මංගළශ්ලෝකාඃ
මංගළං භගවාන්විෂ්ණුර්මංගළං මධුසූදනඃ ।
මංගළං පුංඩරීකාක්ෂෝ මංගළං ගරුඩධ්වජඃ ॥ 1

මංගළං කෝසලේංද්රාය මහනීයගුණාබ්ධයේ ।
චක්රවර්තිතනූජාය සාර්වභෞමාය මංගළම් ॥ 2

වේදවේදාංතවේද්යාය මේඝශ්යාමලමූර්තයේ ।
පුංසාං මෝහනරූපාය පුණ්යශ්ලෝකාය මංගළම් ॥ 3

විශ්වාමිත්රාංතරංගාය මිථිලානගරීපතේඃ ।
භාග්යානාං පරිපාකාය භව්යරූපාය මංගළම් ॥ 4

පිතෘභක්තාය සතතං භ්රාතෘභිඃ සහ සීතයා ।
නංදිතාඛිලලෝකාය රාමචංද්රාය මංගළම් ॥ 5

ත්යක්තසාකේතවාසාය චිත්රකූටවිහාරිණේ ।
සේව්යාය සර්වයමිනාං ධීරෝදාත්තාය මංගළම් ॥ 6

සෞමිත්රිණා ච ජානක්යා චාපබාණාසිධාරිණා ।
සංසේව්යාය සදා භක්ත්යා සානුජායාස්තු මංගළම් ॥ 7

දංඩකාරණ්යවාසාය ඛංඩිතාමරශත්රවේ ।
ගෘධ්රරාජාය භක්තාය මුක්තිදායාස්තු මංගළම් ॥ 8

සාදරං ශබරීදත්තඵලමූලාභිලාෂිණේ ।
සෞලභ්යපරිපූර්ණාය සත්ත්වෝද්යුක්තාය මංගළම් ॥ 9

හනූමත්සමවේතාය හරීශාභීෂ්ටදායිනේ ।
වාලිප්රමථනායාස්තු මහාධීරාය මංගළම් ॥ 10

ශ්රීමතේ රඝුවීරාය සේතුලංඝිතසිංධවේ ।
ජිතරාක්ෂසරාජාය රණධීරාය මංගළම් ॥ 11

ආසාද්ය නගරීං දිව්යාමභිෂික්තාය සීතයා ।
රාජාධිරාජරාජාය රාමභද්රාය මංගළම් ॥ 12

විභීෂණකෘතේ ප්රීත්යා විශ්වාභීෂ්ටප්රදායිනේ ।
ජානකීප්රාණනාථාය සදා රාමාය මංගළම් ॥ 13

—-

ශ්රීරාමං ත්රිජගද්ගුරුං සුරවරං සීතාමනෝනායකං
ශ්යාමාංගං ශශිකෝටිපූර්ණවදනං චංචත්කලාකෞස්තුභම් ।
සෞම්යං සත්යගුණෝත්තමං සුසරයූතීරේ වසංතං ප්රභුං
ත්රාතාරං සකලාර්ථසිද්ධිසහිතං වංදේ රඝූණාං පතිම් ॥ 14

ශ්රීරාඝවං දශරථාත්මජමප්රමේයං
සීතාපතිං රඝුවරාන්වයරත්නදීපම් ।
ආජානුබාහුමරවිංදදළායතාක්ෂං
රාමං නිශාචරවිනාශකරං නමාමි ॥ 15

ශ්රීරාමචංද්ර කරුණාකර රාඝවේංද්ර
රාජේංද්රචංද්ර රඝුවංශසමුද්රචංද්ර ।
සුග්රීවනේත්රයුගළෝත්පල-පූර්ණචංද්ර
සීතාමනඃකුමුදචංද්ර නමෝ නමස්තේ ॥ 16

සීතාමනෝමානසරාජහංස
සංසාරසංතාපහර ක්ෂමාවන් ।
ශ්රීරාම දෛත්යාංතක ශාංතරූප
ශ්රීතාරකබ්රහ්ම නමෝ නමස්තේ ॥ 17

විෂ්ණෝ රාඝව වාසුදේව නෘහරේ දේවෞඝචූඩාමණේ ।
සංසාරාර්ණවකර්ණධාරක හරේ කෘෂ්ණාය තුභ්යං නමඃ ॥ 18

සුග්රීවාදිසමස්තවානරවරෛස්සංසේව්යමානං සදා ।
විශ්වාමිත්රපරාශරාදිමුනිභිස්සංස්තූයමානං භජේ ॥ 19

රාමං චංදනශීතලං ක්ෂිතිසුතාමෝහාකරං ශ්රීකරං
වෛදේහීනයනාරවිංදමිහිරං සංපූර්ණචංද්රානනම් ।
රාජානං කරුණාසමේතනයනං සීතාමනෝනංදනං
සීතාදර්පණචාරුගංඩලලිතං වංදේ සදා රාඝවම් ॥ 20

ජානාති රාම තව නාමරුචිං මහේශෝ
ජානාති ගෞතමසතී චරණප්රභාවම් ।
ජානාති දෝර්බලපරාක්රමමීශචාපෝ
ජානාත්යමෝඝපටුබාණගතිං පයෝධිඃ ॥ 21

මාතා රාමෝ මත්පිතා රාමචංද්රෝ
භ්රාතා රාමෝ මත්සඛා රාඝවේශඃ ।
සර්වස්වං මේ රාමචංද්රෝ දායාළු-
ර්නාන්යං දෛවං නෛව ජානේ න ජානේ ॥ 22

විමලකමලනේත්රං විස්ඵුරන්නීලගාත්රං
තපනකුලපවිත්රං දානවධ්වංතමිත්රම් ।
භුවනශුභචරිත්රං භූමිපුත්රීකළත්රං
දශරථවරපුත්රං නෞමි රාමාඛ්යමිත්රම් ॥ 23

මාර්ගේ මාර්ගේ ශාඛිනාං රත්නවේදී
වේද්යාං වේද්යාං කින්නරීබෘංදගීතම් ।
ගීතේ ගීතේ මංජුලාලාපගෝෂ්ඨී
ගෝෂ්ඨ්යාං ගෝෂ්ඨ්යාං ත්වත්කථා රාමචංද්ර ॥ 24

වෘක්ෂේ වෘක්ෂේ වීක්ෂිතාඃ පක්ෂිසංඝාඃ
සංඝේ සංඝේ මංජුලාමෝදවාක්යම් ।
වාක්යේ වාක්යේ මංජුලාලාපගෝෂ්ඨී
ගෝෂ්ඨ්යාං ගෝෂ්ඨ්යාං ත්වත්කථා රාමචංද්ර ॥ 25

දුරිතතිමිරචංද්රෝ දුෂ්ටකංජාතචංද්රඃ
සුරකුවලයචංද්රස්සූර්යවංශාබ්ධිචංද්රඃ ।
ස්වජනනිවහචංද්රශ්ශත්රුරාජීවචංද්රඃ
ප්රණතකුමුදචංද්රඃ පාතු මාං රාමචංද්රඃ ॥ 26

කළ්යාණදං කෞශිකයජ්ඤපාලං
කළානිධිං කාංචනශෛලධීරම් ।
කංජාතනේත්රං කරුණාසමුද්රං
කාකුත්ස්ථරාමං කලයාමි චිත්තේ ॥ 27

රාජීවායතලෝචනං රඝුවරං නීලෝත්පලශ්යාමලං
මංදාරාංචිතමංඩපේ සුලලිතේ සෞවර්ණකේ පුෂ්පකේ ।
ආස්ථානේ නවරත්නරාජිඛචිතේ සිංහාසනේ සංස්ථිතං
සීතාලක්ෂ්මණලෝකපාලසහිතං වංදේ මුනීංද්රාස්පදම් ॥ 28

