॥ 𑌏𑌕𑌾𑌦𑌶𑌃 𑌸𑌰𑍍𑌗𑌃 ॥
॥ 𑌸𑌾𑌨𑌂𑌦𑌦𑌾𑌮𑍋𑌦𑌰𑌃 ॥
𑌸𑍁𑌚𑌿𑌰𑌮𑌨𑍁𑌨𑌯𑌨𑍇 𑌪𑍍𑌰𑍀𑌣𑌯𑌿𑌤𑍍𑌵𑌾 𑌮𑍃𑌗𑌾𑌕𑍍𑌷𑍀𑌂 𑌗𑌤𑌵𑌤𑌿 𑌕𑍃𑌤𑌵𑍇𑌶𑍇 𑌕𑍇𑌶𑌵𑍇 𑌕𑍁𑌂𑌜𑌶𑌯𑍍𑌯𑌾𑌮𑍍 ।
𑌰𑌚𑌿𑌤𑌰𑍁𑌚𑌿𑌰𑌭𑍂𑌷𑌾𑌂 𑌦𑍃𑌷𑍍𑌟𑌿𑌮𑍋𑌷𑍇 𑌪𑍍𑌰𑌦𑍋𑌷𑍇 𑌸𑍍𑌫𑍁𑌰𑌤𑌿 𑌨𑌿𑌰𑌵𑌸𑌾𑌦𑌾𑌂 𑌕𑌾𑌪𑌿 𑌰𑌾𑌧𑌾𑌂 𑌜𑌗𑌾𑌦 ॥ 5 ॥
॥ 𑌗𑍀𑌤𑌂 20 ॥
𑌵𑌿𑌰𑌚𑌿𑌤𑌚𑌾𑌟𑍁𑌵𑌚𑌨𑌰𑌚𑌨𑌂 𑌚𑌰𑌣𑍇 𑌰𑌚𑌿𑌤𑌪𑍍𑌰𑌣𑌿𑌪𑌾𑌤𑌮𑍍 ।
𑌸𑌂𑌪𑍍𑌰𑌤𑌿 𑌮𑌂𑌜𑍁𑌲𑌵𑌂𑌜𑍁𑌲𑌸𑍀𑌮𑌨𑌿 𑌕𑍇𑌲𑌿𑌶𑌯𑌨𑌮𑌨𑍁𑌯𑌾𑌤𑌮𑍍 ॥
𑌮𑍁𑌗𑍍𑌧𑍇 𑌮𑌧𑍁𑌮𑌥𑌨𑌮𑌨𑍁𑌗𑌤𑌮𑌨𑍁𑌸𑌰 𑌰𑌾𑌧𑌿𑌕𑍇 ॥ 1 ॥
𑌘𑌨𑌜𑌘𑌨𑌸𑍍𑌤𑌨𑌭𑌾𑌰𑌭𑌰𑍇 𑌦𑌰𑌮𑌂𑌥𑌰𑌚𑌰𑌣𑌵𑌿𑌹𑌾𑌰𑌮𑍍 ।
𑌮𑍁𑌖𑌰𑌿𑌤𑌮𑌣𑍀𑌮𑌂𑌜𑍀𑌰𑌮𑍁𑌪𑍈𑌹𑌿 𑌵𑌿𑌧𑍇𑌹𑌿 𑌮𑌰𑌾𑌲𑌵𑌿𑌕𑌾𑌰𑌮𑍍 ॥ 2 ॥
𑌶𑍃𑌣𑍁 𑌰𑌮𑌣𑍀𑌯𑌤𑌰𑌂 𑌤𑌰𑍁𑌣𑍀𑌜𑌨𑌮𑍋𑌹𑌨𑌮𑌧𑍁𑌪𑌵𑌿𑌰𑌾𑌵𑌮𑍍 ।
𑌕𑍁𑌸𑍁𑌮𑌶𑌰𑌾𑌸𑌨𑌶𑌾𑌸𑌨𑌬𑌂𑌦𑌿𑌨𑌿 𑌪𑌿𑌕𑌨𑌿𑌕𑌰𑍇 𑌭𑌜 𑌭𑌾𑌵𑌮𑍍 ॥ 3 ॥
𑌅𑌨𑌿𑌲𑌤𑌰𑌲𑌕𑌿𑌸𑌲𑌯𑌨𑌿𑌕𑌰𑍇𑌣 𑌕𑌰𑍇𑌣 𑌲𑌤𑌾𑌨𑌿𑌕𑍁𑌰𑌂𑌬𑌮𑍍 ।
