॥ 𑌦𑍍𑌵𑌿𑌤𑍀𑌯𑌃 𑌸𑌰𑍍𑌗𑌃 ॥
॥ 𑌅𑌕𑍍𑌲𑍇𑌶𑌕𑍇𑌶𑌵𑌃 ॥
𑌵𑌿𑌹𑌰𑌤𑌿 𑌵𑌨𑍇 𑌰𑌾𑌧𑌾 𑌸𑌾𑌧𑌾𑌰𑌣𑌪𑍍𑌰𑌣𑌯𑍇 𑌹𑌰𑍌 𑌵𑌿𑌗𑌲𑌿𑌤𑌨𑌿𑌜𑍋𑌤𑍍𑌕𑌰𑍍𑌷𑌾𑌦𑍀𑌰𑍍𑌷𑍍𑌯𑌾𑌵𑌶𑍇𑌨 𑌗𑌤𑌾𑌨𑍍𑌯𑌤𑌃 ।
𑌕𑍍𑌵𑌚𑌿𑌦𑌪𑌿 𑌲𑌤𑌾𑌕𑍁𑌂𑌜𑍇 𑌗𑍁𑌂𑌜𑌨𑍍𑌮𑌧𑍁𑌵𑍍𑌰𑌤𑌮𑌂𑌡𑌲𑍀-𑌮𑍁𑌖𑌰𑌶𑌿𑌖𑌰𑍇 𑌲𑍀𑌨𑌾 𑌦𑍀𑌨𑌾𑌪𑍍𑌯𑍁𑌵𑌾𑌚 𑌰𑌹𑌃 𑌸𑌖𑍀𑌮𑍍 ॥ 14 ॥
॥ 𑌗𑍀𑌤𑌂 5 ॥
𑌸𑌂𑌚𑌰𑌦𑌧𑌰𑌸𑍁𑌧𑌾𑌮𑌧𑍁𑌰𑌧𑍍𑌵𑌨𑌿𑌮𑍁𑌖𑌰𑌿𑌤𑌮𑍋𑌹𑌨𑌵𑌂𑌶𑌮𑍍 ।
𑌚𑌲𑌿𑌤𑌦𑍃𑌗𑌂𑌚𑌲𑌚𑌂𑌚𑌲𑌮𑍌𑌲𑌿𑌕𑌪𑍋𑌲𑌵𑌿𑌲𑍋𑌲𑌵𑌤𑌂𑌸𑌮𑍍 ॥
𑌰𑌾𑌸𑍇 𑌹𑌰𑌿𑌮𑌿𑌹 𑌵𑌿𑌹𑌿𑌤𑌵𑌿𑌲𑌾𑌸𑌂 𑌸𑍍𑌮𑌰𑌤𑌿 𑌮𑌨𑍋 𑌮𑌮 𑌕𑍃𑌤𑌪𑌰𑌿𑌹𑌾𑌸𑌮𑍍 ॥ 1 ॥
𑌚𑌂𑌦𑍍𑌰𑌕𑌚𑌾𑌰𑍁𑌮𑌯𑍂𑌰𑌶𑌿𑌖𑌂𑌡𑌕𑌮𑌂𑌡𑌲𑌵𑌲𑌯𑌿𑌤𑌕𑍇𑌶𑌮𑍍 ।
𑌪𑍍𑌰𑌚𑍁𑌰𑌪𑍁𑌰𑌂𑌦𑌰𑌧𑌨𑍁𑌰𑌨𑍁𑌰𑌂𑌜𑌿𑌤𑌮𑍇𑌦𑍁𑌰𑌮𑍁𑌦𑌿𑌰𑌸𑍁𑌵𑍇𑌶𑌮𑍍 ॥ 2 ॥
𑌗𑍋𑌪𑌕𑌦𑌂𑌬𑌨𑌿𑌤𑌂𑌬𑌵𑌤𑍀𑌮𑍁𑌖𑌚𑍁𑌂𑌬𑌨𑌲𑌂𑌭𑌿𑌤𑌲𑍋𑌭𑌮𑍍 ।
