𑌭𑌜𑍇𑌽𑌹𑌂 𑌕𑍁𑌮𑌾𑌰𑌂 𑌭𑌵𑌾𑌨𑍀𑌕𑍁𑌮𑌾𑌰𑌂
𑌗𑌲𑍋𑌲𑍍𑌲𑌾𑌸𑌿𑌹𑌾𑌰𑌂 𑌨𑌮𑌤𑍍𑌸𑌦𑍍𑌵𑌿𑌹𑌾𑌰𑌮𑍍 ।
𑌰𑌿𑌪𑍁𑌸𑍍𑌤𑍋𑌮𑌪𑌾𑌰𑌂 𑌨𑍃𑌸𑌿𑌂𑌹𑌾𑌵𑌤𑌾𑌰𑌂
𑌸𑌦𑌾𑌨𑌿𑌰𑍍𑌵𑌿𑌕𑌾𑌰𑌂 𑌗𑍁𑌹𑌂 𑌨𑌿𑌰𑍍𑌵𑌿𑌚𑌾𑌰𑌮𑍍 ॥ 1 ॥

𑌨𑌮𑌾𑌮𑍀𑌶𑌪𑍁𑌤𑍍𑌰𑌂 𑌜𑌪𑌾𑌶𑍋𑌣𑌗𑌾𑌤𑍍𑌰𑌂
𑌸𑍁𑌰𑌾𑌰𑌾𑌤𑌿𑌶𑌤𑍍𑌰𑍁𑌂 𑌰𑌵𑍀𑌂𑌦𑍍𑌵𑌗𑍍𑌨𑌿𑌨𑍇𑌤𑍍𑌰𑌮𑍍 ।
𑌮𑌹𑌾𑌬𑌰𑍍𑌹𑌿𑌪𑌤𑍍𑌰𑌂 𑌶𑌿𑌵𑌾𑌸𑍍𑌯𑌾𑌬𑍍𑌜𑌮𑌿𑌤𑍍𑌰𑌂
𑌪𑍍𑌰𑌭𑌾𑌸𑍍𑌵𑌤𑍍𑌕𑌳𑌤𑍍𑌰𑌂 𑌪𑍁𑌰𑌾𑌣𑌂 𑌪𑌵𑌿𑌤𑍍𑌰𑌮𑍍 ॥ 2 ॥

𑌅𑌨𑍇𑌕𑌾𑌰𑍍𑌕𑌕𑍋𑌟𑌿-𑌪𑍍𑌰𑌭𑌾𑌵𑌜𑍍𑌜𑍍𑌵𑌲𑌂 𑌤𑌂
𑌮𑌨𑍋𑌹𑌾𑌰𑌿 𑌮𑌾𑌣𑌿𑌕𑍍𑌯 𑌭𑍂𑌷𑍋𑌜𑍍𑌜𑍍𑌵𑌲𑌂 𑌤𑌮𑍍 ।
𑌶𑍍𑌰𑌿𑌤𑌾𑌨𑌾𑌮𑌭𑍀𑌷𑍍𑌟𑌂 𑌨𑌿𑌶𑌾𑌂𑌤𑌂 𑌨𑌿𑌤𑌾𑌂𑌤𑌂
𑌭𑌜𑍇 𑌷𑌣𑍍𑌮𑍁𑌖𑌂 𑌤𑌂 𑌶𑌰𑌚𑍍𑌚𑌂𑌦𑍍𑌰𑌕𑌾𑌂𑌤𑌮𑍍 ॥ 3 ॥

