ଐଂଦ୍ରସ୍ୟେଵ ଶରାସନସ୍ୟ ଦଧତୀ ମଧ୍ୟେଲଲାଟଂ ପ୍ରଭାଂ
ଶୌକ୍ଲୀଂ କାଂତିମନୁଷ୍ଣଗୋରିଵ ଶିରସ୍ୟାତନ୍ଵତୀ ସର୍ଵତଃ ।
ଏଷାସୌ ତ୍ରିପୁରା ହୃଦି ଦ୍ୟୁତିରିଵୋଷ୍ଣାଂଶୋଃ ସଦାହଃ ସ୍ଥିତାତ୍
ଛିଂଦ୍ୟାନ୍ନଃ ସହସା ପଦୈସ୍ତ୍ରିଭିରଘଂ ଜ୍ୟୋତିର୍ମୟୀ ଵାଙ୍ମୟୀ ॥ 1 ॥
ୟା ମାତ୍ରା ତ୍ରପୁସୀଲତାତନୁଲସତ୍ତଂତୂତ୍ଥିତିସ୍ପର୍ଧିନୀ
ଵାଗ୍ବୀଜେ ପ୍ରଥମେ ସ୍ଥିତା ତଵ ସଦା ତାଂ ମନ୍ମହେ ତେ ଵୟମ୍ ।
ଶକ୍ତିଃ କୁଂଡଲିନୀତି ଵିଶ୍ଵଜନନଵ୍ୟାପାରବଦ୍ଧୋଦ୍ୟମାଃ
ଜ୍ଞାତ୍ଵେତ୍ଥଂ ନ ପୁନଃ ସ୍ପୃଶଂତି ଜନନୀଗର୍ଭେଽର୍ଭକତ୍ଵଂ ନରାଃ ॥ 2 ॥
ଦୃଷ୍ଟ୍ଵା ସଂଭ୍ରମକାରି ଵସ୍ତୁ ସହସା ଐ ଐ ଇତି ଵ୍ୟାହୃତଂ
ୟେନାକୂତଵଶାଦପୀହ ଵରଦେ ବିଂଦୁଂ ଵିନାପ୍ୟକ୍ଷରମ୍ ।
ତସ୍ୟାପି ଧ୍ରୁଵମେଵ ଦେଵି ତରସା ଜାତେ ତଵାନୁଗ୍ରହେ
ଵାଚଃସୂକ୍ତିସୁଧାରସଦ୍ରଵମୁଚୋ ନିର୍ୟାଂତି ଵକ୍ତ୍ରାଂବୁଜାତ୍ ॥ 3 ॥
ୟନ୍ନିତ୍ୟେ ତଵ କାମରାଜମପରଂ ମଂତ୍ରାକ୍ଷରଂ ନିଷ୍କଲଂ
ତତ୍ସାରସ୍ଵତମିତ୍ୟଵୈତି ଵିରଲଃ କଶ୍ଚିଦ୍ବୁଧଶ୍ଚେଦ୍ଭୁଵି ।
ଆଖ୍ୟାନଂ ପ୍ରତିପର୍ଵ ସତ୍ୟତପସୋ ୟତ୍କୀର୍ତୟଂତୋ ଦ୍ଵିଜାଃ
ପ୍ରାରଂଭେ ପ୍ରଣଵାସ୍ପଦପ୍ରଣୟିତାଂ ନୀତ୍ଵୋଚ୍ଚରଂତି ସ୍ଫୁଟମ୍ ॥ 4 ॥
ୟତ୍ସଦ୍ୟୋ ଵଚସାଂ ପ୍ରଵୃତ୍ତିକରଣେ ଦୃଷ୍ଟପ୍ରଭାଵଂ ବୁଧୈଃ
ତାର୍ତୀୟଂ ତଦହଂ ନମାମି ମନସା ତ୍ଵଦ୍ବୀଜମିଂଦୁପ୍ରଭମ୍ ।
ଅସ୍ତ୍ୟୌର୍ଵୋଽପି ସରସ୍ଵତୀମନୁଗତୋ ଜାଡ୍ୟାଂବୁଵିଚ୍ଛିତ୍ତୟେ
ଗୋଶବ୍ଦୋ ଗିରି ଵର୍ତତେ ସନିୟତଂ ୟୋଗଂ ଵିନା ସିଦ୍ଧିଦଃ ॥ 5 ॥
ଏକୈକଂ ତଵ ଦେଵି ବୀଜମନଘଂ ସଵ୍ୟଂଜନାଵ୍ୟଂଜନଂ
