𑌵𑌂𑌦𑍇 𑌗𑌜𑍇𑌂𑌦𑍍𑌰𑌵𑌦𑌨𑌂
𑌵𑌾𑌮𑌾𑌂𑌕𑌾𑌰𑍂𑌢𑌵𑌲𑍍𑌲𑌭𑌾𑌶𑍍𑌲𑌿𑌷𑍍𑌟𑌮𑍍 ।
𑌕𑍁𑌂𑌕𑍁𑌮𑌪𑌰𑌾𑌗𑌶𑍋𑌣𑌂
𑌕𑍁𑌵𑌲𑌯𑌿𑌨𑍀𑌜𑌾𑌰𑌕𑍋𑌰𑌕𑌾𑌪𑍀𑌡𑌮𑍍 ॥ 1 ॥

𑌸 𑌜𑌯𑌤𑌿 𑌸𑍁𑌵𑌰𑍍𑌣𑌶𑍈𑌲𑌃
𑌸𑌕𑌲𑌜𑌗𑌚𑍍𑌚𑌕𑍍𑌰𑌸𑌂𑌘𑌟𑌿𑌤𑌮𑍂𑌰𑍍𑌤𑌿𑌃 ।
𑌕𑌾𑌂𑌚𑌨𑌨𑌿𑌕𑍁𑌂𑌜𑌵𑌾𑌟𑍀-
-𑌕𑌂𑌦𑌲𑌦𑌮𑌰𑍀𑌪𑍍𑌰𑌪𑌂𑌚𑌸𑌂𑌗𑍀𑌤𑌃 ॥ 2 ॥

𑌹𑌰𑌿𑌹𑌯𑌨𑍈𑌰𑍃𑌤𑌮𑌾𑌰𑍁𑌤-
-𑌹𑌰𑌿𑌤𑌾𑌮𑌂𑌤𑍇𑌷𑍍𑌵𑌵𑌸𑍍𑌥𑌿𑌤𑌂 𑌤𑌸𑍍𑌯 ।
𑌵𑌿𑌨𑍁𑌮𑌃 𑌸𑌾𑌨𑍁𑌤𑍍𑌰𑌿𑌤𑌯𑌂
𑌵𑌿𑌧𑌿𑌹𑌰𑌿𑌗𑍌𑌰𑍀𑌶𑌵𑌿𑌷𑍍𑌟𑌪𑌾𑌧𑌾𑌰𑌮𑍍 ॥ 3 ॥

𑌮𑌧𑍍𑌯𑍇 𑌪𑍁𑌨𑌰𑍍𑌮𑌨𑍋𑌹𑌰-
-𑌰𑌤𑍍𑌨𑌰𑍁𑌚𑌿𑌸𑍍𑌤𑌬𑌕𑌰𑌂𑌜𑌿𑌤𑌦𑌿𑌗𑌂𑌤𑌮𑍍 ।
𑌉𑌪𑌰𑌿 𑌚𑌤𑍁𑌃𑌶𑌤𑌯𑍋𑌜𑌨-
-𑌮𑍁𑌤𑍍𑌤𑍁𑌂𑌗𑌂 𑌶𑍃𑌂𑌗𑌪𑍁𑌂𑌗𑌵𑌮𑍁𑌪𑌾𑌸𑍇 ॥ 4 ॥

𑌤𑌤𑍍𑌰 𑌚𑌤𑍁𑌃𑌶𑌤𑌯𑍋𑌜𑌨-
-𑌪𑌰𑌿𑌣𑌾𑌹𑌂 𑌦𑍇𑌵𑌶𑌿𑌲𑍍𑌪𑌿𑌨𑌾 𑌰𑌚𑌿𑌤𑌮𑍍 ।
𑌨𑌾𑌨𑌾𑌸𑌾𑌲𑌮𑌨𑍋𑌜𑍍𑌞𑌂
𑌨𑌮𑌾𑌮𑍍𑌯𑌹𑌂 𑌨𑌗𑌰𑌮𑌾𑌦𑌿𑌵𑌿𑌦𑍍𑌯𑌾𑌯𑌾𑌃 ॥ 5 ॥

𑌪𑍍𑌰𑌥𑌮𑌂 𑌸𑌹𑌸𑍍𑌰𑌪𑍂𑌰𑍍𑌵𑌕-
-𑌷𑌟𑍍𑌶𑌤𑌸𑌂𑌖𑍍𑌯𑌾𑌕𑌯𑍋𑌜𑌨𑌂 𑌪𑌰𑌿𑌤𑌃 ।
𑌵𑌲𑌯𑍀𑌕𑍃𑌤𑌸𑍍𑌵𑌗𑌾𑌤𑍍𑌰𑌂
𑌵𑌰𑌣𑌂 𑌶𑌰𑌣𑌂 𑌵𑍍𑌰𑌜𑌾𑌮𑍍𑌯𑌯𑍋𑌰𑍂𑌪𑌮𑍍 ॥ 6 ॥

𑌤𑌸𑍍𑌯𑍋𑌤𑍍𑌤𑌰𑍇 𑌸𑌮𑍀𑌰𑌣-
-𑌯𑍋𑌜𑌨𑌦𑍂𑌰𑍇 𑌤𑌰𑌂𑌗𑌿𑌤𑌚𑍍𑌛𑌾𑌯𑌃 ।
𑌘𑌟𑌯𑌤𑍁 𑌮𑍁𑌦𑌂 𑌦𑍍𑌵𑌿𑌤𑍀𑌯𑍋
𑌘𑌂𑌟𑌾𑌸𑍍𑌤𑌨𑌸𑌾𑌰𑌨𑌿𑌰𑍍𑌮𑌿𑌤𑌃 𑌸𑌾𑌲𑌃 ॥ 𑍭 ॥

𑌉𑌭𑌯𑍋𑌰𑌂𑌤𑌰𑌸𑍀𑌮-
-𑌨𑍍𑌯𑍁𑌦𑍍𑌦𑌾𑌮𑌭𑍍𑌰𑌮𑌰𑌰𑌂𑌜𑌿𑌤𑍋𑌦𑌾𑌰𑌮𑍍 ।
𑌉𑌪𑌵𑌨𑌮𑍁𑌪𑌾𑌸𑍍𑌮𑌹𑍇 𑌵𑌯-
-𑌮𑍂𑌰𑍀𑌕𑍃𑌤𑌮𑌂𑌦𑌮𑌾𑌰𑍁𑌤𑌸𑍍𑌯𑌂𑌦𑌮𑍍 ॥ 𑍮 ॥

𑌆𑌲𑌿𑌂𑌗𑍍𑌯 𑌭𑌦𑍍𑌰𑌕𑌾𑌲𑍀-
-𑌮𑌾𑌸𑍀𑌨𑌸𑍍𑌤𑌤𑍍𑌰 𑌹𑌰𑌿𑌶𑌿𑌲𑌾𑌶𑍍𑌯𑌾𑌮𑌾𑌮𑍍 ।
𑌮𑌨𑌸𑌿 𑌮𑌹𑌾𑌕𑌾𑌲𑍋 𑌮𑍇
𑌵𑌿𑌹𑌰𑌤𑍁 𑌮𑌧𑍁𑌪𑌾𑌨𑌵𑌿𑌭𑍍𑌰𑌮𑌨𑍍𑌨𑍇𑌤𑍍𑌰𑌃 ॥ 𑍯 ॥

𑌤𑌾𑌰𑍍𑌤𑍀𑌯𑍀𑌕𑍋 𑌵𑌰𑌣-
-𑌸𑍍𑌤𑌸𑍍𑌯𑍋𑌤𑍍𑌤𑌰𑌸𑍀𑌮𑍍𑌨𑌿 𑌵𑌾𑌤𑌯𑍋𑌜𑌨𑌤𑌃 ।
𑌤𑌾𑌮𑍍𑌰𑍇𑌣 𑌰𑌚𑌿𑌤𑌮𑍂𑌰𑍍𑌤𑌿-
-𑌸𑍍𑌤𑌨𑍁𑌤𑌾𑌮𑌾𑌚𑌂𑌦𑍍𑌰𑌤𑌾𑌰𑌕𑌂 𑌭𑌦𑍍𑌰𑌮𑍍 ॥ 10 ॥

𑌮𑌧𑍍𑌯𑍇 𑌤𑌯𑍋𑌶𑍍𑌚 𑌮𑌣𑌿𑌮𑌯-
-𑌪𑌲𑍍𑌲𑌵𑌶𑌾𑌖𑌾𑌪𑍍𑌰𑌸𑍂𑌨𑌪𑌕𑍍𑌷𑍍𑌮𑌲𑌿𑌤𑌾𑌮𑍍 ।
𑌕𑌲𑍍𑌪𑌾𑌨𑍋𑌕𑌹𑌵𑌾𑌟𑍀𑌂
𑌕𑌲𑌯𑍇 𑌮𑌕𑌰𑌂𑌦𑌪𑌂𑌕𑌿𑌲𑌾𑌵𑌾𑌲𑌾𑌮𑍍 ॥ 11 ॥

𑌤𑌤𑍍𑌰 𑌮𑌧𑍁𑌮𑌾𑌧𑌵𑌶𑍍𑌰𑍀-
-𑌤𑌰𑍁𑌣𑍀𑌭𑍍𑌯𑌾𑌂 𑌤𑌰𑌲𑌦𑍃𑌕𑍍𑌚𑌕𑍋𑌰𑌾𑌭𑍍𑌯𑌾𑌮𑍍 ।
𑌆𑌲𑌿𑌂𑌗𑌿𑌤𑍋𑌽𑌵𑌤𑌾𑌨𑍍𑌮𑌾-
-𑌮𑌨𑌿𑌶𑌂 𑌪𑍍𑌰𑌥𑌮𑌰𑍍𑌤𑍁𑌰𑌾𑌤𑍍𑌤𑌪𑍁𑌷𑍍𑌪𑌾𑌸𑍍𑌤𑍍𑌰𑌃 ॥ 12 ॥

𑌨𑌮𑌤 𑌤𑌦𑍁𑌤𑍍𑌤𑌰𑌭𑌾𑌗𑍇
𑌨𑌾𑌕𑌿𑌪𑌥𑍋𑌲𑍍𑌲𑌂𑌘𑌿𑌶𑍃𑌂𑌗𑌸𑌂𑌘𑌾𑌤𑌮𑍍 ।
𑌸𑍀𑌸𑌾𑌕𑍃𑌤𑌿𑌂 𑌤𑍁𑌰𑍀𑌯𑌂
𑌸𑌿𑌤𑌕𑌿𑌰𑌣𑌾𑌲𑍋𑌕𑌨𑌿𑌰𑍍𑌮𑌲𑌂 𑌸𑌾𑌲𑌮𑍍 ॥ 13 ॥

𑌸𑌾𑌲𑌦𑍍𑌵𑌯𑌾𑌂𑌤𑌰𑌾𑌲𑍇
𑌸𑌰𑌲𑌾𑌲𑌿𑌕𑌪𑍋𑌤𑌚𑌾𑌟𑍁𑌸𑍁𑌭𑌗𑌾𑌯𑌾𑌮𑍍 ।
𑌸𑌂𑌤𑌾𑌨𑌵𑌾𑌟𑌿𑌕𑌾𑌯𑌾𑌂
𑌸𑌕𑍍𑌤𑌂 𑌚𑍇𑌤𑍋𑌽𑌸𑍍𑌤𑍁 𑌸𑌤𑌤𑌮𑌸𑍍𑌮𑌾𑌕𑌮𑍍 ॥ 14 ॥

𑌤𑌤𑍍𑌰 𑌤𑌪𑌨𑌾𑌤𑌿𑌰𑍂𑌕𑍍𑌷𑌃
𑌸𑌾𑌮𑍍𑌰𑌾𑌜𑍍𑌞𑍀𑌚𑌰𑌣𑌸𑌾𑌂𑌦𑍍𑌰𑌿𑌤𑌸𑍍𑌵𑌾𑌂𑌤𑌃 ।
𑌶𑍁𑌕𑍍𑌰𑌶𑍁𑌚𑌿𑌶𑍍𑌰𑍀𑌸𑌹𑌿𑌤𑍋
𑌗𑍍𑌰𑍀𑌷𑍍𑌮𑌰𑍍𑌤𑍁𑌰𑍍𑌦𑌿𑌶𑌤𑍁 𑌕𑍀𑌰𑍍𑌤𑌿𑌮𑌾𑌕𑌲𑍍𑌪𑌮𑍍 ॥ 15 ॥

𑌉𑌤𑍍𑌤𑌰𑌸𑍀𑌮𑌨𑌿 𑌤𑌸𑍍𑌯𑍋-
-𑌨𑍍𑌨𑌤𑌶𑌿𑌖𑌰𑍋𑌤𑍍𑌕𑌂𑌪𑌿𑌹𑌾𑌟𑌕𑌪𑌤𑌾𑌕𑌃 ।
𑌪𑍍𑌰𑌕𑌟𑌯𑌤𑍁 𑌪𑌂𑌚𑌮𑍋 𑌨𑌃
𑌪𑍍𑌰𑌾𑌕𑌾𑌰𑌃 𑌕𑍁𑌶𑌲𑌮𑌾𑌰𑌕𑍂𑌟𑌮𑌯𑌃 ॥ 16 ॥

𑌪𑍍𑌰𑌾𑌕𑌾𑌰𑌯𑍋𑌶𑍍𑌚 𑌮𑌧𑍍𑌯𑍇
𑌪𑌲𑍍𑌲𑌵𑌿𑌤𑌾𑌨𑍍𑌯𑌭𑍃𑌤𑌪𑌂𑌚𑌮𑍋𑌨𑍍𑌮𑍇𑌷𑌾 ।
𑌹𑌰𑌿𑌚𑌂𑌦𑌨𑌦𑍍𑌰𑍁𑌵𑌾𑌟𑍀-
-𑌹𑌰𑌤𑌾𑌦𑌾𑌮𑍂𑌲𑌮𑌸𑍍𑌮𑌦𑌨𑍁𑌤𑌾𑌪𑌮𑍍 ॥ 1𑍭 ॥

𑌤𑌤𑍍𑌰 𑌨𑌭𑌃 𑌶𑍍𑌰𑍀𑌮𑍁𑌖𑍍𑌯𑍈-
-𑌸𑍍𑌤𑌰𑍁𑌣𑍀𑌵𑌰𑍍𑌗𑍈𑌃 𑌸𑌮𑌨𑍍𑌵𑌿𑌤𑌃 𑌪𑌰𑌿𑌤𑌃 ।
𑌵𑌜𑍍𑌰𑌾𑌟𑍍𑌟𑌹𑌾𑌸𑌮𑍁𑌖𑌰𑍋
𑌵𑌾𑌂𑌛𑌾𑌪𑍂𑌰𑍍𑌤𑌿𑌂 𑌤𑌨𑍋𑌤𑍁 𑌵𑌰𑍍𑌷𑌰𑍍𑌤𑍁𑌃 ॥ 1𑍮 ॥

𑌮𑌾𑌰𑍁𑌤𑌯𑍋𑌜𑌨𑌦𑍂𑌰𑍇
𑌮𑌹𑌨𑍀𑌯𑌸𑍍𑌤𑌸𑍍𑌯 𑌚𑍋𑌤𑍍𑌤𑌰𑍇 𑌭𑌾𑌗𑍇 ।
𑌭𑌦𑍍𑌰𑌂 𑌕𑍃𑌷𑍀𑌷𑍍𑌟 𑌷𑌷𑍍𑌠𑌃
𑌪𑍍𑌰𑌾𑌕𑌾𑌰𑌃 𑌪𑌂𑌚𑌲𑍋𑌹𑌧𑌾𑌤𑍁𑌮𑌯𑌃 ॥ 1𑍯 ॥

𑌅𑌨𑌯𑍋𑌰𑍍𑌮𑌧𑍍𑌯𑍇 𑌸𑌂𑌤𑌤-
-𑌮𑌂𑌕𑍂𑌰𑌦𑍍𑌦𑌿𑌵𑍍𑌯𑌕𑍁𑌸𑍁𑌮𑌗𑌂𑌧𑌾𑌯𑌾𑌮𑍍 ।
𑌮𑌂𑌦𑌾𑌰𑌵𑌾𑌟𑌿𑌕𑌾𑌯𑌾𑌂
𑌮𑌾𑌨𑌸𑌮𑌂𑌗𑍀𑌕𑌰𑍋𑌤𑍁 𑌮𑍇 𑌵𑌿𑌹𑍃𑌤𑌿𑌮𑍍 ॥ 20 ॥

𑌤𑌸𑍍𑌯𑌾𑌮𑌿𑌷𑍋𑌰𑍍𑌜𑌲𑌕𑍍𑌷𑍍𑌮𑍀-
-𑌤𑌰𑍁𑌣𑍀𑌭𑍍𑌯𑌾𑌂 𑌶𑌰𑌦𑍃𑌤𑍁𑌃 𑌸𑌦𑌾 𑌸𑌹𑌿𑌤𑌃 ।
𑌅𑌭𑍍𑌯𑌰𑍍𑌚𑌯𑌨𑍍 𑌸 𑌜𑍀𑌯𑌾-
-𑌦𑌂𑌬𑌾𑌮𑌾𑌮𑍋𑌦𑌮𑍇𑌦𑍁𑌰𑍈𑌃 𑌕𑍁𑌸𑍁𑌮𑍈𑌃 ॥ 21 ॥

𑌤𑌸𑍍𑌯𑌰𑍍𑌷𑌿𑌸𑌂𑌖𑍍𑌯𑌯𑍋𑌜𑌨-
-𑌦𑍂𑌰𑍇 𑌦𑍇𑌦𑍀𑌪𑍍𑌯𑌮𑌾𑌨𑌶𑍃𑌂𑌗𑍌𑌘𑌃 ।
𑌕𑌲𑌧𑍌𑌤𑌕𑌲𑌿𑌤𑌮𑍂𑌰𑍍𑌤𑌿𑌃
𑌕𑌲𑍍𑌯𑌾𑌣𑌂 𑌦𑌿𑌶𑌤𑍁 𑌸𑌪𑍍𑌤𑌮𑌃 𑌸𑌾𑌲𑌃 ॥ 22 ॥

𑌮𑌧𑍍𑌯𑍇 𑌤𑌯𑍋𑌰𑍍𑌮𑌰𑍁𑌤𑍍𑌪𑌥
𑌲𑌂𑌘𑌿𑌤𑌵𑌿𑌟𑌪𑌾𑌗𑍍𑌰𑌵𑌿𑌰𑍁𑌤𑌕𑌲𑌕𑌂𑌠𑌾 ।
𑌶𑍍𑌰𑍀𑌪𑌾𑌰𑌿𑌜𑌾𑌤𑌵𑌾𑌟𑍀
𑌶𑍍𑌰𑌿𑌯𑌮𑌨𑌿𑌶𑌂 𑌦𑌿𑌶𑌤𑍁 𑌶𑍀𑌤𑌲𑍋𑌦𑍍𑌦𑍇𑌶𑌾 ॥ 23 ॥

𑌤𑌸𑍍𑌯𑌾𑌮𑌤𑌿𑌪𑍍𑌰𑌿𑌯𑌾𑌭𑍍𑌯𑌾𑌂
𑌸𑌹 𑌖𑍇𑌲𑌨𑍍 𑌸𑌹𑌸𑌹𑌸𑍍𑌯𑌲𑌕𑍍𑌷𑍍𑌮𑍀𑌭𑍍𑌯𑌾𑌮𑍍 ।
𑌸𑌾𑌮𑌂𑌤𑍋 𑌝𑌷𑌕𑍇𑌤𑍋-
-𑌰𑍍𑌹𑍇𑌮𑌂𑌤𑍋 𑌭𑌵𑌤𑍁 𑌹𑍇𑌮𑌵𑍃𑌦𑍍𑌧𑍍𑌯𑍈 𑌨𑌃 ॥ 24 ॥

𑌉𑌤𑍍𑌤𑌰𑌤𑌸𑍍𑌤𑌸𑍍𑌯 𑌮𑌹𑌾-
-𑌨𑍁𑌦𑍍𑌭𑌟𑌹𑍁𑌤𑌭𑍁𑌕𑍍𑌶𑌿𑌖𑌾𑌰𑍁𑌣𑌮𑌯𑍂𑌖𑌃 ।
𑌤𑌪𑌨𑍀𑌯𑌖𑌂𑌡𑌰𑌚𑌿𑌤-
-𑌸𑍍𑌤𑌨𑍁𑌤𑌾𑌦𑌾𑌯𑍁𑌷𑍍𑌯𑌮𑌷𑍍𑌟𑌮𑍋 𑌵𑌰𑌣𑌃 ॥ 25 ॥

𑌕𑌾𑌦𑌂𑌬𑌵𑌿𑌪𑌿𑌨𑌵𑌾𑌟𑍀-
-𑌮𑌨𑌯𑍋𑌰𑍍𑌮𑌧𑍍𑌯𑌭𑍁𑌵𑌿 𑌕𑌲𑍍𑌪𑌿𑌤𑌾𑌵𑌾𑌸𑌾𑌮𑍍 ।
𑌕𑌲𑌯𑌾𑌮𑌿 𑌸𑍂𑌨𑌕𑍋𑌰𑌕-
-𑌕𑌂𑌦𑌲𑌿𑌤𑌾𑌮𑍋𑌦𑌤𑍁𑌂𑌦𑌿𑌲𑌸𑌮𑍀𑌰𑌾𑌮𑍍 ॥ 26 ॥

𑌤𑌸𑍍𑌯𑌾𑌮𑌤𑌿𑌶𑌿𑌶𑌿𑌰𑌾𑌕𑍃𑌤𑌿-
-𑌰𑌾𑌸𑍀𑌨𑌸𑍍𑌤𑌪𑌤𑌪𑌸𑍍𑌯𑌲𑌕𑍍𑌷𑍍𑌮𑍀𑌭𑍍𑌯𑌾𑌮𑍍 ।
𑌶𑌿𑌵𑌮𑌨𑌿𑌶𑌂 𑌕𑍁𑌰𑍁𑌤𑌾𑌨𑍍𑌮𑍇
𑌶𑌿𑌶𑌿𑌰𑌰𑍍𑌤𑍁𑌃 𑌸𑌤𑌤𑌶𑍀𑌤𑌲𑌦𑌿𑌗𑌂𑌤𑌃 ॥ 2𑍭 ॥

