భజ గోవిన్దం భజ గోవిన్దం
గోవిన్దం భజ మూఢమతే ।
సమ్ప్రాప్తే సన్నిహితే కాలే
నహి నహి రక్షతి డుకృఙ్కరణే ॥ 1 ॥
భజ గోవిన్దం భజ గోవిన్దం ...
మూఢ జహీహి ధనాగమతృష్ణాం
కురు సద్బుద్ధిం మనసి వితృష్ణామ్ ।
యల్లభసే నిజకర్మోపాత్తం
విత్తం తేన వినోదయ చిత్తమ్ ॥ 2 ॥
భజ గోవిన్దం భజ గోవిన్దం ...
నారీస్తనభర-నాభీదేశం
దృష్ట్వా మా గా మోహావేశమ్ ।
ఏతన్మాంసవసాదివికారం
మనసి విచిన్తయ వారం వారమ్ ॥ 3 ॥
భజ గోవిన్దం భజ గోవిన్దం ...
నలినీదల-గతజలమతితరలం
తద్వజ్జీవితమతిశయ-చపలమ్ ।
విద్ధి వ్యాధ్యభిమానగ్రస్తం
లోకం శోకహతం చ సమస్తమ్ ॥ 4 ॥
భజ గోవిన్దం భజ గోవిన్దం ...
యావద్విత్తోపార్జనసక్తః
తావన్నిజపరివారో రక్తః ।
పశ్చాజ్జీవతి జర్జరదేహే
వార్తాం కోఽపి న పృచ్ఛతి గేహే ॥ 5 ॥
భజ గోవిన్దం భజ గోవిన్దం ...
యావత్పవనో నివసతి దేహే
తావత్పృచ్ఛతి కుశలం గేహే ।
గతవతి వాయౌ దేహాపాయే
భార్యా బిభ్యతి తస్మిన్కాయే ॥ 6 ॥
భజ గోవిన్దం భజ గోవిన్దం ...
బాలస్తావత్క్రీడాసక్తః
తరుణస్తావత్తరుణీసక్తః ।
వృద్ధస్తావచ్చిన్తాసక్తః
పరమే బ్రహ్మణి కోఽపి న సక్తః ॥ 7 ॥
భజ గోవిన్దం భజ గోవిన్దం ...
కా తే కాన్తా కస్తే పుత్రః
సంసారోఽయమతీవ విచిత్రః ।
కస్య త్వం కః కుత ఆయాతః
తత్త్వం చిన్తయ తదిహ భ్రాతః ॥ 8 ॥
భజ గోవిన్దం భజ గోవిన్దం ...
సత్సఙ్గత్వే నిస్సఙ్గత్వం
నిస్సఙ్గత్వే నిర్మోహత్వమ్ ।
నిర్మోహత్వే నిశ్చలతత్త్వం
నిశ్చలతత్త్వే జీవన్ముక్తిః ॥ 9 ॥
భజ గోవిన్దం భజ గోవిన్దం ...
వయసి గతే కః కామవికారః
శుష్కే నీరే కః కాసారః ।
క్షీణే విత్తే కః పరివారః
జ్ఞాతే తత్త్వే కః సంసారః ॥ 10 ॥
భజ గోవిన్దం భజ గోవిన్దం ...
మా కురు ధన-జన-యౌవన-గర్వం
హరతి నిమేషాత్కాలః సర్వమ్ ।
మాయామయమిదమఖిలం హిత్వా
బ్రహ్మపదం త్వం ప్రవిశ విదిత్వా ॥ 11 ॥
భజ గోవిన్దం భజ గోవిన్దం ...
దినయామిన్యౌ సాయం ప్రాతః
శిశిరవసన్తౌ పునరాయాతః ।
కాలః క్రీడతి గచ్ఛత్యాయుః
తదపి న ముఞ్చత్యాశావాయుః ॥ 12 ॥
భజ గోవిన్దం భజ గోవిన్దం ...
కా తే కాన్తా ధనగతచిన్తా
వాతుల కిం తవ నాస్తి నియన్తా ।
త్రిజగతి సజ్జనసఙ్గతిరేకా
భవతి భవార్ణవతరణే నౌకా ॥ 13 ॥
భజ గోవిన్దం భజ గోవిన్దం ...
ద్వాదశ-మఞ్జరికాభిరశేషః
కథితో వైయాకరణస్యైషః ।
ఉపదేశోఽభూద్విద్యా-నిపుణైః
శ్రీమచ్ఛఙ్కర-భగవచ్ఛరణైః ॥ 14 ॥
భజ గోవిన్దం భజ గోవిన్దం ...
జటిలో ముణ్డీ లుఞ్ఛితకేశః
కాషాయామ్బర-బహుకృతవేషః ।
పశ్యన్నపి చ న పశ్యతి మూఢః
ఉదరనిమిత్తం బహుకృతవేషః ॥ 15 ॥
భజ గోవిన్దం భజ గోవిన్దం ...
అఙ్గం గలితం పలితం ముణ్డం
దశనవిహీనం జాతం తుణ్డమ్ ।
వృద్ధో యాతి గృహీత్వా దణ్డం
తదపి న ముఞ్చత్యాశాపిణ్డమ్ ॥ 16 ॥
భజ గోవిన్దం భజ గోవిన్దం ...
అగ్రే వహ్నిః పృష్ఠే భానుః
రాత్రౌ చుబుక-సమర్పిత-జానుః ।
కరతల-భిక్షస్తరుతలవాసః
తదపి న ముఞ్చత్యాశాపాశః ॥ 17 ॥
భజ గోవిన్దం భజ గోవిన్దం ...
