මෝහාංධකාරනිවහං විනිහංතුමීඩේ
මූකාත්මනාමපි මහාකවිතාවදාන්යාන් ।
ශ්රීකාංචිදේශශිශිරීකෘතිජාගරූකාන්
ඒකාම්රනාථතරුණීකරුණාවලෝකාන් ॥1॥

මාතර්ජයංති මමතාග්රහමෝක්ෂණානි
මාහේංද්රනීලරුචිශික්ෂණදක්ෂිණානි ।
කාමාක්ෂි කල්පිතජගත්ත්රයරක්ෂණානි
ත්වද්වීක්ෂණානි වරදානවිචක්ෂණානි ॥2॥

ආනංගතංත්රවිධිදර්ශිතකෞශලානාම්
ආනංදමංදපරිඝූර්ණිතමංථරාණාම් ।
තාරල්යමංබ තව තාඩිතකර්ණසීම්නාං
කාමාක්ෂි ඛේලති කටාක්ෂනිරීක්ෂණානාම් ॥3॥

කල්ලෝලිතේන කරුණාරසවේල්ලිතේන
කල්මාෂිතේන කමනීයමෘදුස්මිතේන ।
මාමංචිතේන තව කිංචන කුංචිතේන
කාමාක්ෂි තේන ශිශිරීකුරු වීක්ෂිතේන ॥4॥

සාහාය්යකං ගතවතී මුහුරර්ජනස්ය
මංදස්මිතස්ය පරිතෝෂිතභීමචේතාඃ ।
කාමාක්ෂි පාංඩවචමූරිව තාවකීනා
කර්ණාංතිකං චලති හංත කටාක්ෂලක්ෂ්මීඃ ॥5॥

අස්තං ක්ෂණාන්නයතු මේ පරිතාපසූර්යම්
ආනංදචංද්රමසමානයතාං ප්රකාශම් ।
කාලාංධකාරසුෂුමාං කලයංදිගංතේ
කාමාක්ෂි කෝමලකටාක්ෂනිශාගමස්තේ ॥6॥

තාටාංකමෞක්තිකරුචාංකුරදංතකාංතිඃ
කාරුණ්යහස්තිපශිඛාමණිනාධිරූඪඃ ।
උන්මූලයත්වශුභපාදපමස්මදීයං
කාමාක්ෂි තාවකකටාක්ෂමතංගජේතංද්රඃ ॥7॥

ඡායාභරණේ ජගතාං පරිතාපහාරී
තාටංකරත්නමණිතල්ලජපල්ලවශ්රීඃ ।
කාරුණ්යනාම විකිරන්මකරංදජාලං
කාමාක්ෂි රාජති කටාක්ෂසුරද්රුමස්තේ ॥8॥

සූර්යාශ්රයප්රණයිනී මණිකුංඩලාංශු-
ලෞහිත්යකෝකනදකානනමානනීයා ।
යාංතී තව ස්මරහරානනකාංතිසිංධුං
කාමාක්ෂි රාජති කටාක්ෂකලිංදකන්යා ॥9॥

ප්රාප්නෝති යං සුකෘතිනං තව පක්ෂපාතාත්
කාමාක්ෂි වීක්ෂණවිලාසකලාපුරංධ්රී ।
සද්යස්තමේව කිල මුක්තිවධූර්වෘණීතේ
තස්මාන්නිතාංතමනයෝරිදමෛකමත්යම් ॥10॥

යාංතී සදෛව මරුතාමනුකූලභාවං
භ්රූවල්ලිශක්රධනුරුල්ලසිතා රසාර්ද්රා ।
කාමාක්ෂි කෞතුකතරංගිතනීලකංඨා
කාදංබිනීව තව භාති කටාක්ෂමාලා ॥11॥

ගංගාංභසි ස්මිතමයේ තපනාත්මජේව
ගංගාධරෝරසි නවෝත්පලමාලිකේව ।
වක්ත්රප්රභාසරසි ශෛවලමංඩලීව
කාමාක්ෂි රාජති කටාක්ෂරුචිච්ඡටා තේ ॥12॥

සංස්කාරතඃ කිමපි කංදලිතාන් රසජ්ඤ-
කේදාරසීම්නි සුධියාමුපභෝගයෝග්යාන් ।
කල්යාණසූක්තිලහරීකලමාංකුරාන්නඃ
කාමාක්ෂි පක්ෂ්මලයතු ත්වදපාංගමේඝඃ ॥13॥