𑌬𑌂𑌧𑍁𑌜𑍀𑌵𑌮𑌧𑍁𑌰𑌾𑌧𑌰𑌪𑌲𑍍𑌲𑌵𑌮𑍁𑌲𑍍𑌲𑌸𑌿𑌤𑌸𑍍𑌮𑌿𑌤𑌶𑍋𑌭𑌮𑍍 ॥ 3 ॥
𑌵𑌿𑌪𑍁𑌲𑌪𑍁𑌲𑌕𑌭𑍁𑌜𑌪𑌲𑍍𑌲𑌵𑌵𑌲𑌯𑌿𑌤𑌵𑌲𑍍𑌲𑌵𑌯𑍁𑌵𑌤𑌿𑌸𑌹𑌸𑍍𑌰𑌮𑍍 ।
𑌕𑌰𑌚𑌰𑌣𑍋𑌰𑌸𑌿 𑌮𑌣𑌿𑌗𑌣𑌭𑍂𑌷𑌣𑌕𑌿𑌰𑌣𑌵𑌿𑌭𑌿𑌨𑍍𑌨𑌤𑌮𑌿𑌸𑍍𑌰𑌮𑍍 ॥ 4 ॥
𑌜𑌲𑌦𑌪𑌟𑌲𑌵𑌲𑌦𑌿𑌂𑌦𑍁𑌵𑌿𑌨𑌂𑌦𑌕𑌚𑌂𑌦𑌨𑌤𑌿𑌲𑌕𑌲𑌲𑌾𑌟𑌮𑍍 ।
𑌪𑍀𑌨𑌪𑌯𑍋𑌧𑌰𑌪𑌰𑌿𑌸𑌰𑌮𑌰𑍍𑌦𑌨𑌨𑌿𑌰𑍍𑌦𑌯𑌹𑍃𑌦𑌯𑌕𑌵𑌾𑌟𑌮𑍍 ॥ 5 ॥
𑌮𑌣𑌿𑌮𑌯𑌮𑌕𑌰𑌮𑌨𑍋𑌹𑌰𑌕𑍁𑌂𑌡𑌲𑌮𑌂𑌡𑌿𑌤𑌗𑌂𑌡𑌮𑍁𑌦𑌾𑌰𑌮𑍍 ।
𑌪𑍀𑌤𑌵𑌸𑌨𑌮𑌨𑍁𑌗𑌤𑌮𑍁𑌨𑌿𑌮𑌨𑍁𑌜𑌸𑍁𑌰𑌾𑌸𑍁𑌰𑌵𑌰𑌪𑌰𑌿𑌵𑌾𑌰𑌮𑍍 ॥ 6 ॥
𑌵𑌿𑌶𑌦𑌕𑌦𑌂𑌬𑌤𑌲𑍇 𑌮𑌿𑌲𑌿𑌤𑌂 𑌕𑌲𑌿𑌕𑌲𑍁𑌷𑌭𑌯𑌂 𑌶𑌮𑌯𑌂𑌤𑌮𑍍 ।
𑌮𑌾𑌮𑌪𑌿 𑌕𑌿𑌮𑌪𑌿 𑌤𑌰𑌂𑌗𑌦𑌨𑌂𑌗𑌦𑍃𑌶𑌾 𑌮𑌨𑌸𑌾 𑌰𑌮𑌯𑌂𑌤𑌮𑍍 ॥ ॥
𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌮𑌤𑌿𑌸𑍁𑌂𑌦𑌰𑌮𑍋𑌹𑌨𑌮𑌧𑍁𑌰𑌿𑌪𑍁𑌰𑍂𑌪𑌮𑍍 ।
