ଜୟ ପଦ୍ମପଲାଶାକ୍ଷି ଜୟ ତ୍ଵଂ ଶ୍ରୀପତିପ୍ରିୟେ ।
ଜୟ ମାତର୍ମହାଲକ୍ଷ୍ମି ସଂସାରାର୍ଣଵତାରିଣି ॥ 1 ॥

ମହାଲକ୍ଷ୍ମି ନମସ୍ତୁଭ୍ୟଂ ନମସ୍ତୁଭ୍ୟଂ ସୁରେଶ୍ଵରି ।
ହରିପ୍ରିୟେ ନମସ୍ତୁଭ୍ୟଂ ନମସ୍ତୁଭ୍ୟଂ ଦୟାନିଧେ ॥ 2 ॥

ପଦ୍ମାଲୟେ ନମସ୍ତୁଭ୍ୟଂ ନମସ୍ତୁଭ୍ୟଂ ଚ ସର୍ଵଦେ ।
ସର୍ଵଭୂତହିତାର୍ଥାୟ ଵସୁଵୃଷ୍ଟିଂ ସଦା କୁରୁ ॥ 3 ॥

ଜଗନ୍ମାତର୍ନମସ୍ତୁଭ୍ୟଂ ନମସ୍ତୁଭ୍ୟଂ ଦୟାନିଧେ ।
ଦୟାଵତି ନମସ୍ତୁଭ୍ୟଂ ଵିଶ୍ଵେଶ୍ଵରି ନମୋଽସ୍ତୁ ତେ ॥ 4 ॥

ନମଃ କ୍ଷୀରାର୍ଣଵସୁତେ ନମସ୍ତ୍ରୈଲୋକ୍ୟଧାରିଣି ।
ଵସୁଵୃଷ୍ଟେ ନମସ୍ତୁଭ୍ୟଂ ରକ୍ଷ ମାଂ ଶରଣାଗତମ୍ ॥ 5 ॥

ରକ୍ଷ ତ୍ଵଂ ଦେଵଦେଵେଶି ଦେଵଦେଵସ୍ୟ ଵଲ୍ଲଭେ ।
ଦାରିଦ୍ର୍ୟାତ୍ତ୍ରାହି ମାଂ ଲକ୍ଷ୍ମି କୃପାଂ କୁରୁ ମମୋପରି ॥ 6 ॥

ନମସ୍ତ୍ରୈଲୋକ୍ୟଜନନି ନମସ୍ତ୍ରୈଲୋକ୍ୟପାଵନି ।
ବ୍ରହ୍ମାଦୟୋ ନମଂତି ତ୍ଵାଂ ଜଗଦାନଂଦଦାୟିନି ॥ 7 ॥

ଵିଷ୍ଣୁପ୍ରିୟେ ନମସ୍ତୁଭ୍ୟଂ ନମସ୍ତୁଭ୍ୟଂ ଜଗଦ୍ଧିତେ ।
ଆର୍ତିହଂତ୍ରି ନମସ୍ତୁଭ୍ୟଂ ସମୃଦ୍ଧିଂ କୁରୁ ମେ ସଦା ॥ 8 ॥

ଅବ୍ଜଵାସେ ନମସ୍ତୁଭ୍ୟଂ ଚପଲାୟୈ ନମୋ ନମଃ ।
ଚଂଚଲାୟୈ ନମସ୍ତୁଭ୍ୟଂ ଲଲିତାୟୈ ନମୋ ନମଃ ॥ 9 ॥

ନମଃ ପ୍ରଦ୍ୟୁମ୍ନଜନନି ମାତସ୍ତୁଭ୍ୟଂ ନମୋ ନମଃ ।
ପରିପାଲୟ ମାଂ ମାତଃ ମାଂ ତୁଭ୍ୟଂ ଶରଣାଗତମ୍ ॥ 10 ॥

ଶରଣ୍ୟେ ତ୍ଵାଂ ପ୍ରପନ୍ନୋଽସ୍ମି କମଲେ କମଲାଲୟେ ।
ତ୍ରାହି ତ୍ରାହି ମହାଲକ୍ଷ୍ମି ପରିତ୍ରାଣପରାୟଣେ ॥ 11 ॥

ପାଂଡିତ୍ୟଂ ଶୋଭତେ ନୈଵ ନ ଶୋଭଂତେ ଗୁଣା ନରେ ।
ଶୀଲତ୍ଵଂ ନୈଵ ଶୋଭେତ ମହାଲକ୍ଷ୍ମି ତ୍ଵୟା ଵିନା ॥ 12 ॥

ତାଵଦ୍ଵିରାଜତେ ରୂପଂ ତାଵଚ୍ଛୀଲଂ ଵିରାଜତେ ।
ତାଵଦ୍ଗୁଣା ନରାଣାଂ ଚ ୟାଵଲ୍ଲକ୍ଷ୍ମୀଃ ପ୍ରସୀଦତି ॥ 13 ॥

