𑌸𑌰𑍍𑌵𑍇 𑌉𑌚𑍁𑌃 ।
𑌯𑌤𑍋𑌽𑌨𑌂𑌤𑌶𑌕𑍍𑌤𑍇𑌰𑌨𑌂𑌤𑌾𑌶𑍍𑌚 𑌜𑍀𑌵𑌾
𑌯𑌤𑍋 𑌨𑌿𑌰𑍍𑌗𑍁𑌣𑌾𑌦𑌪𑍍𑌰𑌮𑍇𑌯𑌾 𑌗𑍁𑌣𑌾𑌸𑍍𑌤𑍇 ।
𑌯𑌤𑍋 𑌭𑌾𑌤𑌿 𑌸𑌰𑍍𑌵𑌂 𑌤𑍍𑌰𑌿𑌧𑌾 𑌭𑍇𑌦𑌭𑌿𑌨𑍍𑌨𑌂
𑌸𑌦𑌾 𑌤𑌂 𑌗𑌣𑍇𑌶𑌂 𑌨𑌮𑌾𑌮𑍋 𑌭𑌜𑌾𑌮𑌃 ॥ 1 ॥
𑌯𑌤𑌶𑍍𑌚𑌾𑌵𑌿𑌰𑌾𑌸𑍀𑌜𑍍𑌜𑌗𑌤𑍍𑌸𑌰𑍍𑌵𑌮𑍇𑌤-
-𑌤𑍍𑌤𑌥𑌾𑌬𑍍𑌜𑌾𑌸𑌨𑍋 𑌵𑌿𑌶𑍍𑌵𑌗𑍋 𑌵𑌿𑌶𑍍𑌵𑌗𑍋𑌪𑍍𑌤𑌾 ।
𑌤𑌥𑍇𑌂𑌦𑍍𑌰𑌾𑌦𑌯𑍋 𑌦𑍇𑌵𑌸𑌂𑌘𑌾 𑌮𑌨𑍁𑌷𑍍𑌯𑌾𑌃
𑌸𑌦𑌾 𑌤𑌂 𑌗𑌣𑍇𑌶𑌂 𑌨𑌮𑌾𑌮𑍋 𑌭𑌜𑌾𑌮𑌃 ॥ 2 ॥
𑌯𑌤𑍋 𑌵𑌹𑍍𑌨𑌿𑌭𑌾𑌨𑍂 𑌭𑌵𑍋 𑌭𑍂𑌰𑍍𑌜𑌲𑌂 𑌚
𑌯𑌤𑌃 𑌸𑌾𑌗𑌰𑌾𑌶𑍍𑌚𑌂𑌦𑍍𑌰𑌮𑌾 𑌵𑍍𑌯𑍋𑌮 𑌵𑌾𑌯𑍁𑌃 ।
𑌯𑌤𑌃 𑌸𑍍𑌥𑌾𑌵𑌰𑌾 𑌜𑌂𑌗𑌮𑌾 𑌵𑍃𑌕𑍍𑌷𑌸𑌂𑌘𑌾𑌃
𑌸𑌦𑌾 𑌤𑌂 𑌗𑌣𑍇𑌶𑌂 𑌨𑌮𑌾𑌮𑍋 𑌭𑌜𑌾𑌮𑌃 ॥ 3 ॥
𑌯𑌤𑍋 𑌦𑌾𑌨𑌵𑌾𑌃 𑌕𑌿𑌨𑍍𑌨𑌰𑌾 𑌯𑌕𑍍𑌷𑌸𑌂𑌘𑌾
𑌯𑌤𑌶𑍍𑌚𑌾𑌰𑌣𑌾 𑌵𑌾𑌰𑌣𑌾𑌃 𑌶𑍍𑌵𑌾𑌪𑌦𑌾𑌶𑍍𑌚 ।
𑌯𑌤𑌃 𑌪𑌕𑍍𑌷𑌿𑌕𑍀𑌟𑌾 𑌯𑌤𑍋 𑌵𑍀𑌰𑍁𑌧𑌶𑍍𑌚
𑌸𑌦𑌾 𑌤𑌂 𑌗𑌣𑍇𑌶𑌂 𑌨𑌮𑌾𑌮𑍋 𑌭𑌜𑌾𑌮𑌃 ॥ 4 ॥