ධ්යායේ රාමං සුධාංශුං නතසකලභවාරණ්යතාපප්රහාරම් ।
ශ්යාමං ශාංතං සුරේංද්රං සුරමුනිවිනුතං කෝටිසූර්යප්රකාශම් ।
සීතාසෞමිත්රිසේව්යං සුරනරසුගමං දිව්යසිංහාසනස්ථම් ।
සායාහ්නේ රාමචංද්රං ස්මිතරුචිරමුඛං සර්වදා මේ ප්රසන්නම් ॥ 29

ඉංද්රනීලමණිසන්නිභදේහං
වංදනීයමසකෘන්මුනිබෘංදෛඃ ।
ලංබමානතුලසීවනමාලං
චිංතයාමි සතතං රඝුවීරම් ॥ 30

සංපූර්ණචංද්රවදනං සරසීරුහාක්ෂං
මාණික්යකුංඩලධරං මුකුටාභිරාමම් ।
චාංපේයගෞරවසනං ශරචාපහස්තං
ශ්රීරාමචංද්රමනිශං මනසා ස්මරාමි ॥ 31

මාතුඃ පාර්ශ්වේ චරංතං මණිමයශයනේ මංජුභූෂාංචිතාංගම් ।
මංදං මංදං පිබංතං මුකුළිතනයනං ස්තන්යමන්යස්තනාග්රම් ।
අංගුළ්යාග්රෛඃ ස්පෘශංතං සුඛපරවශයා සස්මිතාලිංගිතාංගම් ।
ගාඪං ගාඪං ජනන්යා කලයතු හෘදයං මාමකං රාමබාලම් ॥ 32

රාමාභිරාමං නයනාභිරාමං
වාචාභිරාමං වදනාභිරාමම් ।
සර්වාභිරාමං ච සදාභිරාමං
වංදේ සදා දාශරථිං ච රාමම් ॥ 33

රාශබ්දෝච්චාරමාත්රේණ මුඛාන්නිර්යාති පාතකාඃ ।
පුනඃ ප්රවේශභීත්යා ච මකාරස්තු කවාටවත් ॥ 34

අනර්ඝමාණික්යවිරාජමාන-
ශ්රීපාදුකාලංකෘතශෝභනාභ්යාම් ।
අශේෂබෘංදාරකවංදිතාභ්යාං
නමෝ නමෝ රාමපදාංබුජාභ්යාම් ॥ 35

චලත්කනකකුංඩලෝල්ලසිතදිව්යගංඩස්ථලං
චරාචරජගන්මයං චරණපද්මගංගාශ්රයම් ।
චතුර්විධඵලප්රදං චරමපීඨමධ්යස්ථිතං
චිදංශමඛිලාස්පදං දශරථාත්මජං චිංතයේ ॥ 36

සනංදනමුනිප්රියං සකලවර්ණවේදාත්මකං
සමස්තනිගමාගමස්ඵුරිතතත්ත්වසිංහාසනම් ।
සහස්රනයනාබ්ජජාද්යමරබෘංදසංසේවිතං
සමෂ්ටිපුරවල්ලභං දශරථාත්මජං චිංතයේ ॥ 37

ජාග්රත්ස්වප්නසුෂුප්ති-කාලවිලසත්තත්ත්වාත්මචින්මාත්රකං
චෛතන්යාත්මකමාධිපාපරහිතං භූම්යාදිතන්මාත්රකම් ।
ශාංභව්යාදිසමස්තයෝගකුලකං සාංඛ්යාදිතත්ත්වාත්පරං
ශබ්දාවාච්යමහං නමාමි සතතං ව්යුත්පත්තිනාශාත්පරම් ॥ 38

ඉක්ෂ්වාකුවංශාර්ණවජාතරත්නං
සීතාංගනායෞවනභාග්යරත්නම් ।
වෛකුංඨරත්නං මම භාග්යරත්නං
ශ්රීරාමරත්නං ශිරසා නමාමි ॥ 39

ඉක්ෂ්වාකුනංදනං සුග්රීවපූජිතං
ත්රෛලෝක්යරක්ෂකං සත්යසංධං සදා ।
රාඝවං රඝුපතිං රාජීවලෝචනං
රාමචංද්රං භජේ රාඝවේශං භජේ ॥ 40

භක්තප්රියං භක්තසමාධිගම්යං
චිංතාහරං චිංතිතකාමධේනුම් ।
සූර්යේංදුකෝටිද්යුතිභාස්වරං තං
රාමං භජේ රාඝවරාමචංද්රම් ॥ 41

ශ්රීරාමං ජනකක්ෂිතීශ්වරසුතාවක්ත්රාංබුජාහාරිණං
ශ්රීමද්භානුකුලාබ්ධිකෞස්තුභමණිං ශ්රීරත්නවක්ෂස්ස්ථලම් ।
ශ්රීකංඨාද්යමරෞඝරත්නමකුටාලංකාරපාදාංබුජං
ශ්රීවත්සෝජ්ජ්වලමිංද්රනීලසදෘශං ශ්රීරාමචංද්රං භජේ ॥ 42

රාමචංද්ර චරිතාකථාමෘතං
ලක්ෂ්මණාග්රජගුණානුකීර්තනම් ।
රාඝවේශ තව පාදසේවනං
සංභවංතු මම ජන්මජන්මනි ॥ 43

අජ්ඤානසංභව-භවාංබුධිබාඩබාග්නි-
රව්යක්තතත්ත්වනිකරප්රණවාධිරූඪඃ ।
සීතාසමේතමනුජේන හෘදංතරාළේ
ප්රාණප්රයාණසමයේ මම සන්නිධත්තේ ॥ 44

රාමෝ මත්කුලදෛවතං සකරුණං රාමං භජේ සාදරං
රාමේණාඛිලඝෝරපාපනිහතී රාමාය තස්මෛ නමඃ ।
රාමාන්නාස්ති ජගත්රයෛකසුලභෝ රාමස්ය දාසෝऽස්ම්යහං
රාමේ ප්රීතිරතීව මේ කුලගුරෝ ශ්රීරාම රක්ෂස්ව මාම් ॥ 45

වෛදේහීසහිතං සුරද්රුමතලේ හෛමේ මහාමංටපේ ।
මධ්යේපුෂ්පකමාසනේ මණිමයේ වීරාසනේ සංස්ථිතම් ।
අග්රේ වාචයති ප්රභංජනසුතේ තත්ත්වං මුනිභ්යඃ පරම් ।
ව්යාඛ්යාංතං භරතාදිභිඃ පරිවෘතං රාමං භජේ ශ්යාමලම් ॥ 46

වාමේ භූමිසුතා පුරස්තු හනුමාන්පශ්චාත්සුමිත්රාසුත-
ශ්ශත්රුඝ්නෝ භරතශ්ච පාර්ශ්වදළයෝර්වාය්වාදිකෝණේෂ්වපි ।
සුග්රීවශ්ච විභීෂණශ්ච යුවරාට් තාරාසුතෝ ජාංබවාන්
මධ්යේ නීලසරෝජකෝමලරුචිං රාමං භජේ ශ්යාමලම් ॥ 47

කේයූරාංගදකංකණෛර්මණිගණෛර්වෛරෝචමානං සදා
රාකාපර්වණිචංද්රකෝටිසදෘශං ඡත්රේණ වෛරාජිතම් ।
හේමස්තංභසහස්රෂෝඩශයුතේ මධ්යේ මහාමංඩපේ
දේවේශං භරතාදිභිඃ පරිවෘතං රාමං භජේ ශ්යාමලම් ॥ 48

සාකේතේ ශරදිංදුකුංදධවළේ සෞඝේ මහාමංටපේ ।
පර්යස්තාගරුධූපධූමපටලේ කර්පූරදීපෝජ්ජ්වලේ ।
සුග්රීවාංගදවායුපුත්රසහිතං සෞමිත්රිණා සේවිතං
ලීලාමානුෂවිග්රහං රඝුපතිං රාමං භජේ ශ්යාමලම් ॥ 49

