ନିଶୁଂଭଵଧୋନାମ ନଵମୋଧ୍ୟାୟଃ ॥
ଧ୍ୟାନଂ
ଓଂ ବଂଧୂକ କାଂଚନନିଭଂ ରୁଚିରାକ୍ଷମାଲାଂ
ପାଶାଂକୁଶୌ ଚ ଵରଦାଂ ନିଜବାହୁଦଂଡୈଃ ।
ବିଭ୍ରାଣମିଂଦୁ ଶକଲାଭରଣାଂ ତ୍ରିନେତ୍ରାଂ-
ଅର୍ଧାଂବିକେଶମନିଶଂ ଵପୁରାଶ୍ରୟାମି ॥
ରାଜୌଵାଚ॥1॥
ଵିଚିତ୍ରମିଦମାଖ୍ୟାତଂ ଭଗଵନ୍ ଭଵତା ମମ ।
ଦେଵ୍ୟାଶ୍ଚରିତମାହାତ୍ମ୍ୟଂ ରକ୍ତ ବୀଜଵଧାଶ୍ରିତମ୍ ॥ 2॥
ଭୂୟଶ୍ଚେଚ୍ଛାମ୍ୟହଂ ଶ୍ରୋତୁଂ ରକ୍ତବୀଜେ ନିପାତିତେ ।
ଚକାର ଶୁଂଭୋ ୟତ୍କର୍ମ ନିଶୁଂଭଶ୍ଚାତିକୋପନଃ ॥3॥
ଋଷିରୁଵାଚ ॥4॥
ଚକାର କୋପମତୁଲଂ ରକ୍ତବୀଜେ ନିପାତିତେ।
ଶୁଂଭାସୁରୋ ନିଶୁଂଭଶ୍ଚ ହତେଷ୍ଵନ୍ୟେଷୁ ଚାହଵେ ॥5॥
ହନ୍ୟମାନଂ ମହାସୈନ୍ୟଂ ଵିଲୋକ୍ୟାମର୍ଷମୁଦ୍ଵହନ୍।
ଅଭ୍ୟଦାଵନ୍ନିଶୁଂବୋଽଥ ମୁଖ୍ୟୟାସୁର ସେନୟା ॥6॥
ତସ୍ୟାଗ୍ରତସ୍ତଥା ପୃଷ୍ଠେ ପାର୍ଶ୍ଵୟୋଶ୍ଚ ମହାସୁରାଃ
ସଂଦଷ୍ଟୌଷ୍ଠପୁଟାଃ କ୍ରୁଦ୍ଧା ହଂତୁଂ ଦେଵୀମୁପାୟୟୁଃ ॥7॥
ଆଜଗାମ ମହାଵୀର୍ୟଃ ଶୁଂଭୋଽପି ସ୍ଵବଲୈର୍ଵୃତଃ।
ନିହଂତୁଂ ଚଂଡିକାଂ କୋପାତ୍କୃତ୍ଵା ୟୁଦ୍ଦଂ ତୁ ମାତୃଭିଃ ॥8॥
ତତୋ ୟୁଦ୍ଧମତୀଵାସୀଦ୍ଦେଵ୍ୟା ଶୁଂଭନିଶୁଂଭୟୋଃ।
ଶରଵର୍ଷମତୀଵୋଗ୍ରଂ ମେଘୟୋରିଵ ଵର୍ଷତୋଃ ॥9॥
ଚିଚ୍ଛେଦାସ୍ତାଂଛରାଂସ୍ତାଭ୍ୟାଂ ଚଂଡିକା ସ୍ଵଶରୋତ୍କରୈଃ।
ତାଡୟାମାସ ଚାଂଗେଷୁ ଶସ୍ତ୍ରୌଘୈରସୁରେଶ୍ଵରୌ ॥10॥
ନିଶୁଂଭୋ ନିଶିତଂ ଖଡ୍ଗଂ ଚର୍ମ ଚାଦାୟ ସୁପ୍ରଭମ୍।