𑌕𑍃𑌪𑌾𑌵𑌾𑌰𑌿 𑌕𑌲𑍍𑌲𑍋𑌲𑌭𑌾𑌸𑍍𑌵𑌤𑍍𑌕𑌟𑌾𑌕𑍍𑌷𑌂
𑌵𑌿𑌰𑌾𑌜𑌨𑍍𑌮𑌨𑍋𑌹𑌾𑌰𑌿 𑌶𑍋𑌣𑌾𑌂𑌬𑍁𑌜𑌾𑌕𑍍𑌷𑌮𑍍 ।
𑌪𑍍𑌰𑌯𑍋𑌗𑌪𑍍𑌰𑌦𑌾𑌨𑌪𑍍𑌰𑌵𑌾𑌹𑍈𑌕𑌦𑌕𑍍𑌷𑌂
𑌭𑌜𑍇 𑌕𑌾𑌂𑌤𑌿𑌕𑌾𑌂𑌤𑌂 𑌪𑌰𑌸𑍍𑌤𑍋𑌮𑌰𑌕𑍍𑌷𑌮𑍍 ॥ 4 ॥

𑌸𑍁𑌕𑌸𑍍𑌤𑍂𑌰𑌿𑌸𑌿𑌂𑌦𑍂𑌰𑌭𑌾𑌸𑍍𑌵𑌲𑍍𑌲𑌲𑌾𑌟𑌂
𑌦𑌯𑌾𑌪𑍂𑌰𑍍𑌣𑌚𑌿𑌤𑍍𑌤𑌂 𑌮𑌹𑌾𑌦𑍇𑌵𑌪𑍁𑌤𑍍𑌰𑌮𑍍 ।
𑌰𑌵𑍀𑌂𑌦𑍂𑌲𑍍𑌲𑌸𑌦𑍍𑌰𑌤𑍍𑌨𑌰𑌾𑌜𑌤𑍍𑌕𑌿𑌰𑍀𑌟𑌂
𑌭𑌜𑍇 𑌕𑍍𑌰𑍀𑌡𑌿𑌤𑌾𑌕𑌾𑌶 𑌗𑌂𑌗𑌾𑌦𑍍𑌰𑌿𑌕𑍂𑌟𑌮𑍍 ॥ 5 ॥

𑌸𑍁𑌕𑍁𑌂𑌦𑌪𑍍𑌰𑌸𑍂𑌨𑌾𑌵𑌳𑍀𑌶𑍋𑌭𑌿𑌤𑌾𑌂𑌗𑌂
𑌶𑌰𑌤𑍍𑌪𑍂𑌰𑍍𑌣𑌚𑌂𑌦𑍍𑌰𑌪𑍍𑌰𑌭𑌾𑌕𑌾𑌂𑌤𑌿𑌕𑌾𑌂𑌤𑌮𑍍 ।
𑌶𑌿𑌰𑍀𑌷𑌪𑍍𑌰𑌸𑍂𑌨𑌾𑌭𑌿𑌰𑌾𑌮𑌂 𑌭𑌵𑌂𑌤𑌂
𑌭𑌜𑍇 𑌦𑍇𑌵𑌸𑍇𑌨𑌾𑌪𑌤𑌿𑌂 𑌵𑌲𑍍𑌲𑌭𑌂 𑌤𑌮𑍍 ॥ 6 ॥

𑌸𑍁𑌲𑌾𑌵𑌣𑍍𑌯𑌸𑌤𑍍𑌸𑍂𑌰𑍍𑌯𑌕𑍋𑌟𑌿𑌪𑍍𑌰𑌤𑍀𑌕𑌂
𑌪𑍍𑌰𑌭𑍁𑌂 𑌤𑌾𑌰𑌕𑌾𑌰𑌿𑌂 𑌦𑍍𑌵𑌿𑌷𑌡𑍍𑌬𑌾𑌹𑍁𑌮𑍀𑌶𑌮𑍍 ।
𑌨𑌿𑌜𑌾𑌂𑌕𑌪𑍍𑌰𑌭𑌾𑌦𑌿𑌵𑍍𑌯𑌮𑌾𑌨𑌾𑌪𑌦𑍀𑌶𑌂
𑌭𑌜𑍇 𑌪𑌾𑌰𑍍𑌵𑌤𑍀𑌪𑍍𑌰𑌾𑌣𑌪𑍁𑌤𑍍𑌰𑌂 𑌸𑍁𑌕𑍇𑌶𑌮𑍍 ॥ 𑍭 ॥

