વંદે ગજેંદ્રવદનં
વામાંકારૂઢવલ્લભાશ્લિષ્ટમ્ ।
કુંકુમપરાગશોણં
કુવલયિનીજારકોરકાપીડમ્ ॥ 1 ॥
સ જયતિ સુવર્ણશૈલઃ
સકલજગચ્ચક્રસંઘટિતમૂર્તિઃ ।
કાંચનનિકુંજવાટી-
-કંદલદમરીપ્રપંચસંગીતઃ ॥ 2 ॥
હરિહયનૈરૃતમારુત-
-હરિતામંતેષ્વવસ્થિતં તસ્ય ।
વિનુમઃ સાનુત્રિતયં
વિધિહરિગૌરીશવિષ્ટપાધારમ્ ॥ 3 ॥
મધ્યે પુનર્મનોહર-
-રત્નરુચિસ્તબકરંજિતદિગંતમ્ ।
ઉપરિ ચતુઃશતયોજન-
-મુત્તુંગં શૃંગપુંગવમુપાસે ॥ 4 ॥
તત્ર ચતુઃશતયોજન-
-પરિણાહં દેવશિલ્પિના રચિતમ્ ।
નાનાસાલમનોજ્ઞં
નમામ્યહં નગરમાદિવિદ્યાયાઃ ॥ 5 ॥
પ્રથમં સહસ્રપૂર્વક-
-ષટ્શતસંખ્યાકયોજનં પરિતઃ ।
વલયીકૃતસ્વગાત્રં
વરણં શરણં વ્રજામ્યયોરૂપમ્ ॥ 6 ॥
તસ્યોત્તરે સમીરણ-
-યોજનદૂરે તરંગિતચ્છાયઃ ।
ઘટયતુ મુદં દ્વિતીયો
ઘંટાસ્તનસારનિર્મિતઃ સાલઃ ॥ 7 ॥
ઉભયોરંતરસીમ-
-ન્યુદ્દામભ્રમરરંજિતોદારમ્ ।
ઉપવનમુપાસ્મહે વય-
-મૂરીકૃતમંદમારુતસ્યંદમ્ ॥ 8 ॥
આલિંગ્ય ભદ્રકાલી-
-માસીનસ્તત્ર હરિશિલાશ્યામામ્ ।
મનસિ મહાકાલો મે
વિહરતુ મધુપાનવિભ્રમન્નેત્રઃ ॥ 9 ॥
તાર્તીયીકો વરણ-
-સ્તસ્યોત્તરસીમ્નિ વાતયોજનતઃ ।
તામ્રેણ રચિતમૂર્તિ-
-સ્તનુતામાચંદ્રતારકં ભદ્રમ્ ॥ 10 ॥
મધ્યે તયોશ્ચ મણિમય-
-પલ્લવશાખાપ્રસૂનપક્ષ્મલિતામ્ ।
કલ્પાનોકહવાટીં
કલયે મકરંદપંકિલાવાલામ્ ॥ 11 ॥
તત્ર મધુમાધવશ્રી-
-તરુણીભ્યાં તરલદૃક્ચકોરાભ્યામ્ ।
આલિંગિતોઽવતાન્મા-
-મનિશં પ્રથમર્તુરાત્તપુષ્પાસ્ત્રઃ ॥ 12 ॥
નમત તદુત્તરભાગે
નાકિપથોલ્લંઘિશૃંગસંઘાતમ્ ।
સીસાકૃતિં તુરીયં
સિતકિરણાલોકનિર્મલં સાલમ્ ॥ 13 ॥
સાલદ્વયાંતરાલે
સરલાલિકપોતચાટુસુભગાયામ્ ।
સંતાનવાટિકાયાં
સક્તં ચેતોઽસ્તુ સતતમસ્માકમ્ ॥ 14 ॥
તત્ર તપનાતિરૂક્ષઃ
સામ્રાજ્ઞીચરણસાંદ્રિતસ્વાંતઃ ।
શુક્રશુચિશ્રીસહિતો
ગ્રીષ્મર્તુર્દિશતુ કીર્તિમાકલ્પમ્ ॥ 15 ॥
ઉત્તરસીમનિ તસ્યો-
-ન્નતશિખરોત્કંપિહાટકપતાકઃ ।
પ્રકટયતુ પંચમો નઃ
પ્રાકારઃ કુશલમારકૂટમયઃ ॥ 16 ॥
પ્રાકારયોશ્ચ મધ્યે
પલ્લવિતાન્યભૃતપંચમોન્મેષા ।
હરિચંદનદ્રુવાટી-
-હરતાદામૂલમસ્મદનુતાપમ્ ॥ 17 ॥
તત્ર નભઃ શ્રીમુખ્યૈ-
-સ્તરુણીવર્ગૈઃ સમન્વિતઃ પરિતઃ ।
વજ્રાટ્ટહાસમુખરો
વાંછાપૂર્તિં તનોતુ વર્ષર્તુઃ ॥ 18 ॥
મારુતયોજનદૂરે
મહનીયસ્તસ્ય ચોત્તરે ભાગે ।
ભદ્રં કૃષીષ્ટ ષષ્ઠઃ
પ્રાકારઃ પંચલોહધાતુમયઃ ॥ 19 ॥
અનયોર્મધ્યે સંતત-
-મંકૂરદ્દિવ્યકુસુમગંધાયામ્ ।
મંદારવાટિકાયાં
માનસમંગીકરોતુ મે વિહૃતિમ્ ॥ 20 ॥
તસ્યામિષોર્જલક્ષ્મી-
-તરુણીભ્યાં શરદૃતુઃ સદા સહિતઃ ।
અભ્યર્ચયન્ સ જીયા-
-દંબામામોદમેદુરૈઃ કુસુમૈઃ ॥ 21 ॥
તસ્યર્ષિસંખ્યયોજન-
-દૂરે દેદીપ્યમાનશૃંગૌઘઃ ।
કલધૌતકલિતમૂર્તિઃ
કલ્યાણં દિશતુ સપ્તમઃ સાલઃ ॥ 22 ॥
મધ્યે તયોર્મરુત્પથ
લંઘિતવિટપાગ્રવિરુતકલકંઠા ।
શ્રીપારિજાતવાટી
શ્રિયમનિશં દિશતુ શીતલોદ્દેશા ॥ 23 ॥
તસ્યામતિપ્રિયાભ્યાં
સહ ખેલન્ સહસહસ્યલક્ષ્મીભ્યામ્ ।
સામંતો ઝષકેતો-
-ર્હેમંતો ભવતુ હેમવૃદ્ધ્યૈ નઃ ॥ 24 ॥
ઉત્તરતસ્તસ્ય મહા-
-નુદ્ભટહુતભુક્શિખારુણમયૂખઃ ।
તપનીયખંડરચિત-
-સ્તનુતાદાયુષ્યમષ્ટમો વરણઃ ॥ 25 ॥
કાદંબવિપિનવાટી-
-મનયોર્મધ્યભુવિ કલ્પિતાવાસામ્ ।
કલયામિ સૂનકોરક-
-કંદલિતામોદતુંદિલસમીરામ્ ॥ 26 ॥
તસ્યામતિશિશિરાકૃતિ-
-રાસીનસ્તપતપસ્યલક્ષ્મીભ્યામ્ ।
શિવમનિશં કુરુતાન્મે
શિશિરર્તુઃ સતતશીતલદિગંતઃ ॥ 27 ॥
તસ્યાં કદંબવાટ્યાં
