අථ චතුර්ථස්තෝත්රම්
නිජපූර්ණසුඛාමිතබෝධතනුඃ පරශක්තිරනංතගුණඃ පරමඃ ।
අජරාමරණඃ සකලාර්තිහරඃ කමලාපතිරීඩ්යතමෝऽවතු නඃ ॥ 1॥
යදසුප්තිගතෝऽපි හරිඃ සුඛවාන් සුඛරූපිණමාහුරතෝ නිගමාඃ ।
ස්වමතිප්රභවං ජගදස්ය යතඃ පරබෝධතනුං ච තතඃ ඛපතිම් ॥ 2॥ (සුමතිප්රභවම්)
බහුචිත්රජගත් බහුධාකරණාත්පරශක්තිරනංතගුණඃ පරමඃ ।
සුඛරූපමමුෂ්යපදං පරමං ස්මරතස්තු භවිෂ්යති තත්සතතම් ॥ 3॥
ස්මරණේ හි පරේශිතුරස්ය විභෝර්මලිනානි මනාංසි කුතඃ කරණම් ।
විමලං හි පදං පරමං ස්වරතං තරුණාර්කසවර්ණමජස්ය හරේඃ ॥ 4॥
විමලෛඃ ශ්රුතිශාණනිශාතතමෛඃ සුමනෝऽසිභිරාශු නිහත්ය දෘඪම් ।
බලිනං නිජවෛරිණමාත්මතමෝභිදමීශමනංතමුපාස්ව හරිම් ॥ 5॥
න හි විශ්වසෘජෝ විභුශංභුපුරංදර සූර්යමුඛානපරානපරාන් ।
සෘජතීඩ්යතමෝऽවති හංති නිජං පදමාපයති ප්රණතාං ස්වධියා ॥ 6॥
පරමෝऽපි රමේශිතුරස්ය සමෝ න හි කශ්චිදභූන්න භවිෂ්යති ච ।
ක්වචිදද්යතනෝऽපි න පූර්ණසදාගණිතේඩ්යගුණානුභවෛකතනෝඃ ॥ 7॥
ඉති දේවවරස්ය හරේඃ ස්තවනං කෘතවාන් මුනිරුත්තමමාදරතඃ ।
සුඛතීර්ථපදාභිහිතඃ පඨතස්තදිදං භවති ධ්රුවමුච්චසුඛම් ॥ 8॥
ඉති ශ්රීමදානංදතීර්ථභගවත්පාදාචාර්ය විරචිතං
ද්වාදශස්තෝත්රේෂු චතුර්ථස්තෝත්රං සංපූර්ණම්