𑌅𑌜𑌂 𑌸𑌰𑍍𑌵𑌲𑍋𑌕𑌪𑍍𑌰𑌿𑌯𑌂 𑌲𑍋𑌕𑌨𑌾𑌥𑌂
𑌗𑍁𑌹𑌂 𑌶𑍂𑌰𑌪𑌦𑍍𑌮𑌾𑌦𑌿𑌦𑌂𑌭𑍋𑌳𑌿𑌧𑌾𑌰𑌮𑍍 ।
𑌸𑍁𑌚𑌾𑌰𑍁𑌂 𑌸𑍁𑌨𑌾𑌸𑌾𑌪𑍁𑌟𑌂 𑌸𑌚𑍍𑌚𑌰𑌿𑌤𑍍𑌰𑌂
𑌭𑌜𑍇 𑌕𑌾𑌰𑍍𑌤𑌿𑌕𑍇𑌯𑌂 𑌸𑌦𑌾 𑌬𑌾𑌹𑍁𑌲𑍇𑌯𑌮𑍍 ॥ 𑍮 ॥

𑌶𑌰𑌾𑌰𑌣𑍍𑌯𑌸𑌂𑌭𑍂𑌤𑌮𑌿𑌂𑌦𑍍𑌰𑌾𑌦𑌿𑌵𑌂𑌦𑍍𑌯𑌂
𑌦𑍍𑌵𑌿𑌷𑌡𑍍𑌬𑌾𑌹𑍁𑌸𑌂𑌖𑍍𑌯𑌾𑌯𑍁𑌧𑌶𑍍𑌰𑍇𑌣𑌿𑌰𑌮𑍍𑌯𑌮𑍍 ।
𑌮𑌰𑍁𑌤𑍍𑌸𑌾𑌰𑌥𑌿𑌂 𑌕𑍁𑌕𑍍𑌕𑍁𑌟𑍇𑌶𑌂 𑌸𑍁𑌕𑍇𑌤𑍁𑌂
𑌭𑌜𑍇 𑌯𑍋𑌗𑌿𑌹𑍃𑌤𑍍𑌪𑌦𑍍𑌮𑌮𑌧𑍍𑌯𑌾𑌧𑌿𑌵𑌾𑌸𑌮𑍍 ॥ 𑍯 ॥

𑌵𑌿𑌰𑌿𑌂𑌚𑍀𑌂𑌦𑍍𑌰𑌵𑌲𑍍𑌲𑍀𑌶 𑌦𑍇𑌵𑍇𑌶𑌮𑍁𑌖𑍍𑌯𑌂
𑌪𑍍𑌰𑌶𑌸𑍍𑌤𑌾𑌮𑌰𑌸𑍍𑌤𑍋𑌮𑌸𑌂𑌸𑍍𑌤𑍂𑌯𑌮𑌾𑌨𑌮𑍍 ।
𑌦𑌿𑌶 𑌤𑍍𑌵𑌂 𑌦𑌯𑌾𑌳𑍋 𑌶𑍍𑌰𑌿𑌯𑌂 𑌨𑌿𑌶𑍍𑌚𑌲𑌾𑌂 𑌮𑍇
𑌵𑌿𑌨𑌾 𑌤𑍍𑌵𑌾𑌂 𑌗𑌤𑌿𑌃 𑌕𑌾 𑌪𑍍𑌰𑌭𑍋 𑌮𑍇 𑌪𑍍𑌰𑌸𑍀𑌦 ॥ 10 ॥