𑌪𑍍𑌰𑍇𑌰𑌣𑌮𑌿𑌵 𑌕𑌰𑌭𑍋𑌰𑍁 𑌕𑌰𑍋𑌤𑌿 𑌗𑌤𑌿𑌂 𑌪𑍍𑌰𑌤𑌿𑌮𑍁𑌂𑌚 𑌵𑌿𑌲𑌂𑌬𑌮𑍍 ॥ 4 ॥
𑌸𑍍𑌫𑍁𑌰𑌿𑌤𑌮𑌨𑌂𑌗𑌤𑌰𑌂𑌗𑌵𑌶𑌾𑌦𑌿𑌵 𑌸𑍂𑌚𑌿𑌤𑌹𑌰𑌿𑌪𑌰𑌿𑌰𑌂𑌭𑌮𑍍 ।
𑌪𑍃𑌚𑍍𑌛 𑌮𑌨𑍋𑌹𑌰𑌹𑌾𑌰𑌵𑌿𑌮𑌲𑌜𑌲𑌧𑌾𑌰𑌮𑌮𑍁𑌂 𑌕𑍁𑌚𑌕𑍁𑌂𑌭𑌮𑍍 ॥ 5 ॥
𑌅𑌧𑌿𑌗𑌤𑌮𑌖𑌿𑌲𑌸𑌖𑍀𑌭𑌿𑌰𑌿𑌦𑌂 𑌤𑌵 𑌵𑌪𑍁𑌰𑌪𑌿 𑌰𑌤𑌿𑌰𑌣𑌸𑌜𑍍𑌜𑌮𑍍 ।
𑌚𑌂𑌡𑌿 𑌰𑌸𑌿𑌤𑌰𑌶𑌨𑌾𑌰𑌵𑌡𑌿𑌂𑌡𑌿𑌮𑌮𑌭𑌿𑌸𑌰 𑌸𑌰𑌸𑌮𑌲𑌜𑍍𑌜𑌮𑍍 ॥ 6 ॥
𑌸𑍍𑌮𑌰𑌶𑌰𑌸𑍁𑌭𑌗𑌨𑌖𑍇𑌨 𑌕𑌰𑍇𑌣 𑌸𑌖𑍀𑌮𑌵𑌲𑌂𑌬𑍍𑌯 𑌸𑌲𑍀𑌲𑌮𑍍 ।
𑌚𑌲 𑌵𑌲𑌯𑌕𑍍𑌵𑌣𑍀𑌤𑍈𑌰𑌵𑌬𑍋𑌧𑌯 𑌹𑌰𑌮𑌪𑌿 𑌨𑌿𑌜𑌗𑌤𑌿𑌶𑍀𑌲𑌮𑍍 ॥ ॥
𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌮𑌧𑌰𑍀𑌕𑍃𑌤𑌹𑌾𑌰𑌮𑍁𑌦𑌾𑌸𑌿𑌤𑌵𑌾𑌮𑌮𑍍 ।
𑌹𑌰𑌿𑌵𑌿𑌨𑌿𑌹𑌿𑌤𑌮𑌨𑌸𑌾𑌮𑌧𑌿𑌤𑌿𑌷𑍍𑌠𑌤𑍁 𑌕𑌂𑌠𑌤𑌟𑍀𑌮𑌵𑌿𑌰𑌾𑌮𑌮𑍍 ॥ ॥
