જય પદ્મપલાશાક્ષિ જય ત્વં શ્રીપતિપ્રિયે ।
જય માતર્મહાલક્ષ્મિ સંસારાર્ણવતારિણિ ॥ 1 ॥

મહાલક્ષ્મિ નમસ્તુભ્યં નમસ્તુભ્યં સુરેશ્વરિ ।
હરિપ્રિયે નમસ્તુભ્યં નમસ્તુભ્યં દયાનિધે ॥ 2 ॥

પદ્માલયે નમસ્તુભ્યં નમસ્તુભ્યં ચ સર્વદે ।
સર્વભૂતહિતાર્થાય વસુવૃષ્ટિં સદા કુરુ ॥ 3 ॥

જગન્માતર્નમસ્તુભ્યં નમસ્તુભ્યં દયાનિધે ।
દયાવતિ નમસ્તુભ્યં વિશ્વેશ્વરિ નમોઽસ્તુ તે ॥ 4 ॥

નમઃ ક્ષીરાર્ણવસુતે નમસ્ત્રૈલોક્યધારિણિ ।
વસુવૃષ્ટે નમસ્તુભ્યં રક્ષ માં શરણાગતમ્ ॥ 5 ॥

રક્ષ ત્વં દેવદેવેશિ દેવદેવસ્ય વલ્લભે ।
દારિદ્ર્યાત્ત્રાહિ માં લક્ષ્મિ કૃપાં કુરુ મમોપરિ ॥ 6 ॥

નમસ્ત્રૈલોક્યજનનિ નમસ્ત્રૈલોક્યપાવનિ ।
બ્રહ્માદયો નમંતિ ત્વાં જગદાનંદદાયિનિ ॥ 7 ॥

વિષ્ણુપ્રિયે નમસ્તુભ્યં નમસ્તુભ્યં જગદ્ધિતે ।
આર્તિહંત્રિ નમસ્તુભ્યં સમૃદ્ધિં કુરુ મે સદા ॥ 8 ॥

અબ્જવાસે નમસ્તુભ્યં ચપલાયૈ નમો નમઃ ।
ચંચલાયૈ નમસ્તુભ્યં લલિતાયૈ નમો નમઃ ॥ 9 ॥

નમઃ પ્રદ્યુમ્નજનનિ માતસ્તુભ્યં નમો નમઃ ।
પરિપાલય માં માતઃ માં તુભ્યં શરણાગતમ્ ॥ 10 ॥

શરણ્યે ત્વાં પ્રપન્નોઽસ્મિ કમલે કમલાલયે ।
ત્રાહિ ત્રાહિ મહાલક્ષ્મિ પરિત્રાણપરાયણે ॥ 11 ॥

પાંડિત્યં શોભતે નૈવ ન શોભંતે ગુણા નરે ।
શીલત્વં નૈવ શોભેત મહાલક્ષ્મિ ત્વયા વિના ॥ 12 ॥

તાવદ્વિરાજતે રૂપં તાવચ્છીલં વિરાજતે ।
તાવદ્ગુણા નરાણાં ચ યાવલ્લક્ષ્મીઃ પ્રસીદતિ ॥ 13 ॥

લક્ષ્મિ ત્વયાઽલંકૃતમાનવા યે
પાપૈર્વિમુક્તા નૃપલોકમાન્યાઃ ।
ગુણૈર્વિહીના ગુણિનો ભવંતિ
દુશ્શીલિનઃ શીલવતાં વરિષ્ઠાઃ ॥ 14 ॥

લક્ષ્મીર્ભૂષયતે રૂપં લક્ષ્મીર્ભૂષયતે કુલમ્ ।
લક્ષ્મીર્ભૂષયતે વિદ્યાં સર્વા લક્ષ્મીર્વિશિષ્યતે ॥ 15 ॥

લક્ષ્મી ત્વદ્ગુણકીર્તનેન કમલા ભૂર્યાત્યલં જિહ્મતામ્
રુદ્રાદ્યા રવિચંદ્રદેવપતયો વક્તું ચ નૈવ ક્ષમાઃ ।
અસ્માભિસ્તવ રૂપલક્ષણગુણાન્વક્તું કથં શક્યતે
માતર્માં પરિપાહિ વિશ્વજનની કૃત્વા મમેષ્ટં ધ્રુવમ્ ॥ 16 ॥

દીનાર્તિભીતં ભવતાપપીડિતં
ધનૈર્વિહીનં તવ પાર્શ્વમાગતમ્ ।
કૃપાનિધિત્વાન્મમ લક્ષ્મિ સત્વરં
ધનપ્રદાનાદ્ધનનાયકં કુરુ ॥ 17 ॥