ශාංතං ශාරදචංද්රකෝටිසදෘශං චංද්රාභිරාමානනං
චංද්රාර්කාග්නිවිකාසිකුංඩලධරං චංද්රාවතංසස්තුතම් ।
වීණාපුස්තකසාක්ෂසූත්රවිලසද්ව්යාඛ්යානමුද්රාකරං
දේවේශං භරතාදිභිඃ පරිවෘතං රාමං භජේ ශ්යාමලම් ॥ 50

රාමං රාක්ෂසමර්දනං රඝුපතිං ශක්රාරිවිධ්වංසිනං
සුග්රීවේප්සිතරාජ්යදං සුරපතේඃ පුත්රාංතකං ශාර්‍ංගිණම් ।
භක්තානාමභයප්රදං භයහරං පාපෞඝවිධ්වංසිනං
සීතාසේවිතපාදපද්මයුගළං රාමං භජේ ශ්යාමලම් ॥ 51

කංදර්පායුතකෝටිකෝටිතුලිතං කාලාංබුදශ්යාමලං
කංබුග්රීවමුදාරකෞස්තුභධරං කර්ණාවතංසෝත්පලම් ।
කස්තූරීතිලකෝජ්ජ්වලං ස්මිතමුඛං චින්මුද්රයාලංකෘතං
සීතාලක්ෂ්මණවායුපුත්රසහිතං සිංහාසනස්ථං භජේ ॥ 52

සාකේතේ නවරත්නපංක්තිඛචිතේ චිත්රධ්වජාලංකෘතේ
වාසේ ස්වර්ණමයේ දළාෂ්ටලලිතේ පද්මේ විමානෝත්තමේ ।
ආසීනං භරතාදිසෝදරජනෛඃ ශාඛාමෘගෛඃ කින්නරෛඃ
දික්පාලෛර්මුනිපුංගවෛර්නෘපගණෛස්සංසේව්යමානං භජේ ॥ 53

කස්තූරීඝනසාරකුංකුමලසච්ඡ්රීචංදනාලංකෘතං
කංදර්පාධිකසුංදරං ඝනනිභං කාකුත්ස්ථවංශධ්වජම් ।
කළ්යාණාංභරවේෂ්ටිතං කමලයා යුක්තං කලාවල්ලභං
කළ්යාණාචලකාර්මුකප්රියසඛං කළ්යාණරාමං භජේ ॥ 54

මුක්තේර්මූලං මුනිවරහෘදානංදකංදං මුකුංදං
කූටස්ථාඛ්යං සකලවරදං සර්වචෛතන්යරූපම් ।
නාදාතීතං කමලනිලයං නාදනාදාංතතත්ත්වං
නාදාතීතං ප්රකෘතිරහිතං රාමචංද්රං භජේऽහම් ॥ 55

තාරාකාරං නිඛිලනිලයං තත්ත්වමස්යාදිලක්ෂ්යං
ශබ්දාවාච්යං ත්රිගුණරහිතං ව්යෝමමංගුෂ්ඨමාත්රම් ।
නිර්වාණාඛ්යං සගුණමගුණව්යෝමරංධ්රාංතරස්ථං
සෞෂුම්නාංතඃ ප්රණවසහිතං රාමචංද්රං භජේऽහම් ॥ 56

නිජානංදාකාරං නිගමතුරගාරාධිතපදං
පරබ්රහ්මානංදං පරමපදගං පාපහරණම් ।
කෘපාපාරාවාරං පරමපුරුෂං පද්මනිලයං
භජේ රාමං ශ්යාමං ප්රකෘතිරහිතං නිර්ගුණමහම් ॥ 57

සාකේතේ නගරේ සමස්තමහිමාධාරේ ජගන්මෝහනේ
රත්නස්තංභසහස්රමංටපමහාසිංහාසනේ සාංබුජේ ।
විශ්වාමිත්රවසිෂ්ඨගෞතමශුකව්යාසාදිභිර්මෞනිභිඃ
ධ්යේයං ලක්ෂ්මණලෝකපාලසහිතං සීතාසමේතං භජේ ॥ 58

රාමං ශ්යාමාභිරාමං රවිශශිනයනං කෝටිසූර්යප්රකාශං
දිව්යං දිව්යාස්ත්රපාණිං ශරමුඛශරධිං චාරුකෝඩංඩහස්තම් ।
කාලං කාලාග්නිරුද්රං රිපුකුලදහනං විඝ්නවිච්ඡේදදක්ෂං
භීමං භීමාට්ටහාසං සකලභයහරං රාමචංද්රං භජේऽහම් ॥ 59

ශ්රීරාමං භුවනෛකසුංදරතනුං ධාරාධරශ්යාමලං
රාජීවායතලෝචනං රඝුවරං රාකේංදුබිංබානනම් ।
කෝදංඩාදිනිජායුධාශ්රිතභුජෛර්භ්රාංතං විදේහාත්මජා-
ධීශං භක්තජනාවනං රඝුවරං ශ්රීරාමචංද්රං භජේ ॥ 60

ශ්රීවත්සාංකමුදාරකෞස්තුභලසත්පීතාංබරාලංකෘතං
නානාරත්නවිරාජමානමකුටං නීලාංබුදශ්යාමලම් ।
කස්තූරීඝනසාරචර්චිතතනුං මංදාරමාලාධරං
කංදර්පායුතසුංදරං රඝුපතිං සීතාසමේතං භජේ ॥ 61

සදානංදදේවේ සහස්රාරපද්මේ
ගලච්චංද්රපීයූෂධාරාමෘතාංතේ ।
ස්ථිතං රාමමූර්තිං නිෂේවේ නිෂේවේ-
ऽන්යදෛවං න සේවේ න සේවේ න සේවේ ॥ 62

සුධාභාසිතද්වීපමධ්යේ විමානේ
සුපර්වාළිවෘක්ෂෝජ්ජ්වලේ ශේෂතල්පේ ।
නිෂණ්ණං රමාංකං නිෂේවේ නිෂේවේ-
ऽන්යදෛවං න සේවේ න සේවේ න සේවේ ॥ 63

චිදංශං සමානංදමානංදකංදං
සුෂුම්නාඛ්යරංධ්රාංතරාළේ ච හංසම් ।
සචක්රං සශංඛං සපීතාංබරාංකං
පරංචාන්යදෛවං න ජානේ න ජානේ ॥ 64

චතුර්වේදකූටෝල්ලසත්කාරණාඛ්යං
ස්ඵුරද්දිව්යවෛමානිකේ භෝගිතල්පේ ।
පරංධාමමූර්තිං නිෂණ්ණං නිෂේවේ
නිෂේවේऽන්යදෛවං න සේවේ න සේවේ ॥ 65

සිංහාසනස්ථං සුරසේවිතව්යං
රත්නාංකිතාලංකෘතපාදපද්මම් ।
සීතාසමේතං ශශිසූර්යනේත්රං
රාමං භජේ රාඝව රාමචංද්රම් ॥ 66

රාමං පුරාණපුරුෂං රමණීයවේෂං
රාජාධිරාජමකුටාර්චිතපාදපීඨම් ।
සීතාපතිං සුනයනං ජගදේකවීරං
ශ්රීරාමචංද්රමනිශං කලයාමි චිත්තේ ॥ 67

පරානංදවස්තුස්වරූපාදිසාක්ෂිං
පරබ්රහ්මගම්යං පරංජ්යෝතිමූර්තිම් ।
පරාශක්තිමිත්රාऽප්රියාරාධිතාංඝ්රිං
පරංධාමරූපං භජේ රාමචංද්රම් ॥ 68

