గోప్య ఊచుః ।
జయతి తేఽధికం జన్మనా వ్రజః
శ్రయత ఇన్దిరా శశ్వదత్ర హి ।
దయిత దృశ్యతాం దిక్షు తావకా-
స్త్వయి ధృతాసవస్త్వాం విచిన్వతే ॥ 1॥
శరదుదాశయే సాధుజాతస-
త్సరసిజోదరశ్రీముషా దృశా ।
సురతనాథ తేఽశుల్కదాసికా
వరద నిఘ్నతో నేహ కిం వధః ॥ 2॥
విషజలాప్యయాద్వ్యాలరాక్షసా-
ద్వర్షమారుతాద్వైద్యుతానలాత్ ।
వృషమయాత్మజాద్విశ్వతోభయా-
దృషభ తే వయం రక్షితా ముహుః ॥ 3॥
న ఖలు గోపికానన్దనో భవా-
నఖిలదేహినామన్తరాత్మదృక్ ।
విఖనసార్థితో విశ్వగుప్తయే
సఖ ఉదేయివాన్సాత్వతాం కులే ॥ 4॥
విరచితాభయం వృష్ణిధుర్య తే
చరణమీయుషాం సంసృతేర్భయాత్ ।
కరసరోరుహం కాన్త కామదం
శిరసి ధేహి నః శ్రీకరగ్రహమ్ ॥ 5॥
వ్రజజనార్తిహన్వీర యోషితాం
నిజజనస్మయధ్వంసనస్మిత ।
భజ సఖే భవత్కిఙ్కరీః స్మ నో
జలరుహాననం చారు దర్శయ ॥ 6॥
ప్రణతదేహినాం పాపకర్శనం
తృణచరానుగం శ్రీనికేతనమ్ ।
ఫణిఫణార్పితం తే పదామ్బుజం
కృణు కుచేషు నః కృన్ధి హృచ్ఛయమ్ ॥ 7॥
మధురయా గిరా వల్గువాక్యయా
బుధమనోజ్ఞయా పుష్కరేక్షణ ।
విధికరీరిమా వీర ముహ్యతీ-
రధరసీధునాఽఽప్యాయయస్వ నః ॥ 8॥
తవ కథామృతం తప్తజీవనం
కవిభిరీడితం కల్మషాపహమ్ ।
శ్రవణమఙ్గలం శ్రీమదాతతం
భువి గృణన్తి తే భూరిదా జనాః ॥ 9॥
ప్రహసితం ప్రియ ప్రేమవీక్షణం
విహరణం చ తే ధ్యానమఙ్గలమ్ ।
రహసి సంవిదో యా హృదిస్పృశః
కుహక నో మనః క్షోభయన్తి హి ॥ 10॥
చలసి యద్వ్రజాచ్చారయన్పశూన్
నలినసున్దరం నాథ తే పదమ్ ।
శిలతృణాఙ్కురైః సీదతీతి నః
కలిలతాం మనః కాన్త గచ్ఛతి ॥ 11॥
దినపరిక్షయే నీలకున్తలై-
ర్వనరుహాననం బిభ్రదావృతమ్ ।
ఘనరజస్వలం దర్శయన్ముహు-
ర్మనసి నః స్మరం వీర యచ్ఛసి ॥ 12॥
ప్రణతకామదం పద్మజార్చితం
ధరణిమణ్డనం ధ్యేయమాపది ।
చరణపఙ్కజం శన్తమం చ తే
రమణ నః స్తనేష్వర్పయాధిహన్ ॥ 13॥
సురతవర్ధనం శోకనాశనం
స్వరితవేణునా సుష్ఠు చుమ్బితమ్ ।
ఇతరరాగవిస్మారణం నృణాం
వితర వీర నస్తేఽధరామృతమ్ ॥ 14॥
అటతి యద్భవానహ్ని కాననం
త్రుటిర్యుగాయతే త్వామపశ్యతామ్ ।
కుటిలకున్తలం శ్రీముఖం చ తే
జడ ఉదీక్షతాం పక్ష్మకృద్దృశామ్ ॥ 15॥
పతిసుతాన్వయభ్రాతృబాన్ధవా-
నతివిలఙ్ఘ్య తేఽన్త్యచ్యుతాగతాః ।
గతివిదస్తవోద్గీతమోహితాః
కితవ యోషితః కస్త్యజేన్నిశి ॥ 16॥
రహసి సంవిదం హృచ్ఛయోదయం
ప్రహసితాననం ప్రేమవీక్షణమ్ ।
బృహదురః శ్రియో వీక్ష్య ధామ తే
ముహురతిస్పృహా ముహ్యతే మనః ॥ 17॥
వ్రజవనౌకసాం వ్యక్తిరఙ్గ తే
వృజినహన్త్ర్యలం విశ్వమఙ్గలమ్ ।
త్యజ మనాక్ చ నస్త్వత్స్పృహాత్మనాం
స్వజనహృద్రుజాం యన్నిషూదనమ్ ॥ 18॥
యత్తే సుజాతచరణామ్బురుహం స్తనేష
భీతాః శనైః ప్రియ దధీమహి కర్కశేషు ।
తేనాటవీమటసి తద్వ్యథతే న కింస్విత్
కూర్పాదిభిర్భ్రమతి ధీర్భవదాయుషాం నః ॥ 19॥
ఇతి శ్రీమద్భాగవత మహాపురాణే పారమహంస్యాం సంహితాయాం
దశమస్కన్ధే పూర్వార్ధే రాసక్రీడాయాం గోపీగీతం నామైకత్రింశోఽధ్యాయః ॥
