ଵଂଦେ ଗଜେଂଦ୍ରଵଦନଂ
ଵାମାଂକାରୂଢଵଲ୍ଲଭାଶ୍ଲିଷ୍ଟମ୍ ।
କୁଂକୁମପରାଗଶୋଣଂ
କୁଵଲୟିନୀଜାରକୋରକାପୀଡମ୍ ॥ 1 ॥
ସ ଜୟତି ସୁଵର୍ଣଶୈଲଃ
ସକଲଜଗଚ୍ଚକ୍ରସଂଘଟିତମୂର୍ତିଃ ।
କାଂଚନନିକୁଂଜଵାଟୀ-
-କଂଦଲଦମରୀପ୍ରପଂଚସଂଗୀତଃ ॥ 2 ॥
ହରିହୟନୈରୃତମାରୁତ-
-ହରିତାମଂତେଷ୍ଵଵସ୍ଥିତଂ ତସ୍ୟ ।
ଵିନୁମଃ ସାନୁତ୍ରିତୟଂ
ଵିଧିହରିଗୌରୀଶଵିଷ୍ଟପାଧାରମ୍ ॥ 3 ॥
ମଧ୍ୟେ ପୁନର୍ମନୋହର-
-ରତ୍ନରୁଚିସ୍ତବକରଂଜିତଦିଗଂତମ୍ ।
ଉପରି ଚତୁଃଶତୟୋଜନ-
-ମୁତ୍ତୁଂଗଂ ଶୃଂଗପୁଂଗଵମୁପାସେ ॥ 4 ॥
ତତ୍ର ଚତୁଃଶତୟୋଜନ-
-ପରିଣାହଂ ଦେଵଶିଲ୍ପିନା ରଚିତମ୍ ।
ନାନାସାଲମନୋଜ୍ଞଂ
ନମାମ୍ୟହଂ ନଗରମାଦିଵିଦ୍ୟାୟାଃ ॥ 5 ॥
ପ୍ରଥମଂ ସହସ୍ରପୂର୍ଵକ-
-ଷଟ୍ଶତସଂଖ୍ୟାକୟୋଜନଂ ପରିତଃ ।
ଵଲୟୀକୃତସ୍ଵଗାତ୍ରଂ
ଵରଣଂ ଶରଣଂ ଵ୍ରଜାମ୍ୟୟୋରୂପମ୍ ॥ 6 ॥
ତସ୍ୟୋତ୍ତରେ ସମୀରଣ-
-ୟୋଜନଦୂରେ ତରଂଗିତଚ୍ଛାୟଃ ।
ଘଟୟତୁ ମୁଦଂ ଦ୍ଵିତୀୟୋ
ଘଂଟାସ୍ତନସାରନିର୍ମିତଃ ସାଲଃ ॥ 7 ॥
ଉଭୟୋରଂତରସୀମ-
-ନ୍ୟୁଦ୍ଦାମଭ୍ରମରରଂଜିତୋଦାରମ୍ ।
ଉପଵନମୁପାସ୍ମହେ ଵୟ-
-ମୂରୀକୃତମଂଦମାରୁତସ୍ୟଂଦମ୍ ॥ 8 ॥
ଆଲିଂଗ୍ୟ ଭଦ୍ରକାଲୀ-
-ମାସୀନସ୍ତତ୍ର ହରିଶିଲାଶ୍ୟାମାମ୍ ।
ମନସି ମହାକାଲୋ ମେ
ଵିହରତୁ ମଧୁପାନଵିଭ୍ରମନ୍ନେତ୍ରଃ ॥ 9 ॥
ତାର୍ତୀୟୀକୋ ଵରଣ-
-ସ୍ତସ୍ୟୋତ୍ତରସୀମ୍ନି ଵାତୟୋଜନତଃ ।
ତାମ୍ରେଣ ରଚିତମୂର୍ତି-
-ସ୍ତନୁତାମାଚଂଦ୍ରତାରକଂ ଭଦ୍ରମ୍ ॥ 10 ॥
ମଧ୍ୟେ ତୟୋଶ୍ଚ ମଣିମୟ-
-ପଲ୍ଲଵଶାଖାପ୍ରସୂନପକ୍ଷ୍ମଲିତାମ୍ ।
କଲ୍ପାନୋକହଵାଟୀଂ
କଲୟେ ମକରଂଦପଂକିଲାଵାଲାମ୍ ॥ 11 ॥
ତତ୍ର ମଧୁମାଧଵଶ୍ରୀ-
-ତରୁଣୀଭ୍ୟାଂ ତରଲଦୃକ୍ଚକୋରାଭ୍ୟାମ୍ ।
ଆଲିଂଗିତୋଽଵତାନ୍ମା-
-ମନିଶଂ ପ୍ରଥମର୍ତୁରାତ୍ତପୁଷ୍ପାସ୍ତ୍ରଃ ॥ 12 ॥
ନମତ ତଦୁତ୍ତରଭାଗେ
ନାକିପଥୋଲ୍ଲଂଘିଶୃଂଗସଂଘାତମ୍ ।
ସୀସାକୃତିଂ ତୁରୀୟଂ
ସିତକିରଣାଲୋକନିର୍ମଲଂ ସାଲମ୍ ॥ 13 ॥
ସାଲଦ୍ଵୟାଂତରାଲେ
ସରଲାଲିକପୋତଚାଟୁସୁଭଗାୟାମ୍ ।
ସଂତାନଵାଟିକାୟାଂ
ସକ୍ତଂ ଚେତୋଽସ୍ତୁ ସତତମସ୍ମାକମ୍ ॥ 14 ॥
ତତ୍ର ତପନାତିରୂକ୍ଷଃ
ସାମ୍ରାଜ୍ଞୀଚରଣସାଂଦ୍ରିତସ୍ଵାଂତଃ ।
ଶୁକ୍ରଶୁଚିଶ୍ରୀସହିତୋ
ଗ୍ରୀଷ୍ମର୍ତୁର୍ଦିଶତୁ କୀର୍ତିମାକଲ୍ପମ୍ ॥ 15 ॥
ଉତ୍ତରସୀମନି ତସ୍ୟୋ-
-ନ୍ନତଶିଖରୋତ୍କଂପିହାଟକପତାକଃ ।
ପ୍ରକଟୟତୁ ପଂଚମୋ ନଃ
ପ୍ରାକାରଃ କୁଶଲମାରକୂଟମୟଃ ॥ 16 ॥
ପ୍ରାକାରୟୋଶ୍ଚ ମଧ୍ୟେ
ପଲ୍ଲଵିତାନ୍ୟଭୃତପଂଚମୋନ୍ମେଷା ।
ହରିଚଂଦନଦ୍ରୁଵାଟୀ-
-ହରତାଦାମୂଲମସ୍ମଦନୁତାପମ୍ ॥ 17 ॥
ତତ୍ର ନଭଃ ଶ୍ରୀମୁଖ୍ୟୈ-
-ସ୍ତରୁଣୀଵର୍ଗୈଃ ସମନ୍ଵିତଃ ପରିତଃ ।
ଵଜ୍ରାଟ୍ଟହାସମୁଖରୋ
ଵାଂଛାପୂର୍ତିଂ ତନୋତୁ ଵର୍ଷର୍ତୁଃ ॥ 18 ॥
ମାରୁତୟୋଜନଦୂରେ
ମହନୀୟସ୍ତସ୍ୟ ଚୋତ୍ତରେ ଭାଗେ ।
ଭଦ୍ରଂ କୃଷୀଷ୍ଟ ଷଷ୍ଠଃ
ପ୍ରାକାରଃ ପଂଚଲୋହଧାତୁମୟଃ ॥ 19 ॥
ଅନୟୋର୍ମଧ୍ୟେ ସଂତତ-
-ମଂକୂରଦ୍ଦିଵ୍ୟକୁସୁମଗଂଧାୟାମ୍ ।
ମଂଦାରଵାଟିକାୟାଂ
ମାନସମଂଗୀକରୋତୁ ମେ ଵିହୃତିମ୍ ॥ 20 ॥
ତସ୍ୟାମିଷୋର୍ଜଲକ୍ଷ୍ମୀ-
-ତରୁଣୀଭ୍ୟାଂ ଶରଦୃତୁଃ ସଦା ସହିତଃ ।
ଅଭ୍ୟର୍ଚୟନ୍ ସ ଜୀୟା-
-ଦଂବାମାମୋଦମେଦୁରୈଃ କୁସୁମୈଃ ॥ 21 ॥
ତସ୍ୟର୍ଷିସଂଖ୍ୟୟୋଜନ-
-ଦୂରେ ଦେଦୀପ୍ୟମାନଶୃଂଗୌଘଃ ।
କଲଧୌତକଲିତମୂର୍ତିଃ
କଲ୍ୟାଣଂ ଦିଶତୁ ସପ୍ତମଃ ସାଲଃ ॥ 22 ॥
ମଧ୍ୟେ ତୟୋର୍ମରୁତ୍ପଥ
ଲଂଘିତଵିଟପାଗ୍ରଵିରୁତକଲକଂଠା ।
ଶ୍ରୀପାରିଜାତଵାଟୀ
ଶ୍ରିୟମନିଶଂ ଦିଶତୁ ଶୀତଲୋଦ୍ଦେଶା ॥ 23 ॥
ତସ୍ୟାମତିପ୍ରିୟାଭ୍ୟାଂ
ସହ ଖେଲନ୍ ସହସହସ୍ୟଲକ୍ଷ୍ମୀଭ୍ୟାମ୍ ।
ସାମଂତୋ ଝଷକେତୋ-
-ର୍ହେମଂତୋ ଭଵତୁ ହେମଵୃଦ୍ଧ୍ୟୈ ନଃ ॥ 24 ॥
ଉତ୍ତରତସ୍ତସ୍ୟ ମହା-
-ନୁଦ୍ଭଟହୁତଭୁକ୍ଶିଖାରୁଣମୟୂଖଃ ।
ତପନୀୟଖଂଡରଚିତ-
-ସ୍ତନୁତାଦାୟୁଷ୍ୟମଷ୍ଟମୋ ଵରଣଃ ॥ 25 ॥
କାଦଂବଵିପିନଵାଟୀ-
-ମନୟୋର୍ମଧ୍ୟଭୁଵି କଲ୍ପିତାଵାସାମ୍ ।
କଲୟାମି ସୂନକୋରକ-
-କଂଦଲିତାମୋଦତୁଂଦିଲସମୀରାମ୍ ॥ 26 ॥
ତସ୍ୟାମତିଶିଶିରାକୃତି-
-ରାସୀନସ୍ତପତପସ୍ୟଲକ୍ଷ୍ମୀଭ୍ୟାମ୍ ।
ଶିଵମନିଶଂ କୁରୁତାନ୍ମେ
ଶିଶିରର୍ତୁଃ ସତତଶୀତଲଦିଗଂତଃ ॥ 27 ॥
ତସ୍ୟାଂ କଦଂବଵାଟ୍ୟାଂ