તત્પ્રસવામોદમિલિતમધુગંધમ્ ।
સપ્તાવરણમનોજ્ઞં
શરણં સમુપૈમિ મંત્રિણીશરણમ્ ॥ 28 ॥
તત્રાલયે વિશાલે
તપનીયારચિતતરલસોપાને ।
માણિક્યમંડપાંત-
-ર્મહિતે સિંહાસને સુમણિખચિતે ॥ 29 ॥
બિંદુત્રિપંચકોણ-
-દ્વિપનૃપવસુવેદદલકુરેખાઢ્યે ।
ચક્રે સદા નિવિષ્ટાં
ષષ્ઠ્યષ્ટત્રિંશદક્ષરેશાનીમ્ ॥ 30 ॥
તાપિંછમેચકાભાં
તાલીદલઘટિતકર્ણતાટંકામ્ ।
તાંબૂલપૂરિતમુખીં
તામ્રાધરબિંબદૃષ્ટદરહાસામ્ ॥ 31 ॥
કુંકુમપંકિલદેહાં
કુવલયજીવાતુશાવકવતંસામ્ ।
કોકનદશોણચરણાં
કોકિલનિક્વાણકોમલાલાપામ્ ॥ 32 ॥
વામાંગગલિતચૂલીં
વનમાલ્યકદંબમાલિકાભરણામ્ ।
મુક્તાલલંતિકાંચિત
મુગ્ધાલિકમિલિતચિત્રકોદારામ્ ॥ 33 ॥
કરવિધૃતકીરશાવક-
-કલનિનદવ્યક્તનિખિલનિગમાર્થામ્ ।
વામકુચસંગિવીણાવાદન-
-સૌખ્યાર્ધમીલિતાક્ષિયુગામ્ ॥ 34 ॥
આપાટલાંશુકધરા-
-માદિરસોન્મેષવાસિતકટાક્ષામ્ ।
આમ્નાયસારગુલિકા-
-માદ્યાં સંગીતમાતૃકાં વંદે ॥ 35 ॥
તસ્ય ચ સુવર્ણસાલ-
-સ્યોત્તરતસ્તરુણકુંકુમચ્છાયઃ ।
શમયતુ મમ સંતાપં
સાલો નવમઃ સ પુષ્પરાગમયઃ ॥ 36 ॥
અનયોરંતરવસુધાઃ
પ્રણુમઃ પ્રત્યગ્રપુષ્પરાગમયીઃ ।
સિંહાસનેશ્વરીમનુ-
-ચિંતનનિસ્તંદ્રસિદ્ધનીરંધ્રાઃ ॥ 37 ॥
તત્સાલોત્તરદેશે
તરુણજપાકિરણધોરણીશોણઃ ।
પ્રશમયતુ પદ્મરાગ-
-પ્રાકારો મમ પરાભવં દશમઃ ॥ 38 ॥
અંતરભૂકૃતવાસા-
-નનયોરપનીતચિત્તવૈમત્યાન્ ।
ચક્રેશીપદભક્તાં-
-શ્ચારણવર્ગાનહર્નિશં કલયે ॥ 39 ॥
સારંગવાહયોજનદૂરે-
-ઽસંઘટિતકેતનસ્તસ્ય ।
ગોમેદકેન રચિતો
ગોપાયતુ માં સમુન્નતઃ સાલઃ ॥ 40 ॥
વપ્રદ્વયાંતરોર્વ્યાં
વટુકૈર્વિવિધૈશ્ચ યોગિનીબૃંદૈઃ ।
સતતં સમર્ચિતાયાઃ
સંકર્ષણ્યાઃ પ્રણૌમિ ચરણાબ્જમ્ ॥ 41 ॥
તાપસયોજનદૂરે
તસ્ય સમુત્તુંગ ગોપુરોપેતઃ ।
વાંછાપૂર્ત્યૈ ભવતા-
-દ્વજ્રમણીનિકરનિર્મિતો વપ્રઃ ॥ 42 ॥
વરણદ્વિતયાંતરતો
વાસજુષો વિહિતમધુરસાસ્વાદાઃ ।
રંભાદિવિબુધવેશ્યા
રચયંતુ મહાંતમસ્મદાનંદમ્ ॥ 43 ॥
તત્ર સદા પ્રવહંતી
તટિની વજ્રાભિધા ચિરં જીયાત્ ।
ચટુલોર્મિજાલનૃત્ય-
-ત્કલહંસીકુલકલક્વણિતપુષ્ટા ॥ 44 ॥
રોધસિ તસ્યા રુચિરે
વજ્રેશી જયતિ વજ્રભૂષાઢ્યા ।
વજ્રપ્રદાનતોષિત-
-વજ્રિમુખત્રિદશવિનુતચારિત્રા ॥ 45 ॥
તસ્યોદીચ્યાં હરિતિ
સ્તવકિતસુષમાવલીઢવિયદંતઃ ।
વૈડૂર્યરત્નરચિતો
વૈમલ્યં દિશતુ ચેતસો વરણઃ ॥ 46 ॥
અધિમધ્યમેતયોઃ પુન-
-રંબાચરણાવલંબિતસ્વાંતાન્ ।
કાર્કોટકાદિનાગાન્
કલયામઃ કિં ચ બલિમુખાન્ દનુજાન્ ॥ 47 ॥
ગંધવહસંખ્યયોજન-
-દૂરે ગગનોર્ધ્વજાંઘિકસ્તસ્ય ।
વાસવમણિપ્રણીતો
વરણો બહલયતુ વૈદુષીં વિશદામ્ ॥ 48 ॥
મધ્યક્ષોણ્યામનયો-
-ર્મહેંદ્રનીલાત્મકાનિ ચ સરાંસિ ।
શાતોદરીસહાયા-
-ન્ભૂપાલાનપિ પુનઃ પુનઃ પ્રણુમઃ ॥ 49 ॥
આશુગયોજનદૂરે
તસ્યોર્ધ્વં કાંતિધવલિતદિગંતઃ ।
મુક્તાવિરચિતગાત્રો
મુહુરસ્માકં મુદે ભવતુ સાલઃ ॥ 50 ॥
આવૃત્ત્યોરધિમધ્યં
પૂર્વસ્યાં દિશિ પુરંદરઃ શ્રીમાન્ ।
અભ્રમુવિટાધિરૂઢો
વિભ્રમમસ્માકમનિશમાતનુતાત્ ॥ 51 ॥
તત્કોણે વ્યજનસ્રુ-
-ક્તોમરપાત્રસ્રુવાન્નશક્તિધરઃ ।
સ્વાહાસ્વધાસમેતઃ
સુખયતુ માં હવ્યવાહનઃ સુચિરમ્ ॥ 52 ॥
દક્ષિણદિગંતરાલે
દંડધરો નીલનીરદચ્છાયઃ ।
ત્રિપુરાપદાબ્જભક્તસ્તિરયતુ
મમ નિખિલમંહસાં નિકરમ્ ॥ 53 ॥
તસ્યૈવ પશ્ચિમાયાં
દિશિ દલિતેંદીવરપ્રભાશ્યામઃ ।
ખેટાસિયષ્ટિધારી
ખેદાનપનયતુ યાતુધાનો મે ॥ 54 ॥
તસ્યા ઉત્તરદેશે
ધવલાંગો વિપુલઝષવરારૂઢઃ ।
પાશાયુધાત્તપાણિઃ