ଲକ୍ଷ୍ମି ତ୍ଵୟାଽଲଂକୃତମାନଵା ୟେ
ପାପୈର୍ଵିମୁକ୍ତା ନୃପଲୋକମାନ୍ୟାଃ ।
ଗୁଣୈର୍ଵିହୀନା ଗୁଣିନୋ ଭଵଂତି
ଦୁଶ୍ଶୀଲିନଃ ଶୀଲଵତାଂ ଵରିଷ୍ଠାଃ ॥ 14 ॥

ଲକ୍ଷ୍ମୀର୍ଭୂଷୟତେ ରୂପଂ ଲକ୍ଷ୍ମୀର୍ଭୂଷୟତେ କୁଲମ୍ ।
ଲକ୍ଷ୍ମୀର୍ଭୂଷୟତେ ଵିଦ୍ୟାଂ ସର୍ଵା ଲକ୍ଷ୍ମୀର୍ଵିଶିଷ୍ୟତେ ॥ 15 ॥

ଲକ୍ଷ୍ମୀ ତ୍ଵଦ୍ଗୁଣକୀର୍ତନେନ କମଲା ଭୂର୍ୟାତ୍ୟଲଂ ଜିହ୍ମତାମ୍
ରୁଦ୍ରାଦ୍ୟା ରଵିଚଂଦ୍ରଦେଵପତୟୋ ଵକ୍ତୁଂ ଚ ନୈଵ କ୍ଷମାଃ ।
ଅସ୍ମାଭିସ୍ତଵ ରୂପଲକ୍ଷଣଗୁଣାନ୍ଵକ୍ତୁଂ କଥଂ ଶକ୍ୟତେ
ମାତର୍ମାଂ ପରିପାହି ଵିଶ୍ଵଜନନୀ କୃତ୍ଵା ମମେଷ୍ଟଂ ଧ୍ରୁଵମ୍ ॥ 16 ॥

ଦୀନାର୍ତିଭୀତଂ ଭଵତାପପୀଡିତଂ
ଧନୈର୍ଵିହୀନଂ ତଵ ପାର୍ଶ୍ଵମାଗତମ୍ ।
କୃପାନିଧିତ୍ଵାନ୍ମମ ଲକ୍ଷ୍ମି ସତ୍ଵରଂ
ଧନପ୍ରଦାନାଦ୍ଧନନାୟକଂ କୁରୁ ॥ 17 ॥

ମାଂ ଵିଲୋକ୍ୟ ଜନନୀ ହରିପ୍ରିୟେ
ନିର୍ଧନଂ ତଵ ସମୀପମାଗତମ୍ ।
ଦେହି ମେ ଝଟିତି ଲକ୍ଷ୍ମି କରାଗ୍ରଂ
ଵସ୍ତ୍ରକାଂଚନଵରାନ୍ନମଦ୍ଭୁତମ୍ ॥ 18 ॥

ତ୍ଵମେଵ ଜନନୀ ଲକ୍ଷ୍ମୀଃ ପିତା ଲକ୍ଷ୍ମୀସ୍ତ୍ଵମେଵ ଚ ।
ଭ୍ରାତା ତ୍ଵଂ ଚ ସଖା ଲକ୍ଷ୍ମୀର୍ଵିଦ୍ୟା ଲକ୍ଷ୍ମୀସ୍ତ୍ଵମେଵ ଚ ॥ 19 ॥

ତ୍ରାହି ତ୍ରାହି ମହାଲକ୍ଷ୍ମି ତ୍ରାହି ତ୍ରାହି ସୁରେଶ୍ଵରି ।
ତ୍ରାହି ତ୍ରାହି ଜଗନ୍ମାତଃ ଦାରିଦ୍ର୍ୟାତ୍ତ୍ରାହି ଵେଗତଃ ॥ 20 ॥

ନମସ୍ତୁଭ୍ୟଂ ଜଗଦ୍ଧାତ୍ରି ନମସ୍ତୁଭ୍ୟଂ ନମୋ ନମଃ ।
ଧର୍ମାଧାରେ ନମସ୍ତୁଭ୍ୟଂ ନମଃ ସଂପତ୍ତିଦାୟିନୀ ॥ 21 ॥

ଦାରିଦ୍ର୍ୟାର୍ଣଵମଗ୍ନୋଽହଂ ନିମଗ୍ନୋଽହଂ ରସାତଲେ ।
ମଜ୍ଜଂତଂ ମାଂ କରେ ଧୃତ୍ଵା ତୂଦ୍ଧର ତ୍ଵଂ ରମେ ଦ୍ରୁତମ୍ ॥ 22 ॥

