𑌪𑍍𑌰𑌹𑍍𑌲𑌾𑌦𑌨𑌾𑌰𑌦𑌪𑌰𑌾𑌶𑌰𑌪𑍁𑌂𑌡𑌰𑍀𑌕-
𑌵𑍍𑌯𑌾𑌸𑌾𑌂𑌬𑌰𑍀𑌷𑌶𑍁𑌕𑌶𑍌𑌨𑌕𑌭𑍀𑌷𑍍𑌮𑌕𑌾𑌵𑍍𑌯𑌾𑌃 ।
𑌰𑍁𑌕𑍍𑌮𑌾𑌂𑌗𑌦𑌾𑌰𑍍𑌜𑍁𑌨𑌵𑌸𑌿𑌷𑍍𑌠𑌵𑌿𑌭𑍀𑌷𑌣𑌾𑌦𑍍𑌯𑌾
𑌏𑌤𑌾𑌨𑌹𑌂 𑌪𑌰𑌮𑌭𑌾𑌗𑌵𑌤𑌾𑌨𑍍 𑌨𑌮𑌾𑌮𑌿 ॥ 1॥

𑌲𑍋𑌮𑌹𑌰𑍍𑌷𑌣 𑌉𑌵𑌾𑌚 ।
𑌧𑌰𑍍𑌮𑍋 𑌵𑌿𑌵𑌰𑍍𑌧𑌤𑌿 𑌯𑍁𑌧𑌿𑌷𑍍𑌠𑌿𑌰𑌕𑍀𑌰𑍍𑌤𑌨𑍇𑌨
𑌪𑌾𑌪𑌂 𑌪𑍍𑌰𑌣𑌶𑍍𑌯𑌤𑌿 𑌵𑍃𑌕𑍋𑌦𑌰𑌕𑍀𑌰𑍍𑌤𑌨𑍇𑌨 ।
𑌶𑌤𑍍𑌰𑍁𑌰𑍍𑌵𑌿𑌨𑌶𑍍𑌯𑌤𑌿 𑌧𑌨𑌂𑌜𑌯𑌕𑍀𑌰𑍍𑌤𑌨𑍇𑌨
𑌮𑌾𑌦𑍍𑌰𑍀𑌸𑍁𑌤𑍌 𑌕𑌥𑌯𑌤𑌾𑌂 𑌨 𑌭𑌵𑌂𑌤𑌿 𑌰𑍋𑌗𑌾𑌃 ॥ 2॥

𑌬𑍍𑌰𑌹𑍍𑌮𑍋𑌵𑌾𑌚 ।
𑌯𑍇 𑌮𑌾𑌨𑌵𑌾 𑌵𑌿𑌗𑌤𑌰𑌾𑌗𑌪𑌰𑌾𑌽𑌪𑌰𑌜𑍍𑌞𑌾
𑌨𑌾𑌰𑌾𑌯𑌣𑌂 𑌸𑍁𑌰𑌗𑍁𑌰𑍁𑌂 𑌸𑌤𑌤𑌂 𑌸𑍍𑌮𑌰𑌂𑌤𑌿 ।
𑌧𑍍𑌯𑌾𑌨𑍇𑌨 𑌤𑍇𑌨 𑌹𑌤𑌕𑌿𑌲𑍍𑌬𑌿𑌷 𑌚𑍇𑌤𑌨𑌾𑌸𑍍𑌤𑍇
𑌮𑌾𑌤𑍁𑌃 𑌪𑌯𑍋𑌧𑌰𑌰𑌸𑌂 𑌨 𑌪𑍁𑌨𑌃 𑌪𑌿𑌬𑌂𑌤𑌿 ॥ 3॥

𑌇𑌂𑌦𑍍𑌰 𑌉𑌵𑌾𑌚 ।
𑌨𑌾𑌰𑌾𑌯𑌣𑍋 𑌨𑌾𑌮 𑌨𑌰𑍋 𑌨𑌰𑌾𑌣𑌾𑌂
𑌪𑍍𑌰𑌸𑌿𑌦𑍍𑌧𑌚𑍌𑌰𑌃 𑌕𑌥𑌿𑌤𑌃 𑌪𑍃𑌥𑌿𑌵𑍍𑌯𑌾𑌮𑍍 ।
𑌅𑌨𑍇𑌕𑌜𑌨𑍍𑌮𑌾𑌰𑍍𑌜𑌿𑌤𑌪𑌾𑌪𑌸𑌂𑌚𑌯𑌂
𑌹𑌰𑌤𑍍𑌯𑌶𑍇𑌷𑌂 𑌸𑍍𑌮𑍃𑌤𑌮𑌾𑌤𑍍𑌰 𑌏𑌵 𑌯𑌃 ॥ 4॥

𑌯𑍁𑌧𑌿𑌷𑍍𑌠𑌿𑌰 𑌉𑌵𑌾𑌚 ।
𑌮𑍇𑌘𑌶𑍍𑌯𑌾𑌮𑌂 𑌪𑍀𑌤𑌕𑍌𑌶𑍇𑌯𑌵𑌾𑌸𑌂
𑌶𑍍𑌰𑍀𑌵𑌤𑍍𑌸𑌾𑌂𑌕𑌂 𑌕𑍌𑌸𑍍𑌤𑍁𑌭𑍋𑌦𑍍𑌭𑌾𑌸𑌿𑌤𑌾𑌂𑌗𑌮𑍍 ।
𑌪𑍁𑌣𑍍𑌯𑍋𑌪𑍇𑌤𑌂 𑌪𑍁𑌂𑌡𑌰𑍀𑌕𑌾𑌯𑌤𑌾𑌕𑍍𑌷𑌂
𑌵𑌿𑌷𑍍𑌣𑍁𑌂 𑌵𑌂𑌦𑍇 𑌸𑌰𑍍𑌵𑌲𑍋𑌕𑍈𑌕𑌨𑌾𑌥𑌮𑍍 ॥ 5॥

𑌭𑍀𑌮 𑌉𑌵𑌾𑌚 ।
𑌜𑌲𑍌𑌘𑌮𑌗𑍍𑌨𑌾 𑌸𑌚𑌰𑌾𑌽𑌚𑌰𑌾 𑌧𑌰𑌾
𑌵𑌿𑌷𑌾𑌣𑌕𑍋𑌟𑍍𑌯𑌾𑌽𑌖𑌿𑌲𑌵𑌿𑌶𑍍𑌵𑌮𑍂𑌰𑍍𑌤𑌿𑌨𑌾 ।
𑌸𑌮𑍁𑌦𑍍𑌧𑍃𑌤𑌾 𑌯𑍇𑌨 𑌵𑌰𑌾𑌹𑌰𑍂𑌪𑌿𑌣𑌾
𑌸 𑌮𑍇 𑌸𑍍𑌵𑌯𑌂𑌭𑍂𑌰𑍍𑌭𑌗𑌵𑌾𑌨𑍍 𑌪𑍍𑌰𑌸𑍀𑌦𑌰𑍁 ॥ 6॥

𑌅𑌰𑍍𑌜𑍁𑌨 𑌉𑌵𑌾𑌚 ।
𑌅𑌚𑌿𑌂𑌤𑍍𑌯𑌮𑌵𑍍𑌯𑌕𑍍𑌤𑌮𑌨𑌂𑌤𑌮𑌵𑍍𑌯𑌯𑌂
𑌵𑌿𑌭𑍁𑌂 𑌪𑍍𑌰𑌭𑍁𑌂 𑌭𑌾𑌵𑌿𑌤𑌵𑌿𑌶𑍍𑌵𑌭𑌾𑌵𑌨𑌮𑍍 ।
𑌤𑍍𑌰𑍈𑌲𑍋𑌕𑍍𑌯𑌵𑌿𑌸𑍍𑌤𑌾𑌰𑌵𑌿𑌚𑌾𑌰𑌕𑌾𑌰𑌕𑌂
𑌹𑌰𑌿𑌂 𑌪𑍍𑌰𑌪𑌨𑍍𑌨𑍋𑌽𑌸𑍍𑌮𑌿 𑌗𑌤𑌿𑌂 𑌮𑌹𑌾𑌤𑍍𑌮𑌨𑌾𑌮𑍍 ॥ 𑍭॥

𑌨𑌕𑍁𑌲 𑌉𑌵𑌾𑌚 ।
𑌯𑌦𑌿 𑌗𑌮𑌨𑌮𑌧𑌸𑍍𑌤𑌾𑌤𑍍 𑌕𑌾𑌲𑌪𑌾𑌶𑌾𑌨𑍁𑌬𑌂𑌧𑌾𑌦𑍍
𑌯𑌦𑌿 𑌚 𑌕𑍁𑌲𑌵𑌿𑌹𑍀𑌨𑍇 𑌜𑌾𑌯𑌤𑍇 𑌪𑌕𑍍𑌷𑌿𑌕𑍀𑌟𑍇 ।
𑌕𑍃𑌮𑌿𑌶𑌤𑌮𑌪𑌿 𑌗𑌤𑍍𑌵𑌾 𑌧𑍍𑌯𑌾𑌯𑌤𑍇 𑌚𑌾𑌂𑌤𑌰𑌾𑌤𑍍𑌮𑌾
𑌮𑌮 𑌭𑌵𑌤𑍁 𑌹𑍃𑌦𑌿𑌸𑍍𑌥𑌾 𑌕𑍇𑌶𑌵𑍇 𑌭𑌕𑍍𑌤𑌿𑌰𑍇𑌕𑌾 ॥ 𑍮॥