ତତ୍ପ୍ରସଵାମୋଦମିଲିତମଧୁଗଂଧମ୍ ।
ସପ୍ତାଵରଣମନୋଜ୍ଞଂ
ଶରଣଂ ସମୁପୈମି ମଂତ୍ରିଣୀଶରଣମ୍ ॥ 28 ॥
ତତ୍ରାଲୟେ ଵିଶାଲେ
ତପନୀୟାରଚିତତରଲସୋପାନେ ।
ମାଣିକ୍ୟମଂଡପାଂତ-
-ର୍ମହିତେ ସିଂହାସନେ ସୁମଣିଖଚିତେ ॥ 29 ॥
ବିଂଦୁତ୍ରିପଂଚକୋଣ-
-ଦ୍ଵିପନୃପଵସୁଵେଦଦଲକୁରେଖାଢ୍ୟେ ।
ଚକ୍ରେ ସଦା ନିଵିଷ୍ଟାଂ
ଷଷ୍ଠ୍ୟଷ୍ଟତ୍ରିଂଶଦକ୍ଷରେଶାନୀମ୍ ॥ 30 ॥
ତାପିଂଛମେଚକାଭାଂ
ତାଲୀଦଲଘଟିତକର୍ଣତାଟଂକାମ୍ ।
ତାଂବୂଲପୂରିତମୁଖୀଂ
ତାମ୍ରାଧରବିଂବଦୃଷ୍ଟଦରହାସାମ୍ ॥ 31 ॥
କୁଂକୁମପଂକିଲଦେହାଂ
କୁଵଲୟଜୀଵାତୁଶାଵକଵତଂସାମ୍ ।
କୋକନଦଶୋଣଚରଣାଂ
କୋକିଲନିକ୍ଵାଣକୋମଲାଲାପାମ୍ ॥ 32 ॥
ଵାମାଂଗଗଲିତଚୂଲୀଂ
ଵନମାଲ୍ୟକଦଂବମାଲିକାଭରଣାମ୍ ।
ମୁକ୍ତାଲଲଂତିକାଂଚିତ
ମୁଗ୍ଧାଲିକମିଲିତଚିତ୍ରକୋଦାରାମ୍ ॥ 33 ॥
କରଵିଧୃତକୀରଶାଵକ-
-କଲନିନଦଵ୍ୟକ୍ତନିଖିଲନିଗମାର୍ଥାମ୍ ।
ଵାମକୁଚସଂଗିଵୀଣାଵାଦନ-
-ସୌଖ୍ୟାର୍ଧମୀଲିତାକ୍ଷିୟୁଗାମ୍ ॥ 34 ॥
ଆପାଟଲାଂଶୁକଧରା-
-ମାଦିରସୋନ୍ମେଷଵାସିତକଟାକ୍ଷାମ୍ ।
ଆମ୍ନାୟସାରଗୁଲିକା-
-ମାଦ୍ୟାଂ ସଂଗୀତମାତୃକାଂ ଵଂଦେ ॥ 35 ॥
ତସ୍ୟ ଚ ସୁଵର୍ଣସାଲ-
-ସ୍ୟୋତ୍ତରତସ୍ତରୁଣକୁଂକୁମଚ୍ଛାୟଃ ।
ଶମୟତୁ ମମ ସଂତାପଂ
ସାଲୋ ନଵମଃ ସ ପୁଷ୍ପରାଗମୟଃ ॥ 36 ॥
ଅନୟୋରଂତରଵସୁଧାଃ
ପ୍ରଣୁମଃ ପ୍ରତ୍ୟଗ୍ରପୁଷ୍ପରାଗମୟୀଃ ।
ସିଂହାସନେଶ୍ଵରୀମନୁ-
-ଚିଂତନନିସ୍ତଂଦ୍ରସିଦ୍ଧନୀରଂଧ୍ରାଃ ॥ 37 ॥
ତତ୍ସାଲୋତ୍ତରଦେଶେ
ତରୁଣଜପାକିରଣଧୋରଣୀଶୋଣଃ ।
ପ୍ରଶମୟତୁ ପଦ୍ମରାଗ-
-ପ୍ରାକାରୋ ମମ ପରାଭଵଂ ଦଶମଃ ॥ 38 ॥
ଅଂତରଭୂକୃତଵାସା-
-ନନୟୋରପନୀତଚିତ୍ତଵୈମତ୍ୟାନ୍ ।
ଚକ୍ରେଶୀପଦଭକ୍ତାଂ-
-ଶ୍ଚାରଣଵର୍ଗାନହର୍ନିଶଂ କଲୟେ ॥ 39 ॥
ସାରଂଗଵାହୟୋଜନଦୂରେ-
-ଽସଂଘଟିତକେତନସ୍ତସ୍ୟ ।
ଗୋମେଦକେନ ରଚିତୋ
ଗୋପାୟତୁ ମାଂ ସମୁନ୍ନତଃ ସାଲଃ ॥ 40 ॥
ଵପ୍ରଦ୍ଵୟାଂତରୋର୍ଵ୍ୟାଂ
ଵଟୁକୈର୍ଵିଵିଧୈଶ୍ଚ ୟୋଗିନୀବୃଂଦୈଃ ।
ସତତଂ ସମର୍ଚିତାୟାଃ
ସଂକର୍ଷଣ୍ୟାଃ ପ୍ରଣୌମି ଚରଣାବ୍ଜମ୍ ॥ 41 ॥
ତାପସୟୋଜନଦୂରେ
ତସ୍ୟ ସମୁତ୍ତୁଂଗ ଗୋପୁରୋପେତଃ ।
ଵାଂଛାପୂର୍ତ୍ୟୈ ଭଵତା-
-ଦ୍ଵଜ୍ରମଣୀନିକରନିର୍ମିତୋ ଵପ୍ରଃ ॥ 42 ॥
ଵରଣଦ୍ଵିତୟାଂତରତୋ
ଵାସଜୁଷୋ ଵିହିତମଧୁରସାସ୍ଵାଦାଃ ।
ରଂଭାଦିଵିବୁଧଵେଶ୍ୟା
ରଚୟଂତୁ ମହାଂତମସ୍ମଦାନଂଦମ୍ ॥ 43 ॥
ତତ୍ର ସଦା ପ୍ରଵହଂତୀ
ତଟିନୀ ଵଜ୍ରାଭିଧା ଚିରଂ ଜୀୟାତ୍ ।
ଚଟୁଲୋର୍ମିଜାଲନୃତ୍ୟ-
-ତ୍କଲହଂସୀକୁଲକଲକ୍ଵଣିତପୁଷ୍ଟା ॥ 44 ॥
ରୋଧସି ତସ୍ୟା ରୁଚିରେ
ଵଜ୍ରେଶୀ ଜୟତି ଵଜ୍ରଭୂଷାଢ୍ୟା ।
ଵଜ୍ରପ୍ରଦାନତୋଷିତ-
-ଵଜ୍ରିମୁଖତ୍ରିଦଶଵିନୁତଚାରିତ୍ରା ॥ 45 ॥
ତସ୍ୟୋଦୀଚ୍ୟାଂ ହରିତି
ସ୍ତଵକିତସୁଷମାଵଲୀଢଵିୟଦଂତଃ ।
ଵୈଡୂର୍ୟରତ୍ନରଚିତୋ
ଵୈମଲ୍ୟଂ ଦିଶତୁ ଚେତସୋ ଵରଣଃ ॥ 46 ॥
ଅଧିମଧ୍ୟମେତୟୋଃ ପୁନ-
-ରଂବାଚରଣାଵଲଂବିତସ୍ଵାଂତାନ୍ ।
କାର୍କୋଟକାଦିନାଗାନ୍
କଲୟାମଃ କିଂ ଚ ବଲିମୁଖାନ୍ ଦନୁଜାନ୍ ॥ 47 ॥
ଗଂଧଵହସଂଖ୍ୟୟୋଜନ-
-ଦୂରେ ଗଗନୋର୍ଧ୍ଵଜାଂଘିକସ୍ତସ୍ୟ ।
ଵାସଵମଣିପ୍ରଣୀତୋ
ଵରଣୋ ବହଲୟତୁ ଵୈଦୁଷୀଂ ଵିଶଦାମ୍ ॥ 48 ॥
ମଧ୍ୟକ୍ଷୋଣ୍ୟାମନୟୋ-
-ର୍ମହେଂଦ୍ରନୀଲାତ୍ମକାନି ଚ ସରାଂସି ।
ଶାତୋଦରୀସହାୟା-
-ନ୍ଭୂପାଲାନପି ପୁନଃ ପୁନଃ ପ୍ରଣୁମଃ ॥ 49 ॥
ଆଶୁଗୟୋଜନଦୂରେ
ତସ୍ୟୋର୍ଧ୍ଵଂ କାଂତିଧଵଲିତଦିଗଂତଃ ।
ମୁକ୍ତାଵିରଚିତଗାତ୍ରୋ
ମୁହୁରସ୍ମାକଂ ମୁଦେ ଭଵତୁ ସାଲଃ ॥ 50 ॥
ଆଵୃତ୍ତ୍ୟୋରଧିମଧ୍ୟଂ
ପୂର୍ଵସ୍ୟାଂ ଦିଶି ପୁରଂଦରଃ ଶ୍ରୀମାନ୍ ।
ଅଭ୍ରମୁଵିଟାଧିରୂଢୋ
ଵିଭ୍ରମମସ୍ମାକମନିଶମାତନୁତାତ୍ ॥ 51 ॥
ତତ୍କୋଣେ ଵ୍ୟଜନସ୍ରୁ-
-କ୍ତୋମରପାତ୍ରସ୍ରୁଵାନ୍ନଶକ୍ତିଧରଃ ।
ସ୍ଵାହାସ୍ଵଧାସମେତଃ
ସୁଖୟତୁ ମାଂ ହଵ୍ୟଵାହନଃ ସୁଚିରମ୍ ॥ 52 ॥
ଦକ୍ଷିଣଦିଗଂତରାଲେ
ଦଂଡଧରୋ ନୀଲନୀରଦଚ୍ଛାୟଃ ।
ତ୍ରିପୁରାପଦାବ୍ଜଭକ୍ତସ୍ତିରୟତୁ
ମମ ନିଖିଲମଂହସାଂ ନିକରମ୍ ॥ 53 ॥
ତସ୍ୟୈଵ ପଶ୍ଚିମାୟାଂ
ଦିଶି ଦଲିତେଂଦୀଵରପ୍ରଭାଶ୍ୟାମଃ ।
ଖେଟାସିୟଷ୍ଟିଧାରୀ
ଖେଦାନପନୟତୁ ୟାତୁଧାନୋ ମେ ॥ 54 ॥
ତସ୍ୟା ଉତ୍ତରଦେଶେ
ଧଵଲାଂଗୋ ଵିପୁଲଝଷଵରାରୂଢଃ ।
ପାଶାୟୁଧାତ୍ତପାଣିଃ