මංදස්මිතං කුංඩලගංඩභාගං
පීතාංබරං භූෂණභූෂිතාංගම් ।
නීලෝත්පලාංගං භුවනෛකමිත්රං
රාමං භජේ රාඝව රාමචංද්රම් ॥ 69

අචිංත්යමව්යක්තමනංතරූප-
මද්වෛතමානංදමනාදිගම්යම් ।
පුණ්යස්වරූපං පුරුෂෝත්තමාඛ්යං
රාමං භජේ රාඝව රාමචංද්රම් ॥ 70

පද්මාසනස්ථං සුරසේවිතව්යං
පද්මාලයානංදකටාක්ෂවීක්ෂ්යම් ।
ගංධර්වවිද්යාධරගීයමානං
රාමං භජේ රාඝව රාමචංද්රම් ॥ 71

අනංතකීර්තිං වරදං ප්රසන්නං
පද්මාසනං සේවකපාරිජාතම් ।
රාජාධිරාජං රඝුවීරකේතුං
රාමං භජේ රාඝව රාමචංද්රම් ॥ 72

සුග්රීවමිත්රං සුජනානුරූපං
ලංකාහරං රාක්ෂසවංශනාශම් ।
වේදාශ්රයාංගං විපුලායතාක්ෂං
රාමං භජේ රාඝව රාමචංද්රම් ॥ 73

සකෘත්ප්රණතරක්ෂායාං සාක්ෂී යස්ය විභීෂණඃ ।
සාපරාධප්රතීකාරඃ ස ශ්රීරාමෝ ගතිර්මම ॥ 74

ඵලමූලාශිනෞ දාංතෞ තාපසෞ ධර්මචාරිණෞ ।
රක්ෂඃකුලවිහංතාරෞ භ්රාතරෞ රාමලක්ෂ්මණෞ ॥ 75

තරුණෞ රූපසංපන්නෞ සුකුමාරෞ මහාබලෞ ।
පුංඩරීක විශාලාක්ෂෞ චීරකෘෂ්ණාජිනාංබරෞ ॥ 76

කෞසල්යානයනේංදුං දශරථමුඛාරවිංදමාර්තාංඩම් ।
සීතාමානසහංසං රාමං රාජීවලෝචනං වංදේ ॥ 77

භර්ජනං භවබීජානාං මාර්ජනං සුඛසංපදාම් ।
තර්ජනං යමදූතානාං රාමරාමේති කීර්තනම් ॥ 78

න ජානේ ජානකී ජානේ රාම ත්වන්නාමවෛභවම් ।
සර්වේශෝ භගවාන් ශංභුර්වාල්මීකිර්වේත්ති වා නවා ॥ 79

කරතලධෘතචාපං කාලමේඝස්වරූපං
සරසිජදළනේත්රං චාරුහාසං සුගාත්රම් ।
විචිනුතවනවාසං වික්රමෝදග්රවේෂං
ප්රණමත රඝුනාථං ජානකීප්රාණනාථම් ॥ 80

විද්යුත්ස්ඵුරන්මකරකුංඩලදීප්තචාරු-
ගංඩස්ථලං මණිකිරීටවිරාජමානම් ।
පීතාංබරං ජලදනීලමුදාරකාංතිං
ශ්රීරාමචංද්රමනිශං කලයාමි චිත්තේ ॥ 81

රත්නෝල්ලසජ්ජ්වලිතකුංඩලගංඩභාගං
කස්තූරිකාතිලකශෝභිතඵාලභාගම් ।
කර්ණාංතදීර්ඝනයනං කරුණාකටාක්ෂං
ශ්රීරාමචංද්ර මුඛමාත්මනි සන්නිධත්තම් ॥ 82

වෛදේහීසහිතං ච ලක්ෂ්මණයුතං කෛකේයිපුත්රාන්විතං
සුග්රීවං ච විභීෂණානිලසුතෞ නීලං නලං සාංගදම් ।
විශ්වාමිත්රවසිෂ්ඨගෞතමභරද්වාජාදිකාන් මානයන්
රාමෝ මාරුතිසේවිතඃ ස්මරතු මාං සාම්රාජ්යසිංහාසනේ ॥ 83

සකලගුණනිධානං යෝගිභිස්ස්තූයමානං
භජිතසුරවිමානං රක්ෂිතේංද්රාදිමානම් ।
මහිතවෘෂභයානං සීතයා ශෝභමානං
ස්මරතු හෘදයභානුං බ්රහ්මරාමාභිරාමම් ॥ 84

ත්රිදශකුමුදචංද්රෝ දානවාංභෝජචංද්රෝ
දුරිතතිමිරචංද්රෝ යෝගිනාං ජ්ඤානචංද්රඃ ।
ප්රණතනයනචංද්රෝ මෛථිලීනේත්රචංද්රෝ
දශමුඛරිපුචංද්රඃ පාතු මාං රාමචංද්රඃ ॥ 85

යන්නාමෛව සහස්රනාමසදෘශං යන්නාම වේදෛස්සමං
යන්නාමාංකිතවාක්ය-මාසුරබලස්ත්රීගර්භවිච්ඡේදනම් ।
යන්නාම ශ්වපචාර්යභේදරහිතං මුක්තිප්රදානෝජ්ජ්වලං
තන්නාමාऽලඝුරාමරාමරමණං ශ්රීරාමනාමාමෘතම් ॥ 86

රාජීවනේත්ර රඝුපුංගව රාමභද්ර
රාකේංදුබිංබසදෘශානන නීලගාත්ර ।
රාමාऽභිරාම රඝුවංශසමුද්භව ත්වං
ශ්රීරාමචංද්ර මම දේහි කරාවලංබම් ॥ 87

මාණික්යමංජීරපදාරවිංදං
රාමාර්කසංඵුල්ලමුඛාරවිංදම් ।
භක්තාභයප්රාපිකරාරවිංදාං
දේවීං භජේ රාඝවවල්ලභාං තාම් ॥ 88

ජයතු විජයකාරී ජානකීමෝදකාරී
තපනකුලවිහාරී දංඩකාරණ්යචාරී ।
දශවදනකුඨාරී දෛත්යවිච්ඡේදකාරී
මණිමකුටකධාරී චංඩකෝදංඩධාරී ॥ 89

රාමඃ පිතා රඝව ඒව මාතා
රාමස්සුබංධුශ්ච සඛා හිතශ්ච ।
රාමෝ ගුරුර්මේ පරමං ච දෛවං
රාමං විනා නාऽන්යමහං ස්මරාමි ॥ 90

ශ්රීරාම මේ ත්වං හි පිතා ච මාතා
ශ්රීරාම මේ ත්වං හි සුහෘච්ච බංධුඃ ।
ශ්රීරාම මේ ත්වං හි ගුරුශ්ච ගෝෂ්ඨී
ශ්රීරාම මේ ත්වං හි සමස්තමේව ॥ 91

රාමචංද්රචරිතාමෘතපානං
සෝමපානශතකෝටිසමානම් ।
සෝමපානශතකෝටිභිරීයා-
ජ්ජන්ම නෛති රඝුනායකනාම්නා ॥ 92

රාම රාම දයාසිංධෝ රාවණාරේ ජගත්පතේ ।
ත්වත්පාදකමලාසක්ති-ර්භවේජ්ජන්මනි ජන්මනි ॥ 93

ශ්රීරාමචංද්රේති දයාපරේති
භක්තප්රියේති භවබංධනමෝචනේති ।
නාථේති නාගශයනේති සදා ස්තුවංතං
මාං පාහි භීතමනිශං කෘපණං කෘපාළෝ ॥ 94

අයෝධ්යානාථ රාජේංද්ර සීතාකාංත ජගත්පතේ ।
ශ්රීරාම පුංඩරීකාක්ෂ රාමචංද්ර නමෝऽස්තු තේ ॥ 95