𑌤𑌸𑍍𑌯𑌾𑌂 𑌕𑌦𑌂𑌬𑌵𑌾𑌟𑍍𑌯𑌾𑌂
𑌤𑌤𑍍𑌪𑍍𑌰𑌸𑌵𑌾𑌮𑍋𑌦𑌮𑌿𑌲𑌿𑌤𑌮𑌧𑍁𑌗𑌂𑌧𑌮𑍍 ।
𑌸𑌪𑍍𑌤𑌾𑌵𑌰𑌣𑌮𑌨𑍋𑌜𑍍𑌞𑌂
𑌶𑌰𑌣𑌂 𑌸𑌮𑍁𑌪𑍈𑌮𑌿 𑌮𑌂𑌤𑍍𑌰𑌿𑌣𑍀𑌶𑌰𑌣𑌮𑍍 ॥ 2𑍮 ॥

𑌤𑌤𑍍𑌰𑌾𑌲𑌯𑍇 𑌵𑌿𑌶𑌾𑌲𑍇
𑌤𑌪𑌨𑍀𑌯𑌾𑌰𑌚𑌿𑌤𑌤𑌰𑌲𑌸𑍋𑌪𑌾𑌨𑍇 ।
𑌮𑌾𑌣𑌿𑌕𑍍𑌯𑌮𑌂𑌡𑌪𑌾𑌂𑌤-
-𑌰𑍍𑌮𑌹𑌿𑌤𑍇 𑌸𑌿𑌂𑌹𑌾𑌸𑌨𑍇 𑌸𑍁𑌮𑌣𑌿𑌖𑌚𑌿𑌤𑍇 ॥ 2𑍯 ॥

𑌬𑌿𑌂𑌦𑍁𑌤𑍍𑌰𑌿𑌪𑌂𑌚𑌕𑍋𑌣-
-𑌦𑍍𑌵𑌿𑌪𑌨𑍃𑌪𑌵𑌸𑍁𑌵𑍇𑌦𑌦𑌲𑌕𑍁𑌰𑍇𑌖𑌾𑌢𑍍𑌯𑍇 ।
𑌚𑌕𑍍𑌰𑍇 𑌸𑌦𑌾 𑌨𑌿𑌵𑌿𑌷𑍍𑌟𑌾𑌂
𑌷𑌷𑍍𑌠𑍍𑌯𑌷𑍍𑌟𑌤𑍍𑌰𑌿𑌂𑌶𑌦𑌕𑍍𑌷𑌰𑍇𑌶𑌾𑌨𑍀𑌮𑍍 ॥ 30 ॥

𑌤𑌾𑌪𑌿𑌂𑌛𑌮𑍇𑌚𑌕𑌾𑌭𑌾𑌂
𑌤𑌾𑌲𑍀𑌦𑌲𑌘𑌟𑌿𑌤𑌕𑌰𑍍𑌣𑌤𑌾𑌟𑌂𑌕𑌾𑌮𑍍 ।
𑌤𑌾𑌂𑌬𑍂𑌲𑌪𑍂𑌰𑌿𑌤𑌮𑍁𑌖𑍀𑌂
𑌤𑌾𑌮𑍍𑌰𑌾𑌧𑌰𑌬𑌿𑌂𑌬𑌦𑍃𑌷𑍍𑌟𑌦𑌰𑌹𑌾𑌸𑌾𑌮𑍍 ॥ 31 ॥

𑌕𑍁𑌂𑌕𑍁𑌮𑌪𑌂𑌕𑌿𑌲𑌦𑍇𑌹𑌾𑌂
𑌕𑍁𑌵𑌲𑌯𑌜𑍀𑌵𑌾𑌤𑍁𑌶𑌾𑌵𑌕𑌵𑌤𑌂𑌸𑌾𑌮𑍍 ।
𑌕𑍋𑌕𑌨𑌦𑌶𑍋𑌣𑌚𑌰𑌣𑌾𑌂
𑌕𑍋𑌕𑌿𑌲𑌨𑌿𑌕𑍍𑌵𑌾𑌣𑌕𑍋𑌮𑌲𑌾𑌲𑌾𑌪𑌾𑌮𑍍 ॥ 32 ॥

𑌵𑌾𑌮𑌾𑌂𑌗𑌗𑌲𑌿𑌤𑌚𑍂𑌲𑍀𑌂
𑌵𑌨𑌮𑌾𑌲𑍍𑌯𑌕𑌦𑌂𑌬𑌮𑌾𑌲𑌿𑌕𑌾𑌭𑌰𑌣𑌾𑌮𑍍 ।
𑌮𑍁𑌕𑍍𑌤𑌾𑌲𑌲𑌂𑌤𑌿𑌕𑌾𑌂𑌚𑌿𑌤
𑌮𑍁𑌗𑍍𑌧𑌾𑌲𑌿𑌕𑌮𑌿𑌲𑌿𑌤𑌚𑌿𑌤𑍍𑌰𑌕𑍋𑌦𑌾𑌰𑌾𑌮𑍍 ॥ 33 ॥

𑌕𑌰𑌵𑌿𑌧𑍃𑌤𑌕𑍀𑌰𑌶𑌾𑌵𑌕-
-𑌕𑌲𑌨𑌿𑌨𑌦𑌵𑍍𑌯𑌕𑍍𑌤𑌨𑌿𑌖𑌿𑌲𑌨𑌿𑌗𑌮𑌾𑌰𑍍𑌥𑌾𑌮𑍍 ।
𑌵𑌾𑌮𑌕𑍁𑌚𑌸𑌂𑌗𑌿𑌵𑍀𑌣𑌾𑌵𑌾𑌦𑌨-
-𑌸𑍌𑌖𑍍𑌯𑌾𑌰𑍍𑌧𑌮𑍀𑌲𑌿𑌤𑌾𑌕𑍍𑌷𑌿𑌯𑍁𑌗𑌾𑌮𑍍 ॥ 34 ॥

𑌆𑌪𑌾𑌟𑌲𑌾𑌂𑌶𑍁𑌕𑌧𑌰𑌾-
-𑌮𑌾𑌦𑌿𑌰𑌸𑍋𑌨𑍍𑌮𑍇𑌷𑌵𑌾𑌸𑌿𑌤𑌕𑌟𑌾𑌕𑍍𑌷𑌾𑌮𑍍 ।
𑌆𑌮𑍍𑌨𑌾𑌯𑌸𑌾𑌰𑌗𑍁𑌲𑌿𑌕𑌾-
-𑌮𑌾𑌦𑍍𑌯𑌾𑌂 𑌸𑌂𑌗𑍀𑌤𑌮𑌾𑌤𑍃𑌕𑌾𑌂 𑌵𑌂𑌦𑍇 ॥ 35 ॥

𑌤𑌸𑍍𑌯 𑌚 𑌸𑍁𑌵𑌰𑍍𑌣𑌸𑌾𑌲-
-𑌸𑍍𑌯𑍋𑌤𑍍𑌤𑌰𑌤𑌸𑍍𑌤𑌰𑍁𑌣𑌕𑍁𑌂𑌕𑍁𑌮𑌚𑍍𑌛𑌾𑌯𑌃 ।
𑌶𑌮𑌯𑌤𑍁 𑌮𑌮 𑌸𑌂𑌤𑌾𑌪𑌂
𑌸𑌾𑌲𑍋 𑌨𑌵𑌮𑌃 𑌸 𑌪𑍁𑌷𑍍𑌪𑌰𑌾𑌗𑌮𑌯𑌃 ॥ 36 ॥

𑌅𑌨𑌯𑍋𑌰𑌂𑌤𑌰𑌵𑌸𑍁𑌧𑌾𑌃
𑌪𑍍𑌰𑌣𑍁𑌮𑌃 𑌪𑍍𑌰𑌤𑍍𑌯𑌗𑍍𑌰𑌪𑍁𑌷𑍍𑌪𑌰𑌾𑌗𑌮𑌯𑍀𑌃 ।
𑌸𑌿𑌂𑌹𑌾𑌸𑌨𑍇𑌶𑍍𑌵𑌰𑍀𑌮𑌨𑍁-
-𑌚𑌿𑌂𑌤𑌨𑌨𑌿𑌸𑍍𑌤𑌂𑌦𑍍𑌰𑌸𑌿𑌦𑍍𑌧𑌨𑍀𑌰𑌂𑌧𑍍𑌰𑌾𑌃 ॥ 3𑍭 ॥

𑌤𑌤𑍍𑌸𑌾𑌲𑍋𑌤𑍍𑌤𑌰𑌦𑍇𑌶𑍇
𑌤𑌰𑍁𑌣𑌜𑌪𑌾𑌕𑌿𑌰𑌣𑌧𑍋𑌰𑌣𑍀𑌶𑍋𑌣𑌃 ।
𑌪𑍍𑌰𑌶𑌮𑌯𑌤𑍁 𑌪𑌦𑍍𑌮𑌰𑌾𑌗-
-𑌪𑍍𑌰𑌾𑌕𑌾𑌰𑍋 𑌮𑌮 𑌪𑌰𑌾𑌭𑌵𑌂 𑌦𑌶𑌮𑌃 ॥ 3𑍮 ॥

𑌅𑌂𑌤𑌰𑌭𑍂𑌕𑍃𑌤𑌵𑌾𑌸𑌾-
-𑌨𑌨𑌯𑍋𑌰𑌪𑌨𑍀𑌤𑌚𑌿𑌤𑍍𑌤𑌵𑍈𑌮𑌤𑍍𑌯𑌾𑌨𑍍 ।
𑌚𑌕𑍍𑌰𑍇𑌶𑍀𑌪𑌦𑌭𑌕𑍍𑌤𑌾𑌂-
-𑌶𑍍𑌚𑌾𑌰𑌣𑌵𑌰𑍍𑌗𑌾𑌨𑌹𑌰𑍍𑌨𑌿𑌶𑌂 𑌕𑌲𑌯𑍇 ॥ 3𑍯 ॥

𑌸𑌾𑌰𑌂𑌗𑌵𑌾𑌹𑌯𑍋𑌜𑌨𑌦𑍂𑌰𑍇-
-𑌽𑌸𑌂𑌘𑌟𑌿𑌤𑌕𑍇𑌤𑌨𑌸𑍍𑌤𑌸𑍍𑌯 ।
𑌗𑍋𑌮𑍇𑌦𑌕𑍇𑌨 𑌰𑌚𑌿𑌤𑍋
𑌗𑍋𑌪𑌾𑌯𑌤𑍁 𑌮𑌾𑌂 𑌸𑌮𑍁𑌨𑍍𑌨𑌤𑌃 𑌸𑌾𑌲𑌃 ॥ 40 ॥

𑌵𑌪𑍍𑌰𑌦𑍍𑌵𑌯𑌾𑌂𑌤𑌰𑍋𑌰𑍍𑌵𑍍𑌯𑌾𑌂
𑌵𑌟𑍁𑌕𑍈𑌰𑍍𑌵𑌿𑌵𑌿𑌧𑍈𑌶𑍍𑌚 𑌯𑍋𑌗𑌿𑌨𑍀𑌬𑍃𑌂𑌦𑍈𑌃 ।
𑌸𑌤𑌤𑌂 𑌸𑌮𑌰𑍍𑌚𑌿𑌤𑌾𑌯𑌾𑌃
𑌸𑌂𑌕𑌰𑍍𑌷𑌣𑍍𑌯𑌾𑌃 𑌪𑍍𑌰𑌣𑍌𑌮𑌿 𑌚𑌰𑌣𑌾𑌬𑍍𑌜𑌮𑍍 ॥ 41 ॥

𑌤𑌾𑌪𑌸𑌯𑍋𑌜𑌨𑌦𑍂𑌰𑍇
𑌤𑌸𑍍𑌯 𑌸𑌮𑍁𑌤𑍍𑌤𑍁𑌂𑌗 𑌗𑍋𑌪𑍁𑌰𑍋𑌪𑍇𑌤𑌃 ।
𑌵𑌾𑌂𑌛𑌾𑌪𑍂𑌰𑍍𑌤𑍍𑌯𑍈 𑌭𑌵𑌤𑌾-
-𑌦𑍍𑌵𑌜𑍍𑌰𑌮𑌣𑍀𑌨𑌿𑌕𑌰𑌨𑌿𑌰𑍍𑌮𑌿𑌤𑍋 𑌵𑌪𑍍𑌰𑌃 ॥ 42 ॥

𑌵𑌰𑌣𑌦𑍍𑌵𑌿𑌤𑌯𑌾𑌂𑌤𑌰𑌤𑍋
𑌵𑌾𑌸𑌜𑍁𑌷𑍋 𑌵𑌿𑌹𑌿𑌤𑌮𑌧𑍁𑌰𑌸𑌾𑌸𑍍𑌵𑌾𑌦𑌾𑌃 ।
𑌰𑌂𑌭𑌾𑌦𑌿𑌵𑌿𑌬𑍁𑌧𑌵𑍇𑌶𑍍𑌯𑌾
𑌰𑌚𑌯𑌂𑌤𑍁 𑌮𑌹𑌾𑌂𑌤𑌮𑌸𑍍𑌮𑌦𑌾𑌨𑌂𑌦𑌮𑍍 ॥ 43 ॥

𑌤𑌤𑍍𑌰 𑌸𑌦𑌾 𑌪𑍍𑌰𑌵𑌹𑌂𑌤𑍀
𑌤𑌟𑌿𑌨𑍀 𑌵𑌜𑍍𑌰𑌾𑌭𑌿𑌧𑌾 𑌚𑌿𑌰𑌂 𑌜𑍀𑌯𑌾𑌤𑍍 ।
𑌚𑌟𑍁𑌲𑍋𑌰𑍍𑌮𑌿𑌜𑌾𑌲𑌨𑍃𑌤𑍍𑌯-
-𑌤𑍍𑌕𑌲𑌹𑌂𑌸𑍀𑌕𑍁𑌲𑌕𑌲𑌕𑍍𑌵𑌣𑌿𑌤𑌪𑍁𑌷𑍍𑌟𑌾 ॥ 44 ॥

𑌰𑍋𑌧𑌸𑌿 𑌤𑌸𑍍𑌯𑌾 𑌰𑍁𑌚𑌿𑌰𑍇
𑌵𑌜𑍍𑌰𑍇𑌶𑍀 𑌜𑌯𑌤𑌿 𑌵𑌜𑍍𑌰𑌭𑍂𑌷𑌾𑌢𑍍𑌯𑌾 ।
𑌵𑌜𑍍𑌰𑌪𑍍𑌰𑌦𑌾𑌨𑌤𑍋𑌷𑌿𑌤-
-𑌵𑌜𑍍𑌰𑌿𑌮𑍁𑌖𑌤𑍍𑌰𑌿𑌦𑌶𑌵𑌿𑌨𑍁𑌤𑌚𑌾𑌰𑌿𑌤𑍍𑌰𑌾 ॥ 45 ॥

𑌤𑌸𑍍𑌯𑍋𑌦𑍀𑌚𑍍𑌯𑌾𑌂 𑌹𑌰𑌿𑌤𑌿
𑌸𑍍𑌤𑌵𑌕𑌿𑌤𑌸𑍁𑌷𑌮𑌾𑌵𑌲𑍀𑌢𑌵𑌿𑌯𑌦𑌂𑌤𑌃 ।
𑌵𑍈𑌡𑍂𑌰𑍍𑌯𑌰𑌤𑍍𑌨𑌰𑌚𑌿𑌤𑍋
𑌵𑍈𑌮𑌲𑍍𑌯𑌂 𑌦𑌿𑌶𑌤𑍁 𑌚𑍇𑌤𑌸𑍋 𑌵𑌰𑌣𑌃 ॥ 46 ॥

𑌅𑌧𑌿𑌮𑌧𑍍𑌯𑌮𑍇𑌤𑌯𑍋𑌃 𑌪𑍁𑌨-
-𑌰𑌂𑌬𑌾𑌚𑌰𑌣𑌾𑌵𑌲𑌂𑌬𑌿𑌤𑌸𑍍𑌵𑌾𑌂𑌤𑌾𑌨𑍍 ।
𑌕𑌾𑌰𑍍𑌕𑍋𑌟𑌕𑌾𑌦𑌿𑌨𑌾𑌗𑌾𑌨𑍍
𑌕𑌲𑌯𑌾𑌮𑌃 𑌕𑌿𑌂 𑌚 𑌬𑌲𑌿𑌮𑍁𑌖𑌾𑌨𑍍 𑌦𑌨𑍁𑌜𑌾𑌨𑍍 ॥ 4𑍭 ॥

𑌗𑌂𑌧𑌵𑌹𑌸𑌂𑌖𑍍𑌯𑌯𑍋𑌜𑌨-
-𑌦𑍂𑌰𑍇 𑌗𑌗𑌨𑍋𑌰𑍍𑌧𑍍𑌵𑌜𑌾𑌂𑌘𑌿𑌕𑌸𑍍𑌤𑌸𑍍𑌯 ।
𑌵𑌾𑌸𑌵𑌮𑌣𑌿𑌪𑍍𑌰𑌣𑍀𑌤𑍋
𑌵𑌰𑌣𑍋 𑌬𑌹𑌲𑌯𑌤𑍁 𑌵𑍈𑌦𑍁𑌷𑍀𑌂 𑌵𑌿𑌶𑌦𑌾𑌮𑍍 ॥ 4𑍮 ॥

𑌮𑌧𑍍𑌯𑌕𑍍𑌷𑍋𑌣𑍍𑌯𑌾𑌮𑌨𑌯𑍋-
-𑌰𑍍𑌮𑌹𑍇𑌂𑌦𑍍𑌰𑌨𑍀𑌲𑌾𑌤𑍍𑌮𑌕𑌾𑌨𑌿 𑌚 𑌸𑌰𑌾𑌂𑌸𑌿 ।
𑌶𑌾𑌤𑍋𑌦𑌰𑍀𑌸𑌹𑌾𑌯𑌾-
-𑌨𑍍𑌭𑍂𑌪𑌾𑌲𑌾𑌨𑌪𑌿 𑌪𑍁𑌨𑌃 𑌪𑍁𑌨𑌃 𑌪𑍍𑌰𑌣𑍁𑌮𑌃 ॥ 4𑍯 ॥

𑌆𑌶𑍁𑌗𑌯𑍋𑌜𑌨𑌦𑍂𑌰𑍇
𑌤𑌸𑍍𑌯𑍋𑌰𑍍𑌧𑍍𑌵𑌂 𑌕𑌾𑌂𑌤𑌿𑌧𑌵𑌲𑌿𑌤𑌦𑌿𑌗𑌂𑌤𑌃 ।
𑌮𑍁𑌕𑍍𑌤𑌾𑌵𑌿𑌰𑌚𑌿𑌤𑌗𑌾𑌤𑍍𑌰𑍋
𑌮𑍁𑌹𑍁𑌰𑌸𑍍𑌮𑌾𑌕𑌂 𑌮𑍁𑌦𑍇 𑌭𑌵𑌤𑍁 𑌸𑌾𑌲𑌃 ॥ 50 ॥

𑌆𑌵𑍃𑌤𑍍𑌤𑍍𑌯𑍋𑌰𑌧𑌿𑌮𑌧𑍍𑌯𑌂
𑌪𑍂𑌰𑍍𑌵𑌸𑍍𑌯𑌾𑌂 𑌦𑌿𑌶𑌿 𑌪𑍁𑌰𑌂𑌦𑌰𑌃 𑌶𑍍𑌰𑍀𑌮𑌾𑌨𑍍 ।
𑌅𑌭𑍍𑌰𑌮𑍁𑌵𑌿𑌟𑌾𑌧𑌿𑌰𑍂𑌢𑍋
𑌵𑌿𑌭𑍍𑌰𑌮𑌮𑌸𑍍𑌮𑌾𑌕𑌮𑌨𑌿𑌶𑌮𑌾𑌤𑌨𑍁𑌤𑌾𑌤𑍍 ॥ 51 ॥

𑌤𑌤𑍍𑌕𑍋𑌣𑍇 𑌵𑍍𑌯𑌜𑌨𑌸𑍍𑌰𑍁-
-𑌕𑍍𑌤𑍋𑌮𑌰𑌪𑌾𑌤𑍍𑌰𑌸𑍍𑌰𑍁𑌵𑌾𑌨𑍍𑌨𑌶𑌕𑍍𑌤𑌿𑌧𑌰𑌃 ।
𑌸𑍍𑌵𑌾𑌹𑌾𑌸𑍍𑌵𑌧𑌾𑌸𑌮𑍇𑌤𑌃
𑌸𑍁𑌖𑌯𑌤𑍁 𑌮𑌾𑌂 𑌹𑌵𑍍𑌯𑌵𑌾𑌹𑌨𑌃 𑌸𑍁𑌚𑌿𑌰𑌮𑍍 ॥ 52 ॥

𑌦𑌕𑍍𑌷𑌿𑌣𑌦𑌿𑌗𑌂𑌤𑌰𑌾𑌲𑍇
𑌦𑌂𑌡𑌧𑌰𑍋 𑌨𑍀𑌲𑌨𑍀𑌰𑌦𑌚𑍍𑌛𑌾𑌯𑌃 ।
𑌤𑍍𑌰𑌿𑌪𑍁𑌰𑌾𑌪𑌦𑌾𑌬𑍍𑌜𑌭𑌕𑍍𑌤𑌸𑍍𑌤𑌿𑌰𑌯𑌤𑍁
𑌮𑌮 𑌨𑌿𑌖𑌿𑌲𑌮𑌂𑌹𑌸𑌾𑌂 𑌨𑌿𑌕𑌰𑌮𑍍 ॥ 53 ॥

𑌤𑌸𑍍𑌯𑍈𑌵 𑌪𑌶𑍍𑌚𑌿𑌮𑌾𑌯𑌾𑌂
𑌦𑌿𑌶𑌿 𑌦𑌲𑌿𑌤𑍇𑌂𑌦𑍀𑌵𑌰𑌪𑍍𑌰𑌭𑌾𑌶𑍍𑌯𑌾𑌮𑌃 ।
𑌖𑍇𑌟𑌾𑌸𑌿𑌯𑌷𑍍𑌟𑌿𑌧𑌾𑌰𑍀
𑌖𑍇𑌦𑌾𑌨𑌪𑌨𑌯𑌤𑍁 𑌯𑌾𑌤𑍁𑌧𑌾𑌨𑍋 𑌮𑍇 ॥ 54 ॥

