Ashtavakra Gita Chapter 11 - Shuddha Telugu

Collection of Spiritual and Devotional Literature in Various Indian Languages

View this in:

This document is in శుద్ధ తెలుగు with the right anusvaras marked. View this in సరళ తెలుగు, with simplified anusvaras for easier reading.

అష్టావక్ర గీతా ఏకాదశోఽధ్యాయః

అష్టావక్ర ఉవాచ ॥

భావాభావవికారశ్చ స్వభావాదితి నిశ్చయీ ।
నిర్వికారో గతక్లేశః సుఖేనైవోపశామ్యతి ॥ 11-1॥

ఈశ్వరః సర్వనిర్మాతా నేహాన్య ఇతి నిశ్చయీ ।
అన్తర్గలితసర్వాశః శాన్తః క్వాపి న సజ్జతే ॥ 11-2॥

ఆపదః సమ్పదః కాలే దైవాదేవేతి నిశ్చయీ ।
తృప్తః స్వస్థేన్ద్రియో నిత్యం న వాఞ్ఛతి న శోచతి ॥ 11-3॥

సుఖదుఃఖే జన్మమృత్యూ దైవాదేవేతి నిశ్చయీ ।
సాధ్యాదర్శీ నిరాయాసః కుర్వన్నపి న లిప్యతే ॥ 11-4॥

చిన్తయా జాయతే దుఃఖం నాన్యథేహేతి నిశ్చయీ ।
తయా హీనః సుఖీ శాన్తః సర్వత్ర గలితస్పృహః ॥ 11-5॥

నాహం దేహో న మే దేహో బోధోఽహమితి నిశ్చయీ ।
కైవల్యమివ సమ్ప్రాప్తో న స్మరత్యకృతం కృతమ్ ॥ 11-6॥

ఆబ్రహ్మస్తమ్బపర్యన్తమహమేవేతి నిశ్చయీ ।
నిర్వికల్పః శుచిః శాన్తః ప్రాప్తాప్రాప్తవినిర్వృతః ॥ 11-7॥

నానాశ్చర్యమిదం విశ్వం న కిఞ్చిదితి నిశ్చయీ ।
నిర్వాసనః స్ఫూర్తిమాత్రో న కిఞ్చిదివ శామ్యతి ॥ 11-8॥

Browse Related Categories: