জনক উবাচ ॥
অহো নিরংজনঃ শাংতো বোধোঽহং প্রকৃতেঃ পরঃ ।
এতাবংতমহং কালং মোহেনৈব বিডংবিতঃ ॥ 2-1॥
যথা প্রকাশয়াম্য়েকো দেহমেনং তথা জগত্ ।
অতো মম জগত্সর্বমথবা ন চ কিংচন ॥ 2-2॥
স শরীরমহো বিশ্বং পরিত্যজ্য় ময়াধুনা ।
কুতশ্চিত্ কৌশলাদ্ এব পরমাত্মা বিলোক্যতে ॥ 2-3॥
যথা ন তোযতো ভিন্নাস্তরংগাঃ ফেনবুদ্বুদাঃ ।
আত্মনো ন তথা ভিন্নং বিশ্বমাত্মবিনির্গতম্ ॥ 2-4॥
তংতুমাত্রো ভবেদ্ এব পটো যদ্বদ্ বিচারিতঃ ।
আত্মতন্মাত্রমেবেদং তদ্বদ্ বিশ্বং বিচারিতম্ ॥ 2-5॥
যথৈবেক্ষুরসে ক্লৃপ্তা তেন ব্য়াপ্তৈব শর্করা ।
তথা বিশ্বং ময়ি ক্লৃপ্তং ময়া ব্য়াপ্তং নিরংতরম্ ॥ 2-6॥
আত্মাজ্ঞানাজ্জগদ্ভাতি আত্মজ্ঞানান্ন ভাসতে ।
রজ্জ্বজ্ঞানাদহির্ভাতি তজ্জ্ঞানাদ্ ভাসতে ন হি ॥ 2-7॥
প্রকাশো মে নিজং রূপং নাতিরিক্তোঽস্ম্যহং ততঃ ।
যদা প্রকাশতে বিশ্বং তদাহং ভাস এব হি ॥ 2-8॥
অহো বিকল্পিতং বিশ্বমজ্ঞানান্ময়ি ভাসতে ।
রূপ্য়ং শুক্তৌ ফণী রজ্জৌ বারি সূর্যকরে যথা ॥ 2-9॥
মত্তো বিনির্গতং বিশ্বং ময়্য়েব লযমেষ্যতি ।
মৃদি কুংভো জলে বীচিঃ কনকে কটকং যথা ॥ 2-10॥
অহো অহং নমো মহ্য়ং বিনাশো যস্য় নাস্তি মে ।
ব্রহ্মাদিস্তংবপর্য়ংতং জগন্নাশোঽপি তিষ্ঠতঃ ॥ 2-11॥
অহো অহং নমো মহ্যমেকোঽহং দেহবানপি ।
ক্বচিন্ন গংতা নাগংতা ব্য়াপ্য় বিশ্বমবস্থিতঃ ॥ 2-12॥
অহো অহং নমো মহ্য়ং দক্ষো নাস্তীহ মত্সমঃ ।
অসংস্পৃশ্য় শরীরেণ যেন বিশ্বং চিরং ধৃতম্ ॥ 2-13॥
অহো অহং নমো মহ্য়ং যস্য় মে নাস্তি কিংচন ।
অথবা যস্য় মে সর্বং যদ্ বাঙ্মনসগোচরম্ ॥ 2-14॥
জ্ঞানং জ্ঞেয়ং তথা জ্ঞাতা ত্রিতয়ং নাস্তি বাস্তবম্ ।
অজ্ঞানাদ্ ভাতি যত্রেদং সোঽহমস্মি নিরংজনঃ ॥ 2-15॥
দ্বৈতমূলমহো দুঃখং নান্যত্তস্য়াঽস্তি ভেষজম্ ।
দৃশ্যমেতন্ মৃষা সর্বমেকোঽহং চিদ্রসোমলঃ ॥ 2-16॥
বোধমাত্রোঽহমজ্ঞানাদ্ উপাধিঃ কল্পিতো ময়া ।
এবং বিমৃশতো নিত্য়ং নির্বিকল্পে স্থিতির্মম ॥ 2-17॥
ন মে বংধোঽস্তি মোক্ষো বা ভ্রাংতিঃ শাংতা নিরাশ্রয়া ।
অহো ময়ি স্থিতং বিশ্বং বস্তুতো ন ময়ি স্থিতম্ ॥ 2-18॥
সশরীরমিদং বিশ্বং ন কিংচিদিতি নিশ্চিতম্ ।
শুদ্ধচিন্মাত্র আত্মা চ তত্কস্মিন্ কল্পনাধুনা ॥ 2-19॥
শরীরং স্বর্গনরকৌ বংধমোক্ষৌ ভয়ং তথা ।
কল্পনামাত্রমেবৈতত্ কিং মে কার্য়ং চিদাত্মনঃ ॥ 2-20॥
অহো জনসমূহেঽপি ন দ্বৈতং পশ্যতো মম ।
অরণ্যমিব সংবৃত্তং ক্ব রতিং করবাণ্যহম্ ॥ 2-21॥
নাহং দেহো ন মে দেহো জীবো নাহমহং হি চিত্ ।
অযমেব হি মে বংধ আসীদ্য়া জীবিতে স্পৃহা ॥ 2-22॥
অহো ভুবনকল্লোলৈর্বিচিত্রৈর্দ্রাক্ সমুত্থিতম্ ।
ময়্যনংতমহাংভোধৌ চিত্তবাতে সমুদ্যতে ॥ 2-23॥
ময়্যনংতমহাংভোধৌ চিত্তবাতে প্রশাম্যতি ।
অভাগ্য়াজ্জীববণিজো জগত্পোতো বিনশ্বরঃ ॥ 2-24॥
ময়্যনংতমহাংভোধাবাশ্চর্য়ং জীববীচয়ঃ ।
উদ্য়ংতি ঘ্নংতি খেলংতি প্রবিশংতি স্বভাবতঃ ॥ 2-25॥
