ଆନଂଦମଂଥରପୁରଂଦରମୁକ୍ତମାଲ୍ୟଂ
ମୌଲୌ ହଠେନ ନିହିତଂ ମହିଷାସୁରସ୍ୟ ।
ପାଦାଂବୁଜଂ ଭଵତୁ ମେ ଵିଜୟାୟ ମଂଜୁ-
-ମଂଜୀରଶିଂଜିତମନୋହରମଂବିକାୟାଃ ॥ 1 ॥
ଦେଵି ତ୍ର୍ୟଂବକପତ୍ନି ପାର୍ଵତି ସତି ତ୍ରୈଲୋକ୍ୟମାତଃ ଶିଵେ
ଶର୍ଵାଣି ତ୍ରିପୁରେ ମୃଡାନି ଵରଦେ ରୁଦ୍ରାଣି କାତ୍ୟାୟନି ।
ଭୀମେ ଭୈରଵି ଚଂଡି ଶର୍ଵରିକଲେ କାଲକ୍ଷୟେ ଶୂଲିନି
ତ୍ଵତ୍ପାଦପ୍ରଣତାନନନ୍ୟମନସଃ ପର୍ୟାକୁଲାନ୍ପାହି ନଃ ॥ 2 ॥
ଦେଵି ତ୍ଵାଂ ସକୃଦେଵ ୟଃ ପ୍ରଣମତି କ୍ଷୋଣୀଭୃତସ୍ତଂ ନମ-
-ଂତ୍ୟାଜନ୍ମସ୍ଫୁରଦଂଘ୍ରିପୀଠଵିଲୁଠତ୍କୋଟୀରକୋଟିଚ୍ଛଟାଃ ।
ୟସ୍ତ୍ଵାମର୍ଚତି ସୋଽର୍ଚ୍ୟତେ ସୁରଗଣୈର୍ୟଃ ସ୍ତୌତି ସ ସ୍ତୂୟତେ
ୟସ୍ତ୍ଵାଂ ଧ୍ୟାୟତି ତଂ ସ୍ମରାର୍ତିଵିଧୁରା ଧ୍ୟାୟଂତି ଵାମଭ୍ରୁଵଃ ॥ 3 ॥
ଉନ୍ମତ୍ତା ଇଵ ସଗ୍ରହା ଇଵ ଵିଷଵ୍ୟାସକ୍ତମୂର୍ଛା ଇଵ
ପ୍ରାପ୍ତପ୍ରୌଢମଦା ଇଵାର୍ତିଵିରହଗ୍ରସ୍ତା ଇଵାର୍ତା ଇଵ ।
ୟେ ଧ୍ୟାୟଂତି ହି ଶୈଲରାଜତନୟାଂ ଧନ୍ୟାସ୍ତ ଏଵାଗ୍ରତଃ
ତ୍ୟକ୍ତୋପାଧିଵିଵୃଦ୍ଧରାଗମନସୋ ଧ୍ୟାୟଂତି ତାନ୍ସୁଭ୍ରୁଵଃ ॥ 4 ॥
ଧ୍ୟାୟଂତି ୟେ କ୍ଷଣମପି ତ୍ରିପୁରେ ହୃଦି ତ୍ଵାଂ
ଲାଵଣ୍ୟୟୌଵନଧନୈରପି ଵିପ୍ରୟୁକ୍ତାଃ ।
ତେ ଵିସ୍ଫୁରଂତି ଲଲିତାୟତଲୋଚନାନାଂ
ଚିତ୍ତୈକଭିତ୍ତିଲିଖିତପ୍ରତିମାଃ ପୁମାଂସଃ ॥ 5 ॥
ଏତଂ କିଂ ନୁ ଦୃଶା ପିବାମ୍ୟୁତ ଵିଶାମ୍ୟସ୍ୟାଂଗମଂଗୈର୍ନିଜୈଃ
କିଂ ଵାଽମୁଂ ନିଗରାମ୍ୟନେନ ସହସା କିଂ ଵୈକତାମାଶ୍ରୟେ ।
ୟସ୍ୟେତ୍ଥଂ ଵିଵଶୋ ଵିକଲ୍ପଲଲିତାକୂତେନ ୟୋଷିଜ୍ଜନଃ
କିଂ ତଦ୍ୟନ୍ନ କରୋତି ଦେଵି ହୃଦୟେ ୟସ୍ୟ ତ୍ଵମାଵର୍ତସେ ॥ 6 ॥
ଵିଶ୍ଵଵ୍ୟାପିନି ୟଦ୍ଵଦୀଶ୍ଵର ଇତି ସ୍ଥାଣାଵନନ୍ୟାଶ୍ରୟଃ
ଶବ୍ଦଃ ଶକ୍ତିରିତି ତ୍ରିଲୋକଜନନି ତ୍ଵୟ୍ୟେଵ ତଥ୍ୟସ୍ଥିତିଃ ।