ପାଶୀ ଵିଦଲୟତୁ ପାଶଜାଲାନି ॥ 55 ॥
ଵଂଦେ ତଦୁତ୍ତରହରି-
-ତ୍କୋଣେ ଵାୟୁଂ ଚମୂରୁଵରଵାହମ୍ ।
କୋରକିତତତ୍ତ୍ଵବୋଧା-
-ନ୍ଗୋରକ୍ଷପ୍ରମୁଖୟୋଗିନୋଽପି ମୁହୁଃ ॥ 56 ॥
ତରୁଣୀରିଡାପ୍ରଧାନା-
-ସ୍ତିସ୍ରୋ ଵାତସ୍ୟ ତସ୍ୟ କୃତଵାସାଃ ।
ପ୍ରତ୍ୟଗ୍ରକାପିଶାୟନ-
-ପାନପରିଭ୍ରାଂତଲୋଚନାଃ କଲୟେ ॥ 57 ॥
ତଲ୍ଲୋକପୂର୍ଵଭାଗେ
ଧନଦଂ ଧ୍ୟାୟାମି ଶେଵଧିକୁଲେଶମ୍ ।
ଅପି ମାଣିଭଦ୍ରମୁଖ୍ୟା-
-ନଂବାଚରଣାଵଲଂବିନୋ ୟକ୍ଷାନ୍ ॥ 58 ॥
ତସ୍ୟୈଵ ପୂର୍ଵସୀମନି
ତପନୀୟାରଚିତଗୋପୁରେ ନଗରେ ।
କାତ୍ୟାୟନୀସହାୟଂ
କଲୟେ ଶୀତାଂଶୁଖଂଡଚୂଡାଲମ୍ ॥ 59 ॥
ତତ୍ପୁରଷୋଡଶଵରଣ-
-ସ୍ଥଲଭାଜସ୍ତରୁଣଚଂଦ୍ରଚୂଡାଲାନ୍ ।
ରୁଦ୍ରାଧ୍ୟାୟେ ପଠିତା-
-ନ୍ରୁଦ୍ରାଣୀସହଚରାନ୍ଭଜେ ରୁଦ୍ରାନ୍ ॥ 60 ॥
ପଵମାନସଂଖ୍ୟୟୋଜନ-
-ଦୂରେ ବାଲତୃଣ୍ମେଚକସ୍ତସ୍ୟ ।
ସାଲୋ ମରକତରଚିତଃ
ସଂପଦମଚଲାଂ ଶ୍ରିୟଂ ଚ ପୁଷ୍ଣାତୁ ॥ 61 ॥
ଆଵୃତିୟୁଗ୍ମାଂତରତୋ
ହରିତମଣୀନିଵହମେଚକେ ଦେଶେ ।
ହାଟକତାଲୀଵିପିନଂ
ହାଲାଘଟଘଟିତଵିଟପମାକଲୟେ ॥ 62 ॥
ତତ୍ରୈଵ ମଂତ୍ରିଣୀଗୃହ-
-ପରିଣାହଂ ତରଲକେତନଂ ସଦନମ୍ ।
ମରକତସୌଧମନୋଜ୍ଞଂ
ଦଦ୍ୟାଦାୟୂଂଷି ଦଂଡନାଥାୟାଃ ॥ 63 ॥
ସଦନେ ତତ୍ର ହରିନ୍ମଣି-
-ସଂଘଟିତେ ମଂଡପେ ଶତସ୍ତଂଭେ ।
କାର୍ତସ୍ଵରମୟପୀଠେ
କନକମୟାଂବୁରୁହକର୍ଣିକାମଧ୍ୟେ ॥ 64 ॥
ବିଂଦୁତ୍ରିକୋଣଵର୍ତୁଲ-
-ଷଡସ୍ରଵୃତ୍ତଦ୍ଵୟାନ୍ଵିତେ ଚକ୍ରେ ।
ସଂଚାରିଣୀ ଦଶୋତ୍ତର-
ଶତାର୍ଣମନୁରାଜକମଲକଲହଂସୀ ॥ 65 ॥
କୋଲଵଦନା କୁଶେଶୟ-
-ନୟନା କୋକାରିମଂଡିତଶିଖଂଡା ।
ସଂତପ୍ତକାଂଚନାଭା
ସଂଧ୍ୟାରୁଣଚେଲସଂଵୃତନିତଂବା ॥ 66 ॥
ହଲମୁସଲଶଂଖଚକ୍ରା-
-ଽଂକୁଶପାଶାଭୟଵରସ୍ଫୁରିତହସ୍ତା ।
କୂଲଂକଷାନୁକଂପା
କୁଂକୁମଜଂବାଲିତସ୍ତନାଭୋଗା ॥ 67 ॥
ଧୂର୍ତାନାମତିଦୂରା-
-ଵାର୍ତାଶେଷାଵଲଗ୍ନକମନୀୟା ।
ଆର୍ତାଲୀଶୁଭଦାତ୍ରୀ
ଵାର୍ତାଲୀ ଭଵତୁ ଵାଂଛିତାର୍ଥାୟ ॥ 68 ॥
ତସ୍ୟାଃ ପରିତୋ ଦେଵୀଃ
ସ୍ଵପ୍ନେଶ୍ୟୁନ୍ମତ୍ତଭୈରଵୀମୁଖ୍ୟାଃ ।
ପ୍ରଣମତ ଜଂଭିନ୍ୟାଦ୍ୟାଃ
ଭୈରଵଵର୍ଗାଂଶ୍ଚ ହେତୁକପ୍ରମୁଖାନ୍ ॥ 69 ॥
ପୂର୍ଵୋକ୍ତସଂଖ୍ୟୟୋଜନ-
-ଦୂରେ ପୂୟାଂଶୁପାଟଲସ୍ତସ୍ୟ ।
ଵିଦ୍ରାଵୟତୁ ମଦାର୍ତିଂ
ଵିଦ୍ରୁମସାଲୋ ଵିଶଂକଟଦ୍ଵାରଃ ॥ 70 ॥
ଆଵରଣୟୋରହର୍ନିଶ-
-ମଂତରଭୂମୌପ୍ରକାଶଶାଲିନ୍ୟାମ୍ ।
ଆସୀନମଂବୁଜାସନ-
-ମଭିନଵସିଂଦୂରଗୌରମହମୀଡେ ॥ 71 ॥
ଵରଣସ୍ୟ ତସ୍ୟ ମାରୁତ-
-ୟୋଜନତୋ ଵିପୁଲଗୋପୁରଦ୍ଵାରଃ ।
ସାଲୋ ନାନାରତ୍ନୈଃ
ସଂଘଟିତାଂଗଃ କୃଷୀଷ୍ଟ ମଦଭୀଷ୍ଟମ୍ ॥ 72 ॥
ଅଂତରକକ୍ଷ୍ୟାମନୟୋ-
-ରଵିରଲଶୋଭାପିଚଂଡିଲୋଦ୍ଦେଶାମ୍ ।
ମାଣିକ୍ୟମଂଡପାଖ୍ୟାଂ
ମହତୀମଧିହୃଦୟମନିଶମାକଲୟେ ॥ 73 ॥
ତତ୍ର ସ୍ଥିତଂ ପ୍ରସନ୍ନଂ
ତରୁଣତମାଲପ୍ରଵାଲକିରଣାଭମ୍ ।
କର୍ଣାଵଲଂବିକୁଂଡଲ-
-କଂଦଲିତାଭୀଶୁକଵଚିତକପୋଲମ୍ ॥ 74 ॥
ଶୋଣାଧରଂ ଶୁଚିସ୍ମିତ-
-ମେଣାଂକଵଦନମେଧମାନକୃପମ୍ ।
ମୁଗ୍ଧୈଣମଦଵିଶେଷକ-
-ମୁଦ୍ରିତନିଟିଲେଂଦୁରେଖିକାରୁଚିରମ୍ ॥ 75 ॥
ନାଲୀକଦଲସହୋଦର-
-ନୟନାଂଚଲଘଟିତମନସିଜାକୂତମ୍ ।
କମଲାକଠିନପୟୋଧର-
-କସ୍ତୂରୀଘୁସୃଣପଂକିଲୋରସ୍କମ୍ ॥ 76 ॥
ଚାଂପେୟଗଂଧିକୈଶ୍ୟଂ
ଶଂପାସବ୍ରହ୍ମଚାରିକୌଶେୟମ୍ ।
ଶ୍ରୀଵତ୍ସକୌସ୍ତୁଭଧରଂ
ଶ୍ରିତଜନରକ୍ଷାଧୁରୀଣଚରଣାବ୍ଜମ୍ ॥ 77 ॥
କଂବୁସୁଦର୍ଶନଵିଲସ-
-ତ୍କରପଦ୍ମଂ କଂଠଲୋଲଵନମାଲମ୍ ।
ମୁଚୁକୁଂଦମୋକ୍ଷଫଲଦଂ
ମୁକୁଂଦମାନଂଦକଂଦମଵଲଂବେ ॥ 78 ॥
ତଦ୍ଵରଣୋତ୍ତରଭାଗେ
ତାରାପତିବିଂବଚୁଂବିନିଜଶୃଂଗଃ ।
ଵିଵିଧମଣୀଗଣଘଟିତୋ
ଵିତରତୁ ସାଲୋ ଵିନିର୍ମଲାଂ ଧିଷଣାମ୍ ॥ 79 ॥
ପ୍ରାକାରଦ୍ଵିତୟାଂତର-
-କକ୍ଷ୍ୟାଂ ପୃଥୁରତ୍ନନିକରସଂକୀର୍ଣାମ୍ ।
ନମତ ସହସ୍ରସ୍ତଂଭକ-
-ମଂଡପନାମ୍ନାତିଵିଶ୍ରୁତାଂ ଭୁଵନେ ॥ 80 ॥
ପ୍ରଣୁମସ୍ତତ୍ର ଭଵାନୀ-
-ସହଚରମୀଶାନମିଂଦୁଖଂଡଧରମ୍ ।
ଶୃଂଗାରନାୟିକାମନୁ-
-ଶୀଲନଭାଜୋଽପି ଭୃଂଗିନଂଦିମୁଖାନ୍ ॥ 81 ॥
ତସ୍ୟୈଣଵାହୟୋଜନ-
-ଦୂରେ ଵଂଦେ ମନୋମୟଂ ଵପ୍ରମ୍ ।
ଅଂକୂରନ୍ମଣିକିରଣା-
-ମଂତରକକ୍ଷ୍ୟାଂ ଚ ନିର୍ମଲାମନୟୋଃ ॥ 82 ॥
ତତ୍ରୈଵାମୃତଵାପୀଂ
ତରଲତରଂଗାଵଲୀଢତଟୟୁଗ୍ମାମ୍ ।