හේ රාම හේ රමණ හේ ජගදේකවීර
හේ නාථ හේ රඝුපතේ කරුණාලවාල ।
හේ ජානකීරමණ හේ ජගදේකබංධෝ
මාං පාහි දීනමනිශං කෘපණං කෘතඝ්නම් ॥ 96

ජානාති රාම තව තත්ත්වගතිං හනූමාන් ।
ජානාති රාම තව සඛ්යගතිං කපීශඃ ।
ජානාති රාම තව යුද්ධගතිං දශාස්යෝ ।
ජානාති රාම ධනදානුජ ඒව සත්යම් ॥ 97

සේව්යං ශ්රීරාමමංත්රං ශ්රවණශුභකරං ශ්රේෂ්ඨසුජ්ඤානිමංත්රං
ස්තව්යං ශ්රීරාමමංත්රං නරකදුරිතදුර්වාරනිර්ඝාතමංත්රම් ।
භව්යං ශ්රීරාමමංත්රං භජතු භජතු සංසාරනිස්තාරමංත්රං
දිව්යං ශ්රීරාමමංත්රං දිවි භුවි විලසන්මෝක්ෂරක්ෂෛකමංත්රම් ॥ 98

නිඛිලනිලයමංත්රං නිත්යතත්ත්වාඛ්යමංත්රං
භවකුලහරමංත්රං භූමිජාප්රාණමංත්රම් ।
පවනජනුතමංත්රං පාර්වතීමෝක්ෂමංත්රං
පශුපතිනිජමංත්රං පාතු මාං රාමමංත්රම් ॥ 99

ප්රණවනිලයමංත්රං ප්රාණනිර්වාණමංත්රං
ප්රකෘතිපුරුෂමංත්රං බ්රහ්මරුද්රේංද්රමංත්රම් ।
ප්රකටදුරිතරාගද්වේෂනිර්ණාශමංත්රං
රඝුපතිනිජමංත්රං රාමරාමේතිමංත්රම් ॥ 100

දශරථසුතමංත්රං දෛත්යසංහාරමංත්රං
විබුධවිනුතමංත්රං විශ්වවිඛ්යාතමංත්රම් ।
මුනිගණනුතමංත්රං මුක්තිමාර්ගෛකමංත්රං
රඝුපතිනිජමංත්රං රාමරාමේතිමංත්රම් ॥ 101

සංසාරසාගරභයාපහවිශ්වමංත්රං
සාක්ෂාන්මුමුක්ෂුජනසේවිතසිද්ධමංත්රම් ।
සාරංගහස්තමුඛහස්තනිවාසමංත්රං
කෛවල්යමංත්රමනිශං භජ රාමමංත්රම් ॥ 102

ජයතු ජයතු මංත්රං ජන්මසාඵල්යමංත්රං
ජනනමරණභේදක්ලේශවිච්ඡේදමංත්රම් ।
සකලනිගමමංත්රං සර්වශාස්ත්රෛකමංත්රං
රඝුපතිනිජමංත්රං රාමරාමේතිමංත්රම් ॥ 103

ජගති විශදමංත්රං ජානකීප්රාණමංත්රං
විබුධවිනුතමංත්රං විශ්වවිඛ්යාතමංත්රම් ।
දශරථසුතමංත්රං දෛත්යසංහාරමංත්රං
රඝුපතිනිජමංත්රං රාමරාමේතිමංත්රම් ॥ 104

බ්රහ්මාදියෝගිමුනිපූජිතසිද්ධමංත්රං
දාරිද්ර්යදුඃඛභවරෝගවිනාශමංත්රම් ।
සංසාරසාගරසමුත්තරණෛකමංත්රං
වංදේ මහාභයහරං රඝුරාමමංත්රම් ॥ 105

ශත්රුච්ඡේදෛකමංත්රං සරසමුපනිෂද්වාක්යසංපූජ්යමංත්රං
සංසාරෝත්තාරමංත්රං සමුචිතසමයේ සංගනිර්යාණමංත්රම් ।
සර්වෛශ්වර්යෛකමංත්රං ව්යසනභුජගසංදෂ්ටසංත්රාණමංත්රං
ජිහ්වේ ශ්රීරාමමංත්රං ජප ජප සඵලං ජන්මසාඵල්යමංත්රම් ॥ 106

නිත්යං ශ්රීරාමමංත්රං නිරුපමමධිකං නීතිසුජ්ඤානමංත්රං
සත්යං ශ්රීරාමමංත්රං සදමලහෘදයේ සර්වදාරෝග්යමංත්රම් ।
ස්තුත්යං ශ්රීරාමමංත්රං සුලලිතසුමනස්සෞඛ්යසෞභාග්යමංත්රං
පඨ්යං ශ්රීරාමමංත්රං පවනජවරදං පාතු මාං රාමමංත්රම් ॥ 107

ව්යාමෝහප්රශමෞෂධං මුනිමනෝවෘත්තිප්රවෘත්ත්යෞෂධං
දෛත්යෝන්මූලකරෞෂධං භවභයප්රධ්වංසනෛකෞෂධම් ।
භක්තානංදකරෞෂධං ත්රිභුවනේ සංජීවනෛකෞෂධං
ශ්රේයඃ ප්රාප්තිකරෞෂධං පිබ මනඃ ශ්රීරාමනාමෞෂධම් ॥ 108

සකලභුවනරත්නං සර්වශාස්ත්රාර්ථරත්නං
සමරවිජයරත්නං සච්චිදානංදරත්නම් ।
දශමුඛහරරත්නං දානවාරාතිරත්නං
රඝුකුලනෘපරත්නං පාතු මාං රාමරත්නම් ॥ 109

සකලභුවනරත්නං සච්චිදානංදරත්නං
සකලහෘදයරත්නං සූර්යබිංබාංතරත්නම් ।
විමලසුකෘතරත්නං වේදවේදාංතරත්නං
පුරහරජපරත්නං පාතු මාං රාමරත්නම් ॥ 110

නිගමශිඛරරත්නං නිර්මලානංදරත්නං
නිරුපමගුණරත්නං නාදනාදාංතරත්නම් ।
දශරථකුලරත්නං ද්වාදශාංතස්ස්ථරත්නං
පශුපතිජපරත්නං පාතු මාං රාමරත්නම් ॥ 111

ශතමඛසුතරත්නං ෂෝඩශාංතස්ස්ථරත්නං
මුනිජනජපරත්නං මුඛ්යවෛකුංඨරත්නම් ।
නිරුපමගුණරත්නං නීරජාංතස්ස්ථරත්නං
පරමපදවිරත්නං පාතු මාං රාමරත්නම් ॥ 112

සකලසුකෘතරත්නං සත්යවාක්යාර්ථරත්නං
ශමදමගුණරත්නං ශාශ්වතානංදරත්නම් ।
ප්රණයනිලයරත්නං ප්රස්ඵුටද්යෝතිරත්නං
පරමපදවිරත්නං පාතු මාං රාමරත්නම් ॥ 113

නිගමශිඛරරත්නං නිත්යමාශාස්යරත්නං
ජනනුතනෘපරත්නං ජානකීරූපරත්නම් ।
භුවනවලයරත්නං භූභුජාමේකරත්නං
රඝුකුලවරරත්නං පාතු මාං රාමරත්නම් ॥ 114

විශාලනේත්රං පරිපූර්ණගාත්රං
සීතාකලත්රං සුරවෛරිජෛත්රම් ।
කාරුණ්යපාත්රං ජගතඃ පවිත්රං
ශ්රීරාමරත්නං ප්රණතෝऽස්මි නිත්යම් ॥ 115

හේ ගෝපාලක හේ දයාජලනිධේ හේ සද්ගුණාංභෝනිධේ
හේ දෛත්යාංතක හේ විභීෂණදයාපරීණ හේ භූපතේ ।
හේ වෛදේහසුතාමනෝජවිහෘතේ හේ කෝටිමාරාකෘතේ
හේ නව්යාංබුජනේත්ර පාලය පරං ජානාමි න ත්වාං විනා ॥ 116

