විහරණජුෂේ කාංචීදේශේ මහේශ්වරලෝචන-
ත්රිතයසරසක්රීඩාසෞධාංගණාය නමෝ නමඃ ॥30॥

මරකතරුචාං ප්රත්යාදේශං මහේශ්වරචක්ෂුෂාම්
අමෘතලහරීපූරං පාරං භවාඛ්යපයෝනිධේඃ ।
සුචරිතඵලං කාංචීභාජෝ ජනස්ය පචේලිමං
හිමශිඛරිණෝ වංශස්යෛකං වතංසමුපාස්මහේ ॥31॥

ප්රණමනදිනාරංභේ කංපානදීසඛි තාවකේ
සරසකවිතෝන්මේෂඃ පූෂා සතාං සමුදංචිතඃ ।
ප්රතිභටමහාප්රෞඪප්රෝද්යත්කවිත්වකුමුද්වතීං
නයති තරසා නිද්රාමුද්රාං නගේශ්වරකන්යකේ ॥32॥

ශමිතජඩිමාරංභා කංපාතටීනිකටේචරී
නිහතදුරිතස්තෝමා සෝමාර්ධමුද්රිතකුංතලා ।
ඵලිතසුමනෝවාංඡා පාංචායුධී පරදේවතා
සඵලයතු මේ නේත්රේ ගෝත්රේශ්වරප්රියනංදිනී ॥33॥

මම තු ධිෂණා පීඩ්යා ජාඩ්යාතිරේක කථං ත්වයා
කුමුදසුෂමාමෛත්රීපාත්රීවතංසිතකුංතලාම් ।
ජගති ශමිතස්තංභාං කංපානදීනිලයාමසෞ
ශ්රියති හි ගලත්තංද්රා චංද්රාවතංසසධර්මිණීම් ॥34॥

පරිමලපරීපාකෝද්රේකං පයෝමුචි කාංචනේ
ශිඛරිණි පුනර්ද්බෛධීභාවං ශශින්යරුණාතපම් ।
අපි ච ජනයන්කංබෝර්ලක්ෂ්මීමනංබුනි කෝऽප්යසෞ
කුසුමධනුෂඃ කාංචීදේශේ චකාස්ති පරාක්රමඃ ॥35॥

පුරදමයිතුර්වාමෝත්සංගස්ථලේන රසජ්ඤයා
සරසකවිතාභාජා කාංචීපුරෝදරසීමයා ।
තටපරිසරෛර්නීහාරාද්රේර්වචෝභිරකෘත්රිමෛඃ
කිමිව න තුලාමස්මච්චේතෝ මහේශ්වරි ගාහතේ ॥36॥

නයනයුගලීමාස්මාකීනාං කදා නු ඵලේග්රහීං
විදධති ගතෞ ව්යාකුර්වාණා ගජේංද්රචමත්ක්රියාම් ।
මරතකරුචෝ මාහේශානා ඝනස්තනනම්රිතාඃ
සුකෘතවිභවාඃ ප්රාංචඃ කාංචීවතංසධුරංධරාඃ ॥37॥

මනසිජයශඃපාරංපර්යං මරංදඣරීසුවාං
කවිකුලගිරාං කංදං කංපානදීතටමංඩනම් ।
මධුරලලිතං මත්කං චක්ෂුර්මනීෂිමනෝහරං
පුරවිජයිනඃ සර්වස්වං තත්පුරස්කුරුතේ කදා ॥38॥

ශිථිලිතතමෝලීලාං නීලාරවිංදවිලෝචනාං
දහනවිලසත්ඵාලාං ශ්රීකාමකෝටිමුපාස්මහේ ।
කරධෘතසච්ඡූලාං කාලාරිචිත්තහරාං පරාං
මනසිජකෘපාලීලාං ලෝලාලකාමලිකේක්ෂණාම් ॥39॥

කලාලීලාශාලා කවිකුලවචඃකෛරවවනී-
ශරජ්ජ්යෝත්ස්නාධාරා ශශධරශිශුශ්ලාඝ්යමුකුටී ।
පුනීතේ නඃ කංපාපුලිනතටසෞහාර්දතරලා
කදා චක්ෂුර්මාර්ගං කනකගිරිධානුෂ්කමහිෂී ॥40॥