ମୁକ୍ତାମୟକଲହଂସୀ-
-ମୁଦ୍ରିତକନକାରଵିଂଦସଂଦୋହାମ୍ ॥ 83 ॥
ଶକ୍ରୋପଲମୟଭୃଂଗୀ-
-ସଂଗୀତୋନ୍ମେଷଘୋଷିତଦିଗଂତାମ୍ ।
କାଂଚନମୟାଂଗଵିଲସ-
-ତ୍କାରଂଡଵଷଂଡତାଂଡଵମନୋଜ୍ଞାମ୍ ॥ 84 ॥
କୁରୁଵିଂଦାତ୍ମକହଲ୍ଲକ-
-କୋରକସୁଷମାସମୂହପାଟଲିତାମ୍ ।
କଲୟେ ସୁଧାସ୍ଵରୂପାଂ
କଂଦଲିତାମଂଦକୈରଵାମୋଦାମ୍ ॥ 85 ॥
ତଦ୍ଵାପିକାଂତରାଲେ ତରଲେ
ମଣିପୋତସୀମ୍ନି ଵିହରଂତୀମ୍ ।
ସିଂଦୂରପାଟଲାଂଗୀଂ
ସିତକିରଣାଂକୂରକଲ୍ପିତଵତଂସାମ୍ ॥ 86 ॥
ପର୍ଵେଂଦୁବିଂବଵଦନାଂ
ପଲ୍ଲଵଶୋଣାଧରସ୍ଫୁରିତହାସାମ୍ ।
କୁଟିଲକବରୀଂ କୁରଂଗୀ-
-ଶିଶୁନୟନାଂ କୁଂଡଲସ୍ଫୁରିତଗଂଡାମ୍ ॥ 87 ॥
ନିକଟସ୍ଥପୋତନିଲୟାଃ
ଶକ୍ତୀଃ ଶୟଵିଧୃତହେମଶୃଂଗଜଲୈଃ ।
ପରିଷିଂଚଂତୀଂ ପରିତ-
-ସ୍ତାରାଂ ତାରୁଣ୍ୟଗର୍ଵିତାଂ ଵଂଦେ ॥ 88 ॥
ପ୍ରାଗୁକ୍ତସଂଖ୍ୟୟୋଜନଦୂରେ
ପ୍ରଣମାମି ବୁଦ୍ଧିମୟସାଲମ୍ ।
ଅନୟୋରଂତରକକ୍ଷ୍ୟା-
-ମଷ୍ଟାପଦପୁଷ୍ଟମେଦିନୀଂ ରୁଚିରାମ୍ ॥ 89 ॥
କାଦଂବରୀନିଧାନାଂ
କଲୟାମ୍ୟାନଂଦଵାପିକାଂ ତସ୍ୟାମ୍ ।
ଶୋଣାଶ୍ମନିଵହନିର୍ମିତ-
-ସୋପାନଶ୍ରେଣିଶୋଭମାନତଟୀମ୍ ॥ 90 ॥
ମାଣିକ୍ୟତରଣିନିଲୟାଂ
ମଧ୍ୟେ ତସ୍ୟା ମଦାରୁଣକପୋଲାମ୍ ।
ଅମୃତେଶୀତ୍ୟଭିଧାନା-
-ମଂତଃ କଲୟାମି ଵାରୁଣୀଂ ଦେଵୀମ୍ ॥ 91 ॥
ସୌଵର୍ଣକେନିପାତନ-
-ହସ୍ତାଃ ସୌଂଦର୍ୟଗର୍ଵିତା ଦେଵ୍ୟଃ ।
ତତ୍ପୁରତଃ ସ୍ଥିତିଭାଜୋ
ଵିତରଂତ୍ଵସ୍ମାକମାୟୁଷୋ ଵୃଦ୍ଧିମ୍ ॥ 92 ॥
ତସ୍ୟ ପୃଷଦଶ୍ଵୟୋଜନ-
-ଦୂରେଽହଂକାରସାଲମତିତୁଂଗମ୍ ।
ଵଂଦେ ତୟୋଶ୍ଚ ମଧ୍ୟେ
କକ୍ଷ୍ୟାଂ ଵଲମାନମଲୟପଵମାନାମ୍ ॥ 93 ॥
ଵିନୁମୋ ଵିମର୍ଶଵାପୀଂ
ସୌଷୁମ୍ନସୁଧାସ୍ଵରୂପିଣୀଂ ତତ୍ର ।
ଵେଲାତିଲଂଘ୍ୟଵୀଚୀ-
-କୋଲାହଲଭରିତକୂଲଵନଵାଟୀମ୍ ॥ 94 ॥
ତତ୍ରୈଵ ସଲିଲମଧ୍ୟେ
ତାପିଂଛଦଲପ୍ରପଂଚସୁଷମାଭାମ୍ ।
ଶ୍ୟାମଲକଂଚୁକଲସିତାଂ
ଶ୍ୟାମାଵିଟବିଂବଡଂବରହରାସ୍ୟାମ୍ ॥ 95 ॥
ଆଭୁଗ୍ନମସୃଣଚିଲ୍ଲୀ-
-ହସିତାୟୁଗ୍ମଶରକାର୍ମୁକଵିଲାସାମ୍ ।
ମଂଦସ୍ମିତାଂଚିତମୁଖୀଂ
ମଣିମୟତାଟଂକମଂଡିତକପୋଲାମ୍ ॥ 96 ॥
କୁରୁଵିଂଦତରଣିନିଲୟାଂ
କୁଲାଚଲସ୍ପର୍ଧିକୁଚନମନ୍ମଧ୍ୟାମ୍ ।
କୁଂକୁମଵିଲିପ୍ତଗାତ୍ରୀଂ
କୁରୁକୁଲ୍ଲାଂ ମନସି କୁର୍ମହେ ସତତମ୍ ॥ 97 ॥
ତତ୍ସାଲୋତ୍ତରଭାଗେ
ଭାନୁମୟଂ ଵପ୍ରମାଶ୍ରୟେ ଦୀପ୍ତମ୍ ।
ମଧ୍ୟଂ ଚ ଵିପୁଲମନୟୋ-
-ର୍ମନ୍ୟେ ଵିଶ୍ରାଂତମାତପୋଦ୍ଗାରମ୍ ॥ 98 ॥
ତତ୍ର କୁରୁଵିଂଦପୀଠେ
ତାମରସେ କନକକର୍ଣିକାଘଟିତେ ।
ଆସୀନମରୁଣଵାସସ-
-ମମ୍ଲାନପ୍ରସଵମାଲିକାଭରଣମ୍ ॥ 99 ॥
ଚକ୍ଷୁଷ୍ମତୀପ୍ରକାଶନ-
-ଶକ୍ତିଚ୍ଛାୟାସମାରଚିତକେଲିମ୍ ।
ମାଣିକ୍ୟମୁକୁଟରମ୍ୟଂ
ମନ୍ୟେ ମାର୍ତାଂଡଭୈରଵଂ ହୃଦୟେ ॥ 100 ॥
ଇଂଦୁମୟସାଲମୀଡେ
ତସ୍ୟୋତ୍ତରତସ୍ତୁଷାରଗିରିଗୌରମ୍ ।
ଅତ୍ୟଂତଶିଶିରମାରୁତ-
-ମନୟୋର୍ମଧ୍ୟଂ ଚ ଚଂଦ୍ରିକୋଦ୍ଗାରମ୍ ॥ 101 ॥
ତତ୍ର ପ୍ରକାଶମାନଂ
ତାରାନିକରୈଃ ପରିଷ୍କୃତୋଦ୍ଦେଶମ୍ ।
ଅମୃତମୟକାଂତିକଂଦଲ-
-ମଂତଃ କଲୟାମି କୁଂଦସିତମିଂଦୁମ୍ ॥ 102 ॥
ଶୃଂଗାରସାଲମୀଡେ
ଶୃଂଗୋଲ୍ଲସିତଂ ତଦୁତ୍ତରେ ଭାଗେ ।
ମଧ୍ୟସ୍ଥଲେ ତୟୋରପି
ମହିତାଂ ଶୃଂଗାରପୂର୍ଵିକାଂ ପରିଖାମ୍ ॥ 103 ॥
ତତ୍ର ମଣିନୌସ୍ଥିତାଭି-
-ସ୍ତପନୀୟାଵିରଚିତାଗ୍ରହସ୍ତାଭିଃ ।
ଶୃଂଗାରଦେଵତାଭିଃ
ସହିତଂ ପରିଖାଧିପଂ ଭଜେ ମଦନମ୍ ॥ 104 ॥
ଶୃଂଗାରଵରଣଵର୍ୟସ୍ୟୋତ୍ତରତଃ
ସକଲଵିବୁଧସଂସେଵ୍ୟମ୍ ।
ଚିଂତାମଣିଗଣରଚିତଂ
ଚିଂତାଂ ଦୂରୀକରୋତୁ ମେ ସଦନମ୍ ॥ 105 ॥
ମଣିସଦନସାଲୟୋରଧି-
-ମଧ୍ୟଂ ଦଶତାଲଭୂମିରୁହଦୀର୍ଘୈଃ ।
ପର୍ଣୈଃ ସୁଵର୍ଣଵର୍ଣୈ-
-ର୍ୟୁକ୍ତାଂ କାଂଡୈଶ୍ଚ ୟୋଜନୋତ୍ତୁଂଗୈଃ ॥ 106 ॥
ମୃଦୁଲୈସ୍ତାଲୀପଂଚକ-
-ମାନୈର୍ମିଲିତାଂ ଚ କେସରକଦଂବୈଃ ।
ସଂତତଗଲିତମରଂଦ-
-ସ୍ରୋତୋନିର୍ୟନ୍ମିଲିଂଦସଂଦୋହାମ୍ ॥ 107 ॥
ପାଟୀରପଵନବାଲକ-
-ଧାଟୀନିର୍ୟତ୍ପରାଗପିଂଜରିତାମ୍ ।
କଲହଂସୀକୁଲକଲକଲ-
-କୂଲଂକଷନିନଦନିଚୟକମନୀୟାମ୍ ॥ 108 ॥
ପଦ୍ମାଟଵୀଂ ଭଜାମଃ
ପରିମଲକଲ୍ଲୋଲପକ୍ଷ୍ମଲୋପାଂତାମ୍ ।
[ ଦେଵ୍ୟର୍ଘ୍ୟପାତ୍ରଧାରୀ
ତସ୍ୟାଃ ପୂର୍ଵଦିଶି ଦଶକଲାୟୁକ୍ତଃ । ]
ଵଲୟିତମୂର୍ତିର୍ଭଗଵା-