𑌸𑌹𑌦𑍇𑌵 𑌉𑌵𑌾𑌚 ।
𑌤𑌸𑍍𑌯 𑌯𑌜𑍍𑌞𑌵𑌰𑌾𑌹𑌸𑍍𑌯 𑌵𑌿𑌷𑍍𑌣𑍋𑌰𑌤𑍁𑌲𑌤𑍇𑌜𑌸𑌃 ।
𑌪𑍍𑌰𑌣𑌾𑌮𑌂 𑌯𑍇 𑌪𑍍𑌰𑌕𑍁𑌰𑍍𑌵𑌂𑌤𑌿 𑌤𑍇𑌷𑌾𑌮𑌪𑌿 𑌨𑌮𑍋 𑌨𑌮𑌃 ॥ 𑍯॥

𑌕𑍁𑌂𑌤𑍀 𑌉𑌵𑌾𑌚 ।
𑌸𑍍𑌵𑌕𑌰𑍍𑌮𑌫𑌲𑌨𑌿𑌰𑍍𑌦𑌿𑌷𑍍𑌟𑌾𑌂 𑌯𑌾𑌂 𑌯𑌾𑌂 𑌯𑍋𑌨𑌿𑌂 𑌵𑍍𑌰𑌜𑌾𑌮𑍍𑌯𑌹𑌮𑍍 ।
𑌤𑌸𑍍𑌯𑌾𑌂 𑌤𑌸𑍍𑌯𑌾𑌂 𑌹𑍃𑌷𑍀𑌕𑍇𑌶 𑌤𑍍𑌵𑌯𑌿 𑌭𑌕𑍍𑌤𑌿𑌰𑍍𑌦𑍃𑌢𑌾𑌽𑌸𑍍𑌤𑍁 𑌮𑍇 ॥ 10॥

𑌮𑌾𑌦𑍍𑌰𑍀 𑌉𑌵𑌾𑌚 ।
𑌕𑍃𑌷𑍍𑌣𑍇 𑌰𑌤𑌾𑌃 𑌕𑍃𑌷𑍍𑌣𑌮𑌨𑍁𑌸𑍍𑌮𑌰𑌂𑌤𑌿
𑌰𑌾𑌤𑍍𑌰𑍌 𑌚 𑌕𑍃𑌷𑍍𑌣𑌂 𑌪𑍁𑌨𑌰𑍁𑌤𑍍𑌥𑌿𑌤𑌾 𑌯𑍇 ।
𑌤𑍇 𑌭𑌿𑌨𑍍𑌨𑌦𑍇𑌹𑌾𑌃 𑌪𑍍𑌰𑌵𑌿𑌶𑌂𑌤𑌿 𑌕𑍃𑌷𑍍𑌣𑍇
𑌹𑌵𑌿𑌰𑍍𑌯𑌥𑌾 𑌮𑌂𑌤𑍍𑌰𑌹𑍁𑌤𑌂 𑌹𑍁𑌤𑌾𑌶𑍇 ॥ 11॥

𑌦𑍍𑌰𑍌𑌪𑌦𑍀 𑌉𑌵𑌾𑌚 ।
𑌕𑍀𑌟𑍇𑌷𑍁 𑌪𑌕𑍍𑌷𑌿𑌷𑍁 𑌮𑍃𑌗𑍇𑌷𑍁 𑌸𑌰𑍀𑌸𑍃𑌪𑍇𑌷𑍁
𑌰𑌕𑍍𑌷𑌃𑌪𑌿𑌶𑌾𑌚𑌮𑌨𑍁𑌜𑍇𑌷𑍍𑌵𑌪𑌿 𑌯𑌤𑍍𑌰 𑌯𑌤𑍍𑌰 ।
𑌜𑌾𑌤𑌸𑍍𑌯 𑌮𑍇 𑌭𑌵𑌤𑍁 𑌕𑍇𑌶𑌵 𑌤𑍍𑌵𑌤𑍍𑌪𑍍𑌰𑌸𑌾𑌦𑌾𑌤𑍍
𑌤𑍍𑌵𑌯𑍍𑌯𑍇𑌵 𑌭𑌕𑍍𑌤𑌿𑌰𑌚𑌲𑌾𑌽𑌵𑍍𑌯𑌭𑌿𑌚𑌾𑌰𑌿𑌣𑍀 𑌚 ॥ 12॥

𑌸𑍁𑌭𑌦𑍍𑌰𑌾 𑌉𑌵𑌾𑌚 ।
𑌏𑌕𑍋𑌽𑌪𑌿 𑌕𑍃𑌷𑍍𑌣𑌸𑍍𑌯 𑌕𑍃𑌤𑌃 𑌪𑍍𑌰𑌣𑌾𑌮𑍋
𑌦𑌶𑌾𑌶𑍍𑌵𑌮𑍇𑌧𑌾𑌵𑌭𑍃𑌥𑍇𑌨 𑌤𑍁𑌲𑍍𑌯𑌃 ।
𑌦𑌶𑌾𑌶𑍍𑌵𑌮𑍇𑌧𑍀 𑌪𑍁𑌨𑌰𑍇𑌤𑌿 𑌜𑌨𑍍𑌮
𑌕𑍃𑌷𑍍𑌣𑌪𑍍𑌰𑌣𑌾𑌮𑍀 𑌨 𑌪𑍁𑌨𑌰𑍍𑌭𑌵𑌾𑌯 ॥ 13॥

𑌅𑌭𑌿𑌮𑌨𑍍𑌯𑍁𑌰𑍁𑌵𑌾𑌚 ।
𑌗𑍋𑌵𑌿𑌂𑌦 𑌗𑍋𑌵𑌿𑌂𑌦 𑌹𑌰𑍇 𑌮𑍁𑌰𑌾𑌰𑍇
𑌗𑍋𑌵𑌿𑌂𑌦 𑌗𑍋𑌵𑌿𑌂𑌦 𑌮𑍁𑌕𑍁𑌂𑌦 𑌕𑍃𑌷𑍍𑌣
𑌗𑍋𑌵𑌿𑌂𑌦 𑌗𑍋𑌵𑌿𑌂𑌦 𑌰𑌥𑌾𑌂𑌗𑌪𑌾𑌣𑍇 ।
𑌗𑍋𑌵𑌿𑌂𑌦 𑌗𑍋𑌵𑌿𑌂𑌦 𑌨𑌮𑌾𑌮𑌿 𑌨𑌿𑌤𑍍𑌯𑌮𑍍 ॥ 14॥

𑌧𑍃𑌷𑍍𑌟𑌦𑍍𑌯𑍁𑌮𑍍𑌨 𑌉𑌵𑌾𑌚 ।
𑌶𑍍𑌰𑍀𑌰𑌾𑌮 𑌨𑌾𑌰𑌾𑌯𑌣 𑌵𑌾𑌸𑍁𑌦𑍇𑌵
𑌗𑍋𑌵𑌿𑌂𑌦 𑌵𑍈𑌕𑍁𑌂𑌠 𑌮𑍁𑌕𑍁𑌂𑌦 𑌕𑍃𑌷𑍍𑌣 ।
𑌶𑍍𑌰𑍀𑌕𑍇𑌶𑌵𑌾𑌨𑌂𑌤 𑌨𑍃𑌸𑌿𑌂𑌹 𑌵𑌿𑌷𑍍𑌣𑍋
𑌮𑌾𑌂 𑌤𑍍𑌰𑌾𑌹𑌿 𑌸𑌂𑌸𑌾𑌰𑌭𑍁𑌜𑌂𑌗𑌦𑌷𑍍𑌟𑌮𑍍 ॥ 15॥

𑌸𑌾𑌤𑍍𑌯𑌕𑌿𑌰𑍁𑌵𑌾𑌚 ।
𑌅𑌪𑍍𑌰𑌮𑍇𑌯 𑌹𑌰𑍇 𑌵𑌿𑌷𑍍𑌣𑍋 𑌕𑍃𑌷𑍍𑌣 𑌦𑌾𑌮𑍋𑌦𑌰𑌾𑌽𑌚𑍍𑌯𑍁𑌤 ।
𑌗𑍋𑌵𑌿𑌂𑌦𑌾𑌨𑌂𑌤 𑌸𑌰𑍍𑌵𑍇𑌶 𑌵𑌾𑌸𑍁𑌦𑍇𑌵 𑌨𑌮𑍋𑌽𑌸𑍍𑌤𑍁 𑌤𑍇 ॥ 16॥

𑌉𑌦𑍍𑌧𑌵 𑌉𑌵𑌾𑌚 ।
𑌵𑌾𑌸𑍁𑌦𑍇𑌵𑌂 𑌪𑌰𑌿𑌤𑍍𑌯𑌜𑍍𑌯 𑌯𑍋𑌽𑌨𑍍𑌯𑌂 𑌦𑍇𑌵𑌮𑍁𑌪𑌾𑌸𑌤𑍇 ।
𑌤𑍃𑌷𑌿𑌤𑍋 𑌜𑌾𑌹𑍍𑌨𑌵𑍀𑌤𑍀𑌰𑍇 𑌕𑍂𑌪𑌂 𑌖𑌨𑌤𑌿 𑌦𑍁𑌰𑍍𑌮𑌤𑌿𑌃 ॥ 1𑍭॥

𑌧𑍌𑌮𑍍𑌯 𑌉𑌵𑌾𑌚 ।
𑌅𑌪𑌾𑌂 𑌸𑌮𑍀𑌪𑍇 𑌶𑌯𑌨𑌾𑌸𑌨𑌸𑍍𑌥𑌿𑌤𑍇
𑌦𑌿𑌵𑌾 𑌚 𑌰𑌾𑌤𑍍𑌰𑍌 𑌚 𑌯𑌥𑌾𑌧𑌿𑌗𑌚𑍍𑌛𑌤𑌾 ।
𑌯𑌦𑍍𑌯𑌸𑍍𑌤𑌿 𑌕𑌿𑌂𑌚𑌿𑌤𑍍 𑌸𑍁𑌕𑍃𑌤𑌂 𑌕𑍃𑌤𑌂 𑌮𑌯𑌾
𑌜𑌨𑌾𑌰𑍍𑌦𑌨𑌸𑍍𑌤𑍇𑌨 𑌕𑍃𑌤𑍇𑌨 𑌤𑍁𑌷𑍍𑌯𑌤𑍁 ॥ 1𑍮॥