𑌤𑌸𑍍𑌯𑌾 𑌉𑌤𑍍𑌤𑌰𑌦𑍇𑌶𑍇
𑌧𑌵𑌲𑌾𑌂𑌗𑍋 𑌵𑌿𑌪𑍁𑌲𑌝𑌷𑌵𑌰𑌾𑌰𑍂𑌢𑌃 ।
𑌪𑌾𑌶𑌾𑌯𑍁𑌧𑌾𑌤𑍍𑌤𑌪𑌾𑌣𑌿𑌃
𑌪𑌾𑌶𑍀 𑌵𑌿𑌦𑌲𑌯𑌤𑍁 𑌪𑌾𑌶𑌜𑌾𑌲𑌾𑌨𑌿 ॥ 55 ॥

𑌵𑌂𑌦𑍇 𑌤𑌦𑍁𑌤𑍍𑌤𑌰𑌹𑌰𑌿-
-𑌤𑍍𑌕𑍋𑌣𑍇 𑌵𑌾𑌯𑍁𑌂 𑌚𑌮𑍂𑌰𑍁𑌵𑌰𑌵𑌾𑌹𑌮𑍍 ।
𑌕𑍋𑌰𑌕𑌿𑌤𑌤𑌤𑍍𑌤𑍍𑌵𑌬𑍋𑌧𑌾-
-𑌨𑍍𑌗𑍋𑌰𑌕𑍍𑌷𑌪𑍍𑌰𑌮𑍁𑌖𑌯𑍋𑌗𑌿𑌨𑍋𑌽𑌪𑌿 𑌮𑍁𑌹𑍁𑌃 ॥ 56 ॥

𑌤𑌰𑍁𑌣𑍀𑌰𑌿𑌡𑌾𑌪𑍍𑌰𑌧𑌾𑌨𑌾-
-𑌸𑍍𑌤𑌿𑌸𑍍𑌰𑍋 𑌵𑌾𑌤𑌸𑍍𑌯 𑌤𑌸𑍍𑌯 𑌕𑍃𑌤𑌵𑌾𑌸𑌾𑌃 ।
𑌪𑍍𑌰𑌤𑍍𑌯𑌗𑍍𑌰𑌕𑌾𑌪𑌿𑌶𑌾𑌯𑌨-
-𑌪𑌾𑌨𑌪𑌰𑌿𑌭𑍍𑌰𑌾𑌂𑌤𑌲𑍋𑌚𑌨𑌾𑌃 𑌕𑌲𑌯𑍇 ॥ 5𑍭 ॥

𑌤𑌲𑍍𑌲𑍋𑌕𑌪𑍂𑌰𑍍𑌵𑌭𑌾𑌗𑍇
𑌧𑌨𑌦𑌂 𑌧𑍍𑌯𑌾𑌯𑌾𑌮𑌿 𑌶𑍇𑌵𑌧𑌿𑌕𑍁𑌲𑍇𑌶𑌮𑍍 ।
𑌅𑌪𑌿 𑌮𑌾𑌣𑌿𑌭𑌦𑍍𑌰𑌮𑍁𑌖𑍍𑌯𑌾-
-𑌨𑌂𑌬𑌾𑌚𑌰𑌣𑌾𑌵𑌲𑌂𑌬𑌿𑌨𑍋 𑌯𑌕𑍍𑌷𑌾𑌨𑍍 ॥ 5𑍮 ॥

𑌤𑌸𑍍𑌯𑍈𑌵 𑌪𑍂𑌰𑍍𑌵𑌸𑍀𑌮𑌨𑌿
𑌤𑌪𑌨𑍀𑌯𑌾𑌰𑌚𑌿𑌤𑌗𑍋𑌪𑍁𑌰𑍇 𑌨𑌗𑌰𑍇 ।
𑌕𑌾𑌤𑍍𑌯𑌾𑌯𑌨𑍀𑌸𑌹𑌾𑌯𑌂
𑌕𑌲𑌯𑍇 𑌶𑍀𑌤𑌾𑌂𑌶𑍁𑌖𑌂𑌡𑌚𑍂𑌡𑌾𑌲𑌮𑍍 ॥ 5𑍯 ॥

𑌤𑌤𑍍𑌪𑍁𑌰𑌷𑍋𑌡𑌶𑌵𑌰𑌣-
-𑌸𑍍𑌥𑌲𑌭𑌾𑌜𑌸𑍍𑌤𑌰𑍁𑌣𑌚𑌂𑌦𑍍𑌰𑌚𑍂𑌡𑌾𑌲𑌾𑌨𑍍 ।
𑌰𑍁𑌦𑍍𑌰𑌾𑌧𑍍𑌯𑌾𑌯𑍇 𑌪𑌠𑌿𑌤𑌾-
-𑌨𑍍𑌰𑍁𑌦𑍍𑌰𑌾𑌣𑍀𑌸𑌹𑌚𑌰𑌾𑌨𑍍𑌭𑌜𑍇 𑌰𑍁𑌦𑍍𑌰𑌾𑌨𑍍 ॥ 60 ॥

𑌪𑌵𑌮𑌾𑌨𑌸𑌂𑌖𑍍𑌯𑌯𑍋𑌜𑌨-
-𑌦𑍂𑌰𑍇 𑌬𑌾𑌲𑌤𑍃𑌣𑍍𑌮𑍇𑌚𑌕𑌸𑍍𑌤𑌸𑍍𑌯 ।
𑌸𑌾𑌲𑍋 𑌮𑌰𑌕𑌤𑌰𑌚𑌿𑌤𑌃
𑌸𑌂𑌪𑌦𑌮𑌚𑌲𑌾𑌂 𑌶𑍍𑌰𑌿𑌯𑌂 𑌚 𑌪𑍁𑌷𑍍𑌣𑌾𑌤𑍁 ॥ 61 ॥

𑌆𑌵𑍃𑌤𑌿𑌯𑍁𑌗𑍍𑌮𑌾𑌂𑌤𑌰𑌤𑍋
𑌹𑌰𑌿𑌤𑌮𑌣𑍀𑌨𑌿𑌵𑌹𑌮𑍇𑌚𑌕𑍇 𑌦𑍇𑌶𑍇 ।
𑌹𑌾𑌟𑌕𑌤𑌾𑌲𑍀𑌵𑌿𑌪𑌿𑌨𑌂
𑌹𑌾𑌲𑌾𑌘𑌟𑌘𑌟𑌿𑌤𑌵𑌿𑌟𑌪𑌮𑌾𑌕𑌲𑌯𑍇 ॥ 62 ॥

𑌤𑌤𑍍𑌰𑍈𑌵 𑌮𑌂𑌤𑍍𑌰𑌿𑌣𑍀𑌗𑍃𑌹-
-𑌪𑌰𑌿𑌣𑌾𑌹𑌂 𑌤𑌰𑌲𑌕𑍇𑌤𑌨𑌂 𑌸𑌦𑌨𑌮𑍍 ।
𑌮𑌰𑌕𑌤𑌸𑍌𑌧𑌮𑌨𑍋𑌜𑍍𑌞𑌂
𑌦𑌦𑍍𑌯𑌾𑌦𑌾𑌯𑍂𑌂𑌷𑌿 𑌦𑌂𑌡𑌨𑌾𑌥𑌾𑌯𑌾𑌃 ॥ 63 ॥

𑌸𑌦𑌨𑍇 𑌤𑌤𑍍𑌰 𑌹𑌰𑌿𑌨𑍍𑌮𑌣𑌿-
-𑌸𑌂𑌘𑌟𑌿𑌤𑍇 𑌮𑌂𑌡𑌪𑍇 𑌶𑌤𑌸𑍍𑌤𑌂𑌭𑍇 ।
𑌕𑌾𑌰𑍍𑌤𑌸𑍍𑌵𑌰𑌮𑌯𑌪𑍀𑌠𑍇
𑌕𑌨𑌕𑌮𑌯𑌾𑌂𑌬𑍁𑌰𑍁𑌹𑌕𑌰𑍍𑌣𑌿𑌕𑌾𑌮𑌧𑍍𑌯𑍇 ॥ 64 ॥

𑌬𑌿𑌂𑌦𑍁𑌤𑍍𑌰𑌿𑌕𑍋𑌣𑌵𑌰𑍍𑌤𑍁𑌲-
-𑌷𑌡𑌸𑍍𑌰𑌵𑍃𑌤𑍍𑌤𑌦𑍍𑌵𑌯𑌾𑌨𑍍𑌵𑌿𑌤𑍇 𑌚𑌕𑍍𑌰𑍇 ।
𑌸𑌂𑌚𑌾𑌰𑌿𑌣𑍀 𑌦𑌶𑍋𑌤𑍍𑌤𑌰-
𑌶𑌤𑌾𑌰𑍍𑌣𑌮𑌨𑍁𑌰𑌾𑌜𑌕𑌮𑌲𑌕𑌲𑌹𑌂𑌸𑍀 ॥ 65 ॥

𑌕𑍋𑌲𑌵𑌦𑌨𑌾 𑌕𑍁𑌶𑍇𑌶𑌯-
-𑌨𑌯𑌨𑌾 𑌕𑍋𑌕𑌾𑌰𑌿𑌮𑌂𑌡𑌿𑌤𑌶𑌿𑌖𑌂𑌡𑌾 ।
𑌸𑌂𑌤𑌪𑍍𑌤𑌕𑌾𑌂𑌚𑌨𑌾𑌭𑌾
𑌸𑌂𑌧𑍍𑌯𑌾𑌰𑍁𑌣𑌚𑍇𑌲𑌸𑌂𑌵𑍃𑌤𑌨𑌿𑌤𑌂𑌬𑌾 ॥ 66 ॥

𑌹𑌲𑌮𑍁𑌸𑌲𑌶𑌂𑌖𑌚𑌕𑍍𑌰𑌾-
-𑌽𑌂𑌕𑍁𑌶𑌪𑌾𑌶𑌾𑌭𑌯𑌵𑌰𑌸𑍍𑌫𑍁𑌰𑌿𑌤𑌹𑌸𑍍𑌤𑌾 ।
𑌕𑍂𑌲𑌂𑌕𑌷𑌾𑌨𑍁𑌕𑌂𑌪𑌾
𑌕𑍁𑌂𑌕𑍁𑌮𑌜𑌂𑌬𑌾𑌲𑌿𑌤𑌸𑍍𑌤𑌨𑌾𑌭𑍋𑌗𑌾 ॥ 6𑍭 ॥

𑌧𑍂𑌰𑍍𑌤𑌾𑌨𑌾𑌮𑌤𑌿𑌦𑍂𑌰𑌾-
-𑌵𑌾𑌰𑍍𑌤𑌾𑌶𑍇𑌷𑌾𑌵𑌲𑌗𑍍𑌨𑌕𑌮𑌨𑍀𑌯𑌾 ।
𑌆𑌰𑍍𑌤𑌾𑌲𑍀𑌶𑍁𑌭𑌦𑌾𑌤𑍍𑌰𑍀
𑌵𑌾𑌰𑍍𑌤𑌾𑌲𑍀 𑌭𑌵𑌤𑍁 𑌵𑌾𑌂𑌛𑌿𑌤𑌾𑌰𑍍𑌥𑌾𑌯 ॥ 6𑍮 ॥

𑌤𑌸𑍍𑌯𑌾𑌃 𑌪𑌰𑌿𑌤𑍋 𑌦𑍇𑌵𑍀𑌃
𑌸𑍍𑌵𑌪𑍍𑌨𑍇𑌶𑍍𑌯𑍁𑌨𑍍𑌮𑌤𑍍𑌤𑌭𑍈𑌰𑌵𑍀𑌮𑍁𑌖𑍍𑌯𑌾𑌃 ।
𑌪𑍍𑌰𑌣𑌮𑌤 𑌜𑌂𑌭𑌿𑌨𑍍𑌯𑌾𑌦𑍍𑌯𑌾𑌃
𑌭𑍈𑌰𑌵𑌵𑌰𑍍𑌗𑌾𑌂𑌶𑍍𑌚 𑌹𑍇𑌤𑍁𑌕𑌪𑍍𑌰𑌮𑍁𑌖𑌾𑌨𑍍 ॥ 6𑍯 ॥

𑌪𑍂𑌰𑍍𑌵𑍋𑌕𑍍𑌤𑌸𑌂𑌖𑍍𑌯𑌯𑍋𑌜𑌨-
-𑌦𑍂𑌰𑍇 𑌪𑍂𑌯𑌾𑌂𑌶𑍁𑌪𑌾𑌟𑌲𑌸𑍍𑌤𑌸𑍍𑌯 ।
𑌵𑌿𑌦𑍍𑌰𑌾𑌵𑌯𑌤𑍁 𑌮𑌦𑌾𑌰𑍍𑌤𑌿𑌂
𑌵𑌿𑌦𑍍𑌰𑍁𑌮𑌸𑌾𑌲𑍋 𑌵𑌿𑌶𑌂𑌕𑌟𑌦𑍍𑌵𑌾𑌰𑌃 ॥ 𑍭0 ॥

𑌆𑌵𑌰𑌣𑌯𑍋𑌰𑌹𑌰𑍍𑌨𑌿𑌶-
-𑌮𑌂𑌤𑌰𑌭𑍂𑌮𑍌𑌪𑍍𑌰𑌕𑌾𑌶𑌶𑌾𑌲𑌿𑌨𑍍𑌯𑌾𑌮𑍍 ।
𑌆𑌸𑍀𑌨𑌮𑌂𑌬𑍁𑌜𑌾𑌸𑌨-
-𑌮𑌭𑌿𑌨𑌵𑌸𑌿𑌂𑌦𑍂𑌰𑌗𑍌𑌰𑌮𑌹𑌮𑍀𑌡𑍇 ॥ 𑍭1 ॥

𑌵𑌰𑌣𑌸𑍍𑌯 𑌤𑌸𑍍𑌯 𑌮𑌾𑌰𑍁𑌤-
-𑌯𑍋𑌜𑌨𑌤𑍋 𑌵𑌿𑌪𑍁𑌲𑌗𑍋𑌪𑍁𑌰𑌦𑍍𑌵𑌾𑌰𑌃 ।
𑌸𑌾𑌲𑍋 𑌨𑌾𑌨𑌾𑌰𑌤𑍍𑌨𑍈𑌃
𑌸𑌂𑌘𑌟𑌿𑌤𑌾𑌂𑌗𑌃 𑌕𑍃𑌷𑍀𑌷𑍍𑌟 𑌮𑌦𑌭𑍀𑌷𑍍𑌟𑌮𑍍 ॥ 𑍭2 ॥

𑌅𑌂𑌤𑌰𑌕𑌕𑍍𑌷𑍍𑌯𑌾𑌮𑌨𑌯𑍋-
-𑌰𑌵𑌿𑌰𑌲𑌶𑍋𑌭𑌾𑌪𑌿𑌚𑌂𑌡𑌿𑌲𑍋𑌦𑍍𑌦𑍇𑌶𑌾𑌮𑍍 ।
𑌮𑌾𑌣𑌿𑌕𑍍𑌯𑌮𑌂𑌡𑌪𑌾𑌖𑍍𑌯𑌾𑌂
𑌮𑌹𑌤𑍀𑌮𑌧𑌿𑌹𑍃𑌦𑌯𑌮𑌨𑌿𑌶𑌮𑌾𑌕𑌲𑌯𑍇 ॥ 𑍭3 ॥

𑌤𑌤𑍍𑌰 𑌸𑍍𑌥𑌿𑌤𑌂 𑌪𑍍𑌰𑌸𑌨𑍍𑌨𑌂
𑌤𑌰𑍁𑌣𑌤𑌮𑌾𑌲𑌪𑍍𑌰𑌵𑌾𑌲𑌕𑌿𑌰𑌣𑌾𑌭𑌮𑍍 ।
𑌕𑌰𑍍𑌣𑌾𑌵𑌲𑌂𑌬𑌿𑌕𑍁𑌂𑌡𑌲-
-𑌕𑌂𑌦𑌲𑌿𑌤𑌾𑌭𑍀𑌶𑍁𑌕𑌵𑌚𑌿𑌤𑌕𑌪𑍋𑌲𑌮𑍍 ॥ 𑍭4 ॥

𑌶𑍋𑌣𑌾𑌧𑌰𑌂 𑌶𑍁𑌚𑌿𑌸𑍍𑌮𑌿𑌤-
-𑌮𑍇𑌣𑌾𑌂𑌕𑌵𑌦𑌨𑌮𑍇𑌧𑌮𑌾𑌨𑌕𑍃𑌪𑌮𑍍 ।
𑌮𑍁𑌗𑍍𑌧𑍈𑌣𑌮𑌦𑌵𑌿𑌶𑍇𑌷𑌕-
-𑌮𑍁𑌦𑍍𑌰𑌿𑌤𑌨𑌿𑌟𑌿𑌲𑍇𑌂𑌦𑍁𑌰𑍇𑌖𑌿𑌕𑌾𑌰𑍁𑌚𑌿𑌰𑌮𑍍 ॥ 𑍭5 ॥

𑌨𑌾𑌲𑍀𑌕𑌦𑌲𑌸𑌹𑍋𑌦𑌰-
-𑌨𑌯𑌨𑌾𑌂𑌚𑌲𑌘𑌟𑌿𑌤𑌮𑌨𑌸𑌿𑌜𑌾𑌕𑍂𑌤𑌮𑍍 ।
𑌕𑌮𑌲𑌾𑌕𑌠𑌿𑌨𑌪𑌯𑍋𑌧𑌰-
-𑌕𑌸𑍍𑌤𑍂𑌰𑍀𑌘𑍁𑌸𑍃𑌣𑌪𑌂𑌕𑌿𑌲𑍋𑌰𑌸𑍍𑌕𑌮𑍍 ॥ 𑍭6 ॥

𑌚𑌾𑌂𑌪𑍇𑌯𑌗𑌂𑌧𑌿𑌕𑍈𑌶𑍍𑌯𑌂
𑌶𑌂𑌪𑌾𑌸𑌬𑍍𑌰𑌹𑍍𑌮𑌚𑌾𑌰𑌿𑌕𑍌𑌶𑍇𑌯𑌮𑍍 ।
𑌶𑍍𑌰𑍀𑌵𑌤𑍍𑌸𑌕𑍌𑌸𑍍𑌤𑍁𑌭𑌧𑌰𑌂
𑌶𑍍𑌰𑌿𑌤𑌜𑌨𑌰𑌕𑍍𑌷𑌾𑌧𑍁𑌰𑍀𑌣𑌚𑌰𑌣𑌾𑌬𑍍𑌜𑌮𑍍 ॥ 𑍭𑍭 ॥

𑌕𑌂𑌬𑍁𑌸𑍁𑌦𑌰𑍍𑌶𑌨𑌵𑌿𑌲𑌸-
-𑌤𑍍𑌕𑌰𑌪𑌦𑍍𑌮𑌂 𑌕𑌂𑌠𑌲𑍋𑌲𑌵𑌨𑌮𑌾𑌲𑌮𑍍 ।
𑌮𑍁𑌚𑍁𑌕𑍁𑌂𑌦𑌮𑍋𑌕𑍍𑌷𑌫𑌲𑌦𑌂
𑌮𑍁𑌕𑍁𑌂𑌦𑌮𑌾𑌨𑌂𑌦𑌕𑌂𑌦𑌮𑌵𑌲𑌂𑌬𑍇 ॥ 𑍭𑍮 ॥

𑌤𑌦𑍍𑌵𑌰𑌣𑍋𑌤𑍍𑌤𑌰𑌭𑌾𑌗𑍇
𑌤𑌾𑌰𑌾𑌪𑌤𑌿𑌬𑌿𑌂𑌬𑌚𑍁𑌂𑌬𑌿𑌨𑌿𑌜𑌶𑍃𑌂𑌗𑌃 ।
𑌵𑌿𑌵𑌿𑌧𑌮𑌣𑍀𑌗𑌣𑌘𑌟𑌿𑌤𑍋
𑌵𑌿𑌤𑌰𑌤𑍁 𑌸𑌾𑌲𑍋 𑌵𑌿𑌨𑌿𑌰𑍍𑌮𑌲𑌾𑌂 𑌧𑌿𑌷𑌣𑌾𑌮𑍍 ॥ 𑍭𑍯 ॥

𑌪𑍍𑌰𑌾𑌕𑌾𑌰𑌦𑍍𑌵𑌿𑌤𑌯𑌾𑌂𑌤𑌰-
-𑌕𑌕𑍍𑌷𑍍𑌯𑌾𑌂 𑌪𑍃𑌥𑍁𑌰𑌤𑍍𑌨𑌨𑌿𑌕𑌰𑌸𑌂𑌕𑍀𑌰𑍍𑌣𑌾𑌮𑍍 ।
𑌨𑌮𑌤 𑌸𑌹𑌸𑍍𑌰𑌸𑍍𑌤𑌂𑌭𑌕-
-𑌮𑌂𑌡𑌪𑌨𑌾𑌮𑍍𑌨𑌾𑌤𑌿𑌵𑌿𑌶𑍍𑌰𑍁𑌤𑌾𑌂 𑌭𑍁𑌵𑌨𑍇 ॥ 𑍮0 ॥

𑌪𑍍𑌰𑌣𑍁𑌮𑌸𑍍𑌤𑌤𑍍𑌰 𑌭𑌵𑌾𑌨𑍀-
-𑌸𑌹𑌚𑌰𑌮𑍀𑌶𑌾𑌨𑌮𑌿𑌂𑌦𑍁𑌖𑌂𑌡𑌧𑌰𑌮𑍍 ।
𑌶𑍃𑌂𑌗𑌾𑌰𑌨𑌾𑌯𑌿𑌕𑌾𑌮𑌨𑍁-
-𑌶𑍀𑌲𑌨𑌭𑌾𑌜𑍋𑌽𑌪𑌿 𑌭𑍃𑌂𑌗𑌿𑌨𑌂𑌦𑌿𑌮𑍁𑌖𑌾𑌨𑍍 ॥ 𑍮1 ॥

𑌤𑌸𑍍𑌯𑍈𑌣𑌵𑌾𑌹𑌯𑍋𑌜𑌨-
-𑌦𑍂𑌰𑍇 𑌵𑌂𑌦𑍇 𑌮𑌨𑍋𑌮𑌯𑌂 𑌵𑌪𑍍𑌰𑌮𑍍 ।
𑌅𑌂𑌕𑍂𑌰𑌨𑍍𑌮𑌣𑌿𑌕𑌿𑌰𑌣𑌾-
-𑌮𑌂𑌤𑌰𑌕𑌕𑍍𑌷𑍍𑌯𑌾𑌂 𑌚 𑌨𑌿𑌰𑍍𑌮𑌲𑌾𑌮𑌨𑌯𑍋𑌃 ॥ 𑍮2 ॥