-ନ୍ଵହ୍ନିଃ କ୍ରୋଶୋନ୍ନତଶ୍ଚିରଂ ପାୟାତ୍ ॥ 109 ॥
ତତ୍ରାଧାରେ ଦେଵ୍ୟାଃ
ପାତ୍ରୀରୂପଃ ପ୍ରଭାକରଃ ଶ୍ରୀମାନ୍ ।
ଦ୍ଵାଦଶକଲାସମେତୋ
ଧ୍ଵାଂତଂ ମମ ବହୁଲମାଂତରଂ ଭିଂଦ୍ୟାତ୍ ॥ 110 ॥
ତସ୍ମିନ୍ ଦିନେଶପାତ୍ରେ
ତରଂଗିତାମୋଦମମୃତମୟମର୍ଘ୍ୟମ୍ ।
ଚଂଦ୍ରକଲାତ୍ମକମମୃତଂ
ସାଂଦ୍ରୀକୁର୍ୟାଦମଂଦମାନଂଦମ୍ ॥ 111 ॥
ଅମୃତେ ତସ୍ମିନ୍ନଭିତୋ
ଵିହରଂତ୍ୟୋ ଵିଵିଧମଣିତରଣିଭାଜଃ ।
ଷୋଡଶ କଲାଃ ସୁଧାଂଶୋଃ
ଶୋକାଦୁତ୍ତାରୟଂତୁ ମାମନିଶମ୍ ॥ 112 ॥
ତତ୍ରୈଵ ଵିହୃତିଭାଜୋ
ଧାତୃମୁଖାନାଂ ଚ କାରଣେଶାନାମ୍ ।
ସୃଷ୍ଟ୍ୟାଦିରୂପିକାସ୍ତାଃ
ଶମୟଂତ୍ଵଖିଲାଃ କଲାଶ୍ଚ ସଂତାପମ୍ ॥ 113 ॥
କୀନାଶଵରୁଣକିନ୍ନର-
-ରାଜଦିଗଂତେଷୁ ରତ୍ନଗେହସ୍ୟ ।
କଲୟାମି ତାନ୍ୟଜସ୍ରଂ
କଲୟଂତ୍ଵାୟୁଷ୍ୟମର୍ଘ୍ୟପାତ୍ରାଣି ॥ 114 ॥
ପାତ୍ରସ୍ଥଲସ୍ୟ ପୁରତଃ
ପଦ୍ମାରମଣଵିଧିପାର୍ଵତୀଶାନାମ୍ ।
ଭଵନାନି ଶର୍ମଣେ ନୋ
ଭଵଂତୁ ଭାସା ପ୍ରଦୀପିତଜଗଂତି ॥ 115 ॥
ସଦନସ୍ୟାନଲକୋଣେ
ସତତଂ ପ୍ରଣମାମି କୁଂଡମାଗ୍ନେୟମ୍ ।
ତତ୍ର ସ୍ଥିତଂ ଚ ଵହ୍ନିଂ
ତରଲଶିଖାଜଟିଲମଂବିକାଜନକମ୍ ॥ 116 ॥
ତସ୍ୟାସୁରଦିଶି ତାଦୃଶ-
-ରତ୍ନପରିସ୍ଫୁରିତପର୍ଵନଵକାଢ୍ୟମ୍ ।
ଚକ୍ରାତ୍ମକଂ ଶତାଂଗଂ
ଶତୟୋଜନମୁନ୍ନତଂ ଭଜେ ଦିଵ୍ୟମ୍ ॥ 117 ॥
ତତ୍ରୈଵ ଦିଶି ନିଷଣ୍ଣଂ
ତପନୀୟଧ୍ଵଜପରଂପରାଶ୍ଲିଷ୍ଟମ୍ ।
ରଥମପରଂ ଚ ଭଵାନ୍ୟା
ରଚୟାମୋ ମନସି ରତ୍ନମୟଚୂଡମ୍ ॥ 118 ॥
ଭଵନସ୍ୟ ଵାୟୁଭାଗେ
ପରିଷ୍କୃତୋ ଵିଵିଧଵୈଜୟଂତୀଭିଃ ।
ରଚୟତୁ ମୁଦଂ ରଥେଂଦ୍ରଃ
ସଚିଵେଶାନ୍ୟାଃ ସମସ୍ତଵଂଦ୍ୟାୟାଃ ॥ 119 ॥
କୁର୍ମୋଽଧିହୃଦୟମନିଶଂ
କ୍ରୋଡାସ୍ୟାୟାଃ ଶତାଂଗମୂର୍ଧନ୍ୟମ୍ ।
ରୁଦ୍ରଦିଶି ରତ୍ନଧାମ୍ନୋ
ରୁଚିରଶଲାକାପ୍ରପଂଚକଂଚୁକିତମ୍ ॥ 120 ॥
ପରିତୋ ଦେଵୀଧାମ୍ନଃ
ପ୍ରଣୀତଵାସା ମନୁସ୍ଵରୂପିଣ୍ୟଃ ।
କୁର୍ଵଂତୁ ରଶ୍ମିମାଲା-
-କୃତୟଃ କୁଶଲାନି ଦେଵତା ନିଖିଲାଃ ॥ 121 ॥
ପ୍ରାଗ୍ଦ୍ଵାରସ୍ୟ ଭଵାନୀ-
-ଧାମ୍ନଃ ପାର୍ଶ୍ଵଦ୍ଵୟାରଚିତଵାସେ ।
ମାତଂଗୀକିଟିମୁଖ୍ୟୌ
ମଣିସଦନେ ମନସି ଭାଵୟାମି ଚିରମ୍ ॥ 122 ॥
ୟୋଜନୟୁଗଲାଭୋଗା
ତତ୍କ୍ରୋଶପରିଣାହୟୈଵ ଭିତ୍ତ୍ୟା ଚ ।
ଚିଂତାମଣିଗୃହଭୂମି-
-ର୍ଜୀୟାଦାମ୍ନାୟମୟଚତୁର୍ଦ୍ଵାରା ॥ 123 ॥
ଦ୍ଵାରେ ଦ୍ଵାରେ ଧାମ୍ନଃ
ପିଂଡୀଭୂତା ନଵୀନବିଂବାଭାଃ ।
ଵିଦଧତୁ ଵିପୁଲାଂ କୀର୍ତିଂ
ଦିଵ୍ୟା ଲୌହିତ୍ୟସିଦ୍ଧ୍ୟୋ ଦେଵ୍ୟଃ ॥ 124 ॥
ମଣିସଦନସ୍ୟାଂତରତୋ
ମହନୀୟେ ରତ୍ନଵେଦିକାମଧ୍ୟେ ।
ବିଂଦୁମୟଚକ୍ରମୀଡେ
ପୀଠାନାମୁପରି ଵିରଚିତାଵାସମ୍ ॥ 125 ॥
ଚକ୍ରାଣାଂ ସକଲାନାଂ
ପ୍ରଥମମଧଃ ସୀମଫଲକଵାସ୍ତଵ୍ୟାଃ ।
ଅଣିମାଦିସିଦ୍ଧୟୋ ମା-
-ମଵଂତୁ ଦେଵୀ ପ୍ରଭାସ୍ଵରୂପିଣ୍ୟଃ ॥ 126 ॥
ଅଣିମାଦିସିଦ୍ଧିଫଲକ-
-ସ୍ୟୋପରିହରିଣାଂକଖଂଡକୃତଚୂଡାଃ ।
ଭଦ୍ରଂ ପକ୍ଷ୍ମଲୟଂତୁ
ବ୍ରାହ୍ମୀପ୍ରମୁଖାଶ୍ଚ ମାତରୋଽସ୍ମାକମ୍ ॥ 127 ॥
ତସ୍ୟୋପରି ମଣିଫଲକେ
ତାରୁଣ୍ୟୋତ୍ତୁଂଗପୀନକୁଚଭାରାଃ ।
ସଂକ୍ଷୋଭିଣୀପ୍ରଧାନାଃ
ଭ୍ରାଂତି ଵିଦ୍ରାଵୟଂତୁ ଦଶ ମୁଦ୍ରାଃ ॥ 128 ॥
ଫଲକତ୍ରୟସ୍ଵରୂପେ
ପୃଥୁଲେ ତ୍ରୈଲୋକ୍ୟମୋହନେ ଚକ୍ରେ ।
ଦୀଵ୍ୟଂତୁ ପ୍ରକଟାଖ୍ୟା-
-ସ୍ତାସାଂ କର୍ତ୍ରୀଂ ଚ ଭଗଵତୀ ତ୍ରିପୁରା ॥ 129 ॥
ତଦୁପରି ଵିପୁଲେ ଧିଷ୍ଣ୍ୟେ
ତରଲଦୃଶସ୍ତରୁଣକୋକନଦଭାସଃ ।
କାମାକର୍ଷିଣ୍ୟାଦ୍ୟାଃ
କଲୟେ ଦେଵୀଃ କଲାଧରଶିଖଂଡାଃ ॥ 130 ॥
ସର୍ଵାଶାପରିପୂରକଚକ୍ରେ-
-ଽସ୍ମିନ୍ ଗୁପ୍ତୟୋଗିନୀସେଵ୍ୟାଃ ।
ତ୍ରିପୁରେଶୀ ମମ ଦୁରିତଂ
ତୁଦ୍ୟାତ୍ କଂଠାଵଲଂବିମଣିହାରା ॥ 131 ॥
ତସ୍ୟୋପରି ମଣିପୀଠେ
ତାମ୍ରାଂଭୋରୁହଦଲପ୍ରଭାଶୋଣାଃ ।
ଧ୍ୟାୟାମ୍ୟନଂଗକୁସୁମା-
-ପ୍ରମୁଖା ଦେଵୀଶ୍ଚ ଵିଧୃତକୂର୍ପାସାଃ ॥ 132 ॥
ସଂକ୍ଷୋଭକାରକେଽସ୍ମିଂ-
-ଶ୍ଚକ୍ରେ ଶ୍ରୀତ୍ରିପୁରସୁଂଦରୀ ସାକ୍ଷାତ୍ ।
ଗୋପ୍ତ୍ରୀ ଗୁପ୍ତତରାଖ୍ୟାଃ
ଗୋପାୟତୁ ମାଂ କୃପାର୍ଦ୍ରୟା ଦୃଷ୍ଟ୍ୟା ॥ 133 ॥
ସଂକ୍ଷୋଭିଣୀପ୍ରଧାନାଃ
ଶକ୍ତୀସ୍ତସ୍ୟୋର୍ଧ୍ଵଵଲୟକୃତଵାସାଃ ।
ଆଲୋଲନୀଲଵେଣୀ-
-ରଂତଃ କଲୟାମି ୟୌଵନୋନ୍ମତ୍ତାଃ ॥ 134 ॥
ସୌଭାଗ୍ୟଦାୟକେଽସ୍ମିଂ-
-ଶ୍ଚକ୍ରେଶୀ ତ୍ରିପୁରଵାସିନୀ ଜୀୟାତ୍ ।
ଶକ୍ତୀଶ୍ଚ ସଂପ୍ରଦାୟାଭିଧାଃ