પાશી વિદલયતુ પાશજાલાનિ ॥ 55 ॥
વંદે તદુત્તરહરિ-
-ત્કોણે વાયું ચમૂરુવરવાહમ્ ।
કોરકિતતત્ત્વબોધા-
-ન્ગોરક્ષપ્રમુખયોગિનોઽપિ મુહુઃ ॥ 56 ॥
તરુણીરિડાપ્રધાના-
-સ્તિસ્રો વાતસ્ય તસ્ય કૃતવાસાઃ ।
પ્રત્યગ્રકાપિશાયન-
-પાનપરિભ્રાંતલોચનાઃ કલયે ॥ 57 ॥
તલ્લોકપૂર્વભાગે
ધનદં ધ્યાયામિ શેવધિકુલેશમ્ ।
અપિ માણિભદ્રમુખ્યા-
-નંબાચરણાવલંબિનો યક્ષાન્ ॥ 58 ॥
તસ્યૈવ પૂર્વસીમનિ
તપનીયારચિતગોપુરે નગરે ।
કાત્યાયનીસહાયં
કલયે શીતાંશુખંડચૂડાલમ્ ॥ 59 ॥
તત્પુરષોડશવરણ-
-સ્થલભાજસ્તરુણચંદ્રચૂડાલાન્ ।
રુદ્રાધ્યાયે પઠિતા-
-ન્રુદ્રાણીસહચરાન્ભજે રુદ્રાન્ ॥ 60 ॥
પવમાનસંખ્યયોજન-
-દૂરે બાલતૃણ્મેચકસ્તસ્ય ।
સાલો મરકતરચિતઃ
સંપદમચલાં શ્રિયં ચ પુષ્ણાતુ ॥ 61 ॥
આવૃતિયુગ્માંતરતો
હરિતમણીનિવહમેચકે દેશે ।
હાટકતાલીવિપિનં
હાલાઘટઘટિતવિટપમાકલયે ॥ 62 ॥
તત્રૈવ મંત્રિણીગૃહ-
-પરિણાહં તરલકેતનં સદનમ્ ।
મરકતસૌધમનોજ્ઞં
દદ્યાદાયૂંષિ દંડનાથાયાઃ ॥ 63 ॥
સદને તત્ર હરિન્મણિ-
-સંઘટિતે મંડપે શતસ્તંભે ।
કાર્તસ્વરમયપીઠે
કનકમયાંબુરુહકર્ણિકામધ્યે ॥ 64 ॥
બિંદુત્રિકોણવર્તુલ-
-ષડસ્રવૃત્તદ્વયાન્વિતે ચક્રે ।
સંચારિણી દશોત્તર-
શતાર્ણમનુરાજકમલકલહંસી ॥ 65 ॥
કોલવદના કુશેશય-
-નયના કોકારિમંડિતશિખંડા ।
સંતપ્તકાંચનાભા
સંધ્યારુણચેલસંવૃતનિતંબા ॥ 66 ॥
હલમુસલશંખચક્રા-
-ઽંકુશપાશાભયવરસ્ફુરિતહસ્તા ।
કૂલંકષાનુકંપા
કુંકુમજંબાલિતસ્તનાભોગા ॥ 67 ॥
ધૂર્તાનામતિદૂરા-
-વાર્તાશેષાવલગ્નકમનીયા ।
આર્તાલીશુભદાત્રી
વાર્તાલી ભવતુ વાંછિતાર્થાય ॥ 68 ॥
તસ્યાઃ પરિતો દેવીઃ
સ્વપ્નેશ્યુન્મત્તભૈરવીમુખ્યાઃ ।
પ્રણમત જંભિન્યાદ્યાઃ
ભૈરવવર્ગાંશ્ચ હેતુકપ્રમુખાન્ ॥ 69 ॥
પૂર્વોક્તસંખ્યયોજન-
-દૂરે પૂયાંશુપાટલસ્તસ્ય ।
વિદ્રાવયતુ મદાર્તિં
વિદ્રુમસાલો વિશંકટદ્વારઃ ॥ 70 ॥
આવરણયોરહર્નિશ-
-મંતરભૂમૌપ્રકાશશાલિન્યામ્ ।
આસીનમંબુજાસન-
-મભિનવસિંદૂરગૌરમહમીડે ॥ 71 ॥
વરણસ્ય તસ્ય મારુત-
-યોજનતો વિપુલગોપુરદ્વારઃ ।
સાલો નાનારત્નૈઃ
સંઘટિતાંગઃ કૃષીષ્ટ મદભીષ્ટમ્ ॥ 72 ॥
અંતરકક્ષ્યામનયો-
-રવિરલશોભાપિચંડિલોદ્દેશામ્ ।
માણિક્યમંડપાખ્યાં
મહતીમધિહૃદયમનિશમાકલયે ॥ 73 ॥
તત્ર સ્થિતં પ્રસન્નં
તરુણતમાલપ્રવાલકિરણાભમ્ ।
કર્ણાવલંબિકુંડલ-
-કંદલિતાભીશુકવચિતકપોલમ્ ॥ 74 ॥
શોણાધરં શુચિસ્મિત-
-મેણાંકવદનમેધમાનકૃપમ્ ।
મુગ્ધૈણમદવિશેષક-
-મુદ્રિતનિટિલેંદુરેખિકારુચિરમ્ ॥ 75 ॥
નાલીકદલસહોદર-
-નયનાંચલઘટિતમનસિજાકૂતમ્ ।
કમલાકઠિનપયોધર-
-કસ્તૂરીઘુસૃણપંકિલોરસ્કમ્ ॥ 76 ॥
ચાંપેયગંધિકૈશ્યં
શંપાસબ્રહ્મચારિકૌશેયમ્ ।
શ્રીવત્સકૌસ્તુભધરં
શ્રિતજનરક્ષાધુરીણચરણાબ્જમ્ ॥ 77 ॥
કંબુસુદર્શનવિલસ-
-ત્કરપદ્મં કંઠલોલવનમાલમ્ ।
મુચુકુંદમોક્ષફલદં
મુકુંદમાનંદકંદમવલંબે ॥ 78 ॥
તદ્વરણોત્તરભાગે
તારાપતિબિંબચુંબિનિજશૃંગઃ ।
વિવિધમણીગણઘટિતો
વિતરતુ સાલો વિનિર્મલાં ધિષણામ્ ॥ 79 ॥
પ્રાકારદ્વિતયાંતર-
-કક્ષ્યાં પૃથુરત્નનિકરસંકીર્ણામ્ ।
નમત સહસ્રસ્તંભક-
-મંડપનામ્નાતિવિશ્રુતાં ભુવને ॥ 80 ॥
પ્રણુમસ્તત્ર ભવાની-
-સહચરમીશાનમિંદુખંડધરમ્ ।
શૃંગારનાયિકામનુ-
-શીલનભાજોઽપિ ભૃંગિનંદિમુખાન્ ॥ 81 ॥
તસ્યૈણવાહયોજન-
-દૂરે વંદે મનોમયં વપ્રમ્ ।
અંકૂરન્મણિકિરણા-
-મંતરકક્ષ્યાં ચ નિર્મલામનયોઃ ॥ 82 ॥
તત્રૈવામૃતવાપીં
તરલતરંગાવલીઢતટયુગ્મામ્ ।