𑌯𑌤𑍋 𑌬𑍁𑌦𑍍𑌧𑌿𑌰𑌜𑍍𑌞𑌾𑌨𑌨𑌾𑌶𑍋 𑌮𑍁𑌮𑍁𑌕𑍍𑌷𑍋-
-𑌰𑍍𑌯𑌤𑌃 𑌸𑌂𑌪𑌦𑍋 𑌭𑌕𑍍𑌤𑌸𑌂𑌤𑍋𑌷𑌦𑌾𑌃 𑌸𑍍𑌯𑍁𑌃 ।
𑌯𑌤𑍋 𑌵𑌿𑌘𑍍𑌨𑌨𑌾𑌶𑍋 𑌯𑌤𑌃 𑌕𑌾𑌰𑍍𑌯𑌸𑌿𑌦𑍍𑌧𑌿𑌃
𑌸𑌦𑌾 𑌤𑌂 𑌗𑌣𑍇𑌶𑌂 𑌨𑌮𑌾𑌮𑍋 𑌭𑌜𑌾𑌮𑌃 ॥ 5 ॥
𑌯𑌤𑌃 𑌪𑍁𑌤𑍍𑌰𑌸𑌂𑌪𑌦𑍍𑌯𑌤𑍋 𑌵𑌾𑌂𑌛𑌿𑌤𑌾𑌰𑍍𑌥𑍋
𑌯𑌤𑍋𑌽𑌭𑌕𑍍𑌤𑌵𑌿𑌘𑍍𑌨𑌾𑌸𑍍𑌤𑌥𑌾𑌽𑌨𑍇𑌕𑌰𑍂𑌪𑌾𑌃 ।
𑌯𑌤𑌃 𑌶𑍋𑌕𑌮𑍋𑌹𑍌 𑌯𑌤𑌃 𑌕𑌾𑌮 𑌏𑌵
𑌸𑌦𑌾 𑌤𑌂 𑌗𑌣𑍇𑌶𑌂 𑌨𑌮𑌾𑌮𑍋 𑌭𑌜𑌾𑌮𑌃 ॥ 6 ॥
𑌯𑌤𑍋𑌽𑌨𑌂𑌤𑌶𑌕𑍍𑌤𑌿𑌃 𑌸 𑌶𑍇𑌷𑍋 𑌬𑌭𑍂𑌵
𑌧𑌰𑌾𑌧𑌾𑌰𑌣𑍇𑌽𑌨𑍇𑌕𑌰𑍂𑌪𑍇 𑌚 𑌶𑌕𑍍𑌤𑌃 ।
𑌯𑌤𑍋𑌽𑌨𑍇𑌕𑌧𑌾 𑌸𑍍𑌵𑌰𑍍𑌗𑌲𑍋𑌕𑌾 𑌹𑌿 𑌨𑌾𑌨𑌾
𑌸𑌦𑌾 𑌤𑌂 𑌗𑌣𑍇𑌶𑌂 𑌨𑌮𑌾𑌮𑍋 𑌭𑌜𑌾𑌮𑌃 ॥ ॥
𑌯𑌤𑍋 𑌵𑍇𑌦𑌵𑌾𑌚𑍋 𑌵𑌿𑌕𑍁𑌂𑌠𑌾 𑌮𑌨𑍋𑌭𑌿𑌃
𑌸𑌦𑌾 𑌨𑍇𑌤𑌿 𑌨𑍇𑌤𑍀𑌤𑌿 𑌯𑌤𑍍𑌤𑌾 𑌗𑍃𑌣𑌂𑌤𑌿 ।
𑌪𑌰𑌬𑍍𑌰𑌹𑍍𑌮𑌰𑍂𑌪𑌂 𑌚𑌿𑌦𑌾𑌨𑌂𑌦𑌭𑍂𑌤𑌂
𑌸𑌦𑌾 𑌤𑌂 𑌗𑌣𑍇𑌶𑌂 𑌨𑌮𑌾𑌮𑍋 𑌭𑌜𑌾𑌮𑌃 ॥ ॥
𑌶𑍍𑌰𑍀𑌗𑌣𑍇𑌶 𑌉𑌵𑌾𑌚 ।