චාංචල්යමේව නියතං කලයන්ප්රකෘත්යා
මාලින්යභූඃ ශ්රතිපථාක්රමජාගරූකඃ ।
කෛවල්යමේව කිමු කල්පයතේ නතානාං
කාමාක්ෂි චිත්රමපි තේ කරුණාකටාක්ෂඃ ॥14॥

සංජීවනේ ජනනි චූතශිලීමුඛස්ය
සංමෝහනේ ශශිකිශෝරකශේඛරස්ය ।
සංස්තංභනේ ච මමතාග්රහචේෂ්ටිතස්ය
කාමාක්ෂි වීක්ෂණකලා පරමෞෂධං තේ ॥15॥

නීලෝऽපි රාගමධිකං ජනයන්පුරාරේඃ
ලෝලෝऽපි භක්තිමධිකාං දෘඪයන්නරාණාම් ।
වක්රෝऽපි දේවි නමතාං සමතාං විතන්වන්
කාමාක්ෂි නෘත්යතු මයි ත්වදපාංගපාතඃ ॥16॥

කාමද්රුහෝ හෘදයයංත්රණජාගරූකා
කාමාක්ෂි චංචලදෘගංචලමේඛලා තේ ।
ආශ්චර්යමංබ භජතාං ඣටිති ස්වකීය-
සංපර්ක ඒව විධුනෝති සමස්තබංධාන් ॥17॥

කුංඨීකරෝතු විපදං මම කුංචිතභ්රූ-
චාපාංචිතඃ ශ්රිතවිදේහභවානුරාගඃ ।
රක්ෂෝපකාරමනිශං ජනයංජගත්යාං
කාමාක්ෂි රාම ඉව තේ කරුණාකටාක්ෂඃ ॥18॥

ශ්රීකාමකෝටි ශිවලෝචනශෝෂිතස්ය
ශෘංගාරබීජවිභවස්ය පුනඃප්රරෝහේ ।
ප්රේමාංභසාර්ද්රමචිරාත්ප්රචුරේණ ශංකේ
කේදාරමංබ තව කේවලදෘෂ්ටිපාතම් ॥19॥

මාහාත්ම්යශේවධිරසෞ තව දුර්විලංඝ්ය-
සංසාරවිංධ්යගිරිකුංඨනකේලිචුංචුඃ ।
ධෛර්යාංබුධිං පශුපතේශ්චුලකීකරෝති
කාමාක්ෂි වීක්ෂණවිජෘංභණකුංභජන්මා ॥20॥

පීයූෂවර්ෂවශිශිරා ස්ඵුටදුත්පලශ්රී-
මෛත්රී නිසර්ගමධුරා කෘතතාරකාප්තිඃ ।
කාමාක්ෂි සංශ්රිතවතී වපුරෂ්ටමූර්තේඃ
ජ්යෝත්ස්නායතේ භගවති ත්වදපාංගමාලා ॥21॥

අංබ ස්මරප්රතිභටස්ය වපුර්මනෝජ්ඤම්
අංභෝජකානනමිවාංචිතකංටකාභම් ।
භෘංගීව චුංබති සදෛව සපක්ෂපාතා
කාමාක්ෂි කෝමලරුචිස්ත්වදපාංගමාලා ॥22॥

කේශප්රභාපටලනීලවිතානජාලේ
කාමාක්ෂි කුංඩලමණිච්ඡවිදීපශෝභේ ।
ශංකේ කටාක්ෂරුචිරංගතලේ කෘපාඛ්යා
ශෛලූෂිකා නටති ශංකරවල්ලභේ තේ ॥23॥

අත්යංතශීතලමතංද්රයතු ක්ෂණාර්ධම්
අස්තෝකවිභ්රමමනංගවිලාසකංදම් ।
අල්පස්මිතාදෘතමපාරකෘපාප්රවාහම්
අක්ෂිප්රරෝහමචිරාන්මයි කාමකෝටි ॥24॥

මංදාක්ෂරාගතරලීකෘතිපාරතංත්ර්යාත්
කාමාක්ෂි මංථරතරාං ත්වදපාංගඩෝලාම් ।
ආරුහ්ය මංදමතිකෞතුකශාලි චක්ෂුඃ
ආනංදමේති මුහුරර්ධශශාංකමෞලේඃ ॥25॥

