॥ 𑌷𑌷𑍍𑌠𑌃 𑌸𑌰𑍍𑌗𑌃 ॥
॥ 𑌕𑍁𑌂𑌠𑌵𑍈𑌕𑍁𑌂𑌠𑌃 ॥
𑌅𑌥 𑌤𑌾𑌂 𑌗𑌂𑌤𑍁𑌮𑌶𑌕𑍍𑌤𑌾𑌂 𑌚𑌿𑌰𑌮𑌨𑍁𑌰𑌕𑍍𑌤𑌾𑌂 𑌲𑌤𑌾𑌗𑍃𑌹𑍇 𑌦𑍃𑌷𑍍𑌟𑍍𑌵𑌾 ।
𑌤𑌚𑍍𑌚𑌰𑌿𑌤𑌂 𑌗𑍋𑌵𑌿𑌂𑌦𑍇 𑌮𑌨𑌸𑌿𑌜𑌮𑌂𑌦𑍇 𑌸𑌖𑍀 𑌪𑍍𑌰𑌾𑌹 ॥ 3 ॥
॥ 𑌗𑍀𑌤𑌂 12 ॥
𑌪𑌶𑍍𑌯𑌤𑌿 𑌦𑌿𑌶𑌿 𑌦𑌿𑌶𑌿 𑌰𑌹𑌸𑌿 𑌭𑌵𑌂𑌤𑌮𑍍 ।
𑌤𑌦𑌧𑌰𑌮𑌧𑍁𑌰𑌮𑌧𑍂𑌨𑌿 𑌪𑌿𑌬𑌂𑌤𑌮𑍍 ॥
𑌨𑌾𑌥 𑌹𑌰𑍇 𑌜𑌗𑌨𑍍𑌨𑌾𑌥 𑌹𑌰𑍇 𑌸𑍀𑌦𑌤𑌿 𑌰𑌾𑌧𑌾 𑌵𑌾𑌸𑌗𑍃𑌹𑍇 - 𑌧𑍍𑌰𑍁𑌵𑌮𑍍 ॥ 1 ॥
𑌤𑍍𑌵𑌦𑌭𑌿𑌸𑌰𑌣𑌰𑌭𑌸𑍇𑌨 𑌵𑌲𑌂𑌤𑍀 ।
𑌪𑌤𑌤𑌿 𑌪𑌦𑌾𑌨𑌿 𑌕𑌿𑌯𑌂𑌤𑌿 𑌚𑌲𑌂𑌤𑍀 ॥ 2 ॥
𑌵𑌿𑌹𑌿𑌤𑌵𑌿𑌶𑌦𑌬𑌿𑌸𑌕𑌿𑌸𑌲𑌯𑌵𑌲𑌯𑌾 ।
𑌜𑍀𑌵𑌤𑌿 𑌪𑌰𑌮𑌿𑌹 𑌤𑌵 𑌰𑌤𑌿𑌕𑌲𑌯𑌾 ॥ 3 ॥
𑌮𑍁𑌹𑍁𑌰𑌵𑌲𑍋𑌕𑌿𑌤𑌮𑌂𑌡𑌨𑌲𑍀𑌲𑌾 ।
𑌮𑌧𑍁𑌰𑌿𑌪𑍁𑌰𑌹𑌮𑌿𑌤𑌿 𑌭𑌾𑌵𑌨𑌶𑍀𑌲𑌾 ॥ 4 ॥
𑌤𑍍𑌵𑌰𑌿𑌤𑌮𑍁𑌪𑍈𑌤𑌿 𑌨 𑌕𑌥𑌮𑌭𑌿𑌸𑌾𑌰𑌮𑍍 ।
𑌹𑌰𑌿𑌰𑌿𑌤𑌿 𑌵𑌦𑌤𑌿 𑌸𑌖𑍀𑌮𑌨𑍁𑌵𑌾𑌰𑌮𑍍 ॥ 5 ॥
𑌶𑍍𑌲𑌿𑌷𑍍𑌯𑌤𑌿 𑌚𑍁𑌂𑌬𑌤𑌿 𑌜𑌲𑌧𑌰𑌕𑌲𑍍𑌪𑌮𑍍 ।
𑌹𑌰𑌿𑌰𑍁𑌪𑌗𑌤 𑌇𑌤𑌿 𑌤𑌿𑌮𑌿𑌰𑌮𑌨𑌲𑍍𑌪𑌮𑍍 ॥ 6 ॥
𑌭𑌵𑌤𑌿 𑌵𑌿𑌲𑌂𑌬𑌿𑌨𑌿 𑌵𑌿𑌗𑌲𑌿𑌤𑌲𑌜𑍍𑌜𑌾 ।
𑌵𑌿𑌲𑌪𑌤𑌿 𑌰𑍋𑌦𑌿𑌤𑌿 𑌵𑌾𑌸𑌕𑌸𑌜𑍍𑌜𑌾 ॥ ॥
𑌶𑍍𑌰𑍀𑌜𑌯𑌦𑍇𑌵𑌕𑌵𑍇𑌰𑌿𑌦𑌮𑍁𑌦𑌿𑌤𑌮𑍍 ।