𑌤𑌤𑍍𑌰𑍈𑌵𑌾𑌮𑍃𑌤𑌵𑌾𑌪𑍀𑌂
𑌤𑌰𑌲𑌤𑌰𑌂𑌗𑌾𑌵𑌲𑍀𑌢𑌤𑌟𑌯𑍁𑌗𑍍𑌮𑌾𑌮𑍍 ।
𑌮𑍁𑌕𑍍𑌤𑌾𑌮𑌯𑌕𑌲𑌹𑌂𑌸𑍀-
-𑌮𑍁𑌦𑍍𑌰𑌿𑌤𑌕𑌨𑌕𑌾𑌰𑌵𑌿𑌂𑌦𑌸𑌂𑌦𑍋𑌹𑌾𑌮𑍍 ॥ 𑍮3 ॥

𑌶𑌕𑍍𑌰𑍋𑌪𑌲𑌮𑌯𑌭𑍃𑌂𑌗𑍀-
-𑌸𑌂𑌗𑍀𑌤𑍋𑌨𑍍𑌮𑍇𑌷𑌘𑍋𑌷𑌿𑌤𑌦𑌿𑌗𑌂𑌤𑌾𑌮𑍍 ।
𑌕𑌾𑌂𑌚𑌨𑌮𑌯𑌾𑌂𑌗𑌵𑌿𑌲𑌸-
-𑌤𑍍𑌕𑌾𑌰𑌂𑌡𑌵𑌷𑌂𑌡𑌤𑌾𑌂𑌡𑌵𑌮𑌨𑍋𑌜𑍍𑌞𑌾𑌮𑍍 ॥ 𑍮4 ॥

𑌕𑍁𑌰𑍁𑌵𑌿𑌂𑌦𑌾𑌤𑍍𑌮𑌕𑌹𑌲𑍍𑌲𑌕-
-𑌕𑍋𑌰𑌕𑌸𑍁𑌷𑌮𑌾𑌸𑌮𑍂𑌹𑌪𑌾𑌟𑌲𑌿𑌤𑌾𑌮𑍍 ।
𑌕𑌲𑌯𑍇 𑌸𑍁𑌧𑌾𑌸𑍍𑌵𑌰𑍂𑌪𑌾𑌂
𑌕𑌂𑌦𑌲𑌿𑌤𑌾𑌮𑌂𑌦𑌕𑍈𑌰𑌵𑌾𑌮𑍋𑌦𑌾𑌮𑍍 ॥ 𑍮5 ॥

𑌤𑌦𑍍𑌵𑌾𑌪𑌿𑌕𑌾𑌂𑌤𑌰𑌾𑌲𑍇 𑌤𑌰𑌲𑍇
𑌮𑌣𑌿𑌪𑍋𑌤𑌸𑍀𑌮𑍍𑌨𑌿 𑌵𑌿𑌹𑌰𑌂𑌤𑍀𑌮𑍍 ।
𑌸𑌿𑌂𑌦𑍂𑌰𑌪𑌾𑌟𑌲𑌾𑌂𑌗𑍀𑌂
𑌸𑌿𑌤𑌕𑌿𑌰𑌣𑌾𑌂𑌕𑍂𑌰𑌕𑌲𑍍𑌪𑌿𑌤𑌵𑌤𑌂𑌸𑌾𑌮𑍍 ॥ 𑍮6 ॥

𑌪𑌰𑍍𑌵𑍇𑌂𑌦𑍁𑌬𑌿𑌂𑌬𑌵𑌦𑌨𑌾𑌂
𑌪𑌲𑍍𑌲𑌵𑌶𑍋𑌣𑌾𑌧𑌰𑌸𑍍𑌫𑍁𑌰𑌿𑌤𑌹𑌾𑌸𑌾𑌮𑍍 ।
𑌕𑍁𑌟𑌿𑌲𑌕𑌬𑌰𑍀𑌂 𑌕𑍁𑌰𑌂𑌗𑍀-
-𑌶𑌿𑌶𑍁𑌨𑌯𑌨𑌾𑌂 𑌕𑍁𑌂𑌡𑌲𑌸𑍍𑌫𑍁𑌰𑌿𑌤𑌗𑌂𑌡𑌾𑌮𑍍 ॥ 𑍮𑍭 ॥

𑌨𑌿𑌕𑌟𑌸𑍍𑌥𑌪𑍋𑌤𑌨𑌿𑌲𑌯𑌾𑌃
𑌶𑌕𑍍𑌤𑍀𑌃 𑌶𑌯𑌵𑌿𑌧𑍃𑌤𑌹𑍇𑌮𑌶𑍃𑌂𑌗𑌜𑌲𑍈𑌃 ।
𑌪𑌰𑌿𑌷𑌿𑌂𑌚𑌂𑌤𑍀𑌂 𑌪𑌰𑌿𑌤-
-𑌸𑍍𑌤𑌾𑌰𑌾𑌂 𑌤𑌾𑌰𑍁𑌣𑍍𑌯𑌗𑌰𑍍𑌵𑌿𑌤𑌾𑌂 𑌵𑌂𑌦𑍇 ॥ 𑍮𑍮 ॥

𑌪𑍍𑌰𑌾𑌗𑍁𑌕𑍍𑌤𑌸𑌂𑌖𑍍𑌯𑌯𑍋𑌜𑌨𑌦𑍂𑌰𑍇
𑌪𑍍𑌰𑌣𑌮𑌾𑌮𑌿 𑌬𑍁𑌦𑍍𑌧𑌿𑌮𑌯𑌸𑌾𑌲𑌮𑍍 ।
𑌅𑌨𑌯𑍋𑌰𑌂𑌤𑌰𑌕𑌕𑍍𑌷𑍍𑌯𑌾-
-𑌮𑌷𑍍𑌟𑌾𑌪𑌦𑌪𑍁𑌷𑍍𑌟𑌮𑍇𑌦𑌿𑌨𑍀𑌂 𑌰𑍁𑌚𑌿𑌰𑌾𑌮𑍍 ॥ 𑍮𑍯 ॥

𑌕𑌾𑌦𑌂𑌬𑌰𑍀𑌨𑌿𑌧𑌾𑌨𑌾𑌂
𑌕𑌲𑌯𑌾𑌮𑍍𑌯𑌾𑌨𑌂𑌦𑌵𑌾𑌪𑌿𑌕𑌾𑌂 𑌤𑌸𑍍𑌯𑌾𑌮𑍍 ।
𑌶𑍋𑌣𑌾𑌶𑍍𑌮𑌨𑌿𑌵𑌹𑌨𑌿𑌰𑍍𑌮𑌿𑌤-
-𑌸𑍋𑌪𑌾𑌨𑌶𑍍𑌰𑍇𑌣𑌿𑌶𑍋𑌭𑌮𑌾𑌨𑌤𑌟𑍀𑌮𑍍 ॥ 𑍯0 ॥

𑌮𑌾𑌣𑌿𑌕𑍍𑌯𑌤𑌰𑌣𑌿𑌨𑌿𑌲𑌯𑌾𑌂
𑌮𑌧𑍍𑌯𑍇 𑌤𑌸𑍍𑌯𑌾 𑌮𑌦𑌾𑌰𑍁𑌣𑌕𑌪𑍋𑌲𑌾𑌮𑍍 ।
𑌅𑌮𑍃𑌤𑍇𑌶𑍀𑌤𑍍𑌯𑌭𑌿𑌧𑌾𑌨𑌾-
-𑌮𑌂𑌤𑌃 𑌕𑌲𑌯𑌾𑌮𑌿 𑌵𑌾𑌰𑍁𑌣𑍀𑌂 𑌦𑍇𑌵𑍀𑌮𑍍 ॥ 𑍯1 ॥

𑌸𑍌𑌵𑌰𑍍𑌣𑌕𑍇𑌨𑌿𑌪𑌾𑌤𑌨-
-𑌹𑌸𑍍𑌤𑌾𑌃 𑌸𑍌𑌂𑌦𑌰𑍍𑌯𑌗𑌰𑍍𑌵𑌿𑌤𑌾 𑌦𑍇𑌵𑍍𑌯𑌃 ।
𑌤𑌤𑍍𑌪𑍁𑌰𑌤𑌃 𑌸𑍍𑌥𑌿𑌤𑌿𑌭𑌾𑌜𑍋
𑌵𑌿𑌤𑌰𑌂𑌤𑍍𑌵𑌸𑍍𑌮𑌾𑌕𑌮𑌾𑌯𑍁𑌷𑍋 𑌵𑍃𑌦𑍍𑌧𑌿𑌮𑍍 ॥ 𑍯2 ॥

𑌤𑌸𑍍𑌯 𑌪𑍃𑌷𑌦𑌶𑍍𑌵𑌯𑍋𑌜𑌨-
-𑌦𑍂𑌰𑍇𑌽𑌹𑌂𑌕𑌾𑌰𑌸𑌾𑌲𑌮𑌤𑌿𑌤𑍁𑌂𑌗𑌮𑍍 ।
𑌵𑌂𑌦𑍇 𑌤𑌯𑍋𑌶𑍍𑌚 𑌮𑌧𑍍𑌯𑍇
𑌕𑌕𑍍𑌷𑍍𑌯𑌾𑌂 𑌵𑌲𑌮𑌾𑌨𑌮𑌲𑌯𑌪𑌵𑌮𑌾𑌨𑌾𑌮𑍍 ॥ 𑍯3 ॥

𑌵𑌿𑌨𑍁𑌮𑍋 𑌵𑌿𑌮𑌰𑍍𑌶𑌵𑌾𑌪𑍀𑌂
𑌸𑍌𑌷𑍁𑌮𑍍𑌨𑌸𑍁𑌧𑌾𑌸𑍍𑌵𑌰𑍂𑌪𑌿𑌣𑍀𑌂 𑌤𑌤𑍍𑌰 ।
𑌵𑍇𑌲𑌾𑌤𑌿𑌲𑌂𑌘𑍍𑌯𑌵𑍀𑌚𑍀-
-𑌕𑍋𑌲𑌾𑌹𑌲𑌭𑌰𑌿𑌤𑌕𑍂𑌲𑌵𑌨𑌵𑌾𑌟𑍀𑌮𑍍 ॥ 𑍯4 ॥

𑌤𑌤𑍍𑌰𑍈𑌵 𑌸𑌲𑌿𑌲𑌮𑌧𑍍𑌯𑍇
𑌤𑌾𑌪𑌿𑌂𑌛𑌦𑌲𑌪𑍍𑌰𑌪𑌂𑌚𑌸𑍁𑌷𑌮𑌾𑌭𑌾𑌮𑍍 ।
𑌶𑍍𑌯𑌾𑌮𑌲𑌕𑌂𑌚𑍁𑌕𑌲𑌸𑌿𑌤𑌾𑌂
𑌶𑍍𑌯𑌾𑌮𑌾𑌵𑌿𑌟𑌬𑌿𑌂𑌬𑌡𑌂𑌬𑌰𑌹𑌰𑌾𑌸𑍍𑌯𑌾𑌮𑍍 ॥ 𑍯5 ॥

𑌆𑌭𑍁𑌗𑍍𑌨𑌮𑌸𑍃𑌣𑌚𑌿𑌲𑍍𑌲𑍀-
-𑌹𑌸𑌿𑌤𑌾𑌯𑍁𑌗𑍍𑌮𑌶𑌰𑌕𑌾𑌰𑍍𑌮𑍁𑌕𑌵𑌿𑌲𑌾𑌸𑌾𑌮𑍍 ।
𑌮𑌂𑌦𑌸𑍍𑌮𑌿𑌤𑌾𑌂𑌚𑌿𑌤𑌮𑍁𑌖𑍀𑌂
𑌮𑌣𑌿𑌮𑌯𑌤𑌾𑌟𑌂𑌕𑌮𑌂𑌡𑌿𑌤𑌕𑌪𑍋𑌲𑌾𑌮𑍍 ॥ 𑍯6 ॥

𑌕𑍁𑌰𑍁𑌵𑌿𑌂𑌦𑌤𑌰𑌣𑌿𑌨𑌿𑌲𑌯𑌾𑌂
𑌕𑍁𑌲𑌾𑌚𑌲𑌸𑍍𑌪𑌰𑍍𑌧𑌿𑌕𑍁𑌚𑌨𑌮𑌨𑍍𑌮𑌧𑍍𑌯𑌾𑌮𑍍 ।
𑌕𑍁𑌂𑌕𑍁𑌮𑌵𑌿𑌲𑌿𑌪𑍍𑌤𑌗𑌾𑌤𑍍𑌰𑍀𑌂
𑌕𑍁𑌰𑍁𑌕𑍁𑌲𑍍𑌲𑌾𑌂 𑌮𑌨𑌸𑌿 𑌕𑍁𑌰𑍍𑌮𑌹𑍇 𑌸𑌤𑌤𑌮𑍍 ॥ 𑍯𑍭 ॥

𑌤𑌤𑍍𑌸𑌾𑌲𑍋𑌤𑍍𑌤𑌰𑌭𑌾𑌗𑍇
𑌭𑌾𑌨𑍁𑌮𑌯𑌂 𑌵𑌪𑍍𑌰𑌮𑌾𑌶𑍍𑌰𑌯𑍇 𑌦𑍀𑌪𑍍𑌤𑌮𑍍 ।
𑌮𑌧𑍍𑌯𑌂 𑌚 𑌵𑌿𑌪𑍁𑌲𑌮𑌨𑌯𑍋-
-𑌰𑍍𑌮𑌨𑍍𑌯𑍇 𑌵𑌿𑌶𑍍𑌰𑌾𑌂𑌤𑌮𑌾𑌤𑌪𑍋𑌦𑍍𑌗𑌾𑌰𑌮𑍍 ॥ 𑍯𑍮 ॥

𑌤𑌤𑍍𑌰 𑌕𑍁𑌰𑍁𑌵𑌿𑌂𑌦𑌪𑍀𑌠𑍇
𑌤𑌾𑌮𑌰𑌸𑍇 𑌕𑌨𑌕𑌕𑌰𑍍𑌣𑌿𑌕𑌾𑌘𑌟𑌿𑌤𑍇 ।
𑌆𑌸𑍀𑌨𑌮𑌰𑍁𑌣𑌵𑌾𑌸𑌸-
-𑌮𑌮𑍍𑌲𑌾𑌨𑌪𑍍𑌰𑌸𑌵𑌮𑌾𑌲𑌿𑌕𑌾𑌭𑌰𑌣𑌮𑍍 ॥ 𑍯𑍯 ॥

𑌚𑌕𑍍𑌷𑍁𑌷𑍍𑌮𑌤𑍀𑌪𑍍𑌰𑌕𑌾𑌶𑌨-
-𑌶𑌕𑍍𑌤𑌿𑌚𑍍𑌛𑌾𑌯𑌾𑌸𑌮𑌾𑌰𑌚𑌿𑌤𑌕𑍇𑌲𑌿𑌮𑍍 ।
𑌮𑌾𑌣𑌿𑌕𑍍𑌯𑌮𑍁𑌕𑍁𑌟𑌰𑌮𑍍𑌯𑌂
𑌮𑌨𑍍𑌯𑍇 𑌮𑌾𑌰𑍍𑌤𑌾𑌂𑌡𑌭𑍈𑌰𑌵𑌂 𑌹𑍃𑌦𑌯𑍇 ॥ 100 ॥

𑌇𑌂𑌦𑍁𑌮𑌯𑌸𑌾𑌲𑌮𑍀𑌡𑍇
𑌤𑌸𑍍𑌯𑍋𑌤𑍍𑌤𑌰𑌤𑌸𑍍𑌤𑍁𑌷𑌾𑌰𑌗𑌿𑌰𑌿𑌗𑍌𑌰𑌮𑍍 ।
𑌅𑌤𑍍𑌯𑌂𑌤𑌶𑌿𑌶𑌿𑌰𑌮𑌾𑌰𑍁𑌤-
-𑌮𑌨𑌯𑍋𑌰𑍍𑌮𑌧𑍍𑌯𑌂 𑌚 𑌚𑌂𑌦𑍍𑌰𑌿𑌕𑍋𑌦𑍍𑌗𑌾𑌰𑌮𑍍 ॥ 101 ॥

𑌤𑌤𑍍𑌰 𑌪𑍍𑌰𑌕𑌾𑌶𑌮𑌾𑌨𑌂
𑌤𑌾𑌰𑌾𑌨𑌿𑌕𑌰𑍈𑌃 𑌪𑌰𑌿𑌷𑍍𑌕𑍃𑌤𑍋𑌦𑍍𑌦𑍇𑌶𑌮𑍍 ।
𑌅𑌮𑍃𑌤𑌮𑌯𑌕𑌾𑌂𑌤𑌿𑌕𑌂𑌦𑌲-
-𑌮𑌂𑌤𑌃 𑌕𑌲𑌯𑌾𑌮𑌿 𑌕𑍁𑌂𑌦𑌸𑌿𑌤𑌮𑌿𑌂𑌦𑍁𑌮𑍍 ॥ 102 ॥

𑌶𑍃𑌂𑌗𑌾𑌰𑌸𑌾𑌲𑌮𑍀𑌡𑍇
𑌶𑍃𑌂𑌗𑍋𑌲𑍍𑌲𑌸𑌿𑌤𑌂 𑌤𑌦𑍁𑌤𑍍𑌤𑌰𑍇 𑌭𑌾𑌗𑍇 ।
𑌮𑌧𑍍𑌯𑌸𑍍𑌥𑌲𑍇 𑌤𑌯𑍋𑌰𑌪𑌿
𑌮𑌹𑌿𑌤𑌾𑌂 𑌶𑍃𑌂𑌗𑌾𑌰𑌪𑍂𑌰𑍍𑌵𑌿𑌕𑌾𑌂 𑌪𑌰𑌿𑌖𑌾𑌮𑍍 ॥ 103 ॥

𑌤𑌤𑍍𑌰 𑌮𑌣𑌿𑌨𑍌𑌸𑍍𑌥𑌿𑌤𑌾𑌭𑌿-
-𑌸𑍍𑌤𑌪𑌨𑍀𑌯𑌾𑌵𑌿𑌰𑌚𑌿𑌤𑌾𑌗𑍍𑌰𑌹𑌸𑍍𑌤𑌾𑌭𑌿𑌃 ।
𑌶𑍃𑌂𑌗𑌾𑌰𑌦𑍇𑌵𑌤𑌾𑌭𑌿𑌃
𑌸𑌹𑌿𑌤𑌂 𑌪𑌰𑌿𑌖𑌾𑌧𑌿𑌪𑌂 𑌭𑌜𑍇 𑌮𑌦𑌨𑌮𑍍 ॥ 104 ॥

𑌶𑍃𑌂𑌗𑌾𑌰𑌵𑌰𑌣𑌵𑌰𑍍𑌯𑌸𑍍𑌯𑍋𑌤𑍍𑌤𑌰𑌤𑌃
𑌸𑌕𑌲𑌵𑌿𑌬𑍁𑌧𑌸𑌂𑌸𑍇𑌵𑍍𑌯𑌮𑍍 ।
𑌚𑌿𑌂𑌤𑌾𑌮𑌣𑌿𑌗𑌣𑌰𑌚𑌿𑌤𑌂
𑌚𑌿𑌂𑌤𑌾𑌂 𑌦𑍂𑌰𑍀𑌕𑌰𑍋𑌤𑍁 𑌮𑍇 𑌸𑌦𑌨𑌮𑍍 ॥ 105 ॥

𑌮𑌣𑌿𑌸𑌦𑌨𑌸𑌾𑌲𑌯𑍋𑌰𑌧𑌿-
-𑌮𑌧𑍍𑌯𑌂 𑌦𑌶𑌤𑌾𑌲𑌭𑍂𑌮𑌿𑌰𑍁𑌹𑌦𑍀𑌰𑍍𑌘𑍈𑌃 ।
𑌪𑌰𑍍𑌣𑍈𑌃 𑌸𑍁𑌵𑌰𑍍𑌣𑌵𑌰𑍍𑌣𑍈-
-𑌰𑍍𑌯𑍁𑌕𑍍𑌤𑌾𑌂 𑌕𑌾𑌂𑌡𑍈𑌶𑍍𑌚 𑌯𑍋𑌜𑌨𑍋𑌤𑍍𑌤𑍁𑌂𑌗𑍈𑌃 ॥ 106 ॥

𑌮𑍃𑌦𑍁𑌲𑍈𑌸𑍍𑌤𑌾𑌲𑍀𑌪𑌂𑌚𑌕-
-𑌮𑌾𑌨𑍈𑌰𑍍𑌮𑌿𑌲𑌿𑌤𑌾𑌂 𑌚 𑌕𑍇𑌸𑌰𑌕𑌦𑌂𑌬𑍈𑌃 ।
𑌸𑌂𑌤𑌤𑌗𑌲𑌿𑌤𑌮𑌰𑌂𑌦-
-𑌸𑍍𑌰𑍋𑌤𑍋𑌨𑌿𑌰𑍍𑌯𑌨𑍍𑌮𑌿𑌲𑌿𑌂𑌦𑌸𑌂𑌦𑍋𑌹𑌾𑌮𑍍 ॥ 10𑍭 ॥

𑌪𑌾𑌟𑍀𑌰𑌪𑌵𑌨𑌬𑌾𑌲𑌕-
-𑌧𑌾𑌟𑍀𑌨𑌿𑌰𑍍𑌯𑌤𑍍𑌪𑌰𑌾𑌗𑌪𑌿𑌂𑌜𑌰𑌿𑌤𑌾𑌮𑍍 ।
𑌕𑌲𑌹𑌂𑌸𑍀𑌕𑍁𑌲𑌕𑌲𑌕𑌲-
-𑌕𑍂𑌲𑌂𑌕𑌷𑌨𑌿𑌨𑌦𑌨𑌿𑌚𑌯𑌕𑌮𑌨𑍀𑌯𑌾𑌮𑍍 ॥ 10𑍮 ॥

𑌪𑌦𑍍𑌮𑌾𑌟𑌵𑍀𑌂 𑌭𑌜𑌾𑌮𑌃
𑌪𑌰𑌿𑌮𑌲𑌕𑌲𑍍𑌲𑍋𑌲𑌪𑌕𑍍𑌷𑍍𑌮𑌲𑍋𑌪𑌾𑌂𑌤𑌾𑌮𑍍 ।
[ 𑌦𑍇𑌵𑍍𑌯𑌰𑍍𑌘𑍍𑌯𑌪𑌾𑌤𑍍𑌰𑌧𑌾𑌰𑍀
𑌤𑌸𑍍𑌯𑌾𑌃 𑌪𑍂𑌰𑍍𑌵𑌦𑌿𑌶𑌿 𑌦𑌶𑌕𑌲𑌾𑌯𑍁𑌕𑍍𑌤𑌃 । ]
𑌵𑌲𑌯𑌿𑌤𑌮𑍂𑌰𑍍𑌤𑌿𑌰𑍍𑌭𑌗𑌵𑌾-
-𑌨𑍍𑌵𑌹𑍍𑌨𑌿𑌃 𑌕𑍍𑌰𑍋𑌶𑍋𑌨𑍍𑌨𑌤𑌶𑍍𑌚𑌿𑌰𑌂 𑌪𑌾𑌯𑌾𑌤𑍍 ॥ 10𑍯 ॥