కురుతే గఙ్గాసాగరగమనం
వ్రత-పరిపాలనమథవా దానమ్ ।
జ్ఞానవిహీనః సర్వమతేన
భజతి న ముక్తిం జన్మశతేన ॥ 18 ॥
భజ గోవిన్దం భజ గోవిన్దం ...
సురమన్దిర-తరు-మూల-నివాసః
శయ్యా భూతలమజినం వాసః ।
సర్వ-పరిగ్రహ-భోగత్యాగః
కస్య సుఖం న కరోతి విరాగః ॥ 19 ॥
భజ గోవిన్దం భజ గోవిన్దం ...
యోగరతో వా భోగరతో వా
సఙ్గరతో వా సఙ్గవిహీనః ।
యస్య బ్రహ్మణి రమతే చిత్తం
నన్దతి నన్దతి నన్దత్యేవ ॥ 20 ॥
భజ గోవిన్దం భజ గోవిన్దం ...
భగవద్గీతా కిఞ్చిదధీతా
గఙ్గాజల-లవకణికా పీతా ।
సకృదపి యేన మురారిసమర్చా
క్రియతే తస్య యమేన న చర్చా ॥ 21 ॥
భజ గోవిన్దం భజ గోవిన్దం ...
పునరపి జననం పునరపి మరణం
పునరపి జననీజఠరే శయనమ్ ।
ఇహ సంసారే బహుదుస్తారే
కృపయాఽపారే పాహి మురారే ॥ 22 ॥
భజ గోవిన్దం భజ గోవిన్దం ...
రథ్యాచర్పట-విరచిత-కన్థః
పుణ్యాపుణ్య-వివర్జిత-పన్థః ।
యోగీ యోగనియోజిత-చిత్తః
రమతే బాలోన్మత్తవదేవ ॥ 23 ॥
భజ గోవిన్దం భజ గోవిన్దం ...
కస్త్వం కోఽహం కుత ఆయాతః
కా మే జననీ కో మే తాతః ।
ఇతి పరిభావయ సర్వమసారం
విశ్వం త్యక్త్వా స్వప్నవిచారమ్ ॥ 24 ॥
భజ గోవిన్దం భజ గోవిన్దం ...
త్వయి మయి చాన్యత్రైకో విష్ణుః
వ్యర్థం కుప్యసి మయ్యసహిష్ణుః ।
భవ సమచిత్తః సర్వత్ర త్వం
వాఞ్ఛస్యచిరాద్యది విష్ణుత్వమ్ ॥ 25 ॥
భజ గోవిన్దం భజ గోవిన్దం ...
శత్రౌ మిత్రే పుత్రే బన్ధౌ
మా కురు యత్నం విగ్రహసన్ధౌ ।
సర్వస్మిన్నపి పశ్యాత్మానం
సర్వత్రోత్సృజ భేదాజ్ఞానమ్ ॥ 26 ॥
భజ గోవిన్దం భజ గోవిన్దం ...
కామం క్రోధం లోభం మోహం
త్యక్త్వాఽఽత్మానం పశ్యతి సోఽహమ్ ।
ఆత్మజ్ఞానవిహీనా మూఢాః
తే పచ్యన్తే నరకనిగూఢాః ॥ 27 ॥
భజ గోవిన్దం భజ గోవిన్దం ...
గేయం గీతా-నామసహస్రం
ధ్యేయం శ్రీపతి-రూపమజస్రమ్ ।
నేయం సజ్జన-సఙ్గే చిత్తం
దేయం దీనజనాయ చ విత్తమ్ ॥ 28 ॥
భజ గోవిన్దం భజ గోవిన్దం ...
సుఖతః క్రియతే కామాభోగః
పశ్చాదన్త శరీరే రోగః ।
యద్యపి లోకే మరణం శరణం
తదపి న ముఞ్చతి పాపాచరణమ్ ॥ 29 ॥
భజ గోవిన్దం భజ గోవిన్దం ...
అర్థమనర్థం భావయ నిత్యం
నాస్తితతః సుఖలేశః సత్యమ్ ।
పుత్రాదపి ధనభాజాం భీతిః
సర్వత్రైషా విహితా రీతిః ॥ 30 ॥
భజ గోవిన్దం భజ గోవిన్దం ...
ప్రాణాయామం ప్రత్యాహారం
నిత్యానిత్య వివేకవిచారమ్ ।
జాప్యసమేతసమాధివిధానం
కుర్వవధానం మహదవధానమ్ ॥ 31 ॥
భజ గోవిన్దం భజ గోవిన్దం ...
గురుచరణామ్బుజ-నిర్భరభక్తః
సంసారాదచిరాద్భవ ముక్తః ।
సేన్ద్రియమానస-నియమాదేవం
ద్రక్ష్యసి నిజహృదయస్థం దేవమ్ ॥ 32 ॥
భజ గోవిన్దం భజ గోవిన్దం ...
మూఢః కశ్చన వైయాకరణో
డుఃకృఙ్కరణాధ్యయనధురీణః ।
శ్రీమచ్ఛఙ్కర-భగవచ్ఛిష్యైః
బోధిత ఆసీచ్ఛోధిత-కరణః ॥ 33 ॥
భజ గోవిన్దం భజ గోవిన్దం ...
భజ గోవిన్దం భజ గోవిన్దం
గోవిన్దం భజ మూఢమతే ।
నామస్మరణాదన్యముపాయం
నహి పశ్యామో భవతరణే ॥ 34 ॥
భజ గోవిన్దం భజ గోవిన్దం ...
