॥ పఞ్చమః సర్గః ॥
॥ సాకాఙ్క్షపుణ్డరీకాక్షః ॥
అహమిహ నివసామి యాహి రాధాం అనునయ మద్వచనేన చానయేథాః ।
ఇతి మధురిపుణా సఖీ నియుక్తా స్వయమిదమేత్య పునర్జగాద రాధామ్ ॥ 31 ॥
॥ గీతం 10 ॥
వహతి మలయసమీరే మదనముపనిధాయ ।
స్ఫుటతి కుసుమనికరే విరహిహృదయదలనాయ ॥
తవ విరహే వనమాలీ సఖి సీదతి ॥ 1 ॥
దహతి శిశిరమయూఖే మరణమనుకరోతి ।
పతతి మదనవిశిఖే విలపతి వికలతరోఽతి ॥ 2 ॥
ధ్వనతి మధుపసమూహే శ్రవణమపిదధాతి ।
మనసి చలితవిరహే నిశి నిశి రుజముపయాతి ॥ 3 ॥
వసతి విపినవితానే త్యజతి లలితధామ ।
లుఠతి ధరణిశయనే బహు విలపతి తవ నామ ॥ 4 ॥
రణతి పికసమవాయే ప్రతిదిశమనుయాతి ।
హసతి మనుజనిచయే విరహమపలపతి నేతి ॥ 5 ॥
స్ఫురతి కలరవరావే స్మరతి మణితమేవ।
తవరతిసుఖవిభవే గణయతి సుగుణమతీవ ॥ 6 ॥
త్వదభిధశుభదమాసం వదతి నరి శృణోతి ।
తమపి జపతి సరసం యువతిషు న రతిముపైతి ॥ 7 ॥
భణతి కవిజయదేవే విరహవిలసితేన ।
మనసి రభసవిభవే హరిరుదయతు సుకృతేన ॥ 8 ॥
పూర్వం యత్ర సమం త్వయా రతిపతేరాసాదితః సిద్ధయ-స్తస్మిన్నేవ నికుఞ్జమన్మథమహాతీర్థే పునర్మాధవః ।
ధ్యాయంస్త్వామనిశం జపన్నపి తవైవాలాపమన్త్రావలీం భూయస్త్వత్కుచకుమ్భనిర్భరపరీరమ్భామృతం వాఞ్ఛతి ॥ 32 ॥
॥ గీతం 11 ॥
రతిసుఖసారే గతమభిసారే మదనమనోహరవేశమ్ ।
న కురు నితమ్బిని గమనవిలమ్బనమనుసర తం హృదయేశమ్ ॥
ధీరసమీరే యమునాతీరే వసతి వనే వనమాలీ ॥ 1 ॥
నామ సమేతం కృతసఙ్కేతం వాదయతే మృదువేణుమ్ ।
బహు మనుతే నను తే తనుసఙ్గతపవనచలితమపి రేణుమ్ ॥ 2 ॥
పతతి పతత్రే విచలతి పత్రే శఙ్కితభవదుపయానమ్ ।
రచయతి శయనం సచకితనయనం పశ్యతి తవ పన్థానమ్ ॥ 3 ॥
ముఖరమధీరం త్యజ మఞ్జీరం రిపుమివ కేలిషులోలమ్ ।
చల సఖి కుఞ్జం సతిమిరపుఞ్జం శీలయ నీలనిచోలమ్ ॥ 4 ॥
ఉరసి మురారేరుపహితహారే ఘన ఇవ తరలబలాకే ।
తటిదివ పీతే రతివిపరీతే రాజసి సుకృతవిపాకే ॥ 5 ॥
విగలితవసనం పరిహృతరసనం ఘటయ జఘనమపిధానమ్ ।
కిసలయశయనే పఙ్కజనయనే నిధిమివ హర్షనిదానమ్ ॥ 6 ॥
హరిరభిమానీ రజనిరిదానీమియమపి యాతి విరామమ్ ।
కురు మమ వచనం సత్వరరచనం పూరయ మధురిపుకామమ్ ॥ 7 ॥
శ్రీజయదేవే కృతహరిసేవే భణతి పరమరమణీయమ్ ।
ప్రముదితహృదయం హరిమతిసదయం నమత సుకృతకమనీయమ్ ॥ 8 ॥
వికిరతి ముహుః శ్వాసాన్దిశః పురో ముహురీక్షతే ప్రవిశతి ముహుః కుఞ్జం గుఞ్జన్ముహుర్బహు తామ్యతి ।
రచయతి ముహుః శయ్యాం పర్యాకులం ముహురీక్షతే మదనకదనక్లాన్తః కాన్తే ప్రియస్తవ వర్తతే ॥ 33 ॥
త్వద్వామ్యేన సమం సమగ్రమధునా తిగ్మాంశురస్తం గతో గోవిన్దస్య మనోరథేన చ సమం ప్రాప్తం తమః సాన్ద్రతామ్ ।
కోకానాం కరుణస్వనేన సదృశీ దీర్ఘా మదభ్యర్థనా తన్ముగ్ధే విఫలం విలమ్బనమసౌ రమ్యోఽభిసారక్షణః ॥ 34 ॥
ఆశ్లేషాదను చుమ్బనాదను నఖోల్లేఖాదను స్వాన్తజ-ప్రోద్బోధాదను సమ్భ్రమాదను రతారమ్భాదను ప్రీతయోః ।
అన్యార్థం గతయోర్భ్రమాన్మిలితయోః సమ్భాషణైర్జానతో-ర్దమ్పత్యోరిహ కో న కో న తమసి వ్రీడావిమిశ్రో రసః ॥ 35 ॥
సభయచకితం విన్యస్యన్తీం దృశౌ తిమిరే పథి ప్రతితరు ముహుః స్థిత్వా మన్దం పదాని వితన్వతీమ్ ।
కథమపి రహః ప్రాప్తామఙ్గైరనఙ్గతరఙ్గిభిః సుముఖి సుభగః పశ్యన్స త్వాముపైతు కృతార్థతామ్ ॥ 36 ॥
రాధాముగ్ధముఖారవిన్దమధుపస్త్రైలోక్యమౌలిస్థలీ నేపథ్యోచితనీలరత్నమవనీభారావతారాన్తకః।
స్వచ్ఛన్దం వ్రజసుబ్దరీజనమనస్తోషప్రదోషోదయః కంసధ్వంసనధూమకేతురవతు త్వాం దేవకీనన్దనః॥ 36 + 1 ॥
॥ ఇతి శ్రీగీతగోవిన్దేఽభిసారికవర్ణనే సాకాఙ్క్షపుణ్డరీకాక్షో నామ పఞ్చమః సర్గః ॥
