॥ 𑌤𑍃𑌤𑍀𑌯𑌃 𑌸𑌰𑍍𑌗𑌃 ॥
॥ 𑌮𑍁𑌗𑍍𑌧𑌮𑌧𑍁𑌸𑍂𑌦𑌨𑌃 ॥
𑌕𑌂𑌸𑌾𑌰𑌿𑌰𑌪𑌿 𑌸𑌂𑌸𑌾𑌰𑌵𑌾𑌸𑌨𑌾𑌬𑌂𑌧𑌶𑍃𑌂𑌖𑌲𑌾𑌮𑍍 ।
𑌰𑌾𑌧𑌾𑌮𑌾𑌧𑌾𑌯 𑌹𑍃𑌦𑌯𑍇 𑌤𑌤𑍍𑌯𑌾𑌜 𑌵𑍍𑌰𑌜𑌸𑍁𑌂𑌦𑌰𑍀𑌃 ॥ 1 ॥
𑌇𑌤𑌸𑍍𑌤𑌤𑌸𑍍𑌤𑌾𑌮𑌨𑍁𑌸𑍃𑌤𑍍𑌯 𑌰𑌾𑌧𑌿𑌕𑌾-𑌮𑌨𑌂𑌗𑌬𑌾𑌣𑌵𑍍𑌰𑌣𑌖𑌿𑌨𑍍𑌨𑌮𑌾𑌨𑌸𑌃 ।
𑌕𑍃𑌤𑌾𑌨𑍁𑌤𑌾𑌪𑌃 𑌸 𑌕𑌲𑌿𑌂𑌦𑌨𑌂𑌦𑌿𑌨𑍀-𑌤𑌟𑌾𑌂𑌤𑌕𑍁𑌂𑌜𑍇 𑌵𑌿𑌷𑌸𑌾𑌦 𑌮𑌾𑌧𑌵𑌃 ॥ 1 ॥
॥ 𑌗𑍀𑌤𑌂 ॥
𑌮𑌾𑌮𑌿𑌯𑌂 𑌚𑌲𑌿𑌤𑌾 𑌵𑌿𑌲𑍋𑌕𑍍𑌯 𑌵𑍃𑌤𑌂 𑌵𑌧𑍂𑌨𑌿𑌚𑌯𑍇𑌨 ।
𑌸𑌾𑌪𑌰𑌾𑌧𑌤𑌯𑌾 𑌮𑌯𑌾𑌪𑌿 𑌨 𑌵𑌾𑌰𑌿𑌤𑌾𑌤𑌿𑌭𑌯𑍇𑌨 ॥
𑌹𑌰𑌿 𑌹𑌰𑌿 𑌹𑌤𑌾𑌦𑌰𑌤𑌯𑌾 𑌗𑌤𑌾 𑌸𑌾 𑌕𑍁𑌪𑌿𑌤𑍇𑌵 ॥ 1 ॥
𑌕𑌿𑌂 𑌕𑌰𑌿𑌷𑍍𑌯𑌤𑌿 𑌕𑌿𑌂 𑌵𑌦𑌿𑌷𑍍𑌯𑌤𑌿 𑌸𑌾 𑌚𑌿𑌰𑌂 𑌵𑌿𑌰𑌹𑍇𑌣 ।
𑌕𑌿𑌂 𑌧𑌨𑍇𑌨 𑌜𑌨𑍇𑌨 𑌕𑌿𑌂 𑌮𑌮 𑌜𑍀𑌵𑌨𑍇𑌨 𑌗𑍃𑌹𑍇𑌣 ॥ 2 ॥
𑌚𑌿𑌂𑌤𑌯𑌾𑌮𑌿 𑌤𑌦𑌾𑌨𑌨𑌂 𑌕𑍁𑌟𑌿𑌲𑌭𑍍𑌰𑍁 𑌕𑍋𑌪𑌭𑌰𑍇𑌣 ।
𑌶𑍋𑌣𑌪𑌦𑍍𑌮𑌮𑌿𑌵𑍋𑌪𑌰𑌿 𑌭𑍍𑌰𑌮𑌤𑌾𑌕𑍁𑌲𑌂 𑌭𑍍𑌰𑌮𑌰𑍇𑌣 ॥ 3 ॥