ත්රෛයංබකං ත්රිපුරසුංදරි හර්ම්යභූමි-
රංගං විහාරසරසී කරුණාප්රවාහඃ ।
දාසාශ්ච වාසවමුඛාඃ පරිපාලනීයං
කාමාක්ෂි විශ්වමපි වීක්ෂණභූභෘතස්තේ ॥26॥

වාගීශ්වරී සහචරී නියමේන ලක්ෂ්මීඃ
භ්රූවල්ලරීවශකරී භුවනානි ගේහම් ।
රූපං ත්රිලෝකනයනාමෘතමංබ තේෂාං
කාමාක්ෂි යේෂු තව වීක්ෂණපාරතංත්රී ॥27॥

මාහේශ්වරං ඣටිති මානසමීනමංබ
කාමාක්ෂි ධෛර්යජලධෞ නිතරාං නිමග්නම් ।
ජාලේන ශෘංඛලයති ත්වදපාංගනාම්නා
විස්තාරිතේන විෂමායුධදාශකෝऽසෞ ॥28॥

උන්මථ්ය බෝධකමලාකාරමංබ ජාඩ්ය-
ස්තංබේරමං මම මනෝවිපිනේ භ්රමංතම් ।
කුංඨීකුරුෂ්ව තරසා කුටිලාග්රසීම්නා
කාමාක්ෂි තාවකකටාක්ෂමහාංකුශේන ॥29॥

උද්වේල්ලිතස්තබකිතෛර්ලලිතෛර්විලාසෛඃ
උත්ථාය දේවි තව ගාඪකටාක්ෂකුංජාත් ।
දූරං පලායයතු මෝහමෘගීකුලං මේ
කාමාක්ෂි ස්තවරමනුග්රහකේසරීංද්රඃ ॥30॥

ස්නේහාදෘතාං විදලිතෝත්පලකංතිචෝරාං
ජේතාරමේව ජගදීශ්වරි ජේතුකාමඃ ।
මානෝද්ධතෝ මකරකේතුරසෞ ධුනීතේ
කාමාක්ෂි තාවකකටාක්ෂකෘපාණවල්ලීම් ॥31॥

ශ්රෞතීං ව්රජන්නපි සදා සරණිං මුනීනාං
කාමාක්ෂි සංතතමපි ස්මෘතිමාර්ගගාමී ।
කෞටිල්යමංබ කථමස්ථිරතාං ච ධත්තේ
චෞර්යං ච පංකජරුචාං ත්වදපාංගපාතඃ ॥32॥

නිත්යං ශ්රේතුඃ පරිචිතෞ යතමානමේව
නීලෝත්පලං නිජසමීපනිවාසලෝලම් ।
ප්රීත්යෛව පාඨයති වීක්ෂණදේශිකේංද්රඃ
කාමාක්ෂී කිංතු තව කාලිමසංප්රදායම් ॥33॥

භ්රාංත්වා මුහුඃ ස්තබකිතස්මිතඵේනරාශෞ
කාමාක්ෂි වක්ත්රරුචිසංචයවාරිරාශෞ ।
ආනංදති ත්රිපුරමර්දනනේත්රලක්ෂ්මීඃ
ආලංබ්ය දේවි තව මංදමපාංගසේතුම් ॥34॥

ශ්යාමා තව ත්රිපුරසුංදරි ලෝචනශ්රීඃ
කාමාක්ෂි කංදලිතමේදුරතාරකාංතිඃ ।
ජ්යෝත්ස්නාවතී ස්මිතරුචාපි කථං තනෝති
ස්පර්ධාමහෝ කුවලයෛශ්ච තථා චකෝරෛඃ ॥35॥

කාලාංජනං ච තව දේවි නිරීක්ෂණං ච
කාමාක්ෂි සාම්යසරණිං සමුපෛති කාංත්යා ।
නිශ්ශේෂනේත්රසුලභං ජගතීෂු පූර්ව-
මන්යත්ත්රිනේත්රසුලභං තුහිනාද්රිකන්යේ ॥36॥

ධූමාංකුරෝ මකරකේතනපාවකස්ය
කාමාක්ෂි නේත්රරුචිනීලිමචාතුරී තේ ।
අත්යංතමද්භුතමිදං නයනත්රයස්ය
හර්ෂෝදයං ජනයතේ හරුණාංකමෞලේඃ ॥37॥

ආරභ්භලේශසමයේ තව වීක්ෂණස්ස
කාමාක්ෂි මූකමපි වීක්ෂණමාත්රනම්රම් ।
සර්වජ්ඤතා සකලලෝකසමක්ෂමේව
කීර්තිස්වයංවරණමාල්යවතී වෘණීතේ ॥38॥

