શ્રીનંદિકેશ્વર ઉવાચ
ભદ્રકાળીમહં વંદે વીરભદ્રસતીં શિવામ્ ।
સુતામ્રાર્ચિતપાદાબ્જં સુખસૌભાગ્યદાયિનીમ્ ॥ 1 ॥
અથ સ્તોત્રમ્
ભદ્રકાળી કામરૂપા મહાવિદ્યા યશસ્વિની ।
મહાશ્રયા મહાભાગા દક્ષયાગવિભેદિની ॥ 2 ॥
રુદ્રકોપસમુદ્ભૂતા ભદ્રા મુદ્રા શિવંકરી ।
ચંદ્રિકા ચંદ્રવદના રોષતામ્રાક્ષશોભિની ॥ 3 ॥
ઇંદ્રાદિદમની શાંતા ચંદ્રલેખાવિભૂષિતા ।
ભક્તાર્તિહારિણી મુક્તા ચંડિકાનંદદાયિની ॥ 4 ॥
સૌદામિની સુધામૂર્તિઃ દિવ્યાલંકારભૂષિતા ।
સુવાસિની સુનાસા ચ ત્રિકાલજ્ઞા ધુરંધરા ॥ 5 ॥
સર્વજ્ઞા સર્વલોકેશી દેવયોનિરયોનિજા ।
નિર્ગુણા નિરહંકારા લોકકળ્યાણકારિણી ॥ 6 ॥
સર્વલોકપ્રિયા ગૌરી સર્વગર્વવિમર્દિની ।
તેજોવતી મહામાતા કોટિસૂર્યસમપ્રભા ॥ 7 ॥
વીરભદ્રકૃતાનંદભોગિની વીરસેવિતા ।
નારદાદિમુનિસ્તુત્યા નિત્યા સત્યા તપસ્વિની ॥ 8 ॥
જ્ઞાનરૂપા કળાતીતા ભક્તાભીષ્ટફલપ્રદા ।
કૈલાસનિલયા શુભ્રા ક્ષમા શ્રીઃ સર્વમંગળા ॥ 9 ॥
સિદ્ધવિદ્યા મહાશક્તિઃ કામિની પદ્મલોચના ।
દેવપ્રિયા દૈત્યહંત્રી દક્ષગર્વાપહારિણી ॥ 10 ॥
શિવશાસનકર્ત્રી ચ શૈવાનંદવિધાયિની ।
ભવપાશનિહંત્રી ચ સવનાંગસુકારિણી ॥ 11 ॥
લંબોદરી મહાકાળી ભીષણાસ્યા સુરેશ્વરી ।
મહાનિદ્રા યોગનિદ્રા પ્રજ્ઞા વાર્તા ક્રિયાવતી ॥ 12 ॥
પુત્રપૌત્રપ્રદા સાધ્વી સેનાયુદ્ધસુકાંક્ષિણી ।
ઇચ્છા શંભોઃ કૃપાસિંધુઃ ચંડી ચંડપરાક્રમા ॥ 13 ॥
શોભા ભગવતી માયા દુર્ગા નીલા મનોગતિઃ ।
ખેચરી ખડ્ગિની ચક્રહસ્તા શૂલવિધારિણી ॥ 14 ॥
સુબાણા શક્તિહસ્તા ચ પાદસંચારિણી પરા ।
તપઃસિદ્ધિપ્રદા દેવી વીરભદ્રસહાયિની ॥ 15 ॥
ધનધાન્યકરી વિશ્વા મનોમાલિન્યહારિણી ।
સુનક્ષત્રોદ્ભવકરી વંશવૃદ્ધિપ્રદાયિની ॥ 16 ॥
બ્રહ્માદિસુરસંસેવ્યા શાંકરી પ્રિયભાષિણી ।
ભૂતપ્રેતપિશાચાદિહારિણી સુમનસ્વિની ॥ 17 ॥
પુણ્યક્ષેત્રકૃતાવાસા પ્રત્યક્ષપરમેશ્વરી ।
એવં નામ્નાં ભદ્રકાળ્યાઃ શતમષ્ટોત્તરં વિદુઃ ॥ 18 ॥
પુણ્યં યશો દીર્ઘમાયુઃ પુત્રપૌત્રં ધનં બહુ ।
દદાતિ દેવી તસ્યાશુ યઃ પઠેત્ સ્તોત્રમુત્તમમ્ ॥ 19 ॥
ભૌમવારે ભૃગૌ ચૈવ પૌર્ણમાસ્યાં વિશેષતઃ ।
પ્રાતઃ સ્નાત્વા નિત્યકર્મ વિધાય ચ સુભક્તિમાન્ ॥ 20 ॥
વીરભદ્રાલયે ભદ્રાં સંપૂજ્ય સુરસેવિતામ્ ।
પઠેત્ સ્તોત્રમિદં દિવ્યં નાના ભોગપ્રદં શુભમ્ ॥ 21 ॥
અભીષ્ટસિદ્ધિં પ્રાપ્નોતિ શીઘ્રં વિદ્વાન્ પરંતપ ।
અથવા સ્વગૃહે વીરભદ્રપત્નીં સમર્ચયેત્ ॥ 22 ॥
સ્તોત્રેણાનેન વિધિવત્ સર્વાન્ કામાનવાપ્નુયાત્ ।
રોગા નશ્યંતિ તસ્યાશુ યોગસિદ્ધિં ચ વિંદતિ ॥ 23 ॥
સનત્કુમારભક્તાનામિદં સ્તોત્રં પ્રબોધય ।
રહસ્યં સારભૂતં ચ સર્વજ્ઞઃ સંભવિષ્યસિ ॥ 24 ॥
ઇતિ શ્રીભદ્રકાળ્યષ્ટોત્તરશતનામ સ્તોત્રમ્ ।