යස්ය කිංචිදපි නෝ හරණීයං
කර්ම කිංචිදපි නෝ චරණීයම් ।
රාමනාම ච සදා ස්මරණීයං
ලීලයා භවජලං තරණීයම් ॥ 117

දශරථසුතමීශං දංඩකාරණ්යවාසං
ශතමඛමණිනීලං ජානකීප්රාණලෝලම් ।
සකලභුවනමෝහං සන්නුතාංභෝදදේහං
බහුළනුතසමුද්රං භාවයේ රාමභද්රම් ॥ 118

විශාලනේත්රං පරිපූර්ණගාත්රං
සීතාකළත්රං සුරවෛරිජෛත්රම් ।
ජගත්පවිත්රං පරමාත්මතංත්රං
ශ්රීරාමචංද්රං ප්රණමාමි චිත්තේ ॥ 119

ජය ජය රඝුරාම ශ්රීමුඛාංභෝජභානෝ
ජය ජය රඝුවීර ශ්රීමදංභෝජනේත්ර ।
ජය ජය රඝුනාථ ශ්රීකරාභ්යර්චිතාංඝ්රි
ජය ජය රඝුවර්ය ශ්රීශ කාරුණ්යසිංධෝ ॥ 120

මංදාරමූලේ මණිපීඨසංස්ථං
සුධාප්ලුතං දිව්යවිරාට්ස්වරූපම් ।
සබිංදුනාදාංතකලාංතතුර්ය-
මූර්තිං භජේऽහං රඝුවංශරත්නම් ॥ 121

නාදං නාදවිනීලචිත්තපවනං නාදාංතත්ත්වප්රියං
නාමාකාරවිවර්ජිතං නවඝනශ්යාමාංගනාදප්රියම් ।
නාදාංභෝජමරංදමත්තවිලසද්භෘංගං මදාංතස්ස්ථිතං
නාදාංතධෘවමංඩලාබ්ජරුචිරං රාමං භජේ තාරකම් ॥ 122

නානාභූතහෘදබ්ජපද්මනිලයං නාමෝජ්ජ්වලාභූෂණම් ।
නාමස්තෝත්රපවිත්රිතත්රිභුවනං නාරායණාෂ්ටාක්ෂරම් ।
නාදාංතේංදුගළත්සුධාප්ලුතතනුං නානාත්මචින්මාත්රකම් ।
නානාකෝටියුගාංතභානුසදෘශං රාමං භජේ තාරකම් ॥ 123

වේද්යං වේදගුරුං විරිංචිජනකං වේදාංතමූර්තිං ස්ඵුර-
ද්වේදං වේදකලාපමූලමහිමාධාරාංතකංදාංකුරම් ।
වේදශෘංගසමානශේෂශයනං වේදාංතවේද්යාත්මකං
වේදාරාධිතපාදපංකජමහං රාමං භජේ තාරකම් ॥ 124

මජ්ජීවං මදනුග්රහං මදධිපං මද්භාවනං මත්සුඛං
මත්තාතං මම සද්ගුරුං මම වරං මෝහාංධවිච්ඡේදනම් ।
මත්පුණ්යං මදනේකබාංධවජනං මජ්ජීවනං මන්නිධිං
මත්සිද්ධිං මම සර්වකර්මසුකෘතං රාමං භජේ තාරකම් ॥ 125

නිත්යං නීරජලෝචනං නිරුපමං නීවාරශූකෝපමං
නිර්භේදානුභවං නිරංතරගුණං නීලාංගරාගෝජ්ජ්වලම් ।
නිෂ්පාපං නිගමාගමාර්චිතපදං නිත්යාත්මකං නිර්මලං
නිෂ්පුණ්යං නිඛිලං නිරංජනපදං රාමං භජේ තාරකම් ॥ 126

ධ්යායේ ත්වාං හෘදයාංබුජේ රඝුපතිං විජ්ඤානදීපාංකුරං
හංසෝහංසපරංපරාදිමහිමාධාරං ජගන්මෝහනම් ।
හස්තාංභෝජගදාබ්ජචක්රමතුලං පීතාංබරං කෞස්තුභං
ශ්රීවත්සං පුරුෂෝත්තමං මණිනිභං රාමං භජේ තාරකම් ॥ 127

සත්යජ්ඤානමනංතමච්යුතමජං චාව්යාකෘතං තත්පරං
කූටස්ථාදිසමස්තසාක්ෂිමනඝං සාක්ෂාද්විරාට්තත්ත්වදම් ।
වේද්යං විශ්වමයං ස්වලීනභුවනස්වාරාජ්යසෞඛ්යප්රදං
පූර්ණං පූර්ණතරං පුරාණපුරුෂං රාමං භජේ තාරකම් ॥ 128

රාමං රාක්ෂසවංශනාශනකරං රාකේංදුබිංබානනං
රක්ෂෝරිං රඝුවංශවර්ධනකරං රක්තාධරං රාඝවම් ।
රාධායාත්මනිවාසිනං රවිනිභං රම්යං රමානායකං
රංධ්රාංතර්ගතශේෂශායිනමහං රාමං භජේ තාරකම් ॥ 129

ඕතප්රෝතසමස්තවස්තුනිචයං ඕංකාරබීජාක්ෂරං
ඕංකාරප්රකෘතිං ෂඩක්ෂරහිතං ඕංකාරකංදාංකුරම් ।
ඕංකාරස්ඵුටභූර්භුවස්සුපරිතං ඕඝත්රයාරාධිතම්
ඕංකාරෝජ්ජ්වලසිංහපීඨනිලයං රාමං භජේ තාරකම් ॥ 130

සාකේතේ නගරේ සමස්තසුඛදේ හර්ම්යේऽබ්ජකෝටිද්යුතේ
නක්ෂත්රග්රහපංක්තිලග්නශිඛරේ චාංතර්යපංකේරුහේ ।
වාල්මීකාත්රිපරාශරාදිමුනිභිස්සංසේව්යමානං ස්ථිතං
සීතාලංකෘතවාමභාගමනිශං රාමං භජේ තාරකම් ॥ 131

වෛකුංඨේ නගරේ සුරද්රුමතලේ චානංදවප්රාංතරේ
නානාරත්නවිනිර්මිතස්ඵුටපටුප්රාකාරසංවේෂ්ටිතේ ।
සෞධේංදූපලශේෂතල්පලලිතේ නීලෝත්පලච්ඡාදිතේ
පර්යංකේ ශයනං රමාදිසහිතං රාමං භජේ තාරකම් ॥ 132

වංදේ රාමමනාදිපූරුෂමජං වංදේ රමානායකං
වංදේ හාරිකිරීටකුංඩලධරං වංදේ සුනීලද්යුතිම් ।
වංදේ චාපකලංබකෝජ්ජ්වලකරං වංදේ ජගන්මංගළං
වංදේ පංක්තිරථාත්මජං මම ගුරුං වංදේ සදා රාඝවම් ॥ 133

වංදේ ශෞනකගෞතමාද්යභිනුතං වංදේ ඝනශ්යාමලං
වංදේ තාරකපීඨමධ්යනිලයං වංදේ ජගන්නායකම් ।
වංදේ භක්තජනෞඝදේවිවටපං වංදේ ධනුර්වල්ලභං
වංදේ තත්ත්වමසීතිවාක්යජනකං වංදේ සදා රාඝවම් ॥ 134

වංදේ සූර්යශශාංකලෝචනයුගං වංදේ ජගත්පාවනං
වංදේ පත්රසහස්රපද්මනිලයං වංදේ පුරාරිප්රියම් ।
වංදේ රාක්ෂසවංශනාශනකරං වංදේ සුධාශීතලං
වංදේ දේවකපීංද්රකෝටිවිනුතං වංදේ සදා රාඝවම් ॥ 135