ଅତାଡୟନ୍ମୂର୍ଧ୍ନି ସିଂହଂ ଦେଵ୍ୟା ଵାହନମୁତ୍ତମମ୍॥11॥
ତାଡିତେ ଵାହନେ ଦେଵୀ କ୍ଷୁର ପ୍ରେଣାସିମୁତ୍ତମମ୍।
ଶୁଂଭସ୍ୟାଶୁ ଚିଚ୍ଛେଦ ଚର୍ମ ଚାପ୍ୟଷ୍ଟ ଚଂଦ୍ରକମ୍ ॥12॥
ଛିନ୍ନେ ଚର୍ମଣି ଖଡ୍ଗେ ଚ ଶକ୍ତିଂ ଚିକ୍ଷେପ ସୋଽସୁରଃ।
ତାମପ୍ୟସ୍ୟ ଦ୍ଵିଧା ଚକ୍ରେ ଚକ୍ରେଣାଭିମୁଖାଗତାମ୍॥13॥
କୋପାଧ୍ମାତୋ ନିଶୁଂଭୋଽଥ ଶୂଲଂ ଜଗ୍ରାହ ଦାନଵଃ।
ଆୟାତଂ ମୁଷ୍ଠିପାତେନ ଦେଵୀ ତଚ୍ଚାପ୍ୟଚୂର୍ଣୟତ୍॥14॥
ଆଵିଦ୍ଧ୍ୟାଥ ଗଦାଂ ସୋଽପି ଚିକ୍ଷେପ ଚଂଡିକାଂ ପ୍ରତି।
ସାପି ଦେଵ୍ୟାସ୍ ତ୍ରିଶୂଲେନ ଭିନ୍ନା ଭସ୍ମତ୍ଵମାଗତା॥15॥
ତତଃ ପରଶୁହସ୍ତଂ ତମାୟାଂତଂ ଦୈତ୍ୟପୁଂଗଵଂ।
ଆହତ୍ୟ ଦେଵୀ ବାଣୌଘୈରପାତୟତ ଭୂତଲେ॥16॥
ତସ୍ମିନ୍ନି ପତିତେ ଭୂମୌ ନିଶୁଂଭେ ଭୀମଵିକ୍ରମେ।
ଭ୍ରାତର୍ୟତୀଵ ସଂକ୍ରୁଦ୍ଧଃ ପ୍ରୟୟୌ ହଂତୁମଂବିକାମ୍॥17॥
ସ ରଥସ୍ଥସ୍ତଥାତ୍ୟୁଚ୍ଛୈ ର୍ଗୃହୀତପରମାୟୁଧୈଃ।
ଭୁଜୈରଷ୍ଟାଭିରତୁଲୈ ର୍ଵ୍ୟାପ୍ୟା ଶେଷଂ ବଭୌ ନଭଃ॥18॥
ତମାୟାଂତଂ ସମାଲୋକ୍ୟ ଦେଵୀ ଶଂଖମଵାଦୟତ୍।
ଜ୍ୟାଶବ୍ଦଂ ଚାପି ଧନୁଷ ଶ୍ଚକାରାତୀଵ ଦୁଃସହମ୍॥19॥
ପୂରୟାମାସ କକୁଭୋ ନିଜଘଂଟା ସ୍ଵନେନ ଚ।
ସମସ୍ତଦୈତ୍ୟସୈନ୍ୟାନାଂ ତେଜୋଵଧଵିଧାୟିନା॥20॥
ତତଃ ସିଂହୋ ମହାନାଦୈ ସ୍ତ୍ୟାଜିତେଭମହାମଦୈଃ।
ପୁରୟାମାସ ଗଗନଂ ଗାଂ ତଥୈଵ ଦିଶୋ ଦଶ॥21॥
ତତଃ କାଳୀ ସମୁତ୍ପତ୍ୟ ଗଗନଂ କ୍ଷ୍ମାମତାଡୟତ୍।