𑌸𑌂𑌜𑌯 𑌉𑌵𑌾𑌚 ।
𑌆𑌰𑍍𑌤𑌾 𑌵𑌿𑌷𑌣𑍍𑌣𑌾𑌃 𑌶𑌿𑌥𑌿𑌲𑌾𑌶𑍍𑌚 𑌭𑍀𑌤𑌾
𑌘𑍋𑌰𑍇𑌷𑍁 𑌵𑍍𑌯𑌾𑌘𑍍𑌰𑌾𑌦𑌿𑌷𑍁 𑌵𑌰𑍍𑌤𑌮𑌾𑌨𑌾𑌃 ।
𑌸𑌂𑌕𑍀𑌰𑍍𑌤𑍍𑌯 𑌨𑌾𑌰𑌾𑌯𑌣𑌶𑌬𑍍𑌦𑌮𑌾𑌤𑍍𑌰𑌂
𑌵𑌿𑌮𑍁𑌕𑍍𑌤𑌦𑍁𑌃𑌖𑌾𑌃 𑌸𑍁𑌖𑌿𑌨𑍋 𑌭𑌵𑌂𑌤𑌿 ॥ 1𑍯॥

𑌅𑌕𑍍𑌰𑍂𑌰 𑌉𑌵𑌾𑌚 ।
𑌅𑌹𑌂 𑌤𑍁 𑌨𑌾𑌰𑌾𑌯𑌣𑌦𑌾𑌸𑌦𑌾𑌸-
𑌦𑌾𑌸𑌸𑍍𑌯 𑌦𑌾𑌸𑌸𑍍𑌯 𑌚 𑌦𑌾𑌸𑌦𑌾𑌸𑌃 ।
𑌅𑌨𑍍𑌯𑍋 𑌨 𑌹𑍀𑌶𑍋 𑌜𑌗𑌤𑍋 𑌨𑌰𑌾𑌣𑌾𑌂
𑌤𑌸𑍍𑌮𑌾𑌦𑌹𑌂 𑌧𑌨𑍍𑌯𑌤𑌰𑍋𑌽𑌸𑍍𑌮𑌿 𑌲𑍋𑌕𑍇 ॥ 20॥

𑌵𑌿𑌰𑌾𑌟 𑌉𑌵𑌾𑌚 ।
𑌵𑌾𑌸𑍁𑌦𑍇𑌵𑌸𑍍𑌯 𑌯𑍇 𑌭𑌕𑍍𑌤𑌾𑌃 𑌶𑌾𑌂𑌤𑌾𑌸𑍍𑌤𑌦𑍍𑌗𑌤𑌚𑍇𑌤𑌸𑌃 ।
𑌤𑍇𑌷𑌾𑌂 𑌦𑌾𑌸𑌸𑍍𑌯 𑌦𑌾𑌸𑍋𑌽𑌹𑌂 𑌭𑌵𑍇𑌯𑌂 𑌜𑌨𑍍𑌮𑌜𑌨𑍍𑌮𑌨𑌿 ॥ 21॥

𑌭𑍀𑌷𑍍𑌮 𑌉𑌵𑌾𑌚 ।
𑌵𑌿𑌪𑌰𑍀𑌤𑍇𑌷𑍁 𑌕𑌾𑌲𑍇𑌷𑍁 𑌪𑌰𑌿𑌕𑍍𑌷𑍀𑌣𑍇𑌷𑍁 𑌬𑌂𑌧𑍁𑌷𑍁 ।
𑌤𑍍𑌰𑌾𑌹𑌿 𑌮𑌾𑌂 𑌕𑍃𑌪𑌯𑌾 𑌕𑍃𑌷𑍍𑌣 𑌶𑌰𑌣𑌾𑌗𑌤𑌵𑌤𑍍𑌸𑌲 ॥ 22॥

𑌦𑍍𑌰𑍋𑌣 𑌉𑌵𑌾𑌚 ।
𑌯𑍇 𑌯𑍇 𑌹𑌤𑌾𑌶𑍍𑌚𑌕𑍍𑌰𑌧𑌰𑍇𑌣 𑌦𑍈𑌤𑍍𑌯𑌾𑌂-
𑌸𑍍𑌤𑍍𑌰𑍈𑌲𑍋𑌕𑍍𑌯𑌨𑌾𑌥𑍇𑌨 𑌜𑌨𑌾𑌰𑍍𑌦𑌨𑍇𑌨 ।
𑌤𑍇 𑌤𑍇 𑌗𑌤𑌾 𑌵𑌿𑌷𑍍𑌣𑍁𑌪𑍁𑌰𑍀𑌂 𑌪𑍍𑌰𑌯𑌾𑌤𑌾𑌃
𑌕𑍍𑌰𑍋𑌧𑍋𑌽𑌪𑌿 𑌦𑍇𑌵𑌸𑍍𑌯 𑌵𑌰𑍇𑌣 𑌤𑍁𑌲𑍍𑌯𑌃 ॥ 23॥

𑌕𑍃𑌪𑌾𑌚𑌾𑌰𑍍𑌯 𑌉𑌵𑌾𑌚 ।
𑌮𑌜𑍍𑌜𑌨𑍍𑌮𑌨𑌃 𑌫𑌲𑌮𑌿𑌦𑌂 𑌮𑌧𑍁𑌕𑍈𑌟𑌭𑌾𑌰𑍇
𑌮𑌤𑍍𑌪𑍍𑌰𑌾𑌰𑍍𑌥𑌨𑍀𑌯 𑌮𑌦𑌨𑍁𑌗𑍍𑌰𑌹 𑌏𑌷 𑌏𑌵 ।
𑌤𑍍𑌵𑌦𑍍𑌭𑍃𑌤𑍍𑌯𑌭𑍃𑌤𑍍𑌯𑌪𑌰𑌿𑌚𑌾𑌰𑌕𑌭𑍃𑌤𑍍𑌯𑌭𑍃𑌤𑍍𑌯-
𑌭𑍃𑌤𑍍𑌯𑌸𑍍𑌯 𑌭𑍃𑌤𑍍𑌯 𑌇𑌤𑌿 𑌮𑌾𑌂 𑌸𑍍𑌮𑌰 𑌲𑍋𑌕𑌨𑌾𑌥 ॥ 24॥

𑌅𑌶𑍍𑌵𑌤𑍍𑌥𑌾𑌮 𑌉𑌵𑌾𑌚 ।
𑌗𑍋𑌵𑌿𑌂𑌦 𑌕𑍇𑌶𑌵 𑌜𑌨𑌾𑌰𑍍𑌦𑌨 𑌵𑌾𑌸𑍁𑌦𑍇𑌵
𑌵𑌿𑌶𑍍𑌵𑍇𑌶 𑌵𑌿𑌶𑍍𑌵 𑌮𑌧𑍁𑌸𑍂𑌦𑌨 𑌵𑌿𑌶𑍍𑌵𑌰𑍂𑌪 ।
𑌶𑍍𑌰𑍀𑌪𑌦𑍍𑌮𑌨𑌾𑌭 𑌪𑍁𑌰𑍁𑌷𑍋𑌤𑍍𑌤𑌮 𑌦𑍇𑌹𑌿 𑌦𑌾𑌸𑍍𑌯𑌂
𑌨𑌾𑌰𑌾𑌯𑌣𑌾𑌚𑍍𑌯𑍁𑌤 𑌨𑍃𑌸𑌿𑌂𑌹 𑌨𑌮𑍋 𑌨𑌮𑌸𑍍𑌤𑍇 ॥ 25॥

𑌕𑌰𑍍𑌣 𑌉𑌵𑌾𑌚 ।
𑌨𑌾𑌨𑍍𑌯𑌂 𑌵𑌦𑌾𑌮𑌿 𑌨 𑌶‍𑌋𑌣𑍋𑌮𑌿 𑌨 𑌚𑌿𑌂𑌤𑌯𑌾𑌮𑌿
𑌨𑌾𑌨𑍍𑌯𑌂 𑌸𑍍𑌮𑌰𑌾𑌮𑌿 𑌨 𑌭𑌜𑌾𑌮𑌿 𑌨 𑌚𑌾𑌶𑍍𑌰𑌯𑌾𑌮𑌿 ।
𑌭𑌕𑍍𑌤𑍍𑌯𑌾 𑌤𑍍𑌵𑌦𑍀𑌯𑌚𑌰𑌣𑌾𑌂𑌬𑍁𑌜𑌮𑌾𑌦𑌰𑍇𑌣
𑌶𑍍𑌰𑍀𑌶𑍍𑌰𑍀𑌨𑌿𑌵𑌾𑌸 𑌪𑍁𑌰𑍁𑌷𑍋𑌤𑍍𑌤𑌮 𑌦𑍇𑌹𑌿 𑌦𑌾𑌸𑍍𑌯𑌮𑍍 ॥ 26॥

𑌧𑍃𑌤𑌰𑌾𑌷𑍍𑌟𑍍𑌰 𑌉𑌵𑌾𑌚 ।
𑌨𑌮𑍋 𑌨𑌮𑌃 𑌕𑌾𑌰𑌣𑌵𑌾𑌮𑌨𑌾𑌯
𑌨𑌾𑌰𑌾𑌯𑌣𑌾𑌯𑌾𑌮𑌿𑌤𑌵𑌿𑌕𑍍𑌰𑌮𑌾𑌯 ।
𑌶𑍍𑌰𑍀𑌶𑌾𑌰𑍍𑌙𑍍𑌗𑌚𑌕𑍍𑌰𑌾𑌸𑌿𑌗𑌦𑌾𑌧𑌰𑌾𑌯
𑌨𑌮𑍋𑌽𑌸𑍍𑌤𑍁 𑌤𑌸𑍍𑌮𑍈 𑌪𑍁𑌰𑍁𑌷𑍋𑌤𑍍𑌤𑌮𑌾𑌯 ॥ 2𑍭॥