𑌤𑌤𑍍𑌰𑌾𑌧𑌾𑌰𑍇 𑌦𑍇𑌵𑍍𑌯𑌾𑌃
𑌪𑌾𑌤𑍍𑌰𑍀𑌰𑍂𑌪𑌃 𑌪𑍍𑌰𑌭𑌾𑌕𑌰𑌃 𑌶𑍍𑌰𑍀𑌮𑌾𑌨𑍍 ।
𑌦𑍍𑌵𑌾𑌦𑌶𑌕𑌲𑌾𑌸𑌮𑍇𑌤𑍋
𑌧𑍍𑌵𑌾𑌂𑌤𑌂 𑌮𑌮 𑌬𑌹𑍁𑌲𑌮𑌾𑌂𑌤𑌰𑌂 𑌭𑌿𑌂𑌦𑍍𑌯𑌾𑌤𑍍 ॥ 110 ॥

𑌤𑌸𑍍𑌮𑌿𑌨𑍍 𑌦𑌿𑌨𑍇𑌶𑌪𑌾𑌤𑍍𑌰𑍇
𑌤𑌰𑌂𑌗𑌿𑌤𑌾𑌮𑍋𑌦𑌮𑌮𑍃𑌤𑌮𑌯𑌮𑌰𑍍𑌘𑍍𑌯𑌮𑍍 ।
𑌚𑌂𑌦𑍍𑌰𑌕𑌲𑌾𑌤𑍍𑌮𑌕𑌮𑌮𑍃𑌤𑌂
𑌸𑌾𑌂𑌦𑍍𑌰𑍀𑌕𑍁𑌰𑍍𑌯𑌾𑌦𑌮𑌂𑌦𑌮𑌾𑌨𑌂𑌦𑌮𑍍 ॥ 111 ॥

𑌅𑌮𑍃𑌤𑍇 𑌤𑌸𑍍𑌮𑌿𑌨𑍍𑌨𑌭𑌿𑌤𑍋
𑌵𑌿𑌹𑌰𑌂𑌤𑍍𑌯𑍋 𑌵𑌿𑌵𑌿𑌧𑌮𑌣𑌿𑌤𑌰𑌣𑌿𑌭𑌾𑌜𑌃 ।
𑌷𑍋𑌡𑌶 𑌕𑌲𑌾𑌃 𑌸𑍁𑌧𑌾𑌂𑌶𑍋𑌃
𑌶𑍋𑌕𑌾𑌦𑍁𑌤𑍍𑌤𑌾𑌰𑌯𑌂𑌤𑍁 𑌮𑌾𑌮𑌨𑌿𑌶𑌮𑍍 ॥ 112 ॥

𑌤𑌤𑍍𑌰𑍈𑌵 𑌵𑌿𑌹𑍃𑌤𑌿𑌭𑌾𑌜𑍋
𑌧𑌾𑌤𑍃𑌮𑍁𑌖𑌾𑌨𑌾𑌂 𑌚 𑌕𑌾𑌰𑌣𑍇𑌶𑌾𑌨𑌾𑌮𑍍 ।
𑌸𑍃𑌷𑍍𑌟𑍍𑌯𑌾𑌦𑌿𑌰𑍂𑌪𑌿𑌕𑌾𑌸𑍍𑌤𑌾𑌃
𑌶𑌮𑌯𑌂𑌤𑍍𑌵𑌖𑌿𑌲𑌾𑌃 𑌕𑌲𑌾𑌶𑍍𑌚 𑌸𑌂𑌤𑌾𑌪𑌮𑍍 ॥ 113 ॥

𑌕𑍀𑌨𑌾𑌶𑌵𑌰𑍁𑌣𑌕𑌿𑌨𑍍𑌨𑌰-
-𑌰𑌾𑌜𑌦𑌿𑌗𑌂𑌤𑍇𑌷𑍁 𑌰𑌤𑍍𑌨𑌗𑍇𑌹𑌸𑍍𑌯 ।
𑌕𑌲𑌯𑌾𑌮𑌿 𑌤𑌾𑌨𑍍𑌯𑌜𑌸𑍍𑌰𑌂
𑌕𑌲𑌯𑌂𑌤𑍍𑌵𑌾𑌯𑍁𑌷𑍍𑌯𑌮𑌰𑍍𑌘𑍍𑌯𑌪𑌾𑌤𑍍𑌰𑌾𑌣𑌿 ॥ 114 ॥

𑌪𑌾𑌤𑍍𑌰𑌸𑍍𑌥𑌲𑌸𑍍𑌯 𑌪𑍁𑌰𑌤𑌃
𑌪𑌦𑍍𑌮𑌾𑌰𑌮𑌣𑌵𑌿𑌧𑌿𑌪𑌾𑌰𑍍𑌵𑌤𑍀𑌶𑌾𑌨𑌾𑌮𑍍 ।
𑌭𑌵𑌨𑌾𑌨𑌿 𑌶𑌰𑍍𑌮𑌣𑍇 𑌨𑍋
𑌭𑌵𑌂𑌤𑍁 𑌭𑌾𑌸𑌾 𑌪𑍍𑌰𑌦𑍀𑌪𑌿𑌤𑌜𑌗𑌂𑌤𑌿 ॥ 115 ॥

𑌸𑌦𑌨𑌸𑍍𑌯𑌾𑌨𑌲𑌕𑍋𑌣𑍇
𑌸𑌤𑌤𑌂 𑌪𑍍𑌰𑌣𑌮𑌾𑌮𑌿 𑌕𑍁𑌂𑌡𑌮𑌾𑌗𑍍𑌨𑍇𑌯𑌮𑍍 ।
𑌤𑌤𑍍𑌰 𑌸𑍍𑌥𑌿𑌤𑌂 𑌚 𑌵𑌹𑍍𑌨𑌿𑌂
𑌤𑌰𑌲𑌶𑌿𑌖𑌾𑌜𑌟𑌿𑌲𑌮𑌂𑌬𑌿𑌕𑌾𑌜𑌨𑌕𑌮𑍍 ॥ 116 ॥

𑌤𑌸𑍍𑌯𑌾𑌸𑍁𑌰𑌦𑌿𑌶𑌿 𑌤𑌾𑌦𑍃𑌶-
-𑌰𑌤𑍍𑌨𑌪𑌰𑌿𑌸𑍍𑌫𑍁𑌰𑌿𑌤𑌪𑌰𑍍𑌵𑌨𑌵𑌕𑌾𑌢𑍍𑌯𑌮𑍍 ।
𑌚𑌕𑍍𑌰𑌾𑌤𑍍𑌮𑌕𑌂 𑌶𑌤𑌾𑌂𑌗𑌂
𑌶𑌤𑌯𑍋𑌜𑌨𑌮𑍁𑌨𑍍𑌨𑌤𑌂 𑌭𑌜𑍇 𑌦𑌿𑌵𑍍𑌯𑌮𑍍 ॥ 11𑍭 ॥

𑌤𑌤𑍍𑌰𑍈𑌵 𑌦𑌿𑌶𑌿 𑌨𑌿𑌷𑌣𑍍𑌣𑌂
𑌤𑌪𑌨𑍀𑌯𑌧𑍍𑌵𑌜𑌪𑌰𑌂𑌪𑌰𑌾𑌶𑍍𑌲𑌿𑌷𑍍𑌟𑌮𑍍 ।
𑌰𑌥𑌮𑌪𑌰𑌂 𑌚 𑌭𑌵𑌾𑌨𑍍𑌯𑌾
𑌰𑌚𑌯𑌾𑌮𑍋 𑌮𑌨𑌸𑌿 𑌰𑌤𑍍𑌨𑌮𑌯𑌚𑍂𑌡𑌮𑍍 ॥ 11𑍮 ॥

𑌭𑌵𑌨𑌸𑍍𑌯 𑌵𑌾𑌯𑍁𑌭𑌾𑌗𑍇
𑌪𑌰𑌿𑌷𑍍𑌕𑍃𑌤𑍋 𑌵𑌿𑌵𑌿𑌧𑌵𑍈𑌜𑌯𑌂𑌤𑍀𑌭𑌿𑌃 ।
𑌰𑌚𑌯𑌤𑍁 𑌮𑍁𑌦𑌂 𑌰𑌥𑍇𑌂𑌦𑍍𑌰𑌃
𑌸𑌚𑌿𑌵𑍇𑌶𑌾𑌨𑍍𑌯𑌾𑌃 𑌸𑌮𑌸𑍍𑌤𑌵𑌂𑌦𑍍𑌯𑌾𑌯𑌾𑌃 ॥ 11𑍯 ॥

𑌕𑍁𑌰𑍍𑌮𑍋𑌽𑌧𑌿𑌹𑍃𑌦𑌯𑌮𑌨𑌿𑌶𑌂
𑌕𑍍𑌰𑍋𑌡𑌾𑌸𑍍𑌯𑌾𑌯𑌾𑌃 𑌶𑌤𑌾𑌂𑌗𑌮𑍂𑌰𑍍𑌧𑌨𑍍𑌯𑌮𑍍 ।
𑌰𑍁𑌦𑍍𑌰𑌦𑌿𑌶𑌿 𑌰𑌤𑍍𑌨𑌧𑌾𑌮𑍍𑌨𑍋
𑌰𑍁𑌚𑌿𑌰𑌶𑌲𑌾𑌕𑌾𑌪𑍍𑌰𑌪𑌂𑌚𑌕𑌂𑌚𑍁𑌕𑌿𑌤𑌮𑍍 ॥ 120 ॥

𑌪𑌰𑌿𑌤𑍋 𑌦𑍇𑌵𑍀𑌧𑌾𑌮𑍍𑌨𑌃
𑌪𑍍𑌰𑌣𑍀𑌤𑌵𑌾𑌸𑌾 𑌮𑌨𑍁𑌸𑍍𑌵𑌰𑍂𑌪𑌿𑌣𑍍𑌯𑌃 ।
𑌕𑍁𑌰𑍍𑌵𑌂𑌤𑍁 𑌰𑌶𑍍𑌮𑌿𑌮𑌾𑌲𑌾-
-𑌕𑍃𑌤𑌯𑌃 𑌕𑍁𑌶𑌲𑌾𑌨𑌿 𑌦𑍇𑌵𑌤𑌾 𑌨𑌿𑌖𑌿𑌲𑌾𑌃 ॥ 121 ॥

𑌪𑍍𑌰𑌾𑌗𑍍𑌦𑍍𑌵𑌾𑌰𑌸𑍍𑌯 𑌭𑌵𑌾𑌨𑍀-
-𑌧𑌾𑌮𑍍𑌨𑌃 𑌪𑌾𑌰𑍍𑌶𑍍𑌵𑌦𑍍𑌵𑌯𑌾𑌰𑌚𑌿𑌤𑌵𑌾𑌸𑍇 ।
𑌮𑌾𑌤𑌂𑌗𑍀𑌕𑌿𑌟𑌿𑌮𑍁𑌖𑍍𑌯𑍌
𑌮𑌣𑌿𑌸𑌦𑌨𑍇 𑌮𑌨𑌸𑌿 𑌭𑌾𑌵𑌯𑌾𑌮𑌿 𑌚𑌿𑌰𑌮𑍍 ॥ 122 ॥

𑌯𑍋𑌜𑌨𑌯𑍁𑌗𑌲𑌾𑌭𑍋𑌗𑌾
𑌤𑌤𑍍𑌕𑍍𑌰𑍋𑌶𑌪𑌰𑌿𑌣𑌾𑌹𑌯𑍈𑌵 𑌭𑌿𑌤𑍍𑌤𑍍𑌯𑌾 𑌚 ।
𑌚𑌿𑌂𑌤𑌾𑌮𑌣𑌿𑌗𑍃𑌹𑌭𑍂𑌮𑌿-
-𑌰𑍍𑌜𑍀𑌯𑌾𑌦𑌾𑌮𑍍𑌨𑌾𑌯𑌮𑌯𑌚𑌤𑍁𑌰𑍍𑌦𑍍𑌵𑌾𑌰𑌾 ॥ 123 ॥

𑌦𑍍𑌵𑌾𑌰𑍇 𑌦𑍍𑌵𑌾𑌰𑍇 𑌧𑌾𑌮𑍍𑌨𑌃
𑌪𑌿𑌂𑌡𑍀𑌭𑍂𑌤𑌾 𑌨𑌵𑍀𑌨𑌬𑌿𑌂𑌬𑌾𑌭𑌾𑌃 ।
𑌵𑌿𑌦𑌧𑌤𑍁 𑌵𑌿𑌪𑍁𑌲𑌾𑌂 𑌕𑍀𑌰𑍍𑌤𑌿𑌂
𑌦𑌿𑌵𑍍𑌯𑌾 𑌲𑍌𑌹𑌿𑌤𑍍𑌯𑌸𑌿𑌦𑍍𑌧𑍍𑌯𑍋 𑌦𑍇𑌵𑍍𑌯𑌃 ॥ 124 ॥

𑌮𑌣𑌿𑌸𑌦𑌨𑌸𑍍𑌯𑌾𑌂𑌤𑌰𑌤𑍋
𑌮𑌹𑌨𑍀𑌯𑍇 𑌰𑌤𑍍𑌨𑌵𑍇𑌦𑌿𑌕𑌾𑌮𑌧𑍍𑌯𑍇 ।
𑌬𑌿𑌂𑌦𑍁𑌮𑌯𑌚𑌕𑍍𑌰𑌮𑍀𑌡𑍇
𑌪𑍀𑌠𑌾𑌨𑌾𑌮𑍁𑌪𑌰𑌿 𑌵𑌿𑌰𑌚𑌿𑌤𑌾𑌵𑌾𑌸𑌮𑍍 ॥ 125 ॥

𑌚𑌕𑍍𑌰𑌾𑌣𑌾𑌂 𑌸𑌕𑌲𑌾𑌨𑌾𑌂
𑌪𑍍𑌰𑌥𑌮𑌮𑌧𑌃 𑌸𑍀𑌮𑌫𑌲𑌕𑌵𑌾𑌸𑍍𑌤𑌵𑍍𑌯𑌾𑌃 ।
𑌅𑌣𑌿𑌮𑌾𑌦𑌿𑌸𑌿𑌦𑍍𑌧𑌯𑍋 𑌮𑌾-
-𑌮𑌵𑌂𑌤𑍁 𑌦𑍇𑌵𑍀 𑌪𑍍𑌰𑌭𑌾𑌸𑍍𑌵𑌰𑍂𑌪𑌿𑌣𑍍𑌯𑌃 ॥ 126 ॥

𑌅𑌣𑌿𑌮𑌾𑌦𑌿𑌸𑌿𑌦𑍍𑌧𑌿𑌫𑌲𑌕-
-𑌸𑍍𑌯𑍋𑌪𑌰𑌿𑌹𑌰𑌿𑌣𑌾𑌂𑌕𑌖𑌂𑌡𑌕𑍃𑌤𑌚𑍂𑌡𑌾𑌃 ।
𑌭𑌦𑍍𑌰𑌂 𑌪𑌕𑍍𑌷𑍍𑌮𑌲𑌯𑌂𑌤𑍁
𑌬𑍍𑌰𑌾𑌹𑍍𑌮𑍀𑌪𑍍𑌰𑌮𑍁𑌖𑌾𑌶𑍍𑌚 𑌮𑌾𑌤𑌰𑍋𑌽𑌸𑍍𑌮𑌾𑌕𑌮𑍍 ॥ 12𑍭 ॥

𑌤𑌸𑍍𑌯𑍋𑌪𑌰𑌿 𑌮𑌣𑌿𑌫𑌲𑌕𑍇
𑌤𑌾𑌰𑍁𑌣𑍍𑌯𑍋𑌤𑍍𑌤𑍁𑌂𑌗𑌪𑍀𑌨𑌕𑍁𑌚𑌭𑌾𑌰𑌾𑌃 ।
𑌸𑌂𑌕𑍍𑌷𑍋𑌭𑌿𑌣𑍀𑌪𑍍𑌰𑌧𑌾𑌨𑌾𑌃
𑌭𑍍𑌰𑌾𑌂𑌤𑌿 𑌵𑌿𑌦𑍍𑌰𑌾𑌵𑌯𑌂𑌤𑍁 𑌦𑌶 𑌮𑍁𑌦𑍍𑌰𑌾𑌃 ॥ 12𑍮 ॥

𑌫𑌲𑌕𑌤𑍍𑌰𑌯𑌸𑍍𑌵𑌰𑍂𑌪𑍇
𑌪𑍃𑌥𑍁𑌲𑍇 𑌤𑍍𑌰𑍈𑌲𑍋𑌕𑍍𑌯𑌮𑍋𑌹𑌨𑍇 𑌚𑌕𑍍𑌰𑍇 ।
𑌦𑍀𑌵𑍍𑌯𑌂𑌤𑍁 𑌪𑍍𑌰𑌕𑌟𑌾𑌖𑍍𑌯𑌾-
-𑌸𑍍𑌤𑌾𑌸𑌾𑌂 𑌕𑌰𑍍𑌤𑍍𑌰𑍀𑌂 𑌚 𑌭𑌗𑌵𑌤𑍀 𑌤𑍍𑌰𑌿𑌪𑍁𑌰𑌾 ॥ 12𑍯 ॥

𑌤𑌦𑍁𑌪𑌰𑌿 𑌵𑌿𑌪𑍁𑌲𑍇 𑌧𑌿𑌷𑍍𑌣𑍍𑌯𑍇
𑌤𑌰𑌲𑌦𑍃𑌶𑌸𑍍𑌤𑌰𑍁𑌣𑌕𑍋𑌕𑌨𑌦𑌭𑌾𑌸𑌃 ।
𑌕𑌾𑌮𑌾𑌕𑌰𑍍𑌷𑌿𑌣𑍍𑌯𑌾𑌦𑍍𑌯𑌾𑌃
𑌕𑌲𑌯𑍇 𑌦𑍇𑌵𑍀𑌃 𑌕𑌲𑌾𑌧𑌰𑌶𑌿𑌖𑌂𑌡𑌾𑌃 ॥ 130 ॥

𑌸𑌰𑍍𑌵𑌾𑌶𑌾𑌪𑌰𑌿𑌪𑍂𑌰𑌕𑌚𑌕𑍍𑌰𑍇-
-𑌽𑌸𑍍𑌮𑌿𑌨𑍍 𑌗𑍁𑌪𑍍𑌤𑌯𑍋𑌗𑌿𑌨𑍀𑌸𑍇𑌵𑍍𑌯𑌾𑌃 ।
𑌤𑍍𑌰𑌿𑌪𑍁𑌰𑍇𑌶𑍀 𑌮𑌮 𑌦𑍁𑌰𑌿𑌤𑌂
𑌤𑍁𑌦𑍍𑌯𑌾𑌤𑍍 𑌕𑌂𑌠𑌾𑌵𑌲𑌂𑌬𑌿𑌮𑌣𑌿𑌹𑌾𑌰𑌾 ॥ 131 ॥

𑌤𑌸𑍍𑌯𑍋𑌪𑌰𑌿 𑌮𑌣𑌿𑌪𑍀𑌠𑍇
𑌤𑌾𑌮𑍍𑌰𑌾𑌂𑌭𑍋𑌰𑍁𑌹𑌦𑌲𑌪𑍍𑌰𑌭𑌾𑌶𑍋𑌣𑌾𑌃 ।
𑌧𑍍𑌯𑌾𑌯𑌾𑌮𑍍𑌯𑌨𑌂𑌗𑌕𑍁𑌸𑍁𑌮𑌾-
-𑌪𑍍𑌰𑌮𑍁𑌖𑌾 𑌦𑍇𑌵𑍀𑌶𑍍𑌚 𑌵𑌿𑌧𑍃𑌤𑌕𑍂𑌰𑍍𑌪𑌾𑌸𑌾𑌃 ॥ 132 ॥

𑌸𑌂𑌕𑍍𑌷𑍋𑌭𑌕𑌾𑌰𑌕𑍇𑌽𑌸𑍍𑌮𑌿𑌂-
-𑌶𑍍𑌚𑌕𑍍𑌰𑍇 𑌶𑍍𑌰𑍀𑌤𑍍𑌰𑌿𑌪𑍁𑌰𑌸𑍁𑌂𑌦𑌰𑍀 𑌸𑌾𑌕𑍍𑌷𑌾𑌤𑍍 ।
𑌗𑍋𑌪𑍍𑌤𑍍𑌰𑍀 𑌗𑍁𑌪𑍍𑌤𑌤𑌰𑌾𑌖𑍍𑌯𑌾𑌃
𑌗𑍋𑌪𑌾𑌯𑌤𑍁 𑌮𑌾𑌂 𑌕𑍃𑌪𑌾𑌰𑍍𑌦𑍍𑌰𑌯𑌾 𑌦𑍃𑌷𑍍𑌟𑍍𑌯𑌾 ॥ 133 ॥

𑌸𑌂𑌕𑍍𑌷𑍋𑌭𑌿𑌣𑍀𑌪𑍍𑌰𑌧𑌾𑌨𑌾𑌃
𑌶𑌕𑍍𑌤𑍀𑌸𑍍𑌤𑌸𑍍𑌯𑍋𑌰𑍍𑌧𑍍𑌵𑌵𑌲𑌯𑌕𑍃𑌤𑌵𑌾𑌸𑌾𑌃 ।
𑌆𑌲𑍋𑌲𑌨𑍀𑌲𑌵𑍇𑌣𑍀-
-𑌰𑌂𑌤𑌃 𑌕𑌲𑌯𑌾𑌮𑌿 𑌯𑍌𑌵𑌨𑍋𑌨𑍍𑌮𑌤𑍍𑌤𑌾𑌃 ॥ 134 ॥

