॥ 𑌪𑌂𑌚𑌮𑌃 𑌸𑌰𑍍𑌗𑌃 ॥
॥ 𑌸𑌾𑌕𑌾𑌂𑌕𑍍𑌷𑌪𑍁𑌂𑌡𑌰𑍀𑌕𑌾𑌕𑍍𑌷𑌃 ॥
𑌅𑌹𑌮𑌿𑌹 𑌨𑌿𑌵𑌸𑌾𑌮𑌿 𑌯𑌾𑌹𑌿 𑌰𑌾𑌧𑌾𑌂 𑌅𑌨𑍁𑌨𑌯 𑌮𑌦𑍍𑌵𑌚𑌨𑍇𑌨 𑌚𑌾𑌨𑌯𑍇𑌥𑌾𑌃 ।
𑌇𑌤𑌿 𑌮𑌧𑍁𑌰𑌿𑌪𑍁𑌣𑌾 𑌸𑌖𑍀 𑌨𑌿𑌯𑍁𑌕𑍍𑌤𑌾 𑌸𑍍𑌵𑌯𑌮𑌿𑌦𑌮𑍇𑌤𑍍𑌯 𑌪𑍁𑌨𑌰𑍍𑌜𑌗𑌾𑌦 𑌰𑌾𑌧𑌾𑌮𑍍 ॥ 31 ॥
॥ 𑌗𑍀𑌤𑌂 10 ॥
𑌵𑌹𑌤𑌿 𑌮𑌲𑌯𑌸𑌮𑍀𑌰𑍇 𑌮𑌦𑌨𑌮𑍁𑌪𑌨𑌿𑌧𑌾𑌯 ।
𑌸𑍍𑌫𑍁𑌟𑌤𑌿 𑌕𑍁𑌸𑍁𑌮𑌨𑌿𑌕𑌰𑍇 𑌵𑌿𑌰𑌹𑌿𑌹𑍃𑌦𑌯𑌦𑌲𑌨𑌾𑌯 ॥
𑌤𑌵 𑌵𑌿𑌰𑌹𑍇 𑌵𑌨𑌮𑌾𑌲𑍀 𑌸𑌖𑌿 𑌸𑍀𑌦𑌤𑌿 ॥ 1 ॥
𑌦𑌹𑌤𑌿 𑌶𑌿𑌶𑌿𑌰𑌮𑌯𑍂𑌖𑍇 𑌮𑌰𑌣𑌮𑌨𑍁𑌕𑌰𑍋𑌤𑌿 ।
𑌪𑌤𑌤𑌿 𑌮𑌦𑌨𑌵𑌿𑌶𑌿𑌖𑍇 𑌵𑌿𑌲𑌪𑌤𑌿 𑌵𑌿𑌕𑌲𑌤𑌰𑍋𑌽𑌤𑌿 ॥ 2 ॥
𑌧𑍍𑌵𑌨𑌤𑌿 𑌮𑌧𑍁𑌪𑌸𑌮𑍂𑌹𑍇 𑌶𑍍𑌰𑌵𑌣𑌮𑌪𑌿𑌦𑌧𑌾𑌤𑌿 ।
𑌮𑌨𑌸𑌿 𑌚𑌲𑌿𑌤𑌵𑌿𑌰𑌹𑍇 𑌨𑌿𑌶𑌿 𑌨𑌿𑌶𑌿 𑌰𑍁𑌜𑌮𑍁𑌪𑌯𑌾𑌤𑌿 ॥ 3 ॥
𑌵𑌸𑌤𑌿 𑌵𑌿𑌪𑌿𑌨𑌵𑌿𑌤𑌾𑌨𑍇 𑌤𑍍𑌯𑌜𑌤𑌿 𑌲𑌲𑌿𑌤𑌧𑌾𑌮 ।