𑌤𑌾𑌮𑌹𑌂 𑌹𑍃𑌦𑌿 𑌸𑌂𑌗𑌤𑌾𑌮𑌨𑌿𑌶𑌂 𑌭𑍃𑌶𑌂 𑌰𑌮𑌯𑌾𑌮𑌿 ।
𑌕𑌿𑌂 𑌵𑌨𑍇𑌽𑌨𑍁𑌸𑌰𑌾𑌮𑌿 𑌤𑌾𑌮𑌿𑌹 𑌕𑌿𑌂 𑌵𑍃𑌥𑌾 𑌵𑌿𑌲𑌪𑌾𑌮𑌿 ॥ 4 ॥
𑌤𑌨𑍍𑌵𑌿 𑌖𑌿𑌨𑍍𑌨𑌮𑌸𑍂𑌯𑌯𑌾 𑌹𑍃𑌦𑌯𑌂 𑌤𑌵𑌾𑌕𑌲𑌯𑌾𑌮𑌿 ।
𑌤𑌨𑍍𑌨 𑌵𑍇𑌦𑍍𑌮𑌿 𑌕𑍁𑌤𑍋 𑌗𑌤𑌾𑌸𑌿 𑌨 𑌤𑍇𑌨 𑌤𑍇𑌽𑌨𑍁𑌨𑌯𑌾𑌮𑌿 ॥ 5 ॥
𑌦𑍃𑌶𑍍𑌯𑌤𑍇 𑌪𑍁𑌰𑌤𑍋 𑌗𑌤𑌾𑌗𑌤𑌮𑍇𑌵 𑌮𑍇 𑌵𑌿𑌦𑌧𑌾𑌸𑌿 ।
𑌕𑌿𑌂 𑌪𑍁𑌰𑍇𑌵 𑌸𑌸𑌂𑌭𑍍𑌰𑌮𑌂 𑌪𑌰𑌿𑌰𑌂𑌭𑌣𑌂 𑌨 𑌦𑌦𑌾𑌸𑌿 ॥ 6 ॥
𑌕𑍍𑌷𑌮𑍍𑌯𑌤𑌾𑌮𑌪𑌰𑌂 𑌕𑌦𑌾𑌪𑌿 𑌤𑌵𑍇𑌦𑍃𑌶𑌂 𑌨 𑌕𑌰𑍋𑌮𑌿 ।
𑌦𑍇𑌹𑌿 𑌸𑍁𑌂𑌦𑌰𑌿 𑌦𑌰𑍍𑌶𑌨𑌂 𑌮𑌮 𑌮𑌨𑍍𑌮𑌥𑍇𑌨 𑌦𑍁𑌨𑍋𑌮𑌿 ॥ ॥
𑌵𑌰𑍍𑌣𑌿𑌤𑌂 𑌜𑌯𑌦𑍇𑌵𑌕𑍇𑌨 𑌹𑌰𑍇𑌰𑌿𑌦𑌂 𑌪𑍍𑌰𑌵𑌣𑍇𑌨 ।
𑌕𑌿𑌂𑌦𑍁𑌬𑌿𑌲𑍍𑌵𑌸𑌮𑍁𑌦𑍍𑌰𑌸𑌂𑌭𑌵𑌰𑍋𑌹𑌿𑌣𑍀𑌰𑌮𑌣𑍇𑌨 ॥ ॥
𑌹𑍃𑌦𑌿 𑌬𑌿𑌸𑌲𑌤𑌾𑌹𑌾𑌰𑍋 𑌨𑌾𑌯𑌂 𑌭𑍁𑌜𑌂𑌗𑌮𑌨𑌾𑌯𑌕𑌃 𑌕𑍁𑌵𑌲𑌯𑌦𑌲𑌶𑍍𑌰𑍇𑌣𑍀 𑌕𑌂𑌠𑍇 𑌨 𑌸𑌾 𑌗𑌰𑌲𑌦𑍍𑌯𑍁𑌤𑌿𑌃 ।
𑌮𑌲𑌯𑌜𑌰𑌜𑍋 𑌨𑍇𑌦𑌂 𑌭𑌸𑍍𑌮 𑌪𑍍𑌰𑌿𑌯𑌾𑌰𑌹𑌿𑌤𑍇 𑌮𑌯𑌿 𑌪𑍍𑌰𑌹𑌰 𑌨 𑌹𑌰𑌭𑍍𑌰𑌾𑌂𑌤𑍍𑌯𑌾𑌨𑌂𑌗 𑌕𑍍𑌰𑍁𑌧𑌾 𑌕𑌿𑌮𑍁 𑌧𑌾𑌵𑌸𑌿 ॥ 20 ॥