𑌗𑌾𑌂𑌧𑌾𑌰𑍀 𑌉𑌵𑌾𑌚 ।
𑌤𑍍𑌵𑌮𑍇𑌵 𑌮𑌾𑌤𑌾 𑌚 𑌪𑌿𑌤𑌾 𑌤𑍍𑌵𑌮𑍇𑌵
𑌤𑍍𑌵𑌮𑍇𑌵 𑌬𑌂𑌧𑍁𑌶𑍍𑌚 𑌸𑌖𑌾 𑌤𑍍𑌵𑌮𑍇𑌵 ।
𑌤𑍍𑌵𑌮𑍇𑌵 𑌵𑌿𑌦𑍍𑌯𑌾 𑌦𑍍𑌰𑌵𑌿𑌣𑌂 𑌤𑍍𑌵𑌮𑍇𑌵
𑌤𑍍𑌵𑌮𑍇𑌵 𑌸𑌰𑍍𑌵𑌂 𑌮𑌮 𑌦𑍇𑌵 𑌦𑍇𑌵 ॥ 2𑍮॥

𑌦𑍍𑌰𑍁𑌪𑌦 𑌉𑌵𑌾𑌚 ।
𑌯𑌜𑍍𑌞𑍇𑌶𑌾𑌚𑍍𑌯𑍁𑌤 𑌗𑍋𑌵𑌿𑌂𑌦 𑌮𑌾𑌧𑌵𑌾𑌨𑌂𑌤 𑌕𑍇𑌶𑌵 ।
𑌕𑍃𑌷𑍍𑌣 𑌵𑌿𑌷𑍍𑌣𑍋 𑌹𑍃𑌷𑍀𑌕𑍇𑌶 𑌵𑌾𑌸𑍁𑌦𑍇𑌵 𑌨𑌮𑍋𑌽𑌸𑍍𑌤𑍁 𑌤𑍇 ॥ 2𑍯॥

𑌜𑌯𑌦𑍍𑌰𑌥 𑌉𑌵𑌾𑌚 ।
𑌨𑌮𑌃 𑌕𑍃𑌷𑍍𑌣𑌾𑌯 𑌦𑍇𑌵𑌾𑌯 𑌬𑍍𑌰𑌹𑍍𑌮𑌣𑍇𑌽𑌨𑌂𑌤𑌶𑌕𑍍𑌤𑌯𑍇 ।
𑌯𑍋𑌗𑍇𑌶𑍍𑌵𑌰𑌾𑌯 𑌯𑍋𑌗𑌾𑌯 𑌤𑍍𑌵𑌾𑌮𑌹𑌂 𑌶𑌰𑌣𑌂 𑌗𑌤𑌃 ॥ 30॥

𑌵𑌿𑌕𑌰𑍍𑌣 𑌉𑌵𑌾𑌚 ।
𑌕𑍃𑌷𑍍𑌣𑌾𑌯 𑌵𑌾𑌸𑍁𑌦𑍇𑌵𑌾𑌯 𑌦𑍇𑌵𑌕𑍀𑌨𑌂𑌦𑌨𑌾𑌯 𑌚 ।
𑌨𑌂𑌦𑌗𑍋𑌪𑌕𑍁𑌮𑌾𑌰𑌾𑌯 𑌗𑍋𑌵𑌿𑌂𑌦𑌾𑌯 𑌨𑌮𑍋 𑌨𑌮𑌃 ॥ 31॥

𑌵𑌿𑌰𑌾𑌟 𑌉𑌵𑌾𑌚 ।
𑌨𑌮𑍋 𑌬𑍍𑌰𑌹𑍍𑌮𑌣𑍍𑌯𑌦𑍇𑌵𑌾𑌯 𑌗𑍋𑌬𑍍𑌰𑌾𑌹𑍍𑌮𑌣𑌹𑌿𑌤𑌾𑌯 𑌚 ।
𑌜𑌗𑌦𑍍𑌧𑌿𑌤𑌾𑌯 𑌕𑍃𑌷𑍍𑌣𑌾𑌯 𑌗𑍋𑌵𑌿𑌂𑌦𑌾𑌯 𑌨𑌮𑍋 𑌨𑌮𑌃 ॥ 32॥

𑌶𑌲𑍍𑌯 𑌉𑌵𑌾𑌚 ।
𑌅𑌤𑌸𑍀𑌪𑍁𑌷𑍍𑌪𑌸𑌂𑌕𑌾𑌶𑌂 𑌪𑍀𑌤𑌵𑌾𑌸𑌸𑌮𑌚𑍍𑌯𑍁𑌤𑌮𑍍 ।
𑌯𑍇 𑌨𑌮𑌸𑍍𑌯𑌂𑌤𑌿 𑌗𑍋𑌵𑌿𑌂𑌦𑌂 𑌤𑍇𑌷𑌾𑌂 𑌨 𑌵𑌿𑌦𑍍𑌯𑌤𑍇 𑌭𑌯𑌮𑍍 ॥ 33॥

𑌬𑌲𑌭𑌦𑍍𑌰 𑌉𑌵𑌾𑌚 ।
𑌕𑍃𑌷𑍍𑌣 𑌕𑍃𑌷𑍍𑌣 𑌕𑍃𑌪𑌾𑌲𑍋 𑌤𑍍𑌵𑌮𑌗𑌤𑍀𑌨𑌾𑌂 𑌗𑌤𑌿𑌰𑍍𑌭𑌵 ।
𑌸𑌂𑌸𑌾𑌰𑌾𑌰𑍍𑌣𑌵𑌮𑌗𑍍𑌨𑌾𑌨𑌾𑌂 𑌪𑍍𑌰𑌸𑍀𑌦 𑌪𑍁𑌰𑍁𑌷𑍋𑌤𑍍𑌤𑌮 ॥ 34॥

𑌶𑍍𑌰𑍀𑌕𑍃𑌷𑍍𑌣 𑌉𑌵𑌾𑌚 ।
𑌕𑍃𑌷𑍍𑌣 𑌕𑍃𑌷𑍍𑌣𑍇𑌤𑌿 𑌕𑍃𑌷𑍍𑌣𑍇𑌤𑌿 𑌯𑍋 𑌮𑌾𑌂 𑌸𑍍𑌮𑌰𑌤𑌿 𑌨𑌿𑌤𑍍𑌯𑌶𑌃 ।
𑌜𑌲𑌂 𑌭𑌿𑌤𑍍𑌵𑌾 𑌯𑌥𑌾 𑌪𑌦𑍍𑌮𑌂 𑌨𑌰𑌕𑌾𑌦𑍁𑌦𑍍𑌧𑌰𑌾𑌮𑍍𑌯𑌹𑌮𑍍 ॥ 35॥

𑌶𑍍𑌰𑍀𑌕𑍃𑌷𑍍𑌣 𑌉𑌵𑌾𑌚 ।
𑌨𑌿𑌤𑍍𑌯𑌂 𑌵𑌦𑌾𑌮𑌿 𑌮𑌨𑍁𑌜𑌾𑌃 𑌸𑍍𑌵𑌯𑌮𑍂𑌰𑍍𑌧𑍍𑌵𑌬𑌾𑌹𑍁-
𑌰𑍍𑌯𑍋 𑌮𑌾𑌂 𑌮𑍁𑌕𑍁𑌂𑌦 𑌨𑌰𑌸𑌿𑌂𑌹 𑌜𑌨𑌾𑌰𑍍𑌦𑌨𑍇𑌤𑌿 ।
𑌜𑍀𑌵𑍋 𑌜𑌪𑌤𑍍𑌯𑌨𑍁𑌦𑌿𑌨𑌂 𑌮𑌰𑌣𑍇 𑌰𑌣𑍇 𑌵𑌾
𑌪𑌾𑌷𑌾𑌣𑌕𑌾𑌷𑍍𑌠𑌸𑌦𑍃𑌶𑌾𑌯 𑌦𑌦𑌾𑌮𑍍𑌯𑌭𑍀𑌷𑍍𑌟𑌮𑍍 ॥ 36॥

𑌈𑌶𑍍𑌵𑌰 𑌉𑌵𑌾𑌚 ।
𑌸𑌕𑍃𑌨𑍍𑌨𑌾𑌰𑌾𑌯𑌣𑍇𑌤𑍍𑌯𑍁𑌕𑍍𑌤𑍍𑌵𑌾 𑌪𑍁𑌮𑌾𑌨𑍍 𑌕𑌲𑍍𑌪𑌶𑌤𑌤𑍍𑌰𑌯𑌮𑍍 ।
𑌗𑌂𑌗𑌾𑌦𑌿𑌸𑌰𑍍𑌵𑌤𑍀𑌰𑍍𑌥𑍇𑌷𑍁 𑌸𑍍𑌨𑌾𑌤𑍋 𑌭𑌵𑌤𑌿 𑌪𑍁𑌤𑍍𑌰𑌕 ॥ 3𑍭॥

𑌸𑍂𑌤 𑌉𑌵𑌾𑌚 ।
𑌤𑌤𑍍𑌰𑍈𑌵 𑌗𑌂𑌗𑌾 𑌯𑌮𑍁𑌨𑌾 𑌚 𑌤𑌤𑍍𑌰
𑌗𑍋𑌦𑌾𑌵𑌰𑍀 𑌸𑌿𑌂𑌧𑍁 𑌸𑌰𑌸𑍍𑌵𑌤𑍀 𑌚 ।
𑌸𑌰𑍍𑌵𑌾𑌣𑌿 𑌤𑍀𑌰𑍍𑌥𑌾𑌨𑌿 𑌵𑌸𑌂𑌤𑌿 𑌤𑌤𑍍𑌰
𑌯𑌤𑍍𑌰𑌾𑌚𑍍𑌯𑍁𑌤𑍋𑌦𑌾𑌰 𑌕𑌥𑌾𑌪𑍍𑌰𑌸𑌂𑌗𑌃 ॥ 3𑍮॥