කාලාංබුවාහ උව තේ පරිතාපහාරී
කාමාක්ෂි පුෂ්කරමධඃකුරුතේ කටාඛ්ක්ෂ්ෂඃ ।
පූර්වඃ පරං ක්ෂණරුචා සමුපෛති මෛත්රී-
මන්යස්තු ස.තතරුචිං ප්රකටීකරෝති ॥39॥

සූක්ෂ්මේऽපි දුර්ගමතරේऽපි ගුරුප්රසාද-
සාහාය්යකේන විචරන්නපවර්ගමාර්ගේ ।
සංසාරපංකනිචයේ න පතත්යමූං තේ
කාමාක්ෂි ගාඪමවලංබ්ය කටාක්ෂයෂ්ටිම් ॥40॥

කාමාක්ෂි සංතතමසෞ හරිනීලරත්න-
ස්තංභේ කටාක්ෂරුචිපුංජමයේ භවත්යාඃ ।
බද්ධෝऽපි භක්තිනිගලෛර්මම චිත්තහස්තී
ස්තංභං ච බංධමපි මුංචති හංත චිත්රම් ॥41॥

කාමාක්ෂි කාෂ්ණර්යමපි සංතතමංජනං ච
බිභ්රන්නිසර්ගතරලෝऽපි භවත්කටාක්ෂඃ ।
වෛමල්යමන්වහමනංජනතා ච භූයඃ
ස්ථෛර්යං ච භක්තහෘදයාය කථං දදාති ॥42॥

මංදස්මිතස්තබකිතං මණිකුංඩලාංශු-
ස්තෝමප්රවාලරුචිරං ශිශිරීකෘතාශම් ।
කාමාක්ෂි රාජති කටාක්ෂරුචේඃ කදංබම්
උද්යානමංබ කරුණාහරිණේක්ෂණායාඃ ॥43॥

කාමාක්ෂි තාවකකටාක්ෂමහේංද්රනීල-
සිංහාසනං ශ්රිතවතෝ මකරධ්වජස්ය ।
සාම්රාජ්යමංගලවිධෞ මුණිකුංඩලශ්රීඃ
නීරාජනෝත්සවතරංගිතදීපමාලා ॥44॥

මාතඃ ක්ෂණං ස්නපය මාං තව වීක්ෂිතේන
මංදාක්ෂිතේන සුජනෛරපරෝක්ෂිතේන ।
කාමාක්ෂි කර්මතිමිරෝත්කරභාස්කරේණ
ශ්රේයස්කරේණ මධුපද්යුතිතස්කරේණ ॥45॥

ප්රේමාපගාපයසි මජ්ජනමාරචය්ය
යුක්තඃ ස්මිතාංශුකෘතභස්මවිලේපනේන ।
කාමාක්ෂි කුංඩලමණිද්යුතිභිර්ජටාලඃ
ශ්රීකංඨමේව භජතේ තව දෘෂ්ටිපාතඃ ॥46॥

කෛවල්යදාය කරුණාරසකිංකරාය
කාමාක්ෂි කංදලිතවිභ්රමශංකරාය ।
ආලෝකනාය තව භක්තශිවංකරාය
මාතර්නමෝऽස්තු පරතංත්රිතශංකරාය ॥47॥

සාම්රාජ්යමංගලවිධෞ මකරධ්වජස්ය
ලෝලාලකාලිකෘතතෝරණමාල්යශෝභේ ।
කාමේශ්වරි ප්රචලදුත්පලවෛජයංතී-
චාතුර්යමේති තව චංචලදෘෂ්ටිපාතඃ ॥48॥

මාර්ගේණ මංජුකචකාංතිතමෝවෘතේන
මංදායමානගමනා මදනාතුරාසෞ ।
කාමාක්ෂි දෘෂ්ටිරයතේ තව ශංකරාය
සංකේතභූමිමචිරාදභිසාරිකේව ॥49॥

ව්රීඩනුවෘත්තිරමණීකෘතසාහචර්යා
ශෛවාලිතාං ගලරුචා ශශිශේඛරස්ය ।
කාමාක්ෂි කාංතිසරසීං ත්වදපාංගලක්ෂ්මීඃ
මංදං සමාශ්රයති මජ්ජනඛේලනාය ॥50॥