𑌸𑍌𑌭𑌾𑌗𑍍𑌯𑌦𑌾𑌯𑌕𑍇𑌽𑌸𑍍𑌮𑌿𑌂-
-𑌶𑍍𑌚𑌕𑍍𑌰𑍇𑌶𑍀 𑌤𑍍𑌰𑌿𑌪𑍁𑌰𑌵𑌾𑌸𑌿𑌨𑍀 𑌜𑍀𑌯𑌾𑌤𑍍 ।
𑌶𑌕𑍍𑌤𑍀𑌶𑍍𑌚 𑌸𑌂𑌪𑍍𑌰𑌦𑌾𑌯𑌾𑌭𑌿𑌧𑌾𑌃
𑌸𑌮𑌸𑍍𑌤𑌾𑌃 𑌪𑍍𑌰𑌮𑍋𑌦𑌯𑌂𑌤𑍍𑌵𑌨𑌿𑌶𑌮𑍍 ॥ 135 ॥

𑌮𑌣𑌿𑌪𑍀𑌠𑍋𑌪𑌰𑌿 𑌤𑌾𑌸𑌾𑌂
𑌮𑌹𑌤𑌿 𑌚𑌤𑍁𑌰𑍍𑌹𑌸𑍍𑌤𑌵𑌿𑌸𑍍𑌤𑍃𑌤𑍇 𑌵𑌲𑌯𑍇 ।
𑌸𑌂𑌤𑌤𑌵𑌿𑌰𑌚𑌿𑌤𑌵𑌾𑌸𑌾𑌃
𑌶𑌕𑍍𑌤𑍀𑌃 𑌕𑌲𑌯𑌾𑌮𑌿 𑌸𑌰𑍍𑌵𑌸𑌿𑌦𑍍𑌧𑌿𑌮𑍁𑌖𑌾𑌃 ॥ 136 ॥

𑌸𑌰𑍍𑌵𑌾𑌰𑍍𑌥𑌸𑌾𑌧𑌕𑌾𑌖𑍍𑌯𑍇
𑌚𑌕𑍍𑌰𑍇𑌽𑌮𑍁𑌷𑍍𑌮𑌿𑌨𑍍 𑌸𑌮𑌸𑍍𑌤𑌫𑌲𑌦𑌾𑌤𑍍𑌰𑍀 ।
𑌤𑍍𑌰𑌿𑌪𑍁𑌰𑌾 𑌶𑍍𑌰𑍀𑌰𑍍𑌮𑌮 𑌕𑍁𑌶𑌲𑌂
𑌦𑌿𑌶𑌤𑌾𑌦𑍁𑌤𑍍𑌤𑍀𑌰𑍍𑌣𑌯𑍋𑌗𑌿𑌨𑍀𑌸𑍇𑌵𑍍𑌯𑌾 ॥ 13𑍭 ॥

𑌤𑌾𑌸𑌾𑌂 𑌨𑌿𑌲𑌯𑌸𑍍𑌯𑍋𑌪𑌰𑌿
𑌧𑌿𑌷𑍍𑌣𑍍𑌯𑍇 𑌕𑍌𑌸𑍁𑌂𑌭𑌕𑌂𑌚𑍁𑌕𑌮𑌨𑍋𑌜𑍍𑌞𑌾𑌃 ।
𑌸𑌰𑍍𑌵𑌾𑌜𑍍𑌞𑌾𑌦𑍍𑌯𑌾𑌃 𑌦𑍇𑌵𑍍𑌯𑌃
𑌸𑌕𑌲𑌾𑌃 𑌸𑌂𑌪𑌾𑌦𑌯𑌂𑌤𑍁 𑌮𑌮 𑌕𑍀𑌰𑍍𑌤𑌿𑌮𑍍 ॥ 13𑍮 ॥

𑌚𑌕𑍍𑌰𑍇 𑌸𑌮𑌸𑍍𑌤𑌰𑌕𑍍𑌷𑌾-
-𑌕𑌰𑌨𑌾𑌮𑍍𑌨𑍍𑌯𑌸𑍍𑌮𑌿𑌨𑍍 𑌸𑌮𑌸𑍍𑌤𑌜𑌨𑌸𑍇𑌵𑍍𑌯𑌾𑌮𑍍 ।
𑌮𑌨𑌸𑌿 𑌨𑌿𑌗𑌰𑍍𑌭𑌾𑌸𑌹𑌿𑌤𑌾𑌂
𑌮𑌨𑍍𑌯𑍇 𑌶𑍍𑌰𑍀𑌤𑍍𑌰𑌿𑌪𑍁𑌰𑌮𑌾𑌲𑌿𑌨𑍀𑌂 𑌦𑍇𑌵𑍀𑌮𑍍 ॥ 13𑍯 ॥

𑌸𑌰𑍍𑌵𑌜𑍍𑌞𑌾𑌸𑌦𑌨𑌸𑍍𑌯𑍋𑌪𑌰𑌿
𑌚𑌕𑍍𑌰𑍇 𑌵𑌿𑌪𑍁𑌲𑍇 𑌸𑌮𑌾𑌕𑌲𑌿𑌤𑌗𑍇𑌹𑌾𑌃 ।
𑌵𑌂𑌦𑍇 𑌵𑌶𑌿𑌨𑍀𑌮𑍁𑌖𑍍𑌯𑌾𑌃
𑌶𑌕𑍍𑌤𑍀𑌃 𑌸𑌿𑌂𑌦𑍂𑌰𑌰𑍇𑌣𑍁𑌰𑍁𑌚𑌃 ॥ 140 ॥

𑌶𑍍𑌰𑍀𑌸𑌰𑍍𑌵𑌰𑍋𑌗𑌹𑌰𑌾𑌖𑍍𑌯-
-𑌚𑌕𑍍𑌰𑍇𑌽𑌸𑍍𑌮𑌿𑌂𑌸𑍍𑌤𑍍𑌰𑌿𑌪𑍁𑌰𑌪𑍂𑌰𑍍𑌵𑌿𑌕𑌾𑌂 𑌸𑌿𑌦𑍍𑌧𑌾𑌮𑍍 ।
𑌵𑌂𑌦𑍇 𑌰𑌹𑌸𑍍𑌯𑌨𑌾𑌮𑍍𑌨𑌾
𑌵𑍇𑌦𑍍𑌯𑌾𑌭𑌿𑌃 𑌶𑌕𑍍𑌤𑌿𑌭𑌿𑌃 𑌸𑌦𑌾 𑌸𑍇𑌵𑍍𑌯𑌾𑌮𑍍 ॥ 141 ॥

𑌵𑌶𑌿𑌨𑍀𑌗𑍃𑌹𑍋𑌪𑌰𑌿𑌷𑍍𑌟𑌾-
-𑌦𑍍𑌵𑌿𑌂𑌶𑌤𑌿𑌹𑌸𑍍𑌤𑍋𑌨𑍍𑌨𑌤𑍇 𑌮𑌹𑌾𑌪𑍀𑌠𑍇 ।
𑌶𑌮𑌯𑌂𑌤𑍁 𑌶𑌤𑍍𑌰𑍁𑌬𑍃𑌂𑌦𑌂
𑌶𑌸𑍍𑌤𑍍𑌰𑌾𑌣𑍍𑌯𑌸𑍍𑌤𑍍𑌰𑌾𑌣𑌿 𑌚𑌾𑌦𑌿𑌦𑌂𑌪𑌤𑍍𑌯𑍋𑌃 ॥ 142 ॥

𑌶𑌸𑍍𑌤𑍍𑌰𑌸𑌦𑌨𑍋𑌪𑌰𑌿𑌷𑍍𑌟𑌾-
-𑌦𑍍𑌵𑌲𑌯𑍇 𑌵𑌲𑌵𑍈𑌰𑌿𑌰𑌤𑍍𑌨𑌸𑌂𑌘𑌟𑌿𑌤𑍇 ।
𑌕𑌾𑌮𑍇𑌶𑍍𑌵𑌰𑍀𑌪𑍍𑌰𑌧𑌾𑌨𑌾𑌃
𑌕𑌲𑌯𑍇 𑌦𑍇𑌵𑍀𑌃 𑌸𑌮𑌸𑍍𑌤𑌜𑌨𑌵𑌂𑌦𑍍𑌯𑌾𑌃 ॥ 143 ॥

𑌚𑌕𑍍𑌰𑍇𑌽𑌤𑍍𑌰 𑌸𑌰𑍍𑌵𑌸𑌿𑌦𑍍𑌧𑌿𑌪𑍍𑌰𑌦-
-𑌨𑌾𑌮𑌨𑌿 𑌸𑌰𑍍𑌵𑌫𑌲𑌦𑌾𑌤𑍍𑌰𑍀 ।
𑌤𑍍𑌰𑌿𑌪𑍁𑌰𑌾𑌂𑌬𑌾𑌵𑌤𑍁 𑌸𑌤𑌤𑌂
𑌪𑌰𑌾𑌪𑌰𑌰𑌹𑌸𑍍𑌯𑌯𑍋𑌗𑌿𑌨𑍀𑌸𑍇𑌵𑍍𑌯𑌾 ॥ 144 ॥

𑌕𑌾𑌮𑍇𑌶𑍍𑌵𑌰𑍀𑌗𑍃𑌹𑍋𑌪𑌰𑌿𑌵𑌲𑌯𑍇
𑌵𑌿𑌵𑌿𑌧𑌮𑌨𑍁𑌸𑌂𑌪𑍍𑌰𑌦𑌾𑌯𑌜𑍍𑌞𑌾𑌃 ।
𑌚𑌤𑍍𑌵𑌾𑌰𑍋 𑌯𑍁𑌗𑌨𑌾𑌥𑌾
𑌜𑌯𑌂𑌤𑍁 𑌮𑌿𑌤𑍍𑌰𑍇𑌶𑌪𑍂𑌰𑍍𑌵𑌕𑌾𑌃 𑌗𑍁𑌰𑌵𑌃 ॥ 145 ॥

𑌨𑌾𑌥𑌭𑌵𑌨𑍋𑌪𑌰𑌿𑌷𑍍𑌟𑌾-
-𑌨𑍍𑌨𑌾𑌨𑌾𑌰𑌤𑍍𑌨𑌚𑌯𑌮𑍇𑌦𑍁𑌰𑍇 𑌪𑍀𑌠𑍇 ।
𑌕𑌾𑌮𑍇𑌶𑍍𑌯𑌾𑌦𑍍𑌯𑌾 𑌨𑌿𑌤𑍍𑌯𑌾𑌃
𑌕𑌲𑌯𑌂𑌤𑍁 𑌮𑍁𑌦𑌂 𑌤𑌿𑌥𑌿𑌸𑍍𑌵𑌰𑍂𑌪𑌿𑌣𑍍𑌯𑌃 ॥ 146 ॥

𑌨𑌿𑌤𑍍𑌯𑌾𑌸𑌦𑌨𑌸𑍍𑌯𑍋𑌪𑌰𑌿
𑌨𑌿𑌰𑍍𑌮𑌲𑌮𑌣𑌿𑌨𑌿𑌵𑌹𑌵𑌿𑌰𑌚𑌿𑌤𑍇 𑌧𑌿𑌷𑍍𑌣𑍍𑌯𑍇 ।
𑌕𑍁𑌶𑌲𑌂 𑌷𑌡𑌂𑌗𑌦𑍇𑌵𑍍𑌯𑌃
𑌕𑌲𑌯𑌂𑌤𑍍𑌵𑌸𑍍𑌮𑌾𑌕𑌮𑍁𑌤𑍍𑌤𑌰𑌲𑌨𑍇𑌤𑍍𑌰𑌾𑌃 ॥ 14𑍭 ॥

𑌸𑌦𑌨𑌸𑍍𑌯𑍋𑌪𑌰𑌿 𑌤𑌾𑌸𑌾𑌂
𑌸𑌰𑍍𑌵𑌾𑌨𑌂𑌦𑌮𑌯𑌨𑌾𑌮𑌕𑍇 𑌬𑌿𑌂𑌦𑍌 ।
𑌪𑌂𑌚𑌬𑍍𑌰𑌹𑍍𑌮𑌾𑌕𑌾𑌰𑌾𑌂
𑌮𑌂𑌚𑌂 𑌪𑍍𑌰𑌣𑌮𑌾𑌮𑌿 𑌮𑌣𑌿𑌗𑌣𑌾𑌕𑍀𑌰𑍍𑌣𑌮𑍍 ॥ 14𑍮 ॥

𑌪𑌰𑌿𑌤𑍋 𑌮𑌣𑌿𑌮𑌂𑌚𑌸𑍍𑌯
𑌪𑍍𑌰𑌲𑌂𑌬𑌮𑌾𑌨𑌾 𑌨𑌿𑌯𑌂𑌤𑍍𑌰𑌿𑌤𑌾 𑌪𑌾𑌶𑍈𑌃 ।
𑌮𑌾𑌯𑌾𑌮𑌯𑍀 𑌜𑌵𑌨𑌿𑌕𑌾
𑌮𑌮 𑌦𑍁𑌰𑌿𑌤𑌂 𑌹𑌰𑌤𑍁 𑌮𑍇𑌚𑌕𑌚𑍍𑌛𑌾𑌯𑌾 ॥ 14𑍯 ॥

𑌮𑌂𑌚𑌸𑍍𑌯𑍋𑌪𑌰𑌿 𑌲𑌂𑌬-
-𑌨𑍍𑌮𑌦𑌨𑍀𑌪𑍁𑌨𑍍𑌨𑌾𑌗𑌮𑌾𑌲𑌿𑌕𑌾𑌭𑌰𑌿𑌤𑌮𑍍 ।
𑌹𑌰𑌿𑌗𑍋𑌪𑌮𑌯𑌵𑌿𑌤𑌾𑌨𑌂
𑌹𑌰𑌤𑌾𑌦𑌾𑌲𑌸𑍍𑌯𑌮𑌨𑌿𑌶𑌮𑌸𑍍𑌮𑌾𑌕𑌮𑍍 ॥ 150 ॥

𑌪𑌰𑍍𑌯𑌂𑌕𑌸𑍍𑌯 𑌭𑌜𑌾𑌮𑌃
𑌪𑌾𑌦𑌾𑌨𑍍𑌬𑌿𑌂𑌬𑌾𑌂𑌬𑍁𑌦𑍇𑌂𑌦𑍁𑌹𑍇𑌮𑌰𑍁𑌚𑌃 ।
𑌅𑌜𑌹𑌰𑌿𑌰𑍁𑌦𑍍𑌰𑍇𑌶𑌮𑌯𑌾-
-𑌨𑌨𑌲𑌾𑌸𑍁𑌰𑌮𑌾𑌰𑍁𑌤𑍇𑌶𑌕𑍋𑌣𑌸𑍍𑌥𑌾𑌨𑍍 ॥ 151 ॥

𑌫𑌲𑌕𑌂 𑌸𑌦𑌾𑌶𑌿𑌵𑌮𑌯𑌂
𑌪𑍍𑌰𑌣𑍌𑌮𑌿 𑌸𑌿𑌂𑌦𑍂𑌰𑌰𑍇𑌣𑍁𑌕𑌿𑌰𑌣𑌾𑌭𑌮𑍍 ।
𑌆𑌰𑌭𑍍𑌯𑌾𑌂𑌗𑍇𑌶𑍀𑌨𑌾𑌂
𑌸𑌦𑌨𑌾𑌤𑍍𑌕𑌲𑌿𑌤𑌂 𑌚 𑌰𑌤𑍍𑌨𑌸𑍋𑌪𑌾𑌨𑌮𑍍 ॥ 152 ॥

𑌪𑌟𑍍𑌟𑍋𑌪𑌧𑌾𑌨𑌗𑌂𑌡𑌕-
-𑌚𑌤𑍁𑌷𑍍𑌟𑌯𑌸𑍍𑌫𑍁𑌰𑌿𑌤𑌪𑌾𑌟𑌲𑌾𑌸𑍍𑌤𑌰𑌣𑌮𑍍 ।
𑌪𑌰𑍍𑌯𑌂𑌕𑍋𑌪𑌰𑌿 𑌘𑌟𑌿𑌤𑌂
𑌪𑌾𑌤𑍁 𑌚𑌿𑌰𑌂 𑌹𑌂𑌸𑌤𑍂𑌲𑌶𑌯𑌨𑌂 𑌨𑌃 ॥ 153 ॥

𑌤𑌸𑍍𑌯𑍋𑌪𑌰𑌿 𑌨𑌿𑌵𑌸𑌂𑌤𑌂
𑌤𑌾𑌰𑍁𑌣𑍍𑌯𑌶𑍍𑌰𑍀𑌨𑌿𑌷𑍇𑌵𑌿𑌤𑌂 𑌸𑌤𑌤𑌮𑍍 ।
𑌆𑌵𑍃𑌂𑌤𑌪𑍁𑌲𑍍𑌲𑌹𑌲𑍍𑌲𑌕-
-𑌮𑌰𑍀𑌚𑌿𑌕𑌾𑌪𑍁𑌂𑌜𑌮𑌂𑌜𑍁𑌲𑌚𑍍𑌛𑌾𑌯𑌮𑍍 ॥ 154 ॥

𑌸𑌿𑌂𑌦𑍂𑌰𑌶𑍋𑌣𑌵𑌸𑌨𑌂
𑌶𑍀𑌤𑌾𑌂𑌶𑍁𑌸𑍍𑌤𑌬𑌕𑌚𑍁𑌂𑌬𑌿𑌤𑌕𑌿𑌰𑍀𑌟𑌮𑍍 ।
𑌕𑍁𑌂𑌕𑍁𑌮𑌤𑌿𑌲𑌕𑌮𑌨𑍋𑌹𑌰-
-𑌕𑍁𑌟𑌿𑌲𑌾𑌲𑌿𑌕𑌹𑌸𑌿𑌤𑌕𑍁𑌮𑍁𑌦𑌬𑌂𑌧𑍁𑌶𑌿𑌶𑍁𑌮𑍍 ॥ 155 ॥

𑌪𑍂𑌰𑍍𑌣𑍇𑌂𑌦𑍁𑌬𑌿𑌂𑌬𑌵𑌦𑌨𑌂
𑌫𑍁𑌲𑍍𑌲𑌸𑌰𑍋𑌜𑌾𑌤𑌲𑍋𑌚𑌨𑌤𑍍𑌰𑌿𑌤𑌯𑌮𑍍 ।
𑌤𑌰𑌲𑌾𑌪𑌾𑌂𑌗𑌤𑌰𑌂𑌗𑌿𑌤-
-𑌶𑌫𑌰𑌾𑌂𑌕𑌨𑌶𑌾𑌸𑍍𑌤𑍍𑌰𑌸𑌂𑌪𑍍𑌰𑌦𑌾𑌯𑌾𑌰𑍍𑌥𑌮𑍍 ॥ 156 ॥

𑌮𑌣𑌿𑌮𑌯𑌕𑍁𑌂𑌡𑌲𑌪𑍁𑌷𑍍𑌯-
-𑌨𑍍𑌮𑌰𑍀𑌚𑌿𑌕𑌲𑍍𑌲𑍋𑌲𑌮𑌾𑌂𑌸𑌲𑌕𑌪𑍋𑌲𑌮𑍍 ।
𑌵𑌿𑌦𑍍𑌰𑍁𑌮𑌸𑌹𑍋𑌦𑌰𑌾𑌧𑌰-
-𑌵𑌿𑌸𑍃𑌮𑌰𑌸𑍁𑌸𑍍𑌮𑌿𑌤𑌕𑌿𑌶𑍋𑌰𑌸𑌂𑌚𑌾𑌰𑌮𑍍 ॥ 15𑍭 ॥

𑌆𑌮𑍋𑌦𑌿𑌕𑍁𑌸𑍁𑌮𑌶𑍇𑌖𑌰-
-𑌮𑌾𑌨𑍀𑌲𑌭𑍍𑌰𑍂𑌲𑌤𑌾𑌯𑍁𑌗𑌮𑌨𑍋𑌜𑍍𑌞𑌮𑍍 ।
𑌵𑍀𑌟𑍀𑌸𑍌𑌰𑌭𑌵𑍀𑌚𑍀-
-𑌦𑍍𑌵𑌿𑌗𑍁𑌣𑌿𑌤𑌵𑌕𑍍𑌤𑍍𑌰𑌾𑌰𑌵𑌿𑌂𑌦𑌸𑍌𑌰𑌭𑍍𑌯𑌮𑍍 ॥ 15𑍮 ॥

𑌪𑌾𑌶𑌾𑌂𑌕𑍁𑌶𑍇𑌕𑍍𑌷𑍁𑌚𑌾𑌪-
-𑌪𑍍𑌰𑌸𑌵𑌶𑌰𑌸𑍍𑌫𑍁𑌰𑌿𑌤𑌕𑍋𑌮𑌲𑌕𑌰𑌾𑌬𑍍𑌜𑌮𑍍 ।
𑌕𑌾𑌶𑍍𑌮𑍀𑌰𑌪𑌂𑌕𑌿𑌲𑌾𑌂𑌗𑌂
𑌕𑌾𑌮𑍇𑌶𑌂 𑌮𑌨𑌸𑌿 𑌕𑍁𑌰𑍍𑌮𑌹𑍇 𑌸𑌤𑌤𑌮𑍍 ॥ 15𑍯 ॥

𑌤𑌸𑍍𑌯𑌾𑌂𑌕𑌭𑍁𑌵𑌿 𑌨𑌿𑌷𑌣𑍍𑌣𑌾𑌂
𑌤𑌰𑍁𑌣𑌕𑌦𑌂𑌬𑌪𑍍𑌰𑌸𑍂𑌨𑌕𑌿𑌰𑌣𑌾𑌭𑌾𑌮𑍍 ।
𑌶𑍀𑌤𑌾𑌂𑌶𑍁𑌖𑌂𑌡𑌚𑍂𑌡𑌾𑌂
𑌸𑍀𑌮𑌂𑌤𑌨𑍍𑌯𑌸𑍍𑌤𑌸𑌾𑌂𑌦𑍍𑌰𑌸𑌿𑌂𑌦𑍂𑌰𑌾𑌮𑍍 ॥ 160 ॥

𑌕𑍁𑌂𑌕𑍁𑌮𑌲𑌲𑌾𑌮𑌭𑌾𑌸𑍍𑌵-
-𑌨𑍍𑌨𑌿𑌟𑌿𑌲𑌾𑌂 𑌕𑍁𑌟𑌿𑌲𑌤𑌰𑌚𑌿𑌲𑍍𑌲𑌿𑌕𑌾𑌯𑍁𑌗𑌲𑌾𑌮𑍍 ।
𑌨𑌾𑌲𑍀𑌕𑌤𑍁𑌲𑍍𑌯𑌨𑌯𑌨𑌾𑌂
𑌨𑌾𑌸𑌾𑌂𑌚𑌲𑌨𑌟𑌿𑌤𑌮𑍌𑌕𑍍𑌤𑌿𑌕𑌾𑌭𑌰𑌣𑌾𑌮𑍍 ॥ 161 ॥