କରାଭ୍ୟାଂ ତନ୍ନିନାଦେନ ପ୍ରାକ୍ସ୍ଵନାସ୍ତେ ତିରୋହିତାଃ॥22॥
ଅଟ୍ଟାଟ୍ଟହାସମଶିଵଂ ଶିଵଦୂତୀ ଚକାର ହ।
ଵୈଃ ଶବ୍ଦୈରସୁରାସ୍ତ୍ରେସୁଃ ଶୁଂଭଃ କୋପଂ ପରଂ ୟୟୌ॥23॥
ଦୁରାତ୍ମଂ ସ୍ତିଷ୍ଟ ତିଷ୍ଠେତି ଵ୍ୟାଜ ହାରାଂବିକା ୟଦା।
ତଦା ଜୟେତ୍ୟଭିହିତଂ ଦେଵୈରାକାଶ ସଂସ୍ଥିତୈଃ॥24॥
ଶୁଂଭେନାଗତ୍ୟ ୟା ଶକ୍ତିର୍ମୁକ୍ତା ଜ୍ଵାଲାତିଭୀଷଣା।
ଆୟାଂତୀ ଵହ୍ନିକୂଟାଭା ସା ନିରସ୍ତା ମହୋଲ୍କୟା॥25॥
ସିଂହନାଦେନ ଶୁଂଭସ୍ୟ ଵ୍ୟାପ୍ତଂ ଲୋକତ୍ରୟାଂତରମ୍।
ନିର୍ଘାତନିଃସ୍ଵନୋ ଘୋରୋ ଜିତଵାନଵନୀପତେ॥26॥
ଶୁଂଭମୁକ୍ତାଂଛରାଂଦେଵୀ ଶୁଂଭସ୍ତତ୍ପ୍ରହିତାଂଛରାନ୍।
ଚିଚ୍ଛେଦ ସ୍ଵଶରୈରୁଗ୍ରୈଃ ଶତଶୋଽଥ ସହସ୍ରଶଃ॥27॥
ତତଃ ସା ଚଂଡିକା କ୍ରୁଦ୍ଧା ଶୂଲେନାଭିଜଘାନ ତମ୍।
ସ ତଦାଭି ହତୋ ଭୂମୌ ମୂର୍ଛିତୋ ନିପପାତ ହ॥28॥
ତତୋ ନିଶୁଂଭଃ ସଂପ୍ରାପ୍ୟ ଚେତନାମାତ୍ତକାର୍ମୁକଃ।
ଆଜଘାନ ଶରୈର୍ଦେଵୀଂ କାଳୀଂ କେସରିଣଂ ତଥା॥29॥
ପୁନଶ୍ଚ କୃତ୍ଵା ବାହୁନାମୟୁତଂ ଦନୁଜେଶ୍ଵରଃ।
ଚକ୍ରାୟୁଧେନ ଦିତିଜଶ୍ଚାଦୟାମାସ ଚଂଡିକାମ୍॥30॥
ତତୋ ଭଗଵତୀ କ୍ରୁଦ୍ଧା ଦୁର୍ଗାଦୁର୍ଗାର୍ତି ନାଶିନୀ।
ଚିଚ୍ଛେଦ ଦେଵୀ ଚକ୍ରାଣି ସ୍ଵଶରୈଃ ସାୟକାଂଶ୍ଚ ତାନ୍॥31॥
ତତୋ ନିଶୁଂଭୋ ଵେଗେନ ଗଦାମାଦାୟ ଚଂଡିକାମ୍।
ଅଭ୍ୟଧାଵତ ଵୈ ହଂତୁଂ ଦୈତ୍ୟ ସେନାସମାଵୃତଃ॥32॥
ତସ୍ୟାପତତ ଏଵାଶୁ ଗଦାଂ ଚିଚ୍ଛେଦ ଚଂଡିକା।
