(𑌶𑍍𑌰𑍀𑌦𑍇𑌵𑍀𑌭𑌾𑌗𑌵𑌤𑌂, 𑌦𑍍𑌵𑌾𑌦𑌶 𑌸𑍍𑌕𑌂𑌧𑌂, 𑌦𑌶𑌮𑍋𑌽𑌧𑍍𑌯𑌾𑌯𑌃, , 𑌮𑌣𑌿𑌦𑍍𑌵𑍀𑌪 𑌵𑌰𑍍𑌣𑌨 - 1)

𑌵𑍍𑌯𑌾𑌸 𑌉𑌵𑌾𑌚 –
𑌬𑍍𑌰𑌹𑍍𑌮𑌲𑍋𑌕𑌾𑌦𑍂𑌰𑍍𑌧𑍍𑌵𑌭𑌾𑌗𑍇 𑌸𑌰𑍍𑌵𑌲𑍋𑌕𑍋𑌽𑌸𑍍𑌤𑌿 𑌯𑌃 𑌶𑍍𑌰𑍁𑌤𑌃 ।
𑌮𑌣𑌿𑌦𑍍𑌵𑍀𑌪𑌃 𑌸 𑌏𑌵𑌾𑌸𑍍𑌤𑌿 𑌯𑌤𑍍𑌰 𑌦𑍇𑌵𑍀 𑌵𑌿𑌰𑌾𑌜𑌤𑍇 ॥ 1 ॥

𑌸𑌰𑍍𑌵𑌸𑍍𑌮𑌾𑌦𑌧𑌿𑌕𑍋 𑌯𑌸𑍍𑌮𑌾𑌤𑍍𑌸𑌰𑍍𑌵𑌲𑍋𑌕𑌸𑍍𑌤𑌤𑌃 𑌸𑍍𑌮𑍃𑌤𑌃 ।
𑌪𑍁𑌰𑌾 𑌪𑌰𑌾𑌂𑌬𑌯𑍈𑌵𑌾𑌯𑌂 𑌕𑌲𑍍𑌪𑌿𑌤𑍋 𑌮𑌨𑌸𑍇𑌚𑍍𑌛𑌯𑌾 ॥ 2 ॥

𑌸𑌰𑍍𑌵𑌾𑌦𑍌 𑌨𑌿𑌜𑌵𑌾𑌸𑌾𑌰𑍍𑌥𑌂 𑌪𑍍𑌰𑌕𑍃𑌤𑍍𑌯𑌾 𑌮𑍂𑌲𑌭𑍂𑌤𑌯𑌾 ।
𑌕𑍈𑌲𑌾𑌸𑌾𑌦𑌧𑌿𑌕𑍋 𑌲𑍋𑌕𑍋 𑌵𑍈𑌕𑍁𑌂𑌠𑌾𑌦𑌪𑌿 𑌚𑍋𑌤𑍍𑌤𑌮𑌃 ॥ 3 ॥

𑌗𑍋𑌲𑍋𑌕𑌾𑌦𑌪𑌿 𑌸𑌰𑍍𑌵𑌸𑍍𑌮𑌾𑌤𑍍𑌸𑌰𑍍𑌵𑌲𑍋𑌕𑍋𑌽𑌧𑌿𑌕𑌃 𑌸𑍍𑌮𑍃𑌤𑌃 ।
𑌨𑍈𑌤𑌤𑍍𑌸𑌮𑌂 𑌤𑍍𑌰𑌿𑌲𑍋𑌕𑍍𑌯𑌾𑌂 𑌤𑍁 𑌸𑍁𑌂𑌦𑌰𑌂 𑌵𑌿𑌦𑍍𑌯𑌤𑍇 𑌕𑍍𑌵𑌚𑌿𑌤𑍍 ॥ 4 ॥

𑌛𑌤𑍍𑌰𑍀𑌭𑍂𑌤𑌂 𑌤𑍍𑌰𑌿𑌜𑌗𑌤𑍋 𑌭𑌵𑌸𑌂𑌤𑌾𑌪𑌨𑌾𑌶𑌕𑌮𑍍 ।
𑌛𑌾𑌯𑌾𑌭𑍂𑌤𑌂 𑌤𑌦𑍇𑌵𑌾𑌸𑍍𑌤𑌿 𑌬𑍍𑌰𑌹𑍍𑌮𑌾𑌂𑌡𑌾𑌨𑌾𑌂 𑌤𑍁 𑌸𑌤𑍍𑌤𑌮 ॥ 5 ॥

𑌬𑌹𑍁𑌯𑍋𑌜𑌨𑌵𑌿𑌸𑍍𑌤𑍀𑌰𑍍𑌣𑍋 𑌗𑌂𑌭𑍀𑌰𑌸𑍍𑌤𑌾𑌵𑌦𑍇𑌵 𑌹𑌿 ।
𑌮𑌣𑌿𑌦𑍍𑌵𑍀𑌪𑌸𑍍𑌯 𑌪𑌰𑌿𑌤𑍋 𑌵𑌰𑍍𑌤𑌤𑍇 𑌤𑍁 𑌸𑍁𑌧𑍋𑌦𑌧𑌿𑌃 ॥ 6 ॥

𑌮𑌰𑍁𑌤𑍍𑌸𑌂𑌘𑌟𑍍𑌟𑌨𑍋𑌤𑍍𑌕𑍀𑌰𑍍𑌣𑌤𑌰𑌂𑌗 𑌶𑌤𑌸𑌂𑌕𑍁𑌲𑌃 ।
𑌰𑌤𑍍𑌨𑌾𑌚𑍍𑌛𑌵𑌾𑌲𑍁𑌕𑌾𑌯𑍁𑌕𑍍𑌤𑍋 𑌝𑌷𑌶𑌂𑌖𑌸𑌮𑌾𑌕𑍁𑌲𑌃 ॥ 𑍭 ॥

𑌵𑍀𑌚𑌿𑌸𑌂𑌘𑌰𑍍𑌷𑌸𑌂𑌜𑌾𑌤𑌲𑌹𑌰𑍀𑌕𑌣𑌶𑍀𑌤𑌲𑌃 ।
𑌨𑌾𑌨𑌾𑌧𑍍𑌵𑌜𑌸𑌮𑌾𑌯𑍁𑌕𑍍𑌤𑌾 𑌨𑌾𑌨𑌾𑌪𑍋𑌤𑌗𑌤𑌾𑌗𑌤𑍈𑌃 ॥ 𑍮 ॥

𑌵𑌿𑌰𑌾𑌜𑌮𑌾𑌨𑌃 𑌪𑌰𑌿𑌤𑌸𑍍𑌤𑍀𑌰𑌰𑌤𑍍𑌨𑌦𑍍𑌰𑍁𑌮𑍋 𑌮𑌹𑌾𑌨𑍍 ।
𑌤𑌦𑍁𑌤𑍍𑌤𑌰𑌮𑌯𑍋𑌧𑌾𑌤𑍁𑌨𑌿𑌰𑍍𑌮𑌿𑌤𑍋 𑌗𑌗𑌨𑍇 𑌤𑌤𑌃 ॥ 𑍯 ॥

𑌸𑌪𑍍𑌤𑌯𑍋𑌜𑌨𑌵𑌿𑌸𑍍𑌤𑍀𑌰𑍍𑌣𑌃 𑌪𑍍𑌰𑌾𑌕𑌾𑌰𑍋 𑌵𑌰𑍍𑌤𑌤𑍇 𑌮𑌹𑌾𑌨𑍍 ।
𑌨𑌾𑌨𑌾𑌶𑌸𑍍𑌤𑍍𑌰𑌪𑍍𑌰𑌹𑌰𑌣𑌾 𑌨𑌾𑌨𑌾𑌯𑍁𑌦𑍍𑌧𑌵𑌿𑌶𑌾𑌰𑌦𑌾𑌃 ॥ 10 ॥

𑌰𑌕𑍍𑌷𑌕𑌾 𑌨𑌿𑌵𑌸𑌂𑌤𑍍𑌯𑌤𑍍𑌰 𑌮𑍋𑌦𑌮𑌾𑌨𑌾𑌃 𑌸𑌮𑌂𑌤𑌤𑌃 ।
𑌚𑌤𑍁𑌰𑍍𑌦𑍍𑌵𑌾𑌰𑌸𑌮𑌾𑌯𑍁𑌕𑍍𑌤𑍋 𑌦𑍍𑌵𑌾𑌰𑌪𑌾𑌲𑌶𑌤𑌾𑌨𑍍𑌵𑌿𑌤𑌃 ॥ 11 ॥

𑌨𑌾𑌨𑌾𑌗𑌣𑍈𑌃 𑌪𑌰𑌿𑌵𑍃𑌤𑍋 𑌦𑍇𑌵𑍀𑌭𑌕𑍍𑌤𑌿𑌯𑍁𑌤𑍈𑌰𑍍𑌨𑍃𑌪 ।
𑌦𑌰𑍍𑌶𑌨𑌾𑌰𑍍𑌥𑌂 𑌸𑌮𑌾𑌯𑌾𑌂𑌤𑌿 𑌯𑍇 𑌦𑍇𑌵𑌾 𑌜𑌗𑌦𑍀𑌶𑌿𑌤𑍁𑌃 ॥ 12 ॥