କିଂ ଲକ୍ଷ୍ମି ବହୁନୋକ୍ତେନ ଜଲ୍ପିତେନ ପୁନଃ ପୁନଃ ।
ଅନ୍ୟନ୍ମେ ଶରଣଂ ନାସ୍ତି ସତ୍ୟଂ ସତ୍ୟଂ ହରିପ୍ରିୟେ ॥ 23 ॥

ଏତଚ୍ଛ୍ରୁତ୍ଵାଽଗସ୍ତ୍ୟଵାକ୍ୟଂ ହୃଷ୍ୟମାଣା ହରିପ୍ରିୟା ।
ଉଵାଚ ମଧୁରାଂ ଵାଣୀଂ ତୁଷ୍ଟାଽହଂ ତଵ ସର୍ଵଦା ॥ 24 ॥

ଶ୍ରୀଲକ୍ଷ୍ମୀରୁଵାଚ ।
ୟତ୍ତ୍ଵୟୋକ୍ତମିଦଂ ସ୍ତୋତ୍ରଂ ୟଃ ପଠିଷ୍ୟତି ମାନଵଃ ।
ଶୃଣୋତି ଚ ମହାଭାଗସ୍ତସ୍ୟାହଂ ଵଶଵର୍ତିନୀ ॥ 25 ॥

ନିତ୍ୟଂ ପଠତି ୟୋ ଭକ୍ତ୍ୟା ତ୍ଵଲକ୍ଷ୍ମୀସ୍ତସ୍ୟ ନଶ୍ୟତି ।
ଋଣଂ ଚ ନଶ୍ୟତେ ତୀଵ୍ରଂ ଵିୟୋଗଂ ନୈଵ ପଶ୍ୟତି ॥ 26 ॥

ୟଃ ପଠେତ୍ପ୍ରାତରୁତ୍ଥାୟ ଶ୍ରଦ୍ଧାଭକ୍ତିସମନ୍ଵିତଃ ।
ଗୃହେ ତସ୍ୟ ସଦା ତିଷ୍ଟେନ୍ନିତ୍ୟଂ ଶ୍ରୀଃ ପତିନା ସହ ॥ 27 ॥

ସୁଖସୌଭାଗ୍ୟସଂପନ୍ନୋ ମନସ୍ଵୀ ବୁଦ୍ଧିମାନ୍ଭଵେତ୍ ।
ପୁତ୍ରଵାନ୍ ଗୁଣଵାନ୍ ଶ୍ରେଷ୍ଠୋ ଭୋଗଭୋକ୍ତା ଚ ମାନଵଃ ॥ 28 ॥

ଇଦଂ ସ୍ତୋତ୍ରଂ ମହାପୁଣ୍ୟଂ ଲକ୍ଷ୍ମ୍ୟାଗସ୍ତ୍ୟପ୍ରକୀର୍ତିତମ୍ ।
ଵିଷ୍ଣୁପ୍ରସାଦଜନନଂ ଚତୁର୍ଵର୍ଗଫଲପ୍ରଦମ୍ ॥ 29 ॥

ରାଜଦ୍ଵାରେ ଜୟଶ୍ଚୈଵ ଶତ୍ରୋଶ୍ଚୈଵ ପରାଜୟଃ ।
ଭୂତପ୍ରେତପିଶାଚାନାଂ ଵ୍ୟାଘ୍ରାଣାଂ ନ ଭୟଂ ତଥା ॥ 30 ॥

ନ ଶସ୍ତ୍ରାନଲତୋୟୌଘାଦ୍ଭୟଂ ତସ୍ୟ ପ୍ରଜାୟତେ ।
ଦୁର୍ଵୃତ୍ତାନାଂ ଚ ପାପାନାଂ ବହୁହାନିକରଂ ପରମ୍ ॥ 31 ॥

ମଂଦୁରାକରିଶାଲାସୁ ଗଵାଂ ଗୋଷ୍ଠେ ସମାହିତଃ ।
ପଠେତ୍ତଦ୍ଦୋଷଶାଂତ୍ୟର୍ଥଂ ମହାପାତକନାଶନମ୍ ॥ 32 ॥

ସର୍ଵସୌଖ୍ୟକରଂ ନୄଣାମାୟୁରାରୋଗ୍ୟଦଂ ତଥା ।
ଅଗସ୍ତ୍ୟମୁନିନା ପ୍ରୋକ୍ତଂ ପ୍ରଜାନାଂ ହିତକାମ୍ୟୟା ॥ 33 ॥

ଇତ୍ୟଗସ୍ତ୍ୟଵିରଚିତଂ ଶ୍ରୀ ଲକ୍ଷ୍ମୀ ସ୍ତୋତ୍ରମ୍ ।