𑌪𑌦𑌾𑌂𑌭𑍋𑌜𑌸𑍇𑌵𑌾 𑌸𑌮𑌾𑌯𑌾𑌤𑌬𑍃𑌂𑌦𑌾-
𑌰𑌕𑌶𑍍𑌰𑍇𑌣𑌿𑌕𑍋𑌟𑍀𑌰𑌭𑌾𑌸𑍍𑌵𑌲𑍍𑌲𑌲𑌾𑌟𑌮𑍍 ।
𑌕𑌳𑌤𑍍𑌰𑍋𑌲𑍍𑌲𑌸𑌤𑍍𑌪𑌾𑌰𑍍𑌶𑍍𑌵𑌯𑍁𑌗𑍍𑌮𑌂 𑌵𑌰𑍇𑌣𑍍𑌯𑌂
𑌭𑌜𑍇 𑌦𑍇𑌵𑌮𑌾𑌦𑍍𑌯𑌂𑌤𑌹𑍀𑌨𑌪𑍍𑌰𑌭𑌾𑌵𑌮𑍍 ॥ 11 ॥

𑌭𑌵𑌾𑌂𑌭𑍋𑌧𑌿𑌮𑌧𑍍𑌯𑍇 𑌤𑌰𑌂𑌗𑍇 𑌪𑌤𑌂𑌤𑌂
𑌪𑍍𑌰𑌭𑍋 𑌮𑌾𑌂 𑌸𑌦𑌾 𑌪𑍂𑌰𑍍𑌣𑌦𑍃𑌷𑍍𑌟𑍍𑌯𑌾 𑌸𑌮𑍀𑌕𑍍𑌷𑍍𑌯 ।
𑌭𑌵𑌦𑍍𑌭𑌕𑍍𑌤𑌿𑌨𑌾𑌵𑍋𑌦𑍍𑌧𑌰 𑌤𑍍𑌵𑌂 𑌦𑌯𑌾𑌳𑍋
𑌸𑍁𑌗𑌤𑍍𑌯𑌂𑌤𑌰𑌂 𑌨𑌾𑌸𑍍𑌤𑌿 𑌦𑍇𑌵 𑌪𑍍𑌰𑌸𑍀𑌦 ॥ 12 ॥

𑌗𑌳𑍇 𑌰𑌤𑍍𑌨𑌭𑍂𑌷𑌂 𑌤𑌨𑍌 𑌮𑌂𑌜𑍁𑌵𑍇𑌷𑌂
𑌕𑌰𑍇 𑌜𑍍𑌞𑌾𑌨𑌶𑌕𑍍𑌤𑌿𑌂 𑌦𑌰𑌸𑍍𑌮𑍇𑌰𑌮𑌾𑌸𑍍𑌯𑍇 ।
𑌕𑌟𑌿𑌨𑍍𑌯𑌸𑍍𑌤𑌪𑌾𑌣𑌿𑌂 𑌶𑌿𑌖𑌿𑌸𑍍𑌥𑌂 𑌕𑍁𑌮𑌾𑌰𑌂
𑌭𑌜𑍇𑌽𑌹𑌂 𑌗𑍁𑌹𑌾𑌦𑌨𑍍𑌯𑌦𑍇𑌵𑌂 𑌨 𑌮𑌨𑍍𑌯𑍇 ॥ 13 ॥

𑌦𑌯𑌾𑌹𑍀𑌨𑌚𑌿𑌤𑍍𑌤𑌂 𑌪𑌰𑌦𑍍𑌰𑍋𑌹𑌪𑌾𑌤𑍍𑌰𑌂
𑌸𑌦𑌾 𑌪𑌾𑌪𑌶𑍀𑌲𑌂 𑌗𑍁𑌰𑍋𑌰𑍍𑌭𑌕𑍍𑌤𑌿𑌹𑍀𑌨𑌮𑍍 ।
𑌅𑌨𑌨𑍍𑌯𑌾𑌵𑌲𑌂𑌬𑌂 𑌭𑌵𑌨𑍍𑌨𑍇𑌤𑍍𑌰𑌪𑌾𑌤𑍍𑌰𑌂
𑌕𑍃𑌪𑌾𑌶𑍀𑌲 𑌮𑌾𑌂 𑌭𑍋 𑌪𑌵𑌿𑌤𑍍𑌰𑌂 𑌕𑍁𑌰𑍁 𑌤𑍍𑌵𑌮𑍍 ॥ 14 ॥