𑌤𑍇𑌷𑌾𑌂 𑌗𑌣𑌾 𑌵𑌸𑌂𑌤𑍍𑌯𑌤𑍍𑌰 𑌵𑌾𑌹𑌨𑌾𑌨𑌿 𑌚 𑌤𑌤𑍍𑌰 𑌹𑌿 ।
𑌵𑌿𑌮𑌾𑌨𑌶𑌤𑌸𑌂𑌘𑌰𑍍𑌷𑌘𑌂𑌟𑌾𑌸𑍍𑌵𑌨𑌸𑌮𑌾𑌕𑍁𑌲𑌃 ॥ 13 ॥

𑌹𑌯𑌹𑍇𑌷𑌾𑌖𑍁𑌰𑌾𑌘𑌾𑌤𑌬𑌧𑌿𑌰𑍀𑌕𑍃𑌤𑌦𑌿𑌂𑌮𑍁𑌖𑌃 ।
𑌗𑌣𑍈𑌃 𑌕𑌿𑌲𑌕𑌿𑌲𑌾𑌰𑌾𑌵𑍈𑌰𑍍𑌵𑍇𑌤𑍍𑌰𑌹𑌸𑍍𑌤𑍈𑌶𑍍𑌚 𑌤𑌾𑌡𑌿𑌤𑌾𑌃 ॥ 14 ॥

𑌸𑍇𑌵𑌕𑌾 𑌦𑍇𑌵𑌸𑌂𑌗𑌾𑌨𑌾𑌂 𑌭𑍍𑌰𑌾𑌜𑌂𑌤𑍇 𑌤𑌤𑍍𑌰 𑌭𑍂𑌮𑌿𑌪 ।
𑌤𑌸𑍍𑌮𑌿𑌂𑌕𑍋𑌲𑌾𑌹𑌲𑍇 𑌰𑌾𑌜𑌨𑍍𑌨𑌶𑌬𑍍𑌦𑌃 𑌕𑍇𑌨𑌚𑌿𑌤𑍍𑌕𑍍𑌵𑌚𑌿𑌤𑍍 ॥ 15 ॥

𑌕𑌸𑍍𑌯𑌚𑌿𑌚𑍍𑌛𑍍𑌰𑍂𑌯𑌤𑍇𑌽𑌤𑍍𑌯𑌂𑌤𑌂 𑌨𑌾𑌨𑌾𑌧𑍍𑌵𑌨𑌿𑌸𑌮𑌾𑌕𑍁𑌲𑍇 ।
𑌪𑌦𑍇 𑌪𑌦𑍇 𑌮𑌿𑌷𑍍𑌟𑌵𑌾𑌰𑌿𑌪𑌰𑌿𑌪𑍂𑌰𑍍𑌣𑌸𑌰𑌾𑌨𑍍𑌸𑌿 𑌚 ॥ 16 ॥

𑌵𑌾𑌟𑌿𑌕𑌾 𑌵𑌿𑌵𑌿𑌧𑌾 𑌰𑌾𑌜𑌨𑍍 𑌰𑌤𑍍𑌨𑌦𑍍𑌰𑍁𑌮𑌵𑌿𑌰𑌾𑌜𑌿𑌤𑌾𑌃 ।
𑌤𑌦𑍁𑌤𑍍𑌤𑌰𑌂 𑌮𑌹𑌾𑌸𑌾𑌰𑌧𑌾𑌤𑍁𑌨𑌿𑌰𑍍𑌮𑌿𑌤𑌮𑌂𑌡𑌲𑌃 ॥ 1𑍭 ॥

𑌸𑌾𑌲𑍋𑌽𑌪𑌰𑍋 𑌮𑌹𑌾𑌨𑌸𑍍𑌤𑌿 𑌗𑌗𑌨𑌸𑍍𑌪𑌰𑍍𑌶𑌿 𑌯𑌚𑍍𑌛𑌿𑌰𑌃 ।
𑌤𑍇𑌜𑌸𑌾 𑌸𑍍𑌯𑌾𑌚𑍍𑌛𑌤𑌗𑍁𑌣𑌃 𑌪𑍂𑌰𑍍𑌵𑌸𑌾𑌲𑌾𑌦𑌯𑌂 𑌪𑌰𑌃 ॥ 1𑍮 ॥

𑌗𑍋𑌪𑍁𑌰𑌦𑍍𑌵𑌾𑌰𑌸𑌹𑌿𑌤𑍋 𑌬𑌹𑍁𑌵𑍃𑌕𑍍𑌷𑌸𑌮𑌨𑍍𑌵𑌿𑌤𑌃 ।
𑌯𑌾 𑌵𑍃𑌕𑍍𑌷𑌜𑌾𑌤𑌯𑌃 𑌸𑌂𑌤𑌿 𑌸𑌰𑍍𑌵𑌾𑌸𑍍𑌤𑌾𑌸𑍍𑌤𑌤𑍍𑌰 𑌸𑌂𑌤𑌿 𑌚 ॥ 1𑍯 ॥

𑌨𑌿𑌰𑌂𑌤𑌰𑌂 𑌪𑍁𑌷𑍍𑌪𑌯𑍁𑌤𑌾𑌃 𑌸𑌦𑌾 𑌫𑌲𑌸𑌮𑌨𑍍𑌵𑌿𑌤𑌾𑌃 ।
𑌨𑌵𑌪𑌲𑍍𑌲𑌵𑌸𑌂𑌯𑍁𑌕𑍍𑌤𑌾𑌃 𑌪𑌰𑌸𑍌𑌰𑌭𑌸𑌂𑌕𑍁𑌲𑌾𑌃 ॥ 20 ॥

𑌪𑌨𑌸𑌾 𑌬𑌕𑍁𑌲𑌾 𑌲𑍋𑌧𑍍𑌰𑌾𑌃 𑌕𑌰𑍍𑌣𑌿𑌕𑌾𑌰𑌾𑌶𑍍𑌚 𑌶𑌿𑌂𑌶𑌪𑌾𑌃 ।
𑌦𑍇𑌵𑌦𑌾𑌰𑍁𑌕𑌾𑌂𑌚𑌨𑌾𑌰𑌾 𑌆𑌮𑍍𑌰𑌾𑌶𑍍𑌚𑍈𑌵 𑌸𑍁𑌮𑍇𑌰𑌵𑌃 ॥ 21 ॥

𑌲𑌿𑌕𑍁𑌚𑌾 𑌹𑌿𑌂𑌗𑍁𑌲𑌾𑌶𑍍𑌚𑍈𑌲𑌾 𑌲𑌵𑌂𑌗𑌾𑌃 𑌕𑌟𑍍𑌫𑌲𑌾𑌸𑍍𑌤𑌥𑌾 ।
𑌪𑌾𑌟𑌲𑌾 𑌮𑍁𑌚𑍁𑌕𑍁𑌂𑌦𑌾𑌶𑍍𑌚 𑌫𑌲𑌿𑌨𑍍𑌯𑍋 𑌜𑌘𑌨𑍇𑌫𑌲𑌾𑌃 ॥ 22 ॥

𑌤𑌾𑌲𑌾𑌸𑍍𑌤𑌮𑌾𑌲𑌾𑌃 𑌸𑌾𑌲𑌾𑌶𑍍𑌚 𑌕𑌂𑌕𑍋𑌲𑌾 𑌨𑌾𑌗𑌭𑌦𑍍𑌰𑌕𑌾𑌃 ।
𑌪𑍁𑌨𑍍𑌨𑌾𑌗𑌾𑌃 𑌪𑍀𑌲𑌵𑌃 𑌸𑌾𑌲𑍍𑌵𑌕𑌾 𑌵𑍈 𑌕𑌰𑍍𑌪𑍂𑌰𑌶𑌾𑌖𑌿𑌨𑌃 ॥ 23 ॥

𑌅𑌶𑍍𑌵𑌕𑌰𑍍𑌣𑌾 𑌹𑌸𑍍𑌤𑌿𑌕𑌰𑍍𑌣𑌾𑌸𑍍𑌤𑌾𑌲𑌪𑌰𑍍𑌣𑌾𑌶𑍍𑌚 𑌦𑌾𑌡𑌿𑌮𑌾𑌃 ।
𑌗𑌣𑌿𑌕𑌾 𑌬𑌂𑌧𑍁𑌜𑍀𑌵𑌾𑌶𑍍𑌚 𑌜𑌂𑌬𑍀𑌰𑌾𑌶𑍍𑌚 𑌕𑍁𑌰𑌂𑌡𑌕𑌾𑌃 ॥ 24 ॥

𑌚𑌾𑌂𑌪𑍇𑌯𑌾 𑌬𑌂𑌧𑍁𑌜𑍀𑌵𑌾𑌶𑍍𑌚 𑌤𑌥𑌾 𑌵𑍈 𑌕𑌨𑌕𑌦𑍍𑌰𑍁𑌮𑌾𑌃 ।
𑌕𑌾𑌲𑌾𑌗𑍁𑌰𑍁𑌦𑍍𑌰𑍁𑌮𑌾𑌶𑍍𑌚𑍈𑌵 𑌤𑌥𑌾 𑌚𑌂𑌦𑌨𑌪𑌾𑌦𑌪𑌾𑌃 ॥ 25 ॥