મુક્તામયકલહંસી-
-મુદ્રિતકનકારવિંદસંદોહામ્ ॥ 83 ॥
શક્રોપલમયભૃંગી-
-સંગીતોન્મેષઘોષિતદિગંતામ્ ।
કાંચનમયાંગવિલસ-
-ત્કારંડવષંડતાંડવમનોજ્ઞામ્ ॥ 84 ॥
કુરુવિંદાત્મકહલ્લક-
-કોરકસુષમાસમૂહપાટલિતામ્ ।
કલયે સુધાસ્વરૂપાં
કંદલિતામંદકૈરવામોદામ્ ॥ 85 ॥
તદ્વાપિકાંતરાલે તરલે
મણિપોતસીમ્નિ વિહરંતીમ્ ।
સિંદૂરપાટલાંગીં
સિતકિરણાંકૂરકલ્પિતવતંસામ્ ॥ 86 ॥
પર્વેંદુબિંબવદનાં
પલ્લવશોણાધરસ્ફુરિતહાસામ્ ।
કુટિલકબરીં કુરંગી-
-શિશુનયનાં કુંડલસ્ફુરિતગંડામ્ ॥ 87 ॥
નિકટસ્થપોતનિલયાઃ
શક્તીઃ શયવિધૃતહેમશૃંગજલૈઃ ।
પરિષિંચંતીં પરિત-
-સ્તારાં તારુણ્યગર્વિતાં વંદે ॥ 88 ॥
પ્રાગુક્તસંખ્યયોજનદૂરે
પ્રણમામિ બુદ્ધિમયસાલમ્ ।
અનયોરંતરકક્ષ્યા-
-મષ્ટાપદપુષ્ટમેદિનીં રુચિરામ્ ॥ 89 ॥
કાદંબરીનિધાનાં
કલયામ્યાનંદવાપિકાં તસ્યામ્ ।
શોણાશ્મનિવહનિર્મિત-
-સોપાનશ્રેણિશોભમાનતટીમ્ ॥ 90 ॥
માણિક્યતરણિનિલયાં
મધ્યે તસ્યા મદારુણકપોલામ્ ।
અમૃતેશીત્યભિધાના-
-મંતઃ કલયામિ વારુણીં દેવીમ્ ॥ 91 ॥
સૌવર્ણકેનિપાતન-
-હસ્તાઃ સૌંદર્યગર્વિતા દેવ્યઃ ।
તત્પુરતઃ સ્થિતિભાજો
વિતરંત્વસ્માકમાયુષો વૃદ્ધિમ્ ॥ 92 ॥
તસ્ય પૃષદશ્વયોજન-
-દૂરેઽહંકારસાલમતિતુંગમ્ ।
વંદે તયોશ્ચ મધ્યે
કક્ષ્યાં વલમાનમલયપવમાનામ્ ॥ 93 ॥
વિનુમો વિમર્શવાપીં
સૌષુમ્નસુધાસ્વરૂપિણીં તત્ર ।
વેલાતિલંઘ્યવીચી-
-કોલાહલભરિતકૂલવનવાટીમ્ ॥ 94 ॥
તત્રૈવ સલિલમધ્યે
તાપિંછદલપ્રપંચસુષમાભામ્ ।
શ્યામલકંચુકલસિતાં
શ્યામાવિટબિંબડંબરહરાસ્યામ્ ॥ 95 ॥
આભુગ્નમસૃણચિલ્લી-
-હસિતાયુગ્મશરકાર્મુકવિલાસામ્ ।
મંદસ્મિતાંચિતમુખીં
મણિમયતાટંકમંડિતકપોલામ્ ॥ 96 ॥
કુરુવિંદતરણિનિલયાં
કુલાચલસ્પર્ધિકુચનમન્મધ્યામ્ ।
કુંકુમવિલિપ્તગાત્રીં
કુરુકુલ્લાં મનસિ કુર્મહે સતતમ્ ॥ 97 ॥
તત્સાલોત્તરભાગે
ભાનુમયં વપ્રમાશ્રયે દીપ્તમ્ ।
મધ્યં ચ વિપુલમનયો-
-ર્મન્યે વિશ્રાંતમાતપોદ્ગારમ્ ॥ 98 ॥
તત્ર કુરુવિંદપીઠે
તામરસે કનકકર્ણિકાઘટિતે ।
આસીનમરુણવાસસ-
-મમ્લાનપ્રસવમાલિકાભરણમ્ ॥ 99 ॥
ચક્ષુષ્મતીપ્રકાશન-
-શક્તિચ્છાયાસમારચિતકેલિમ્ ।
માણિક્યમુકુટરમ્યં
મન્યે માર્તાંડભૈરવં હૃદયે ॥ 100 ॥
ઇંદુમયસાલમીડે
તસ્યોત્તરતસ્તુષારગિરિગૌરમ્ ।
અત્યંતશિશિરમારુત-
-મનયોર્મધ્યં ચ ચંદ્રિકોદ્ગારમ્ ॥ 101 ॥
તત્ર પ્રકાશમાનં
તારાનિકરૈઃ પરિષ્કૃતોદ્દેશમ્ ।
અમૃતમયકાંતિકંદલ-
-મંતઃ કલયામિ કુંદસિતમિંદુમ્ ॥ 102 ॥
શૃંગારસાલમીડે
શૃંગોલ્લસિતં તદુત્તરે ભાગે ।
મધ્યસ્થલે તયોરપિ
મહિતાં શૃંગારપૂર્વિકાં પરિખામ્ ॥ 103 ॥
તત્ર મણિનૌસ્થિતાભિ-
-સ્તપનીયાવિરચિતાગ્રહસ્તાભિઃ ।
શૃંગારદેવતાભિઃ
સહિતં પરિખાધિપં ભજે મદનમ્ ॥ 104 ॥
શૃંગારવરણવર્યસ્યોત્તરતઃ
સકલવિબુધસંસેવ્યમ્ ।
ચિંતામણિગણરચિતં
ચિંતાં દૂરીકરોતુ મે સદનમ્ ॥ 105 ॥
મણિસદનસાલયોરધિ-
-મધ્યં દશતાલભૂમિરુહદીર્ઘૈઃ ।
પર્ણૈઃ સુવર્ણવર્ણૈ-
-ર્યુક્તાં કાંડૈશ્ચ યોજનોત્તુંગૈઃ ॥ 106 ॥
મૃદુલૈસ્તાલીપંચક-
-માનૈર્મિલિતાં ચ કેસરકદંબૈઃ ।
સંતતગલિતમરંદ-
-સ્રોતોનિર્યન્મિલિંદસંદોહામ્ ॥ 107 ॥
પાટીરપવનબાલક-
-ધાટીનિર્યત્પરાગપિંજરિતામ્ ।
કલહંસીકુલકલકલ-
-કૂલંકષનિનદનિચયકમનીયામ્ ॥ 108 ॥
પદ્માટવીં ભજામઃ
પરિમલકલ્લોલપક્ષ્મલોપાંતામ્ ।
[ દેવ્યર્ઘ્યપાત્રધારી
તસ્યાઃ પૂર્વદિશિ દશકલાયુક્તઃ । ]
વલયિતમૂર્તિર્ભગવા-