𑌲𑍁𑌠𑌤𑌿 𑌧𑌰𑌣𑌿𑌶𑌯𑌨𑍇 𑌬𑌹𑍁 𑌵𑌿𑌲𑌪𑌤𑌿 𑌤𑌵 𑌨𑌾𑌮 ॥ 4 ॥
𑌰𑌣𑌤𑌿 𑌪𑌿𑌕𑌸𑌮𑌵𑌾𑌯𑍇 𑌪𑍍𑌰𑌤𑌿𑌦𑌿𑌶𑌮𑌨𑍁𑌯𑌾𑌤𑌿 ।
𑌹𑌸𑌤𑌿 𑌮𑌨𑍁𑌜𑌨𑌿𑌚𑌯𑍇 𑌵𑌿𑌰𑌹𑌮𑌪𑌲𑌪𑌤𑌿 𑌨𑍇𑌤𑌿 ॥ 5 ॥
𑌸𑍍𑌫𑍁𑌰𑌤𑌿 𑌕𑌲𑌰𑌵𑌰𑌾𑌵𑍇 𑌸𑍍𑌮𑌰𑌤𑌿 𑌮𑌣𑌿𑌤𑌮𑍇𑌵।
𑌤𑌵𑌰𑌤𑌿𑌸𑍁𑌖𑌵𑌿𑌭𑌵𑍇 𑌗𑌣𑌯𑌤𑌿 𑌸𑍁𑌗𑍁𑌣𑌮𑌤𑍀𑌵 ॥ 6 ॥
𑌤𑍍𑌵𑌦𑌭𑌿𑌧𑌶𑍁𑌭𑌦𑌮𑌾𑌸𑌂 𑌵𑌦𑌤𑌿 𑌨𑌰𑌿 𑌶𑍃𑌣𑍋𑌤𑌿 ।
𑌤𑌮𑌪𑌿 𑌜𑌪𑌤𑌿 𑌸𑌰𑌸𑌂 𑌯𑍁𑌵𑌤𑌿𑌷𑍁 𑌨 𑌰𑌤𑌿𑌮𑍁𑌪𑍈𑌤𑌿 ॥ ॥
𑌭𑌣𑌤𑌿 𑌕𑌵𑌿𑌜𑌯𑌦𑍇𑌵𑍇 𑌵𑌿𑌰𑌹𑌵𑌿𑌲𑌸𑌿𑌤𑍇𑌨 ।
𑌮𑌨𑌸𑌿 𑌰𑌭𑌸𑌵𑌿𑌭𑌵𑍇 𑌹𑌰𑌿𑌰𑍁𑌦𑌯𑌤𑍁 𑌸𑍁𑌕𑍃𑌤𑍇𑌨 ॥ ॥
𑌪𑍂𑌰𑍍𑌵𑌂 𑌯𑌤𑍍𑌰 𑌸𑌮𑌂 𑌤𑍍𑌵𑌯𑌾 𑌰𑌤𑌿𑌪𑌤𑍇𑌰𑌾𑌸𑌾𑌦𑌿𑌤𑌃 𑌸𑌿𑌦𑍍𑌧𑌯-𑌸𑍍𑌤𑌸𑍍𑌮𑌿𑌨𑍍𑌨𑍇𑌵 𑌨𑌿𑌕𑍁𑌂𑌜𑌮𑌨𑍍𑌮𑌥𑌮𑌹𑌾𑌤𑍀𑌰𑍍𑌥𑍇 𑌪𑍁𑌨𑌰𑍍𑌮𑌾𑌧𑌵𑌃 ।