𑌖𑌰𑍍𑌜𑍂𑌰𑌾 𑌯𑍂𑌥𑌿𑌕𑌾𑌸𑍍𑌤𑌾𑌲𑌪𑌰𑍍𑌣𑍍𑌯𑌶𑍍𑌚𑍈𑌵 𑌤𑌥𑍇𑌕𑍍𑌷𑌵𑌃 ।
𑌕𑍍𑌷𑍀𑌰𑌵𑍃𑌕𑍍𑌷𑌾𑌶𑍍𑌚 𑌖𑌦𑌿𑌰𑌾𑌶𑍍𑌚𑌿𑌂𑌚𑌾𑌭𑌲𑍍𑌲𑌾𑌤𑌕𑌾𑌸𑍍𑌤𑌥𑌾 ॥ 26 ॥

𑌰𑍁𑌚𑌕𑌾𑌃 𑌕𑍁𑌟𑌜𑌾 𑌵𑍃𑌕𑍍𑌷𑌾 𑌬𑌿𑌲𑍍𑌵𑌵𑍃𑌕𑍍𑌷𑌾𑌸𑍍𑌤𑌥𑍈𑌵 𑌚 ।
𑌤𑍁𑌲𑌸𑍀𑌨𑌾𑌂 𑌵𑌨𑌾𑌨𑍍𑌯𑍇𑌵𑌂 𑌮𑌲𑍍𑌲𑌿𑌕𑌾𑌨𑌾𑌂 𑌤𑌥𑍈𑌵 𑌚 ॥ 2𑍭 ॥

𑌇𑌤𑍍𑌯𑌾𑌦𑌿𑌤𑌰𑍁𑌜𑌾𑌤𑍀𑌨𑌾𑌂 𑌵𑌨𑌾𑌨𑍍𑌯𑍁𑌪𑌵𑌨𑌾𑌨𑌿 𑌚 ।
𑌨𑌾𑌨𑌾𑌵𑌾𑌪𑍀𑌶𑌤𑍈𑌰𑍍𑌯𑍁𑌕𑍍𑌤𑌾𑌨𑍍𑌯𑍇𑌵𑌂 𑌸𑌂𑌤𑌿 𑌧𑌰𑌾𑌧𑌿𑌪 ॥ 2𑍮 ॥

𑌕𑍋𑌕𑌿𑌲𑌾𑌰𑌾𑌵𑌸𑌂𑌯𑍁𑌕𑍍𑌤𑌾 𑌗𑍁𑌨𑍍𑌜𑌦𑍍𑌭𑍍𑌰𑌮𑌰𑌭𑍂𑌷𑌿𑌤𑌾𑌃 ।
𑌨𑌿𑌰𑍍𑌯𑌾𑌸𑌸𑍍𑌰𑌾𑌵𑌿𑌣𑌃 𑌸𑌰𑍍𑌵𑍇 𑌸𑍍𑌨𑌿𑌗𑍍𑌧𑌚𑍍𑌛𑌾𑌯𑌾𑌸𑍍𑌤𑌰𑍂𑌤𑍍𑌤𑌮𑌾𑌃 ॥ 2𑍯 ॥

𑌨𑌾𑌨𑌾𑌋𑌤𑍁𑌭𑌵𑌾 𑌵𑍃𑌕𑍍𑌷𑌾 𑌨𑌾𑌨𑌾𑌪𑌕𑍍𑌷𑌿𑌸𑌮𑌾𑌕𑍁𑌲𑌾𑌃 ।
𑌨𑌾𑌨𑌾𑌰𑌸𑌸𑍍𑌰𑌾𑌵𑌿𑌣𑍀𑌭𑌿𑌰𑍍𑌨𑌦𑍀𑌭𑌿𑌰𑌤𑌿𑌶𑍋𑌭𑌿𑌤𑌾𑌃 ॥ 30 ॥

𑌪𑌾𑌰𑌾𑌵𑌤𑌶𑍁𑌕𑌵𑍍𑌰𑌾𑌤𑌸𑌾𑌰𑌿𑌕𑌾𑌪𑌕𑍍𑌷𑌮𑌾𑌰𑍁𑌤𑍈𑌃 ।
𑌹𑌂𑌸𑌪𑌕𑍍𑌷𑌸𑌮𑍁𑌦𑍍𑌭𑍂𑌤 𑌵𑌾𑌤𑌵𑍍𑌰𑌾𑌤𑍈𑌶𑍍𑌚𑌲𑌦𑍍𑌦𑍍𑌰𑍁𑌮𑌮𑍍 ॥ 31 ॥

𑌸𑍁𑌗𑌂𑌧𑌗𑍍𑌰𑌾𑌹𑌿𑌪𑌵𑌨𑌪𑍂𑌰𑌿𑌤𑌂 𑌤𑌦𑍍𑌵𑌨𑍋𑌤𑍍𑌤𑌮𑌮𑍍 ।
𑌸𑌹𑌿𑌤𑌂 𑌹𑌰𑌿𑌣𑍀𑌯𑍂𑌥𑍈𑌰𑍍𑌧𑌾𑌵𑌮𑌾𑌨𑍈𑌰𑌿𑌤𑌸𑍍𑌤𑌤𑌃 ॥ 32 ॥

𑌨𑍃𑌤𑍍𑌯𑌦𑍍𑌬𑌰𑍍𑌹𑌿𑌕𑌦𑌂𑌬𑌸𑍍𑌯 𑌕𑍇𑌕𑌾𑌰𑌾𑌵𑍈𑌃 𑌸𑍁𑌖𑌪𑍍𑌰𑌦𑍈𑌃 ।
𑌨𑌾𑌦𑌿𑌤𑌂 𑌤𑌦𑍍𑌵𑌨𑌂 𑌦𑌿𑌵𑍍𑌯𑌂 𑌮𑌧𑍁𑌸𑍍𑌰𑌾𑌵𑌿 𑌸𑌮𑌂𑌤𑌤𑌃 ॥ 33 ॥

𑌕𑌾𑌂𑌸𑍍𑌯𑌸𑌾𑌲𑌾𑌦𑍁𑌤𑍍𑌤𑌰𑍇 𑌤𑍁 𑌤𑌾𑌮𑍍𑌰𑌸𑌾𑌲𑌃 𑌪𑍍𑌰𑌕𑍀𑌰𑍍𑌤𑌿𑌤𑌃 ।
𑌚𑌤𑍁𑌰𑌸𑍍𑌰𑌸𑌮𑌾𑌕𑌾𑌰 𑌉𑌨𑍍𑌨𑌤𑍍𑌯𑌾 𑌸𑌪𑍍𑌤𑌯𑍋𑌜𑌨𑌃 ॥ 34 ॥

𑌦𑍍𑌵𑌯𑍋𑌸𑍍𑌤𑍁 𑌸𑌾𑌲𑌯𑍋𑌰𑍍𑌮𑌧𑍍𑌯𑍇 𑌸𑌂𑌪𑍍𑌰𑍋𑌕𑍍𑌤𑌾 𑌕𑌲𑍍𑌪𑌵𑌾𑌟𑌿𑌕𑌾 ।
𑌯𑍇𑌷𑌾𑌂 𑌤𑌰𑍂𑌣𑌾𑌂 𑌪𑍁𑌷𑍍𑌪𑌾𑌣𑌿 𑌕𑌾𑌂𑌚𑌨𑌾𑌭𑌾𑌨𑌿 𑌭𑍂𑌮𑌿𑌪 ॥ 35 ॥

𑌪𑌤𑍍𑌰𑌾𑌣𑌿 𑌕𑌾𑌂𑌚𑌨𑌾𑌭𑌾𑌨𑌿 𑌰𑌤𑍍𑌨𑌬𑍀𑌜𑌫𑌲𑌾𑌨𑌿 𑌚 ।
𑌦𑌶𑌯𑍋𑌜𑌨𑌗𑌂𑌧𑍋 𑌹𑌿 𑌪𑍍𑌰𑌸𑌰𑍍𑌪𑌤𑌿 𑌸𑌮𑌂𑌤𑌤𑌃 ॥ 36 ॥

𑌤𑌦𑍍𑌵𑌨𑌂 𑌰𑌕𑍍𑌷𑌿𑌤𑌂 𑌰𑌾𑌜𑌨𑍍𑌵𑌸𑌂𑌤𑍇𑌨𑌰𑍍𑌤𑍁𑌨𑌾𑌨𑌿𑌶𑌮𑍍 ।
𑌪𑍁𑌷𑍍𑌪𑌸𑌿𑌂𑌹𑌾𑌸𑌨𑌾𑌸𑍀𑌨𑌃 𑌪𑍁𑌷𑍍𑌪𑌚𑍍𑌛𑌤𑍍𑌰𑌵𑌿𑌰𑌾𑌜𑌿𑌤𑌃 ॥ 3𑍭 ॥

𑌪𑍁𑌷𑍍𑌪𑌭𑍂𑌷𑌾𑌭𑍂𑌷𑌿𑌤𑌶𑍍𑌚 𑌪𑍁𑌷𑍍𑌪𑌾𑌸𑌵𑌵𑌿𑌘𑍂𑌰𑍍𑌣𑌿𑌤𑌃 ।
𑌮𑌧𑍁𑌶𑍍𑌰𑍀𑌰𑍍𑌮𑌾𑌧𑌵𑌶𑍍𑌰𑍀𑌶𑍍𑌚 𑌦𑍍𑌵𑍇 𑌭𑌾𑌰𑍍𑌯𑍇 𑌤𑌸𑍍𑌯 𑌸𑌮𑍍𑌮𑌤𑍇 ॥ 3𑍮 ॥