ଇତ୍ଥଂ ସତ୍ୟପି ଶକ୍ନୁଵଂତି ୟଦିମାଃ କ୍ଷୁଦ୍ରା ରୁଜୋ ବାଧିତୁଂ
ତ୍ଵଦ୍ଭକ୍ତାନପି ନ କ୍ଷିଣୋଷି ଚ ରୁଷା ତଦ୍ଦେଵି ଚିତ୍ରଂ ମହତ୍ ॥ 7 ॥
ଇଂଦୋର୍ମଧ୍ୟଗତାଂ ମୃଗାଂକସଦୃଶଚ୍ଛାୟାଂ ମନୋହାରିଣୀଂ
ପାଂଡୂତ୍ଫୁଲ୍ଲସରୋରୁହାସନଗତା ସ୍ନିଗ୍ଧପ୍ରଦୀପଚ୍ଛଵିମ୍ ।
ଵର୍ଷଂତୀମମୃତଂ ଭଵାନି ଭଵତୀଂ ଧ୍ୟାୟଂତି ୟେ ଦେହିନଃ
ତେ ନିର୍ମୁକ୍ତରୁଜୋ ଭଵଂତି ରିପଵଃ ପ୍ରୋଜ୍ଝଂତି ତାଂଦୂରତଃ ॥ 8 ॥
ପୂର୍ଣେଂଦୋଃ ଶକଲୈରିଵାତିବହଲୈଃ ପୀୟୂଷପୂରୈରିଵ
କ୍ଷୀରାବ୍ଧେର୍ଲହରୀଭରୈରିଵ ସୁଧାପଂକସ୍ୟ ପିଂଡୈରିଵ ।
ପ୍ରାଲେୟୈରିଵ ନିର୍ମିତଂ ତଵ ଵପୁର୍ଧ୍ୟାୟଂତି ୟେ ଶ୍ରଦ୍ଧୟା
ଚିତ୍ତାଂତର୍ନିହିତାର୍ତିତାପଵିପଦସ୍ତେ ସଂପଦଂ ବିଭ୍ରତି ॥ 9 ॥
ୟେ ସଂସ୍ମରଂତି ତରଲାଂ ସହସୋଲ୍ଲସଂତୀଂ
ତ୍ଵାଂ ଗ୍ରଂଥିପଂଚକଭିଦଂ ତରୁଣାର୍କଶୋଣାମ୍ ।
ରାଗାର୍ଣଵେ ବହଲରାଗିଣି ମଜ୍ଜୟଂତୀଂ
କୃତ୍ସ୍ନଂ ଜଗଦ୍ଦଧତି ଚେତସି ତାନ୍ମୃଗାକ୍ଷ୍ୟଃ ॥ 10 ॥
ଲାକ୍ଷାରସସ୍ନପିତପଂକଜତଂତୁତନ୍ଵୀଂ
ଅଂତଃ ସ୍ମରତ୍ୟନୁଦିନଂ ଭଵତୀଂ ଭଵାନି ।
ୟସ୍ତଂ ସ୍ମରପ୍ରତିମମପ୍ରତିମସ୍ଵରୂପାଃ
ନେତ୍ରୋତ୍ପଲୈର୍ମୃଗଦୃଶୋ ଭୃଶମର୍ଚୟଂତି ॥ 11 ॥
ସ୍ତୁମସ୍ତ୍ଵାଂ ଵାଚମଵ୍ୟକ୍ତାଂ ହିମକୁଂଦେଂଦୁରୋଚିଷମ୍ ।
କଦଂବମାଲାଂ ବିଭ୍ରାଣାମାପାଦତଲଲଂବିନୀମ୍ ॥ 12 ॥
ମୂର୍ଧ୍ନୀଂଦୋଃ ସିତପଂକଜାସନଗତାଂ ପ୍ରାଲେୟପାଂଡୁତ୍ଵିଷଂ
ଵର୍ଷଂତୀମମୃତଂ ସରୋରୁହଭୁଵୋ ଵକ୍ତ୍ରେଽପି ରଂଧ୍ରେଽପି ଚ ।
ଅଚ୍ଛିନ୍ନା ଚ ମନୋହରା ଚ ଲଲିତା ଚାତିପ୍ରସନ୍ନାପି ଚ
ତ୍ଵାମେଵଂ ସ୍ମରତଃ ସ୍ମରାରିଦୟିତେ ଵାକ୍ସର୍ଵତୋ ଵଲ୍ଗତି ॥ 13 ॥
ଦଦାତୀଷ୍ଟାନ୍ଭୋଗାନ୍ କ୍ଷପୟତି ରିପୂନ୍ହଂତି ଵିପଦୋ
ଦହତ୍ୟାଧୀନ୍ଵ୍ୟାଧୀନ୍ ଶମୟତି ସୁଖାନି ପ୍ରତନୁତେ ।
ହଠାଦଂତର୍ଦୁଃଖଂ ଦଲୟତି ପିନଷ୍ଟୀଷ୍ଟଵିରହଂ