𑌹𑌰𑌿𑌚𑌰𑌣𑌸𑍍𑌮𑌰𑌣𑌂 𑌪𑍍𑌰𑌤𑌿 𑌸𑌂𑌪𑍍𑌰𑌤𑌿 𑌪𑍁𑌣𑍍𑌯𑌵𑌤𑌾𑌮𑌨𑍁𑌰𑍂𑌪𑌮𑍍 ॥ ॥
𑌗𑌣𑌯𑌤𑌿 𑌗𑍁𑌣𑌗𑍍𑌰𑌾𑌮𑌂 𑌭𑌾𑌮𑌂 𑌭𑍍𑌰𑌮𑌾𑌦𑌪𑌿 𑌨𑍇𑌹𑌤𑍇 𑌵𑌹𑌤𑌿 𑌚 𑌪𑌰𑌿𑌤𑍋𑌷𑌂 𑌦𑍋𑌷𑌂 𑌵𑌿𑌮𑍁𑌂𑌚𑌤𑌿 𑌦𑍂𑌰𑌤𑌃 ।
𑌯𑍁𑌵𑌤𑌿𑌷𑍁 𑌵𑌲𑌸𑍍𑌤𑍃𑌷𑍍𑌣𑍇 𑌕𑍃𑌷𑍍𑌣𑍇 𑌵𑌿𑌹𑌾𑌰𑌿𑌣𑌿 𑌮𑌾𑌂 𑌵𑌿𑌨𑌾 𑌪𑍁𑌨𑌰𑌪𑌿 𑌮𑌨𑍋 𑌵𑌾𑌮𑌂 𑌕𑌾𑌮𑌂 𑌕𑌰𑍋𑌤𑌿 𑌕𑌰𑍋𑌮𑌿 𑌕𑌿𑌮𑍍 ॥ 15 ॥
॥ 𑌗𑍀𑌤𑌂 6 ॥
𑌨𑌿𑌭𑍃𑌤𑌨𑌿𑌕𑍁𑌂𑌜𑌗𑍃𑌹𑌂 𑌗𑌤𑌯𑌾 𑌨𑌿𑌶𑌿 𑌰𑌹𑌸𑌿 𑌨𑌿𑌲𑍀𑌯 𑌵𑌸𑌂𑌤𑌮𑍍 ।
𑌚𑌕𑌿𑌤𑌵𑌿𑌲𑍋𑌕𑌿𑌤𑌸𑌕𑌲𑌦𑌿𑌶𑌾 𑌰𑌤𑌿𑌰𑌭𑌸𑌰𑌸𑍇𑌨 𑌹𑌸𑌂𑌤𑌮𑍍 ॥
𑌸𑌖𑌿 𑌹𑍇 𑌕𑍇𑌶𑌿𑌮𑌥𑌨𑌮𑍁𑌦𑌾𑌰𑌂 𑌰𑌮𑌯 𑌮𑌯𑌾 𑌸𑌹 𑌮𑌦𑌨𑌮𑌨𑍋𑌰𑌥𑌭𑌾𑌵𑌿𑌤𑌯𑌾 𑌸𑌵𑌿𑌕𑌾𑌰𑌮𑍍 ॥ 1 ॥
𑌪𑍍𑌰𑌥𑌮𑌸𑌮𑌾𑌗𑌮𑌲𑌜𑍍𑌜𑌿𑌤𑌯𑌾 𑌪𑌟𑍁𑌚𑌾𑌟𑍁𑌶𑌤𑍈𑌰𑌨𑍁𑌕𑍂𑌲𑌮𑍍 ।
𑌮𑍃𑌦𑍁𑌮𑌧𑍁𑌰𑌸𑍍𑌮𑌿𑌤𑌭𑌾𑌷𑌿𑌤𑌯𑌾 𑌶𑌿𑌥𑌿𑌲𑍀𑌕𑍃𑌤𑌜𑌘𑌨𑌦𑍁𑌕𑍂𑌲𑌮𑍍 ॥ 2 ॥