𑌕𑍍𑌰𑍀𑌡𑌤𑌃 𑌸𑍍𑌮𑍇𑌰𑌵𑌦𑌨𑍇 𑌸𑍁𑌮𑌸𑍍𑌤𑌬𑌕𑌕𑌂𑌦𑍁𑌕𑍈𑌃 ।
𑌅𑌤𑍀𑌵 𑌰𑌮𑍍𑌯𑌂 𑌵𑌿𑌪𑌿𑌨𑌂 𑌮𑌧𑍁𑌸𑍍𑌰𑌾𑌵𑌿 𑌸𑌮𑌂𑌤𑌤𑌃 ॥ 3𑍯 ॥

𑌦𑌶𑌯𑍋𑌜𑌨𑌪𑌰𑍍𑌯𑌂𑌤𑌂 𑌕𑍁𑌸𑍁𑌮𑌾𑌮𑍋𑌦𑌵𑌾𑌯𑍁𑌨𑌾 ।
𑌪𑍂𑌰𑌿𑌤𑌂 𑌦𑌿𑌵𑍍𑌯𑌗𑌂𑌧𑌰𑍍𑌵𑍈𑌃 𑌸𑌾𑌂𑌗𑌨𑍈𑌰𑍍𑌗𑌾𑌨𑌲𑍋𑌲𑍁𑌪𑍈𑌃 ॥ 40 ॥

𑌶𑍋𑌭𑌿𑌤𑌂 𑌤𑌦𑍍𑌵𑌨𑌂 𑌦𑌿𑌵𑍍𑌯𑌂 𑌮𑌤𑍍𑌤𑌕𑍋𑌕𑌿𑌲𑌨𑌾𑌦𑌿𑌤𑌮𑍍 ।
𑌵𑌸𑌂𑌤𑌲𑌕𑍍𑌷𑍍𑌮𑍀𑌸𑌂𑌯𑍁𑌕𑍍𑌤𑌂 𑌕𑌾𑌮𑌿𑌕𑌾𑌮𑌪𑍍𑌰𑌵𑌰𑍍𑌧𑌨𑌮𑍍 ॥ 41 ॥

𑌤𑌾𑌮𑍍𑌰𑌸𑌾𑌲𑌾𑌦𑍁𑌤𑍍𑌤𑌰𑌤𑍍𑌰 𑌸𑍀𑌸𑌸𑌾𑌲𑌃 𑌪𑍍𑌰𑌕𑍀𑌰𑍍𑌤𑌿𑌤𑌃 ।
𑌸𑌮𑍁𑌚𑍍𑌛𑍍𑌰𑌾𑌯𑌃 𑌸𑍍𑌮𑍃𑌤𑍋𑌽𑌪𑍍𑌯𑌸𑍍𑌯 𑌸𑌪𑍍𑌤𑌯𑍋𑌜𑌨𑌸𑌂𑌖𑍍𑌯𑌯𑌾 ॥ 42 ॥

𑌸𑌂𑌤𑌾𑌨𑌵𑌾𑌟𑌿𑌕𑌾𑌮𑌧𑍍𑌯𑍇 𑌸𑌾𑌲𑌯𑍋𑌸𑍍𑌤𑍁 𑌦𑍍𑌵𑌯𑍋𑌰𑍍𑌨𑍃𑌪 ।
𑌦𑌶𑌯𑍋𑌜𑌨𑌗𑌂𑌧𑌸𑍍𑌤𑍁 𑌪𑍍𑌰𑌸𑍂𑌨𑌾𑌨𑌾𑌂 𑌸𑌮𑌂𑌤𑌤𑌃 ॥ 43 ॥

𑌹𑌿𑌰𑌣𑍍𑌯𑌾𑌭𑌾𑌨𑌿 𑌕𑍁𑌸𑍁𑌮𑌾𑌨𑍍𑌯𑍁𑌤𑍍𑌫𑍁𑌲𑍍𑌲𑌾𑌨𑌿 𑌨𑌿𑌰𑌂𑌤𑌰𑌮𑍍 ।
𑌅𑌮𑍃𑌤𑌦𑍍𑌰𑌵𑌸𑌂𑌯𑍁𑌕𑍍𑌤𑌫𑌲𑌾𑌨𑌿 𑌮𑌧𑍁𑌰𑌾𑌣𑌿 𑌚 ॥ 44 ॥

𑌗𑍍𑌰𑍀𑌷𑍍𑌮𑌰𑍍𑌤𑍁𑌰𑍍𑌨𑌾𑌯𑌕𑌸𑍍𑌤𑌸𑍍𑌯𑌾 𑌵𑌾𑌟𑌿𑌕𑌾𑌯𑌾 𑌨𑍃𑌪𑍋𑌤𑍍𑌤𑌮 ।
𑌶𑍁𑌕𑍍𑌰𑌶𑍍𑌰𑍀𑌶𑍍𑌚 𑌶𑍁𑌚𑌿𑌶𑍍𑌰𑍀𑌶𑍍𑌚 𑌦𑍍𑌵𑍇 𑌭𑌾𑌰𑍍𑌯𑍇 𑌤𑌸𑍍𑌯 𑌸𑌮𑍍𑌮𑌤𑍇 ॥ 45 ॥

𑌸𑌂𑌤𑌾𑌪𑌤𑍍𑌰𑌸𑍍𑌤𑌲𑍋𑌕𑌾𑌸𑍍𑌤𑍁 𑌵𑍃𑌕𑍍𑌷𑌮𑍂𑌲𑍇𑌷𑍁 𑌸𑌂𑌸𑍍𑌥𑌿𑌤𑌾𑌃 ।
𑌨𑌾𑌨𑌾𑌸𑌿𑌦𑍍𑌧𑍈𑌃 𑌪𑌰𑌿𑌵𑍃𑌤𑍋 𑌨𑌾𑌨𑌾𑌦𑍇𑌵𑍈𑌃 𑌸𑌮𑌨𑍍𑌵𑌿𑌤𑌃 ॥ 46 ॥

𑌵𑌿𑌲𑌾𑌸𑌿𑌨𑍀𑌨𑌾𑌂 𑌬𑍃𑌂𑌦𑍈𑌸𑍍𑌤𑍁 𑌚𑌂𑌦𑌨𑌦𑍍𑌰𑌵𑌪𑌂𑌕𑌿𑌲𑍈𑌃 ।
𑌪𑍁𑌷𑍍𑌪𑌮𑌾𑌲𑌾𑌭𑍂𑌷𑌿𑌤𑍈𑌸𑍍𑌤𑍁 𑌤𑌾𑌲𑌵𑍃𑌂𑌤𑌕𑌰𑌾𑌂𑌬𑍁𑌜𑍈𑌃 ॥ 4𑍭 ॥

[𑌪𑌾𑌠𑌭𑍇𑌦𑌃- 𑌪𑍍𑌰𑌾𑌕𑌾𑌰𑌃]
𑌪𑍍𑌰𑌕𑌾𑌰𑌃 𑌶𑍋𑌭𑌿𑌤𑍋 𑌏𑌜𑌚𑍍𑌛𑍀𑌤𑌲𑌾𑌂𑌬𑍁𑌨𑌿𑌷𑍇𑌵𑌿𑌭𑌿𑌃 ।
𑌸𑍀𑌸𑌸𑌾𑌲𑌾𑌦𑍁𑌤𑍍𑌤𑌰𑌤𑍍𑌰𑌾𑌪𑍍𑌯𑌾𑌰𑌕𑍂𑌟𑌮𑌯𑌃 𑌶𑍁𑌭𑌃 ॥ 4𑍮 ॥

𑌪𑍍𑌰𑌾𑌕𑌾𑌰𑍋 𑌵𑌰𑍍𑌤𑌤𑍇 𑌰𑌾𑌜𑌨𑍍𑌮𑍁𑌨𑌿𑌯𑍋𑌜𑌨𑌦𑍈𑌰𑍍𑌘𑍍𑌯𑌵𑌾𑌨𑍍 ।
𑌹𑌰𑌿𑌚𑌂𑌦𑌨𑌵𑍃𑌕𑍍𑌷𑌾𑌣𑌾𑌂 𑌵𑌾𑌟𑍀 𑌮𑌧𑍍𑌯𑍇 𑌤𑌯𑍋𑌃 𑌸𑍍𑌮𑍃𑌤𑌾 ॥ 4𑍯 ॥

𑌸𑌾𑌲𑌯𑍋𑌰𑌧𑌿𑌨𑌾𑌥𑌸𑍍𑌤𑍁 𑌵𑌰𑍍𑌷𑌰𑍍𑌤𑍁𑌰𑍍𑌮𑍇𑌘𑌵𑌾𑌹𑌨𑌃 ।
𑌵𑌿𑌦𑍍𑌯𑍁𑌤𑍍𑌪𑌿𑌂𑌗𑌲𑌨𑍇𑌤𑍍𑌰𑌶𑍍𑌚 𑌜𑍀𑌮𑍂𑌤𑌕𑌵𑌚𑌃 𑌸𑍍𑌮𑍃𑌤𑌃 ॥ 50 ॥

𑌵𑌜𑍍𑌰𑌨𑌿𑌰𑍍𑌘𑍋𑌷𑌮𑍁𑌖𑌰𑌶𑍍𑌚𑍇𑌂𑌦𑍍𑌰𑌧𑌨𑍍𑌵𑌾 𑌸𑌮𑌂𑌤𑌤𑌃 ।
𑌸𑌹𑌸𑍍𑌰𑌶𑍋 𑌵𑌾𑌰𑌿𑌧𑌾𑌰𑌾 𑌮𑍁𑌂𑌚𑌨𑍍𑌨𑌾𑌸𑍍𑌤𑍇 𑌗𑌣𑌾𑌵𑍃𑌤𑌃 ॥ 51 ॥