𑌧𑍍𑌯𑌾𑌯𑌂𑌸𑍍𑌤𑍍𑌵𑌾𑌮𑌨𑌿𑌶𑌂 𑌜𑌪𑌨𑍍𑌨𑌪𑌿 𑌤𑌵𑍈𑌵𑌾𑌲𑌾𑌪𑌮𑌂𑌤𑍍𑌰𑌾𑌵𑌲𑍀𑌂 𑌭𑍂𑌯𑌸𑍍𑌤𑍍𑌵𑌤𑍍𑌕𑍁𑌚𑌕𑍁𑌂𑌭𑌨𑌿𑌰𑍍𑌭𑌰𑌪𑌰𑍀𑌰𑌂𑌭𑌾𑌮𑍃𑌤𑌂 𑌵𑌾𑌂𑌛𑌤𑌿 ॥ 32 ॥
॥ 𑌗𑍀𑌤𑌂 11 ॥
𑌰𑌤𑌿𑌸𑍁𑌖𑌸𑌾𑌰𑍇 𑌗𑌤𑌮𑌭𑌿𑌸𑌾𑌰𑍇 𑌮𑌦𑌨𑌮𑌨𑍋𑌹𑌰𑌵𑍇𑌶𑌮𑍍 ।
𑌨 𑌕𑍁𑌰𑍁 𑌨𑌿𑌤𑌂𑌬𑌿𑌨𑌿 𑌗𑌮𑌨𑌵𑌿𑌲𑌂𑌬𑌨𑌮𑌨𑍁𑌸𑌰 𑌤𑌂 𑌹𑍃𑌦𑌯𑍇𑌶𑌮𑍍 ॥
𑌧𑍀𑌰𑌸𑌮𑍀𑌰𑍇 𑌯𑌮𑍁𑌨𑌾𑌤𑍀𑌰𑍇 𑌵𑌸𑌤𑌿 𑌵𑌨𑍇 𑌵𑌨𑌮𑌾𑌲𑍀 ॥ 1 ॥
𑌨𑌾𑌮 𑌸𑌮𑍇𑌤𑌂 𑌕𑍃𑌤𑌸𑌂𑌕𑍇𑌤𑌂 𑌵𑌾𑌦𑌯𑌤𑍇 𑌮𑍃𑌦𑍁𑌵𑍇𑌣𑍁𑌮𑍍 ।
𑌬𑌹𑍁 𑌮𑌨𑍁𑌤𑍇 𑌨𑌨𑍁 𑌤𑍇 𑌤𑌨𑍁𑌸𑌂𑌗𑌤𑌪𑌵𑌨𑌚𑌲𑌿𑌤𑌮𑌪𑌿 𑌰𑍇𑌣𑍁𑌮𑍍 ॥ 2 ॥
𑌪𑌤𑌤𑌿 𑌪𑌤𑌤𑍍𑌰𑍇 𑌵𑌿𑌚𑌲𑌤𑌿 𑌪𑌤𑍍𑌰𑍇 𑌶𑌂𑌕𑌿𑌤𑌭𑌵𑌦𑍁𑌪𑌯𑌾𑌨𑌮𑍍 ।
𑌰𑌚𑌯𑌤𑌿 𑌶𑌯𑌨𑌂 𑌸𑌚𑌕𑌿𑌤𑌨𑌯𑌨𑌂 𑌪𑌶𑍍𑌯𑌤𑌿 𑌤𑌵 𑌪𑌂𑌥𑌾𑌨𑌮𑍍 ॥ 3 ॥
𑌮𑍁𑌖𑌰𑌮𑌧𑍀𑌰𑌂 𑌤𑍍𑌯𑌜 𑌮𑌂𑌜𑍀𑌰𑌂 𑌰𑌿𑌪𑍁𑌮𑌿𑌵 𑌕𑍇𑌲𑌿𑌷𑍁𑌲𑍋𑌲𑌮𑍍 ।
𑌚𑌲 𑌸𑌖𑌿 𑌕𑍁𑌂𑌜𑌂 𑌸𑌤𑌿𑌮𑌿𑌰𑌪𑍁𑌂𑌜𑌂 𑌶𑍀𑌲𑌯 𑌨𑍀𑌲𑌨𑌿𑌚𑍋𑌲𑌮𑍍 ॥ 4 ॥