-ન્વહ્નિઃ ક્રોશોન્નતશ્ચિરં પાયાત્ ॥ 109 ॥
તત્રાધારે દેવ્યાઃ
પાત્રીરૂપઃ પ્રભાકરઃ શ્રીમાન્ ।
દ્વાદશકલાસમેતો
ધ્વાંતં મમ બહુલમાંતરં ભિંદ્યાત્ ॥ 110 ॥
તસ્મિન્ દિનેશપાત્રે
તરંગિતામોદમમૃતમયમર્ઘ્યમ્ ।
ચંદ્રકલાત્મકમમૃતં
સાંદ્રીકુર્યાદમંદમાનંદમ્ ॥ 111 ॥
અમૃતે તસ્મિન્નભિતો
વિહરંત્યો વિવિધમણિતરણિભાજઃ ।
ષોડશ કલાઃ સુધાંશોઃ
શોકાદુત્તારયંતુ મામનિશમ્ ॥ 112 ॥
તત્રૈવ વિહૃતિભાજો
ધાતૃમુખાનાં ચ કારણેશાનામ્ ।
સૃષ્ટ્યાદિરૂપિકાસ્તાઃ
શમયંત્વખિલાઃ કલાશ્ચ સંતાપમ્ ॥ 113 ॥
કીનાશવરુણકિન્નર-
-રાજદિગંતેષુ રત્નગેહસ્ય ।
કલયામિ તાન્યજસ્રં
કલયંત્વાયુષ્યમર્ઘ્યપાત્રાણિ ॥ 114 ॥
પાત્રસ્થલસ્ય પુરતઃ
પદ્મારમણવિધિપાર્વતીશાનામ્ ।
ભવનાનિ શર્મણે નો
ભવંતુ ભાસા પ્રદીપિતજગંતિ ॥ 115 ॥
સદનસ્યાનલકોણે
સતતં પ્રણમામિ કુંડમાગ્નેયમ્ ।
તત્ર સ્થિતં ચ વહ્નિં
તરલશિખાજટિલમંબિકાજનકમ્ ॥ 116 ॥
તસ્યાસુરદિશિ તાદૃશ-
-રત્નપરિસ્ફુરિતપર્વનવકાઢ્યમ્ ।
ચક્રાત્મકં શતાંગં
શતયોજનમુન્નતં ભજે દિવ્યમ્ ॥ 117 ॥
તત્રૈવ દિશિ નિષણ્ણં
તપનીયધ્વજપરંપરાશ્લિષ્ટમ્ ।
રથમપરં ચ ભવાન્યા
રચયામો મનસિ રત્નમયચૂડમ્ ॥ 118 ॥
ભવનસ્ય વાયુભાગે
પરિષ્કૃતો વિવિધવૈજયંતીભિઃ ।
રચયતુ મુદં રથેંદ્રઃ
સચિવેશાન્યાઃ સમસ્તવંદ્યાયાઃ ॥ 119 ॥
કુર્મોઽધિહૃદયમનિશં
ક્રોડાસ્યાયાઃ શતાંગમૂર્ધન્યમ્ ।
રુદ્રદિશિ રત્નધામ્નો
રુચિરશલાકાપ્રપંચકંચુકિતમ્ ॥ 120 ॥
પરિતો દેવીધામ્નઃ
પ્રણીતવાસા મનુસ્વરૂપિણ્યઃ ।
કુર્વંતુ રશ્મિમાલા-
-કૃતયઃ કુશલાનિ દેવતા નિખિલાઃ ॥ 121 ॥
પ્રાગ્દ્વારસ્ય ભવાની-
-ધામ્નઃ પાર્શ્વદ્વયારચિતવાસે ।
માતંગીકિટિમુખ્યૌ
મણિસદને મનસિ ભાવયામિ ચિરમ્ ॥ 122 ॥
યોજનયુગલાભોગા
તત્ક્રોશપરિણાહયૈવ ભિત્ત્યા ચ ।
ચિંતામણિગૃહભૂમિ-
-ર્જીયાદામ્નાયમયચતુર્દ્વારા ॥ 123 ॥
દ્વારે દ્વારે ધામ્નઃ
પિંડીભૂતા નવીનબિંબાભાઃ ।
વિદધતુ વિપુલાં કીર્તિં
દિવ્યા લૌહિત્યસિદ્ધ્યો દેવ્યઃ ॥ 124 ॥
મણિસદનસ્યાંતરતો
મહનીયે રત્નવેદિકામધ્યે ।
બિંદુમયચક્રમીડે
પીઠાનામુપરિ વિરચિતાવાસમ્ ॥ 125 ॥
ચક્રાણાં સકલાનાં
પ્રથમમધઃ સીમફલકવાસ્તવ્યાઃ ।
અણિમાદિસિદ્ધયો મા-
-મવંતુ દેવી પ્રભાસ્વરૂપિણ્યઃ ॥ 126 ॥
અણિમાદિસિદ્ધિફલક-
-સ્યોપરિહરિણાંકખંડકૃતચૂડાઃ ।
ભદ્રં પક્ષ્મલયંતુ
બ્રાહ્મીપ્રમુખાશ્ચ માતરોઽસ્માકમ્ ॥ 127 ॥
તસ્યોપરિ મણિફલકે
તારુણ્યોત્તુંગપીનકુચભારાઃ ।
સંક્ષોભિણીપ્રધાનાઃ
ભ્રાંતિ વિદ્રાવયંતુ દશ મુદ્રાઃ ॥ 128 ॥
ફલકત્રયસ્વરૂપે
પૃથુલે ત્રૈલોક્યમોહને ચક્રે ।
દીવ્યંતુ પ્રકટાખ્યા-
-સ્તાસાં કર્ત્રીં ચ ભગવતી ત્રિપુરા ॥ 129 ॥
તદુપરિ વિપુલે ધિષ્ણ્યે
તરલદૃશસ્તરુણકોકનદભાસઃ ।
કામાકર્ષિણ્યાદ્યાઃ
કલયે દેવીઃ કલાધરશિખંડાઃ ॥ 130 ॥
સર્વાશાપરિપૂરકચક્રે-
-ઽસ્મિન્ ગુપ્તયોગિનીસેવ્યાઃ ।
ત્રિપુરેશી મમ દુરિતં
તુદ્યાત્ કંઠાવલંબિમણિહારા ॥ 131 ॥
તસ્યોપરિ મણિપીઠે
તામ્રાંભોરુહદલપ્રભાશોણાઃ ।
ધ્યાયામ્યનંગકુસુમા-
-પ્રમુખા દેવીશ્ચ વિધૃતકૂર્પાસાઃ ॥ 132 ॥
સંક્ષોભકારકેઽસ્મિં-
-શ્ચક્રે શ્રીત્રિપુરસુંદરી સાક્ષાત્ ।
ગોપ્ત્રી ગુપ્તતરાખ્યાઃ
ગોપાયતુ માં કૃપાર્દ્રયા દૃષ્ટ્યા ॥ 133 ॥
સંક્ષોભિણીપ્રધાનાઃ
શક્તીસ્તસ્યોર્ધ્વવલયકૃતવાસાઃ ।
આલોલનીલવેણી-
-રંતઃ કલયામિ યૌવનોન્મત્તાઃ ॥ 134 ॥
સૌભાગ્યદાયકેઽસ્મિં-
-શ્ચક્રેશી ત્રિપુરવાસિની જીયાત્ ।
શક્તીશ્ચ સંપ્રદાયાભિધાઃ