𑌨𑌭𑌃 𑌶𑍍𑌰𑍀𑌶𑍍𑌚 𑌨𑌭𑌸𑍍𑌯𑌶𑍍𑌰𑍀𑌃 𑌸𑍍𑌵𑌰𑌸𑍍𑌯𑌾 𑌰𑌸𑍍𑌯𑌮𑌾𑌲𑌿𑌨𑍀 ।
𑌅𑌂𑌬𑌾 𑌦𑍁𑌲𑌾 𑌨𑌿𑌰𑌤𑍍𑌨𑌿𑌶𑍍𑌚𑌾𑌭𑍍𑌰𑌮𑌂𑌤𑍀 𑌮𑍇𑌘𑌯𑌂𑌤𑌿𑌕𑌾 ॥ 52 ॥

𑌵𑌰𑍍𑌷𑌯𑌂𑌤𑍀 𑌚𑌿𑌬𑍁𑌣𑌿𑌕𑌾 𑌵𑌾𑌰𑌿𑌧𑌾𑌰𑌾 𑌚 𑌸𑌮𑍍𑌮𑌤𑌾𑌃 ।
𑌵𑌰𑍍𑌷𑌰𑍍𑌤𑍋𑌰𑍍𑌦𑍍𑌵𑌾𑌦𑌶 𑌪𑍍𑌰𑍋𑌕𑍍𑌤𑌾𑌃 𑌶𑌕𑍍𑌤𑌯𑍋 𑌮𑌦𑌵𑌿𑌹𑍍𑌵𑌲𑌾𑌃 ॥ 53 ॥

𑌨𑌵𑌪𑌲𑍍𑌲𑌵𑌵𑍃𑌕𑍍𑌷𑌾𑌶𑍍𑌚 𑌨𑌵𑍀𑌨𑌲𑌤𑌿𑌕𑌾𑌨𑍍𑌵𑌿𑌤𑌾𑌃 ।
𑌹𑌰𑌿𑌤𑌾𑌨𑌿 𑌤𑍃𑌣𑌾𑌨𑍍𑌯𑍇𑌵 𑌵𑍇𑌷𑍍𑌟𑌿𑌤𑌾 𑌯𑍈𑌰𑍍𑌧𑌰𑌾𑌽𑌖𑌿𑌲𑌾 ॥ 54 ॥

𑌨𑌦𑍀𑌨𑌦𑌪𑍍𑌰𑌵𑌾𑌹𑌾𑌶𑍍𑌚 𑌪𑍍𑌰𑌵𑌹𑌂𑌤𑌿 𑌚 𑌵𑍇𑌗𑌤𑌃 ।
𑌸𑌰𑌾𑌂𑌸𑌿 𑌕𑌲𑍁𑌷𑌾𑌂𑌬𑍂𑌨𑌿 𑌰𑌾𑌗𑌿𑌚𑌿𑌤𑍍𑌤𑌸𑌮𑌾𑌨𑌿 𑌚 ॥ 55 ॥

𑌵𑌸𑌂𑌤𑌿 𑌦𑍇𑌵𑌾𑌃 𑌸𑌿𑌦𑍍𑌧𑌾𑌶𑍍𑌚 𑌯𑍇 𑌦𑍇𑌵𑍀𑌕𑌰𑍍𑌮𑌕𑌾𑌰𑌿𑌣𑌃 ।
𑌵𑌾𑌪𑍀𑌕𑍂𑌪𑌤𑌡𑌾𑌗𑌾𑌶𑍍𑌚 𑌯𑍇 𑌦𑍇𑌵𑍍𑌯𑌰𑍍𑌥𑌂 𑌸𑌮𑌰𑍍𑌪𑌿𑌤𑌾𑌃 ॥ 56 ॥

𑌤𑍇 𑌗𑌣𑌾 𑌨𑌿𑌵𑌸𑌂𑌤𑍍𑌯𑌤𑍍𑌰 𑌸𑌵𑌿𑌲𑌾𑌸𑌾𑌶𑍍𑌚 𑌸𑌾𑌂𑌗𑌨𑌾𑌃 ।
𑌆𑌰𑌕𑍂𑌟𑌮𑌯𑌾𑌦𑌗𑍍𑌰𑍇 𑌸𑌪𑍍𑌤𑌯𑍋𑌜𑌨𑌦𑍈𑌰𑍍𑌘𑍍𑌯𑌵𑌾𑌨𑍍 ॥ 5𑍭 ॥

𑌪𑌂𑌚𑌲𑍋𑌹𑌾𑌤𑍍𑌮𑌕𑌃 𑌸𑌾𑌲𑍋 𑌮𑌧𑍍𑌯𑍇 𑌮𑌂𑌦𑌾𑌰𑌵𑌾𑌟𑌿𑌕𑌾 ।
𑌨𑌾𑌨𑌾𑌪𑍁𑌷𑍍𑌪𑌲𑌤𑌾𑌕𑍀𑌰𑍍𑌣𑌾 𑌨𑌾𑌨𑌾𑌪𑌲𑍍𑌲𑌵𑌶𑍋𑌭𑌿𑌤𑌾 ॥ 5𑍮 ॥

𑌅𑌧𑌿𑌷𑍍𑌠𑌾𑌤𑌾𑌽𑌤𑍍𑌰 𑌸𑌂𑌪𑍍𑌰𑍋𑌕𑍍𑌤𑌃 𑌶𑌰𑌦𑍃𑌤𑍁𑌰𑌨𑌾𑌮𑌯𑌃 ।
𑌇𑌷𑌲𑌕𑍍𑌷𑍍𑌮𑍀𑌰𑍂𑌰𑍍𑌜𑌲𑌕𑍍𑌷𑍍𑌮𑍀𑌰𑍍𑌦𑍍𑌵𑍇 𑌭𑌾𑌰𑍍𑌯𑍇 𑌤𑌸𑍍𑌯 𑌸𑌮𑍍𑌮𑌤𑍇 ॥ 5𑍯 ॥

𑌨𑌾𑌨𑌾𑌸𑌿𑌦𑍍𑌧𑌾 𑌵𑌸𑌂𑌤𑍍𑌯𑌤𑍍𑌰 𑌸𑌾𑌂𑌗𑌨𑌾𑌃 𑌸𑌪𑌰𑌿𑌚𑍍𑌛𑌦𑌾𑌃 ।
𑌪𑌂𑌚𑌲𑍋𑌹𑌮𑌯𑌾𑌦𑌗𑍍𑌰𑍇 𑌸𑌪𑍍𑌤𑌯𑍋𑌜𑌨𑌦𑍈𑌰𑍍𑌘𑍍𑌯𑌵𑌾𑌨𑍍 ॥ 60 ॥

𑌦𑍀𑌪𑍍𑌯𑌮𑌾𑌨𑍋 𑌮𑌹𑌾𑌶𑍃𑌂𑌗𑍈𑌰𑍍𑌵𑌰𑍍𑌤𑌤𑍇 𑌰𑍌𑌪𑍍𑌯𑌸𑌾𑌲𑌕𑌃 ।
𑌪𑌾𑌰𑌿𑌜𑌾𑌤𑌾𑌟𑌵𑍀𑌮𑌧𑍍𑌯𑍇 𑌪𑍍𑌰𑌸𑍂𑌨𑌸𑍍𑌤𑌬𑌕𑌾𑌨𑍍𑌵𑌿𑌤𑌾 ॥ 61 ॥

𑌦𑌶𑌯𑍋𑌜𑌨𑌗𑌂𑌧𑍀𑌨𑌿 𑌕𑍁𑌸𑍁𑌮𑌾𑌨𑌿 𑌸𑌮𑌂𑌤𑌤𑌃 ।
𑌮𑍋𑌦𑌯𑌂𑌤𑌿 𑌗𑌣𑌾𑌨𑍍𑌸𑌰𑍍𑌵𑌾𑌨𑍍𑌯𑍇 𑌦𑍇𑌵𑍀𑌕𑌰𑍍𑌮𑌕𑌾𑌰𑌿𑌣𑌃 ॥ 62 ॥

𑌤𑌤𑍍𑌰𑌾𑌧𑌿𑌨𑌾𑌥𑌃 𑌸𑌂𑌪𑍍𑌰𑍋𑌕𑍍𑌤𑍋 𑌹𑍇𑌮𑌂𑌤𑌰𑍍𑌤𑍁𑌰𑍍𑌮𑌹𑍋𑌜𑍍𑌜𑍍𑌵𑌲𑌃 ।
𑌸𑌗𑌣𑌃 𑌸𑌾𑌯𑍁𑌧𑌃 𑌸𑌰𑍍𑌵𑌾𑌨𑍍 𑌰𑌾𑌗𑌿𑌣𑍋 𑌰𑌂𑌜𑌯𑌨𑍍𑌨𑌪𑌃 ॥ 63 ॥