𑌮𑌹𑌾𑌸𑍇𑌨 𑌗𑌾𑌂𑌗𑍇𑌯 𑌵𑌲𑍍𑌲𑍀𑌸𑌹𑌾𑌯
𑌪𑍍𑌰𑌭𑍋 𑌤𑌾𑌰𑌕𑌾𑌰𑍇 𑌷𑌡𑌾𑌸𑍍𑌯𑌾𑌮𑌰𑍇𑌶 ।
𑌸𑌦𑌾 𑌪𑌾𑌯𑌸𑌾𑌨𑍍𑌨𑌪𑍍𑌰𑌦𑌾𑌤𑌰𑍍𑌗𑍁𑌹𑍇𑌤𑌿
𑌸𑍍𑌮𑌰𑌿𑌷𑍍𑌯𑌾𑌮𑌿 𑌭𑌕𑍍𑌤𑍍𑌯𑌾 𑌸𑌦𑌾𑌹𑌂 𑌵𑌿𑌭𑍋 𑌤𑍍𑌵𑌾𑌮𑍍 ॥ 15 ॥

𑌪𑍍𑌰𑌤𑌾𑌪𑌸𑍍𑌯 𑌬𑌾𑌹𑍋 𑌨𑌮𑌦𑍍𑌵𑍀𑌰𑌬𑌾𑌹𑍋
𑌪𑍍𑌰𑌭𑍋 𑌕𑌾𑌰𑍍𑌤𑌿𑌕𑍇𑌯𑍇𑌷𑍍𑌟𑌕𑌾𑌮𑌪𑍍𑌰𑌦𑍇𑌤𑌿 ।
𑌯𑌦𑌾 𑌯𑍇 𑌪𑌠𑌂𑌤𑍇 𑌭𑌵𑌂𑌤𑌂 𑌤𑌦𑍇𑌵𑌂
𑌪𑍍𑌰𑌸𑌨𑍍𑌨𑌸𑍍𑌤𑍁 𑌤𑍇𑌷𑌾𑌂 𑌬𑌹𑍁𑌶𑍍𑌰𑍀𑌂 𑌦𑌦𑌾𑌸𑌿 ॥ 16 ॥

𑌅𑌪𑌾𑌰𑌾𑌤𑌿𑌦𑌾𑌰𑌿𑌦𑍍𑌰𑍍𑌯𑌵𑌾𑌰𑌾𑌶𑌿𑌮𑌧𑍍𑌯𑍇
𑌭𑍍𑌰𑌮𑌂𑌤𑌂 𑌜𑌨𑌗𑍍𑌰𑌾𑌹𑌪𑍂𑌰𑍍𑌣𑍇 𑌨𑌿𑌤𑌾𑌂𑌤𑌮𑍍 ।
𑌮𑌹𑌾𑌸𑍇𑌨 𑌮𑌾𑌮𑍁𑌦𑍍𑌧𑌰 𑌤𑍍𑌵𑌂 𑌕𑌟𑌾𑌕𑍍𑌷𑌾-
𑌵𑌲𑍋𑌕𑍇𑌨 𑌕𑌿𑌂𑌚𑌿𑌤𑍍𑌪𑍍𑌰𑌸𑍀𑌦 𑌪𑍍𑌰𑌸𑍀𑌦 ॥ 1𑍭 ॥