𑌪𑍁𑌨𑌰𑍂𑌚𑍇 𑌗𑌣𑌾𑌧𑍀𑌶𑌃 𑌸𑍍𑌤𑍋𑌤𑍍𑌰𑌮𑍇𑌤𑌤𑍍𑌪𑌠𑍇𑌨𑍍𑌨𑌰𑌃 ।
𑌤𑍍𑌰𑌿𑌸𑌂𑌧𑍍𑌯𑌂 𑌤𑍍𑌰𑌿𑌦𑌿𑌨𑌂 𑌤𑌸𑍍𑌯 𑌸𑌰𑍍𑌵𑌕𑌾𑌰𑍍𑌯𑌂 𑌭𑌵𑌿𑌷𑍍𑌯𑌤𑌿 ॥ ॥
𑌯𑍋 𑌜𑌪𑍇𑌦𑌷𑍍𑌟𑌦𑌿𑌵𑌸𑌂 𑌶𑍍𑌲𑍋𑌕𑌾𑌷𑍍𑌟𑌕𑌮𑌿𑌦𑌂 𑌶𑍁𑌭𑌮𑍍 ।
𑌅𑌷𑍍𑌟𑌵𑌾𑌰𑌂 𑌚𑌤𑍁𑌰𑍍𑌥𑍍𑌯𑌾𑌂 𑌤𑍁 𑌸𑍋𑌽𑌷𑍍𑌟𑌸𑌿𑌦𑍍𑌧𑍀𑌰𑌵𑌾𑌪𑍍𑌨𑍁𑌯𑌾𑌤𑍍 ॥ 10 ॥
𑌯𑌃 𑌪𑌠𑍇𑌨𑍍𑌮𑌾𑌸𑌮𑌾𑌤𑍍𑌰𑌂 𑌤𑍁 𑌦𑌶𑌵𑌾𑌰𑌂 𑌦𑌿𑌨𑍇 𑌦𑌿𑌨𑍇 ।
𑌸 𑌮𑍋𑌚𑌯𑍇𑌦𑍍𑌬𑌂𑌧𑌗𑌤𑌂 𑌰𑌾𑌜𑌵𑌧𑍍𑌯𑌂 𑌨 𑌸𑌂𑌶𑌯𑌃 ॥ 11 ॥
𑌵𑌿𑌦𑍍𑌯𑌾𑌕𑌾𑌮𑍋 𑌲𑌭𑍇𑌦𑍍𑌵𑌿𑌦𑍍𑌯𑌾𑌂 𑌪𑍁𑌤𑍍𑌰𑌾𑌰𑍍𑌥𑍀 𑌪𑍁𑌤𑍍𑌰𑌮𑌾𑌪𑍍𑌨𑍁𑌯𑌾𑌤𑍍 ।
𑌵𑌾𑌂𑌛𑌿𑌤𑌾𑌁𑌲𑍍𑌲𑌭𑌤𑍇 𑌸𑌰𑍍𑌵𑌾𑌨𑍇𑌕𑌵𑌿𑌂𑌶𑌤𑌿𑌵𑌾𑌰𑌤𑌃 ॥ 12 ॥
𑌯𑍋 𑌜𑌪𑍇𑌤𑍍𑌪𑌰𑌯𑌾 𑌭𑌕𑍍𑌤𑍍𑌯𑌾 𑌗𑌜𑌾𑌨𑌨𑌪𑌰𑍋 𑌨𑌰𑌃 ।
𑌏𑌵𑌮𑍁𑌕𑍍𑌤𑍍𑌵𑌾 𑌤𑌤𑍋 𑌦𑍇𑌵𑌶𑍍𑌚𑌾𑌂𑌤𑌰𑍍𑌧𑌾𑌨𑌂 𑌗𑌤𑌃 𑌪𑍍𑌰𑌭𑍁𑌃 ॥ 13 ॥
𑌇𑌤𑌿 𑌶𑍍𑌰𑍀𑌗𑌣𑍇𑌶𑌪𑍁𑌰𑌾𑌣𑍇 𑌉𑌪𑌾𑌸𑌨𑌾𑌖𑌂𑌡𑍇 𑌶𑍍𑌰𑍀𑌗𑌣𑍇𑌶𑌾𑌷𑍍𑌟𑌕𑌮𑍍 ।