කාෂායමංශුකමිව ප්රකටං දධානෝ
මාණික්යකුංඩලරුචිං මමතාවිරෝධී ।
ශ්රුත්යංතසීමනි රතඃ සුතරාං චකාස්ති
කාමාක්ෂි තාවකකටාක්ෂයතීශ්වරෝऽසෞ ॥51॥

පාෂාණ ඒව හරිනීලමණිර්දිනේෂු
ප්රම්ලනතාං කුවලයං ප්රකටීකරෝති ।
නෞමිත්තිකෝ ජලදමේචකිමා තතස්තේ
කාමාක්ෂි ශූන්යමුපමනමපාංගලක්ෂ්ම්යාඃ ॥52॥

ශෘංගාරවිභ්රමවතී සුතරාං සලජ්ජා
නාසාග්රමෞක්තිකරුචා කෘතමංදහාසා ।
ශ්යාමා කටාක්ෂසුෂමා තව යුක්තමේතත්
කාමාක්ෂි චුංබති දිගංබරවක්ත්රබිංබම් ॥53॥

නීලෝත්පලේන මධුපේන ච දෘෂ්ටිපාතඃ
කාමාක්ෂි තුල්ය ඉති තේ කථමාමනංති ।
ශෛත්යේන නිංදයති යදන්වහමිංදුපාදාන්
පාථෝරුහේණ යදසෞ කලහායතේ ච ॥54॥

ඕෂ්ඨප්රභාපටලවිද්රුමමුද්රිතේ තේ
භ්රූවල්ලිවීචිසුභගේ මුඛකාංතිසිංධෞ ।
කාමාක්ෂි වාරිභරපූරණලංබමාන-
කාලාංබුවාහසරණිං ලභතේ කටාක්ෂඃ ॥55॥

මංදස්මිතෛර්ධවලිතා මණිකුංඩලාංශු-
සංපර්කලෝහිතරුචිස්ත්වදපාංගධාරා ।
කාමාක්ෂි මල්ලිකුසුමෛර්නවපල්ලවෛශ්ච
නීලෝත්පලෛශ්ච රචිතේව විභාති මාලා ॥56॥

කාමාක්ෂි ශීතලකෘපාරසනිර්ඣරාංභඃ-
සංපර්කපක්ෂ්මලරුචිස්ත්වදපාංගමාලා ।
ගෝභිඃ සදා පුරරිපෝරභිලෂ්යමාණා
දූර්වාකදංබකවිඩංබනමාතනෝති ॥57॥

හෘත්පංකජං මම විකාසයතු ප්රමුෂ්ණ-
න්නුල්ලාසමුත්පලරුචේස්තමසාං නිරෝද්ධා ।
දෝෂානුෂංගජඩතාං ජගතාං ධුනානඃ
කාමාක්ෂි වීක්ෂණවිලාසදිනෝදයස්තේ ॥58॥

චක්ෂුර්විමෝහයති චංද්රවිභූෂණස්ය
කාමාක්ෂි තාවකකටාක්ෂතමඃප්රරෝහඃ ।
ප්රත්යඞ්මුඛං තු නයනං ස්තිමිතං මුනීනාං
ප්රාකාශ්යමේව නයතීති පරං විචිත්රම් ॥59॥

කාමාක්ෂි වීක්ෂණරුචා යුධි නිර්ජිතං තේ
නීලෝත්පලං නිරවශේෂගතාභිමානම් ।
ආගත්ය තත්පරිසරං ශ්රවණවතංස-
ව්යෝජේන නූනමභයාර්ථනමාතනෝති ॥60॥

ආශ්චර්යමංබ මදානාභ්යුදයාවලංබඃ
කාමාක්ෂි චංචලනිරීක්ෂණවිභ්රමස්තේ ।
ධෛර්යං විධූය තනුතේ හෘදි රාගබංධං
ශංභෝස්තදේව විපරීතතයා මුනීනාම් ॥61॥

ජංතෝඃ සකෘත්ප්රණමතෝ ජගදීඩ්යතාං ච
තේජාස්විතාං ච නිශිතාං ච මතිං සභායාම් ।
කාමාක්ෂි මාක්ෂිකඣරීමිව වෛඛරීං ච
ලක්ෂ්මීං ච පක්ෂ්මලයති ක්ෂණවීක්ෂණං තේ ॥62॥

කාදංබිනී කිමයතේ න ජලානුෂංගං
භෘංගාවලී කිමුරරීකුරුතේ න පද්මම් ।
කිං වා කලිංදතනයා සහතේ න භංගං
කාමාක්ෂි නිශ්චයපදං න තවාක්ෂිලක්ෂ්මීඃ ॥63॥