ସମସ୍ତାଃ ପ୍ରମୋଦୟଂତ୍ଵନିଶମ୍ ॥ 135 ॥
ମଣିପୀଠୋପରି ତାସାଂ
ମହତି ଚତୁର୍ହସ୍ତଵିସ୍ତୃତେ ଵଲୟେ ।
ସଂତତଵିରଚିତଵାସାଃ
ଶକ୍ତୀଃ କଲୟାମି ସର୍ଵସିଦ୍ଧିମୁଖାଃ ॥ 136 ॥
ସର୍ଵାର୍ଥସାଧକାଖ୍ୟେ
ଚକ୍ରେଽମୁଷ୍ମିନ୍ ସମସ୍ତଫଲଦାତ୍ରୀ ।
ତ୍ରିପୁରା ଶ୍ରୀର୍ମମ କୁଶଲଂ
ଦିଶତାଦୁତ୍ତୀର୍ଣୟୋଗିନୀସେଵ୍ୟା ॥ 137 ॥
ତାସାଂ ନିଲୟସ୍ୟୋପରି
ଧିଷ୍ଣ୍ୟେ କୌସୁଂଭକଂଚୁକମନୋଜ୍ଞାଃ ।
ସର୍ଵାଜ୍ଞାଦ୍ୟାଃ ଦେଵ୍ୟଃ
ସକଲାଃ ସଂପାଦୟଂତୁ ମମ କୀର୍ତିମ୍ ॥ 138 ॥
ଚକ୍ରେ ସମସ୍ତରକ୍ଷା-
-କରନାମ୍ନ୍ୟସ୍ମିନ୍ ସମସ୍ତଜନସେଵ୍ୟାମ୍ ।
ମନସି ନିଗର୍ଭାସହିତାଂ
ମନ୍ୟେ ଶ୍ରୀତ୍ରିପୁରମାଲିନୀଂ ଦେଵୀମ୍ ॥ 139 ॥
ସର୍ଵଜ୍ଞାସଦନସ୍ୟୋପରି
ଚକ୍ରେ ଵିପୁଲେ ସମାକଲିତଗେହାଃ ।
ଵଂଦେ ଵଶିନୀମୁଖ୍ୟାଃ
ଶକ୍ତୀଃ ସିଂଦୂରରେଣୁରୁଚଃ ॥ 140 ॥
ଶ୍ରୀସର୍ଵରୋଗହରାଖ୍ୟ-
-ଚକ୍ରେଽସ୍ମିଂସ୍ତ୍ରିପୁରପୂର୍ଵିକାଂ ସିଦ୍ଧାମ୍ ।
ଵଂଦେ ରହସ୍ୟନାମ୍ନା
ଵେଦ୍ୟାଭିଃ ଶକ୍ତିଭିଃ ସଦା ସେଵ୍ୟାମ୍ ॥ 141 ॥
ଵଶିନୀଗୃହୋପରିଷ୍ଟା-
-ଦ୍ଵିଂଶତିହସ୍ତୋନ୍ନତେ ମହାପୀଠେ ।
ଶମୟଂତୁ ଶତ୍ରୁବୃଂଦଂ
ଶସ୍ତ୍ରାଣ୍ୟସ୍ତ୍ରାଣି ଚାଦିଦଂପତ୍ୟୋଃ ॥ 142 ॥
ଶସ୍ତ୍ରସଦନୋପରିଷ୍ଟା-
-ଦ୍ଵଲୟେ ଵଲଵୈରିରତ୍ନସଂଘଟିତେ ।
କାମେଶ୍ଵରୀପ୍ରଧାନାଃ
କଲୟେ ଦେଵୀଃ ସମସ୍ତଜନଵଂଦ୍ୟାଃ ॥ 143 ॥
ଚକ୍ରେଽତ୍ର ସର୍ଵସିଦ୍ଧିପ୍ରଦ-
-ନାମନି ସର୍ଵଫଲଦାତ୍ରୀ ।
ତ୍ରିପୁରାଂବାଵତୁ ସତତଂ
ପରାପରରହସ୍ୟୟୋଗିନୀସେଵ୍ୟା ॥ 144 ॥
କାମେଶ୍ଵରୀଗୃହୋପରିଵଲୟେ
ଵିଵିଧମନୁସଂପ୍ରଦାୟଜ୍ଞାଃ ।
ଚତ୍ଵାରୋ ୟୁଗନାଥା
ଜୟଂତୁ ମିତ୍ରେଶପୂର୍ଵକାଃ ଗୁରଵଃ ॥ 145 ॥
ନାଥଭଵନୋପରିଷ୍ଟା-
-ନ୍ନାନାରତ୍ନଚୟମେଦୁରେ ପୀଠେ ।
କାମେଶ୍ୟାଦ୍ୟା ନିତ୍ୟାଃ
କଲୟଂତୁ ମୁଦଂ ତିଥିସ୍ଵରୂପିଣ୍ୟଃ ॥ 146 ॥
ନିତ୍ୟାସଦନସ୍ୟୋପରି
ନିର୍ମଲମଣିନିଵହଵିରଚିତେ ଧିଷ୍ଣ୍ୟେ ।
କୁଶଲଂ ଷଡଂଗଦେଵ୍ୟଃ
କଲୟଂତ୍ଵସ୍ମାକମୁତ୍ତରଲନେତ୍ରାଃ ॥ 147 ॥
ସଦନସ୍ୟୋପରି ତାସାଂ
ସର୍ଵାନଂଦମୟନାମକେ ବିଂଦୌ ।
ପଂଚବ୍ରହ୍ମାକାରାଂ
ମଂଚଂ ପ୍ରଣମାମି ମଣିଗଣାକୀର୍ଣମ୍ ॥ 148 ॥
ପରିତୋ ମଣିମଂଚସ୍ୟ
ପ୍ରଲଂବମାନା ନିୟଂତ୍ରିତା ପାଶୈଃ ।
ମାୟାମୟୀ ଜଵନିକା
ମମ ଦୁରିତଂ ହରତୁ ମେଚକଚ୍ଛାୟା ॥ 149 ॥
ମଂଚସ୍ୟୋପରି ଲଂବ-
-ନ୍ମଦନୀପୁନ୍ନାଗମାଲିକାଭରିତମ୍ ।
ହରିଗୋପମୟଵିତାନଂ
ହରତାଦାଲସ୍ୟମନିଶମସ୍ମାକମ୍ ॥ 150 ॥
ପର୍ୟଂକସ୍ୟ ଭଜାମଃ
ପାଦାନ୍ବିଂବାଂବୁଦେଂଦୁହେମରୁଚଃ ।
ଅଜହରିରୁଦ୍ରେଶମୟା-
-ନନଲାସୁରମାରୁତେଶକୋଣସ୍ଥାନ୍ ॥ 151 ॥
ଫଲକଂ ସଦାଶିଵମୟଂ
ପ୍ରଣୌମି ସିଂଦୂରରେଣୁକିରଣାଭମ୍ ।
ଆରଭ୍ୟାଂଗେଶୀନାଂ
ସଦନାତ୍କଲିତଂ ଚ ରତ୍ନସୋପାନମ୍ ॥ 152 ॥
ପଟ୍ଟୋପଧାନଗଂଡକ-
-ଚତୁଷ୍ଟୟସ୍ଫୁରିତପାଟଲାସ୍ତରଣମ୍ ।
ପର୍ୟଂକୋପରି ଘଟିତଂ
ପାତୁ ଚିରଂ ହଂସତୂଲଶୟନଂ ନଃ ॥ 153 ॥
ତସ୍ୟୋପରି ନିଵସଂତଂ
ତାରୁଣ୍ୟଶ୍ରୀନିଷେଵିତଂ ସତତମ୍ ।
ଆଵୃଂତପୁଲ୍ଲହଲ୍ଲକ-
-ମରୀଚିକାପୁଂଜମଂଜୁଲଚ୍ଛାୟମ୍ ॥ 154 ॥
ସିଂଦୂରଶୋଣଵସନଂ
ଶୀତାଂଶୁସ୍ତବକଚୁଂବିତକିରୀଟମ୍ ।
କୁଂକୁମତିଲକମନୋହର-
-କୁଟିଲାଲିକହସିତକୁମୁଦବଂଧୁଶିଶୁମ୍ ॥ 155 ॥
ପୂର୍ଣେଂଦୁବିଂବଵଦନଂ
ଫୁଲ୍ଲସରୋଜାତଲୋଚନତ୍ରିତୟମ୍ ।
ତରଲାପାଂଗତରଂଗିତ-
-ଶଫରାଂକନଶାସ୍ତ୍ରସଂପ୍ରଦାୟାର୍ଥମ୍ ॥ 156 ॥
ମଣିମୟକୁଂଡଲପୁଷ୍ୟ-
-ନ୍ମରୀଚିକଲ୍ଲୋଲମାଂସଲକପୋଲମ୍ ।
ଵିଦ୍ରୁମସହୋଦରାଧର-
-ଵିସୃମରସୁସ୍ମିତକିଶୋରସଂଚାରମ୍ ॥ 157 ॥
ଆମୋଦିକୁସୁମଶେଖର-
-ମାନୀଲଭ୍ରୂଲତାୟୁଗମନୋଜ୍ଞମ୍ ।
ଵୀଟୀସୌରଭଵୀଚୀ-
-ଦ୍ଵିଗୁଣିତଵକ୍ତ୍ରାରଵିଂଦସୌରଭ୍ୟମ୍ ॥ 158 ॥
ପାଶାଂକୁଶେକ୍ଷୁଚାପ-
-ପ୍ରସଵଶରସ୍ଫୁରିତକୋମଲକରାବ୍ଜମ୍ ।
କାଶ୍ମୀରପଂକିଲାଂଗଂ
କାମେଶଂ ମନସି କୁର୍ମହେ ସତତମ୍ ॥ 159 ॥
ତସ୍ୟାଂକଭୁଵି ନିଷଣ୍ଣାଂ
ତରୁଣକଦଂବପ୍ରସୂନକିରଣାଭାମ୍ ।
ଶୀତାଂଶୁଖଂଡଚୂଡାଂ
ସୀମଂତନ୍ୟସ୍ତସାଂଦ୍ରସିଂଦୂରାମ୍ ॥ 160 ॥
କୁଂକୁମଲଲାମଭାସ୍ଵ-
-ନ୍ନିଟିଲାଂ କୁଟିଲତରଚିଲ୍ଲିକାୟୁଗଲାମ୍ ।
ନାଲୀକତୁଲ୍ୟନୟନାଂ
ନାସାଂଚଲନଟିତମୌକ୍ତିକାଭରଣାମ୍ ॥ 161 ॥
ଅଂକୁରିତମଂଦହାସ-