නමඃ ස්තාන්නම්රේභ්යඃ ස්තනගරිමගර්වේණ ගුරුණා
දධානේභ්යශ්චූඩාභරණමමෘතස්යංදි ශිශිරම් ।
සදා වාස්තවේභ්යඃ සුවිධභුවි කංපාඛ්යසරිතේ
යශෝව්යාපාරේභ්යඃ සුකෘතවිභවේභ්යෝ රතිපතේඃ ॥41॥

අසූයංතී කාචින්මරකතරුචෝ නාකිමුකුටී-
කදංබං චුංබංතී චරණනඛචංද්රාංශුපටලෛඃ ।
තමෝමුද්රාං විද්රාවයතු මම කාංචීර්නිලයනා
හරෝත්සංගශ්රීමන්මණිගෘහමහාදීපකලිකා ॥42॥

අනාද්යංතා කාචිත්සුජනනයනානංදජනනී
නිරුංධානා කාංතිං නිජරුචිවිලාසෛර්ජලමුචාම් ।
ස්මරාරේස්තාරල්යං මනසි ජනයංතී ස්වයමහෝ
ගලත්කංපා ශංපා පරිලසති කංපාපරිසරේ ॥43॥

සුධාඩිංඩීරශ්රීඃ ස්මිතරුචිෂු තුංඩීරවිෂයං
පරිෂ්කුර්වාණාසෞ පරිහසිතනීලෝත්පලරුචිඃ ।
ස්තනාභ්යාමානම්රා ස්තබකයතු මේ කාංක්ෂිතතරුං
දෘශාමෛශානීනාං සුකෘතඵලපාංඩිත්යගරිමා ॥44॥

කෘපාධාරාද්රෝණී කෘපණධිෂණානාං ප්රණමතාං
නිහංත්රී සංතාපං නිගමමුකුටෝත්තංසකලිකා ।
පරා කාංචීලීලාපරිචයවතී පර්වතසුතා
ගිරාං නීවී දේවී ගිරිශපරතංත්රා විජයතේ ॥45॥

කවිත්වශ්රීකංදඃ සුකෘතපරිපාටී හිමගිරේඃ
විධාත්රී විශ්වේෂාං විෂමශරවීරධ්වජපටී ।
සඛී කංපානද්යාඃ පදහසිතපාථෝජයුගලී
පුරාණෝ පායාන්නඃ පුරමථනසාම්රාජ්යපදවී ॥46॥

දරිද්රාණා මධ්යේ දරදලිතතාපිච්ඡසුෂමාඃ
ස්තනාභෝගක්කාංතාස්තරුණහරිණාංකාංකිතකචාඃ ।
හරාධීනා නානාවිබුධමුකුටීචුංබිතපදාඃ
කදා කංපාතීරේ කථය විහරාමෝ ගිරිසුතේ ॥47॥

වරීවර්තු ස්ථේමා ත්වයි මම ගිරාං දේවි මනසෝ
නරීනර්තු ප්රෞඪා වදනකමලේ වාක්යලහරී ।
චරීචර්තු ප්රජ්ඤාජනනි ජඩිමානඃ පරජනේ
සරීසර්තු ස්වෛරං ජනනි මයි කාමාක්ෂි කරුණා ॥48॥

ක්ෂණාත්තේ කාමාක්ෂි භ්රමරසුෂමාශික්ෂණගුරුඃ
කටාක්ෂව්යාක්ෂේපෝ මම භවතු මෝක්ෂාය විපදාම් ।
නරීනර්තු ස්වෛරං වචනලහරී නිර්ජරපුරී-
සරිද්වීචීනීචීකරණපටුරාස්යේ මම සදා ॥49॥

පුරස්තාන්මේ භූයඃප්රශමනපරඃ ස්තාන්මම රුජාං
ප්රචාරස්තේ කංපාතටවිහෘතිසංපාදිනි දෘශෝඃ ।
ඉමාං යාච්ඤාමූරීකුරු සපදි දූරීකුරු තමඃ-
පරීපාකං මත්කං සපදි බුධලෝකං ච නය මාම් ॥50॥