𑌕𑌿𑌸𑌲𑌯𑌶𑌯𑌨𑌨𑌿𑌵𑍇𑌶𑌿𑌤𑌯𑌾 𑌚𑌿𑌰𑌮𑍁𑌰𑌸𑌿 𑌮𑌮𑍈𑌵 𑌶𑌯𑌾𑌨𑌮𑍍 ।
𑌕𑍃𑌤𑌪𑌰𑌿𑌰𑌂𑌭𑌣𑌚𑍁𑌂𑌬𑌨𑌯𑌾 𑌪𑌰𑌿𑌰𑌭𑍍𑌯 𑌕𑍃𑌤𑌾𑌧𑌰𑌪𑌾𑌨𑌮𑍍 ॥ 3 ॥
𑌅𑌲𑌸𑌨𑌿𑌮𑍀𑌲𑌿𑌤𑌲𑍋𑌚𑌨𑌯𑌾 𑌪𑍁𑌲𑌕𑌾𑌵𑌲𑌿𑌲𑌲𑌿𑌤𑌕𑌪𑍋𑌲𑌮𑍍 ।
𑌶𑍍𑌰𑌮𑌜𑌲𑌸𑌕𑌲𑌕𑌲𑍇𑌵𑌰𑌯𑌾 𑌵𑌰𑌮𑌦𑌨𑌮𑌦𑌾𑌦𑌤𑌿𑌲𑍋𑌲𑌮𑍍 ॥ 4 ॥
𑌕𑍋𑌕𑌿𑌲𑌕𑌲𑌰𑌵𑌕𑍂𑌜𑌿𑌤𑌯𑌾 𑌜𑌿𑌤𑌮𑌨𑌸𑌿𑌜𑌤𑌂𑌤𑍍𑌰𑌵𑌿𑌚𑌾𑌰𑌮𑍍 ।
𑌶𑍍𑌲𑌥𑌕𑍁𑌸𑍁𑌮𑌾𑌕𑍁𑌲𑌕𑍁𑌂𑌤𑌲𑌯𑌾 𑌨𑌖𑌲𑌿𑌖𑌿𑌤𑌘𑌨𑌸𑍍𑌤𑌨𑌭𑌾𑌰𑌮𑍍 ॥ 5 ॥
𑌚𑌰𑌣𑌰𑌣𑌿𑌤𑌮𑌨𑌿𑌨𑍂𑌪𑍁𑌰𑌯𑌾 𑌪𑌰𑌿𑌪𑍂𑌰𑌿𑌤𑌸𑍁𑌰𑌤𑌵𑌿𑌤𑌾𑌨𑌮𑍍 ।
𑌮𑍁𑌖𑌰𑌵𑌿𑌶𑍃𑌂𑌖𑌲𑌮𑍇𑌖𑌲𑌯𑌾 𑌸𑌕𑌚𑌗𑍍𑌰𑌹𑌚𑍁𑌂𑌬𑌨𑌦𑌾𑌨𑌮𑍍 ॥ 6 ॥
𑌰𑌤𑌿𑌸𑍁𑌖𑌸𑌮𑌯𑌰𑌸𑌾𑌲𑌸𑌯𑌾 𑌦𑌰𑌮𑍁𑌕𑍁𑌲𑌿𑌤𑌨𑌯𑌨𑌸𑌰𑍋𑌜𑌮𑍍 ।
𑌨𑌿𑌃𑌸𑌹𑌨𑌿𑌪𑌤𑌿𑌤𑌤𑌨𑍁𑌲𑌤𑌯𑌾 𑌮𑌧𑍁𑌸𑍂𑌦𑌨𑌮𑍁𑌦𑌿𑌤𑌮𑌨𑍋𑌜𑌮𑍍 ॥ ॥
𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌮𑌿𑌦𑌮𑌤𑌿𑌶𑌯𑌮𑌧𑍁𑌰𑌿𑌪𑍁𑌨𑌿𑌧𑍁𑌵𑌨𑌶𑍀𑌲𑌮𑍍 ।