වංදේ සාගරගර්වභංගවිශිඛං වංදේ ජගජ්ජීවනං
වංදේ කෞශිකයාගරක්ෂණකරං වංදේ ගුරුණාං ගුරුම් ।
වංදේ බාණශරාසනෝජ්ජ්වලකරං වංදේ ජටාවල්කලං
වංදේ ලක්ෂ්මණභූමිජාන්විතමහං වංදේ සදා රාඝවම් ॥ 136

වංදේ පාංඩරපුංඩරීකනයනං වංදේऽබ්ජබිංබානනං
වංදේ කංබුගළං කරාබ්ජයුගළං වංදේ ලලාටෝජ්ජ්වලම් ।
වංදේ පීතදුකූලමංබුදනිභං වංදේ ජගන්මෝහනං
වංදේ කාරණමානුෂෝජ්ජ්වලතනුං වංදේ සදා රාඝවම් ॥ 137

වංදේ නීලසරෝජකෝමලරුචිං වංදේ ජගද්වංදිතං
වංදේ සූර්යකුලාබ්ධිකෞස්තුභමණිං වංදේ සුරාරාධිතම් ।
වංදේ පාතකපංචකප්රහරණං වංදේ ජගත්කාරණං
වංදේ විංශතිපංචතත්ත්වරහිතං වංදේ සදා රාඝවම් ॥ 138

වංදේ සාධකවර්ගකල්පකතරුං වංදේ ත්රිමූර්ත්යාත්මකං
වංදේ නාදලයාංතරස්ථලගතං වංදේ ත්රිවර්ගාත්මකම් ।
වංදේ රාගවිහීනචිත්තසුලභං වංදේ සභානායකං
වංදේ පූර්ණදයාමෘතාර්ණවමහං වංදේ සදා රාඝවම් ॥ 139

වංදේ සාත්ත්විකතත්ත්වමුද්රිතතනුං වංදේ සුධාදායකං
වංදේ චාරුචතුර්භුජං මණිනිභං වංදේ ෂඩබ්ජස්ථිතම් ।
වංදේ බ්රහ්මපිපීලිකාදිනිලයං වංදේ විරාට්විග්රහං
වංදේ පන්නගතල්පශායිනමහං වංදේ සදා රාඝවම් ॥ 140

සිංහාසනස්ථං මුනිසිද්ධසේව්යං
රක්තෝත්පලාලංකෘතපාදපද්මම් ।
සීතාසමේතං ශශිසූර්යනේත්රං
රාමං භජේ රාඝවරාමචංද්රම් ॥ 141

ශ්රීරාමභද්රාශ්රිතසද්ගුරූණාං
පාදාරවිංදං භජතාං නරාණාම් ।
ආරෝග්යමෛශ්වර්යමනංතකීර්ති-
රංතේ ච විෂ්ණෝඃ පදමස්ති සත්යම් ॥ 142

දශරථවරපුත්රං ජානකීසත්කළත්රං
දශමුඛහරදක්ෂං පද්මපත්රායතාක්ෂම් ।
කරධෘතශරචාපං චාරුමුක්තාකලාපං
රඝුකුලනෘවරේණ්යං රාමමීඩේ ශරණ්යම් ॥ 143

දශමුඛගජසිංහං දෛත්යගර්වාතිරංහං
කදනභයදහස්තං තාරකබ්රහ්ම ශස්තම් ।
මණිඛචිතකිරීටං මංජුලාලාපවාටං
දශරථකුලචංද්රං රාමචංද්රං භජේऽහම් ॥ 144

රාමං රක්තසරෝරුහාක්ෂමමලං ලංකාධිනාථාංතකං
කෞසල්යානයනෝත්සුකං රඝුවරං නාගේංද්රතල්පස්ථිතම් ।
වෛදේහීකුචකුංභකුංකුමරජෝලංකාරහාරං හරිං
මායාමානුෂවිග්රහං රඝුපතිං සීතාසමේතං භජේ ॥ 145

රාමං රාක්ෂසමර්දනං රඝුවරං දෛතේයභිධ්වංසිනං
සුග්රීවේප්සිතරාජ්යදං සුරපතේර්භීත්යංතකං ශාර්‍ංගිණම් ।
භක්තානාමභයප්රදං භයහරං පාපෞඝවිධ්වංසිනං
සාමීරිස්තුතපාදපද්මයුගළං සීතාසමේතං භජේ ॥ 146

යත්පාදාංබුජරේණුනා මුනිසතී මුක්තිංගතා යන්මහඃ
පුණ්යං පාතකනාශනං ත්රිජගතාං භාති ස්මෘතං පාවනම් ।
ස්මෘත්වා රාඝවමප්රමේයමමලං පූර්ණේංදුමංදස්මිතං
තං රාමං සරසීරුහාක්ෂමමලං සීතාසමේතං භජේ ॥ 147

වෛදේහීකුචමංඩලාග්ර-විලසන්මාණික්යහස්තාංබුජං
චංචත්කංකණහාරනූපුර-ලසත්කේයූරහාරාන්විතම් ।
දිව්යශ්රීමණිකුංඩලෝජ්ජ්වල-මහාභූෂාසහස්රාන්විතං
වීරශ්රීරඝුපුංගවං ගුණනිධිං සීතාසමේතං භජේ ॥ 148

වෛදේහීකුචමංඩලෝපරි-ලසන්මාණික්යහාරාවළී-
මධ්යස්ථං නවනීතකෝමලරුචිං නීලෝත්පලශ්යාමලම් ।
කංදර්පායුතකෝටිසුංදරතනුං පූර්ණේංදුබිංබානනං
කෞසල්යාකුලභූෂණං රඝුපතිං සීතාසමේතං භජේ ॥ 149

දිව්යාරණ්යයතීංද්රනාමනගරේ මධ්යේ මහාමංටපේ
ස්වර්ණස්තංභසහස්රෂෝඩශයුතේ මංදාරමූලාශ්රිතේ ।
නානාරත්නවිචිත්රනිර්මලමහාසිංහාසනේ සංස්ථිතං
සීතාලක්ෂ්මණසේවිතං රඝුපතිං සීතාසමේතං භජේ ॥ 150

කස්තූරීතිලකං කපීංද්රහරණං කාරුණ්යවාරාංනිධිං
ක්ෂීරාංභෝධිසුතාමුඛාබ්ජමධුපං කල්යාණසංපන්නිධිම් ।
කෞසල්යානයනෝත්සුකං කපිවරත්රාණං මහාපෞරුෂං
කෞමාරප්රියමර්කකෝටිසදෘශං සීතාසමේතං භජේ ॥ 151

විද්යුත්කෝටිදිවාකරද්යුතිනිභං ශ්රීකෞස්තුභාලංකෘතං
යෝගීංද්රෛස්සනකාදිභිඃ පරිවෘතං කෛලාසනාථප්රියම් ।
මුක්තාරත්නකිරීටකුංඩලධරං ග්රෛවේයහාරාන්විතං
වෛදේහීකුචසන්නිවාසමනිශං සීතාසමේතං භජේ ॥ 152

මේඝශ්යාමලමංබුජාතනයනං විස්තීර්ණවක්ෂස්ස්ථලං
බාහුද්වංද්වවිරාජිතං සුවදනං ශෝණාංඝ්රිපංකේරුහම් ।
නානාරත්නවිචිත්රභූෂණයුතං කෝදංඩබාණාංකිතං
ත්රෛලෝක්යාऽප්රතිමානසුංදරතනුං සීතාසමේතං භජේ ॥ 153

වෛදේහීයුතවාමභාගමතුලං වංදාරුමංදාරකං
වංදේ ප්රස්තුතකීර්තිවාසිතතරුච්ඡායානුකාරිප්රභම් ।
වෛදේහීකුචකුංකුමාංකිතමහෝරස්කං මහාභූෂණං
වේදාංතෛරුපගීයමානමසකෘත්සීතාසමේතං භජේ ॥ 154