𑌯𑌮 𑌉𑌵𑌾𑌚 ।
𑌨𑌰𑌕𑍇 𑌪𑌚𑍍𑌯𑌮𑌾𑌨𑌂 𑌤𑍁 𑌯𑌮𑍇𑌨𑌂 𑌪𑌰𑌿𑌭𑌾𑌷𑌿𑌤𑌮𑍍 ।
𑌕𑌿𑌂 𑌤𑍍𑌵𑌯𑌾 𑌨𑌾𑌰𑍍𑌚𑌿𑌤𑍋 𑌦𑍇𑌵𑌃 𑌕𑍇𑌶𑌵𑌃 𑌕𑍍𑌲𑍇𑌶𑌨𑌾𑌶𑌨𑌃 ॥ 35॥

𑌨𑌾𑌰𑌦 𑌉𑌵𑌾𑌚 ।
𑌜𑌨𑍍𑌮𑌾𑌂𑌤𑌰𑌸𑌹𑌸𑍍𑌰𑍇𑌣 𑌤𑌪𑍋𑌧𑍍𑌯𑌾𑌨𑌸𑌮𑌾𑌧𑌿𑌨𑌾 ।
𑌨𑌰𑌾𑌣𑌾𑌂 𑌕𑍍𑌷𑍀𑌣𑌪𑌾𑌪𑌾𑌨𑌾𑌂 𑌕𑍃𑌷𑍍𑌣𑍇 𑌭𑌕𑍍𑌤𑌿𑌃 𑌪𑍍𑌰𑌜𑌾𑌯𑌤𑍇 ॥ 40॥

𑌪𑍍𑌰𑌹𑍍𑌲𑌾𑌦 𑌉𑌵𑌾𑌚 ।
𑌨𑌾𑌥 𑌯𑍋𑌨𑌿𑌸𑌹𑌸𑍍𑌰𑍇𑌷𑍁 𑌯𑍇𑌷𑍁 𑌯𑍇𑌷𑍁 𑌵𑍍𑌰𑌜𑌾𑌮𑍍𑌯𑌹𑌮𑍍 ।
𑌤𑍇𑌷𑍁 𑌤𑍇𑌷𑍍𑌵𑌚𑌲𑌾 𑌭𑌕𑍍𑌤𑌿𑌰𑌚𑍍𑌯𑍁𑌤𑌾𑌽𑌸𑍍𑌤𑍁 𑌸𑌦𑌾 𑌤𑍍𑌵𑌯𑌿 ॥ 41॥

𑌯𑌾 𑌪𑍍𑌰𑍀𑌤𑌿𑌰𑌵𑌿𑌵𑍇𑌕𑌨𑌾𑌂 𑌵𑌿𑌷𑌯𑍇𑌷𑍍𑌵𑌨𑌪𑌾𑌯𑌿𑌨𑌿 ।
𑌤𑍍𑌵𑌾𑌮𑌨𑍁𑌸𑍍𑌮𑌰𑌤𑌃 𑌸𑌾 𑌮𑍇 𑌹𑍃𑌦𑌯𑌾𑌨𑍍𑌮𑌾𑌽𑌪𑌸𑌰𑍍𑌪𑌤𑍁 ॥ 42॥

𑌵𑌿𑌶𑍍𑌵𑌾𑌮𑌿𑌤𑍍𑌰 𑌉𑌵𑌾𑌚 ।
𑌕𑌿𑌂 𑌤𑌸𑍍𑌯 𑌦𑌾𑌨𑍈𑌃 𑌕𑌿𑌂 𑌤𑍀𑌰𑍍𑌥𑍈𑌃 𑌕𑌿𑌂 𑌤𑌪𑍋𑌭𑌿𑌃 𑌕𑌿𑌮𑌧𑍍𑌵𑌰𑍈𑌃 ।
𑌯𑍋 𑌨𑌿𑌤𑍍𑌯𑌂 𑌧𑍍𑌯𑌾𑌯𑌤𑍇 𑌦𑍇𑌵𑌂 𑌨𑌾𑌰𑌾𑌯𑌣𑌮𑌨𑌨𑍍𑌯𑌧𑍀𑌃 ॥ 43॥

𑌜𑌮𑌦𑌗𑍍𑌨𑌿𑌰𑍁𑌵𑌾𑌚 ।
𑌨𑌿𑌤𑍍𑌯𑍋𑌤𑍍𑌸𑌵𑍋 𑌭𑌵𑍇𑌤𑍍𑌤𑍇𑌷𑌾𑌂 𑌨𑌿𑌤𑍍𑌯𑌂 𑌨𑌿𑌤𑍍𑌯𑌂 𑌚 𑌮𑌂𑌗𑌲𑌮𑍍 ।
𑌯𑍇𑌷𑌾𑌂 𑌹𑍃𑌦𑌿𑌸𑍍𑌥𑍋 𑌭𑌗𑌵𑌾𑌨𑍍𑌮𑌂𑌗𑌲𑌾𑌯𑌤𑌨𑌂 𑌹𑌰𑌿𑌃 ॥ 44॥

𑌭𑌰𑌦𑍍𑌵𑌾𑌜 𑌉𑌵𑌾𑌚 ।
𑌲𑌾𑌭𑌸𑍍𑌤𑍇𑌷𑌾𑌂 𑌜𑌯𑌸𑍍𑌤𑍇𑌷𑌾𑌂 𑌕𑍁𑌤𑌸𑍍𑌤𑍇𑌷𑌾𑌂 𑌪𑌰𑌾𑌜𑌯𑌃 ।
𑌯𑍇𑌷𑌾𑌮𑌿𑌂𑌦𑍀𑌶𑍍𑌵𑌰𑌶𑍍𑌯𑌾𑌮𑍋 𑌹𑍃𑌦𑌯𑌸𑍍𑌥𑍋 𑌜𑌨𑌾𑌰𑍍𑌦𑌨𑌃 ॥ 45॥

𑌗𑍌𑌤𑌮 𑌉𑌵𑌾𑌚 ।
𑌗𑍋𑌕𑍋𑌟𑌿𑌦𑌾𑌨𑌂 𑌗𑍍𑌰𑌹𑌣𑍇𑌷𑍁 𑌕𑌾𑌶𑍀-
𑌪𑍍𑌰𑌯𑌾𑌗𑌗𑌂𑌗𑌾𑌯𑍁𑌤𑌕𑌲𑍍𑌪𑌵𑌾𑌸𑌃 ।
𑌯𑌜𑍍𑌞𑌾𑌯𑍁𑌤𑌂 𑌮𑍇𑌰𑍁𑌸𑍁𑌵𑌰𑍍𑌣𑌦𑌾𑌨𑌂
𑌗𑍋𑌵𑌿𑌂𑌦𑌨𑌾𑌮𑌸𑍍𑌮𑌰𑌣𑍇𑌨 𑌤𑍁𑌲𑍍𑌯𑌮𑍍 ॥ 46॥

𑌅𑌗𑍍𑌨𑌿𑌰𑍁𑌵𑌾𑌚 ।
𑌗𑍋𑌵𑌿𑌂𑌦𑍇𑌤𑌿 𑌸𑌦𑌾 𑌸𑍍𑌨𑌾𑌨𑌂 𑌗𑍋𑌵𑌿𑌂𑌦𑍇𑌤𑌿 𑌸𑌦𑌾 𑌜𑌪𑌃 ।
𑌗𑍋𑌵𑌿𑌂𑌦𑍇𑌤𑌿 𑌸𑌦𑌾 𑌧𑍍𑌯𑌾𑌨𑌂 𑌸𑌦𑌾 𑌗𑍋𑌵𑌿𑌂𑌦𑌕𑍀𑌰𑍍𑌤𑌨𑌮𑍍 ॥ 4𑍭॥

𑌤𑍍𑌰𑍍𑌯𑌕𑍍𑌷𑌰𑌂 𑌪𑌰𑌮𑌂 𑌬𑍍𑌰𑌹𑍍𑌮 𑌗𑍋𑌵𑌿𑌂𑌦 𑌤𑍍𑌰𑍍𑌯𑌕𑍍𑌷𑌰𑌂 𑌪𑌰𑌮𑍍 ।
𑌤𑌸𑍍𑌮𑌾𑌦𑍁𑌚𑍍𑌚𑌾𑌰𑌿𑌤𑌂 𑌯𑍇𑌨 𑌬𑍍𑌰𑌹𑍍𑌮𑌭𑍂𑌯𑌾𑌯 𑌕𑌲𑍍𑌪𑌤𑍇 ॥ 4𑍮॥

𑌵𑍇𑌦𑌵𑍍𑌯𑌾𑌸 𑌉𑌵𑌾𑌚 ।
𑌅𑌚𑍍𑌯𑍁𑌤𑌃 𑌕𑌲𑍍𑌪𑌵𑍃𑌕𑍍𑌷𑍋𑌽𑌸𑌾𑌵𑌨𑌂𑌤𑌃 𑌕𑌾𑌮𑌧𑍇𑌨𑍁 𑌵𑍈 ।
𑌚𑌿𑌂𑌤𑌾𑌮𑌣𑌿𑌸𑍍𑌤𑍁 𑌗𑍋𑌵𑌿𑌂𑌦𑍋 𑌹𑌰𑍇𑌰𑍍𑌨𑌾𑌮 𑌵𑌿𑌚𑌿𑌂𑌤𑌯𑍇𑌤𑍍 ॥ 4𑍯॥