କୂଟସ୍ଥଂ ୟଦି ଵା ପୃଥକ୍ କ୍ରମଗତଂ ୟଦ୍ଵା ସ୍ଥିତଂ ଵ୍ୟୁତ୍କ୍ରମାତ୍ ।
ୟଂ ୟଂ କାମମପେକ୍ଷ୍ୟ ୟେନ ଵିଧିନା କେନାପି ଵା ଚିଂତିତଂ
ଜପ୍ତଂ ଵା ସଫଲୀକରୋତି ସତତଂ ତଂ ତଂ ସମସ୍ତଂ ନୃଣାମ୍ ॥ 6 ॥
ଵାମେ ପୁସ୍ତକଧାରିଣୀମଭୟଦାଂ ସାକ୍ଷସ୍ରଜଂ ଦକ୍ଷିଣେ
ଭକ୍ତେଭ୍ୟୋ ଵରଦାନପେଶଲକରାଂ କର୍ପୂରକୁଂଦୋଜ୍ଜ୍ଵଲାମ୍ ।
ଉଜ୍ଜୃଂଭାଂବୁଜପତ୍ରକାଂତିନୟନସ୍ନିଗ୍ଧପ୍ରଭାଲୋକିନୀଂ
ୟେ ତ୍ଵାମଂବ ନ ଶୀଲୟଂତି ମନସା ତେଷାଂ କଵିତ୍ଵଂ କୁତଃ ॥ 7 ॥
ୟେ ତ୍ଵାଂ ପାଂଡୁରପୁଂଡରୀକପଟଲସ୍ପଷ୍ଟାଭିରାମପ୍ରଭାଂ
ସିଂଚଂତୀମମୃତଦ୍ରଵୈରିଵ ଶିରୋ ଧ୍ୟାୟଂତି ମୂର୍ଧ୍ନି ସ୍ଥିତାମ୍ ।
ଅଶ୍ରାଂତା ଵିକଟସ୍ଫୁଟାକ୍ଷରପଦା ନିର୍ୟାତି ଵକ୍ତ୍ରାଂବୁଜାତ୍
ତେଷାଂ ଭାରତି ଭାରତୀ ସୁରସରିତ୍କଲ୍ଲୋଲଲୋଲୋର୍ମିଵତ୍ ॥ 8 ॥
ୟେ ସିଂଦୂରପରାଗପିଂଜପିହିତାଂ ତ୍ଵତ୍ତେଜସାଦ୍ୟାମିମାଂ
ଉର୍ଵୀଂ ଚାପି ଵିଲୀନୟାଵକରସପ୍ରସ୍ତାରମଗ୍ନାମିଵ ।
ପଶ୍ୟଂତି କ୍ଷଣମପ୍ୟନନ୍ୟମନସସ୍ତେଷାମନଂଗଜ୍ଵର-
-କ୍ଲାଂତସ୍ରସ୍ତକୁରଂଗଶାବକଦୃଶୋ ଵଶ୍ୟା ଭଵଂତି ସ୍ଫୁଟମ୍ ॥ 9 ॥
ଚଂଚତ୍କାଂଚନକୁଂଡଲାଂଗଦଧରାମାବଦ୍ଧକାଂଚୀସ୍ରଜଂ
ୟେ ତ୍ଵାଂ ଚେତସି ତଦ୍ଗତେ କ୍ଷଣମପି ଧ୍ୟାୟଂତି କୃତ୍ଵା ସ୍ଥିରାମ୍ ।
ତେଷାଂ ଵେଶ୍ମସୁ ଵିଭ୍ରମାଦହରହଃ ସ୍ଫାରୀଭଵଂତ୍ୟଶ୍ଚିରଂ
ମାଦ୍ୟତ୍କୁଂଜରକର୍ଣତାଲତରଲାଃ ସ୍ଥୈର୍ୟଂ ଭଜଂତେ ଶ୍ରିୟଃ ॥ 10 ॥
ଆର୍ଭଟ୍ୟା ଶଶିଖଂଡମଂଡିତଜଟାଜୂଟାଂ ନୃମୁଂଡସ୍ରଜଂ
ବଂଧୂକପ୍ରସଵାରୁଣାଂବରଧରାଂ ପ୍ରେତାସନାଧ୍ୟାସିନୀମ୍ ।
ତ୍ଵାଂ ଧ୍ୟାୟଂତି ଚତୁର୍ଭୁଜାଂ ତ୍ରିନୟନାମାପୀନତୁଂଗସ୍ତନୀଂ