උදංචංතී කාංචීනගරනිලයේ ත්වත්කරුණයා
සමෘද්ධා වාග්ධාටී පරිහසිතමාධ්වී කවයතාම් ।
උපාදත්තේ මාරප්රතිභටජටාජූටමුකුටී-
කුටීරෝල්ලාසින්යාඃ ශතමඛතටින්යා ජයපටීම් ॥51॥

ශ්රියං විද්යාං දද්යාජ්ජනනි නමතාං කීර්තිමමිතාං
සුපුත්රාන් ප්රාදත්තේ තව ඣටිති කාමාක්ෂි කරුණා ।
ත්රිලෝක්යාමාධික්යං ත්රිපුරපරිපංථිප්රණයිනි
ප්රණාමස්ත්වත්පාදේ ශමිතදුරිතේ කිං න කුරුතේ ॥52॥

මනඃස්තංභං ස්තංභං ගමයදුපකංපං ප්රණමතාං
සදා ලෝලං නීලං චිකුරජිතලෝලංබනිකරම් ।
ගිරාං දූරං ස්මේරං ධෘතශශිකිශෝරං පශුපතේඃ
දෘශාං යෝග්යං භෝග්යං තුහිනගිරිභාග්යං විජයතේ ॥53॥

ඝනශ්යාමාන්කාමාංතකමහිෂි කාමාක්ෂි මධුරාන්
දෘශාං පාතානේතානමෘතජලශීතානනුපමාන් ।
භවෝත්පාතේ භීතේ මයි විතර නාථේ දෘඪභව-
න්මනශ්ශෝකේ මූකේ හිමගිරිපතාකේ කරුණයා ॥54॥

නතානාං මංදානාං භවනිගලබංධාකුලධියාං
මහාංධ්යාං රුංධානාමභිලෂිතසංතානලතිකාම් ।
චරංතීං කංපායාස්තටභුවි සවිත්රීං ත්රිජගතාං
ස්මරාමස්තාං නිත්යං ස්මරමථනජීවාතුකලිකාම් ॥55॥

පරා විද්යා හෘද්යාශ්රිතමදනවිද්යා මරකත-
ප්රභානීලා ලීලාපරවශිතශූලායුධමනාඃ ।
තමඃපූරං දූරං චරණනතපෞරංදරපුරී-
මෘගාක්ෂී කාමාක්ෂී කමලතරලාක්ෂී නයතු මේ ॥56॥

අහංතාඛ්යා මත්කං කබලයති හා හංත හරිණී
හඨාත්සංවිද්රූපං හරමහිෂි සස්යාංකුරමසෞ ।
කටාක්ෂව්යාක්ෂේපප්රකටහරිපාෂාණපටලෛඃ
ඉමාමුච්චෛරුච්චාටය ඣටිති කාමාක්ෂි කෘපයා ॥57॥

බුධේ වා මූකේ වා තව පතති යස්මින්ක්ෂණමසෞ
කටාක්ෂඃ කාමාක්ෂි ප්රකටජඩිමක්ෂෝදපටිමා ।
කථංකාරං නාස්මෛ කරමුකුලචූඩාලමුකුටා
නමෝවාකං බ්රූයුර්නමුචිපරිපංථිප්රභෘතයඃ ॥58॥

ප්රතීචීං පශ්යාමඃ ප්රකටරුචිනීවාරකමණි-
ප්රභාසධ්රීචීනාං ප්රදලිතෂඩාධාරකමලාම් ।
චරංතීං සෞෂුම්නේ පථි පරපදේංදුප්රවිගල-
ත්සුධාර්ද්රාං කාමාක්ෂීං පරිණතපරංජ්යෝතිරුදයාම් ॥59॥

ජංභාරාතිප්රභෘතිමුකුටීඃ පාදයෝඃ පීඨයංතී
ගුංඵාන්වාචාං කවිජනකෘතාන්ස්වෛරමාරාමයංතී ।
ශංපාලක්ෂ්මීං මණිගණරුචාපාටලෛඃ ප්රාපයංතී
කංපාතීරේ කවිපරිෂදාං ජෘංභතේ භාග්යසීමා ॥60॥

චංද්රාපීඩාං චතුරවදනාං චංචලාපාංගලීලාං
කුංදස්මේරාං කුචභරනතාං කුංතලෝද්ධූතභෘංගාම් ।
මාරාරාතේර්මදනශිඛිනං මාංසලං දීපයංතීං
කාමාක්ෂීං තාං කවිකුලගිරාං කල්පවල්ලීමුපාසේ ॥61॥