𑌸𑌾 𑌮𑌾𑌂 𑌦𑍍𑌰𑌕𑍍𑌷𑍍𑌯𑌤𑌿 𑌵𑌕𑍍𑌷𑍍𑌯𑌤𑌿 𑌸𑍍𑌮𑌰𑌕𑌥𑌾𑌂 𑌪𑍍𑌰𑌤𑍍𑌯𑌂𑌗𑌮𑌾𑌲𑌿𑌂𑌗𑌨𑍈𑌃 𑌪𑍍𑌰𑍀𑌤𑌿𑌂 𑌯𑌾𑌸𑍍𑌯𑌤𑌿 𑌰𑌮𑍍𑌯𑌤𑍇 𑌸𑌖𑌿 𑌸𑌮𑌾𑌗𑌤𑍍𑌯𑍇𑌤𑌿 𑌚𑌿𑌂𑌤𑌾𑌕𑍁𑌲𑌃 ।
𑌸 𑌤𑍍𑌵𑌾𑌂 𑌪𑌶𑍍𑌯𑌤𑌿 𑌵𑍇𑌪𑌤𑍇 𑌪𑍁𑌲𑌕𑌯𑌤𑍍𑌯𑌾𑌨𑌂𑌦𑌤𑌿 𑌸𑍍𑌵𑌿𑌦𑍍𑌯𑌤𑌿 𑌪𑍍𑌰𑌤𑍍𑌯𑍁𑌦𑍍𑌗𑌚𑍍𑌛𑌤𑌿 𑌮𑍂𑌰𑍍𑌚𑍍𑌛𑌤𑌿 𑌸𑍍𑌥𑌿𑌰𑌤𑌮𑌃𑌪𑍁𑌂𑌜𑍇 𑌨𑌿𑌕𑍁𑌂𑌜𑍇 𑌪𑍍𑌰𑌿𑌯𑌃 ॥ 60 ॥
𑌅𑌕𑍍𑌷𑍍𑌣𑍋𑌰𑍍𑌨𑌿𑌕𑍍𑌷𑌿𑌪𑌦𑌂𑌜𑌨𑌂 𑌶𑍍𑌰𑌵𑌣𑌯𑍋𑌸𑍍𑌤𑌾𑌪𑌿𑌚𑍍𑌛𑌗𑍁𑌚𑍍𑌛𑌾𑌵𑌲𑍀𑌂 𑌮𑍂𑌰𑍍𑌧𑍍𑌨𑌿 𑌶𑍍𑌯𑌾𑌮𑌸𑌰𑍋𑌜𑌦𑌾𑌮 𑌕𑍁𑌚𑌯𑍋𑌃 𑌕𑌸𑍍𑌤𑍂𑌰𑌿𑌕𑌾𑌪𑌾𑌤𑍍𑌰𑌕𑌮𑍍 ।
𑌧𑍂𑌰𑍍𑌤𑌾𑌨𑌾𑌮𑌭𑌿𑌸𑌾𑌰𑌸𑌤𑍍𑌵𑌰𑌹𑍃𑌦𑌾𑌂 𑌵𑌿𑌷𑍍𑌵𑌙𑍍𑌨𑌿𑌕𑍁𑌂𑌜𑍇 𑌸𑌖𑌿 𑌧𑍍𑌵𑌾𑌂𑌤𑌂 𑌨𑍀𑌲𑌨𑌿𑌚𑍋𑌲𑌚𑌾𑌰𑍁 𑌸𑌦𑍃𑌶𑌾𑌂 𑌪𑍍𑌰𑌤𑍍𑌯𑌂𑌗𑌮𑌾𑌲𑌿𑌂𑌗𑌤𑌿 ॥ 61 ॥
𑌕𑌾𑌶𑍍𑌮𑍀𑌰𑌗𑍌𑌰𑌵𑌪𑍁𑌷𑌾𑌮𑌭𑌿𑌸𑌾𑌰𑌿𑌕𑌾𑌣𑌾𑌂 𑌆𑌬𑌦𑍍𑌧𑌰𑍇𑌖𑌮𑌭𑌿𑌤𑍋 𑌰𑍁𑌚𑌿𑌮𑌂𑌜𑌰𑍀𑌭𑌿𑌃 ।
𑌏𑌤𑌤𑍍𑌤𑌮𑌾𑌲𑌦𑌲𑌨𑍀𑌲𑌤𑌮𑌂 𑌤𑌮𑌿𑌶𑍍𑌰𑌂 𑌤𑌤𑍍𑌪𑍍𑌰𑍇𑌮𑌹𑍇𑌮𑌨𑌿𑌕𑌷𑍋𑌪𑌲𑌤𑌾𑌂 𑌤𑌨𑍋𑌤𑌿 ॥ 62 ॥