ମଧ୍ୟେ ନିମ୍ନଵଲିତ୍ରୟାଂକିତତନୁଂ ତ୍ଵଦ୍ରୂପସଂଵିତ୍ତୟେ ॥ 11 ॥
ଜାତୋଽପ୍ୟଲ୍ପପରିଚ୍ଛଦେ କ୍ଷିତିଭୁଜାଂ ସାମାନ୍ୟମାତ୍ରେ କୁଲେ
ନିଃଶେଷାଵନିଚକ୍ରଵର୍ତିପଦଵୀଂ ଲବ୍ଧ୍ଵା ପ୍ରତାପୋନ୍ନତଃ ।
ୟଦ୍ଵିଦ୍ୟାଧର ବୃଂଦଵଂଦିତପଦଃ ଶ୍ରୀଵତ୍ସରାଜୋଽଭଵତ୍
ଦେଵି ତ୍ଵଚ୍ଚରଣାଂବୁଜ ପ୍ରଣତିଜଃ ସୋଽୟଂ ପ୍ରସାଦୋଦୟଃ ॥ 12 ॥
ଚଂଡି ତ୍ଵଚ୍ଚରଣାଂବୁଜାର୍ଚନକୃତେ ବିଲ୍ଵାଦିଲୋଲ୍ଲୁଂଠନ-
-ତ୍ରୁଟ୍ୟତ୍କଂଟକକୋଟିଭିଃ ପରିଚୟଂ ୟେଷାଂ ନ ଜଗ୍ମୁଃ କରାଃ ।
ତେ ଦଂଡାଂକୁଶଚକ୍ରଚାପକୁଲିଶଶ୍ରୀଵତ୍ସମତ୍ସ୍ୟାଂକିତୈଃ
ଜାୟଂତେ ପୃଥିଵୀଭୁଜଃ କଥମିଵାଂଭୋଜପ୍ରଭୈଃ ପାଣିଭିଃ ॥ 13 ॥
ଵିପ୍ରାଃ କ୍ଷୋଣିଭୁଜୋ ଵିଶସ୍ତଦିତରେ କ୍ଷୀରାଜ୍ୟମଧ୍ଵାସଵୈଃ ।
ତ୍ଵାଂ ଦେଵି ତ୍ରିପୁରେ ପରାପରମୟୀଂ ସଂତର୍ପ୍ୟ ପୂଜାଵିଧୌ ।
ୟାଂ ୟାଂ ପ୍ରାର୍ଥୟତେ ମନଃ ସ୍ଥିରଧିୟାଂ ତେଷାଂ ତ ଏଵ ଧ୍ରୁଵଂ
ତାଂ ତାଂ ସିଦ୍ଧିମଵାପ୍ନୁଵଂତି ତରସା ଵିଘ୍ନୈରଵିଘ୍ନୀକୃତାଃ ॥ 14 ॥
ଶବ୍ଦାନାଂ ଜନନୀ ତ୍ଵମତ୍ର ଭୁଵନେ ଵାଗ୍ଵାଦିନୀତ୍ୟୁଚ୍ୟସେ
ତ୍ଵତ୍ତଃ କେଶଵଵାସଵ ପ୍ରଭୃତୟୋଽପ୍ୟାଵିର୍ଭଵଂତି ସ୍ଫୁଟମ୍ ।
ଲୀୟଂତେ ଖଲୁ ୟତ୍ର କଲ୍ପଵିରମେ ବ୍ରହ୍ମାଦୟସ୍ତେଽପ୍ୟମୀ
ସା ତ୍ଵଂ କାଚିଦଚିଂତ୍ୟରୂପମହିମା ଶକ୍ତିଃ ପରା ଗୀୟସେ ॥ 15 ॥
ଦେଵାନାଂ ତ୍ରିତୟଂ ତ୍ରୟୀ ହୁତଭୁଜାଂ ଶକ୍ତିତ୍ରୟଂ ତ୍ରିଃ ସ୍ଵରାଃ
ତ୍ରୈଲୋକ୍ୟଂ ତ୍ରିପଦୀ ତ୍ରିପୁଷ୍କରମଥୋ ତ୍ରିବ୍ରହ୍ମ ଵର୍ଣାସ୍ତ୍ରୟଃ ।
ୟତ୍କିଂଚିଜ୍ଜଗତି ତ୍ରିଧା ନିୟମିତଂ ଵସ୍ତୁ ତ୍ରିଵର୍ଗାଦିକଂ
ତତ୍ସର୍ଵଂ ତ୍ରିପୁରେତି ନାମ ଭଗଵତ୍ୟନ୍ଵେତି ତେ ତତ୍ତ୍ଵତଃ ॥ 16 ॥
