॥ 𑌚𑌤𑍁𑌰𑍍𑌥𑌃 𑌸𑌰𑍍𑌗𑌃 ॥
॥ 𑌸𑍍𑌨𑌿𑌗𑍍𑌧𑌮𑌧𑍁𑌸𑍂𑌦𑌨𑌃 ॥
𑌯𑌮𑍁𑌨𑌾𑌤𑍀𑌰𑌵𑌾𑌨𑍀𑌰𑌨𑌿𑌕𑍁𑌂𑌜𑍇 𑌮𑌂𑌦𑌮𑌾𑌸𑍍𑌥𑌿𑌤𑌮𑍍 ।
𑌪𑍍𑌰𑌾𑌹 𑌪𑍍𑌰𑍇𑌮𑌭𑌰𑍋𑌦𑍍𑌭𑍍𑌰𑌾𑌂𑌤𑌂 𑌮𑌾𑌧𑌵𑌂 𑌰𑌾𑌧𑌿𑌕𑌾𑌸𑌖𑍀 ॥ 25 ॥
॥ 𑌗𑍀𑌤𑌂 ॥
𑌨𑌿𑌂𑌦𑌤𑌿 𑌚𑌂𑌦𑌨𑌮𑌿𑌂𑌦𑍁𑌕𑌿𑌰𑌣𑌮𑌨𑍁 𑌵𑌿𑌂𑌦𑌤𑌿 𑌖𑍇𑌦𑌮𑌧𑍀𑌰𑌮𑍍 ।
𑌵𑍍𑌯𑌾𑌲𑌨𑌿𑌲𑌯𑌮𑌿𑌲𑌨𑍇𑌨 𑌗𑌰𑌲𑌮𑌿𑌵 𑌕𑌲𑌯𑌤𑌿 𑌮𑌲𑌯𑌸𑌮𑍀𑌰𑌮𑍍 ॥
𑌸𑌾 𑌵𑌿𑌰𑌹𑍇 𑌤𑌵 𑌦𑍀𑌨𑌾 𑌮𑌾𑌧𑌵 𑌮𑌨𑌸𑌿𑌜𑌵𑌿𑌶𑌿𑌖𑌭𑌯𑌾𑌦𑌿𑌵 𑌭𑌾𑌵𑌨𑌯𑌾 𑌤𑍍𑌵𑌯𑌿 𑌲𑍀𑌨𑌾 ॥ 1 ॥
𑌅𑌵𑌿𑌰𑌲𑌨𑌿𑌪𑌤𑌿𑌤𑌮𑌦𑌨𑌶𑌰𑌾𑌦𑌿𑌵 𑌭𑌵𑌦𑌵𑌨𑌾𑌯 𑌵𑌿𑌶𑌾𑌲𑌮𑍍 ।
𑌸𑍍𑌵𑌹𑍃𑌦𑌯𑌰𑍍𑌮𑌣𑍀 𑌵𑌰𑍍𑌮 𑌕𑌰𑍋𑌤𑌿 𑌸𑌜𑌲𑌨𑌲𑌿𑌨𑍀𑌦𑌲𑌜𑌾𑌲𑌮𑍍 ॥ 2 ॥
𑌕𑍁𑌸𑍁𑌮𑌵𑌿𑌶𑌿𑌖𑌶𑌰𑌤𑌲𑍍𑌪𑌮𑌨𑌲𑍍𑌪𑌵𑌿𑌲𑌾𑌸𑌕𑌲𑌾𑌕𑌮𑌨𑍀𑌯𑌮𑍍 ।
𑌵𑍍𑌰𑌤𑌮𑌿𑌵 𑌤𑌵 𑌪𑌰𑌿𑌰𑌂𑌭𑌸𑍁𑌖𑌾𑌯 𑌕𑌰𑍋𑌤𑌿 𑌕𑍁𑌸𑍁𑌮𑌶𑌯𑌨𑍀𑌯𑌮𑍍 ॥ 3 ॥
𑌵𑌹𑌤𑌿 𑌚 𑌗𑌲𑌿𑌤𑌵𑌿𑌲𑍋𑌚𑌨𑌜𑌲𑌭𑌰𑌮𑌾𑌨𑌨𑌕𑌮𑌲𑌮𑍁𑌦𑌾𑌰𑌮𑍍 ।
𑌵𑌿𑌧𑍁𑌮𑌿𑌵 𑌵𑌿𑌕𑌟𑌵𑌿𑌧𑍁𑌂𑌤𑍁𑌦𑌦𑌂𑌤𑌦𑌲𑌨𑌗𑌲𑌿𑌤𑌾𑌮𑍃𑌤𑌧𑌾𑌰𑌮𑍍 ॥ 4 ॥
𑌵𑌿𑌲𑌿𑌖𑌤𑌿 𑌰𑌹𑌸𑌿 𑌕𑍁𑌰𑌂𑌗𑌮𑌦𑍇𑌨 𑌭𑌵𑌂𑌤𑌮𑌸𑌮𑌶𑌰𑌭𑍂𑌤𑌮𑍍 ।
