બ્રહ્મોવાચ
શૃણુ વત્સ પ્રવક્ષ્યામિ આદ્યાસ્તોત્રં મહાફલમ્ ।
યઃ પઠેત્ સતતં ભક્ત્યા સ એવ વિષ્ણુવલ્લભઃ ॥ 1 ॥
મૃત્યુર્વ્યાધિભયં તસ્ય નાસ્તિ કિંચિત્ કલૌ યુગે ।
અપુત્રા લભતે પુત્રં ત્રિપક્ષં શ્રવણં યદિ ॥ 2 ॥
દ્વૌ માસૌ બંધનાન્મુક્તિ વિપ્રવક્ત્રાત્ શ્રુતં યદિ ।
મૃતવત્સા જીવવત્સા ષણ્માસં શ્રવણં યદિ ॥ 3 ॥
નૌકાયાં સંકટે યુદ્ધે પઠનાજ્જયમાપ્નુયાત્ ।
લિખિત્વા સ્થાપયેદ્ગેહે નાગ્નિચૌરભયં ક્વચિત્ ॥ 4 ॥
રાજસ્થાને જયી નિત્યં પ્રસન્નાઃ સર્વદેવતા ।
ઓં હ્રીમ્ ।
બ્રહ્માણી બ્રહ્મલોકે ચ વૈકુંઠે સર્વમંગળા ॥ 5 ॥
ઇંદ્રાણી અમરાવત્યામંબિકા વરુણાલયે ।
યમાલયે કાલરૂપા કુબેરભવને શુભા ॥ 6 ॥
મહાનંદાગ્નિકોણે ચ વાયવ્યાં મૃગવાહિની ।
નૈરૃત્યાં રક્તદંતા ચ ઐશાન્યાં શૂલધારિણી ॥ 7 ॥
પાતાળે વૈષ્ણવીરૂપા સિંહલે દેવમોહિની ।
સુરસા ચ મણિદ્વિપે લંકાયાં ભદ્રકાળિકા ॥ 8 ॥
રામેશ્વરી સેતુબંધે વિમલા પુરુષોત્તમે ।
વિરજા ઔડ્રદેશે ચ કામાક્ષ્યા નીલપર્વતે ॥ 9 ॥
કાળિકા વંગદેશે ચ અયોધ્યાયાં મહેશ્વરી ।
વારાણસ્યામન્નપૂર્ણા ગયાક્ષેત્રે ગયેશ્વરી ॥ 10 ॥
કુરુક્ષેત્રે ભદ્રકાળી વ્રજે કાત્યાયની પરા ।
દ્વારકાયાં મહામાયા મથુરાયાં મહેશ્વરી ॥ 11 ॥
ક્ષુધા ત્વં સર્વભૂતાનાં વેલા ત્વં સાગરસ્ય ચ ।
નવમી શુક્લપક્ષસ્ય કૃષ્ણસ્યૈકાદશી પરા ॥ 12 ॥
દક્ષસા દુહિતા દેવી દક્ષયજ્ઞવિનાશિની ।
રામસ્ય જાનકી ત્વં હિ રાવણધ્વંસકારિણી ॥ 13 ॥
ચંડમુંડવધે દેવી રક્તબીજવિનાશિની ।
નિશુંભશુંભમથિની મધુકૈટભઘાતિની ॥ 14 ॥
વિષ્ણુભક્તિપ્રદા દુર્ગા સુખદા મોક્ષદા સદા ।
આદ્યાસ્તવમિમં પુણ્યં યઃ પઠેત્ સતતં નરઃ ॥ 15 ॥
સર્વજ્વરભયં ન સ્યાત્ સર્વવ્યાધિવિનાશનમ્ ।
કોટિતીર્થફલં તસ્ય લભતે નાત્ર સંશયઃ ॥ 16 ॥
જયા મે ચાગ્રતઃ પાતુ વિજયા પાતુ પૃષ્ઠતઃ ।
નારાયણી શીર્ષદેશે સર્વાંગે સિંહવાહિની ॥ 17 ॥
શિવદૂતી ઉગ્રચંડા પ્રત્યંગે પરમેશ્વરી ।
વિશાલાક્ષી મહામાયા કૌમારી શંખિની શિવા ॥ 18 ॥
ચક્રિણી જયદાત્રી ચ રણમત્તા રણપ્રિયા ।
દુર્ગા જયંતી કાળી ચ ભદ્રકાળી મહોદરી ॥ 19 ॥
નારસિંહી ચ વારાહી સિદ્ધિદાત્રી સુખપ્રદા ।
ભયંકરી મહારૌદ્રી મહાભયવિનાશિની ॥ 20 ॥
ઇતિ શ્રીબ્રહ્મયામલે બ્રહ્મનારદસંવાદે શ્રી આદ્યા સ્તોત્રમ્ ॥