කාලාංභෝදප්රකරසුෂමාං කාංතිභිස්තිර්ජයංතී
කල්යාණානාමුදයසරණිඃ කල්පවල්ලී කවීනාම් ।
කංදර්පාරේඃ ප්රියසහචරී කල්මෂාණාං නිහංත්රී
කාංචීදේශං තිලකයති සා කාපි කාරුණ්යසීමා ॥62॥

ඌරීකුර්වන්නුරසිජතටේ චාතුරීං භූධරාණාං
පාථෝජානාං නයනයුගලේ පරිපංථ්යං විතන්වන් ।
කංපාතීරේ විහරති රුචා මෝඝයන්මේඝශෛලීං
කෝකද්වේෂං ශිරසි කලයන්කෝऽපි විද්යාවිශේෂඃ ॥63॥

කාංචීලීලාපරිචයවතී කාපි තාපිච්ඡලක්ෂ්මීඃ
ජාඩ්යාරණ්යේ හුතවහශිඛා ජන්මභූමිඃ කෘපායාඃ ।
මාකංදශ්රීර්මධුරකවිතාචාතුරී කෝකිලානාං
මාර්ගේ භූයාන්මම නයනයෝර්මාන්මථී කාපි විද්යා ॥64॥

සේතුර්මාතර්මරතකමයෝ භක්තිභාජාං භවාබ්ධෞ
ලීලාලෝලා කුවලයමයී මාන්මථී වෛජයංතී ।
කාංචීභූෂා පශුපතිදෘශාං කාපි කාලාංජනාලී
මත්කං දුඃඛං ශිථිලයතු තේ මංජුලාපාංගමාලා ॥65॥

ව්යාවෘණ්වානාඃ කුවලයදලප්රක්රියාවෛරමුද්රාං
ව්යාකුර්වාණා මනසිජමහාරාජසාම්රාජ්යලක්ෂ්මීම් ।
කාංචීලීලාවිහෘතිරසිකේ කාංක්ෂිතං නඃ ක්රියාසුඃ
බංධච්ඡේදේ තව නියමිනාං බද්ධදීක්ෂාඃ කටාක්ෂාඃ ॥66॥

කාලාංභෝදේ ශශිරුචි දලං කෛතකං දර්ශයංතී
මධ්යේසෞදාමිනි මධුලිහාං මාලිකාං රාජයංතී ।
හංසාරාවං විකචකමලේ මංජුමුල්ලාසයංතී
කංපාතීරේ විලසති නවා කාපි කාරුණ්යලක්ෂ්මීඃ ॥67॥

චිත්රං චිත්රං නිජමෘදුතයා භර්ත්සයන්පල්ලවාලීං
පුංසාං කාමාන්භුවි ච නියතං පූරයන්පුණ්යභාජාම් ।
ජාතඃ ශෛලාන්න තු ජලනිධේඃ ස්වෛරසංචාරශීලඃ
කාංචීභූෂා කලයතු ශිවං කෝऽපි චිංතාමණිර්මේ ॥68॥

තාම්රාංභෝජං ජලදනිකටේ තත්ර බංධූකපුෂ්පං
තස්මින්මල්ලීකුසුමසුෂමාං තත්ර වීණානිනාදම් ।
ව්යාවෘන්වානා සුකෘතලහරී කාපි කාංචිනගර්යාම්
ඓශානී සා කලයතිතරාමෛංද්රජාලං විලාසම් ॥69॥

ආහාරාංශං ත්රිදශසදසාමාශ්රයේ චාතකානාම්
ආකාශෝපර්යපි ච කලයන්නාලයං තුංගමේෂාම් ।
කංපාතීරේ විහරතිතරාං කාමධේනුඃ කවීනාං
මංදස්මේරෝ මදනනිගමප්රක්රියාසංප්රදායඃ ॥70॥