𑌉𑌰𑌸𑌿 𑌮𑍁𑌰𑌾𑌰𑍇𑌰𑍁𑌪𑌹𑌿𑌤𑌹𑌾𑌰𑍇 𑌘𑌨 𑌇𑌵 𑌤𑌰𑌲𑌬𑌲𑌾𑌕𑍇 ।
𑌤𑌟𑌿𑌦𑌿𑌵 𑌪𑍀𑌤𑍇 𑌰𑌤𑌿𑌵𑌿𑌪𑌰𑍀𑌤𑍇 𑌰𑌾𑌜𑌸𑌿 𑌸𑍁𑌕𑍃𑌤𑌵𑌿𑌪𑌾𑌕𑍇 ॥ 5 ॥
𑌵𑌿𑌗𑌲𑌿𑌤𑌵𑌸𑌨𑌂 𑌪𑌰𑌿𑌹𑍃𑌤𑌰𑌸𑌨𑌂 𑌘𑌟𑌯 𑌜𑌘𑌨𑌮𑌪𑌿𑌧𑌾𑌨𑌮𑍍 ।
𑌕𑌿𑌸𑌲𑌯𑌶𑌯𑌨𑍇 𑌪𑌂𑌕𑌜𑌨𑌯𑌨𑍇 𑌨𑌿𑌧𑌿𑌮𑌿𑌵 𑌹𑌰𑍍𑌷𑌨𑌿𑌦𑌾𑌨𑌮𑍍 ॥ 6 ॥
𑌹𑌰𑌿𑌰𑌭𑌿𑌮𑌾𑌨𑍀 𑌰𑌜𑌨𑌿𑌰𑌿𑌦𑌾𑌨𑍀𑌮𑌿𑌯𑌮𑌪𑌿 𑌯𑌾𑌤𑌿 𑌵𑌿𑌰𑌾𑌮𑌮𑍍 ।
𑌕𑍁𑌰𑍁 𑌮𑌮 𑌵𑌚𑌨𑌂 𑌸𑌤𑍍𑌵𑌰𑌰𑌚𑌨𑌂 𑌪𑍂𑌰𑌯 𑌮𑌧𑍁𑌰𑌿𑌪𑍁𑌕𑌾𑌮𑌮𑍍 ॥ ॥
𑌶𑍍𑌰𑍀𑌜𑌯𑌦𑍇𑌵𑍇 𑌕𑍃𑌤𑌹𑌰𑌿𑌸𑍇𑌵𑍇 𑌭𑌣𑌤𑌿 𑌪𑌰𑌮𑌰𑌮𑌣𑍀𑌯𑌮𑍍 ।
𑌪𑍍𑌰𑌮𑍁𑌦𑌿𑌤𑌹𑍃𑌦𑌯𑌂 𑌹𑌰𑌿𑌮𑌤𑌿𑌸𑌦𑌯𑌂 𑌨𑌮𑌤 𑌸𑍁𑌕𑍃𑌤𑌕𑌮𑌨𑍀𑌯𑌮𑍍 ॥ ॥
𑌵𑌿𑌕𑌿𑌰𑌤𑌿 𑌮𑍁𑌹𑍁𑌃 𑌶𑍍𑌵𑌾𑌸𑌾𑌂𑌦𑌿𑌶𑌃 𑌪𑍁𑌰𑍋 𑌮𑍁𑌹𑍁𑌰𑍀𑌕𑍍𑌷𑌤𑍇 𑌪𑍍𑌰𑌵𑌿𑌶𑌤𑌿 𑌮𑍁𑌹𑍁𑌃 𑌕𑍁𑌂𑌜𑌂 𑌗𑍁𑌂𑌜𑌨𑍍𑌮𑍁𑌹𑍁𑌰𑍍𑌬𑌹𑍁 𑌤𑌾𑌮𑍍𑌯𑌤𑌿 ।