𑌹𑌾𑌰𑌾𑌵𑌲𑍀𑌤𑌰𑌲𑌕𑌾𑌂𑌚𑌨𑌕𑌾𑌂𑌚𑌿𑌦𑌾𑌮-𑌕𑍇𑌯𑍂𑌰𑌕𑌂𑌕𑌣𑌮𑌣𑌿𑌦𑍍𑌯𑍁𑌤𑌿𑌦𑍀𑌪𑌿𑌤𑌸𑍍𑌯 ।
𑌦𑍍𑌵𑌾𑌰𑍇 𑌨𑌿𑌕𑍁𑌂𑌜𑌨𑌿𑌲𑌯𑌸𑍍𑌯𑌹𑌰𑌿𑌂 𑌨𑌿𑌰𑍀𑌕𑍍𑌷𑍍𑌯 𑌵𑍍𑌰𑍀𑌡𑌾𑌵𑌤𑍀𑌮𑌥 𑌸𑌖𑍀 𑌨𑌿𑌜𑌗𑌾𑌹 𑌰𑌾𑌧𑌾𑌮𑍍 ॥ 63 ॥
॥ 𑌗𑍀𑌤𑌂 21 ॥
𑌮𑌂𑌜𑍁𑌤𑌰𑌕𑍁𑌂𑌜𑌤𑌲𑌕𑍇𑌲𑌿𑌸𑌦𑌨𑍇 ।
𑌵𑌿𑌲𑌸 𑌰𑌤𑌿𑌰𑌭𑌸𑌹𑌸𑌿𑌤𑌵𑌦𑌨𑍇 ॥
𑌪𑍍𑌰𑌵𑌿𑌶 𑌰𑌾𑌧𑍇 𑌮𑌾𑌧𑌵𑌸𑌮𑍀𑌪𑌮𑌿𑌹 ॥ 1 ॥
𑌨𑌵𑌭𑌵𑌦𑌶𑍋𑌕𑌦𑌲𑌶𑌯𑌨𑌸𑌾𑌰𑍇 ।
𑌵𑌿𑌲𑌸 𑌕𑍁𑌚𑌕𑌲𑌶𑌤𑌰𑌲𑌹𑌾𑌰𑍇 ॥ 2 ॥
𑌕𑍁𑌸𑍁𑌮𑌚𑌯𑌰𑌚𑌿𑌤𑌶𑍁𑌚𑌿𑌵𑌾𑌸𑌗𑍇𑌹𑍇 ।
𑌵𑌿𑌲𑌸 𑌕𑍁𑌸𑍁𑌮𑌸𑍁𑌕𑍁𑌮𑌾𑌰𑌦𑍇𑌹𑍇 ॥ 3 ॥
𑌚𑌲𑌮𑌲𑌯𑌵𑌨𑌪𑌵𑌨𑌸𑍁𑌰𑌭𑌿𑌶𑍀𑌤𑍇 ।
𑌵𑌿𑌲𑌸 𑌰𑌸𑌵𑌲𑌿𑌤𑌲𑌲𑌿𑌤𑌗𑍀𑌤𑍇 ॥ 4 ॥
𑌮𑌧𑍁𑌮𑍁𑌦𑌿𑌤𑌮𑌧𑍁𑌪𑌕𑍁𑌲𑌕𑌲𑌿𑌤𑌰𑌾𑌵𑍇 ।
𑌵𑌿𑌲𑌸 𑌮𑌦𑌨𑌰𑌸𑌸𑌰𑌸𑌭𑌾𑌵𑍇 ॥ 5 ॥
𑌮𑌧𑍁𑌤𑌰𑌲𑌪𑌿𑌕𑌨𑌿𑌕𑌰𑌨𑌿𑌨𑌦𑌮𑍁𑌖𑌰𑍇 ।
𑌵𑌿𑌲𑌸 𑌦𑌶𑌨𑌰𑍁𑌚𑌿𑌰𑍁𑌚𑌿𑌰𑌶𑌿𑌖𑌰𑍇 ॥ 6 ॥
𑌵𑌿𑌤𑌤 𑌬𑌹𑍁𑌵𑌲𑍍𑌲𑌿𑌨𑌵𑌪𑌲𑍍𑌲𑌵𑌘𑌨𑍇 ।
𑌵𑌿𑌲𑌸 𑌚𑌿𑌰𑌮𑌲𑌸𑌪𑍀𑌨𑌜𑌘𑌨𑍇 ॥ ॥