𑌪𑍍𑌰𑌣𑌮𑌤𑌿 𑌮𑌕𑌰𑌮𑌧𑍋 𑌵𑌿𑌨𑌿𑌧𑌾𑌯 𑌕𑌰𑍇 𑌚 𑌶𑌰𑌂 𑌨𑌵𑌚𑍂𑌤𑌮𑍍 ॥ 5 ॥
𑌪𑍍𑌰𑌤𑌿𑌪𑌦𑌮𑌿𑌦𑌮𑌪𑌿 𑌨𑌿𑌗𑌤𑌤𑌿 𑌮𑌾𑌧𑌵 𑌤𑌵 𑌚𑌰𑌣𑍇 𑌪𑌤𑌿𑌤𑌾𑌹𑌮𑍍 ।
𑌤𑍍𑌵𑌯𑌿 𑌵𑌿𑌮𑍁𑌖𑍇 𑌮𑌯𑌿 𑌸𑌪𑌦𑌿 𑌸𑍁𑌧𑌾𑌨𑌿𑌧𑌿𑌰𑌪𑌿 𑌤𑌨𑍁𑌤𑍇 𑌤𑌨𑍁𑌦𑌾𑌹𑌮𑍍 ॥ 6 ॥
𑌧𑍍𑌯𑌾𑌨𑌲𑌯𑍇𑌨 𑌪𑍁𑌰𑌃 𑌪𑌰𑌿𑌕𑌲𑍍𑌪𑍍𑌯 𑌭𑌵𑌂𑌤𑌮𑌤𑍀𑌵 𑌦𑍁𑌰𑌾𑌪𑌮𑍍 ।
𑌵𑌿𑌲𑌪𑌤𑌿 𑌹𑌸𑌤𑌿 𑌵𑌿𑌷𑍀𑌦𑌤𑌿 𑌰𑍋𑌦𑌿𑌤𑌿 𑌚𑌂𑌚𑌤𑌿 𑌮𑍁𑌂𑌚𑌤𑌿 𑌤𑌾𑌪𑌮𑍍 ॥ ॥
𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌮𑌿𑌦𑌮𑌧𑌿𑌕𑌂 𑌯𑌦𑌿 𑌮𑌨𑌸𑌾 𑌨𑌟𑌨𑍀𑌯𑌮𑍍 ।
𑌹𑌰𑌿𑌵𑌿𑌰𑌹𑌾𑌕𑍁𑌲𑌬𑌲𑍍𑌲𑌵𑌯𑍁𑌵𑌤𑌿𑌸𑌖𑍀𑌵𑌚𑌨𑌂 𑌪𑌠𑌨𑍀𑌯𑌮𑍍 ॥ ॥
𑌆𑌵𑌾𑌸𑍋 𑌵𑌿𑌪𑌿𑌨𑌾𑌯𑌤𑍇 𑌪𑍍𑌰𑌿𑌯𑌸𑌖𑍀𑌮𑌾𑌲𑌾𑌪𑌿 𑌜𑌾𑌲𑌾𑌯𑌤𑍇 𑌤𑌾𑌪𑍋𑌽𑌪𑌿 𑌶𑍍𑌵𑌸𑌿𑌤𑍇𑌨 𑌦𑌾𑌵𑌦𑌹𑌨𑌜𑍍𑌵𑌾𑌲𑌾𑌕𑌲𑌾𑌪𑌾𑌯𑌤𑍇 ।
𑌸𑌾𑌪𑌿 𑌤𑍍𑌵𑌦𑍍𑌵𑌿𑌰𑌹𑍇𑌣 𑌹𑌂𑌤 𑌹𑌰𑌿𑌣𑍀𑌰𑍂𑌪𑌾𑌯𑌤𑍇 𑌹𑌾 𑌕𑌥𑌂 𑌕𑌂𑌦𑌰𑍍𑌪𑍋𑌽𑌪𑌿 𑌯𑌮𑌾𑌯𑌤𑍇 𑌵𑌿𑌰𑌚𑌯𑌞𑍍𑌶𑌾𑌰𑍍𑌦𑍂𑌲𑌵𑌿𑌕𑍍𑌰𑍀𑌡𑌿𑌤𑌮𑍍 ॥ 26 ॥
॥ 𑌗𑍀𑌤𑌂 ॥
𑌸𑍍𑌤𑌨𑌵𑌿𑌨𑌿𑌹𑌿𑌤𑌮𑌪𑌿 𑌹𑌾𑌰𑌮𑍁𑌦𑌾𑌰𑌮𑍍 ।