කාකෝලපාවකතෘණීකරණේऽපි දක්ෂඃ
කාමාක්ෂි බාලකසුධාකරශේඛරස්ය ।
අත්යංතශීතලතමෝऽප්යනුපාරතං තේ
චිත්තං විමෝහයති චිත්රමයං කටාක්ෂඃ ॥64॥

කාර්පණ්යපූරපරිවර්ධිතමංබ මෝහ-
කංදෝද්ගතං භවමයං විෂපාදපං මේ ।
තුංගං ඡිනත්තු තුහිනාද්රිසුතේ භවත්යාඃ
කාංචීපුරේශ්වරි කටාක්ෂකුඨාරධාරා ॥65॥

කාමාක්ෂි ඝෝරභවරෝගචිකිත්සනාර්ථ-
මභ්යර්ථ්ය දේශිකකටාක්ෂභිෂක්ප්රසාදාත් ।
තත්රාපි දේවි ලභතේ සුකෘතී කදාචි-
දන්යස්ය දුර්ලභමපාංගමහෞෂධං තේ ॥66॥

කාමාක්ෂි දේශිකකෘපාංකුරමාශ්රයංතෝ
නානාතපෝනියමනාශිතපාශබංධාඃ ।
වාසාලයං තව කටාක්ෂමමුං මහාංතෝ
ලබ්ධ්වා සුඛං සමාධියෝ විචරංති ලෝකේ ॥67॥

සාකූතසංලපිතසංභෘතමුග්ධහාසං
ව්රීඩානුරාගසහචාරි විලෝකනං තේ ।
කාමාක්ෂි කාමපරිපංථිනි මාරවීර-
සාම්රාජ්යවිභ්රමදශාං සඵලීකරෝති ॥68॥

කාමාක්ෂි විභ්රමබලෛකනිධිර්විධාය
භ්රූවල්ලිචාපකුටිලීකෘතිමේව චිත්රම් ।
ස්වාධීනතාං තව නිනාය ශශාංකමෞලේ-
රංගාර්ධරාජ්යසුඛලාභමපාංගවීරඃ ॥69॥

කාමාංකුරෛකනිලයස්තව දෘෂ්ටිපාතඃ
කාමාක්ෂි භක්තමනසාං ප්රදදාතු කාමාන් ।
රාගාන්විතඃ ස්වයමපි ප්රකටීකරෝති
වෛරාග්යමේව කථමේෂ මහාමුනීනාම් ॥70॥

කාලාංබුවාහනිවහෛඃ කලහායතේ තේ
කාමාක්ෂි කාලිමමදේන සදා කටාක්ෂඃ ।
චිත්රං තථාපි නිතරාමමුමේව දෘෂ්ට්වා
සෝත්කංඨ ඒව රමතේ කිල නීලකංඨඃ ॥71॥

කාමාක්ෂි මන්මථරිපුං ප්රති මාරතාප-
මෝහාංධකාරජලදාගමනේන නෘත්යන් ।
දුෂ්කර්මකංචුකිකුලං කබලීකරෝතු
ව්යාමිශ්රමේචකරුචිස්ත්වදපාංගකේකී ॥72॥

කාමාක්ෂි මන්මථරිපෝරවලෝකනේෂු
කාංතං පයෝජමිව තාවකමක්ෂිපාතම් ।
ප්රේමාගමෝ දිවසවද්විකචීකරෝති
ලජ්ජාභරෝ රජනිවන්මුකුලීකරෝති ॥73॥

මූකෝ විරිංචති පරං පුරුෂඃ කුරූපඃ
කංදර්පති ත්රිදශරාජති කිංපචානඃ ।
කාමාක්ෂි කේවලමුපක්රමකාල ඒව
ලීලාතරංගිතකටාක්ෂරුචඃ ක්ෂණං තේ ॥74॥

නීලාලකා මධුකරංති මනෝජ්ඤනාසා-
මුක්තාරුචඃ ප්රකටකංදබිසාංකුරංති ।
කාරුණ්යමංබ මකරංදති කාමකෝටි
මන්යේ තතඃ කමලමේව විලෝචනං තේ ॥75॥