ଲକ୍ଷ୍ମୀଂ ରାଜକୁଲେ ଜୟାଂ ରଣଭୁଵି କ୍ଷେମଂକରୀମଧ୍ଵନି
କ୍ରଵ୍ୟାଦଦ୍ଵିପସର୍ପଭାଜି ଶବରୀଂ କାଂତାରଦୁର୍ଗେ ଗିରୌ ।
ଭୂତପ୍ରେତପିଶାଚଜଂବୁକଭୟେ ସ୍ମୃତ୍ଵା ମହାଭୈରଵୀଂ
ଵ୍ୟାମୋହେ ତ୍ରିପୁରାଂ ତରଂତି ଵିପଦସ୍ତାରାଂ ଚ ତୋୟପ୍ଲଵେ ॥ 17 ॥
ମାୟା କୁଂଡଲିନୀ କ୍ରିୟା ମଧୁମତୀ କାଲୀ କଲାମାଲିନୀ
ମାତଂଗୀ ଵିଜୟା ଜୟା ଭଗଵତୀ ଦେଵୀ ଶିଵା ଶାଂଭଵୀ ।
ଶକ୍ତିଃ ଶଂକରଵଲ୍ଲଭା ତ୍ରିନୟନା ଵାଗ୍ଵାଦିନୀ ଭୈରଵୀ
ହ୍ରୀଂକାରୀ ତ୍ରିପୁରା ପରାପରମୟୀ ମାତା କୁମାରୀତ୍ୟସି ॥ 18 ॥
ଆଈପଲ୍ଲଵିତୈଃ ପରସ୍ପରୟୁତୈର୍ଦ୍ଵିତ୍ରିକ୍ରମାଦ୍ୟକ୍ଷରୈ
କାଦ୍ୟୈଃ କ୍ଷାଂତଗତୈଃ ସ୍ଵରାଦିଭିରଥ କ୍ଷାଂତୈଶ୍ଚ ତୈଃ ସସ୍ଵରୈଃ ।
ନାମାନି ତ୍ରିପୁରେ ଭଵଂତି ଖଲୁ ୟାନ୍ୟତ୍ୟଂତଗୁହ୍ୟାନି ତେ
ତେଭ୍ୟୋ ଭୈରଵପତ୍ନି ଵିଂଶତିସହସ୍ରେଭ୍ୟଃ ପରେଭ୍ୟୋ ନମଃ ॥ 19 ॥
ବୋଦ୍ଧଵ୍ୟା ନିପୁଣଂ ବୁଧୈଃ ସ୍ତୁତିରିୟଂ କୃତ୍ଵା ମନସ୍ତଦ୍ଗତଂ
ଭାରତ୍ୟାସ୍ତ୍ରିପୁରେତ୍ୟନନ୍ୟମନସା ୟତ୍ରାଦ୍ୟଵୃତ୍ତେ ସ୍ଫୁଟମ୍ ।
ଏକଦ୍ଵିତ୍ରିପଦକ୍ରମେଣ କଥିତସ୍ତତ୍ପାଦସଂଖ୍ୟାକ୍ଷରୈଃ
ମଂତ୍ରୋଦ୍ଧାର ଵିଧିର୍ଵିଶେଷସହିତଃ ସତ୍ସଂପ୍ରଦାୟାନ୍ଵିତଃ ॥ 20 ॥
ସାଵଦ୍ୟଂ ନିରଵଦ୍ୟମସ୍ତୁ ୟଦି ଵା କିଂ ଵାନୟା ଚିଂତୟା
ନୂନଂ ସ୍ତୋତ୍ରମିଦଂ ପଠିଷ୍ୟତି ଜନୋ ୟସ୍ୟାସ୍ତି ଭକ୍ତିସ୍ତ୍ଵୟି ।
ସଂଚିଂତ୍ୟାପି ଲଘୁତ୍ଵମାତ୍ମନି ଦୃଢଂ ସଂଜାୟମାନଂ ହଠାତ୍
ତ୍ଵଦ୍ଭକ୍ତ୍ୟା ମୁଖରୀକୃତେନ ରଚିତଂ ୟସ୍ମାନ୍ମୟାପି ଧୃଵମ୍ ॥ 21 ॥
ଇତି ଶ୍ରୀକାଳିଦାସ ଵିରଚିତ ପଂଚସ୍ତଵ୍ୟାଂ ପ୍ରଥମଃ ଲଘୁସ୍ତଵଃ ।
