𑌪𑍍𑌰𑌤𑌿𑌭𑌟𑌶𑍍𑌰𑍇𑌣𑌿𑌭𑍀𑌷𑌣 𑌵𑌰𑌗𑍁𑌣𑌸𑍍𑌤𑍋𑌮𑌭𑍂𑌷𑌣
𑌜𑌨𑌿𑌭𑌯𑌸𑍍𑌥𑌾𑌨𑌤𑌾𑌰𑌣 𑌜𑌗𑌦𑌵𑌸𑍍𑌥𑌾𑌨𑌕𑌾𑌰𑌣 ।
𑌨𑌿𑌖𑌿𑌲𑌦𑍁𑌷𑍍𑌕𑌰𑍍𑌮𑌕𑌰𑍍𑌶𑌨 𑌨𑌿𑌗𑌮𑌸𑌦𑍍𑌧𑌰𑍍𑌮𑌦𑌰𑍍𑌶𑌨
𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 ॥ 1 ॥
𑌶𑍁𑌭𑌜𑌗𑌦𑍍𑌰𑍂𑌪𑌮𑌂𑌡𑌨 𑌸𑍁𑌰𑌜𑌨𑌤𑍍𑌰𑌾𑌸𑌖𑌂𑌡𑌨
𑌶𑌤𑌮𑌖𑌬𑍍𑌰𑌹𑍍𑌮𑌵𑌂𑌦𑌿𑌤 𑌶𑌤𑌪𑌥𑌬𑍍𑌰𑌹𑍍𑌮𑌨𑌂𑌦𑌿𑌤 ।
𑌪𑍍𑌰𑌥𑌿𑌤𑌵𑌿𑌦𑍍𑌵𑌤𑍍𑌸𑌪𑌕𑍍𑌷𑌿𑌤 𑌭𑌜𑌦𑌹𑌿𑌰𑍍𑌬𑍁𑌧𑍍𑌨𑍍𑌯𑌲𑌕𑍍𑌷𑌿𑌤
𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 ॥ 2 ॥
𑌨𑌿𑌜𑌪𑌦𑌪𑍍𑌰𑍀𑌤𑌸𑌦𑍍𑌗𑌣 𑌨𑌿𑌰𑍁𑌪𑌥𑌿𑌸𑍍𑌫𑍀𑌤𑌷𑌡𑍍𑌗𑍁𑌣
𑌨𑌿𑌗𑌮𑌨𑌿𑌰𑍍𑌵𑍍𑌯𑍂𑌢𑌵𑍈𑌭𑌵 𑌨𑌿𑌜𑌪𑌰𑌵𑍍𑌯𑍂𑌹𑌵𑍈𑌭𑌵 ।
𑌹𑌰𑌿𑌹𑌯𑌦𑍍𑌵𑍇𑌷𑌿𑌦𑌾𑌰𑌣 𑌹𑌰𑌪𑍁𑌰𑌪𑍍𑌲𑍋𑌷𑌕𑌾𑌰𑌣
𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 ॥ 3 ॥
𑌸𑍍𑌫𑍁𑌟𑌤𑌟𑌿𑌜𑍍𑌜𑌾𑌲𑌪𑌿𑌂𑌜𑌰 𑌪𑍃𑌥𑍁𑌤𑌰𑌜𑍍𑌵𑌾𑌲𑌪𑌂𑌜𑌰
𑌪𑌰𑌿𑌗𑌤𑌪𑍍𑌰𑌤𑍍𑌨𑌵𑌿𑌗𑍍𑌰𑌹 𑌪𑌰𑌿𑌮𑌿𑌤𑌪𑍍𑌰𑌜𑍍𑌞𑌦𑍁𑌰𑍍𑌗𑍍𑌰𑌹 ।
𑌪𑍍𑌰𑌹𑌰𑌣𑌗𑍍𑌰𑌾𑌮𑌮𑌂𑌡𑌿𑌤 𑌪𑌰𑌿𑌜𑌨𑌤𑍍𑌰𑌾𑌣𑌪𑌂𑌡𑌿𑌤
𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 ॥ 4 ॥
𑌭𑍁𑌵𑌨𑌨𑍇𑌤𑌸𑍍𑌤𑍍𑌰𑌯𑍀𑌮𑌯 𑌸𑌵𑌨𑌤𑍇𑌜𑌸𑍍𑌤𑍍𑌰𑌯𑍀𑌮𑌯
𑌨𑌿𑌰𑌵𑌧𑌿𑌸𑍍𑌵𑌾𑌦𑍁𑌚𑌿𑌨𑍍𑌮𑌯 𑌨𑌿𑌖𑌿𑌲𑌶𑌕𑍍𑌤𑍇𑌜𑌗𑌨𑍍𑌮𑌯 ।
𑌅𑌮𑌿𑌤𑌵𑌿𑌶𑍍𑌵𑌕𑍍𑌰𑌿𑌯𑌾𑌮𑌯 𑌶𑌮𑌿𑌤𑌵𑌿𑌶𑍍𑌵𑌗𑍍𑌭𑌯𑌾𑌮𑌯
𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 ॥ 5 ॥
𑌮𑌹𑌿𑌤𑌸𑌂𑌪𑌤𑍍𑌸𑌦𑌕𑍍𑌷𑌰 𑌵𑌿𑌹𑌿𑌤𑌸𑌂𑌪𑌤𑍍𑌷𑌡𑌕𑍍𑌷𑌰
𑌷𑌡𑌰𑌚𑌕𑍍𑌰𑌪𑍍𑌰𑌤𑌿𑌷𑍍𑌠𑌿𑌤 𑌸𑌕𑌲𑌤𑌤𑍍𑌤𑍍𑌵𑌪𑍍𑌰𑌤𑌿𑌷𑍍𑌠𑌿𑌤 ।
𑌵𑌿𑌵𑌿𑌧𑌸𑌂𑌕𑌲𑍍𑌪𑌕𑌲𑍍𑌪𑌕 𑌵𑌿𑌬𑍁𑌧𑌸𑌂𑌕𑌲𑍍𑌪𑌕𑌲𑍍𑌪𑌕
𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 ॥ 6 ॥
𑌪𑍍𑌰𑌤𑌿𑌮𑍁𑌖𑌾𑌲𑍀𑌢𑌬𑌂𑌧𑍁𑌰 𑌪𑍃𑌥𑍁𑌮𑌹𑌾𑌹𑍇𑌤𑌿𑌦𑌂𑌤𑍁𑌰
𑌵𑌿𑌕𑌟𑌮𑌾𑌲𑌾𑌪𑌰𑌿𑌷𑍍𑌕𑍃𑌤 𑌵𑌿𑌵𑌿𑌧𑌮𑌾𑌯𑌾𑌬𑌹𑌿𑌷𑍍𑌕𑍃𑌤 ।
𑌸𑍍𑌥𑌿𑌰𑌮𑌹𑌾𑌯𑌂𑌤𑍍𑌰𑌯𑌂𑌤𑍍𑌰𑌿𑌤 𑌦𑍃𑌢𑌦𑌯𑌾𑌤𑌂𑌤𑍍𑌰𑌯𑌂𑌤𑍍𑌰𑌿𑌤
𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 ॥ ॥
𑌦𑌨𑍁𑌜𑌵𑌿𑌸𑍍𑌤𑌾𑌰𑌕𑌰𑍍𑌤𑌨 𑌦𑌨𑍁𑌜𑌵𑌿𑌦𑍍𑌯𑌾𑌵𑌿𑌕𑌰𑍍𑌤𑌨
𑌜𑌨𑌿𑌤𑌮𑌿𑌸𑍍𑌰𑌾𑌵𑌿𑌕𑌰𑍍𑌤𑌨 𑌭𑌜𑌦𑌵𑌿𑌦𑍍𑌯𑌾𑌨𑌿𑌕𑌰𑍍𑌤𑌨 ।
𑌅𑌮𑌰𑌦𑍃𑌷𑍍𑌟𑌸𑍍𑌵𑌵𑌿𑌕𑍍𑌰𑌮 𑌸𑌮𑌰𑌜𑍁𑌷𑍍𑌟𑌭𑍍𑌰𑌮𑌿𑌕𑍍𑌰𑌮
𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 𑌜𑌯 𑌜𑌯 𑌶𑍍𑌰𑍀𑌸𑍁𑌦𑌰𑍍𑌶𑌨 ॥ ॥
𑌦𑍍𑌵𑌿𑌚𑌤𑍁𑌷𑍍𑌕𑌮𑌿𑌦𑌂 𑌪𑍍𑌰𑌭𑍂𑌤𑌸𑌾𑌰𑌂
𑌪𑌠𑌤𑌾𑌂 𑌵𑍇𑌂𑌕𑌟𑌨𑌾𑌯𑌕𑌪𑍍𑌰𑌣𑍀𑌤𑌮𑍍 ।
𑌵𑌿𑌷𑌮𑍇𑌽𑌪𑌿 𑌮𑌨𑍋𑌰𑌥𑌃 𑌪𑍍𑌰𑌧𑌾𑌵𑌨𑍍
𑌨 𑌵𑌿𑌹𑌨𑍍𑌯𑍇𑌤 𑌰𑌥𑌾𑌂𑌗𑌧𑍁𑌰𑍍𑌯𑌗𑍁𑌪𑍍𑌤𑌃 ॥ ॥
𑌇𑌤𑌿 𑌶𑍍𑌰𑍀 𑌵𑍇𑌦𑌾𑌂𑌤𑌾𑌚𑌾𑌰𑍍𑌯𑌸𑍍𑌯 𑌕𑍃𑌤𑌿𑌷𑍁 𑌸𑍁𑌦𑌰𑍍𑌶𑌨𑌾𑌷𑍍𑌟𑌕𑌮𑍍 ।
