ඓංද්රස්යේව ශරාසනස්ය දධතී මධ්යේලලාටං ප්රභාං
ශෞක්ලීං කාංතිමනුෂ්ණගෝරිව ශිරස්යාතන්වතී සර්වතඃ ।
ඒෂාසෞ ත්රිපුරා හෘදි ද්යුතිරිවෝෂ්ණාංශෝඃ සදාහඃ ස්ථිතාත්
ඡිංද්යාන්නඃ සහසා පදෛස්ත්රිභිරඝං ජ්යෝතිර්මයී වාඞ්මයී ॥ 1 ॥
යා මාත්රා ත්රපුසීලතාතනුලසත්තංතූත්ථිතිස්පර්ධිනී
වාග්බීජේ ප්රථමේ ස්ථිතා තව සදා තාං මන්මහේ තේ වයම් ।
ශක්තිඃ කුංඩලිනීති විශ්වජනනව්යාපාරබද්ධෝද්යමාඃ
ජ්ඤාත්වේත්ථං න පුනඃ ස්පෘශංති ජනනීගර්භේऽර්භකත්වං නරාඃ ॥ 2 ॥
දෘෂ්ට්වා සංභ්රමකාරි වස්තු සහසා ඓ ඓ ඉති ව්යාහෘතං
යේනාකූතවශාදපීහ වරදේ බිංදුං විනාප්යක්ෂරම් ।
තස්යාපි ධ්රුවමේව දේවි තරසා ජාතේ තවානුග්රහේ
වාචඃසූක්තිසුධාරසද්රවමුචෝ නිර්යාංති වක්ත්රාංබුජාත් ॥ 3 ॥
යන්නිත්යේ තව කාමරාජමපරං මංත්රාක්ෂරං නිෂ්කලං
තත්සාරස්වතමිත්යවෛති විරලඃ කශ්චිද්බුධශ්චේද්භුවි ।
ආඛ්යානං ප්රතිපර්ව සත්යතපසෝ යත්කීර්තයංතෝ ද්විජාඃ
ප්රාරංභේ ප්රණවාස්පදප්රණයිතාං නීත්වෝච්චරංති ස්ඵුටම් ॥ 4 ॥
යත්සද්යෝ වචසාං ප්රවෘත්තිකරණේ දෘෂ්ටප්රභාවං බුධෛඃ
තාර්තීයං තදහං නමාමි මනසා ත්වද්බීජමිංදුප්රභම් ।
අස්ත්යෞර්වෝऽපි සරස්වතීමනුගතෝ ජාඩ්යාංබුවිච්ඡිත්තයේ
ගෝශබ්දෝ ගිරි වර්තතේ සනියතං යෝගං විනා සිද්ධිදඃ ॥ 5 ॥
ඒකෛකං තව දේවි බීජමනඝං සව්යංජනාව්යංජනං
කූටස්ථං යදි වා පෘථක් ක්රමගතං යද්වා ස්ථිතං ව්යුත්ක්රමාත් ।
යං යං කාමමපේක්ෂ්ය යේන විධිනා කේනාපි වා චිංතිතං
ජප්තං වා සඵලීකරෝති සතතං තං තං සමස්තං නෘණාම් ॥ 6 ॥
වාමේ පුස්තකධාරිණීමභයදාං සාක්ෂස්රජං දක්ෂිණේ
භක්තේභ්යෝ වරදානපේශලකරාං කර්පූරකුංදෝජ්ජ්වලාම් ।
උජ්ජෘංභාංබුජපත්රකාංතිනයනස්නිග්ධප්රභාලෝකිනීං
යේ ත්වාමංබ න ශීලයංති මනසා තේෂාං කවිත්වං කුතඃ ॥ 7 ॥
යේ ත්වාං පාංඩුරපුංඩරීකපටලස්පෂ්ටාභිරාමප්රභාං
සිංචංතීමමෘතද්රවෛරිව ශිරෝ ධ්යායංති මූර්ධ්නි ස්ථිතාම් ।
අශ්රාංතා විකටස්ඵුටාක්ෂරපදා නිර්යාති වක්ත්රාංබුජාත්
තේෂාං භාරති භාරතී සුරසරිත්කල්ලෝලලෝලෝර්මිවත් ॥ 8 ॥
යේ සිංදූරපරාගපිංජපිහිතාං ත්වත්තේජසාද්යාමිමාං
උර්වීං චාපි විලීනයාවකරසප්රස්තාරමග්නාමිව ।
පශ්යංති ක්ෂණමප්යනන්යමනසස්තේෂාමනංගජ්වර-
-ක්ලාංතස්රස්තකුරංගශාබකදෘශෝ වශ්යා භවංති ස්ඵුටම් ॥ 9 ॥
චංචත්කාංචනකුංඩලාංගදධරාමාබද්ධකාංචීස්රජං
යේ ත්වාං චේතසි තද්ගතේ ක්ෂණමපි ධ්යායංති කෘත්වා ස්ථිරාම් ।
තේෂාං වේශ්මසු විභ්රමාදහරහඃ ස්ඵාරීභවංත්යශ්චිරං
මාද්යත්කුංජරකර්ණතාලතරලාඃ ස්ථෛර්යං භජංතේ ශ්රියඃ ॥ 10 ॥
ආර්භට්යා ශශිඛංඩමංඩිතජටාජූටාං නෘමුංඩස්රජං
බංධූකප්රසවාරුණාංබරධරාං ප්රේතාසනාධ්යාසිනීම් ।
ත්වාං ධ්යායංති චතුර්භුජාං ත්රිනයනාමාපීනතුංගස්තනීං