𑌪𑌾𑌣𑍌 𑌮𑌾 𑌕𑍁𑌰𑍁 𑌚𑍂𑌤𑌸𑌾𑌯𑌕𑌮𑌮𑍁𑌂 𑌮𑌾 𑌚𑌾𑌪𑌮𑌾𑌰𑍋𑌪𑌯 𑌕𑍍𑌰𑍀𑌡𑌾𑌨𑌿𑌰𑍍𑌜𑌿𑌤𑌵𑌿𑌶𑍍𑌵 𑌮𑍂𑌰𑍍𑌛𑌿𑌤𑌜𑌨𑌾𑌘𑌾𑌤𑍇𑌨 𑌕𑌿𑌂 𑌪𑍌𑌰𑍁𑌷𑌮𑍍 ।
𑌤𑌸𑍍𑌯𑌾 𑌏𑌵 𑌮𑍃𑌗𑍀𑌦𑍃𑌶𑍋 𑌮𑌨𑌸𑌿𑌜𑌪𑍍𑌰𑍇𑌂𑌖𑌤𑍍𑌕𑌟𑌾𑌕𑍍𑌷𑌾𑌶𑍁𑌗-𑌶𑍍𑌰𑍇𑌣𑍀𑌜𑌰𑍍𑌜𑌰𑌿𑌤𑌂 𑌮𑌨𑌾𑌗𑌪𑌿 𑌮𑌨𑍋 𑌨𑌾𑌦𑍍𑌯𑌾𑌪𑌿 𑌸𑌂𑌧𑍁𑌕𑍍𑌷𑌤𑍇 ॥ 21 ॥
𑌭𑍍𑌰𑍂𑌚𑌾𑌪𑍇 𑌨𑌿𑌹𑌿𑌤𑌃 𑌕𑌟𑌾𑌕𑍍𑌷𑌵𑌿𑌶𑌿𑌖𑍋 𑌨𑌿𑌰𑍍𑌮𑌾𑌤𑍁 𑌮𑌰𑍍𑌮𑌵𑍍𑌯𑌥𑌾𑌂 𑌶𑍍𑌯𑌾𑌮𑌾𑌤𑍍𑌮𑌾 𑌕𑍁𑌟𑌿𑌲𑌃 𑌕𑌰𑍋𑌤𑍁 𑌕𑌬𑌰𑍀𑌭𑌾𑌰𑍋𑌽𑌪𑌿 𑌮𑌾𑌰𑍋𑌦𑍍𑌯𑌮𑌮𑍍 ।
𑌮𑍋𑌹𑌂 𑌤𑌾𑌵𑌦𑌯𑌂 𑌚 𑌤𑌨𑍍𑌵𑌿 𑌤𑌨𑍁𑌤𑌾𑌂 𑌬𑌿𑌂𑌬𑌾𑌦𑌰𑍋 𑌰𑌾𑌗𑌵𑌾𑌨𑍍 𑌸𑌦𑍍𑌵𑍃𑌤𑍍𑌤𑌸𑍍𑌤𑌨𑌮𑌣𑍍𑌦𑌲𑌸𑍍𑌤𑌵 𑌕𑌥𑌂 𑌪𑍍𑌰𑌾𑌣𑍈𑌰𑍍𑌮𑌮 𑌕𑍍𑌰𑍀𑌡𑌤𑌿 ॥ 22 ॥
𑌤𑌾𑌨𑌿 𑌸𑍍𑌪𑌰𑍍𑌶𑌸𑍁𑌖𑌾𑌨𑌿 𑌤𑍇 𑌚 𑌤𑌰𑌲𑌾𑌃 𑌸𑍍𑌨𑌿𑌗𑍍𑌧𑌾 𑌦𑍃𑌶𑍋𑌰𑍍𑌵𑌿𑌭𑍍𑌰𑌮𑌾-𑌸𑍍𑌤𑌦𑍍𑌵𑌕𑍍𑌤𑍍𑌰𑌾𑌂𑌬𑍁𑌜𑌸𑍌𑌰𑌭𑌂 𑌸 𑌚 𑌸𑍁𑌧𑌾𑌸𑍍𑌯𑌂𑌦𑍀 𑌗𑌿𑌰𑌾𑌂 𑌵𑌕𑍍𑌰𑌿𑌮𑌾 ।
