অথ পংচদশোঽধ্য়ায়ঃ ।
পুরুষোত্তমপ্রাপ্তিয়োগঃ
শ্রীভগবানুবাচ ।
ঊর্ধ্বমূলমধঃশাখমশ্বত্থং প্রাহুরব্যযম্ ।
ছংদাংসি যস্য় পর্ণানি যস্তং বেদ স বেদবিত্ ॥ 1 ॥
অধশ্চোর্ধ্বং প্রসৃতাস্তস্য় শাখা গুণপ্রবৃদ্ধা বিষযপ্রবালাঃ।
অধশ্চ মূলান্যনুসংততানি কর্মানুবংধীনি মনুষ্যলোকে ॥ 2 ॥
ন রূপমস্য়েহ তথোপলভ্যতে নাংতো ন চাদির্ন চ সংপ্রতিষ্ঠা।
অশ্বত্থমেনং সুবিরূঢমূলমসংগশস্ত্রেণ দৃঢেন ছিত্ত্বা ॥ 3 ॥
ততঃ পদং তত্পরিমার্গিতব্য়ং যস্মিন্গতা ন নিবর্তংতি ভূয়ঃ।
তমেব চাদ্য়ং পুরুষং প্রপদ্য়ে যতঃ প্রবৃত্তিঃ প্রসৃতা পুরাণী ॥ 4 ॥
নির্মানমোহা জিতসংগদোষা অধ্য়াত্মনিত্য়া বিনিবৃত্তকামাঃ।
দ্বংদ্বৈর্বিমুক্তাঃ সুখদুঃখসংজ্ঞৈর্গচ্ছংত্যমূঢাঃ পদমব্যয়ং তত্ ॥ 5 ॥
ন তদ্ভাসযতে সূর্য়ো ন শশাংকো ন পাবকঃ ।
যদ্গত্বা ন নিবর্তংতে তদ্ধাম পরমং মম ॥ 6 ॥
মমৈবাংশো জীবলোকে জীবভূতঃ সনাতনঃ ।
মনঃষষ্ঠানীংদ্রিয়াণি প্রকৃতিস্থানি কর্ষতি ॥ 7 ॥
শরীরং যদবাপ্নোতি যচ্চাপ্য়ুত্ক্রামতীশ্বরঃ ।
গৃহীত্বৈতানি সংয়াতি বায়ুর্গংধানিবাশয়াত্ ॥ 8 ॥
শ্রোত্রং চক্ষুঃ স্পর্শনং চ রসনং ঘ্রাণমেব চ ।
অধিষ্ঠায় মনশ্চায়ং বিষয়ানুপসেবতে ॥ 9 ॥
উত্ক্রামংতং স্থিতং বাপি ভুংজানং বা গুণান্বিতম্ ।
বিমূঢা নানুপশ্য়ংতি পশ্য়ংতি জ্ঞানচক্ষুষঃ ॥ 10 ॥
যতংতো যোগিনশ্চৈনং পশ্য়ংত্য়াত্মন্যবস্থিতম্ ।
যতংতোঽপ্যকৃতাত্মানো নৈনং পশ্য়ংত্যচেতসঃ ॥ 11 ॥
যদাদিত্যগতং তেজো জগদ্ভাসযতেঽখিলম্ ।
যচ্চংদ্রমসি যচ্চাগ্নৌ তত্তেজো বিদ্ধি মামকম্ ॥ 12 ॥
গামাবিশ্য় চ ভূতানি ধারয়াম্যহমোজসা ।
পুষ্ণামি চৌষধীঃ সর্বাঃ সোমো ভূত্বা রসাত্মকঃ ॥ 13 ॥
অহং বৈশ্বানরো ভূত্বা প্রাণিনাং দেহমাশ্রিতঃ ।
প্রাণাপানসমায়ুক্তঃ পচাম্যন্নং চতুর্বিধম্ ॥ 14 ॥
সর্বস্য় চাহং হৃদি সন্নিবিষ্টো মত্তঃ স্মৃতির্জ্ঞানমপোহনং চ।
বেদৈশ্চ সর্বৈরহমেব বেদ্য়ো বেদাংতকৃদ্বেদবিদেব চাহম্ ॥ 15 ॥
দ্বাবিমৌ পুরুষৌ লোকে ক্ষরশ্চাক্ষর এব চ ।
ক্ষরঃ সর্বাণি ভূতানি কূটস্থোঽক্ষর উচ্যতে ॥ 16 ॥
উত্তমঃ পুরুষস্ত্বন্য়ঃ পরমাত্মেত্য়ুধাহৃতঃ ।
যো লোকত্রযমাবিশ্য় বিভর্ত্যব্যয় ঈশ্বরঃ ॥ 17 ॥
যস্মাত্ক্ষরমতীতোঽহমক্ষরাদপি চোত্তমঃ ।
অতোঽস্মি লোকে বেদে চ প্রথিতঃ পুরুষোত্তমঃ ॥ 18 ॥
যো মামেবমসংমূঢো জানাতি পুরুষোত্তমম্ ।
স সর্ববিদ্ভজতি মাং সর্বভাবেন ভারত ॥ 19 ॥
ইতি গুহ্যতমং শাস্ত্রমিদমুক্তং ময়ানঘ ।
এতদ্বুদ্ধ্বা বুদ্ধিমান্স্য়াত্কৃতকৃত্যশ্চ ভারত ॥ 20 ॥
ওং তত্সদিতি শ্রীমদ্ভগবদ্গীতাসূপনিষত্সু ব্রহ্মবিদ্য়ায়াং যোগশাস্ত্রে শ্রীকৃষ্ণার্জুনসংবাদে
পুরুষোত্তময়োগো নাম পংচদশোঽধ্য়ায়ঃ ॥15 ॥