𑌇𑌂𑌦𑍍𑌰 𑌉𑌵𑌾𑌚 ।
𑌜𑌯𑌤𑍁 𑌜𑌯𑌤𑍁 𑌦𑍇𑌵𑍋 𑌦𑍇𑌵𑌕𑍀𑌨𑌂𑌦𑌨𑍋𑌽𑌯𑌂
𑌜𑌯𑌤𑍁 𑌜𑌯𑌤𑍁 𑌕𑍃𑌷𑍍𑌣𑍋 𑌵𑍃𑌷𑍍𑌣𑌿𑌵𑌂𑌶𑌪𑍍𑌰𑌦𑍀𑌪𑌃 ।
𑌜𑌯𑌤𑍁 𑌜𑌯𑌤𑍁 𑌮𑍇𑌘𑌶𑍍𑌯𑌾𑌮𑌲𑌃 𑌕𑍋𑌮𑌲𑌾𑌂𑌗𑍋
𑌜𑌯𑌤𑍁 𑌜𑌯𑌤𑍁 𑌪𑍃𑌥𑍍𑌵𑍀𑌭𑌾𑌰𑌨𑌾𑌶𑍋 𑌮𑍁𑌕𑍁𑌂𑌦𑌃 ॥ 50॥

𑌪𑌿𑌪𑍍𑌪𑌲𑌾𑌯𑌨 𑌉𑌵𑌾𑌚 ।
𑌶𑍍𑌰𑍀𑌮𑌨𑍍𑌨𑍃𑌸𑌿𑌂𑌹𑌵𑌿𑌭𑌵𑍇 𑌗𑌰𑍁𑌡𑌧𑍍𑌵𑌜𑌾𑌯
𑌤𑌾𑌪𑌤𑍍𑌰𑌯𑍋𑌪𑌶𑌮𑌨𑌾𑌯 𑌭𑌵𑍌𑌷𑌧𑌾𑌯 ।
𑌕𑍃𑌷𑍍𑌣𑌾𑌯 𑌵𑍃𑌶𑍍𑌚𑌿𑌕𑌜𑌲𑌾𑌗𑍍𑌨𑌿𑌭𑍁𑌜𑌂𑌗𑌰𑍋𑌗-
𑌕𑍍𑌲𑍇𑌶𑌵𑍍𑌯𑌯𑌾𑌯 𑌹𑌰𑌯𑍇 𑌗𑍁𑌰𑌵𑍇 𑌨𑌮𑌸𑍍𑌤𑍇 ॥ 51॥

𑌆𑌵𑌿𑌰𑍍𑌹𑍋𑌤𑍍𑌰 𑌉𑌵𑌾𑌚 ।
𑌕𑍃𑌷𑍍𑌣 𑌤𑍍𑌵𑌦𑍀𑌯𑌪𑌦𑌪𑌂𑌕𑌜𑌪𑌂𑌜𑌰𑌾𑌂𑌤𑍇
𑌅𑌦𑍍𑌯𑍈𑌵 𑌮𑍇 𑌵𑌿𑌶𑌤𑍁 𑌮𑌾𑌨𑌸𑌰𑌾𑌜𑌹𑌂𑌸𑌃 ।
𑌪𑍍𑌰𑌾𑌣𑌪𑍍𑌰𑌯𑌾𑌣𑌸𑌮𑌯𑍇 𑌕𑌫𑌵𑌾𑌤𑌪𑌿𑌤𑍍𑌤𑍈𑌃
𑌕𑌂𑌠𑌾𑌵𑌰𑍋𑌧𑌨𑌵𑌿𑌧𑍌 𑌸𑍍𑌮𑌰𑌣𑌂 𑌕𑍁𑌤𑌸𑍍𑌤𑍇 ॥ 52॥

𑌵𑌿𑌦𑍁𑌰 𑌉𑌵𑌾𑌚 ।
𑌹𑌰𑍇𑌰𑍍𑌨𑌾𑌮𑍈𑌵 𑌨𑌾𑌮𑍈𑌵 𑌨𑌾𑌮𑍈𑌵 𑌮𑌮 𑌜𑍀𑌵𑌨𑌮𑍍 ।
𑌕𑌲𑍌 𑌨𑌾𑌸𑍍𑌤𑍍𑌯𑍇𑌵 𑌨𑌾𑌸𑍍𑌤𑍍𑌯𑍇𑌵 𑌨𑌾𑌸𑍍𑌤𑍍𑌯𑍇𑌵 𑌗𑌤𑌿𑌰𑌨𑍍𑌯𑌥𑌾 ॥ 53॥

𑌵𑌸𑌿𑌷𑍍𑌠 𑌉𑌵𑌾𑌚 ।
𑌕𑍃𑌷𑍍𑌣𑍇𑌤𑌿 𑌮𑌂𑌗𑌲𑌂 𑌨𑌾𑌮 𑌯𑌸𑍍𑌯 𑌵𑌾𑌚𑌿 𑌪𑍍𑌰𑌵𑌰𑍍𑌤𑌤𑍇 ।
𑌭𑌸𑍍𑌮𑍀𑌭𑌵𑌂𑌤𑌿 𑌤𑌸𑍍𑌯𑌾𑌶𑍁 𑌮𑌹𑌾𑌪𑌾𑌤𑌕𑌕𑍋𑌟𑌯𑌃 ॥ 54॥

𑌅𑌰𑍁𑌂𑌧𑌤𑍍𑌯𑍁𑌵𑌾𑌚 ।
𑌕𑍃𑌷𑍍𑌣𑌾𑌯 𑌵𑌾𑌸𑍁𑌦𑍇𑌵𑌾𑌯 𑌹𑌰𑌯𑍇 𑌪𑌰𑌮𑌾𑌤𑍍𑌮𑌨𑍇 ।
𑌪𑍍𑌰𑌣𑌤𑌕𑍍𑌲𑍇𑌶𑌨𑌾𑌶𑌾𑌯 𑌗𑍋𑌵𑌿𑌂𑌦𑌾𑌯 𑌨𑌮𑍋 𑌨𑌮𑌃 ॥ 55॥

𑌕𑌶𑍍𑌯𑌪 𑌉𑌵𑌾𑌚 ।
𑌕𑍃𑌷𑍍𑌣𑌾𑌨𑍁𑌸𑍍𑌮𑌰𑌣𑌾𑌦𑍇𑌵 𑌪𑌾𑌪𑌸𑌂𑌘𑌟𑍍𑌟𑌪𑌂𑌜𑌰𑌮𑍍 ।
𑌶𑌤𑌧𑌾 𑌭𑍇𑌦𑌮𑌾𑌪𑍍𑌨𑍋𑌤𑌿 𑌗𑌿𑌰𑌿𑌰𑍍𑌵𑌜𑍍𑌰𑌹𑌤𑍋 𑌯𑌥𑌾 ॥ 56॥

𑌦𑍁𑌰𑍍𑌯𑍋𑌧𑌨 𑌉𑌵𑌾𑌚 ।
𑌜𑌾𑌨𑌾𑌮𑌿 𑌧𑌰𑍍𑌮𑌂 𑌨 𑌚 𑌮𑍇 𑌪𑍍𑌰𑌵𑍃𑌤𑍍𑌤𑌿-
𑌰𑍍𑌜𑌾𑌨𑌾𑌮𑌿 𑌪𑌾𑌪𑌂 𑌨 𑌚 𑌮𑍇 𑌨𑌿𑌵𑍃𑌤𑍍𑌤𑌿𑌃 ।
𑌕𑍇𑌨𑌾𑌪𑌿 𑌦𑍇𑌵𑍇𑌨 𑌹𑍃𑌦𑌿 𑌸𑍍𑌥𑌿𑌤𑍇𑌨
𑌯𑌥𑌾 𑌨𑌿𑌯𑍁𑌕𑍍𑌤𑍋𑌽𑌸𑍍𑌮𑌿 𑌤𑌥𑌾 𑌕𑌰𑍋𑌮𑌿 ॥ 5𑍭॥

𑌯𑌂𑌤𑍍𑌰𑌸𑍍𑌯 𑌮𑌮 𑌦𑍋𑌷𑍇𑌣 𑌕𑍍𑌷𑌮𑍍𑌯𑌤𑌾𑌂 𑌮𑌧𑍁𑌸𑍂𑌦𑌨 ।
𑌅𑌹𑌂 𑌯𑌂𑌤𑍍𑌰𑌂 𑌭𑌵𑌾𑌨𑍍 𑌯𑌂𑌤𑍍𑌰𑍀 𑌮𑌮 𑌦𑍋𑌷𑍋 𑌨 𑌦𑍀𑌯𑌤𑌾𑌮𑍍 ॥ 5𑍮॥

𑌭𑍃𑌗𑍁𑌰𑍁𑌵𑌾𑌚 ।
𑌨𑌾𑌮𑍈𑌵 𑌤𑌵 𑌗𑍋𑌵𑌿𑌂𑌦 𑌨𑌾𑌮 𑌤𑍍𑌵𑌤𑍍𑌤𑌃 𑌶𑌤𑌾𑌧𑌿𑌕𑌮𑍍 ।
𑌦𑌦𑌾𑌤𑍍𑌤𑍍𑌯𑍁𑌚𑍍𑌚𑌾𑌰𑌣𑌾𑌨𑍍𑌮𑍁𑌕𑍍𑌤𑌿𑌃 𑌭𑌵𑌾𑌨𑌷𑍍𑌟𑌾𑌂𑌗𑌯𑍋𑌗𑌤𑌃 ॥ 5𑍯॥