𑌸𑌾 𑌬𑌿𑌂𑌬𑌾𑌧𑌰𑌮𑌾𑌧𑍁𑌰𑍀𑌤𑌿 𑌵𑌿𑌷𑌯𑌾𑌸𑌂𑌗𑍇𑌽𑌪𑌿 𑌚𑍇𑌨𑍍𑌮𑌾𑌨𑌸𑌂 𑌤𑌸𑍍𑌯𑌾𑌂 𑌲𑌗𑍍𑌨𑌸𑌮𑌾𑌧𑌿 𑌹𑌂𑌤 𑌵𑌿𑌰𑌹𑌵𑍍𑌯𑌾𑌧𑌿𑌃 𑌕𑌥𑌂 𑌵𑌰𑍍𑌧𑌤𑍇 ॥ 23 ॥
𑌭𑍍𑌰𑍂𑌪𑌲𑍍𑌲𑌵𑌂 𑌧𑌨𑍁𑌰𑌪𑌾𑌂𑌗𑌤𑌰𑌂𑌗𑌿𑌤𑌾𑌨𑌿 𑌬𑌾𑌣𑌾𑌃 𑌗𑍁𑌣𑌃 𑌶𑍍𑌰𑌵𑌣𑌪𑌾𑌲𑌿𑌰𑌿𑌤𑌿 𑌸𑍍𑌮𑌰𑍇𑌣 ।
𑌤𑌸𑍍𑌯𑌾𑌮𑌨𑌂𑌗𑌜𑌯𑌜𑌂𑌗𑌮𑌦𑍇𑌵𑌤𑌾𑌯𑌾𑌂 𑌅𑌸𑍍𑌤𑍍𑌰𑌾𑌣𑌿 𑌨𑌿𑌰𑍍𑌜𑌿𑌤𑌜𑌗𑌂𑌤𑌿 𑌕𑌿𑌮𑌰𑍍𑌪𑌿𑌤𑌾𑌨𑌿 ॥ 24 ॥
[𑌏𑌷𑌃 𑌶𑍍𑌲𑍋𑌕𑌃 𑌕𑍇𑌷𑍁𑌚𑌨 𑌸𑌂𑌸𑍍𑌕𑌰𑌣𑍇𑌷𑍁 𑌵𑌿𑌦𑍍𑌯𑌤𑍇]
𑌤𑌿𑌰𑍍𑌯𑌕𑍍𑌕𑌂𑌠 𑌵𑌿𑌲𑍋𑌲 𑌮𑍌𑌲𑌿 𑌤𑌰𑌲𑍋𑌤𑍍𑌤𑌂 𑌸𑌸𑍍𑌯 𑌵𑌂𑌶𑍋𑌚𑍍𑌚𑌰𑌦𑍍-
𑌦𑍀𑌪𑍍𑌤𑌿𑌸𑍍𑌥𑌾𑌨 𑌕𑍃𑌤𑌾𑌵𑌧𑌾𑌨 𑌲𑌲𑌨𑌾 𑌲𑌕𑍍𑌷𑍈𑌰𑍍𑌨 𑌸𑌂𑌲𑌕𑍍𑌷𑌿𑌤𑌾𑌃 ।
𑌸𑌂𑌮𑍁𑌗𑍍𑌧𑍇 𑌮𑌧𑍁𑌸𑍂𑌦𑌨𑌸𑍍𑌯 𑌮𑌧𑍁𑌰𑍇 𑌰𑌾𑌧𑌾𑌮𑍁𑌖𑍇𑌂𑌦𑍌 𑌸𑍁𑌧𑌾-
𑌸𑌾𑌰𑍇 𑌕𑌂𑌦𑌲𑌿𑌤𑌾𑌶𑍍𑌚𑌿𑌰𑌂 𑌦𑌧𑌤𑍁 𑌵𑌃 𑌕𑍍𑌷𑍇𑌮𑌂 𑌕𑌟𑌾𑌕𑍍𑌷𑍋𑌰𑍍𑌮𑍍𑌮𑌯 ॥ (25) ॥
॥ 𑌇𑌤𑌿 𑌶𑍍𑌰𑍀𑌗𑍀𑌤𑌗𑍋𑌵𑌿𑌂𑌦𑍇 𑌮𑍁𑌗𑍍𑌧𑌮𑌧𑍁𑌸𑍂𑌦𑌨𑍋 𑌨𑌾𑌮 𑌤𑍃𑌤𑍀𑌯𑌃 𑌸𑌰𑍍𑌗𑌃 ॥