-ମରୁଣାଧରକାଂତିଵିଜିତବିଂବାଭାମ୍ ।
କସ୍ତୂରୀମକରୀୟୁତ-
-କପୋଲସଂକ୍ରାଂତକନକତାଟଂକାମ୍ ॥ 162 ॥
କର୍ପୂରସାଂଦ୍ରଵୀଟୀ-
-କବଲିତଵଦନାରଵିଂଦକମନୀୟାମ୍ ।
କଂବୁସହୋଦରକଂଠ-
-ପ୍ରଲଂବମାନାଚ୍ଛମୌକ୍ତିକକଲାପାମ୍ ॥ 163 ॥
କହ୍ଲାରଦାମକୋମଲ-
-ଭୁଜୟୁଗଲସ୍ଫୁରିତରତ୍ନକେୟୂରାମ୍ ।
କରପଦ୍ମମୂଲଵିଲସ-
-ତ୍କାଂଚନମୟକଟକଵଲୟସଂଦୋହାମ୍ ॥ 164 ॥
ପାଣିଚତୁଷ୍ଟୟଵିଲସ-
-ତ୍ପାଶାଂକୁଶପୁଂଡ୍ରଚାପପୁଷ୍ପାସ୍ତ୍ରାମ୍ ।
କୂଲଂକଷକୁଚଶିଖରାଂ
କୁଂକୁମକର୍ଦମିତରତ୍ନକୂର୍ପାସାମ୍ ॥ 165 ॥
ଅଣୁଦାୟାଦଵଲଗ୍ନା-
-ମଂବୁଦଶୋଭାସନାଭିରୋମଲତାମ୍ ।
ମାଣିକ୍ୟଖଚିତକାଂଚୀ-
-ମରୀଚିକାକ୍ରାଂତମାଂସଲନିତଂବାମ୍ ॥ 166 ॥
କରଭୋରୁକାଂଡୟୁଗଲାଂ
ଜଂଘାଜିତକାମଜୈତ୍ରତୂଣୀରାମ୍ ।
ପ୍ରପଦପରିଭୂତକୂର୍ମାଂ
ପଲ୍ଲଵସଚ୍ଛାୟପଦୟୁଗମନୋଜ୍ଞାମ୍ ॥ 167 ॥
କମଲଭଵକଂଜଲୋଚନ-
-କିରୀଟରତ୍ନାଂଶୁରଂଜିତପଦାବ୍ଜାମ୍ ।
ଉନ୍ମସ୍ତକାନୁକଂପା-
-ମୁତ୍ତରଲାପାଂଗପୋଷିତାନଂଗାମ୍ ॥ 168 ॥
ଆଦିମରସାଵଲଂବା-
-ମନିଦଂ ପ୍ରଥମୋକ୍ତିଵଲ୍ଲରୀକଲିକାମ୍ ।
ଆବ୍ରହ୍ମକୀଟଜନନୀ-
-ମଂତଃ କଲୟାମି ସୁଂଦରୀମନିଶମ୍ ॥ 169 ॥
କସ୍ତୁ କ୍ଷିତୌ ପଟୀୟା-
-ନ୍ଵସ୍ତୁ ସ୍ତୋତୁଂ ଶିଵାଂକଵାସ୍ତଵ୍ୟମ୍ ।
ଅସ୍ତୁ ଚିରଂତନସୁକୃତୈଃ
ପ୍ରସ୍ତୁତକାମ୍ୟାୟ ତନ୍ମମ ପୁରସ୍ତାତ୍ ॥ 170 ॥
ପ୍ରଭୁସମ୍ମିତୋକ୍ତିଗମ୍ୟଂ
ପରମଶିଵୋତ୍ସଂଗତୁଂଗପର୍ୟଂକମ୍ ।
ତେଜଃ କିଂଚନ ଦିଵ୍ୟଂ
ପୁରତୋ ମେ ଭଵତୁ ପୁଂଡ୍ରକୋଦଂଡମ୍ ॥ 171 ॥
ମଧୁରିମଭରିତଶରାସଂ
ମକରଂଦସ୍ୟଂଦିମାର୍ଗଣୋଦାରମ୍ ।
କୈରଵିଣୀଵିଟଚୂଡଂ
କୈଵଲ୍ୟାୟାସ୍ତୁ କିଂଚନ ମହୋ ନଃ ॥ 172 ॥
ଅକ୍ଷୁଦ୍ରମିକ୍ଷୁଚାପଂ
ପରୋକ୍ଷମଵଲଗ୍ନସୀମ୍ନି ତ୍ର୍ୟକ୍ଷମ୍ ।
କ୍ଷପୟତୁ ମେ କ୍ଷେମେତର-
-ମୁକ୍ଷରଥପ୍ରେମପକ୍ଷ୍ମଲଂ ତେଜଃ ॥ 173 ॥
ଭୃଂଗରୁଚିସଂଗରକରାପାଂଗଂ
ଶୃଂଗାରତୁଂଗମରୁଣାଂଗମ୍ ।
ମଂଗଲମଭଂଗୁରଂ ମେ
ଘଟୟତୁ ଗଂଗାଧରାଂଗସଂଗି ମହଃ ॥ 174 ॥
ପ୍ରପଦାଜିତକୂର୍ମମୂର୍ଜିତ-
-କରୁଣଂ ଭର୍ମରୁଚିନିର୍ମଥନଦେହମ୍ ।
ଶ୍ରିତଵର୍ମ ମର୍ମ ଶଂଭୋଃ
କିଂଚନ ମମ ନର୍ମ ଶର୍ମ ନିର୍ମାତୁ ॥ 175 ॥
କାଲକୁରଲାଲିକାଲିମ-
-କଂଦଲଵିଜିତାଲି ଵିଧୃତମଣିଵାଲି ।
ମିଲତୁ ହୃଦି ପୁଲିନଜଘନଂ
ବହୁଲିତଗଲଗରଲକେଲି କିମପି ମହଃ ॥ 176 ॥
କୁଂକୁମତିଲକିତଫାଲା
କୁରୁଵିଂଦଚ୍ଛାୟପାଟଲଦୁକୂଲା ।
କରୁଣାପୟୋଧିଵେଲା
କାଚନ ଚିତ୍ତେ ଚକାସ୍ତୁ ମେ ଲୀଲା ॥ 177 ॥
ପୁଷ୍ପଂଧୟରୁଚିଵେଣ୍ୟଃ
ପୁଲିନାଭୋଗତ୍ରପାକରଶ୍ରେଣ୍ୟଃ ।
ଜୀୟାସୁରିକ୍ଷୁପାଣ୍ୟଃ
କାଶ୍ଚନ କାମାରିକେଲିସାକ୍ଷିଣ୍ୟଃ ॥ 178 ॥
ତପନୀୟାଂଶୁକଭାଂସି
ଦ୍ରାକ୍ଷାମାଧୁର୍ୟନାସ୍ତିକଵଚାଂସି ।
କତିଚନ ଶୁଚଂ ମହାଂସି
କ୍ଷପୟତୁ କପାଲିତୋଷିତମନାଂସି ॥ 179 ॥
ଅସିତକଚମାୟତାକ୍ଷଂ
କୁସୁମଶରଂ କୂଲମୁଦ୍ଵହକୃପାର୍ଦ୍ରମ୍ ।
ଆଦିମରସାଧିଦୈଵତ-
-ମଂତଃ କଲୟେ ହରାଂକଵାସି ମହଃ ॥ 180 ॥
କର୍ଣୋପାଂତତରଂଗିତ-
-କଟାକ୍ଷଵିସ୍ପଂଦିକଂଠଦଘ୍ନକୃପାମ୍ ।
କାମେଶ୍ଵରାଂକନିଲୟାଂ
କାମପି ଵିଦ୍ୟାଂ ପୁରାତନୀଂ କଲୟେ ॥ 181 ॥
ଅରଵିଂଦକାଂତ୍ୟରୁଂତୁଦ-
-ଵିଲୋଚନଦ୍ଵଂଦ୍ଵସୁଂଦରମୁଖେଂଦୁ ।
ଛଂଦଃ କଂଦଲମଂଦିର-
-ମଂତଃପୁରମୈଂଦୁଶେଖରଂ ଵଂଦେ ॥ 182 ॥
ବିଂବିନିକୁରଂବଡଂବର-
-ଵିଡଂବକଚ୍ଛାୟମଂବରଵଲଗ୍ନମ୍ ।
କଂବୁଗଲମଂବୁଦକୁଚଂ
ବିଂବୋକଂ କମପି ଚୁଂବତୁ ମନୋ ମେ ॥ 183 ॥
କମପି କମନୀୟରୂପଂ
କଲୟାମ୍ୟଂତଃ କଦଂବକୁସୁମାଢ୍ୟମ୍ ।
ଚଂପକରୁଚିରସୁଵେଷୈଃ
ସଂପାଦିତକାଂତ୍ୟଲଂକୃତଦିଗଂତମ୍ ॥ 184 ॥
ଶଂପାରୁଚିଭର-
-ଗର୍ହାସଂପାଦକକାଂତିକଵଚିତଦିଗଂତମ୍ ।
ସିଦ୍ଧାଂତଂ ନିଗମାନାଂ
ଶୁଦ୍ଧାଂତଂ କିମପି ଶୂଲିନଃ କଲୟେ ॥ 185 ॥
ଉଦ୍ୟଦ୍ଦିନକରଶୋଣା-
-ନୁତ୍ପଲବଂଧୁସ୍ତନଂଧୟାପୀଡାନ୍ ।
କରକଲିତପୁଂଡ୍ରଚାପା-
-ନ୍କଲୟେ କାନପି କପର୍ଦିନଃ ପ୍ରାଣାନ୍ ॥ 186 ॥
ରଶନାଲସଜ୍ଜଘନୟା
ରସନାଜୀଵାତୁଚାପଭାସୁରୟା ।
ଘ୍ରାଣାୟୁଷ୍କରଶରୟା
ଘ୍ରାତଂ ଚିତ୍ତଂ କୟାପି ଵାସନୟା ॥ 187 ॥
ସରସିଜସହୟୁଧ୍ଵଦୃଶା
ଶଂପାଲତିକାସନାଭିଵିଗ୍ରହୟା ।
ଭାସା କୟାପି ଚେତୋ
ନାସାମଣିଶୋଭିଵଦନୟା ଭରିତମ୍ ॥ 188 ॥