ସକୃଦ୍ଧ୍ୟାତା ଦେଵୀ କିମିଵ ନିରଵଦ୍ୟଂ ନ କୁରୁତେ ॥ 14 ॥
ୟସ୍ତ୍ଵାଂ ଧ୍ୟାୟତି ଵେତ୍ତି ଵିଂଦତି ଜପତ୍ୟାଲୋକତେ ଚିଂତୟ-
-ତ୍ୟନ୍ଵେତି ପ୍ରତିପଦ୍ୟତେ କଲୟତି ସ୍ତୌତ୍ୟାଶ୍ରୟତ୍ୟର୍ଚତି ।
ୟଶ୍ଚ ତ୍ର୍ୟଂବକଵଲ୍ଲଭେ ତଵ ଗୁଣାନାକର୍ଣୟତ୍ୟାଦରାତ୍
ତସ୍ୟ ଶ୍ରୀର୍ନ ଗୃହାଦପୈତି ଵିଜୟସ୍ତସ୍ୟାଗ୍ରତୋ ଧାଵତି ॥ 15 ॥
କିଂ କିଂ ଦୁଃଖଂ ଦନୁଜଦଲିନି କ୍ଷୀୟତେ ନ ସ୍ମୃତାୟାଂ
କା କା କୀର୍ତିଃ କୁଲକମଲିନି ଖ୍ୟାପ୍ୟତେ ନ ସ୍ତୁତାୟାମ୍ ।
କା କା ସିଦ୍ଧିଃ ସୁରଵରନୁତେ ପ୍ରାପ୍ୟତେ ନାର୍ଚିତାୟାଂ
କଂ କଂ ୟୋଗଂ ତ୍ଵୟି ନ ଚିନୁତେ ଚିତ୍ତମାଲଂବିତାୟାମ୍ ॥ 16 ॥
ୟେ ଦେଵି ଦୁର୍ଧରକୃତାଂତମୁଖାଂତରସ୍ଥାଃ
ୟେ କାଲି କାଲଘନପାଶନିତାଂତବଦ୍ଧାଃ ।
ୟେ ଚଂଡି ଚଂଡଗୁରୁକଲ୍ମଷସିଂଧୁମଗ୍ନାଃ
ତାନ୍ପାସି ମୋଚୟସି ତାରୟସି ସ୍ମୃତୈଵ ॥ 17 ॥
ଲକ୍ଷ୍ମୀଵଶୀକରଣଚୂର୍ଣସହୋଦରାଣି
ତ୍ଵତ୍ପାଦପଂକଜରଜାଂସି ଚିରଂ ଜୟଂତି ।
ୟାନି ପ୍ରଣାମମିଲିତାନି ନୃଣାଂ ଲଲାଟେ
ଲୁଂପଂତି ଦୈଵଲିଖିତାନି ଦୁରକ୍ଷରାଣି ॥ 18 ॥
ରେ ମୂଢାଃ କିମୟଂ ଵୃଥୈଵ ତପସା କାୟଃ ପରିକ୍ଲିଶ୍ୟତେ
ୟଜ୍ଞୈର୍ଵା ବହୁଦକ୍ଷିଣୈଃ କିମିତରେ ରିକ୍ତୀକ୍ରିୟଂତେ ଗୃହାଃ ।
ଭକ୍ତିଶ୍ଚେଦଵିନାଶିନୀ ଭଗଵତୀପାଦଦ୍ଵୟୀ ସେଵ୍ୟତାଂ
ଉନ୍ନିଦ୍ରାଂବୁରୁହାତପତ୍ରସୁଭଗା ଲକ୍ଷ୍ମୀଃ ପୁରୋ ଧାଵତି ॥ 19 ॥
ୟାଚେ ନ କଂଚନ ନ କଂଚନ ଵଂଚୟାମି
ସେଵେ ନ କଂଚନ ନିରସ୍ତସମସ୍ତଦୈନ୍ୟଃ ।
ଶ୍ଲକ୍ଷ୍ଣଂ ଵସେ ମଧୁରମଦ୍ମି ଭଜେ ଵରସ୍ତ୍ରୀଃ
ଦେଵୀ ହୃଦି ସ୍ଫୁରତି ମେ କୁଲକାମଧେନୁଃ ॥ 20 ॥
ନମାମି ୟାମିନୀନାଥଲେଖାଲଂକୃତକୁଂତଲାମ୍ ।
ଭଵାନୀଂ ଭଵସଂତାପନିର୍ଵାପଣସୁଧାନଦୀମ୍ ॥ 21 ॥
ଇତି ଶ୍ରୀକାଳିଦାସ ଵିରଚିତ ପଂଚସ୍ତଵ୍ୟାଂ ତୃତୀୟଃ ଘଟସ୍ତଵଃ ।