ආකාංක්ෂ්යමාණඵලදානවිචක්ෂණායාඃ ।
කාමාක්ෂි තාවකකටාක්ෂකකාමධේනෝඃ ।
සංපර්ක ඒව කථමංබ විමුක්තපාශ-
බංධාඃ ස්ඵුටං තනුභෘතඃ පශුතාං ත්යජංති ॥76॥

සංසාරඝර්මපරිතාපජුෂාං නරාණාං
කාමාක්ෂි ශීතලතරාණි තවේක්ෂිතානි ।
චංද්රාතපංති ඝනචංදනකර්දමංති
මුක්තාගුණංති හිමවාරිනිෂේචනංති ॥77॥

ප්රේමාංබුරාශිසතතස්නපිතානි චිත්රං
කාමාක්ෂි තාවකකටාක්ෂනිරීක්ෂණානි ।
සංධුක්ෂයංති මුහුරිංධනරාශිරීත්යා
මාරද්රුහෝ මනසි මන්මථචිත්රභානුම් ॥78॥

කාලාංජනප්රතිභටං කමනීයකාංත්යා
කංදර්පතංත්රකලයා කලිතානුභාවම් ।
කාංචීවිහාරරසිකේ කලුෂාර්තිචෝරං
කල්ලෝලයස්ව මයි තේ කරුණාකටාක්ෂම් ॥79॥

ක්රාංතේන මන්මථදේන විමෝහ්යමාන-
ස්වාංතේන චූතතරුමූලගතස්ය පුංසඃ ।
කාංතේන කිංචිදවලෝකය ලෝචනස්ය
ප්රාංතේන මාං ජනනි කාංචිපුරීවිභූෂේ ॥80॥

කාමාක්ෂි කෝऽපි සුජනාස්ත්වදපාංගසංගේ
කංඨේන කංදලිතකාලිමසංප්රදායාඃ ।
උත්තංසකල්පිතචකෝරකුටුංබපෝෂා
නක්තංදිවසප්රසවභූනයනා භවංති ॥81॥

නීලෝත්පලප්රසවකාංතිනිර්දශනේන
කාරුණ්යවිභ්රමජුෂා තව වීක්ෂණේන ।
කාමාක්ෂි කර්මජලධේඃ කලශීසුතේන
පාශත්රයාද්වයමමී පරිමෝචනීයාඃ ॥82॥

අත්යංතචංචලමකෘත්රිමමංජනං කිං
ඣංකාරභංගිරහිතා කිමු භෘංගමාලා ।
ධූමාංකුරඃ කිමු හුතාශනසංගහීනඃ
කාමාක්ෂි නේත්රරුචිනීලිමකංදලී තේ ॥83॥

කාමාක්ෂි නිත්යමයමංජලිරස්තු මුක්ති-
බීජාය විභ්රමමදෝදයඝූර්ණිතාය ।
කංදර්පදර්පපුනරුද්භවසිද්ධිදාය
කල්යාණදාය තව දේවි දෘගංචලාය ॥84॥

දර්පාංකුරෝ මකරකේතනවිභ්රමාණාං
නිංදාංකුරෝ විදලිතෝත්පලචාතුරීණාම් ।
දීපාංකුරෝ භවතමිස්රකදංබකානාං
කාමාක්ෂි පාලයතු මාං ත්වදපාංගපාතඃ ॥85॥

කෛවල්යදිව්යමණිරෝහණපර්වතේභ්යඃ
කාරුණ්යනිර්ඣරපයඃකෘතමංජනේභ්යඃ ।
කාමාක්ෂි කිංකරිතශංකරමානසේභ්ය-
ස්තේභ්යෝ නමෝऽස්තු තව වීක්ෂණවිභ්රමේභ්යඃ ॥86॥

අල්පීය ඒව නවමුත්පලමංබ හීනා
මීනස්ය වා සරණිරංබුරුහාං ච කිං වා ।
දූරේ මෘගීදෘගසමංජසමංජනං ච
කාමාක්ෂි වීක්ෂණරුචෞ තව තර්කයාමඃ ॥87॥

මිශ්රීභවද්ගරලපංකිලශංකරෝරස්-
සීමාංගණේ කිමපි රිංඛණමාදධානඃ ।
හේලාවධූතලලිතශ්රවණෝත්පලෝऽසෞ
කාමාක්ෂි බාල ඉව රාජති තේ කටාක්ෂඃ ॥88॥

ප්රෞඪිකරෝති විදුෂාං නවසූක්තිධාටී-
චූතාටවීෂු බුධකෝකිලලාල්යමානම් ।
මාධ්වීරසං පරිමලං ච නිරර්ගලං තේ
කාමාක්ෂි වීක්ෂණවිලාසවසංතලක්ෂ්මීඃ ॥89॥