ଖଡ୍ଗେନ ଶିତଧାରେଣ ସ ଚ ଶୂଲଂ ସମାଦଦେ॥33॥
ଶୂଲହସ୍ତଂ ସମାୟାଂତଂ ନିଶୁଂଭମମରାର୍ଦନମ୍।
ହୃଦି ଵିଵ୍ୟାଧ ଶୂଲେନ ଵେଗାଵିଦ୍ଧେନ ଚଂଡିକା॥34॥
ଖିନ୍ନସ୍ୟ ତସ୍ୟ ଶୂଲେନ ହୃଦୟାନ୍ନିଃସୃତୋଽପରଃ।
ମହାବଲୋ ମହାଵୀର୍ୟସ୍ତିଷ୍ଠେତି ପୁରୁଷୋ ଵଦନ୍॥35॥
ତସ୍ୟ ନିଷ୍କ୍ରାମତୋ ଦେଵୀ ପ୍ରହସ୍ୟ ସ୍ଵନଵତ୍ତତଃ।
ଶିରଶ୍ଚିଚ୍ଛେଦ ଖଡ୍ଗେନ ତତୋଽସାଵପତଦ୍ଭୁଵି॥36॥
ତତଃ ସିଂହଶ୍ଚ ଖାଦୋଗ୍ର ଦଂଷ୍ଟ୍ରାକ୍ଷୁଣ୍ଣଶିରୋଧରାନ୍।
ଅସୁରାଂ ସ୍ତାଂସ୍ତଥା କାଳୀ ଶିଵଦୂତୀ ତଥାପରାନ୍॥37॥
କୌମାରୀ ଶକ୍ତିନିର୍ଭିନ୍ନାଃ କେଚିନ୍ନେଶୁର୍ମହାସୁରାଃ
ବ୍ରହ୍ମାଣୀ ମଂତ୍ରପୂତେନ ତୋୟେନାନ୍ୟେ ନିରାକୃତାଃ॥38॥
ମାହେଶ୍ଵରୀ ତ୍ରିଶୂଲେନ ଭିନ୍ନାଃ ପେତୁସ୍ତଥାପରେ।
ଵାରାହୀତୁଂଡଘାତେନ କେଚିଚ୍ଚୂର୍ଣୀ କୃତା ଭୁଵି॥39॥
ଖଂଡଂ ଖଂଡଂ ଚ ଚକ୍ରେଣ ଵୈଷ୍ଣଵ୍ୟା ଦାନଵାଃ କୃତାଃ।
ଵଜ୍ରେଣ ଚୈଂଦ୍ରୀ ହସ୍ତାଗ୍ର ଵିମୁକ୍ତେନ ତଥାପରେ॥40॥
କେଚିଦ୍ଵିନେଶୁରସୁରାଃ କେଚିନ୍ନଷ୍ଟାମହାହଵାତ୍।
ଭକ୍ଷିତାଶ୍ଚାପରେ କାଳୀଶିଵଧୂତୀ ମୃଗାଧିପୈଃ॥41॥
॥ ସ୍ଵସ୍ତି ଶ୍ରୀ ମାର୍କଂଡେୟ ପୁରାଣେ ସାଵର୍ନିକେ ମନ୍ଵଂତରେ ଦେଵି ମହତ୍ମ୍ୟେ ନିଶୁଂଭଵଧୋନାମ ନଵମୋଧ୍ୟାୟ ସମାପ୍ତମ୍ ॥
ଆହୁତି
ଓଂ କ୍ଲୀଂ ଜୟଂତୀ ସାଂଗାୟୈ ସଶକ୍ତିକାୟୈ ସପରିଵାରାୟୈ ସଵାହନାୟୈ ମହାହୁତିଂ ସମର୍ପୟାମି ନମଃ ସ୍ଵାହା ॥