𑌵𑌿𑌹𑌿𑌤𑌪𑌦𑍍𑌮𑌾𑌵𑌤𑍀𑌸𑍁𑌖𑌸𑌮𑌾𑌜𑍇 ।
𑌭𑌣𑌤𑌿 𑌜𑌯𑌦𑍇𑌵𑌕𑌵𑌿𑌰𑌾𑌜𑍇 ॥ ॥
𑌤𑍍𑌵𑌾𑌂 𑌚𑌿𑌤𑍍𑌤𑍇𑌨 𑌚𑌿𑌰𑌂 𑌵𑌹𑌨𑍍𑌨𑌯𑌮𑌤𑌿𑌶𑍍𑌰𑌾𑌂𑌤𑍋 𑌭𑍃𑌶𑌂 𑌤𑌾𑌪𑌿𑌤𑌃 𑌕𑌂𑌦𑌰𑍍𑌪𑍇𑌣 𑌤𑍁 𑌪𑌾𑌤𑍁𑌮𑌿𑌚𑍍𑌛𑌤𑌿 𑌸𑍁𑌧𑌾𑌸𑌂𑌬𑌾𑌧𑌬𑌿𑌂𑌬𑌾𑌧𑌰𑌮𑍍 ।
𑌅𑌸𑍍𑌯𑌾𑌂𑌗𑌂 𑌤𑌦𑌲𑌂𑌕𑍁𑌰𑍁 𑌕𑍍𑌷𑌣𑌮𑌿𑌹 𑌭𑍍𑌰𑍂𑌕𑍍𑌷𑍇𑌪𑌲𑌕𑍍𑌷𑍍𑌮𑍀𑌲𑌵-𑌕𑍍𑌰𑍀𑌤𑍇 𑌦𑌾𑌸 𑌇𑌵𑍋𑌪𑌸𑍇𑌵𑌿𑌤𑌪𑌦𑌾𑌂𑌭𑍋𑌜𑍇 𑌕𑍁𑌤𑌃 𑌸𑌂𑌭𑍍𑌰𑌮𑌃 ॥ 64 ॥
𑌸𑌾 𑌸𑌸𑌾𑌧𑍍𑌵𑌸𑌸𑌾𑌨𑌂𑌦𑌂 𑌗𑍋𑌵𑌿𑌂𑌦𑍇 𑌲𑍋𑌲𑌲𑍋𑌚𑌨𑌾 ।
𑌸𑌿𑌂𑌜𑌾𑌨𑌮𑌂𑌜𑍁𑌮𑌂𑌜𑍀𑌰𑌂 𑌪𑍍𑌰𑌵𑌿𑌵𑍇𑌶 𑌨𑌿𑌵𑍇𑌶𑌨𑌮𑍍 ॥ 65 ॥
॥ 𑌗𑍀𑌤𑌂 22 ॥
𑌰𑌾𑌧𑌾𑌵𑌦𑌨𑌵𑌿𑌲𑍋𑌕𑌨𑌵𑌿𑌕𑌸𑌿𑌤𑌵𑌿𑌵𑌿𑌧𑌵𑌿𑌕𑌾𑌰𑌵𑌿𑌭𑌂𑌗𑌮𑍍 ।
𑌜𑌲𑌨𑌿𑌧𑌿𑌮𑌿𑌵 𑌵𑌿𑌧𑍁𑌮𑌂𑌡𑌲𑌦𑌰𑍍𑌶𑌨𑌤𑌰𑌲𑌿𑌤𑌤𑍁𑌂𑌗𑌤𑌰𑌂𑌗𑌮𑍍 ॥
𑌹𑌰𑌿𑌮𑍇𑌕𑌰𑌸𑌂 𑌚𑌿𑌰𑌮𑌭𑌿𑌲𑌷𑌿𑌤𑌵𑌿𑌲𑌾𑌸𑌂 𑌸𑌾 𑌦𑌦𑌾𑌰𑍍𑌶 𑌗𑍁𑌰𑍁𑌹𑌰𑍍𑌷𑌵𑌶𑌂𑌵𑌦𑌵𑌦𑌨𑌮𑌨𑌂𑌗𑌨𑌿𑌵𑌾𑌸𑌮𑍍 ॥ 1 ॥