𑌸𑌾 𑌮𑌨𑍁𑌤𑍇 𑌕𑍃𑌶𑌤𑌨𑍁𑌰𑌤𑌿𑌭𑌾𑌰𑌮𑍍 ॥
𑌰𑌾𑌧𑌿𑌕𑌾 𑌵𑌿𑌰𑌹𑍇 𑌤𑌵 𑌕𑍇𑌶𑌵 ॥ 1 ॥
𑌸𑌰𑌸𑌮𑌸𑍃𑌣𑌮𑌪𑌿 𑌮𑌲𑌯𑌜𑌪𑌂𑌕𑌮𑍍 ।
𑌪𑌶𑍍𑌯𑌤𑌿 𑌵𑌿𑌷𑌮𑌿𑌵 𑌵𑌪𑍁𑌷𑌿 𑌸𑌶𑌂𑌕𑌮𑍍 ॥ 2 ॥
𑌶𑍍𑌵𑌸𑌿𑌤𑌪𑌵𑌨𑌮𑌨𑍁𑌪𑌮𑌪𑌰𑌿𑌣𑌾𑌹𑌮𑍍 ।
𑌮𑌦𑌨𑌦𑌹𑌨𑌮𑌿𑌵 𑌵𑌹𑌤𑌿 𑌸𑌦𑌾𑌹𑌮𑍍 ॥ 3 ॥
𑌦𑌿𑌶𑌿 𑌦𑌿𑌶𑌿 𑌕𑌿𑌰𑌤𑌿 𑌸𑌜𑌲𑌕𑌣𑌜𑌾𑌲𑌮𑍍 ।
𑌨𑌯𑌨𑌨𑌲𑌿𑌨𑌮𑌿𑌵 𑌵𑌿𑌗𑌲𑌿𑌤𑌨𑌾𑌲𑌮𑍍 ॥ 4 ॥
𑌨𑌯𑌨𑌵𑌿𑌷𑌯𑌮𑌪𑌿 𑌕𑌿𑌸𑌲𑌯𑌤𑌲𑍍𑌪𑌮𑍍 ।
𑌕𑌲𑌯𑌤𑌿 𑌵𑌿𑌹𑌿𑌤𑌹𑍁𑌤𑌾𑌶𑌵𑌿𑌕𑌲𑍍𑌪𑌮𑍍 ॥ 5 ॥
𑌤𑍍𑌯𑌜𑌤𑌿 𑌨 𑌪𑌾𑌣𑌿𑌤𑌲𑍇𑌨 𑌕𑌪𑍋𑌲𑌮𑍍 ।
𑌬𑌾𑌲𑌶𑌶𑌿𑌨𑌮𑌿𑌵 𑌸𑌾𑌯𑌮𑌲𑍋𑌲𑌮𑍍 ॥ 6 ॥
𑌹𑌰𑌿𑌰𑌿𑌤𑌿 𑌹𑌰𑌿𑌰𑌿𑌤𑌿 𑌜𑌪𑌤𑌿 𑌸𑌕𑌾𑌮𑌮𑍍 ।
𑌵𑌿𑌰𑌹𑌵𑌿𑌹𑌿𑌤𑌮𑌰𑌣𑍇𑌨 𑌨𑌿𑌕𑌾𑌮𑌮𑍍 ॥ ॥
𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌮𑌿𑌤𑌿 𑌗𑍀𑌤𑌮𑍍 ।
𑌸𑍁𑌖𑌯𑌤𑍁 𑌕𑍇𑌶𑌵𑌪𑌦𑌮𑍁𑌪𑍁𑌨𑍀𑌤𑌮𑍍 ॥ ॥
𑌸𑌾 𑌰𑍋𑌮𑌾𑌂𑌚𑌤𑌿 𑌸𑍀𑌤𑍍𑌕𑌰𑍋𑌤𑌿 𑌵𑌿𑌲𑌪𑌤𑍍𑌯𑍁𑌤𑍍𑌕𑌂𑌪𑌤𑍇 𑌤𑌾𑌮𑍍𑌯𑌤𑌿 𑌧𑍍𑌯𑌾𑌯𑌤𑍍𑌯𑍁𑌦𑍍𑌭𑍍𑌰𑌮𑌤𑌿 𑌪𑍍𑌰𑌮𑍀𑌲𑌤𑌿 𑌪𑌤𑌤𑍍𑌯𑍁𑌦𑍍𑌯𑌾𑌤𑌿 𑌮𑍂𑌰𑍍𑌚𑍍𑌛𑌤𑍍𑌯𑌪𑌿 ।
