ధరోవాచ
భగవన్ పరమేశాన భక్తిరవ్యభిచారిణీ ।
ప్రారబ్ధం భుజ్యమానస్య కథం భవతి హే ప్రభో ॥ 1 ॥
శ్రీవిష్ణురువాచ
ప్రారబ్ధం భుజ్యమానో హి గీతాభ్యాసరతః సదా ।
స ముక్తః స సుఖీ లోకే కర్మణా నోపలిప్యతే ॥ 2 ॥
మహాపాపాదిపాపాని గీతాధ్యానం కరోతి చేత్ ।
క్వచిత్స్పర్శం న కుర్వన్తి నలినీదలమమ్బువత్ ॥ 3 ॥
గీతాయాః పుస్తకం యత్ర యత్ర పాఠః ప్రవర్తతే ।
తత్ర సర్వాణి తీర్థాని ప్రయాగాదీని తత్ర వై ॥ 4 ॥
సర్వే దేవాశ్చ ఋషయః యోగినః పన్నగాశ్చ యే ।
గోపాలా గోపికా వాఽపి నారదోద్ధవపార్షదైః ॥ 5 ॥
సహాయో జాయతే శీఘ్రం యత్ర గీతా ప్రవర్తతే ।
యత్ర గీతావిచారశ్చ పఠనం పాఠనం శ్రుతమ్ ।
తత్రాహం నిశ్చితం పృథ్వి నివసామి సదైవ హి ॥ 6 ॥
గీతాశ్రయేఽహం తిష్ఠామి గీతా మే చోత్తమం గృహమ్ ।
గీతాజ్ఞానముపాశ్రిత్య త్రీँల్లోకాన్-పాలయామ్యహమ్ ॥ 7 ॥
గీతా మే పరమా విద్యా బ్రహ్మరూపా న సంశయః ।
అర్ధమాత్రాక్షరా నిత్యా స్వానిర్వాచ్యపదాత్మికా ॥ 8 ॥
చిదానన్దేన కృష్ణేన ప్రోక్తా స్వముఖతోఽర్జునమ్ ।
వేదత్రయీ పరానన్దా తత్త్వార్థజ్ఞానసంయుతా ॥ 9 ॥
యోఽష్టాదశం జపేన్నిత్యం నరో నిశ్చలమానసః ।
జ్ఞానసిద్ధిం స లభతే తతో యాతి పరం పదమ్ ॥ 10 ॥
పాఠేఽసమర్థః సమ్పూర్ణే తతోఽర్ధం పాఠమాచరేత్ ।
తదా గోదానజం పుణ్యం లభతే నాత్ర సంశయః ॥ 11 ॥
త్రిభాగం పఠమానస్తు గఙ్గాస్నానఫలం లభేత్ ।
షడంశం జపమానస్తు సోమయాగఫలం లభేత్ ॥ 12 ॥
ఎకాధ్యాయం తుయో నిత్యం పఠతే భక్తిసంయుతః ।
రుద్రలోకమవాప్నోతి గణో భూత్వా వసేచ్చిరమ్ ॥ 13 ॥
అధ్యాయం శ్లోకపాదం వా నిత్యం యః పఠతే నరః ।
స యాతి నరతాం యావత్ మన్వన్తరం వసున్ధరే ॥ 14 ॥
గీతాయాః శ్లోకదశకం సప్త పఞ్చ చతుష్టయమ్ ।
ద్వౌత్రీనేకం తదర్ధం వా శ్లోకానాం యః పఠేన్నరః ॥ 15 ॥
చన్ద్రలోకమవాప్నోతి వర్షాణామయుతం ధృవమ్ ।
గీతాపాఠసమాయుక్తః మృతో మానుషతాం వ్రజేత్ ॥ 16 ॥
గీతాభ్యాసం పునః కృత్వా లభతే ముక్తిముత్తమమ్ ।
గీతేత్యుచ్చారసంయుక్తః మ్రియమాణో గతిం లభేత్ ॥ 17 ॥
గీతార్థశ్రవణాసక్తః మహాపాపయుతోఽపి వా ।
వైకుణ్ఠం సమవాప్నోతి విష్ణునా సహమోదతే ॥ 18 ॥
గీతార్థం ధ్యాయతే నిత్యం కృత్వా కర్మాణి భూరిశః ।
జీవన్ముక్తః స విజ్ఞేయః దేహాన్తే పరమం పదమ్ ॥ 19 ॥
మలనిర్మోచనం పుంసాం జలస్నానం దినే దినే ।
సకృద్గీతామ్భసి స్నానం సంసారమలనాశనమ్ ॥ 20 ॥
గీతామాశ్రిత్య బహవః భూభుజో జనకాదయః ।
నిర్ధూతకల్మషా లోకే గీతా యాతాః పరం పదమ్ ॥ 21 ॥
తే శృణ్వన్తి పఠన్త్యేవ గీతాశాస్త్రమహర్నిశమ్ ।
న తే వై మానుషా జ్ఞేయా దేవా ఏవ న సంశయః ॥ 22 ॥
జ్ఞానాజ్ఞానకృతం నిత్యం ఇన్ద్రియైర్జనితం చ యత్ ।
తత్సర్వం నాశమాయాతి గీతాపాఠేన తక్షణమ్ ॥ 23 ॥
ధిక్ తస్య జ్ఞానమాచారం వ్రతం చేష్టాం తపో యశః ।
గీతార్థపఠనం నాఽస్తి నాధమస్తత్పరో జనః ॥ 24 ॥
సంసారసాగరం ఘోరం తర్తుమిచ్ఛతి యో జనః ।
గీతానావం సమారుహ్య పారం యాతి సుఖేన సః ॥ 25 ॥
గీతాయాః పఠనం కృత్వా మాహాత్మ్యం నైవ యః పఠేత్ ।
వృథా పాఠో భవేత్తస్య శ్రమ ఏవ హ్యుదాహృతః ॥ 26 ॥
ఎతన్మాహాత్మ్యసంయుక్తం గీతాభ్యాసం కరోతి యః ।
స తత్ఫలమవాప్నోతి దుర్లభాం గతిమాప్నుయాత్ ॥ 27 ॥
సూత ఉవాచ
ంఆహాత్మ్యమేతద్గీతాయాః మయా ప్రోక్తం సనాతనమ్ ।
గీతాన్తే చ పఠేద్యస్తు యదుక్తం తత్ఫలం భవేత్ ॥ 28 ॥
ఇతి శ్రీ వరాహపురాణే శ్రీ గీతామాహాత్మ్యం సమ్పూర్ణమ్ ॥
ఓం శాన్తిః శాన్తిః శాన్తిః ॥