𑌹𑌾𑌰𑌮𑌮𑌲𑌤𑌰𑌤𑌾𑌰𑌮𑍁𑌰𑌸𑌿 𑌦𑌧𑌤𑌂 𑌪𑌰𑌿𑌰𑌭𑍍𑌯 𑌵𑌿𑌦𑍂𑌰𑌮𑍍 ।
𑌸𑍍𑌫𑍁𑌟𑌤𑌰𑌫𑍇𑌨𑌕𑌦𑌂𑌬𑌕𑌰𑌂𑌬𑌿𑌤𑌮𑌿𑌵 𑌯𑌮𑍁𑌨𑌾𑌜𑌲𑌪𑍂𑌰𑌮𑍍 ॥ 2 ॥
𑌶𑍍𑌯𑌾𑌮𑌲𑌮𑍃𑌦𑍁𑌲𑌕𑌲𑍇𑌵𑌰𑌮𑌂𑌡𑌲𑌮𑌧𑌿𑌗𑌤𑌗𑍌𑌰𑌦𑍁𑌕𑍂𑌲𑌮𑍍 ।
𑌨𑍀𑌲𑌨𑌲𑌿𑌨𑌮𑌿𑌵 𑌪𑍀𑌤𑌪𑌰𑌾𑌗𑌪𑌤𑌲𑌭𑌰𑌵𑌲𑌯𑌿𑌤𑌮𑍂𑌲𑌮𑍍 ॥ 3 ॥
𑌤𑌰𑌲𑌦𑍃𑌗𑌂𑌚𑌲𑌚𑌲𑌨𑌮𑌨𑍋𑌹𑌰𑌵𑌦𑌨𑌜𑌨𑌿𑌤𑌰𑌤𑌿𑌰𑌾𑌗𑌮𑍍 ।
𑌸𑍍𑌫𑍁𑌟𑌕𑌮𑌲𑍋𑌦𑌰𑌖𑍇𑌲𑌿𑌤𑌖𑌂𑌜𑌨𑌯𑍁𑌗𑌮𑌿𑌵 𑌶𑌰𑌦𑌿 𑌤𑌡𑌾𑌗𑌮𑍍 ॥ 4 ॥
𑌵𑌦𑌨𑌕𑌮𑌲𑌪𑌰𑌿𑌶𑍀𑌲𑌨𑌮𑌿𑌲𑌿𑌤𑌮𑌿𑌹𑌿𑌰𑌸𑌮𑌕𑍁𑌂𑌡𑌲𑌶𑍋𑌭𑌮𑍍 ।
𑌸𑍍𑌮𑌿𑌤𑌰𑍁𑌚𑌿𑌰𑍁𑌚𑌿𑌰𑌸𑌮𑍁𑌲𑍍𑌲𑌸𑌿𑌤𑌾𑌧𑌰𑌪𑌲𑍍𑌲𑌵𑌕𑍃𑌤𑌰𑌤𑌿𑌲𑍋𑌭𑌮𑍍 ॥ 5 ॥
𑌶𑌶𑌿𑌕𑌿𑌰𑌣𑌚𑍍𑌛𑍁𑌰𑌿𑌤𑍋𑌦𑌰𑌜𑌲𑌧𑌰𑌸𑍁𑌂𑌦𑌰𑌸𑌕𑍁𑌸𑍁𑌮𑌕𑍇𑌶𑌮𑍍 ।
𑌤𑌿𑌮𑌿𑌰𑍋𑌦𑌿𑌤𑌵𑌿𑌧𑍁𑌮𑌣𑍍𑌦𑌲𑌨𑌿𑌰𑍍𑌮𑌲𑌮𑌲𑌯𑌜𑌤𑌿𑌲𑌕𑌨𑌿𑌵𑍇𑌶𑌮𑍍 ॥ 6 ॥
𑌵𑌿𑌪𑍁𑌲𑌪𑍁𑌲𑌕𑌭𑌰𑌦𑌂𑌤𑍁𑌰𑌿𑌤𑌂 𑌰𑌤𑌿𑌕𑍇𑌲𑌿𑌕𑌲𑌾𑌭𑌿𑌰𑌧𑍀𑌰𑌮𑍍 ।
𑌮𑌣𑌿𑌗𑌣𑌕𑌿𑌰𑌣𑌸𑌮𑍂𑌹𑌸𑌮𑍁𑌜𑍍𑌜𑍍𑌵𑌲𑌭𑍂𑌷𑌣𑌸𑍁𑌭𑌗𑌶𑌰𑍀𑌰𑌮𑍍 ॥ ॥
𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌵𑌿𑌭𑌵𑌦𑍍𑌵𑌿𑌗𑍁𑌣𑍀𑌕𑍃𑌤𑌭𑍂𑌷𑌣𑌭𑌾𑌰𑌮𑍍 ।
𑌪𑍍𑌰𑌣𑌮𑌤 𑌹𑍃𑌦𑌿 𑌸𑍁𑌚𑌿𑌰𑌂 𑌵𑌿𑌨𑌿𑌧𑌾𑌯 𑌹𑌰𑌿𑌂 𑌸𑍁𑌕𑍃𑌤𑍋𑌦𑌯𑌸𑌾𑌰𑌮𑍍 ॥ ॥
𑌅𑌤𑌿𑌕𑍍𑌰𑌮𑍍𑌯𑌾𑌪𑌾𑌂𑌗𑌂 𑌶𑍍𑌰𑌵𑌣𑌪𑌥𑌪𑌰𑍍𑌯𑌂𑌤𑌗𑌮𑌨-𑌪𑍍𑌰𑌯𑌾𑌸𑍇𑌨𑍇𑌵𑌾𑌕𑍍𑌷𑍍𑌣𑍋𑌸𑍍𑌤𑌰𑌲𑌤𑌰𑌤𑌾𑌰𑌂 𑌪𑌤𑌿𑌤𑌯𑍋𑌃 ।
𑌇𑌦𑌾𑌨𑍀𑌂 𑌰𑌾𑌧𑌾𑌯𑌾𑌃 𑌪𑍍𑌰𑌿𑌯𑌤𑌮𑌸𑌮𑌾𑌲𑍋𑌕𑌸𑌮𑌯𑍇 𑌪𑌪𑌾𑌤 𑌸𑍍𑌵𑍇𑌦𑌾𑌂𑌬𑍁𑌪𑍍𑌰𑌸𑌰 𑌇𑌵 𑌹𑌰𑍍𑌷𑌾𑌶𑍍𑌰𑍁𑌨𑌿𑌕𑌰𑌃 ॥ 66 ॥
𑌭𑌵𑌂𑌤𑍍𑌯𑌾𑌸𑍍𑌤𑌲𑍍𑌪𑌾𑌂𑌤𑌂 𑌕𑍃𑌤𑌕𑌪𑌟𑌕𑌂𑌡𑍂𑌤𑌿𑌪𑌿𑌹𑌿𑌤-𑌸𑍍𑌮𑌿𑌤𑌂 𑌯𑌾𑌤𑍇 𑌗𑍇𑌹𑌾𑌦𑍍𑌬𑌹𑌿𑌰𑌵𑌹𑌿𑌤𑌾𑌲𑍀𑌪𑌰𑌿𑌜𑌨𑍇 ।
𑌪𑍍𑌰𑌿𑌯𑌾𑌸𑍍𑌯𑌂 𑌪𑌶𑍍𑌯𑌂𑌤𑍍𑌯𑌾𑌃 𑌸𑍍𑌮𑌰𑌶𑌰𑌸𑌮𑌾𑌕𑍂𑌲𑌸𑍁𑌭𑌗𑌂 𑌸𑌲𑌜𑍍𑌜𑌾 𑌲𑌜𑍍𑌜𑌾𑌪𑌿 𑌵𑍍𑌯𑌗𑌮𑌦𑌿𑌵 𑌦𑍂𑌰𑌂 𑌮𑍃𑌗𑌦𑍃𑌶𑌃 ॥ 6 ॥
॥ 𑌇𑌤𑌿 𑌶𑍍𑌰𑍀𑌗𑍀𑌤𑌗𑍋𑌵𑌿𑌂𑌦𑍇 𑌰𑌾𑌧𑌿𑌕𑌾𑌮𑌿𑌲𑌨𑍇 𑌸𑌾𑌨𑌂𑌦𑌦𑌾𑌮𑍋𑌦𑌰𑍋 𑌨𑌾𑌮𑍈𑌕𑌾𑌦𑌶𑌃 𑌸𑌰𑍍𑌗𑌃 ॥