𑌰𑌚𑌯𑌤𑌿 𑌮𑍁𑌹𑍁𑌃 𑌶𑌯𑍍𑌯𑌾𑌂 𑌪𑌰𑍍𑌯𑌾𑌕𑍁𑌲𑌂 𑌮𑍁𑌹𑍁𑌰𑍀𑌕𑍍𑌷𑌤𑍇 𑌮𑌦𑌨𑌕𑌦𑌨𑌕𑍍𑌲𑌾𑌂𑌤𑌃 𑌕𑌾𑌂𑌤𑍇 𑌪𑍍𑌰𑌿𑌯𑌸𑍍𑌤𑌵 𑌵𑌰𑍍𑌤𑌤𑍇 ॥ 33 ॥
𑌤𑍍𑌵𑌦𑍍𑌵𑌾𑌮𑍍𑌯𑍇𑌨 𑌸𑌮𑌂 𑌸𑌮𑌗𑍍𑌰𑌮𑌧𑍁𑌨𑌾 𑌤𑌿𑌗𑍍𑌮𑌾𑌂𑌶𑍁𑌰𑌸𑍍𑌤𑌂 𑌗𑌤𑍋 𑌗𑍋𑌵𑌿𑌂𑌦𑌸𑍍𑌯 𑌮𑌨𑍋𑌰𑌥𑍇𑌨 𑌚 𑌸𑌮𑌂 𑌪𑍍𑌰𑌾𑌪𑍍𑌤𑌂 𑌤𑌮𑌃 𑌸𑌾𑌂𑌦𑍍𑌰𑌤𑌾𑌮𑍍 ।
𑌕𑍋𑌕𑌾𑌨𑌾𑌂 𑌕𑌰𑍁𑌣𑌸𑍍𑌵𑌨𑍇𑌨 𑌸𑌦𑍃𑌶𑍀 𑌦𑍀𑌰𑍍𑌘𑌾 𑌮𑌦𑌭𑍍𑌯𑌰𑍍𑌥𑌨𑌾 𑌤𑌨𑍍𑌮𑍁𑌗𑍍𑌧𑍇 𑌵𑌿𑌫𑌲𑌂 𑌵𑌿𑌲𑌂𑌬𑌨𑌮𑌸𑍌 𑌰𑌮𑍍𑌯𑍋𑌽𑌭𑌿𑌸𑌾𑌰𑌕𑍍𑌷𑌣𑌃 ॥ 34 ॥
𑌆𑌶𑍍𑌲𑍇𑌷𑌾𑌦𑌨𑍁 𑌚𑍁𑌂𑌬𑌨𑌾𑌦𑌨𑍁 𑌨𑌖𑍋𑌲𑍍𑌲𑍇𑌖𑌾𑌦𑌨𑍁 𑌸𑍍𑌵𑌾𑌂𑌤𑌜-𑌪𑍍𑌰𑍋𑌦𑍍𑌬𑍋𑌧𑌾𑌦𑌨𑍁 𑌸𑌂𑌭𑍍𑌰𑌮𑌾𑌦𑌨𑍁 𑌰𑌤𑌾𑌰𑌂𑌭𑌾𑌦𑌨𑍁 𑌪𑍍𑌰𑍀𑌤𑌯𑍋𑌃 ।
𑌅𑌨𑍍𑌯𑌾𑌰𑍍𑌥𑌂 𑌗𑌤𑌯𑍋𑌰𑍍𑌭𑍍𑌰𑌮𑌾𑌨𑍍𑌮𑌿𑌲𑌿𑌤𑌯𑍋𑌃 𑌸𑌂𑌭𑌾𑌷𑌣𑍈𑌰𑍍𑌜𑌾𑌨𑌤𑍋-𑌰𑍍𑌦𑌂𑌪𑌤𑍍𑌯𑍋𑌰𑌿𑌹 𑌕𑍋 𑌨 𑌕𑍋 𑌨 𑌤𑌮𑌸𑌿 𑌵𑍍𑌰𑍀𑌡𑌾𑌵𑌿𑌮𑌿𑌶𑍍𑌰𑍋 𑌰𑌸𑌃 ॥ 35 ॥