𑌅𑌂𑌕𑍁𑌰𑌿𑌤𑌮𑌂𑌦𑌹𑌾𑌸-
-𑌮𑌰𑍁𑌣𑌾𑌧𑌰𑌕𑌾𑌂𑌤𑌿𑌵𑌿𑌜𑌿𑌤𑌬𑌿𑌂𑌬𑌾𑌭𑌾𑌮𑍍 ।
𑌕𑌸𑍍𑌤𑍂𑌰𑍀𑌮𑌕𑌰𑍀𑌯𑍁𑌤-
-𑌕𑌪𑍋𑌲𑌸𑌂𑌕𑍍𑌰𑌾𑌂𑌤𑌕𑌨𑌕𑌤𑌾𑌟𑌂𑌕𑌾𑌮𑍍 ॥ 162 ॥

𑌕𑌰𑍍𑌪𑍂𑌰𑌸𑌾𑌂𑌦𑍍𑌰𑌵𑍀𑌟𑍀-
-𑌕𑌬𑌲𑌿𑌤𑌵𑌦𑌨𑌾𑌰𑌵𑌿𑌂𑌦𑌕𑌮𑌨𑍀𑌯𑌾𑌮𑍍 ।
𑌕𑌂𑌬𑍁𑌸𑌹𑍋𑌦𑌰𑌕𑌂𑌠-
-𑌪𑍍𑌰𑌲𑌂𑌬𑌮𑌾𑌨𑌾𑌚𑍍𑌛𑌮𑍌𑌕𑍍𑌤𑌿𑌕𑌕𑌲𑌾𑌪𑌾𑌮𑍍 ॥ 163 ॥

𑌕𑌹𑍍𑌲𑌾𑌰𑌦𑌾𑌮𑌕𑍋𑌮𑌲-
-𑌭𑍁𑌜𑌯𑍁𑌗𑌲𑌸𑍍𑌫𑍁𑌰𑌿𑌤𑌰𑌤𑍍𑌨𑌕𑍇𑌯𑍂𑌰𑌾𑌮𑍍 ।
𑌕𑌰𑌪𑌦𑍍𑌮𑌮𑍂𑌲𑌵𑌿𑌲𑌸-
-𑌤𑍍𑌕𑌾𑌂𑌚𑌨𑌮𑌯𑌕𑌟𑌕𑌵𑌲𑌯𑌸𑌂𑌦𑍋𑌹𑌾𑌮𑍍 ॥ 164 ॥

𑌪𑌾𑌣𑌿𑌚𑌤𑍁𑌷𑍍𑌟𑌯𑌵𑌿𑌲𑌸-
-𑌤𑍍𑌪𑌾𑌶𑌾𑌂𑌕𑍁𑌶𑌪𑍁𑌂𑌡𑍍𑌰𑌚𑌾𑌪𑌪𑍁𑌷𑍍𑌪𑌾𑌸𑍍𑌤𑍍𑌰𑌾𑌮𑍍 ।
𑌕𑍂𑌲𑌂𑌕𑌷𑌕𑍁𑌚𑌶𑌿𑌖𑌰𑌾𑌂
𑌕𑍁𑌂𑌕𑍁𑌮𑌕𑌰𑍍𑌦𑌮𑌿𑌤𑌰𑌤𑍍𑌨𑌕𑍂𑌰𑍍𑌪𑌾𑌸𑌾𑌮𑍍 ॥ 165 ॥

𑌅𑌣𑍁𑌦𑌾𑌯𑌾𑌦𑌵𑌲𑌗𑍍𑌨𑌾-
-𑌮𑌂𑌬𑍁𑌦𑌶𑍋𑌭𑌾𑌸𑌨𑌾𑌭𑌿𑌰𑍋𑌮𑌲𑌤𑌾𑌮𑍍 ।
𑌮𑌾𑌣𑌿𑌕𑍍𑌯𑌖𑌚𑌿𑌤𑌕𑌾𑌂𑌚𑍀-
-𑌮𑌰𑍀𑌚𑌿𑌕𑌾𑌕𑍍𑌰𑌾𑌂𑌤𑌮𑌾𑌂𑌸𑌲𑌨𑌿𑌤𑌂𑌬𑌾𑌮𑍍 ॥ 166 ॥

𑌕𑌰𑌭𑍋𑌰𑍁𑌕𑌾𑌂𑌡𑌯𑍁𑌗𑌲𑌾𑌂
𑌜𑌂𑌘𑌾𑌜𑌿𑌤𑌕𑌾𑌮𑌜𑍈𑌤𑍍𑌰𑌤𑍂𑌣𑍀𑌰𑌾𑌮𑍍 ।
𑌪𑍍𑌰𑌪𑌦𑌪𑌰𑌿𑌭𑍂𑌤𑌕𑍂𑌰𑍍𑌮𑌾𑌂
𑌪𑌲𑍍𑌲𑌵𑌸𑌚𑍍𑌛𑌾𑌯𑌪𑌦𑌯𑍁𑌗𑌮𑌨𑍋𑌜𑍍𑌞𑌾𑌮𑍍 ॥ 16𑍭 ॥

𑌕𑌮𑌲𑌭𑌵𑌕𑌂𑌜𑌲𑍋𑌚𑌨-
-𑌕𑌿𑌰𑍀𑌟𑌰𑌤𑍍𑌨𑌾𑌂𑌶𑍁𑌰𑌂𑌜𑌿𑌤𑌪𑌦𑌾𑌬𑍍𑌜𑌾𑌮𑍍 ।
𑌉𑌨𑍍𑌮𑌸𑍍𑌤𑌕𑌾𑌨𑍁𑌕𑌂𑌪𑌾-
-𑌮𑍁𑌤𑍍𑌤𑌰𑌲𑌾𑌪𑌾𑌂𑌗𑌪𑍋𑌷𑌿𑌤𑌾𑌨𑌂𑌗𑌾𑌮𑍍 ॥ 16𑍮 ॥

𑌆𑌦𑌿𑌮𑌰𑌸𑌾𑌵𑌲𑌂𑌬𑌾-
-𑌮𑌨𑌿𑌦𑌂 𑌪𑍍𑌰𑌥𑌮𑍋𑌕𑍍𑌤𑌿𑌵𑌲𑍍𑌲𑌰𑍀𑌕𑌲𑌿𑌕𑌾𑌮𑍍 ।
𑌆𑌬𑍍𑌰𑌹𑍍𑌮𑌕𑍀𑌟𑌜𑌨𑌨𑍀-
-𑌮𑌂𑌤𑌃 𑌕𑌲𑌯𑌾𑌮𑌿 𑌸𑍁𑌂𑌦𑌰𑍀𑌮𑌨𑌿𑌶𑌮𑍍 ॥ 16𑍯 ॥

𑌕𑌸𑍍𑌤𑍁 𑌕𑍍𑌷𑌿𑌤𑍌 𑌪𑌟𑍀𑌯𑌾-
-𑌨𑍍𑌵𑌸𑍍𑌤𑍁 𑌸𑍍𑌤𑍋𑌤𑍁𑌂 𑌶𑌿𑌵𑌾𑌂𑌕𑌵𑌾𑌸𑍍𑌤𑌵𑍍𑌯𑌮𑍍 ।
𑌅𑌸𑍍𑌤𑍁 𑌚𑌿𑌰𑌂𑌤𑌨𑌸𑍁𑌕𑍃𑌤𑍈𑌃
𑌪𑍍𑌰𑌸𑍍𑌤𑍁𑌤𑌕𑌾𑌮𑍍𑌯𑌾𑌯 𑌤𑌨𑍍𑌮𑌮 𑌪𑍁𑌰𑌸𑍍𑌤𑌾𑌤𑍍 ॥ 1𑍭0 ॥

𑌪𑍍𑌰𑌭𑍁𑌸𑌮𑍍𑌮𑌿𑌤𑍋𑌕𑍍𑌤𑌿𑌗𑌮𑍍𑌯𑌂
𑌪𑌰𑌮𑌶𑌿𑌵𑍋𑌤𑍍𑌸𑌂𑌗𑌤𑍁𑌂𑌗𑌪𑌰𑍍𑌯𑌂𑌕𑌮𑍍 ।
𑌤𑍇𑌜𑌃 𑌕𑌿𑌂𑌚𑌨 𑌦𑌿𑌵𑍍𑌯𑌂
𑌪𑍁𑌰𑌤𑍋 𑌮𑍇 𑌭𑌵𑌤𑍁 𑌪𑍁𑌂𑌡𑍍𑌰𑌕𑍋𑌦𑌂𑌡𑌮𑍍 ॥ 1𑍭1 ॥

𑌮𑌧𑍁𑌰𑌿𑌮𑌭𑌰𑌿𑌤𑌶𑌰𑌾𑌸𑌂
𑌮𑌕𑌰𑌂𑌦𑌸𑍍𑌯𑌂𑌦𑌿𑌮𑌾𑌰𑍍𑌗𑌣𑍋𑌦𑌾𑌰𑌮𑍍 ।
𑌕𑍈𑌰𑌵𑌿𑌣𑍀𑌵𑌿𑌟𑌚𑍂𑌡𑌂
𑌕𑍈𑌵𑌲𑍍𑌯𑌾𑌯𑌾𑌸𑍍𑌤𑍁 𑌕𑌿𑌂𑌚𑌨 𑌮𑌹𑍋 𑌨𑌃 ॥ 1𑍭2 ॥

𑌅𑌕𑍍𑌷𑍁𑌦𑍍𑌰𑌮𑌿𑌕𑍍𑌷𑍁𑌚𑌾𑌪𑌂
𑌪𑌰𑍋𑌕𑍍𑌷𑌮𑌵𑌲𑌗𑍍𑌨𑌸𑍀𑌮𑍍𑌨𑌿 𑌤𑍍𑌰𑍍𑌯𑌕𑍍𑌷𑌮𑍍 ।
𑌕𑍍𑌷𑌪𑌯𑌤𑍁 𑌮𑍇 𑌕𑍍𑌷𑍇𑌮𑍇𑌤𑌰-
-𑌮𑍁𑌕𑍍𑌷𑌰𑌥𑌪𑍍𑌰𑍇𑌮𑌪𑌕𑍍𑌷𑍍𑌮𑌲𑌂 𑌤𑍇𑌜𑌃 ॥ 1𑍭3 ॥

𑌭𑍃𑌂𑌗𑌰𑍁𑌚𑌿𑌸𑌂𑌗𑌰𑌕𑌰𑌾𑌪𑌾𑌂𑌗𑌂
𑌶𑍃𑌂𑌗𑌾𑌰𑌤𑍁𑌂𑌗𑌮𑌰𑍁𑌣𑌾𑌂𑌗𑌮𑍍 ।
𑌮𑌂𑌗𑌲𑌮𑌭𑌂𑌗𑍁𑌰𑌂 𑌮𑍇
𑌘𑌟𑌯𑌤𑍁 𑌗𑌂𑌗𑌾𑌧𑌰𑌾𑌂𑌗𑌸𑌂𑌗𑌿 𑌮𑌹𑌃 ॥ 1𑍭4 ॥

𑌪𑍍𑌰𑌪𑌦𑌾𑌜𑌿𑌤𑌕𑍂𑌰𑍍𑌮𑌮𑍂𑌰𑍍𑌜𑌿𑌤-
-𑌕𑌰𑍁𑌣𑌂 𑌭𑌰𑍍𑌮𑌰𑍁𑌚𑌿𑌨𑌿𑌰𑍍𑌮𑌥𑌨𑌦𑍇𑌹𑌮𑍍 ।
𑌶𑍍𑌰𑌿𑌤𑌵𑌰𑍍𑌮 𑌮𑌰𑍍𑌮 𑌶𑌂𑌭𑍋𑌃
𑌕𑌿𑌂𑌚𑌨 𑌮𑌮 𑌨𑌰𑍍𑌮 𑌶𑌰𑍍𑌮 𑌨𑌿𑌰𑍍𑌮𑌾𑌤𑍁 ॥ 1𑍭5 ॥

𑌕𑌾𑌲𑌕𑍁𑌰𑌲𑌾𑌲𑌿𑌕𑌾𑌲𑌿𑌮-
-𑌕𑌂𑌦𑌲𑌵𑌿𑌜𑌿𑌤𑌾𑌲𑌿 𑌵𑌿𑌧𑍃𑌤𑌮𑌣𑌿𑌵𑌾𑌲𑌿 ।
𑌮𑌿𑌲𑌤𑍁 𑌹𑍃𑌦𑌿 𑌪𑍁𑌲𑌿𑌨𑌜𑌘𑌨𑌂
𑌬𑌹𑍁𑌲𑌿𑌤𑌗𑌲𑌗𑌰𑌲𑌕𑍇𑌲𑌿 𑌕𑌿𑌮𑌪𑌿 𑌮𑌹𑌃 ॥ 1𑍭6 ॥

𑌕𑍁𑌂𑌕𑍁𑌮𑌤𑌿𑌲𑌕𑌿𑌤𑌫𑌾𑌲𑌾
𑌕𑍁𑌰𑍁𑌵𑌿𑌂𑌦𑌚𑍍𑌛𑌾𑌯𑌪𑌾𑌟𑌲𑌦𑍁𑌕𑍂𑌲𑌾 ।
𑌕𑌰𑍁𑌣𑌾𑌪𑌯𑍋𑌧𑌿𑌵𑍇𑌲𑌾
𑌕𑌾𑌚𑌨 𑌚𑌿𑌤𑍍𑌤𑍇 𑌚𑌕𑌾𑌸𑍍𑌤𑍁 𑌮𑍇 𑌲𑍀𑌲𑌾 ॥ 1𑍭𑍭 ॥

𑌪𑍁𑌷𑍍𑌪𑌂𑌧𑌯𑌰𑍁𑌚𑌿𑌵𑍇𑌣𑍍𑌯𑌃
𑌪𑍁𑌲𑌿𑌨𑌾𑌭𑍋𑌗𑌤𑍍𑌰𑌪𑌾𑌕𑌰𑌶𑍍𑌰𑍇𑌣𑍍𑌯𑌃 ।
𑌜𑍀𑌯𑌾𑌸𑍁𑌰𑌿𑌕𑍍𑌷𑍁𑌪𑌾𑌣𑍍𑌯𑌃
𑌕𑌾𑌶𑍍𑌚𑌨 𑌕𑌾𑌮𑌾𑌰𑌿𑌕𑍇𑌲𑌿𑌸𑌾𑌕𑍍𑌷𑌿𑌣𑍍𑌯𑌃 ॥ 1𑍭𑍮 ॥

𑌤𑌪𑌨𑍀𑌯𑌾𑌂𑌶𑍁𑌕𑌭𑌾𑌂𑌸𑌿
𑌦𑍍𑌰𑌾𑌕𑍍𑌷𑌾𑌮𑌾𑌧𑍁𑌰𑍍𑌯𑌨𑌾𑌸𑍍𑌤𑌿𑌕𑌵𑌚𑌾𑌂𑌸𑌿 ।
𑌕𑌤𑌿𑌚𑌨 𑌶𑍁𑌚𑌂 𑌮𑌹𑌾𑌂𑌸𑌿
𑌕𑍍𑌷𑌪𑌯𑌤𑍁 𑌕𑌪𑌾𑌲𑌿𑌤𑍋𑌷𑌿𑌤𑌮𑌨𑌾𑌂𑌸𑌿 ॥ 1𑍭𑍯 ॥

𑌅𑌸𑌿𑌤𑌕𑌚𑌮𑌾𑌯𑌤𑌾𑌕𑍍𑌷𑌂
𑌕𑍁𑌸𑍁𑌮𑌶𑌰𑌂 𑌕𑍂𑌲𑌮𑍁𑌦𑍍𑌵𑌹𑌕𑍃𑌪𑌾𑌰𑍍𑌦𑍍𑌰𑌮𑍍 ।
𑌆𑌦𑌿𑌮𑌰𑌸𑌾𑌧𑌿𑌦𑍈𑌵𑌤-
-𑌮𑌂𑌤𑌃 𑌕𑌲𑌯𑍇 𑌹𑌰𑌾𑌂𑌕𑌵𑌾𑌸𑌿 𑌮𑌹𑌃 ॥ 1𑍮0 ॥

𑌕𑌰𑍍𑌣𑍋𑌪𑌾𑌂𑌤𑌤𑌰𑌂𑌗𑌿𑌤-
-𑌕𑌟𑌾𑌕𑍍𑌷𑌵𑌿𑌸𑍍𑌪𑌂𑌦𑌿𑌕𑌂𑌠𑌦𑌘𑍍𑌨𑌕𑍃𑌪𑌾𑌮𑍍 ।
𑌕𑌾𑌮𑍇𑌶𑍍𑌵𑌰𑌾𑌂𑌕𑌨𑌿𑌲𑌯𑌾𑌂
𑌕𑌾𑌮𑌪𑌿 𑌵𑌿𑌦𑍍𑌯𑌾𑌂 𑌪𑍁𑌰𑌾𑌤𑌨𑍀𑌂 𑌕𑌲𑌯𑍇 ॥ 1𑍮1 ॥

𑌅𑌰𑌵𑌿𑌂𑌦𑌕𑌾𑌂𑌤𑍍𑌯𑌰𑍁𑌂𑌤𑍁𑌦-
-𑌵𑌿𑌲𑍋𑌚𑌨𑌦𑍍𑌵𑌂𑌦𑍍𑌵𑌸𑍁𑌂𑌦𑌰𑌮𑍁𑌖𑍇𑌂𑌦𑍁 ।
𑌛𑌂𑌦𑌃 𑌕𑌂𑌦𑌲𑌮𑌂𑌦𑌿𑌰-
-𑌮𑌂𑌤𑌃𑌪𑍁𑌰𑌮𑍈𑌂𑌦𑍁𑌶𑍇𑌖𑌰𑌂 𑌵𑌂𑌦𑍇 ॥ 1𑍮2 ॥

𑌬𑌿𑌂𑌬𑌿𑌨𑌿𑌕𑍁𑌰𑌂𑌬𑌡𑌂𑌬𑌰-
-𑌵𑌿𑌡𑌂𑌬𑌕𑌚𑍍𑌛𑌾𑌯𑌮𑌂𑌬𑌰𑌵𑌲𑌗𑍍𑌨𑌮𑍍 ।
𑌕𑌂𑌬𑍁𑌗𑌲𑌮𑌂𑌬𑍁𑌦𑌕𑍁𑌚𑌂
𑌬𑌿𑌂𑌬𑍋𑌕𑌂 𑌕𑌮𑌪𑌿 𑌚𑍁𑌂𑌬𑌤𑍁 𑌮𑌨𑍋 𑌮𑍇 ॥ 1𑍮3 ॥

𑌕𑌮𑌪𑌿 𑌕𑌮𑌨𑍀𑌯𑌰𑍂𑌪𑌂
𑌕𑌲𑌯𑌾𑌮𑍍𑌯𑌂𑌤𑌃 𑌕𑌦𑌂𑌬𑌕𑍁𑌸𑍁𑌮𑌾𑌢𑍍𑌯𑌮𑍍 ।
𑌚𑌂𑌪𑌕𑌰𑍁𑌚𑌿𑌰𑌸𑍁𑌵𑍇𑌷𑍈𑌃
𑌸𑌂𑌪𑌾𑌦𑌿𑌤𑌕𑌾𑌂𑌤𑍍𑌯𑌲𑌂𑌕𑍃𑌤𑌦𑌿𑌗𑌂𑌤𑌮𑍍 ॥ 1𑍮4 ॥

𑌶𑌂𑌪𑌾𑌰𑍁𑌚𑌿𑌭𑌰-
-𑌗𑌰𑍍𑌹𑌾𑌸𑌂𑌪𑌾𑌦𑌕𑌕𑌾𑌂𑌤𑌿𑌕𑌵𑌚𑌿𑌤𑌦𑌿𑌗𑌂𑌤𑌮𑍍 ।
𑌸𑌿𑌦𑍍𑌧𑌾𑌂𑌤𑌂 𑌨𑌿𑌗𑌮𑌾𑌨𑌾𑌂
𑌶𑍁𑌦𑍍𑌧𑌾𑌂𑌤𑌂 𑌕𑌿𑌮𑌪𑌿 𑌶𑍂𑌲𑌿𑌨𑌃 𑌕𑌲𑌯𑍇 ॥ 1𑍮5 ॥

𑌉𑌦𑍍𑌯𑌦𑍍𑌦𑌿𑌨𑌕𑌰𑌶𑍋𑌣𑌾-
-𑌨𑍁𑌤𑍍𑌪𑌲𑌬𑌂𑌧𑍁𑌸𑍍𑌤𑌨𑌂𑌧𑌯𑌾𑌪𑍀𑌡𑌾𑌨𑍍 ।
𑌕𑌰𑌕𑌲𑌿𑌤𑌪𑍁𑌂𑌡𑍍𑌰𑌚𑌾𑌪𑌾-
-𑌨𑍍𑌕𑌲𑌯𑍇 𑌕𑌾𑌨𑌪𑌿 𑌕𑌪𑌰𑍍𑌦𑌿𑌨𑌃 𑌪𑍍𑌰𑌾𑌣𑌾𑌨𑍍 ॥ 1𑍮6 ॥

𑌰𑌶𑌨𑌾𑌲𑌸𑌜𑍍𑌜𑌘𑌨𑌯𑌾
𑌰𑌸𑌨𑌾𑌜𑍀𑌵𑌾𑌤𑍁𑌚𑌾𑌪𑌭𑌾𑌸𑍁𑌰𑌯𑌾 ।
𑌘𑍍𑌰𑌾𑌣𑌾𑌯𑍁𑌷𑍍𑌕𑌰𑌶𑌰𑌯𑌾
𑌘𑍍𑌰𑌾𑌤𑌂 𑌚𑌿𑌤𑍍𑌤𑌂 𑌕𑌯𑌾𑌪𑌿 𑌵𑌾𑌸𑌨𑌯𑌾 ॥ 1𑍮𑍭 ॥

𑌸𑌰𑌸𑌿𑌜𑌸𑌹𑌯𑍁𑌧𑍍𑌵𑌦𑍃𑌶𑌾
𑌶𑌂𑌪𑌾𑌲𑌤𑌿𑌕𑌾𑌸𑌨𑌾𑌭𑌿𑌵𑌿𑌗𑍍𑌰𑌹𑌯𑌾 ।
𑌭𑌾𑌸𑌾 𑌕𑌯𑌾𑌪𑌿 𑌚𑍇𑌤𑍋
𑌨𑌾𑌸𑌾𑌮𑌣𑌿𑌶𑍋𑌭𑌿𑌵𑌦𑌨𑌯𑌾 𑌭𑌰𑌿𑌤𑌮𑍍 ॥ 1𑍮𑍮 ॥