මධ්යේ නිම්නවලිත්රයාංකිතතනුං ත්වද්රූපසංවිත්තයේ ॥ 11 ॥
ජාතෝऽප්යල්පපරිච්ඡදේ ක්ෂිතිභුජාං සාමාන්යමාත්රේ කුලේ
නිඃශේෂාවනිචක්රවර්තිපදවීං ලබ්ධ්වා ප්රතාපෝන්නතඃ ।
යද්විද්යාධර බෘංදවංදිතපදඃ ශ්රීවත්සරාජෝऽභවත්
දේවි ත්වච්චරණාංබුජ ප්රණතිජඃ සෝऽයං ප්රසාදෝදයඃ ॥ 12 ॥
චංඩි ත්වච්චරණාංබුජාර්චනකෘතේ බිල්වාදිලෝල්ලුංඨන-
-ත්රුට්යත්කංටකකෝටිභිඃ පරිචයං යේෂාං න ජග්මුඃ කරාඃ ।
තේ දංඩාංකුශචක්රචාපකුලිශශ්රීවත්සමත්ස්යාංකිතෛඃ
ජායංතේ පෘථිවීභුජඃ කථමිවාංභෝජප්රභෛඃ පාණිභිඃ ॥ 13 ॥
විප්රාඃ ක්ෂෝණිභුජෝ විශස්තදිතරේ ක්ෂීරාජ්යමධ්වාසවෛඃ ।
ත්වාං දේවි ත්රිපුරේ පරාපරමයීං සංතර්ප්ය පූජාවිධෞ ।
යාං යාං ප්රාර්ථයතේ මනඃ ස්ථිරධියාං තේෂාං ත ඒව ධ්රුවං
තාං තාං සිද්ධිමවාප්නුවංති තරසා විඝ්නෛරවිඝ්නීකෘතාඃ ॥ 14 ॥
ශබ්දානාං ජනනී ත්වමත්ර භුවනේ වාග්වාදිනීත්යුච්යසේ
ත්වත්තඃ කේශවවාසව ප්රභෘතයෝऽප්යාවිර්භවංති ස්ඵුටම් ।
ලීයංතේ ඛලු යත්ර කල්පවිරමේ බ්රහ්මාදයස්තේऽප්යමී
සා ත්වං කාචිදචිංත්යරූපමහිමා ශක්තිඃ පරා ගීයසේ ॥ 15 ॥
දේවානාං ත්රිතයං ත්රයී හුතභුජාං ශක්තිත්රයං ත්රිඃ ස්වරාඃ
ත්රෛලෝක්යං ත්රිපදී ත්රිපුෂ්කරමථෝ ත්රිබ්රහ්ම වර්ණාස්ත්රයඃ ।
යත්කිංචිජ්ජගති ත්රිධා නියමිතං වස්තු ත්රිවර්ගාදිකං
තත්සර්වං ත්රිපුරේති නාම භගවත්යන්වේති තේ තත්ත්වතඃ ॥ 16 ॥
ලක්ෂ්මීං රාජකුලේ ජයාං රණභුවි ක්ෂේමංකරීමධ්වනි
ක්රව්යාදද්විපසර්පභාජි ශබරීං කාංතාරදුර්ගේ ගිරෞ ।
භූතප්රේතපිශාචජංබුකභයේ ස්මෘත්වා මහාභෛරවීං
ව්යාමෝහේ ත්රිපුරාං තරංති විපදස්තාරාං ච තෝයප්ලවේ ॥ 17 ॥
මායා කුංඩලිනී ක්රියා මධුමතී කාලී කලාමාලිනී
මාතංගී විජයා ජයා භගවතී දේවී ශිවා ශාංභවී ।
ශක්තිඃ ශංකරවල්ලභා ත්රිනයනා වාග්වාදිනී භෛරවී
හ්රීංකාරී ත්රිපුරා පරාපරමයී මාතා කුමාරීත්යසි ॥ 18 ॥
ආඊපල්ලවිතෛඃ පරස්පරයුතෛර්ද්විත්රික්රමාද්යක්ෂරෛ
කාද්යෛඃ ක්ෂාංතගතෛඃ ස්වරාදිභිරථ ක්ෂාංතෛශ්ච තෛඃ සස්වරෛඃ ।
නාමානි ත්රිපුරේ භවංති ඛලු යාන්යත්යංතගුහ්යානි තේ
තේභ්යෝ භෛරවපත්නි විංශතිසහස්රේභ්යඃ පරේභ්යෝ නමඃ ॥ 19 ॥
බෝද්ධව්යා නිපුණං බුධෛඃ ස්තුතිරියං කෘත්වා මනස්තද්ගතං
භාරත්යාස්ත්රිපුරේත්යනන්යමනසා යත්රාද්යවෘත්තේ ස්ඵුටම් ।
ඒකද්විත්රිපදක්රමේණ කථිතස්තත්පාදසංඛ්යාක්ෂරෛඃ
මංත්රෝද්ධාර විධිර්විශේෂසහිතඃ සත්සංප්රදායාන්විතඃ ॥ 20 ॥
සාවද්යං නිරවද්යමස්තු යදි වා කිං වානයා චිංතයා
නූනං ස්තෝත්රමිදං පඨිෂ්යති ජනෝ යස්යාස්ති භක්තිස්ත්වයි ।
සංචිංත්යාපි ලඝුත්වමාත්මනි දෘඪං සංජායමානං හඨාත්
ත්වද්භක්ත්යා මුඛරීකෘතේන රචිතං යස්මාන්මයාපි ධෘවම් ॥ 21 ॥
ඉති ශ්රීකාළිදාස විරචිත පංචස්තව්යාං ප්රථමඃ ලඝුස්තවඃ ।