𑌸𑌹𑌶𑍍𑌰𑍀𑌶𑍍𑌚 𑌸𑌹𑌸𑍍𑌯𑌶𑍍𑌰𑍀𑌰𑍍𑌦𑍍𑌵𑍇 𑌭𑌾𑌰𑍍𑌯𑍇 𑌤𑌸𑍍𑌯 𑌸𑌮𑍍𑌮𑌤𑍇 ।
𑌵𑌸𑌂𑌤𑌿 𑌤𑌤𑍍𑌰 𑌸𑌿𑌦𑍍𑌧𑌾𑌶𑍍𑌚 𑌯𑍇 𑌦𑍇𑌵𑍀𑌵𑍍𑌰𑌤𑌕𑌾𑌰𑌿𑌣𑌃 ॥ 64 ॥

𑌰𑍌𑌪𑍍𑌯𑌸𑌾𑌲𑌮𑌯𑌾𑌦𑌗𑍍𑌰𑍇 𑌸𑌪𑍍𑌤𑌯𑍋𑌜𑌨𑌦𑍈𑌰𑍍𑌘𑍍𑌯𑌵𑌾𑌨𑍍 ।
𑌸𑍌𑌵𑌰𑍍𑌣𑌸𑌾𑌲𑌃 𑌸𑌂𑌪𑍍𑌰𑍋𑌕𑍍𑌤𑌸𑍍𑌤𑌪𑍍𑌤𑌹𑌾𑌟𑌕𑌕𑌲𑍍𑌪𑌿𑌤𑌃 ॥ 65 ॥

𑌮𑌧𑍍𑌯𑍇 𑌕𑌦𑌂𑌬𑌵𑌾𑌟𑍀 𑌤𑍁 𑌪𑍁𑌷𑍍𑌪𑌪𑌲𑍍𑌲𑌵𑌶𑍋𑌭𑌿𑌤𑌾 ।
𑌕𑌦𑌂𑌬𑌮𑌦𑌿𑌰𑌾𑌧𑌾𑌰𑌾𑌃 𑌪𑍍𑌰𑌵𑌰𑍍𑌤𑌂𑌤𑍇 𑌸𑌹𑌸𑍍𑌰𑌶𑌃 ॥ 66 ॥

𑌯𑌾𑌭𑌿𑌰𑍍𑌨𑌿𑌪𑍀𑌤𑌪𑍀𑌤𑌾𑌭𑌿𑌰𑍍𑌨𑌿𑌜𑌾𑌨𑌂𑌦𑍋𑌽𑌨𑍁𑌭𑍂𑌯𑌤𑍇 ।
𑌤𑌤𑍍𑌰𑌾𑌧𑌿𑌨𑌾𑌥𑌃 𑌸𑌂𑌪𑍍𑌰𑍋𑌕𑍍𑌤𑌃 𑌶𑍈𑌶𑌿𑌰𑌰𑍍𑌤𑍁𑌰𑍍𑌮𑌹𑍋𑌦𑌯𑌃 ॥ 6𑍭 ॥

𑌤𑌪𑌃𑌶𑍍𑌰𑍀𑌶𑍍𑌚 𑌤𑌪𑌸𑍍𑌯𑌶𑍍𑌰𑍀𑌰𑍍𑌦𑍍𑌵𑍇 𑌭𑌾𑌰𑍍𑌯𑍇 𑌤𑌸𑍍𑌯 𑌸𑌮𑍍𑌮𑌤𑍇 ।
𑌮𑍋𑌦𑌮𑌾𑌨𑌃 𑌸𑌹𑍈𑌤𑌾𑌭𑍍𑌯𑌾𑌂 𑌵𑌰𑍍𑌤𑌤𑍇 𑌶𑌿𑌶𑌿𑌰𑌾𑌕𑍃𑌤𑌿𑌃 ॥ 6𑍮 ॥

𑌨𑌾𑌨𑌾𑌵𑌿𑌲𑌾𑌸𑌸𑌂𑌯𑍁𑌕𑍍𑌤𑍋 𑌨𑌾𑌨𑌾𑌗𑌣𑌸𑌮𑌾𑌵𑍃𑌤𑌃 ।
𑌨𑌿𑌵𑌸𑌂𑌤𑌿 𑌮𑌹𑌾𑌸𑌿𑌦𑍍𑌧𑌾 𑌯𑍇 𑌦𑍇𑌵𑍀𑌦𑌾𑌨𑌕𑌾𑌰𑌿𑌣𑌃 ॥ 6𑍯 ॥

𑌨𑌾𑌨𑌾𑌭𑍋𑌗𑌸𑌮𑍁𑌤𑍍𑌪𑌨𑍍𑌨𑌮𑌹𑌾𑌨𑌂𑌦𑌸𑌮𑌨𑍍𑌵𑌿𑌤𑌾𑌃 ।
𑌸𑌾𑌂𑌗𑌨𑌾𑌃 𑌪𑌰𑌿𑌵𑌾𑌰𑍈𑌸𑍍𑌤𑍁 𑌸𑌂𑌘𑌶𑌃 𑌪𑌰𑌿𑌵𑌾𑌰𑌿𑌤𑌾𑌃 ॥ 𑍭0 ॥

𑌸𑍍𑌵𑌰𑍍𑌣𑌸𑌾𑌲𑌮𑌯𑌾𑌦𑌗𑍍𑌰𑍇 𑌮𑍁𑌨𑌿𑌯𑍋𑌜𑌨𑌦𑍈𑌰𑍍𑌘𑍍𑌯𑌵𑌾𑌨𑍍 ।
𑌪𑍁𑌷𑍍𑌪𑌰𑌾𑌗𑌮𑌯𑌃 𑌸𑌾𑌲𑌃 𑌕𑍁𑌂𑌕𑍁𑌮𑌾𑌰𑍁𑌣𑌵𑌿𑌗𑍍𑌰𑌹𑌃 ॥ 𑍭1 ॥

𑌪𑍁𑌷𑍍𑌪𑌰𑌾𑌗𑌮𑌯𑍀 𑌭𑍂𑌮𑌿𑌰𑍍𑌵𑌨𑌾𑌨𑍍𑌯𑍁𑌪𑌵𑌨𑌾𑌨𑌿 𑌚 ।
𑌰𑌤𑍍𑌨𑌵𑍃𑌕𑍍𑌷𑌾𑌲𑌵𑌾𑌲𑌾𑌶𑍍𑌚 𑌪𑍁𑌷𑍍𑌪𑌰𑌾𑌗𑌮𑌯𑌾𑌃 𑌸𑍍𑌮𑍃𑌤𑌾𑌃 ॥ 𑍭2 ॥

𑌪𑍍𑌰𑌾𑌕𑌾𑌰𑍋 𑌯𑌸𑍍𑌯 𑌰𑌤𑍍𑌨𑌸𑍍𑌯 𑌤𑌦𑍍𑌰𑌤𑍍𑌨𑌰𑌚𑌿𑌤𑌾 𑌦𑍍𑌰𑍁𑌮𑌾𑌃 ।
𑌵𑌨𑌭𑍂𑌃 𑌪𑌕𑍍𑌷𑌿𑌨𑌶𑍍𑌚𑍈𑌵 𑌰𑌤𑍍𑌨𑌵𑌰𑍍𑌣𑌜𑌲𑌾𑌨𑌿 𑌚 ॥ 𑍭3 ॥

𑌮𑌂𑌡𑌪𑌾 𑌮𑌂𑌡𑌪𑌸𑍍𑌤𑌂𑌭𑌾𑌃 𑌸𑌰𑌾𑌨𑍍𑌸𑌿 𑌕𑌮𑌲𑌾𑌨𑌿 𑌚 ।
𑌪𑍍𑌰𑌾𑌕𑌾𑌰𑍇 𑌤𑌤𑍍𑌰 𑌯𑌦𑍍𑌯𑌤𑍍𑌸𑍍𑌯𑌾𑌤𑍍𑌤𑌤𑍍𑌸𑌰𑍍𑌵𑌂 𑌤𑌤𑍍𑌸𑌮𑌂 𑌭𑌵𑍇𑌤𑍍 ॥ 𑍭4 ॥

𑌪𑌰𑌿𑌭𑌾𑌷𑍇𑌯𑌮𑍁𑌦𑍍𑌦𑌿𑌷𑍍𑌟𑌾 𑌰𑌤𑍍𑌨𑌸𑌾𑌲𑌾𑌦𑌿𑌷𑍁 𑌪𑍍𑌰𑌭𑍋 ।
𑌤𑍇𑌜𑌸𑌾 𑌸𑍍𑌯𑌾𑌲𑍍𑌲𑌕𑍍𑌷𑌗𑍁𑌣𑌃 𑌪𑍂𑌰𑍍𑌵𑌸𑌾𑌲𑌾𑌤𑍍𑌪𑌰𑍋 𑌨𑍃𑌪 ॥ 𑍭5 ॥

𑌦𑌿𑌕𑍍𑌪𑌾𑌲𑌾 𑌨𑌿𑌵𑌸𑌂𑌤𑍍𑌯𑌤𑍍𑌰 𑌪𑍍𑌰𑌤𑌿𑌬𑍍𑌰𑌹𑍍𑌮𑌾𑌨𑍍𑌡𑌵𑌰𑍍𑌤𑌿𑌨𑌾𑌮𑍍 ।
𑌦𑌿𑌕𑍍𑌪𑌾𑌲𑌾𑌨𑌾𑌂 𑌸𑌮𑌷𑍍𑌟𑍍𑌯𑌾𑌤𑍍𑌮𑌰𑍂𑌪𑌾𑌃 𑌸𑍍𑌫𑍂𑌰𑍍𑌜𑌦𑍍𑌵𑌰𑌾𑌯𑍁𑌧𑌾𑌃 ॥ 𑍭6 ॥