𑌨𑌵𑌯𑌾𑌵𑌕𑌾𑌭𑌸𑌿𑌚𑌯𑌾𑌨𑍍𑌵𑌿𑌤𑌯𑌾
𑌗𑌜𑌯𑌾𑌨𑌯𑌾 𑌦𑌯𑌾𑌪𑌰𑌯𑌾 ।
𑌧𑍃𑌤𑌯𑌾𑌮𑌿𑌨𑍀𑌶𑌕𑌲𑌯𑌾
𑌧𑌿𑌯𑌾 𑌕𑌯𑌾𑌪𑌿 𑌕𑍍𑌷𑌤𑌾𑌮𑌯𑌾 𑌹𑌿 𑌵𑌯𑌮𑍍 ॥ 1𑍮𑍯 ॥

𑌅𑌲𑌮𑌲𑌮𑌕𑍁𑌸𑍁𑌮𑌬𑌾𑌣𑍈-
-𑌰𑌬𑌿𑌂𑌬𑌶𑍋𑌣𑍈𑌰𑌪𑍁𑌂𑌡𑍍𑌰𑌕𑍋𑌦𑌂𑌡𑍈𑌃 ।
𑌅𑌕𑍁𑌮𑍁𑌦𑌬𑌾𑌂𑌧𑌵𑌚𑍂𑌡𑍈-
-𑌰𑌨𑍍𑌯𑍈𑌰𑌿𑌹 𑌜𑌗𑌤𑌿 𑌦𑍈𑌵𑌤𑌂 𑌮𑌨𑍍𑌯𑍈𑌃 ॥ 1𑍯0 ॥

𑌕𑍁𑌵𑌲𑌯𑌸𑌦𑍃𑌕𑍍𑌷𑌨𑌯𑌨𑍈𑌃
𑌕𑍁𑌲𑌗𑌿𑌰𑌿𑌕𑍂𑌟𑌸𑍍𑌥𑌬𑌂𑌧𑍁𑌕𑍁𑌚𑌭𑌾𑌰𑍈𑌃 ।
𑌕𑌰𑍁𑌣𑌾𑌸𑍍𑌪𑌂𑌦𑌿𑌕𑌟𑌾𑌕𑍍𑌷𑍈𑌃
𑌕𑌵𑌚𑌿𑌤𑌚𑌿𑌤𑍍𑌤𑍋𑌽𑌸𑍍𑌮𑌿 𑌕𑌤𑌿𑌪𑌯𑍈𑌃 𑌕𑍁𑌤𑍁𑌕𑍈𑌃 ॥ 1𑍯1 ॥

𑌨𑌤𑌜𑌨𑌸𑍁𑌲𑌭𑌾𑌯 𑌨𑌮𑍋
𑌨𑌾𑌲𑍀𑌕𑌸𑌨𑌾𑌭𑌿𑌲𑍋𑌚𑌨𑌾𑌯 𑌨𑌮𑌃 ।
𑌨𑌂𑌦𑌿𑌤𑌗𑌿𑌰𑌿𑌶𑌾𑌯 𑌨𑌮𑍋
𑌮𑌹𑌸𑍇 𑌨𑌵𑌨𑍀𑌪𑌪𑌾𑌟𑌲𑌾𑌯 𑌨𑌮𑌃 ॥ 1𑍯2 ॥

𑌕𑌾𑌦𑌂𑌬𑌕𑍁𑌸𑍁𑌮𑌦𑌾𑌮𑍍𑌨𑍇
𑌕𑌾𑌯𑌚𑍍𑌛𑌾𑌯𑌾𑌕𑌣𑌾𑌯𑌿𑌤𑌾𑌰𑍍𑌯𑌮𑍍𑌣𑍇 ।
𑌸𑍀𑌮𑍍𑌨𑍇 𑌚𑌿𑌰𑌂𑌤𑌨𑌗𑌿𑌰𑌾𑌂
𑌭𑍂𑌮𑍍𑌨𑍇 𑌕𑌸𑍍𑌮𑍈𑌚𑌿𑌦𑌾𑌦𑌦𑍇 𑌪𑍍𑌰𑌣𑌤𑌿𑌮𑍍 ॥ 1𑍯3 ॥

𑌕𑍁𑌟𑌿𑌲𑌕𑌬𑌰𑍀𑌭𑌰𑍇𑌭𑍍𑌯𑌃
𑌕𑍁𑌂𑌕𑍁𑌮𑌸𑌬𑍍𑌰𑌹𑍍𑌮𑌚𑌾𑌰𑌿𑌕𑌿𑌰𑌣𑍇𑌭𑍍𑌯𑌃 ।
𑌕𑍂𑌲𑌂𑌕𑌷𑌸𑍍𑌤𑌨𑍇𑌭𑍍𑌯𑌃
𑌕𑍁𑌰𑍍𑌮𑌃 𑌪𑍍𑌰𑌣𑌤𑌿𑌂 𑌕𑍁𑌲𑌾𑌦𑍍𑌰𑌿𑌕𑍁𑌤𑍁𑌕𑍇𑌭𑍍𑌯𑌃 ॥ 1𑍯4 ॥

𑌕𑍋𑌕𑌨𑌦𑌶𑍋𑌣𑌚𑌰𑌣𑌾-
-𑌤𑍍𑌕𑍋𑌮𑌲𑌕𑍁𑌰𑌲𑌾𑌲𑌿𑌵𑌿𑌜𑌿𑌤𑌶𑍈𑌵𑌾𑌲𑌾𑌤𑍍 ।
𑌉𑌤𑍍𑌪𑌲𑌸𑌗𑌂𑌧𑌿𑌨𑌯𑌨𑌾-
-𑌦𑍁𑌰𑌰𑍀𑌕𑍁𑌰𑍍𑌮𑍋 𑌨 𑌦𑍇𑌵𑌤𑌮𑌾𑌨𑍍𑌯𑌾𑌮𑍍 ॥ 1𑍯5 ॥

𑌆𑌪𑌾𑌟𑌲𑌾𑌧𑌰𑌾𑌣𑌾-
-𑌮𑌾𑌨𑍀𑌲𑌸𑍍𑌨𑌿𑌗𑍍𑌧𑌬𑌰𑍍𑌬𑌰𑌕𑌚𑌾𑌨𑌾𑌮𑍍 ।
𑌆𑌮𑍍𑌨𑌾𑌯𑌜𑍀𑌵𑌨𑌾𑌨𑌾-
-𑌮𑌾𑌕𑍂𑌤𑌾𑌨𑌾𑌂 𑌹𑌰𑌸𑍍𑌯 𑌦𑌾𑌸𑍋𑌽𑌹𑌮𑍍 ॥ 1𑍯6 ॥

𑌪𑍁𑌂𑌖𑌿𑌤𑌵𑌿𑌲𑌾𑌸𑌹𑌾𑌸-
-𑌸𑍍𑌫𑍁𑌰𑌿𑌤𑌾𑌸𑍁 𑌪𑍁𑌰𑌾𑌹𑌿𑌤𑌾𑌂𑌕𑌨𑌿𑌲𑌯𑌾𑌸𑍁 ।
𑌮𑌗𑍍𑌨𑌂 𑌮𑌨𑍋 𑌮𑌦𑍀𑌯𑌂
𑌕𑌾𑌸𑍍𑌵𑌪𑌿 𑌕𑌾𑌮𑌾𑌰𑌿𑌜𑍀𑌵𑌨𑌾𑌡𑍀𑌷𑍁 ॥ 1𑍯𑍭 ॥

𑌲𑌲𑌿𑌤𑌾 𑌪𑌾𑌤𑍁 𑌶𑌿𑌰𑍋 𑌮𑍇
𑌲𑌲𑌾𑌟𑌮𑌂𑌬𑌾 𑌚 𑌮𑌧𑍁𑌮𑌤𑍀𑌰𑍂𑌪𑌾 ।
𑌭𑍍𑌰𑍂𑌯𑍁𑌗𑍍𑌮𑌂 𑌚 𑌭𑌵𑌾𑌨𑍀
𑌪𑍁𑌷𑍍𑌪𑌶𑌰𑌾 𑌪𑌾𑌤𑍁 𑌲𑍋𑌚𑌨𑌦𑍍𑌵𑌂𑌦𑍍𑌵𑌮𑍍 ॥ 1𑍯𑍮 ॥

𑌪𑌾𑌯𑌾𑌨𑍍𑌨𑌾𑌸𑌾𑌂 𑌬𑌾𑌲𑌾
𑌸𑍁𑌭𑌗𑌾 𑌦𑌂𑌤𑌾𑌂𑌶𑍍𑌚 𑌸𑍁𑌂𑌦𑌰𑍀 𑌜𑌿𑌹𑍍𑌵𑌾𑌮𑍍 ।
𑌅𑌧𑌰𑍋𑌷𑍍𑌠𑌮𑌾𑌦𑌿𑌶𑌕𑍍𑌤𑌿-
-𑌶𑍍𑌚𑌕𑍍𑌰𑍇𑌶𑍀 𑌪𑌾𑌤𑍁 𑌮𑍇 𑌚𑌿𑌰𑌂 𑌚𑌿𑌬𑍁𑌕𑌮𑍍 ॥ 1𑍯𑍯 ॥

𑌕𑌾𑌮𑍇𑌶𑍍𑌵𑌰𑍀 𑌚 𑌕𑌰𑍍𑌣𑍌
𑌕𑌾𑌮𑌾𑌕𑍍𑌷𑍀 𑌪𑌾𑌤𑍁 𑌗𑌂𑌡𑌯𑍋𑌰𑍍𑌯𑍁𑌗𑌲𑌮𑍍 ।
𑌶𑍃𑌂𑌗𑌾𑌰𑌨𑌾𑌯𑌿𑌕𑌾𑌵𑍍𑌯𑌾-
-𑌦𑍍𑌵𑌦𑌨𑌂 𑌸𑌿𑌂𑌹𑌾𑌸𑌨𑍇𑌶𑍍𑌵𑌰𑍀 𑌚 𑌗𑌲𑌮𑍍 ॥ 200 ॥

𑌸𑍍𑌕𑌂𑌦𑌪𑍍𑌰𑌸𑍂𑌶𑍍𑌚 𑌪𑌾𑌤𑍁
𑌸𑍍𑌕𑌂𑌧𑍌 𑌬𑌾𑌹𑍂 𑌚 𑌪𑌾𑌟𑌲𑌾𑌂𑌗𑍀 𑌮𑍇 ।
𑌪𑌾𑌣𑍀 𑌚 𑌪𑌦𑍍𑌮𑌨𑌿𑌲𑌯𑌾
𑌪𑌾𑌯𑌾𑌦𑌨𑌿𑌶𑌂 𑌨𑌖𑌾𑌵𑌲𑍀𑌰𑍍𑌵𑌿𑌜𑌯𑌾 ॥ 201 ॥

𑌕𑍋𑌦𑌂𑌡𑌿𑌨𑍀 𑌚 𑌵𑌕𑍍𑌷𑌃
𑌕𑍁𑌕𑍍𑌷𑌿𑌂 𑌚𑌾𑌵𑍍𑌯𑌾𑌤𑍍 𑌕𑍁𑌲𑌾𑌚𑌲𑌤𑌨𑍂𑌜𑌾 ।
𑌕𑌲𑍍𑌯𑌾𑌣𑍀 𑌚 𑌵𑌲𑌗𑍍𑌨𑌂
𑌕𑌟𑌿𑌂 𑌚 𑌪𑌾𑌯𑌾𑌤𑍍𑌕𑌲𑌾𑌧𑌰𑌶𑌿𑌖𑌂𑌡𑌾 ॥ 202 ॥

𑌊𑌰𑍁𑌦𑍍𑌵𑌯𑌂 𑌚 𑌪𑌾𑌯𑌾-
-𑌦𑍁𑌮𑌾 𑌮𑍃𑌡𑌾𑌨𑍀 𑌚 𑌜𑌾𑌨𑍁𑌨𑍀 𑌰𑌕𑍍𑌷𑍇𑌤𑍍 ।
𑌜𑌂𑌘𑍇 𑌚 𑌷𑍋𑌡𑌶𑍀 𑌮𑍇
𑌪𑌾𑌯𑌾𑌤𑍍 𑌪𑌾𑌦𑍌 𑌚 𑌪𑌾𑌶𑌸𑍃𑌣𑌿𑌹𑌸𑍍𑌤𑌾 ॥ 203 ॥

𑌪𑍍𑌰𑌾𑌤𑌃 𑌪𑌾𑌤𑍁 𑌪𑌰𑌾 𑌮𑌾𑌂
𑌮𑌧𑍍𑌯𑌾𑌹𑍍𑌨𑍇 𑌪𑌾𑌤𑍁 𑌮𑌣𑌿𑌗𑍃𑌹𑌾𑌧𑍀𑌶𑌾 ।
𑌶𑌰𑍍𑌵𑌾𑌣𑍍𑌯𑌵𑌤𑍁 𑌚 𑌸𑌾𑌯𑌂
𑌪𑌾𑌯𑌾𑌦𑍍𑌰𑌾𑌤𑍍𑌰𑍌 𑌚 𑌭𑍈𑌰𑌵𑍀 𑌸𑌾𑌕𑍍𑌷𑌾𑌤𑍍 ॥ 204 ॥

𑌭𑌾𑌰𑍍𑌯𑌾𑌂 𑌰𑌕𑍍𑌷𑌤𑍁 𑌗𑍌𑌰𑍀𑌂
𑌪𑌾𑌯𑌾𑌤𑍍 𑌪𑍁𑌤𑍍𑌰𑌾𑌂𑌶𑍍𑌚 𑌬𑌿𑌂𑌦𑍁𑌗𑍃𑌹𑌪𑍀𑌠𑌾 ।
𑌶𑍍𑌰𑍀𑌵𑌿𑌦𑍍𑌯𑌾 𑌚 𑌯𑌶𑍋 𑌮𑍇
𑌶𑍀𑌲𑌂 𑌚𑌾𑌵𑍍𑌯𑌾𑌚𑍍𑌚𑌿𑌰𑌂 𑌮𑌹𑌾𑌰𑌾𑌜𑍍𑌞𑍀 ॥ 205 ॥

𑌪𑌵𑌨𑌮𑌯𑌿 𑌪𑌾𑌵𑌕𑌮𑌯𑌿
𑌕𑍍𑌷𑍋𑌣𑍀𑌮𑌯𑌿 𑌗𑌗𑌨𑌮𑌯𑌿 𑌕𑍃𑌪𑍀𑌟𑌮𑌯𑌿 ।
𑌰𑌵𑌿𑌮𑌯𑌿 𑌶𑌶𑌿𑌮𑌯𑌿 𑌦𑌿𑌙𑍍𑌮𑌯𑌿
𑌸𑌮𑌯𑌮𑌯𑌿 𑌪𑍍𑌰𑌾𑌣𑌮𑌯𑌿 𑌶𑌿𑌵𑍇 𑌪𑌾𑌹𑌿 ॥ 206 ॥

𑌕𑌾𑌲𑌿 𑌕𑌪𑌾𑌲𑌿𑌨𑌿 𑌶𑍂𑌲𑌿𑌨𑌿
𑌭𑍈𑌰𑌵𑌿 𑌮𑌾𑌤𑌂𑌗𑌿 𑌪𑌂𑌚𑌮𑌿 𑌤𑍍𑌰𑌿𑌪𑍁𑌰𑍇 ।
𑌵𑌾𑌗𑍍𑌦𑍇𑌵𑌿 𑌵𑌿𑌂𑌧𑍍𑌯𑌵𑌾𑌸𑌿𑌨𑌿
𑌬𑌾𑌲𑍇 𑌭𑍁𑌵𑌨𑍇𑌶𑌿 𑌪𑌾𑌲𑌯 𑌚𑌿𑌰𑌂 𑌮𑌾𑌮𑍍 ॥ 20𑍭 ॥

𑌅𑌭𑌿𑌨𑌵𑌸𑌿𑌂𑌦𑍂𑌰𑌾𑌭𑌾-
-𑌮𑌂𑌬 𑌤𑍍𑌵𑌾𑌂 𑌚𑌿𑌂𑌤𑌯𑌂𑌤𑌿 𑌯𑍇 𑌹𑍃𑌦𑌯𑍇 ।
𑌉𑌪𑌰𑌿 𑌨𑌿𑌪𑌤𑌂𑌤𑌿 𑌤𑍇𑌷𑌾-
-𑌮𑍁𑌤𑍍𑌪𑌲𑌨𑌯𑌨𑌾𑌕𑌟𑌾𑌕𑍍𑌷𑌕𑌲𑍍𑌲𑍋𑌲𑌾𑌃 ॥ 20𑍮 ॥

𑌵𑌰𑍍𑌗𑌾𑌷𑍍𑌟𑌕𑌮𑌿𑌲𑌿𑌤𑌾𑌭𑌿-
-𑌰𑍍𑌵𑌶𑌿𑌨𑍀𑌮𑍁𑌖𑍍𑌯𑌾𑌭𑌿𑌰𑌾𑌵𑍃𑌤𑌾𑌂 𑌭𑌵𑌤𑍀𑌮𑍍 ।
𑌚𑌿𑌂𑌤𑌯𑌤𑌾𑌂 𑌸𑌿𑌤𑌵𑌰𑍍𑌣𑌾𑌂
𑌵𑌾𑌚𑍋 𑌨𑌿𑌰𑍍𑌯𑌾𑌂𑌤𑍍𑌯𑌯𑌤𑍍𑌨𑌤𑍋 𑌵𑌦𑌨𑌾𑌤𑍍 ॥ 20𑍯 ॥

𑌕𑌨𑌕𑌶𑌲𑌾𑌕𑌾𑌗𑍌𑌰𑍀𑌂
𑌕𑌰𑍍𑌣𑌵𑍍𑌯𑌾𑌲𑍋𑌲𑌕𑍁𑌂𑌡𑌲𑌦𑍍𑌵𑌿𑌤𑌯𑌾𑌮𑍍 ।
𑌪𑍍𑌰𑌹𑌸𑌿𑌤𑌮𑍁𑌖𑍀𑌂 𑌚 𑌭𑌵𑌤𑍀𑌂
𑌧𑍍𑌯𑌾𑌯𑌂𑌤𑍋 𑌯𑍇 𑌤 𑌏𑌵 𑌭𑍂𑌧𑌨𑌦𑌾𑌃 ॥ 210 ॥

𑌶𑍀𑌰𑍍𑌷𑌾𑌂𑌭𑍋𑌰𑍁𑌹𑌮𑌧𑍍𑌯𑍇
𑌶𑍀𑌤𑌲𑌪𑍀𑌯𑍂𑌷𑌵𑌰𑍍𑌷𑌿𑌣𑍀𑌂 𑌭𑌵𑌤𑍀𑌮𑍍 ।
𑌅𑌨𑍁𑌦𑌿𑌨𑌮𑌨𑍁𑌚𑌿𑌂𑌤𑌯𑌤𑌾-
-𑌮𑌾𑌯𑍁𑌷𑍍𑌯𑌂 𑌭𑌵𑌤𑌿 𑌪𑍁𑌷𑍍𑌕𑌲𑌮𑌵𑌨𑍍𑌯𑌾𑌮𑍍 ॥ 211 ॥

𑌮𑌧𑍁𑌰𑌸𑍍𑌮𑌿𑌤𑌾𑌂 𑌮𑌦𑌾𑌰𑍁𑌣𑌨𑌯𑌨𑌾𑌂
𑌮𑌾𑌤𑌂𑌗𑌕𑍁𑌂𑌭𑌵𑌕𑍍𑌷𑍋𑌜𑌾𑌮𑍍 ।
𑌚𑌂𑌦𑍍𑌰𑌵𑌤𑌂𑌸𑌿𑌨𑍀𑌂 𑌤𑍍𑌵𑌾𑌂
𑌸𑌵𑌿𑌧𑍇 𑌪𑌶𑍍𑌯𑌂𑌤𑌿 𑌸𑍁𑌕𑍃𑌤𑌿𑌨𑌃 𑌕𑍇𑌚𑌿𑌤𑍍 ॥ 212 ॥

𑌲𑌲𑌿𑌤𑌾𑌯𑌾𑌃 𑌸𑍍𑌤𑌵𑌰𑌤𑍍𑌨𑌂
𑌲𑌲𑌿𑌤𑌪𑌦𑌾𑌭𑌿𑌃 𑌪𑍍𑌰𑌣𑍀𑌤𑌮𑌾𑌰𑍍𑌯𑌾𑌭𑌿𑌃 ।
𑌪𑍍𑌰𑌤𑌿𑌦𑌿𑌨𑌮𑌵𑌨𑍌 𑌪𑌠𑌤𑌾𑌂
𑌫𑌲𑌾𑌨𑌿 𑌵𑌕𑍍𑌤𑍁𑌂 𑌪𑍍𑌰𑌗𑌲𑍍𑌭𑌤𑍇 𑌸𑍈𑌵 ॥ 213 ॥

𑌸𑌦𑌸𑌦𑌨𑍁𑌗𑍍𑌰𑌹𑌨𑌿𑌗𑍍𑌰𑌹-
-𑌗𑍃𑌹𑍀𑌤𑌮𑍁𑌨𑌿𑌵𑌿𑌗𑍍𑌰𑌹𑍋 𑌭𑌗𑌵𑌾𑌨𑍍 ।
𑌸𑌰𑍍𑌵𑌾𑌸𑌾𑌮𑍁𑌪𑌨𑌿𑌷𑌦𑌾𑌂
𑌦𑍁𑌰𑍍𑌵𑌾𑌸𑌾 𑌜𑌯𑌤𑌿 𑌦𑍇𑌶𑌿𑌕𑌃 𑌪𑍍𑌰𑌥𑌮𑌃 ॥ 214 ॥

𑌇𑌤𑌿 𑌮𑌹𑌰𑍍𑌷𑌿𑌦𑍁𑌰𑍍𑌵𑌾𑌸𑌃 𑌵𑌿𑌰𑌚𑌿𑌤𑌂 𑌶𑍍𑌰𑍀𑌲𑌲𑌿𑌤𑌾𑌸𑍍𑌤𑌵𑌰𑌤𑍍𑌨𑌮𑍍 ।