කූලංකෂං විතනුතේ කරුණාංබුවර්ෂී
සාරස්වතං සුකෘතිනඃ සුලභං ප්රවාහම් ।
තුච්ඡීකරෝති යමුනාංබුතරංගභංගීං
කාමාක්ෂි කිං තව කටාක්ෂමහාංබුවාහඃ ॥90॥

ජගර්ති දේවි කරුණාශුකසුංදරී තේ
තාටංකරත්නරුචිදාඩිමඛංඩශෝණේ ।
කාමාක්ෂි නිර්භරකටාක්ෂමරීචිපුංජ-
මාහේංද්රනීලමණිපංජරමධ්යභාගේ ॥91॥

කාමාක්ෂි සත්කුවලයස්ය සගෝත්රභාවා-
දාක්රාමති ශ්රුතිමසෞ තව දෘෂ්ටිපාතඃ ।
කිංච ස්ඵුටං කුටිලතාං ප්රකටීකරෝති
භ්රූවල්ලරීපරිචිතස්ය ඵලං කිමේතත් ॥92॥

ඒෂා තවාක්ෂිසුෂමා විෂමායුධස්ය
නාරාචවර්ෂලහරී නගරාජකන්යේ ।
ශංකේ කරෝති ශතධා හෘදි ධෛර්යමුද්රාං
ශ්රීකාමකෝටි යදසෞ ශිශිරාංශුමෞලේඃ ॥93॥

බාණේන පුෂ්පධනුෂඃ පරිකල්ප්යමාන-
ත්රාණේන භක්තමනසාං කරුණාකරේණ ।
කෝණේන කෝමලදෘශස්තව කාමකෝටි
ශෝණේන ශෝෂය ශිවේ මම ශෝකසිංධුම් ॥94॥

මාරද්රුහා මුකුටසීමනි ලාල්යමානේ
මංදාකිනීපයසි තේ කුටිලං චරිෂ්ණුඃ ।
කාමාක්ෂි කෝපරභසාද්වලමානමීන-
සංදේහමංකුරයති ක්ෂණමක්ෂිපාතඃ ॥95॥

කාමාක්ෂි සංවලිතමෞක්තිකකුංඩලාංශු-
චංචත්සිතශ්රවණචාමරචාතුරීකඃ ।
ස්තංභේ නිරංතරමපාංගමයේ භවත්යා
බද්ධශ්චකාස්ති මකරධ්වජමත්තහස්තී ॥96॥

යාවත්කටාක්ෂරජනීසමයාගමස්තේ
කාමාක්ෂි තාවදචිරාන්නමතාං නරාණාම් ।
ආවිර්භවත්යමෘතදීධිතිබිංබමංබ
සංවින්මයං හෘදයපූර්වගිරීංද්රශෘංගේ ॥97॥

කාමාක්ෂි කල්පවිටපීව භවත්කටාක්ෂෝ
දිත්සුඃ සමස්තවිභවං නමතාං නරාණාම් ।
භෘංගස්ය නීලනලිනස්ය ච කාංතිසංප-
ත්සර්වස්වමේව හරතීති පරං විචිත්රම් ॥98॥

අත්යංතශීතලමනර්ගලකර්මපාක-
කාකෝලහාරි සුලභං සුමනෝභිරේතත් ।
පීයූෂමේව තව වීක්ෂණමංබ කිංතු
කාමාක්ෂි නීලමිදමිත්යයමේව භේදඃ ॥99॥

අජ්ඤාතභක්තිරසමප්රසරද්විවේක-
මත්යංතගර්වමනධීතසමස්තශාස්ත්රම් ।
අප්රාප්තසත්යමසමීපගතං ච මුක්තේඃ
කාමාක්ෂි නෛව තව ස්පෘහයති දෘෂ්ටිපාතඃ ॥100॥

(කාමාක්ෂි මාමවතු තේ කරුණාකටාක්ෂඃ)
පාතේන ලෝචනරුචේස්තව කාමකෝටි
පෝතේන පතකපයෝධිභයාතුරාණාම් ।
පූතේන තේන නවකාංචනකුංඩලාංශු-
වීතේන ශීතලය භූධරකන්යකේ මාම් ॥101॥

॥ ඉති කටාක්ෂශතකං සංපූර්ණම් ॥