ආර්ද්රීභූතෛරවිරලකෘපෛරාත්තලීලාවිලාසෛඃ
ආස්ථාපූර්ණෛරධිකචපලෛරංචිතාංභෝජශිල්පෛඃ ।
කාංතෛර්ලක්ෂ්මීලලිතභවනෛඃ කාංතිකෛවල්යසාරෛඃ
කාශ්මල්යං නඃ කබලයතු සා කාමකෝටී කටාක්ෂෛඃ ॥71॥

ආධූන්වංත්යෛ තරලනයනෛරාංගජීං වෛජයංතීම්
ආනංදින්යෛ නිජපදජුෂාමාත්තකාංචීපුරායෛ ।
ආස්මාකීනං හෘදයමඛිලෛරාගමානාං ප්රපංචෛඃ
ආරාධ්යායෛ ස්පෘහයතිතරාමදිමායෛ ජනන්යෛ ॥72॥

දූරං වාචාං ත්රිදශසදසාං දුඃඛසිංධෝස්තරිත්රං
මෝහක්ෂ්වේලක්ෂිතිරුහවනේ ක්රූරධාරං කුඨාරම් ।
කංපාතීරප්රණයි කවිභිර්වර්ණිතෝද්යච්චරිත්රං
ශාංත්යෛ සේවේ සකලවිපදාං ශාංකරං තත්කලත්රම් ॥73॥

ඛංඩීකෘත්ය ප්රකෘතිකුටිලං කල්මෂං ප්රාතිභශ්රී-
ශුංඩීරත්වං නිජපදජුෂාං ශූන්යතංද්රං දිශංතී ।
තුංඩීරාඛ්යෛ මහති විෂයේ ස්වර්ණවෘෂ්ටිප්රදාත්රී
චංඩී දේවී කලයති රතිං චංද්රචූඩාලචූඩේ ॥74॥

යේන ඛ්යාතෝ භවති ස ගෘහී පූරුෂෝ මේරුධන්වා
යද්දෘක්කෝණේ මදනනිගමප්රාභවං බෝභවීති ।
යත්ප්රීත්යෛව ත්රිජගදධිපෝ ජෘංභතේ කිංපචානඃ
කංපාතීරේ ස ජයති මහාන්කශ්චිදෝජෝවිශේෂඃ ॥75॥

ධන්යා ධන්යා ගතිරිහ ගිරාං දේවි කාමාක්ෂි යන්මේ
නිංද්යාං භිංද්යාත්සපදි ජඩතාං කල්මෂාදුන්මිෂංතීම් ।
සාධ්වී මාධ්වීරසමධුරතාභංජිනී මංජුරීතිඃ
වාණීවේණී ඣටිති වෘණුතාත්ස්වර්ධුනීස්පර්ධිනී මාම් ॥76॥

යස්යා වාටී හෘදයකමලං කෞසුමී යෝගභාජාං
යස්යාඃ පීඨී සතතශිශිරා ශීකරෛර්මාකරංදෛඃ ।
යස්යාඃ පේටී ශ්රුතිපරිචලන්මෞලිරත්නස්ය කාංචී
සා මේ සෝමාභරණමහිෂී සාධයේත්කාංක්ෂිතානි ॥77॥

ඒකා මාතා සකලජගතාමීයුෂී ධ්යානමුද්රාම්
ඒකාම්රාධීශ්වරචරණයෝරේකතානාං සමිංධේ ।
තාටංකෝද්යන්මණිගණරුචා තාම්රකර්ණප්රදේශා
තාරුණ්යශ්රීස්තබකිතතනුස්තාපසී කාපි බාලා ॥78॥

දංතාදංතිප්රකටනකරී දංතිභිර්මංදයානෛඃ
මංදාරාණාං මදපරිණතිං මථ්නතී මංදහාසෛඃ ।
අංකූරාභ්යාං මනසිජතරෝරංකිතෝරාඃ කුචාභ්යා-
මංතඃකාංචි ස්ඵුරති ජගතාමාදිමා කාපි මාතා ॥79॥

ත්රියංබකකුටුංබිනීං ත්රිපුරසුංදරීමිංදිරාං
පුලිංදපතිසුංදරීං ත්රිපුරභෛරවීං භාරතීම් ।
මතංගකුලනායිකාං මහිෂමර්දනීං මාතෘකාං
භණංති විබුධෝත්තමා විහෘතිමේව කාමාක්ෂි තේ ॥80॥