𑌪𑍂𑌰𑍍𑌵𑌾𑌶𑌾𑌯𑌾𑌂 𑌸𑌮𑍁𑌤𑍍𑌤𑍁𑌂𑌗𑌶𑍃𑌂𑌗𑌾 𑌪𑍂𑌰𑌮𑌰𑌾𑌵𑌤𑍀 ।
𑌨𑌾𑌨𑍋𑌪𑌵𑌨𑌸𑌂𑌯𑍁𑌕𑍍𑌤𑌾 𑌮𑌹𑍇𑌂𑌦𑍍𑌰𑌸𑍍𑌤𑌤𑍍𑌰 𑌰𑌾𑌜𑌤𑍇 ॥ 𑍭𑍭 ॥

𑌸𑍍𑌵𑌰𑍍𑌗𑌶𑍋𑌭𑌾 𑌚 𑌯𑌾 𑌸𑍍𑌵𑌰𑍍𑌗𑍇 𑌯𑌾𑌵𑌤𑍀 𑌸𑍍𑌯𑌾𑌤𑍍𑌤𑌤𑍋𑌽𑌧𑌿𑌕𑌾 ।
𑌸𑌮𑌷𑍍𑌟𑌿𑌶𑌤𑌨𑍇𑌤𑍍𑌰𑌸𑍍𑌯 𑌸𑌹𑌸𑍍𑌰𑌗𑍁𑌣𑌤𑌃 𑌸𑍍𑌮𑍃𑌤𑌾 ॥ 𑍭𑍮 ॥

𑌐𑌰𑌾𑌵𑌤𑌸𑌮𑌾𑌰𑍂𑌢𑍋 𑌵𑌜𑍍𑌰𑌹𑌸𑍍𑌤𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌦𑍇𑌵𑌸𑍇𑌨𑌾𑌪𑌰𑌿𑌵𑍃𑌤𑍋 𑌰𑌾𑌜𑌤𑍇𑌽𑌤𑍍𑌰 𑌶𑌤𑌕𑍍𑌰𑌤𑍁𑌃 ॥ 𑍭𑍯 ॥

𑌦𑍇𑌵𑌾𑌂𑌗𑌨𑌾𑌗𑌣𑌯𑍁𑌤𑌾 𑌶𑌚𑍀 𑌤𑌤𑍍𑌰 𑌵𑌿𑌰𑌾𑌜𑌤𑍇 ।
𑌵𑌹𑍍𑌨𑌿𑌕𑍋𑌣𑍇 𑌵𑌹𑍍𑌨𑌿𑌪𑍁𑌰𑍀 𑌵𑌹𑍍𑌨𑌿𑌪𑍂𑌃 𑌸𑌦𑍃𑌶𑍀 𑌨𑍃𑌪 ॥ 𑍮0 ॥

𑌸𑍍𑌵𑌾𑌹𑌾𑌸𑍍𑌵𑌧𑌾𑌸𑌮𑌾𑌯𑍁𑌕𑍍𑌤𑍋 𑌵𑌹𑍍𑌨𑌿𑌸𑍍𑌤𑌤𑍍𑌰 𑌵𑌿𑌰𑌾𑌜𑌤𑍇 ।
𑌨𑌿𑌜𑌵𑌾𑌹𑌨𑌭𑍂𑌷𑌾𑌢𑍍𑌯𑍋 𑌨𑌿𑌜𑌦𑍇𑌵𑌗𑌣𑍈𑌰𑍍𑌵𑍃𑌤𑌃 ॥ 𑍮1 ॥

𑌯𑌾𑌮𑍍𑌯𑌾𑌶𑌾𑌯𑌾𑌂 𑌯𑌮𑌪𑍁𑌰𑍀 𑌤𑌤𑍍𑌰 𑌦𑌂𑌡𑌧𑌰𑍋 𑌮𑌹𑌾𑌨𑍍 ।
𑌸𑍍𑌵𑌭𑌟𑍈𑌰𑍍𑌵𑍇𑌷𑍍𑌟𑌿𑌤𑍋 𑌰𑌾𑌜𑌨𑍍 𑌚𑌿𑌤𑍍𑌰𑌗𑍁𑌪𑍍𑌤𑌪𑍁𑌰𑍋𑌗𑌮𑍈𑌃 ॥ 𑍮2 ॥

𑌨𑌿𑌜𑌶𑌕𑍍𑌤𑌿𑌯𑍁𑌤𑍋 𑌭𑌾𑌸𑍍𑌵𑌤𑍍𑌤𑌨𑌯𑍋𑌽𑌸𑍍𑌤𑌿 𑌯𑌮𑍋 𑌮𑌹𑌾𑌨𑍍 ।
𑌨𑍈𑌰𑍃𑌤𑍍𑌯𑌾𑌂 𑌦𑌿𑌶𑌿 𑌰𑌾𑌕𑍍𑌷𑌸𑍍𑌯𑌾𑌂 𑌰𑌾𑌕𑍍𑌷𑌸𑍈𑌃 𑌪𑌰𑌿𑌵𑌾𑌰𑌿𑌤𑌃 ॥ 𑍮3 ॥

𑌖𑌡𑍍𑌗𑌧𑌾𑌰𑍀 𑌸𑍍𑌫𑍁𑌰𑌨𑍍𑌨𑌾𑌸𑍍𑌤𑍇 𑌨𑌿𑌰𑍃𑌤𑌿𑌰𑍍𑌨𑌿𑌜𑌶𑌕𑍍𑌤𑌿𑌯𑍁𑌕𑍍 ।
𑌵𑌾𑌰𑍁𑌣𑍍𑌯𑌾𑌂 𑌵𑌰𑍁𑌣𑍋 𑌰𑌾𑌜𑌾 𑌪𑌾𑌶𑌧𑌾𑌰𑍀 𑌪𑍍𑌰𑌤𑌾𑌪𑌵𑌾𑌨𑍍 ॥ 𑍮4 ॥

𑌮𑌹𑌾𑌝𑌶𑌸𑌮𑌾𑌰𑍂𑌢𑍋 𑌵𑌾𑌰𑍁𑌣𑍀𑌮𑌧𑍁𑌵𑌿𑌹𑍍𑌵𑌲𑌃 ।
𑌨𑌿𑌜𑌶𑌕𑍍𑌤𑌿𑌸𑌮𑌾𑌯𑍁𑌕𑍍𑌤𑍋 𑌨𑌿𑌜𑌯𑌾𑌦𑍋𑌗𑌣𑌾𑌨𑍍𑌵𑌿𑌤𑌃 ॥ 𑍮5 ॥

𑌸𑌮𑌾𑌸𑍍𑌤𑍇 𑌵𑌾𑌰𑍁𑌣𑍇 𑌲𑍋𑌕𑍇 𑌵𑌰𑍁𑌣𑌾𑌨𑍀𑌰𑌤𑌾𑌕𑍁𑌲𑌃 ।
𑌵𑌾𑌯𑍁𑌕𑍋𑌣𑍇 𑌵𑌾𑌯𑍁𑌲𑍋𑌕𑍋 𑌵𑌾𑌯𑍁𑌸𑍍𑌤𑌤𑍍𑌰𑌾𑌧𑌿𑌤𑌿𑌷𑍍𑌠𑌤𑌿 ॥ 𑍮6 ॥

𑌵𑌾𑌯𑍁𑌸𑌾𑌧𑌨𑌸𑌂𑌸𑌿𑌦𑍍𑌧𑌯𑍋𑌗𑌿𑌭𑌿𑌃 𑌪𑌰𑌿𑌵𑌾𑌰𑌿𑌤𑌃 ।
𑌧𑍍𑌵𑌜𑌹𑌸𑍍𑌤𑍋 𑌵𑌿𑌶𑌾𑌲𑌾𑌕𑍍𑌷𑍋 𑌮𑍃𑌗𑌵𑌾𑌹𑌨𑌸𑌂𑌸𑍍𑌥𑌿𑌤𑌃 ॥ 𑍮𑍭 ॥

𑌮𑌰𑍁𑌦𑍍𑌗𑌣𑍈𑌃 𑌪𑌰𑌿𑌵𑍃𑌤𑍋 𑌨𑌿𑌜𑌶𑌕𑍍𑌤𑌿𑌸𑌮𑌨𑍍𑌵𑌿𑌤𑌃 ।
𑌉𑌤𑍍𑌤𑌰𑌸𑍍𑌯𑌾𑌂 𑌦𑌿𑌶𑌿 𑌮𑌹𑌾𑌨𑍍𑌯𑌕𑍍𑌷𑌲𑍋𑌕𑍋𑌽𑌸𑍍𑌤𑌿 𑌭𑍂𑌮𑌿𑌪 ॥ 𑍮𑍮 ॥

𑌯𑌕𑍍𑌷𑌾𑌧𑌿𑌰𑌾𑌜𑌸𑍍𑌤𑌤𑍍𑌰𑌾𑌽𑌽𑌸𑍍𑌤𑍇 𑌵𑍃𑌦𑍍𑌧𑌿𑌋𑌦𑍍𑌧𑍍𑌯𑌾𑌦𑌿𑌶𑌕𑍍𑌤𑌿𑌭𑌿𑌃 ।
𑌨𑌵𑌭𑌿𑌰𑍍𑌨𑌿𑌧𑌿𑌭𑌿𑌰𑍍𑌯𑍁𑌕𑍍𑌤𑌸𑍍𑌤𑍁𑌂𑌦𑌿𑌲𑍋 𑌧𑌨𑌨𑌾𑌯𑌕𑌃 ॥ 𑍮𑍯 ॥