𑌲𑍋𑌮𑌶 𑌉𑌵𑌾𑌚 ।
𑌨𑌮𑌾𑌮𑌿 𑌨𑌾𑌰𑌾𑌯𑌣 𑌪𑌾𑌦𑌪𑌂𑌕𑌜𑌂
𑌕𑌰𑍋𑌮𑌿 𑌨𑌾𑌰𑌾𑌯𑌣𑌪𑍂𑌜𑌨𑌂 𑌸𑌦𑌾 ।
𑌵𑌦𑌾𑌮𑌿 𑌨𑌾𑌰𑌾𑌯𑌣𑌨𑌾𑌮 𑌨𑌿𑌰𑍍𑌮𑌲𑌂
𑌸𑍍𑌮𑌰𑌾𑌮𑌿 𑌨𑌾𑌰𑌾𑌯𑌣𑌤𑌤𑍍𑌤𑍍𑌵𑌮𑌵𑍍𑌯𑌯𑌮𑍍 ॥ 60॥

𑌶𑍌𑌨𑌕 𑌉𑌵𑌾𑌚 ।
𑌸𑍍𑌮𑍃𑌤𑍇𑌃 𑌸𑌕𑌲𑌕𑌲𑍍𑌯𑌾𑌣𑌂 𑌭𑌜𑌨𑌂 𑌯𑌸𑍍𑌯 𑌜𑌾𑌯𑌤𑍇 ।
𑌪𑍁𑌰𑍁𑌷𑌂 𑌤𑌮𑌜𑌂 𑌨𑌿𑌤𑍍𑌯𑌂 𑌵𑍍𑌰𑌜𑌾𑌮𑌿 𑌶𑌰𑌣𑌂 𑌹𑌰𑌿𑌮𑍍 ॥ 61॥

𑌗𑌰𑍍𑌗 𑌉𑌵𑌾𑌚 ।
𑌨𑌾𑌰𑌾𑌯𑌣𑍇𑌤𑌿 𑌮𑌂𑌤𑍍𑌰𑍋𑌽𑌸𑍍𑌤𑌿 𑌵𑌾𑌗𑌸𑍍𑌤𑌿 𑌵𑌶𑌵𑌰𑍍𑌤𑌿𑌨𑍀 ।
𑌤𑌥𑌾𑌪𑌿 𑌨𑌰𑌕𑍇 𑌘𑍋𑌰𑍇 𑌪𑌤𑌂𑌤𑍀𑌤𑍍𑌯𑌦𑍍𑌭𑍁𑌤𑌂 𑌮𑌹𑌤𑍍 ॥ 62॥

𑌦𑌾𑌲𑍍𑌭𑍍𑌯 𑌉𑌵𑌾𑌚 ।
𑌕𑌿𑌂 𑌤𑌸𑍍𑌯 𑌬𑌹𑍁𑌭𑌿𑌰𑍍𑌮𑌂𑌤𑍍𑌰𑍈𑌰𑍍𑌭𑌕𑍍𑌤𑌿𑌰𑍍𑌯𑌸𑍍𑌯 𑌜𑌨𑌾𑌰𑍍𑌦𑌨𑍇 ।
𑌨𑌮𑍋 𑌨𑌾𑌰𑌾𑌯𑌣𑌾𑌯𑍇𑌤𑌿 𑌮𑌂𑌤𑍍𑌰𑌃 𑌸𑌰𑍍𑌵𑌾𑌰𑍍𑌥𑌸𑌾𑌧𑌾𑌕𑍇 ॥ 63॥

𑌵𑍈𑌶𑌂𑌪𑌾𑌯𑌨 𑌉𑌵𑌾𑌚 ।
𑌯𑌤𑍍𑌰 𑌯𑍋𑌗𑍇𑌶𑍍𑌵𑌰𑌃 𑌕𑍃𑌷𑍍𑌣𑍋 𑌯𑌤𑍍𑌰 𑌪𑌾𑌰𑍍𑌥𑍋 𑌧𑌨𑍁𑌰𑍍𑌧𑌰𑌃 ।
𑌤𑌤𑍍𑌰 𑌶𑍍𑌰𑍀𑌰𑍍𑌵𑌿𑌜𑌯𑍋 𑌭𑍂𑌤𑌿𑌰𑍍𑌧𑍍𑌰𑍁𑌵𑌾 𑌨𑍀𑌤𑌿𑌰𑍍𑌮𑌤𑌿𑌰𑍍𑌮𑌮 ॥ 64॥

𑌅𑌗𑍍𑌨𑌿𑌰𑍁𑌵𑌾𑌚 ।
𑌹𑌰𑌿𑌰𑍍𑌹𑌰𑌤𑌿 𑌪𑌾𑌪𑌾𑌨𑌿 𑌦𑍁𑌷𑍍𑌟𑌚𑌿𑌤𑍍𑌤𑍈𑌰𑌪𑌿 𑌸𑍍𑌮𑍃𑌤𑌃 ।
𑌅𑌨𑌿𑌚𑍍𑌛𑌯𑌾𑌪𑌿 𑌸𑌂𑌸𑍍𑌪𑍃𑌷𑍍𑌟𑍋 𑌦𑌹𑌤𑍍𑌯𑍇𑌵 𑌹𑌿 𑌪𑌾𑌵𑌕𑌃 ॥ 65॥

𑌪𑌰𑌮𑍇𑌶𑍍𑌵𑌰 𑌉𑌵𑌾𑌚 ।
𑌸𑌕𑍃𑌦𑍁𑌚𑍍𑌚𑌰𑌿𑌤𑌂 𑌯𑍇𑌨 𑌹𑌰𑌿𑌰𑌿𑌤𑍍𑌯𑌕𑍍𑌷𑌰𑌦𑍍𑌵𑌯𑌮𑍍 ।
𑌲𑌬𑍍𑌧𑌃 𑌪𑌰𑌿𑌕𑌰𑌸𑍍𑌤𑍇𑌨 𑌮𑍋𑌕𑍍𑌷𑌾𑌯 𑌗𑌮𑌨𑌂 𑌪𑍍𑌰𑌤𑌿 ॥ 66॥

𑌪𑍁𑌲𑌸𑍍𑌤𑍍𑌯 𑌉𑌵𑌾𑌚 ।
𑌹𑍇 𑌜𑌿𑌹𑍍𑌵𑍇 𑌰𑌸𑌸𑌾𑌰𑌜𑍍𑌞𑍇 𑌸𑌰𑍍𑌵𑌦𑌾 𑌮𑌧𑍁𑌰𑌪𑍍𑌰𑌿𑌯𑍇 ।
𑌨𑌾𑌰𑌾𑌯𑌣𑌾𑌖𑍍𑌯𑌪𑍀𑌯𑍂𑌷𑌂 𑌪𑌿𑌬 𑌜𑌿𑌹𑍍𑌵𑍇 𑌨𑌿𑌰𑌂𑌤𑌰𑌮𑍍 ॥ 6𑍭॥

𑌵𑍍𑌯𑌾𑌸 𑌉𑌵𑌾𑌚 ।
𑌸𑌤𑍍𑌯𑌂 𑌸𑌤𑍍𑌯𑌂 𑌪𑍁𑌨𑌃 𑌸𑌤𑍍𑌯𑌂 𑌸𑌤𑍍𑌯𑌂 𑌸𑌤𑍍𑌯𑌂 𑌵𑌦𑌾𑌮𑍍𑌯𑌹𑌮𑍍 ।
𑌨𑌾𑌸𑍍𑌤𑌿 𑌵𑍇𑌦𑌾𑌤𑍍𑌪𑌰𑌂 𑌶𑌾𑌸𑍍𑌤𑍍𑌰𑌂 𑌨 𑌦𑍇𑌵𑌃 𑌕𑍇𑌶𑌵𑌾𑌤𑍍𑌪𑌰𑌃 ॥ 6𑍮॥

𑌧𑌨𑍍𑌵𑌂𑌤𑌰𑌿𑌰𑍁𑌵𑌾𑌚 ।
𑌅𑌚𑍍𑌯𑍁𑌤𑌾𑌨𑌂𑌤 𑌗𑍋𑌵𑌿𑌂𑌦 𑌨𑌾𑌮𑍋𑌚𑍍𑌚𑌾𑌰𑌣𑌭𑍇𑌷𑌜𑌾𑌤𑍍 ।
𑌨𑌶𑍍𑌯𑌂𑌤𑌿 𑌸𑌕𑌲𑌾 𑌰𑍋𑌗𑌾𑌃 𑌸𑌤𑍍𑌯𑌂 𑌸𑌤𑍍𑌯𑌂 𑌵𑌦𑌾𑌮𑍍𑌯𑌹𑌮𑍍 ॥ 6𑍯॥

𑌮𑌾𑌰𑍍𑌕𑌂𑌡𑍇𑌯 𑌉𑌵𑌾𑌚 ।
𑌸𑍍𑌵𑌰𑍍𑌗𑌦𑌂 𑌮𑍋𑌕𑍍𑌷𑌦𑌂 𑌦𑍇𑌵𑌂 𑌸𑍁𑌖𑌦𑌂 𑌜𑌗𑌤𑍋 𑌗𑍁𑌰𑍁𑌮𑍍 ।
𑌕𑌥𑌂 𑌮𑍁𑌹𑍁𑌰𑍍𑌤𑌮𑌪𑌿 𑌤𑌂 𑌵𑌾𑌸𑍁𑌦𑍇𑌵𑌂 𑌨 𑌚𑌿𑌂𑌤𑌯𑍇𑌤𑍍 ॥ 𑍭0॥