දේවානාං හිතකාරණේන භුවනේ ධෘත්වාऽවතාරං ධ්රුවං
රාමං කෞශිකයජ්ඤවිඝ්නදලනං තත්තාටකාසංහරම් ।
නිත්යං ගෞතමපත්නිශාපදලනශ්රීපාදරේණුං ශුභං
ශංභෝරුත්කටචාපඛංඩනමහාසත්වං භජේ රාඝවම් ॥ 155

ශ්රීරාමං නවරත්නකුංඩලධරං ශ්රීරාමරක්ෂාමණිං
ශ්රීරාමං ච සහස්රභානුසදෘශං ශ්රීරාමචංද්රෝදයම් ।
ශ්රීරාමං ශ්රුතකීර්තිමාකරමහං ශ්රීරාමමුක්තිප්රදං
ශ්රීරාමං රඝුනංදනං භයහරං ශ්රීරාමචංද්රං භජේ ॥ 156

රාමමිංදීවරශ්යාමං රාජීවායතලෝචනම් ।
ජ්යාඝෝෂනිර්ජිතාරාතිං ජානකීරමණං භජේ ॥ 157

දීර්ඝබාහුමරවිංදලෝචනං
දීනවත්සලමනාථරක්ෂකම් ।
දීක්ෂිතං සකලලෝකරක්ෂණේ
දෛවතං දශරථාත්මජං භජේ ॥ 158

ප්රාතස්ස්මරාමි රඝුනාථමුඛාරවිංදං
මංදස්මිතං මධුරභාෂි විශාලඵාලම් ।
කර්ණාවලංබිචලකුංඩලගංඩභාගං
කර්ණාංතදීර්ඝනයනං නයනාභිරාමම් ॥ 159

ප්රාතර්භජාමි රඝුනාථකරාරවිංදං
රක්ෂෝගණාය භයදං වරදං නිජේභ්යඃ ।
යද්රාජසංසදි විභිද්ය මහේශචාපං
සීතාකරග්රහණමංගළමාප සද්යඃ ॥ 160

ප්රාතර්නමාමි රඝුනාථපදාරවිංදං
පද්මාංකුශාදිශුභරේඛශුභාවහං ච ।
යෝගීංද්රමානසමධුව්රතසේව්යමානං
ශාපාපහං සපදි ගෞතමධර්මපත්න්යාඃ ॥ 161

ප්රාතර්වදාමි වචසා රඝුනාථනාම
වාග්දෝෂහාරි සකලං කලුෂං නිහංතෘ ।
යත්පාර්වතී ස්වපතිනා සහ භෝක්තුකාමා
ප්රීත්යා සහස්රහරිනාමසමං ජජාප ॥ 162

ප්රාතඃ ශ්රයේ ශ්රුතිනුතං රඝුනාථමූර්තිං
නීලාංබුදෝත්පලසිතේතරරත්නනීලාම් ।
ආමුක්තමෞක්තිකවිශේෂවිභූෂණාඪ්යාං
ධ්යේයාං සමස්තමුනිභිර්නිජභෘත්යමුඛ්යෛඃ ॥ 163

රඝුකුලවරනාථෝ ජානකීප්රාණනාථඃ
පිතෘවචනවිධාතා කීශරාජ්යප්රදාතා ।
ප්රතිනිශිචරනාශඃ ප්රාප්තරාජ්යප්රවේශෝ
විහිතභුවනරක්ෂඃ පාතු පද්මායතාක්ෂඃ ॥ 164

කුවලයදළනීලඃ පීතවාසාඃ ස්මිතාස්යෝ
විවිධරුචිරභූෂාභූෂිතෝ දිව්යමූර්තිඃ ।
දශරථකුලනාථෝ ජානකීප්රාණනාථෝ
නිවසතු මම චිත්තේ සර්වදා රාමචංද්රඃ ॥ 165

ජයතු ජයතු රාමෝ ජානකීවල්ලභෝऽයං
ජයතු ජයතු රාමශ්චංද්රචූඩාර්චිතාංඝ්රිඃ ।
ජයතු ජයතු වාණීනාථනාථඃ පරාත්මා
ජයතු ජයතු රාමෝऽනාථනාථඃ කෘපාළුඃ ॥ 166

වදතු වදතු වාණී රාමරාමේති නිත්යං
ජයතු ජයතු චිත්තං රාමපාදාරවිංදම් ।
නමතු නමතු දේහං සංතතං රාමචංද්රං
න භවතු මම පාපං ජන්මජන්මාංතරේෂු ॥ 167

ආනංදරූපං වරදං ප්රසන්නං
සිංහේක්ෂණං සේවකපාරිජාතම් ।
නීලෝත්පලාංගං භුවනෛකමිත්රං
රාමං භජේ රාඝවරාමචංද්රම් ॥ 168

ලංකාවිරාමං රණරංගභීමං
රාජීවනේත්රං රඝුවංශමිත්රම් ।
කාරුණ්යමූර්තිං කරුණාප්රපූර්තිං
ශ්රීරාමචංද්රං ශරණං ප්රපද්යේ ॥ 169

සුග්රීවමිත්රං පරමං පවිත්රං
සීතාකළත්රං නවහේමසූත්රම් ।
කාරුණ්යපාත්රං ශතපත්රනේත්රං
ශ්රීරාමචංද්රං ශිරසා නමාමි ॥ 170

ශ්රීරාඝවේති රමණේති රඝූද්වහේති
රාමේති රාවණහරේති රමාධවේති ।
සාකේතනාථසුමුඛේති ච සුව්රතේති
වාණී සදා වදතු රාම හරේ හරේති ॥ 171

ශ්රීරාමනාමාමෘතමංත්රබීජං
සංජීවනං චේන්මනසි ප්රතිෂ්ඨම් ।
හාලාහලං වා ප්රළයානලං වා
මෘත්යෝර්මුඛං වා විතථීකරෝති ॥ 172

කිං යෝගශාස්ත්රෛඃ කිමශේෂවිද්යා
කිං යාගගංගාදිවිශේෂතීර්ථෛඃ ।
කිං බ්රහ්මචර්යාශ්රමසංචරේණ
භක්තිර්නචේත්තේ රඝුවංශකීර්ත්යාම් ॥ 173

ඉදං ශරීරං ශ්ලථසංධිජර්ඣරං
පතත්යවශ්යං පරිණාමපේශලම් ।
කිමෞෂථං පෘච්ඡසි මූඪ දුර්මතේ
නිරාමයං රාමකථාමෘතං පිබ ॥ 174

හේ රාමභද්රාශ්රය හේ කෘපාළෝ
හේ භක්තලෝකෛකශරණ්යමූර්තේ ।
පුනීහි මාං ත්වච්චරණාරවිංදං
ජගත්පවිත්රං ශරණං මමාऽස්තු ॥ 175

නීලාභ්රදේහ නිඛිලේශ ජගන්නිවාස
රාජීවනේත්ර රමණීයගුණාභිරාම ।
ශ්රීදාම දෛත්යකුලමර්දන රාමචංද්ර
ත්වත්පාදපද්මමනිශං කලයාමි චිත්තේ ॥ 176

ශ්රීරාමචංද්ර කරුණාකර දීනබංධෝ
සීතාසමේත භරතාග්රජ රාඝවේශ ।
පාපාර්තිභංජන භයාතුරදීනබංධෝ
පාපාංබුධෞ පතිතමුද්ධර මාමනාථම් ॥ 177

ඉංදීවරදළශ්යාම-මිංදුකෝටිනිභානනම් ।
කංදර්පකෝටිලාවණ්යං වංදේऽහං රඝුනංදනම් ॥ 175

ඉති ශ්රීබෝධේංද්රසරස්වතී කෘත ශ්රීරාමකර්ණාමෘතම් ॥