માં વિલોક્ય જનની હરિપ્રિયે
નિર્ધનં તવ સમીપમાગતમ્ ।
દેહિ મે ઝટિતિ લક્ષ્મિ કરાગ્રં
વસ્ત્રકાંચનવરાન્નમદ્ભુતમ્ ॥ 18 ॥

ત્વમેવ જનની લક્ષ્મીઃ પિતા લક્ષ્મીસ્ત્વમેવ ચ ।
ભ્રાતા ત્વં ચ સખા લક્ષ્મીર્વિદ્યા લક્ષ્મીસ્ત્વમેવ ચ ॥ 19 ॥

ત્રાહિ ત્રાહિ મહાલક્ષ્મિ ત્રાહિ ત્રાહિ સુરેશ્વરિ ।
ત્રાહિ ત્રાહિ જગન્માતઃ દારિદ્ર્યાત્ત્રાહિ વેગતઃ ॥ 20 ॥

નમસ્તુભ્યં જગદ્ધાત્રિ નમસ્તુભ્યં નમો નમઃ ।
ધર્માધારે નમસ્તુભ્યં નમઃ સંપત્તિદાયિની ॥ 21 ॥

દારિદ્ર્યાર્ણવમગ્નોઽહં નિમગ્નોઽહં રસાતલે ।
મજ્જંતં માં કરે ધૃત્વા તૂદ્ધર ત્વં રમે દ્રુતમ્ ॥ 22 ॥

કિં લક્ષ્મિ બહુનોક્તેન જલ્પિતેન પુનઃ પુનઃ ।
અન્યન્મે શરણં નાસ્તિ સત્યં સત્યં હરિપ્રિયે ॥ 23 ॥

એતચ્છ્રુત્વાઽગસ્ત્યવાક્યં હૃષ્યમાણા હરિપ્રિયા ।
ઉવાચ મધુરાં વાણીં તુષ્ટાઽહં તવ સર્વદા ॥ 24 ॥

શ્રીલક્ષ્મીરુવાચ ।
યત્ત્વયોક્તમિદં સ્તોત્રં યઃ પઠિષ્યતિ માનવઃ ।
શૃણોતિ ચ મહાભાગસ્તસ્યાહં વશવર્તિની ॥ 25 ॥

નિત્યં પઠતિ યો ભક્ત્યા ત્વલક્ષ્મીસ્તસ્ય નશ્યતિ ।
ઋણં ચ નશ્યતે તીવ્રં વિયોગં નૈવ પશ્યતિ ॥ 26 ॥

યઃ પઠેત્પ્રાતરુત્થાય શ્રદ્ધાભક્તિસમન્વિતઃ ।
ગૃહે તસ્ય સદા તિષ્ટેન્નિત્યં શ્રીઃ પતિના સહ ॥ 27 ॥

સુખસૌભાગ્યસંપન્નો મનસ્વી બુદ્ધિમાન્ભવેત્ ।
પુત્રવાન્ ગુણવાન્ શ્રેષ્ઠો ભોગભોક્તા ચ માનવઃ ॥ 28 ॥

ઇદં સ્તોત્રં મહાપુણ્યં લક્ષ્મ્યાગસ્ત્યપ્રકીર્તિતમ્ ।
વિષ્ણુપ્રસાદજનનં ચતુર્વર્ગફલપ્રદમ્ ॥ 29 ॥

રાજદ્વારે જયશ્ચૈવ શત્રોશ્ચૈવ પરાજયઃ ।
ભૂતપ્રેતપિશાચાનાં વ્યાઘ્રાણાં ન ભયં તથા ॥ 30 ॥

ન શસ્ત્રાનલતોયૌઘાદ્ભયં તસ્ય પ્રજાયતે ।
દુર્વૃત્તાનાં ચ પાપાનાં બહુહાનિકરં પરમ્ ॥ 31 ॥

મંદુરાકરિશાલાસુ ગવાં ગોષ્ઠે સમાહિતઃ ।
પઠેત્તદ્દોષશાંત્યર્થં મહાપાતકનાશનમ્ ॥ 32 ॥

સર્વસૌખ્યકરં નૄણામાયુરારોગ્યદં તથા ।
અગસ્ત્યમુનિના પ્રોક્તં પ્રજાનાં હિતકામ્યયા ॥ 33 ॥

ઇત્યગસ્ત્યવિરચિતં શ્રી લક્ષ્મી સ્તોત્રમ્ ।