𑌸𑍍𑌥𑌿𑌰𑌾𑌂 𑌦𑍇𑌹𑌿 𑌭𑌕𑍍𑌤𑌿𑌂 𑌭𑌵𑌤𑍍𑌪𑌾𑌦𑌪𑌦𑍍𑌮𑍇
𑌶𑍍𑌰𑌿𑌯𑌂 𑌨𑌿𑌶𑍍𑌚𑌲𑌾𑌂 𑌦𑍇𑌹𑌿 𑌮𑌹𑍍𑌯𑌂 𑌕𑍁𑌮𑌾𑌰 ।
𑌗𑍁𑌹𑌂 𑌚𑌂𑌦𑍍𑌰𑌤𑌾𑌰𑌂 𑌸𑍁𑌵𑌂𑌶𑌾𑌭𑌿𑌵𑍃𑌦𑍍𑌧𑌿𑌂
𑌕𑍁𑌰𑍁 𑌤𑍍𑌵𑌂 𑌪𑍍𑌰𑌭𑍋 𑌮𑍇 𑌮𑌨𑌃 𑌕𑌲𑍍𑌪𑌸𑌾𑌲𑌃 ॥ 1𑍮 ॥

𑌨𑌮𑌸𑍍𑌤𑍇 𑌨𑌮𑌸𑍍𑌤𑍇 𑌮𑌹𑌾𑌶𑌕𑍍𑌤𑌿𑌪𑌾𑌣𑍇
𑌨𑌮𑌸𑍍𑌤𑍇 𑌨𑌮𑌸𑍍𑌤𑍇 𑌲𑌸𑌦𑍍𑌵𑌜𑍍𑌰𑌪𑌾𑌣𑍇 ।
𑌨𑌮𑌸𑍍𑌤𑍇 𑌨𑌮𑌸𑍍𑌤𑍇 𑌕𑌟𑌿𑌨𑍍𑌯𑌸𑍍𑌤𑌪𑌾𑌣𑍇
𑌨𑌮𑌸𑍍𑌤𑍇 𑌨𑌮𑌸𑍍𑌤𑍇 𑌸𑌦𑌾𑌭𑍀𑌷𑍍𑌟𑌪𑌾𑌣𑍇 ॥ 1𑍯 ॥

𑌨𑌮𑌸𑍍𑌤𑍇 𑌨𑌮𑌸𑍍𑌤𑍇 𑌮𑌹𑌾𑌶𑌕𑍍𑌤𑌿𑌧𑌾𑌰𑌿𑌨𑍍
𑌨𑌮𑌸𑍍𑌤𑍇 𑌸𑍁𑌰𑌾𑌣𑌾𑌂 𑌮𑌹𑌾𑌸𑍌𑌖𑍍𑌯𑌦𑌾𑌯𑌿𑌨𑍍 ।
𑌨𑌮𑌸𑍍𑌤𑍇 𑌸𑌦𑌾 𑌕𑍁𑌕𑍍𑌕𑍁𑌟𑍇𑌶𑌾𑌖𑍍𑌯𑌕 𑌤𑍍𑌵𑌂
𑌸𑌮𑌸𑍍𑌤𑌾𑌪𑌰𑌾𑌧𑌂 𑌵𑌿𑌭𑍋 𑌮𑍇 𑌕𑍍𑌷𑌮𑌸𑍍𑌵 ॥ 20 ॥

𑌕𑍁𑌮𑌾𑌰𑌾𑌤𑍍𑌪𑌰𑌂 𑌕𑌰𑍍𑌮𑌯𑍋𑌗𑌂 𑌨 𑌜𑌾𑌨𑍇
𑌕𑍁𑌮𑌾𑌰𑌾𑌤𑍍𑌪𑌰𑌂 𑌕𑌰𑍍𑌮𑌶𑍀𑌲𑌂 𑌨 𑌜𑌾𑌨𑍇 ।
𑌯 𑌏𑌕𑍋 𑌮𑍁𑌨𑍀𑌨𑌾𑌂 𑌹𑍃𑌦𑌬𑍍𑌜𑌾𑌧𑌿𑌵𑌾𑌸𑌃
𑌶𑌿𑌵𑌾𑌂𑌕𑌂 𑌸𑌮𑌾𑌰𑍁𑌹𑍍𑌯 𑌸𑌤𑍍𑌪𑍀𑌠𑌕𑌲𑍍𑌪𑌮𑍍 ॥ 21 ॥