𑌅𑌗𑌸𑍍𑌤𑍍𑌯 𑌉𑌵𑌾𑌚 ।
𑌨𑌿𑌮𑌿𑌷𑌂 𑌨𑌿𑌮𑌿𑌷𑌾𑌰𑍍𑌧𑌂 𑌵𑌾 𑌪𑍍𑌰𑌾𑌣𑌿𑌨𑌾𑌂 𑌵𑌿𑌷𑍍𑌣𑍁𑌚𑌿𑌂𑌤𑌨𑌮𑍍 ।
𑌤𑌤𑍍𑌰 𑌤𑌤𑍍𑌰 𑌕𑍁𑌰𑍁𑌕𑍍𑌷𑍇𑌤𑍍𑌰𑌂 𑌪𑍍𑌰𑌯𑌾𑌗𑍋 𑌨𑍈𑌮𑌿𑌷𑌂 𑌵𑌰𑌮𑍍 ॥ 𑍭1॥

𑌵𑌾𑌮𑌦𑍇𑌵 𑌉𑌵𑌾𑌚 ।
𑌨𑌿𑌮𑌿𑌷𑌂 𑌨𑌿𑌮𑌿𑌷𑌾𑌰𑍍𑌧𑌂 𑌵𑌾 𑌪𑍍𑌰𑌾𑌣𑌿𑌨𑌾𑌂 𑌵𑌿𑌷𑍍𑌣𑍁𑌚𑌿𑌂𑌤𑌨𑌮𑍍 ।
𑌕𑌲𑍍𑌪𑌕𑍋𑌟𑌿𑌸𑌹𑌸𑍍𑌰𑌾𑌣𑌿 𑌲𑌭𑌤𑍇 𑌵𑌾𑌂𑌛𑌿𑌤𑌂 𑌫𑌲𑌮𑍍 ॥ 𑍭2॥

𑌶𑍁𑌕 𑌉𑌵𑌾𑌚 ।
𑌆𑌲𑍋𑌡𑍍𑌯 𑌸𑌰𑍍𑌵𑌶𑌾𑌸𑍍𑌤𑍍𑌰𑌾𑌣𑌿 𑌵𑌿𑌚𑌾𑌰𑍍𑌯 𑌚 𑌪𑍁𑌨𑌃 𑌪𑍁𑌨𑌃 ।
𑌇𑌦𑌮𑍇𑌕𑌂 𑌸𑍁𑌨𑌿𑌷𑍍𑌪𑌨𑍍𑌨𑌂 𑌧𑍍𑌯𑍇𑌯𑍋 𑌨𑌾𑌰𑌾𑌯𑌣𑌃 𑌸𑌦𑌾 ॥ 𑍭3॥

𑌶𑍍𑌰𑍀𑌮𑌹𑌾𑌦𑍇𑌵 𑌉𑌵𑌾𑌚 ।
𑌶𑌰𑍀𑌰𑍇 𑌜𑌰𑍍𑌜𑌰𑍀𑌭𑍂𑌤𑍇 𑌵𑍍𑌯𑌾𑌧𑌿𑌗𑍍𑌰𑌸𑍍𑌤𑍇 𑌕𑌲𑍇𑌵𑌰𑍇 ।
𑌔𑌷𑌧𑌂 𑌜𑌾𑌹𑍍𑌨𑌵𑍀𑌤𑍋𑌯𑌂 𑌵𑍈𑌦𑍍𑌯𑍋 𑌨𑌾𑌰𑌾𑌯𑌣𑍋 𑌹𑌰𑌿𑌃 ॥ 𑍭4॥

𑌶𑍌𑌨𑌕 𑌉𑌵𑌾𑌚 ।
𑌭𑍋𑌜𑌨𑌾𑌚𑍍𑌛𑌾𑌦𑌨𑍇 𑌚𑌿𑌂𑌤𑌾𑌂 𑌵𑍃𑌥𑌾 𑌕𑍁𑌰𑍍𑌵𑌂𑌤𑌿 𑌵𑍈𑌷𑍍𑌣𑌵𑌾𑌃 ।
𑌯𑍋𑌽𑌸𑍌 𑌵𑌿𑌶𑍍𑌵𑌂𑌭𑌰𑍋 𑌦𑍇𑌵𑌃 𑌸 𑌕𑌿𑌂 𑌭𑌕𑍍𑌤𑌾𑌨𑍁𑌪𑍇𑌕𑍍𑌷𑌤𑍇 ॥ 𑍭5॥

𑌸𑌨𑌤𑍍𑌕𑍁𑌮𑌾𑌰 𑌉𑌵𑌾𑌚 ।
𑌯𑌸𑍍𑌯 𑌹𑌸𑍍𑌤𑍇 𑌗𑌦𑌾 𑌚𑌕𑍍𑌰𑌂 𑌗𑌰𑍁𑌡𑍋 𑌯𑌸𑍍𑌯 𑌵𑌾𑌹𑌨𑌮𑍍 ।
𑌶𑌂𑌖𑌚𑌕𑍍𑌰𑌗𑌦𑌾𑌪𑌦𑍍𑌮𑍀 𑌸 𑌮𑍇 𑌵𑌿𑌷𑍍𑌣𑍁𑌃 𑌪𑍍𑌰𑌸𑍀𑌦𑌤𑍁 ॥ 𑍭6॥

𑌏𑌵𑌂 𑌬𑍍𑌰𑌹𑍍𑌮𑌾𑌦𑌯𑍋 𑌦𑍇𑌵𑌾 𑌋𑌷𑌯𑌶𑍍𑌚 𑌤𑌪𑍋𑌧𑌨𑌾𑌃 ।
𑌕𑍀𑌰𑍍𑌤𑌯𑌂𑌤𑌿 𑌸𑍁𑌰𑌶𑍍𑌰𑍇𑌷𑍍𑌠𑌮𑍇𑌵𑌂 𑌨𑌾𑌰𑌾𑌯𑌣𑌂 𑌵𑌿𑌭𑍁𑌮𑍍 ॥ 𑍭𑍭॥

𑌇𑌦𑌂 𑌪𑌵𑌿𑌤𑍍𑌰𑌮𑌾𑌯𑍁𑌷𑍍𑌯𑌂 𑌪𑍁𑌣𑍍𑌯𑌂 𑌪𑌾𑌪𑌪𑍍𑌰𑌣𑌾𑌶𑌨𑌮𑍍 ।
𑌦𑍁𑌃𑌸𑍍𑌵𑌪𑍍𑌨𑌨𑌾𑌶𑌨𑌂 𑌸𑍍𑌤𑍋𑌤𑍍𑌰𑌂 𑌪𑌾𑌂𑌡𑌵𑍈𑌃 𑌪𑌰𑌿𑌕𑍀𑌰𑍍𑌤𑌿𑌤𑌮𑍍 ॥ 𑍭𑍮॥

𑌯𑌃 𑌪𑌠𑍇𑌤𑍍𑌪𑍍𑌰𑌾𑌤𑌰𑍁𑌤𑍍𑌥𑌾𑌯 𑌶𑍁𑌚𑌿𑌸𑍍𑌤𑌦𑍍𑌗𑌤𑌮𑌾𑌨𑌸𑌃 ।
𑌗𑌵𑌾𑌂 𑌶𑌤𑌸𑌹𑌸𑍍𑌰𑌸𑍍𑌯 𑌸𑌮𑍍𑌯𑌗𑍍𑌦𑌤𑍍𑌤𑌸𑍍𑌯 𑌯𑌤𑍍𑌫𑌲𑌮𑍍 ॥ 𑍭𑍯॥

𑌤𑌤𑍍𑌫𑌲𑌂 𑌸𑌮𑌵𑌾𑌪𑍍𑌨𑍋𑌤𑌿 𑌯𑌃 𑌪𑌠𑍇𑌦𑌿𑌤𑌿 𑌸𑌂𑌸𑍍𑌤𑌵𑌮𑍍 ।
𑌸𑌰𑍍𑌵𑌪𑌾𑌪𑌵𑌿𑌨𑌿𑌰𑍍𑌮𑍁𑌕𑍍𑌤𑍋 𑌵𑌿𑌷𑍍𑌣𑍁𑌲𑍋𑌕𑌂 𑌸 𑌗𑌚𑍍𑌛𑌤𑌿 ॥ 𑍮0॥

𑌗𑌂𑌗𑌾 𑌗𑍀𑌤𑌾 𑌚 𑌗𑌾𑌯𑌤𑍍𑌰𑍀 𑌗𑍋𑌵𑌿𑌂𑌦𑍋 𑌗𑌰𑍁𑌡𑌧𑍍𑌵𑌜𑌃 ।
𑌗𑌕𑌾𑌰𑍈𑌃 𑌪𑌂𑌚𑌭𑌿𑌰𑍍𑌯𑍁𑌕𑍍𑌤𑌃 𑌪𑍁𑌨𑌰𑍍𑌜𑌨𑍍𑌮 𑌨 𑌵𑌿𑌦𑍍𑌯𑌤𑍇 ॥ 𑍮1॥

𑌗𑍀𑌤𑌾𑌂 𑌯𑌃 𑌪𑌠𑌤𑍇 𑌨𑌿𑌤𑍍𑌯𑌂 𑌶𑍍𑌲𑍋𑌕𑌾𑌰𑍍𑌧𑌂 𑌶𑍍𑌲𑍋𑌕𑌮𑍇𑌵 𑌵𑌾 ।
𑌮𑍁𑌚𑍍𑌯𑌤𑍇 𑌸𑌰𑍍𑌵𑌪𑌾𑌪𑍇𑌭𑍍𑌯𑍋 𑌵𑌿𑌷𑍍𑌣𑍁𑌲𑍋𑌕𑌂 𑌸 𑌗𑌚𑍍𑌛𑌤𑌿 ॥ 𑍮2॥

𑌇𑌤𑌿 𑌪𑌾𑌂𑌡𑌵𑌗𑍀𑌤𑌾 𑌅𑌥𑌵𑌾 𑌪𑍍𑌰𑌪𑌨𑍍𑌨𑌗𑍀𑌤𑌾 𑌸𑌮𑌾𑌪𑍍𑌤𑌾 ।

𑌓𑌂 𑌤𑌤𑍍𑌸𑌤𑍍 ।