॥ 𑌅𑌷𑍍𑌟𑌮𑌃 𑌸𑌰𑍍𑌗𑌃 ॥
॥ 𑌵𑌿𑌲𑌕𑍍𑌷𑍍𑌯𑌲𑌕𑍍𑌷𑍍𑌮𑍀𑌪𑌤𑌿𑌃 ॥
𑌅𑌥 𑌕𑌥𑌮𑌪𑌿 𑌯𑌾𑌮𑌿𑌨𑍀𑌂 𑌵𑌿𑌨𑍀𑌯 𑌸𑍍𑌮𑌰𑌶𑌰𑌜𑌰𑍍𑌜𑌰𑌿𑌤𑌾𑌪𑌿 𑌸𑌾 𑌪𑍍𑌰𑌭𑌾𑌤𑍇 ।
𑌅𑌨𑍁𑌨𑌯𑌵𑌚𑌨𑌂 𑌵𑌦𑌂𑌤𑌮𑌗𑍍𑌰𑍇 𑌪𑍍𑌰𑌣𑌤𑌮𑌪𑌿 𑌪𑍍𑌰𑌿𑌯𑌮𑌾𑌹 𑌸𑌾𑌭𑍍𑌯𑌸𑍂𑌯𑌮𑍍 ॥ 4 ॥
॥ 𑌗𑍀𑌤𑌂 1 ॥
𑌰𑌜𑌨𑌿𑌜𑌨𑌿𑌤𑌗𑍁𑌰𑍁𑌜𑌾𑌗𑌰𑌰𑌾𑌗𑌕𑌷𑌾𑌯𑌿𑌤𑌮𑌲𑌸𑌨𑌿𑌵𑍇𑌶𑌮𑍍 ।
𑌵𑌹𑌤𑌿 𑌨𑌯𑌨𑌮𑌨𑍁𑌰𑌾𑌗𑌮𑌿𑌵 𑌸𑍍𑌫𑍁𑌟𑌮𑍁𑌦𑌿𑌤𑌰𑌸𑌾𑌭𑌿𑌨𑌿𑌵𑍇𑌶𑌮𑍍 ॥
𑌹𑌰𑌿𑌹𑌰𑌿 𑌯𑌾𑌹𑌿 𑌮𑌾𑌧𑌵 𑌯𑌾𑌹𑌿 𑌕𑍇𑌶𑌵 𑌮𑌾 𑌵𑌦 𑌕𑍈𑌤𑌵𑌵𑌾𑌦𑌂 𑌤𑌾𑌮𑌨𑍁𑌸𑌰 𑌸𑌰𑌸𑍀𑌰𑍁𑌹𑌲𑍋𑌚𑌨 𑌯𑌾 𑌤𑌵 𑌹𑌰𑌤𑌿 𑌵𑌿𑌷𑌾𑌦𑌮𑍍 ॥ 50 ॥
𑌕𑌜𑍍𑌜𑌲𑌮𑌲𑌿𑌨𑌵𑌿𑌲𑍋𑌚𑌨𑌚𑍁𑌂𑌬𑌨𑌵𑌿𑌰𑌚𑌿𑌤𑌨𑍀𑌲𑌿𑌮𑌰𑍂𑌪𑌮𑍍 ।
𑌦𑌶𑌨𑌵𑌸𑌨𑌮𑌰𑍁𑌣𑌂 𑌤𑌵 𑌕𑍃𑌷𑍍𑌣 𑌤𑌨𑍋𑌤𑌿 𑌤𑌨𑍋𑌰𑌨𑍁𑌰𑍂𑌪𑌮𑍍 ॥ 2 ॥
𑌵𑌪𑍁𑌰𑌨𑍁𑌹𑌰𑌤𑌿 𑌤𑌵 𑌸𑍍𑌮𑌰𑌸𑌂𑌗𑌰𑌖𑌰𑌨𑌖𑌰𑌕𑍍𑌷𑌤𑌰𑍇𑌖𑌮𑍍 ।
𑌮𑌰𑌕𑌤𑌶𑌕𑌲𑌕𑌲𑌿𑌤𑌕𑌲𑌧𑍌𑌤𑌲𑌿𑌪𑌿𑌰𑍇𑌵 𑌰𑌤𑌿𑌜𑌯𑌲𑍇𑌖𑌮𑍍 ॥ 3 ॥
𑌚𑌰𑌣𑌕𑌮𑌲𑌗𑌲𑌦𑌲𑌕𑍍𑌤𑌕𑌸𑌿𑌕𑍍𑌤𑌮𑌿𑌦𑌂 𑌤𑌵 𑌹𑍃𑌦𑌯𑌮𑍁𑌦𑌾𑌰𑌮𑍍 ।
𑌦𑌰𑍍𑌶𑌯𑌤𑍀𑌵 𑌬𑌹𑌿𑌰𑍍𑌮𑌦𑌨𑌦𑍍𑌰𑍁𑌮𑌨𑌵𑌕𑌿𑌸𑌲𑌯𑌪𑌰𑌿𑌵𑌾𑌰𑌮𑍍 ॥ 4 ॥