𑌏𑌤𑌾𑌵𑌤𑍍𑌯𑌤𑌨𑍁𑌜𑍍𑌵𑌰𑍇 𑌵𑌰𑌤𑌨𑍁𑌰𑍍𑌜𑍀𑌵𑍇𑌨𑍍𑌨 𑌕𑌿𑌂 𑌤𑍇 𑌰𑌸𑌾𑌤𑍍 𑌸𑍍𑌵𑌰𑍍𑌵𑍈𑌦𑍍𑌯𑌪𑍍𑌰𑌤𑌿𑌮 𑌪𑍍𑌰𑌸𑍀𑌦𑌸𑌿 𑌯𑌦𑌿 𑌤𑍍𑌯𑌕𑍍𑌤𑍋𑌽𑌨𑍍𑌯𑌥𑌾 𑌨𑌾𑌂𑌤𑌕𑌃 ॥ 2 ॥
𑌸𑍍𑌮𑌰𑌾𑌤𑍁𑌰𑌾𑌂 𑌦𑍈𑌵𑌤𑌵𑍈𑌦𑍍𑌯𑌹𑍃𑌦𑍍𑌯 𑌤𑍍𑌵𑌦𑌂𑌗𑌸𑌂𑌗𑌾𑌮𑍃𑌤𑌮𑌾𑌤𑍍𑌰𑌸𑌾𑌧𑍍𑌯𑌾𑌮𑍍 ।
𑌵𑌿𑌮𑍁𑌕𑍍𑌤𑌬𑌾𑌧𑌾𑌂 𑌕𑍁𑌰𑍁𑌷𑍇 𑌨 𑌰𑌾𑌧𑌾-𑌮𑍁𑌪𑍇𑌂𑌦𑍍𑌰 𑌵𑌜𑍍𑌰𑌾𑌦𑌪𑌿 𑌦𑌾𑌰𑍁𑌣𑍋𑌽𑌸𑌿 ॥ 2 ॥
𑌕𑌂𑌦𑌰𑍍𑌪𑌜𑍍𑌵𑌰𑌸𑌂𑌜𑍍𑌵𑌰𑌸𑍍𑌤𑍁𑌰𑌤𑌨𑍋𑌰𑌾𑌶𑍍𑌚𑌰𑍍𑌯𑌮𑌸𑍍𑌯𑌾𑌶𑍍𑌚𑌿𑌰𑌂 𑌚𑍇𑌤𑌶𑍍𑌚𑌂𑌦𑌨𑌚𑌂𑌦𑍍𑌰𑌮𑌃𑌕𑌮𑌲𑌿𑌨𑍀𑌚𑌿𑌂𑌤𑌾𑌸𑍁 𑌸𑌂𑌤𑌾𑌮𑍍𑌯𑌤𑌿 ।
𑌕𑌿𑌂𑌤𑍁 𑌕𑍍𑌲𑌾𑌂𑌤𑌿𑌵𑌶𑍇𑌨 𑌶𑍀𑌤𑌲𑌤𑌨𑍁𑌂 𑌤𑍍𑌵𑌾𑌮𑍇𑌕𑌮𑍇𑌵 𑌪𑍍𑌰𑌿𑌯𑌂 𑌧𑍍𑌯𑌾𑌯𑌂𑌤𑍀 𑌰𑌹𑌸𑌿 𑌸𑍍𑌥𑌿𑌤𑌾 𑌕𑌥𑌮𑌪𑌿 𑌕𑍍𑌷𑍀𑌣𑌾 𑌕𑍍𑌷𑌣𑌂 𑌪𑍍𑌰𑌾𑌣𑌿𑌤𑌿 ॥ 2 ॥
𑌕𑍍𑌷𑌣𑌮𑌪𑌿 𑌵𑌿𑌰𑌹𑌃 𑌪𑍁𑌰𑌾 𑌨 𑌸𑍇𑌹𑍇 𑌨𑌯𑌨𑌨𑌿𑌮𑍀𑌲𑌨𑌖𑌿𑌨𑍍𑌨𑌯𑌾 𑌯𑌯𑌾 𑌤𑍇 ।
𑌶𑍍𑌵𑌸𑌿𑌤𑌿 𑌕𑌥𑌮𑌸𑍌 𑌰𑌸𑌾𑌲𑌶𑌾𑌖𑌾𑌂 𑌚𑌿𑌰𑌵𑌿𑌰𑌹𑍇𑌣 𑌵𑌿𑌲𑍋𑌕𑍍𑌯 𑌪𑍁𑌷𑍍𑌪𑌿𑌤𑌾𑌗𑍍𑌰𑌾𑌮𑍍 ॥ 30 ॥
॥ 𑌇𑌤𑌿 𑌗𑍀𑌤𑌗𑍋𑌵𑌿𑌂𑌦𑍇 𑌸𑍍𑌨𑌿𑌗𑍍𑌧𑌮𑌾𑌧𑌵𑍋 𑌨𑌾𑌮 𑌚𑌤𑍁𑌰𑍍𑌥𑌃 𑌸𑌰𑍍𑌗𑌃 ॥