સમસ્તાઃ પ્રમોદયંત્વનિશમ્ ॥ 135 ॥
મણિપીઠોપરિ તાસાં
મહતિ ચતુર્હસ્તવિસ્તૃતે વલયે ।
સંતતવિરચિતવાસાઃ
શક્તીઃ કલયામિ સર્વસિદ્ધિમુખાઃ ॥ 136 ॥
સર્વાર્થસાધકાખ્યે
ચક્રેઽમુષ્મિન્ સમસ્તફલદાત્રી ।
ત્રિપુરા શ્રીર્મમ કુશલં
દિશતાદુત્તીર્ણયોગિનીસેવ્યા ॥ 137 ॥
તાસાં નિલયસ્યોપરિ
ધિષ્ણ્યે કૌસુંભકંચુકમનોજ્ઞાઃ ।
સર્વાજ્ઞાદ્યાઃ દેવ્યઃ
સકલાઃ સંપાદયંતુ મમ કીર્તિમ્ ॥ 138 ॥
ચક્રે સમસ્તરક્ષા-
-કરનામ્ન્યસ્મિન્ સમસ્તજનસેવ્યામ્ ।
મનસિ નિગર્ભાસહિતાં
મન્યે શ્રીત્રિપુરમાલિનીં દેવીમ્ ॥ 139 ॥
સર્વજ્ઞાસદનસ્યોપરિ
ચક્રે વિપુલે સમાકલિતગેહાઃ ।
વંદે વશિનીમુખ્યાઃ
શક્તીઃ સિંદૂરરેણુરુચઃ ॥ 140 ॥
શ્રીસર્વરોગહરાખ્ય-
-ચક્રેઽસ્મિંસ્ત્રિપુરપૂર્વિકાં સિદ્ધામ્ ।
વંદે રહસ્યનામ્ના
વેદ્યાભિઃ શક્તિભિઃ સદા સેવ્યામ્ ॥ 141 ॥
વશિનીગૃહોપરિષ્ટા-
-દ્વિંશતિહસ્તોન્નતે મહાપીઠે ।
શમયંતુ શત્રુબૃંદં
શસ્ત્રાણ્યસ્ત્રાણિ ચાદિદંપત્યોઃ ॥ 142 ॥
શસ્ત્રસદનોપરિષ્ટા-
-દ્વલયે વલવૈરિરત્નસંઘટિતે ।
કામેશ્વરીપ્રધાનાઃ
કલયે દેવીઃ સમસ્તજનવંદ્યાઃ ॥ 143 ॥
ચક્રેઽત્ર સર્વસિદ્ધિપ્રદ-
-નામનિ સર્વફલદાત્રી ।
ત્રિપુરાંબાવતુ સતતં
પરાપરરહસ્યયોગિનીસેવ્યા ॥ 144 ॥
કામેશ્વરીગૃહોપરિવલયે
વિવિધમનુસંપ્રદાયજ્ઞાઃ ।
ચત્વારો યુગનાથા
જયંતુ મિત્રેશપૂર્વકાઃ ગુરવઃ ॥ 145 ॥
નાથભવનોપરિષ્ટા-
-ન્નાનારત્નચયમેદુરે પીઠે ।
કામેશ્યાદ્યા નિત્યાઃ
કલયંતુ મુદં તિથિસ્વરૂપિણ્યઃ ॥ 146 ॥
નિત્યાસદનસ્યોપરિ
નિર્મલમણિનિવહવિરચિતે ધિષ્ણ્યે ।
કુશલં ષડંગદેવ્યઃ
કલયંત્વસ્માકમુત્તરલનેત્રાઃ ॥ 147 ॥
સદનસ્યોપરિ તાસાં
સર્વાનંદમયનામકે બિંદૌ ।
પંચબ્રહ્માકારાં
મંચં પ્રણમામિ મણિગણાકીર્ણમ્ ॥ 148 ॥
પરિતો મણિમંચસ્ય
પ્રલંબમાના નિયંત્રિતા પાશૈઃ ।
માયામયી જવનિકા
મમ દુરિતં હરતુ મેચકચ્છાયા ॥ 149 ॥
મંચસ્યોપરિ લંબ-
-ન્મદનીપુન્નાગમાલિકાભરિતમ્ ।
હરિગોપમયવિતાનં
હરતાદાલસ્યમનિશમસ્માકમ્ ॥ 150 ॥
પર્યંકસ્ય ભજામઃ
પાદાન્બિંબાંબુદેંદુહેમરુચઃ ।
અજહરિરુદ્રેશમયા-
-નનલાસુરમારુતેશકોણસ્થાન્ ॥ 151 ॥
ફલકં સદાશિવમયં
પ્રણૌમિ સિંદૂરરેણુકિરણાભમ્ ।
આરભ્યાંગેશીનાં
સદનાત્કલિતં ચ રત્નસોપાનમ્ ॥ 152 ॥
પટ્ટોપધાનગંડક-
-ચતુષ્ટયસ્ફુરિતપાટલાસ્તરણમ્ ।
પર્યંકોપરિ ઘટિતં
પાતુ ચિરં હંસતૂલશયનં નઃ ॥ 153 ॥
તસ્યોપરિ નિવસંતં
તારુણ્યશ્રીનિષેવિતં સતતમ્ ।
આવૃંતપુલ્લહલ્લક-
-મરીચિકાપુંજમંજુલચ્છાયમ્ ॥ 154 ॥
સિંદૂરશોણવસનં
શીતાંશુસ્તબકચુંબિતકિરીટમ્ ।
કુંકુમતિલકમનોહર-
-કુટિલાલિકહસિતકુમુદબંધુશિશુમ્ ॥ 155 ॥
પૂર્ણેંદુબિંબવદનં
ફુલ્લસરોજાતલોચનત્રિતયમ્ ।
તરલાપાંગતરંગિત-
-શફરાંકનશાસ્ત્રસંપ્રદાયાર્થમ્ ॥ 156 ॥
મણિમયકુંડલપુષ્ય-
-ન્મરીચિકલ્લોલમાંસલકપોલમ્ ।
વિદ્રુમસહોદરાધર-
-વિસૃમરસુસ્મિતકિશોરસંચારમ્ ॥ 157 ॥
આમોદિકુસુમશેખર-
-માનીલભ્રૂલતાયુગમનોજ્ઞમ્ ।
વીટીસૌરભવીચી-
-દ્વિગુણિતવક્ત્રારવિંદસૌરભ્યમ્ ॥ 158 ॥
પાશાંકુશેક્ષુચાપ-
-પ્રસવશરસ્ફુરિતકોમલકરાબ્જમ્ ।
કાશ્મીરપંકિલાંગં
કામેશં મનસિ કુર્મહે સતતમ્ ॥ 159 ॥
તસ્યાંકભુવિ નિષણ્ણાં
તરુણકદંબપ્રસૂનકિરણાભામ્ ।
શીતાંશુખંડચૂડાં
સીમંતન્યસ્તસાંદ્રસિંદૂરામ્ ॥ 160 ॥
કુંકુમલલામભાસ્વ-
-ન્નિટિલાં કુટિલતરચિલ્લિકાયુગલામ્ ।
નાલીકતુલ્યનયનાં
નાસાંચલનટિતમૌક્તિકાભરણામ્ ॥ 161 ॥
અંકુરિતમંદહાસ-