𑌦𑌶𑌨𑌪𑌦𑌂 𑌭𑌵𑌦𑌧𑌰𑌗𑌤𑌂 𑌮𑌮 𑌜𑌨𑌯𑌤𑌿 𑌚𑍇𑌤𑌸𑌿 𑌖𑍇𑌦𑌮𑍍 ।
𑌕𑌥𑌯𑌤𑌿 𑌕𑌥𑌮𑌧𑍁𑌨𑌾𑌪𑌿 𑌮𑌯𑌾 𑌸𑌹 𑌤𑌵 𑌵𑌪𑍁𑌰𑍇𑌤𑌦𑌭𑍇𑌦𑌮𑍍 ॥ 5 ॥
𑌬𑌹𑌿𑌰𑌿𑌵 𑌮𑌲𑌿𑌨𑌤𑌰𑌂 𑌤𑌵 𑌕𑍃𑌷𑍍𑌣 𑌮𑌨𑍋𑌽𑌪𑌿 𑌭𑌵𑌿𑌷𑍍𑌯𑌤𑌿 𑌨𑍂𑌨𑌮𑍍 ।
𑌕𑌥𑌮𑌥 𑌵𑌂𑌚𑌯𑌸𑍇 𑌜𑌨𑌮𑌨𑍁𑌗𑌤𑌮𑌸𑌮𑌶𑌰𑌜𑍍𑌵𑌰𑌦𑍂𑌨𑌮𑍍 ॥ 6 ॥
𑌭𑍍𑌰𑌮𑌤𑌿 𑌭𑌵𑌾𑌨𑌬𑌲𑌾𑌕𑌵𑌲𑌾𑌯 𑌵𑌨𑍇𑌷𑍁 𑌕𑌿𑌮𑌤𑍍𑌰 𑌵𑌿𑌚𑌿𑌤𑍍𑌰𑌮𑍍 ।
𑌪𑍍𑌰𑌥𑌯𑌤𑌿 𑌪𑍂𑌤𑌨𑌿𑌕𑍈𑌵 𑌵𑌧𑍂𑌵𑌧𑌨𑌿𑌰𑍍𑌦𑌯𑌬𑌾𑌲𑌚𑌰𑌿𑌤𑍍𑌰𑌮𑍍 ॥ ॥
𑌶𑍍𑌰𑍀𑌜𑌯𑌦𑍇𑌵𑌭𑌣𑌿𑌤𑌰𑌤𑌿𑌵𑌂𑌚𑌿𑌤𑌖𑌂𑌡𑌿𑌤𑌯𑍁𑌵𑌤𑌿𑌵𑌿𑌲𑌾𑌪𑌮𑍍 ।
𑌶𑍃𑌣𑍁𑌤 𑌸𑍁𑌧𑌾𑌮𑌧𑍁𑌰𑌂 𑌵𑌿𑌬𑍁𑌧𑌾 𑌵𑌿𑌬𑍁𑌧𑌾𑌲𑌯𑌤𑍋𑌽𑌪𑌿 𑌦𑍁𑌰𑌾𑌪𑌮𑍍 ॥ ॥
𑌤𑌦𑍇𑌵𑌂 𑌪𑌶𑍍𑌯𑌂𑌤𑍍𑌯𑌾𑌃 𑌪𑍍𑌰𑌸𑌰𑌦𑌨𑍁𑌰𑌾𑌗𑌂 𑌬𑌹𑌿𑌰𑌿𑌵 𑌪𑍍𑌰𑌿𑌯𑌾𑌪𑌾𑌦𑌾𑌲𑌕𑍍𑌤𑌚𑍍𑌛𑍁𑌰𑌿𑌤𑌮𑌰𑍁𑌣𑌚𑍍𑌛𑌾𑌯𑌹𑍃𑌦𑌯𑌮𑍍 ।
𑌮𑌮𑌾𑌦𑍍𑌯 𑌪𑍍𑌰𑌖𑍍𑌯𑌾𑌤𑌪𑍍𑌰𑌣𑌯𑌭𑌰𑌭𑌂𑌗𑍇𑌨 𑌕𑌿𑌤𑌵 𑌤𑍍𑌵𑌦𑌾𑌲𑍋𑌕𑌃 𑌶𑍋𑌕𑌾𑌦𑌪𑌿 𑌕𑌿𑌮𑌪𑌿 𑌲𑌜𑍍𑌜𑌾𑌂 𑌜𑌨𑌯𑌤𑌿 ॥ 50 ॥
॥ 𑌇𑌤𑌿 𑌗𑍀𑌤𑌗𑍋𑌵𑌿𑌂𑌦𑍇 𑌖𑌂𑌡𑌿𑌤𑌾𑌵𑌰𑍍𑌣𑌨𑍇 𑌵𑌿𑌲𑌕𑍍𑌷𑍍𑌯𑌲𑌕𑍍𑌷𑍍𑌮𑍀𑌪𑌤𑌿𑌰𑍍𑌨𑌾𑌮 𑌅𑌷𑍍𑌠𑌮𑌃 𑌸𑌰𑍍𑌗𑌃 ॥