𑌸𑌭𑌯𑌚𑌕𑌿𑌤𑌂 𑌵𑌿𑌨𑍍𑌯𑌸𑍍𑌯𑌂𑌤𑍀𑌂 𑌦𑍃𑌶𑍌 𑌤𑌿𑌮𑌿𑌰𑍇 𑌪𑌥𑌿 𑌪𑍍𑌰𑌤𑌿𑌤𑌰𑍁 𑌮𑍁𑌹𑍁𑌃 𑌸𑍍𑌥𑌿𑌤𑍍𑌵𑌾 𑌮𑌂𑌦𑌂 𑌪𑌦𑌾𑌨𑌿 𑌵𑌿𑌤𑌨𑍍𑌵𑌤𑍀𑌮𑍍 ।
𑌕𑌥𑌮𑌪𑌿 𑌰𑌹𑌃 𑌪𑍍𑌰𑌾𑌪𑍍𑌤𑌾𑌮𑌂𑌗𑍈𑌰𑌨𑌂𑌗𑌤𑌰𑌂𑌗𑌿𑌭𑌿𑌃 𑌸𑍁𑌮𑍁𑌖𑌿 𑌸𑍁𑌭𑌗𑌃 𑌪𑌶𑍍𑌯𑌨𑍍𑌸 𑌤𑍍𑌵𑌾𑌮𑍁𑌪𑍈𑌤𑍁 𑌕𑍃𑌤𑌾𑌰𑍍𑌥𑌤𑌾𑌮𑍍 ॥ 36 ॥
𑌰𑌾𑌧𑌾𑌮𑍁𑌗𑍍𑌧𑌮𑍁𑌖𑌾𑌰𑌵𑌿𑌂𑌦𑌮𑌧𑍁𑌪𑌸𑍍𑌤𑍍𑌰𑍈𑌲𑍋𑌕𑍍𑌯𑌮𑍌𑌲𑌿𑌸𑍍𑌥𑌲𑍀 𑌨𑍇𑌪𑌥𑍍𑌯𑍋𑌚𑌿𑌤𑌨𑍀𑌲𑌰𑌤𑍍𑌨𑌮𑌵𑌨𑍀𑌭𑌾𑌰𑌾𑌵𑌤𑌾𑌰𑌾𑌂𑌤𑌕𑌃।
𑌸𑍍𑌵𑌚𑍍𑌛𑌂𑌦𑌂 𑌵𑍍𑌰𑌜𑌸𑍁𑌬𑍍𑌦𑌰𑍀𑌜𑌨𑌮𑌨𑌸𑍍𑌤𑍋𑌷𑌪𑍍𑌰𑌦𑍋𑌷𑍋𑌦𑌯𑌃 𑌕𑌂𑌸𑌧𑍍𑌵𑌂𑌸𑌨𑌧𑍂𑌮𑌕𑍇𑌤𑍁𑌰𑌵𑌤𑍁 𑌤𑍍𑌵𑌾𑌂 𑌦𑍇𑌵𑌕𑍀𑌨𑌂𑌦𑌨𑌃॥ 36 + 1 ॥
॥ 𑌇𑌤𑌿 𑌶𑍍𑌰𑍀𑌗𑍀𑌤𑌗𑍋𑌵𑌿𑌂𑌦𑍇𑌽𑌭𑌿𑌸𑌾𑌰𑌿𑌕𑌵𑌰𑍍𑌣𑌨𑍇 𑌸𑌾𑌕𑌾𑌂𑌕𑍍𑌷𑌪𑍁𑌂𑌡𑌰𑍀𑌕𑌾𑌕𑍍𑌷𑍋 𑌨𑌾𑌮 𑌪𑌂𑌚𑌮𑌃 𑌸𑌰𑍍𑌗𑌃 ॥