𑌵𑌿𑌰𑌿𑌂𑌚𑌾𑌯 𑌮𑌂𑌤𑍍𑌰𑍋𑌪𑌦𑍇𑌶𑌂 𑌚𑌕𑌾𑌰
𑌪𑍍𑌰𑌮𑍋𑌦𑍇𑌨 𑌸𑍋𑌽𑌯𑌂 𑌤𑌨𑍋𑌤𑍁 𑌶𑍍𑌰𑌿𑌯𑌂 𑌮𑍇 ।
𑌯𑌮𑌾𑌹𑍁𑌃 𑌪𑌰𑌂 𑌵𑍇𑌦 𑌶𑍂𑌰𑍇𑌷𑍁 𑌮𑍁𑌖𑍍𑌯𑌂
𑌸𑌦𑌾 𑌯𑌸𑍍𑌯 𑌶𑌕𑍍𑌤𑍍𑌯𑌾 𑌜𑌗𑌤𑍍𑌭𑍀𑌤𑌭𑍀𑌤𑌾 ॥ 22 ॥

𑌯𑌮𑌾𑌶𑍍𑌰𑌿𑌤𑍍𑌯 𑌦𑍇𑌵𑌾𑌃 𑌸𑍍𑌥𑌿𑌰𑌂 𑌸𑍍𑌵𑌰𑍍𑌗𑌪𑌾𑌲𑌾𑌃
𑌸𑌦𑍋𑌂𑌕𑌾𑌰𑌰𑍂𑌪𑌂 𑌚𑌿𑌦𑌾𑌨𑌂𑌦𑌮𑍀𑌡𑍇 ।
𑌗𑍁𑌹𑌸𑍍𑌤𑍋𑌤𑍍𑌰𑌮𑍇𑌤𑌤𑍍 𑌕𑍃𑌤𑌂 𑌤𑌾𑌰𑌕𑌾𑌰𑍇
𑌭𑍁𑌜𑌂𑌗𑌪𑍍𑌰𑌯𑌾𑌤𑍇𑌨 𑌹𑍃𑌦𑍍𑌯𑍇𑌨 𑌕𑌾𑌂𑌤𑌮𑍍 ॥ 23 ॥

𑌜𑌨𑌾 𑌯𑍇 𑌪𑌠𑌂𑌤𑍇 𑌮𑌹𑌾𑌭𑌕𑍍𑌤𑌿𑌯𑍁𑌕𑍍𑌤𑌾𑌃
𑌪𑍍𑌰𑌮𑍋𑌦𑍇𑌨 𑌸𑌾𑌯𑌂 𑌪𑍍𑌰𑌭𑌾𑌤𑍇 𑌵𑌿𑌶𑍇𑌷𑌃 ।
𑌨 𑌜𑌨𑍍𑌮𑌰𑍍𑌕𑍍𑌷𑌯𑍋𑌗𑍇 𑌯𑌦𑌾 𑌤𑍇 𑌰𑍁𑌦𑌾𑌂𑌤𑌾
𑌮𑌨𑍋𑌵𑌾𑌂𑌛𑌿𑌤𑌾𑌨𑍍 𑌸𑌰𑍍𑌵𑌕𑌾𑌮𑌾𑌨𑍍 𑌲𑌭𑌂𑌤𑍇 ॥ 23 ॥

𑌇𑌤𑌿 𑌶𑍍𑌰𑍀 𑌸𑍁𑌬𑍍𑌰𑌹𑍍𑌮𑌣𑍍𑌯 𑌭𑍁𑌜𑌂𑌗 𑌪𑍍𑌰𑌯𑌾𑌤 𑌸𑍍𑌤𑍋𑌤𑍍𑌰𑌮𑍍 ।