මහාමුනිමනෝනටී මහිතරම්යකංපාතටී-
කුටීරකවිහාරිණී කුටිලබෝධසංහාරිණී ।
සදා භවතු කාමිනී සකලදේහිනාං ස්වාමිනී
කෘපාතිශයකිංකරී මම විභූතයේ ශාංකරී ॥81॥

ජඩාඃ ප්රකෘතිනිර්ධනා ජනවිලෝචනාරුංතුදා
නරා ජනනි වීක්ෂණං ක්ෂණමවාප්ය කාමාක්ෂි තේ ।
වචස්සු මධුමාධුරීං ප්රකටයංති පෞරංදරී-
විභූතිෂු විඩංබනාං වපුෂි මාන්මථීං ප්රක්රියාම් ॥82॥

ඝන්සතනතටස්ඵුටස්ඵුරිතකංචුලීචංචලී-
කෘතත්රිපුරශාසනා සුජනශීලිතෝපාසනා ।
දෘශෝඃ සරණිමශ්නුතේ මම කදා නු කාංචීපුරේ
පරා පරමයෝගිනාං මනසි චිත්කුලා පුෂ්කලා ॥83॥

කවීංද්රහෘදයේචරී පරිගෘහීතකාංචීපුරී
නිරූඪකරුණාඣරී නිඛිලලෝකරක්ෂාකරී ।
මනඃපථදවීයසී මදනශාසනප්රේයසී
මහාගුණගරීයසී මම දෘශෝऽස්තු නේදීයසී ॥84॥

ධනේන න රමාමහේ ඛලජනාන්න සේවාමහේ
න චාපලමයාමහේ භවභයාන්න දූයාමහේ ।
ස්ථිරාං තනුමහේතරාං මනසි කිං ච කාංචීරත-
ස්මරාංතකකුටුංබිනීචරණපල්ලවෝපාසනාම් ॥85॥

සුරාඃ පරිජනා වපුර්මනසිජාය වෛරායතේ
ත්රිවිෂ්ටපනිතංබිනීකුචතටී ච කේලීගිරිඃ ।
ගිරඃ සුරභයෝ වයස්තරුණිමා දරිද්රස්ය වා
කටාක්ෂසරණෞ ක්ෂණං නිපතිතස්ය කාමාක්ෂි තේ ॥86॥

පවිත්රය ජගත්ත්රයීවිබුධබෝධජීවාතුභිඃ
පුරත්රයවිමර්දිනඃ පුලකකංචුලීදායිභිඃ ।
භවක්ෂයවිචක්ෂණෛර්ව්යසනමෝක්ෂණෛර්වීක්ෂණෛඃ
නිරක්ෂරශිරෝමණිං කරුණයෛව කාමාක්ෂි මාම් ॥87॥

කදා කලිතඛේලනාඃ කරුණයෛව කාංචීපුරේ
කලායමුකුලත්විෂඃ ශුභකදංබපූර්ණාංකුරාඃ ।
පයෝධරභරාලසාඃ කවිජනේෂු තේ බංධුරාඃ
පචේලිමකෘපාරසා පරිපතංති මාර්ගේ දෘශෝඃ ॥88॥

අශෝධ්යමචලෝද්භවං හෘදයනංදනං දේහිනාම්
අනර්ඝමධිකාංචි තත්කිමපි රත්නමුද්ද්යෝතතේ ।
අනේන සමලංකෘතා ජයති ශංකරාංකස්ථලී
කදාස්ය මම මානසං ව්රජති පේටිකාවිභ්රමම් ॥89॥

පරාමෘතඣරීප්ලුතා ජයති නිත්යමංතශ්චරී
භුවාමපි බහිශ්චරී පරමසංවිදේකාත්මිකා ।
මහද්භිරපරෝක්ෂිතා සතතමේව කාංචීපුරේ
මමාන්වහමහංමතිර්මනසි භාතු මාහේශ්වරී ॥90॥

තමෝවිපිනධාවිනං සතතමේව කාංචීපුරේ
විහාරරසිකා පරා පරමසංවිදුර්වීරුහේ ।
කටාක්ෂනිගලෛර්දෘඪං හෘදයදුෂ්ටදංතාවලං
චිරං නයතු මාමකං ත්රිපුරවෛරිසීමංතිනී ॥91॥