-મરુણાધરકાંતિવિજિતબિંબાભામ્ ।
કસ્તૂરીમકરીયુત-
-કપોલસંક્રાંતકનકતાટંકામ્ ॥ 162 ॥
કર્પૂરસાંદ્રવીટી-
-કબલિતવદનારવિંદકમનીયામ્ ।
કંબુસહોદરકંઠ-
-પ્રલંબમાનાચ્છમૌક્તિકકલાપામ્ ॥ 163 ॥
કહ્લારદામકોમલ-
-ભુજયુગલસ્ફુરિતરત્નકેયૂરામ્ ।
કરપદ્મમૂલવિલસ-
-ત્કાંચનમયકટકવલયસંદોહામ્ ॥ 164 ॥
પાણિચતુષ્ટયવિલસ-
-ત્પાશાંકુશપુંડ્રચાપપુષ્પાસ્ત્રામ્ ।
કૂલંકષકુચશિખરાં
કુંકુમકર્દમિતરત્નકૂર્પાસામ્ ॥ 165 ॥
અણુદાયાદવલગ્ના-
-મંબુદશોભાસનાભિરોમલતામ્ ।
માણિક્યખચિતકાંચી-
-મરીચિકાક્રાંતમાંસલનિતંબામ્ ॥ 166 ॥
કરભોરુકાંડયુગલાં
જંઘાજિતકામજૈત્રતૂણીરામ્ ।
પ્રપદપરિભૂતકૂર્માં
પલ્લવસચ્છાયપદયુગમનોજ્ઞામ્ ॥ 167 ॥
કમલભવકંજલોચન-
-કિરીટરત્નાંશુરંજિતપદાબ્જામ્ ।
ઉન્મસ્તકાનુકંપા-
-મુત્તરલાપાંગપોષિતાનંગામ્ ॥ 168 ॥
આદિમરસાવલંબા-
-મનિદં પ્રથમોક્તિવલ્લરીકલિકામ્ ।
આબ્રહ્મકીટજનની-
-મંતઃ કલયામિ સુંદરીમનિશમ્ ॥ 169 ॥
કસ્તુ ક્ષિતૌ પટીયા-
-ન્વસ્તુ સ્તોતું શિવાંકવાસ્તવ્યમ્ ।
અસ્તુ ચિરંતનસુકૃતૈઃ
પ્રસ્તુતકામ્યાય તન્મમ પુરસ્તાત્ ॥ 170 ॥
પ્રભુસમ્મિતોક્તિગમ્યં
પરમશિવોત્સંગતુંગપર્યંકમ્ ।
તેજઃ કિંચન દિવ્યં
પુરતો મે ભવતુ પુંડ્રકોદંડમ્ ॥ 171 ॥
મધુરિમભરિતશરાસં
મકરંદસ્યંદિમાર્ગણોદારમ્ ।
કૈરવિણીવિટચૂડં
કૈવલ્યાયાસ્તુ કિંચન મહો નઃ ॥ 172 ॥
અક્ષુદ્રમિક્ષુચાપં
પરોક્ષમવલગ્નસીમ્નિ ત્ર્યક્ષમ્ ।
ક્ષપયતુ મે ક્ષેમેતર-
-મુક્ષરથપ્રેમપક્ષ્મલં તેજઃ ॥ 173 ॥
ભૃંગરુચિસંગરકરાપાંગં
શૃંગારતુંગમરુણાંગમ્ ।
મંગલમભંગુરં મે
ઘટયતુ ગંગાધરાંગસંગિ મહઃ ॥ 174 ॥
પ્રપદાજિતકૂર્મમૂર્જિત-
-કરુણં ભર્મરુચિનિર્મથનદેહમ્ ।
શ્રિતવર્મ મર્મ શંભોઃ
કિંચન મમ નર્મ શર્મ નિર્માતુ ॥ 175 ॥
કાલકુરલાલિકાલિમ-
-કંદલવિજિતાલિ વિધૃતમણિવાલિ ।
મિલતુ હૃદિ પુલિનજઘનં
બહુલિતગલગરલકેલિ કિમપિ મહઃ ॥ 176 ॥
કુંકુમતિલકિતફાલા
કુરુવિંદચ્છાયપાટલદુકૂલા ।
કરુણાપયોધિવેલા
કાચન ચિત્તે ચકાસ્તુ મે લીલા ॥ 177 ॥
પુષ્પંધયરુચિવેણ્યઃ
પુલિનાભોગત્રપાકરશ્રેણ્યઃ ।
જીયાસુરિક્ષુપાણ્યઃ
કાશ્ચન કામારિકેલિસાક્ષિણ્યઃ ॥ 178 ॥
તપનીયાંશુકભાંસિ
દ્રાક્ષામાધુર્યનાસ્તિકવચાંસિ ।
કતિચન શુચં મહાંસિ
ક્ષપયતુ કપાલિતોષિતમનાંસિ ॥ 179 ॥
અસિતકચમાયતાક્ષં
કુસુમશરં કૂલમુદ્વહકૃપાર્દ્રમ્ ।
આદિમરસાધિદૈવત-
-મંતઃ કલયે હરાંકવાસિ મહઃ ॥ 180 ॥
કર્ણોપાંતતરંગિત-
-કટાક્ષવિસ્પંદિકંઠદઘ્નકૃપામ્ ।
કામેશ્વરાંકનિલયાં
કામપિ વિદ્યાં પુરાતનીં કલયે ॥ 181 ॥
અરવિંદકાંત્યરુંતુદ-
-વિલોચનદ્વંદ્વસુંદરમુખેંદુ ।
છંદઃ કંદલમંદિર-
-મંતઃપુરમૈંદુશેખરં વંદે ॥ 182 ॥
બિંબિનિકુરંબડંબર-
-વિડંબકચ્છાયમંબરવલગ્નમ્ ।
કંબુગલમંબુદકુચં
બિંબોકં કમપિ ચુંબતુ મનો મે ॥ 183 ॥
કમપિ કમનીયરૂપં
કલયામ્યંતઃ કદંબકુસુમાઢ્યમ્ ।
ચંપકરુચિરસુવેષૈઃ
સંપાદિતકાંત્યલંકૃતદિગંતમ્ ॥ 184 ॥
શંપારુચિભર-
-ગર્હાસંપાદકકાંતિકવચિતદિગંતમ્ ।
સિદ્ધાંતં નિગમાનાં
શુદ્ધાંતં કિમપિ શૂલિનઃ કલયે ॥ 185 ॥
ઉદ્યદ્દિનકરશોણા-
-નુત્પલબંધુસ્તનંધયાપીડાન્ ।
કરકલિતપુંડ્રચાપા-
-ન્કલયે કાનપિ કપર્દિનઃ પ્રાણાન્ ॥ 186 ॥
રશનાલસજ્જઘનયા
રસનાજીવાતુચાપભાસુરયા ।
ઘ્રાણાયુષ્કરશરયા
ઘ્રાતં ચિત્તં કયાપિ વાસનયા ॥ 187 ॥
સરસિજસહયુધ્વદૃશા
શંપાલતિકાસનાભિવિગ્રહયા ।
ભાસા કયાપિ ચેતો
નાસામણિશોભિવદનયા ભરિતમ્ ॥ 188 ॥