𑌰𑌸𑌿𑌕𑌜𑌨𑌂 𑌤𑌨𑍁𑌤𑌾𑌮𑌤𑌿𑌮𑍁𑌦𑌿𑌤𑌮𑍍 ॥ ॥
𑌵𑌿𑌪𑍁𑌲𑌪𑍁𑌲𑌕𑌪𑌾𑌲𑌿𑌃 𑌸𑍍𑌫𑍀𑌤𑌸𑍀𑌤𑍍𑌕𑌾𑌰𑌮𑌂𑌤-𑌰𑍍𑌜𑌨𑌿𑌤𑌜𑌡𑌿𑌮𑌕𑌾𑌕𑍁𑌵𑍍𑌯𑌾𑌕𑍁𑌲𑌂 𑌵𑍍𑌯𑌾𑌹𑌰𑌂𑌤𑍀 ।
𑌤𑌵 𑌕𑌿𑌤𑌵 𑌵𑌿𑌧𑌤𑍍𑌤𑍇𑌽𑌮𑌂𑌦𑌕𑌂𑌦𑌰𑍍𑌪𑌚𑌿𑌂𑌤𑌾𑌂 𑌰𑌸𑌜𑌲𑌧𑌿𑌨𑌿𑌮𑌗𑍍𑌨𑌾 𑌧𑍍𑌯𑌾𑌨𑌲𑌗𑍍𑌨𑌾 𑌮𑍃𑌗𑌾𑌕𑍍𑌷𑍀 ॥ 3 ॥
𑌅𑌂𑌗𑍇𑌷𑍍𑌵𑌾𑌭𑌰𑌣𑌂 𑌕𑌰𑍋𑌤𑌿 𑌬𑌹𑍁𑌶𑌃 𑌪𑌤𑍍𑌰𑍇𑌽𑌪𑌿 𑌸𑌂𑌚𑌾𑌰𑌿𑌣𑌿 𑌪𑍍𑌰𑌾𑌪𑍍𑌤𑌂 𑌤𑍍𑌵𑌾𑌂 𑌪𑌰𑌿𑌶𑌂𑌕𑌤𑍇 𑌵𑌿𑌤𑌨𑍁𑌤𑍇 𑌶𑌯𑍍𑌯𑌾𑌂 𑌚𑌿𑌰𑌂 𑌧𑍍𑌯𑌾𑌯𑌤𑌿 ।
𑌇𑌤𑍍𑌯𑌾𑌕𑌲𑍍𑌪𑌵𑌿𑌕𑌲𑍍𑌪𑌤𑌲𑍍𑌪𑌰𑌚𑌨𑌾𑌸𑌂𑌕𑌲𑍍𑌪𑌲𑍀𑌲𑌾𑌶𑌤-𑌵𑍍𑌯𑌾𑌸𑌕𑍍𑌤𑌾𑌪𑌿 𑌵𑌿𑌨𑌾 𑌤𑍍𑌵𑌯𑌾 𑌵𑌰𑌤𑌨𑍁𑌰𑍍𑌨𑍈𑌷𑌾 𑌨𑌿𑌶𑌾𑌂 𑌨𑍇𑌷𑍍𑌯𑌤𑌿 ॥ 3 ॥
𑌕𑌿𑌂 𑌵𑌿𑌶𑍍𑌰𑌾𑌮𑍍𑌯𑌸𑌿 𑌕𑍃𑌷𑍍𑌣𑌭𑍋𑌗𑌿𑌭𑌵𑌨𑍇 𑌭𑌾𑌂𑌡𑍀𑌰𑌭𑍂𑌮𑍀𑌰𑍁𑌹𑌿 𑌭𑍍𑌰𑌾𑌤 𑌰𑍍𑌯𑌾𑌹𑌿 𑌨𑌦𑍃𑌷𑍍𑌟𑌿𑌗𑍋𑌚𑌰𑌮𑌿𑌤𑌸𑍍𑌸𑌾𑌨𑌂𑌦𑌨𑌂𑌦𑌾𑌸𑍍𑌪𑌦𑌮𑍍।
𑌰𑌧𑌾𑌯𑌾𑌵𑌚𑌨𑌂 𑌤𑌦𑌧𑍍𑌵𑌗𑌮𑍁𑌖𑌾𑌨𑍍𑌨𑌂𑌦𑌾𑌂𑌤𑌿𑌕𑍇𑌗𑍋𑌪𑌤𑍋 𑌗𑍋𑌵𑌿𑌂𑌦𑌸𑍍𑌯𑌜𑌯𑌂𑌤𑌿 𑌸𑌾𑌯𑌮𑌤𑌿𑌥𑌿𑌪𑍍𑌰𑌾𑌶𑌸𑍍𑌤𑍍𑌯𑌗𑌰𑍍𑌭𑌾𑌗𑌿𑌰𑌃॥ 40 ॥
॥ 𑌇𑌤𑌿 𑌗𑍀𑌤𑌗𑍋𑌵𑌿𑌂𑌦𑍇 𑌵𑌾𑌸𑌕𑌸𑌜𑍍𑌜𑌾𑌵𑌰𑍍𑌣𑌨𑍇 𑌕𑍁𑌂𑌠𑌵𑍈𑌕𑍁𑌂𑌠𑍋 𑌨𑌾𑌮 𑌷𑌷𑍍𑌠𑌃 𑌸𑌰𑍍𑌗𑌃 ॥