ත්වමේව සති චංඩිකා ත්වමසි දේවි චාමුංඩිකා
ත්වමේව පරමාතෘකා ත්වමපි යෝගිනීරූපිණී ।
ත්වමේව කිල ශාංභවී ත්වමසි කාමකෝටී ජයා
ත්වමේව විජයා ත්වයි ත්රිජගදංබ කිං බ්රූමහේ ॥92॥

පරේ ජනනි පාර්වති ප්රණතපාලිනි ප්රාතිභ-
ප්රදාත්රි පරමේශ්වරි ත්රිජගදාශ්රිතේ ශාශ්වතේ ।
ත්රියංබකකුටුංබිනි ත්රිපදසංගිනි ත්රීක්ෂණේ
ත්රිශක්තිමයි වීක්ෂණං මයි නිධේහි කාමාක්ෂි තේ ॥93॥

මනෝමධුකරෝත්සවං විදධතී මනීෂාජුෂාං
ස්වයංප්රභවවෛඛරීවිපිනවීථිකාලංබිනී ।
අහෝ ශිශිරිතා කෘපාමධුරසේන කංපාතටේ
චරාචරවිධායිනී චලති කාපි චින්මංජරී ॥94॥

කලාවති කලාභෘතෝ මුකුටසීම්නි ලීලාවති
ස්පෘහාවති මහේශ්වරේ භුවනමෝහනේ භාස්වති ।
ප්රභාවති රමේ සදා මහිතරූපශෝභාවති
ත්වරාවති පරේ සතාං ගුරුකෘපාංබුධාරාවති ॥95॥

ත්වයෛව ජගදංබයා භුවනමංඩලං සූයතේ
ත්වයෛව කරුණාර්ද්රයා තදපි රක්ෂණං නීයතේ ।
ත්වයෛව ඛරකෝපයා නයනපාවකේ හූයතේ
ත්වයෛව කිල නිත්යයා ජගති සංතතං ස්ථීයතේ ॥96॥

චරාචරජගන්මයීං සකලහෘන්මයීං චින්මයීං
ගුණත්රයමයීං ජගත්ත්රයමයීං ත්රිධාමාමයීම් ।
පරාපරමයීං සදා දශදිශාං නිශාහර්මයීං
පරාං සතතසන්මයීං මනසි චින්මයීං ශීලයේ ॥97॥

ජය ජගදංබිකේ හරකුටුංබිනි වක්ත්රරුචා
ජිතශරදංබුජේ ඝනවිඩංබිනි කේශරුචා ।
පරමවලංබනං කුරු සදා පරරූපධරේ
මම ගතසංවිදෝ ජඩිමඩංබරතාංඩවිනඃ ॥98॥

භුවනජනනි භූෂාභූතචංද්රේ නමස්තේ
කලුෂශමනි කංපාතීරගේහේ නමස්තේ ।
නිඛිලනිගමවේද්යේ නිත්යරූපේ නමස්තේ
පරශිවමයි පාශච්ඡේදහස්තේ නමස්තේ ॥99॥

ක්වණත්කාංචී කාංචීපුරමණිවිපංචීලයඣරී-
ශිරඃකංපා කංපාවසතිරනුකංපාජලනිධිඃ ।
ඝනශ්යාමා ශ්යාමා කඨිනකුචසීමා මනසි මේ
මෘගාක්ෂී කාමාක්ෂී හරනටනසාක්ෂී විහරතාත් ॥100॥

සමරවිජයකෝටී සාධකානංදධාටී
මෘදුගුණපරිපේටී මුඛ්යකාදංබවාටී ।
මුනිනුතපරිපාටී මෝහිතාජාංඩකෝටී
පරමශිවවධූටී පාතු මාං කාමකෝටී ॥101॥

ඉමං පරවරප්රදං ප්රකෘතිපේශලං පාවනං
පරාපරචිදාකෘතිප්රකටනප්රදීපායිතම් ।
ස්තවං පඨති නිත්යදා මනසි භාවයන්නංබිකාං
ජපෛරලමලං මඛෛරධිකදේහසංශෝෂණෛඃ ॥102॥

॥ ඉති ස්තුතිශතකං සංපූර්ණම් ॥