નવયાવકાભસિચયાન્વિતયા
ગજયાનયા દયાપરયા ।
ધૃતયામિનીશકલયા
ધિયા કયાપિ ક્ષતામયા હિ વયમ્ ॥ 189 ॥
અલમલમકુસુમબાણૈ-
-રબિંબશોણૈરપુંડ્રકોદંડૈઃ ।
અકુમુદબાંધવચૂડૈ-
-રન્યૈરિહ જગતિ દૈવતં મન્યૈઃ ॥ 190 ॥
કુવલયસદૃક્ષનયનૈઃ
કુલગિરિકૂટસ્થબંધુકુચભારૈઃ ।
કરુણાસ્પંદિકટાક્ષૈઃ
કવચિતચિત્તોઽસ્મિ કતિપયૈઃ કુતુકૈઃ ॥ 191 ॥
નતજનસુલભાય નમો
નાલીકસનાભિલોચનાય નમઃ ।
નંદિતગિરિશાય નમો
મહસે નવનીપપાટલાય નમઃ ॥ 192 ॥
કાદંબકુસુમદામ્ને
કાયચ્છાયાકણાયિતાર્યમ્ણે ।
સીમ્ને ચિરંતનગિરાં
ભૂમ્ને કસ્મૈચિદાદદે પ્રણતિમ્ ॥ 193 ॥
કુટિલકબરીભરેભ્યઃ
કુંકુમસબ્રહ્મચારિકિરણેભ્યઃ ।
કૂલંકષસ્તનેભ્યઃ
કુર્મઃ પ્રણતિં કુલાદ્રિકુતુકેભ્યઃ ॥ 194 ॥
કોકનદશોણચરણા-
-ત્કોમલકુરલાલિવિજિતશૈવાલાત્ ।
ઉત્પલસગંધિનયના-
-દુરરીકુર્મો ન દેવતમાન્યામ્ ॥ 195 ॥
આપાટલાધરાણા-
-માનીલસ્નિગ્ધબર્બરકચાનામ્ ।
આમ્નાયજીવનાના-
-માકૂતાનાં હરસ્ય દાસોઽહમ્ ॥ 196 ॥
પુંખિતવિલાસહાસ-
-સ્ફુરિતાસુ પુરાહિતાંકનિલયાસુ ।
મગ્નં મનો મદીયં
કાસ્વપિ કામારિજીવનાડીષુ ॥ 197 ॥
લલિતા પાતુ શિરો મે
લલાટમંબા ચ મધુમતીરૂપા ।
ભ્રૂયુગ્મં ચ ભવાની
પુષ્પશરા પાતુ લોચનદ્વંદ્વમ્ ॥ 198 ॥
પાયાન્નાસાં બાલા
સુભગા દંતાંશ્ચ સુંદરી જિહ્વામ્ ।
અધરોષ્ઠમાદિશક્તિ-
-શ્ચક્રેશી પાતુ મે ચિરં ચિબુકમ્ ॥ 199 ॥
કામેશ્વરી ચ કર્ણૌ
કામાક્ષી પાતુ ગંડયોર્યુગલમ્ ।
શૃંગારનાયિકાવ્યા-
-દ્વદનં સિંહાસનેશ્વરી ચ ગલમ્ ॥ 200 ॥
સ્કંદપ્રસૂશ્ચ પાતુ
સ્કંધૌ બાહૂ ચ પાટલાંગી મે ।
પાણી ચ પદ્મનિલયા
પાયાદનિશં નખાવલીર્વિજયા ॥ 201 ॥
કોદંડિની ચ વક્ષઃ
કુક્ષિં ચાવ્યાત્ કુલાચલતનૂજા ।
કલ્યાણી ચ વલગ્નં
કટિં ચ પાયાત્કલાધરશિખંડા ॥ 202 ॥
ઊરુદ્વયં ચ પાયા-
-દુમા મૃડાની ચ જાનુની રક્ષેત્ ।
જંઘે ચ ષોડશી મે
પાયાત્ પાદૌ ચ પાશસૃણિહસ્તા ॥ 203 ॥
પ્રાતઃ પાતુ પરા માં
મધ્યાહ્ને પાતુ મણિગૃહાધીશા ।
શર્વાણ્યવતુ ચ સાયં
પાયાદ્રાત્રૌ ચ ભૈરવી સાક્ષાત્ ॥ 204 ॥
ભાર્યાં રક્ષતુ ગૌરીં
પાયાત્ પુત્રાંશ્ચ બિંદુગૃહપીઠા ।
શ્રીવિદ્યા ચ યશો મે
શીલં ચાવ્યાચ્ચિરં મહારાજ્ઞી ॥ 205 ॥
પવનમયિ પાવકમયિ
ક્ષોણીમયિ ગગનમયિ કૃપીટમયિ ।
રવિમયિ શશિમયિ દિઙ્મયિ
સમયમયિ પ્રાણમયિ શિવે પાહિ ॥ 206 ॥
કાલિ કપાલિનિ શૂલિનિ
ભૈરવિ માતંગિ પંચમિ ત્રિપુરે ।
વાગ્દેવિ વિંધ્યવાસિનિ
બાલે ભુવનેશિ પાલય ચિરં મામ્ ॥ 207 ॥
અભિનવસિંદૂરાભા-
-મંબ ત્વાં ચિંતયંતિ યે હૃદયે ।
ઉપરિ નિપતંતિ તેષા-
-મુત્પલનયનાકટાક્ષકલ્લોલાઃ ॥ 208 ॥
વર્ગાષ્ટકમિલિતાભિ-
-ર્વશિનીમુખ્યાભિરાવૃતાં ભવતીમ્ ।
ચિંતયતાં સિતવર્ણાં
વાચો નિર્યાંત્યયત્નતો વદનાત્ ॥ 209 ॥
કનકશલાકાગૌરીં
કર્ણવ્યાલોલકુંડલદ્વિતયામ્ ।
પ્રહસિતમુખીં ચ ભવતીં
ધ્યાયંતો યે ત એવ ભૂધનદાઃ ॥ 210 ॥
શીર્ષાંભોરુહમધ્યે
શીતલપીયૂષવર્ષિણીં ભવતીમ્ ।
અનુદિનમનુચિંતયતા-
-માયુષ્યં ભવતિ પુષ્કલમવન્યામ્ ॥ 211 ॥
મધુરસ્મિતાં મદારુણનયનાં
માતંગકુંભવક્ષોજામ્ ।
ચંદ્રવતંસિનીં ત્વાં
સવિધે પશ્યંતિ સુકૃતિનઃ કેચિત્ ॥ 212 ॥
લલિતાયાઃ સ્તવરત્નં
લલિતપદાભિઃ પ્રણીતમાર્યાભિઃ ।
પ્રતિદિનમવનૌ પઠતાં
ફલાનિ વક્તું પ્રગલ્ભતે સૈવ ॥ 213 ॥
સદસદનુગ્રહનિગ્રહ-
-ગૃહીતમુનિવિગ્રહો ભગવાન્ ।
સર્વાસામુપનિષદાં
દુર્વાસા જયતિ દેશિકઃ પ્રથમઃ ॥ 214 ॥
ઇતિ મહર્ષિદુર્વાસઃ વિરચિતં શ્રીલલિતાસ્તવરત્નમ્ ।