𑌮𑌣𑌿𑌭𑌦𑍍𑌰𑌃 𑌪𑍂𑌰𑍍𑌣𑌭𑌦𑍍𑌰𑍋 𑌮𑌣𑌿𑌮𑌾𑌨𑍍𑌮𑌣𑌿𑌕𑌂𑌧𑌰𑌃 ।
𑌮𑌣𑌿𑌭𑍂𑌷𑍋 𑌮𑌣𑌿𑌸𑍍𑌰𑌗𑍍𑌵𑍀 𑌮𑌣𑌿𑌕𑌾𑌰𑍍𑌮𑍁𑌕𑌧𑌾𑌰𑌕𑌃 ॥ 𑍯0 ॥

𑌇𑌤𑍍𑌯𑌾𑌦𑌿𑌯𑌕𑍍𑌷𑌸𑍇𑌨𑌾𑌨𑍀𑌸𑌹𑌿𑌤𑍋 𑌨𑌿𑌜𑌶𑌕𑍍𑌤𑌿𑌯𑍁𑌕𑍍 ।
𑌈𑌶𑌾𑌨𑌕𑍋𑌣𑍇 𑌸𑌂𑌪𑍍𑌰𑍋𑌕𑍍𑌤𑍋 𑌰𑍁𑌦𑍍𑌰𑌲𑍋𑌕𑍋 𑌮𑌹𑌤𑍍𑌤𑌰𑌃 ॥ 𑍯1 ॥

𑌅𑌨𑌰𑍍𑌘𑍍𑌯𑌰𑌤𑍍𑌨𑌖𑌚𑌿𑌤𑍋 𑌯𑌤𑍍𑌰 𑌰𑍁𑌦𑍍𑌰𑍋𑌽𑌧𑌿𑌦𑍈𑌵𑌤𑌮𑍍 ।
𑌮𑌨𑍍𑌯𑍁𑌮𑌾𑌂𑌦𑍀𑌪𑍍𑌤𑌨𑌯𑌨𑍋 𑌬𑌦𑍍𑌧𑌪𑍃𑌷𑍍𑌠𑌮𑌹𑍇𑌷𑍁𑌧𑌿𑌃 ॥ 𑍯2 ॥

𑌸𑍍𑌫𑍂𑌰𑍍𑌜𑌦𑍍𑌧𑌨𑍁𑌰𑍍𑌵𑌾𑌮𑌹𑌸𑍍𑌤𑍋𑌽𑌧𑌿𑌜𑍍𑌯𑌧𑌨𑍍𑌵𑌭𑌿𑌰𑌾𑌵𑍃𑌤𑌃 ।
𑌸𑍍𑌵𑌸𑌮𑌾𑌨𑍈𑌰𑌸𑌂𑌖𑍍𑌯𑌾𑌤𑌰𑍁𑌦𑍍𑌰𑍈𑌃 𑌶𑍂𑌲𑌵𑌰𑌾𑌯𑍁𑌧𑍈𑌃 ॥ 𑍯3 ॥

𑌵𑌿𑌕𑍃𑌤𑌾𑌸𑍍𑌯𑍈𑌃 𑌕𑌰𑌾𑌲𑌾𑌸𑍍𑌯𑍈𑌰𑍍𑌵𑌮𑌦𑍍𑌵𑌹𑍍𑌨𑌿𑌭𑌿𑌰𑌾𑌸𑍍𑌯𑌤𑌃 ।
𑌦𑌶𑌹𑌸𑍍𑌤𑍈𑌃 𑌶𑌤𑌕𑌰𑍈𑌃 𑌸𑌹𑌸𑍍𑌰𑌭𑍁𑌜𑌸𑌂𑌯𑍁𑌤𑍈𑌃 ॥ 𑍯4 ॥

𑌦𑌶𑌪𑌾𑌦𑍈𑌰𑍍𑌦𑌶𑌗𑍍𑌰𑍀𑌵𑍈𑌸𑍍𑌤𑍍𑌰𑌿𑌨𑍇𑌤𑍍𑌰𑍈𑌰𑍁𑌗𑍍𑌰𑌮𑍂𑌰𑍍𑌤𑌿𑌭𑌿𑌃 ।
𑌅𑌂𑌤𑌰𑌿𑌕𑍍𑌷𑌚𑌰𑌾 𑌯𑍇 𑌚 𑌯𑍇 𑌚 𑌭𑍂𑌮𑌿𑌚𑌰𑌾𑌃 𑌸𑍍𑌮𑍃𑌤𑌾𑌃 ॥ 𑍯5 ॥

𑌰𑍁𑌦𑍍𑌰𑌾𑌧𑍍𑌯𑌾𑌯𑍇 𑌸𑍍𑌮𑍃𑌤𑌾 𑌰𑍁𑌦𑍍𑌰𑌾𑌸𑍍𑌤𑍈𑌃 𑌸𑌰𑍍𑌵𑍈𑌶𑍍𑌚 𑌸𑌮𑌾𑌵𑍃𑌤𑌃 ।
𑌰𑍁𑌦𑍍𑌰𑌾𑌣𑍀𑌕𑍋𑌟𑌿𑌸𑌹𑌿𑌤𑍋 𑌭𑌦𑍍𑌰𑌕𑌾𑌲𑍍𑌯𑌾𑌦𑌿𑌮𑌾𑌤𑍃𑌭𑌿𑌃 ॥ 𑍯6 ॥

𑌨𑌾𑌨𑌾𑌶𑌕𑍍𑌤𑌿𑌸𑌮𑌾𑌵𑌿𑌷𑍍𑌟𑌡𑌾𑌮𑌰𑍍𑌯𑌾𑌦𑌿𑌗𑌣𑌾𑌵𑍃𑌤𑌃 ।
𑌵𑍀𑌰𑌭𑌦𑍍𑌰𑌾𑌦𑌿𑌸𑌹𑌿𑌤𑍋 𑌰𑍁𑌦𑍍𑌰𑍋 𑌰𑌾𑌜𑌨𑍍𑌵𑌿𑌰𑌾𑌜𑌤𑍇 ॥ 𑍯𑍭 ॥

𑌮𑍁𑌂𑌡𑌮𑌾𑌲𑌾𑌧𑌰𑍋 𑌨𑌾𑌗𑌵𑌲𑌯𑍋 𑌨𑌾𑌗𑌕𑌂𑌧𑌰𑌃 ।
𑌵𑍍𑌯𑌾𑌘𑍍𑌰𑌚𑌰𑍍𑌮𑌪𑌰𑍀𑌧𑌾𑌨𑍋 𑌗𑌜𑌚𑌰𑍍𑌮𑍋𑌤𑍍𑌤𑌰𑍀𑌯𑌕𑌃 ॥ 𑍯𑍮 ॥

𑌚𑌿𑌤𑌾𑌭𑌸𑍍𑌮𑌾𑌂𑌗𑌲𑌿𑌪𑍍𑌤𑌾𑌂𑌗𑌃 𑌪𑍍𑌰𑌮𑌥𑌾𑌦𑌿𑌗𑌣𑌾𑌵𑍃𑌤𑌃 ।
𑌨𑌿𑌨𑌦𑌡𑍍𑌡𑌮𑌰𑍁𑌧𑍍𑌵𑌾𑌨𑍈𑌰𑍍𑌬𑌧𑌿𑌰𑍀𑌕𑍃𑌤𑌦𑌿𑌂𑌮𑍁𑌖𑌃 ॥ 𑍯𑍯 ॥

𑌅𑌟𑍍𑌟𑌹𑌾𑌸𑌾𑌸𑍍𑌫𑍋𑌟𑌶𑌬𑍍𑌦𑍈𑌃 𑌸𑌂𑌤𑍍𑌰𑌾𑌸𑌿𑌤𑌨𑌭𑌸𑍍𑌤𑌲𑌃 ।
𑌭𑍂𑌤𑌸𑌂𑌘𑌸𑌮𑌾𑌵𑌿𑌷𑍍𑌟𑍋 𑌭𑍂𑌤𑌾𑌵𑌾𑌸𑍋 𑌮𑌹𑍇𑌶𑍍𑌵𑌰𑌃 ॥ 100 ॥

𑌈𑌶𑌾𑌨𑌦𑌿𑌕𑍍𑌪𑌤𑌿𑌃 𑌸𑍋𑌽𑌯𑌂 𑌨𑌾𑌮𑍍𑌨𑌾 𑌚𑍇𑌶𑌾𑌨 𑌏𑌵 𑌚 ॥ 101 ॥

𑌇𑌤𑌿 𑌶𑍍𑌰𑍀𑌦𑍇𑌵𑍀𑌭𑌾𑌗𑌵𑌤𑍇 𑌮𑌹𑌾𑌪𑍁𑌰𑌾𑌣𑍇 𑌦𑍍𑌵𑌾𑌦𑌶𑌸𑍍𑌕𑌂𑌧𑍇 𑌮𑌣𑌿𑌦𑍍𑌵𑍀𑌪𑌵𑌰𑍍𑌣𑌨𑌂 𑌨𑌾𑌮 𑌦𑌶𑌮𑍋𑌽𑌧𑍍𑌯𑌾𑌯𑌃 ॥