సకృచ్ఛ్రవణమాత్రేణ బ్రహ్మజ్ఞానం యతో భవేత్ ।
బ్రహ్మజ్ఞానావలీమాలా సర్వేషాం మోక్షసిద్ధయే ॥ 1॥
అసఙ్గోఽహమసఙ్గోఽహమసఙ్గోఽహం పునః పునః ।
సచ్చిదానన్దరూపోఽహమహమేవాహమవ్యయః ॥ 2॥
నిత్యశుద్ధవిముక్తోఽహం నిరాకారోఽహమవ్యయః ।
భూమానన్దస్వరూపోఽహమహమేవాహమవ్యయః ॥ 3॥
నిత్యోఽహం నిరవద్యోఽహం నిరాకారోఽహముచ్యతే ।
పరమానన్దరూపోఽహమహమేవాహమవ్యయః ॥ 4॥
శుద్ధచైతన్యరూపోఽహమాత్మారామోఽహమేవ చ ।
అఖణ్డానన్దరూపోఽహమహమేవాహమవ్యయః ॥ 5॥
ప్రత్యక్చైతన్యరూపోఽహం శాన్తోఽహం ప్రకృతేః పరః ।
శాశ్వతానన్దరూపోఽహమహమేవాహమవ్యయః ॥ 6॥
తత్త్వాతీతః పరాత్మాహం మధ్యాతీతః పరః శివః ।
మాయాతీతః పరఞ్జ్యోతిరహమేవాహమవ్యయః ॥ 7॥
నానారూపవ్యతీతోఽహం చిదాకారోఽహమచ్యుతః ।
సుఖరూపస్వరూపోఽహమహమేవాహమవ్యయః ॥ 8॥
మాయాతత్కార్యదేహాది మమ నాస్త్యేవ సర్వదా ।
స్వప్రకాశైకరూపోఽహమహమేవాహమవ్యయః ॥ 9॥
గుణత్రయవ్యతీతోఽహం బ్రహ్మాదీనాం చ సాక్ష్యహమ్ ।
అనన్తానన్తరూపోఽహమహమేవాహమవ్యయః ॥ 10॥
అన్తర్యామిస్వరూపోఽహం కూటస్థః సర్వగోఽస్మ్యహమ్ ।
పరమాత్మస్వరూపోఽహమహమేవాహమవ్యయః ॥ 11॥
నిష్కలోఽహం నిష్క్రియోఽహం సర్వాత్మాద్యః సనాతనః ।
అపరోక్షస్వరూపోఽహమహమేవాహమవ్యయః ॥ 12॥
ద్వన్ద్వాదిసాక్షిరూపోఽహమచలోఽహం సనాతనః ।
సర్వసాక్షిస్వరూపోఽహమహమేవాహమవ్యయః ॥ 13॥
ప్రజ్ఞానఘన ఏవాహం విజ్ఞానఘన ఏవ చ ।
అకర్తాహమభోక్తాహమహమేవాహమవ్యయః ॥ 14॥
నిరాధారస్వరూపోఽహం సర్వాధారోఽహమేవ చ ।
ఆప్తకామస్వరూపోఽహమహమేవాహమవ్యయః ॥ 15॥
తాపత్రయవినిర్ముక్తో దేహత్రయవిలక్షణః ।
అవస్థాత్రయసాక్ష్యస్మి చాహమేవాహమవ్యయః ॥ 16॥
దృగ్దృశ్యౌ ద్వౌ పదార్థౌ స్తః పరస్పరవిలక్షణౌ ।
దృగ్బ్రహ్మ దృశ్యం మాయేతి సర్వవేదాన్తడిణ్డిమః ॥ 17॥
అహం సాక్షీతి యో విద్యాద్వివిచ్యైవం పునః పునః ।
స ఏవ ముక్తః సో విద్వానితి వేదాన్తడిణ్డిమః ॥ 18॥
ఘటకుడ్యాదికం సర్వం మృత్తికామాత్రమేవ చ ।
తద్వద్బ్రహ్మ జగత్సర్వమితి వేదాన్తడిణ్డిమః ॥ 19॥
బ్రహ్మ సత్యం జగన్మిథ్యా జీవో బ్రహ్మైవ నాపరః ।
అనేన వేద్యం సచ్ఛాస్త్రమితి వేదాన్తడిణ్డిమః ॥ 20॥
అన్తర్జ్యోతిర్బహిర్జ్యోతిః ప్రత్యగ్జ్యోతిః పరాత్పరః ।
జ్యోతిర్జ్యోతిః స్వయఞ్జ్యోతిరాత్మజ్యోతిః శివోఽస్మ్యహమ్ ॥ 21॥
ఇతి శ్రీమత్పరమహంసపరివ్రాజకాచార్యస్య
శ్రీగోవిన్దభగవత్పూజ్యపాదశిష్యస్య
శ్రీమచ్ఛఙ్కరభగవతః కృతౌ
బ్రహ్మజ్ఞానావలీమాలా సమ్పూర్ణా ॥