ନଵୟାଵକାଭସିଚୟାନ୍ଵିତୟା
ଗଜୟାନୟା ଦୟାପରୟା ।
ଧୃତୟାମିନୀଶକଲୟା
ଧିୟା କୟାପି କ୍ଷତାମୟା ହି ଵୟମ୍ ॥ 189 ॥
ଅଲମଲମକୁସୁମବାଣୈ-
-ରବିଂବଶୋଣୈରପୁଂଡ୍ରକୋଦଂଡୈଃ ।
ଅକୁମୁଦବାଂଧଵଚୂଡୈ-
-ରନ୍ୟୈରିହ ଜଗତି ଦୈଵତଂ ମନ୍ୟୈଃ ॥ 190 ॥
କୁଵଲୟସଦୃକ୍ଷନୟନୈଃ
କୁଲଗିରିକୂଟସ୍ଥବଂଧୁକୁଚଭାରୈଃ ।
କରୁଣାସ୍ପଂଦିକଟାକ୍ଷୈଃ
କଵଚିତଚିତ୍ତୋଽସ୍ମି କତିପୟୈଃ କୁତୁକୈଃ ॥ 191 ॥
ନତଜନସୁଲଭାୟ ନମୋ
ନାଲୀକସନାଭିଲୋଚନାୟ ନମଃ ।
ନଂଦିତଗିରିଶାୟ ନମୋ
ମହସେ ନଵନୀପପାଟଲାୟ ନମଃ ॥ 192 ॥
କାଦଂବକୁସୁମଦାମ୍ନେ
କାୟଚ୍ଛାୟାକଣାୟିତାର୍ୟମ୍ଣେ ।
ସୀମ୍ନେ ଚିରଂତନଗିରାଂ
ଭୂମ୍ନେ କସ୍ମୈଚିଦାଦଦେ ପ୍ରଣତିମ୍ ॥ 193 ॥
କୁଟିଲକବରୀଭରେଭ୍ୟଃ
କୁଂକୁମସବ୍ରହ୍ମଚାରିକିରଣେଭ୍ୟଃ ।
କୂଲଂକଷସ୍ତନେଭ୍ୟଃ
କୁର୍ମଃ ପ୍ରଣତିଂ କୁଲାଦ୍ରିକୁତୁକେଭ୍ୟଃ ॥ 194 ॥
କୋକନଦଶୋଣଚରଣା-
-ତ୍କୋମଲକୁରଲାଲିଵିଜିତଶୈଵାଲାତ୍ ।
ଉତ୍ପଲସଗଂଧିନୟନା-
-ଦୁରରୀକୁର୍ମୋ ନ ଦେଵତମାନ୍ୟାମ୍ ॥ 195 ॥
ଆପାଟଲାଧରାଣା-
-ମାନୀଲସ୍ନିଗ୍ଧବର୍ବରକଚାନାମ୍ ।
ଆମ୍ନାୟଜୀଵନାନା-
-ମାକୂତାନାଂ ହରସ୍ୟ ଦାସୋଽହମ୍ ॥ 196 ॥
ପୁଂଖିତଵିଲାସହାସ-
-ସ୍ଫୁରିତାସୁ ପୁରାହିତାଂକନିଲୟାସୁ ।
ମଗ୍ନଂ ମନୋ ମଦୀୟଂ
କାସ୍ଵପି କାମାରିଜୀଵନାଡୀଷୁ ॥ 197 ॥
ଲଲିତା ପାତୁ ଶିରୋ ମେ
ଲଲାଟମଂବା ଚ ମଧୁମତୀରୂପା ।
ଭ୍ରୂୟୁଗ୍ମଂ ଚ ଭଵାନୀ
ପୁଷ୍ପଶରା ପାତୁ ଲୋଚନଦ୍ଵଂଦ୍ଵମ୍ ॥ 198 ॥
ପାୟାନ୍ନାସାଂ ବାଲା
ସୁଭଗା ଦଂତାଂଶ୍ଚ ସୁଂଦରୀ ଜିହ୍ଵାମ୍ ।
ଅଧରୋଷ୍ଠମାଦିଶକ୍ତି-
-ଶ୍ଚକ୍ରେଶୀ ପାତୁ ମେ ଚିରଂ ଚିବୁକମ୍ ॥ 199 ॥
କାମେଶ୍ଵରୀ ଚ କର୍ଣୌ
କାମାକ୍ଷୀ ପାତୁ ଗଂଡୟୋର୍ୟୁଗଲମ୍ ।
ଶୃଂଗାରନାୟିକାଵ୍ୟା-
-ଦ୍ଵଦନଂ ସିଂହାସନେଶ୍ଵରୀ ଚ ଗଲମ୍ ॥ 200 ॥
ସ୍କଂଦପ୍ରସୂଶ୍ଚ ପାତୁ
ସ୍କଂଧୌ ବାହୂ ଚ ପାଟଲାଂଗୀ ମେ ।
ପାଣୀ ଚ ପଦ୍ମନିଲୟା
ପାୟାଦନିଶଂ ନଖାଵଲୀର୍ଵିଜୟା ॥ 201 ॥
କୋଦଂଡିନୀ ଚ ଵକ୍ଷଃ
କୁକ୍ଷିଂ ଚାଵ୍ୟାତ୍ କୁଲାଚଲତନୂଜା ।
କଲ୍ୟାଣୀ ଚ ଵଲଗ୍ନଂ
କଟିଂ ଚ ପାୟାତ୍କଲାଧରଶିଖଂଡା ॥ 202 ॥
ଊରୁଦ୍ଵୟଂ ଚ ପାୟା-
-ଦୁମା ମୃଡାନୀ ଚ ଜାନୁନୀ ରକ୍ଷେତ୍ ।
ଜଂଘେ ଚ ଷୋଡଶୀ ମେ
ପାୟାତ୍ ପାଦୌ ଚ ପାଶସୃଣିହସ୍ତା ॥ 203 ॥
ପ୍ରାତଃ ପାତୁ ପରା ମାଂ
ମଧ୍ୟାହ୍ନେ ପାତୁ ମଣିଗୃହାଧୀଶା ।
ଶର୍ଵାଣ୍ୟଵତୁ ଚ ସାୟଂ
ପାୟାଦ୍ରାତ୍ରୌ ଚ ଭୈରଵୀ ସାକ୍ଷାତ୍ ॥ 204 ॥
ଭାର୍ୟାଂ ରକ୍ଷତୁ ଗୌରୀଂ
ପାୟାତ୍ ପୁତ୍ରାଂଶ୍ଚ ବିଂଦୁଗୃହପୀଠା ।
ଶ୍ରୀଵିଦ୍ୟା ଚ ୟଶୋ ମେ
ଶୀଲଂ ଚାଵ୍ୟାଚ୍ଚିରଂ ମହାରାଜ୍ଞୀ ॥ 205 ॥
ପଵନମୟି ପାଵକମୟି
କ୍ଷୋଣୀମୟି ଗଗନମୟି କୃପୀଟମୟି ।
ରଵିମୟି ଶଶିମୟି ଦିଙ୍ମୟି
ସମୟମୟି ପ୍ରାଣମୟି ଶିଵେ ପାହି ॥ 206 ॥
କାଲି କପାଲିନି ଶୂଲିନି
ଭୈରଵି ମାତଂଗି ପଂଚମି ତ୍ରିପୁରେ ।
ଵାଗ୍ଦେଵି ଵିଂଧ୍ୟଵାସିନି
ବାଲେ ଭୁଵନେଶି ପାଲୟ ଚିରଂ ମାମ୍ ॥ 207 ॥
ଅଭିନଵସିଂଦୂରାଭା-
-ମଂବ ତ୍ଵାଂ ଚିଂତୟଂତି ୟେ ହୃଦୟେ ।
ଉପରି ନିପତଂତି ତେଷା-
-ମୁତ୍ପଲନୟନାକଟାକ୍ଷକଲ୍ଲୋଲାଃ ॥ 208 ॥
ଵର୍ଗାଷ୍ଟକମିଲିତାଭି-
-ର୍ଵଶିନୀମୁଖ୍ୟାଭିରାଵୃତାଂ ଭଵତୀମ୍ ।
ଚିଂତୟତାଂ ସିତଵର୍ଣାଂ
ଵାଚୋ ନିର୍ୟାଂତ୍ୟୟତ୍ନତୋ ଵଦନାତ୍ ॥ 209 ॥
କନକଶଲାକାଗୌରୀଂ
କର୍ଣଵ୍ୟାଲୋଲକୁଂଡଲଦ୍ଵିତୟାମ୍ ।
ପ୍ରହସିତମୁଖୀଂ ଚ ଭଵତୀଂ
ଧ୍ୟାୟଂତୋ ୟେ ତ ଏଵ ଭୂଧନଦାଃ ॥ 210 ॥
ଶୀର୍ଷାଂଭୋରୁହମଧ୍ୟେ
ଶୀତଲପୀୟୂଷଵର୍ଷିଣୀଂ ଭଵତୀମ୍ ।
ଅନୁଦିନମନୁଚିଂତୟତା-
-ମାୟୁଷ୍ୟଂ ଭଵତି ପୁଷ୍କଲମଵନ୍ୟାମ୍ ॥ 211 ॥
ମଧୁରସ୍ମିତାଂ ମଦାରୁଣନୟନାଂ
ମାତଂଗକୁଂଭଵକ୍ଷୋଜାମ୍ ।
ଚଂଦ୍ରଵତଂସିନୀଂ ତ୍ଵାଂ
ସଵିଧେ ପଶ୍ୟଂତି ସୁକୃତିନଃ କେଚିତ୍ ॥ 212 ॥
ଲଲିତାୟାଃ ସ୍ତଵରତ୍ନଂ
ଲଲିତପଦାଭିଃ ପ୍ରଣୀତମାର୍ୟାଭିଃ ।
ପ୍ରତିଦିନମଵନୌ ପଠତାଂ
ଫଲାନି ଵକ୍ତୁଂ ପ୍ରଗଲ୍ଭତେ ସୈଵ ॥ 213 ॥
ସଦସଦନୁଗ୍ରହନିଗ୍ରହ-
-ଗୃହୀତମୁନିଵିଗ୍ରହୋ ଭଗଵାନ୍ ।
ସର୍ଵାସାମୁପନିଷଦାଂ
ଦୁର୍ଵାସା ଜୟତି ଦେଶିକଃ ପ୍ରଥମଃ ॥ 214 ॥
ଇତି ମହର୍ଷିଦୁର୍ଵାସଃ ଵିରଚିତଂ ଶ୍ରୀଲଲିତାସ୍ତଵରତ୍ନମ୍ ।