𑌸𑍁𑌖𑌮𑍁𑌤𑍍𑌕𑌂𑌠𑌿𑌤𑌗𑍋𑌪𑌵𑌧𑍂𑌕𑌥𑌿𑌤𑌂 𑌵𑌿𑌤𑌨𑍋𑌤𑍁 𑌸𑌲𑍀𑌲𑌮𑍍 ॥ ॥
𑌹𑌸𑍍𑌤𑌸𑍍𑌰𑌸𑍍𑌤𑌵𑌿𑌲𑌾𑌸𑌵𑌂𑌶𑌮𑌨𑍃𑌜𑍁𑌭𑍍𑌰𑍂𑌵𑌲𑍍𑌲𑌿𑌮𑌦𑍍𑌬𑌲𑍍𑌲𑌵𑍀-𑌵𑍃𑌂𑌦𑍋𑌤𑍍𑌸𑌾𑌰𑌿𑌦𑍃𑌗𑌂𑌤𑌵𑍀𑌕𑍍𑌷𑌿𑌤𑌮𑌤𑌿𑌸𑍍𑌵𑍇𑌦𑌾𑌰𑍍𑌦𑍍𑌰𑌗𑌂𑌡𑌸𑍍𑌥𑌲𑌮𑍍 ।
𑌮𑌾𑌮𑍁𑌦𑍍𑌵𑍀𑌕𑍍𑌷𑍍𑌯 𑌵𑌿𑌲𑌕𑍍𑌷𑌿𑌤𑌂 𑌸𑍍𑌮𑌿𑌤𑌸𑍁𑌧𑌾𑌮𑍁𑌗𑍍𑌧𑌾𑌨𑌨𑌂 𑌕𑌾𑌨𑌨𑍇 𑌗𑍋𑌵𑌿𑌂𑌦𑌂 𑌵𑍍𑌰𑌜𑌸𑍁𑌂𑌦𑌰𑍀𑌗𑌣𑌵𑍃𑌤𑌂 𑌪𑌶𑍍𑌯𑌾𑌮𑌿 𑌹𑍃𑌷𑍍𑌯𑌾𑌮𑌿 𑌚 ॥ 16 ॥
𑌦𑍁𑌰𑌾𑌲𑍋𑌕𑌸𑍍𑌤𑍋𑌕𑌸𑍍𑌤𑌬𑌕𑌨𑌵𑌕𑌾𑌶𑍋𑌕𑌲𑌤𑌿𑌕𑌾-𑌵𑌿𑌕𑌾𑌸𑌃 𑌕𑌾𑌸𑌾𑌰𑍋𑌪𑌵𑌨𑌪𑌵𑌨𑍋𑌽𑌪𑌿 𑌵𑍍𑌯𑌥𑌯𑌤𑌿 ।
𑌅𑌪𑌿 𑌭𑍍𑌰𑌾𑌮𑍍𑌯𑌦𑍍𑌭𑍃𑌂𑌗𑍀𑌰𑌣𑌿𑌤𑌰𑌮𑌣𑍀𑌯𑌾 𑌨 𑌮𑍁𑌕𑍁𑌲-𑌪𑍍𑌰𑌸𑍂𑌤𑌿𑌶𑍍𑌚𑍂𑌤𑌾𑌨𑌾𑌂 𑌸𑌖𑌿 𑌶𑌿𑌖𑌰𑌿𑌣𑍀𑌯𑌂 𑌸𑍁𑌖𑌯𑌤𑌿 ॥ 1 ॥
॥ 𑌇𑌤𑌿 𑌗𑍀𑌤𑌗𑍋𑌵𑌿𑌂𑌦𑍇 𑌅𑌕𑍍𑌲𑍇𑌶𑌕𑍇𑌶𑌵𑍋 𑌨𑌾𑌮 𑌦𑍍𑌵𑌿𑌤𑍀𑌯𑌃 𑌸𑌰𑍍𑌗𑌃 ॥
