𑌕𑌲𑌿𑌤𑌕𑌨𑌕𑌚𑍇𑌲𑌂 𑌖𑌂𑌡𑌿𑌤𑌾𑌪𑌤𑍍𑌕𑍁𑌚𑍇𑌲𑌂
𑌗𑌳𑌧𑍃𑌤𑌵𑌨𑌮𑌾𑌲𑌂 𑌗𑌰𑍍𑌵𑌿𑌤𑌾𑌰𑌾𑌤𑌿𑌕𑌾𑌲𑌮𑍍 ।
𑌕𑌲𑌿𑌮𑌲𑌹𑌰𑌶𑍀𑌲𑌂 𑌕𑌾𑌂𑌤𑌿𑌧𑍂𑌤𑍇𑌂𑌦𑍍𑌰𑌨𑍀𑌲𑌂
𑌵𑌿𑌨𑌮𑌦𑌵𑌨𑌶𑍀𑌲𑌂 𑌵𑍇𑌣𑍁𑌗𑍋𑌪𑌾𑌲𑌮𑍀𑌡𑍇 ॥ 1 ॥
𑌵𑍍𑌰𑌜𑌯𑍁𑌵𑌤𑌿𑌵𑌿𑌲𑍋𑌲𑌂 𑌵𑌂𑌦𑌨𑌾𑌨𑌂𑌦𑌲𑍋𑌲𑌂
𑌕𑌰𑌧𑍃𑌤𑌗𑍁𑌰𑍁𑌶𑍈𑌲𑌂 𑌕𑌂𑌜𑌗𑌰𑍍𑌭𑌾𑌦𑌿𑌪𑌾𑌲𑌮𑍍 ।
𑌅𑌭𑌿𑌮𑌤𑌫𑌲𑌦𑌾𑌨𑌂 𑌶𑍍𑌰𑍀𑌜𑌿𑌤𑌾𑌮𑌰𑍍𑌤𑍍𑌯𑌸𑌾𑌲𑌂
𑌵𑌿𑌨𑌮𑌦𑌵𑌨𑌶𑍀𑌲𑌂 𑌵𑍇𑌣𑍁𑌗𑍋𑌪𑌾𑌲𑌮𑍀𑌡𑍇 ॥ 2 ॥
𑌘𑌨𑌤𑌰𑌕𑌰𑍁𑌣𑌾𑌶𑍍𑌰𑍀𑌕𑌲𑍍𑌪𑌵𑌲𑍍𑌲𑍍𑌯𑌾𑌲𑌵𑌾𑌲𑌂
𑌕𑌲𑌶𑌜𑌲𑌧𑌿𑌕𑌨𑍍𑌯𑌾𑌮𑍋𑌦𑌕𑌶𑍍𑌰𑍀𑌕𑌪𑍋𑌲𑌮𑍍 ।
𑌪𑍍𑌲𑍁𑌷𑌿𑌤𑌵𑌿𑌨𑌤𑌲𑍋𑌕𑌾𑌨𑌂𑌤𑌦𑍁𑌷𑍍𑌕𑌰𑍍𑌮𑌤𑍂𑌲𑌂
𑌵𑌿𑌨𑌮𑌦𑌵𑌨𑌶𑍀𑌲𑌂 𑌵𑍇𑌣𑍁𑌗𑍋𑌪𑌾𑌲𑌮𑍀𑌡𑍇 ॥ 3 ॥
𑌶𑍁𑌭𑌦𑌸𑍁𑌗𑍁𑌣𑌜𑌾𑌲𑌂 𑌸𑍂𑌰𑌿𑌲𑍋𑌕𑌾𑌨𑍁𑌕𑍂𑌲𑌂
𑌦𑌿𑌤𑌿𑌜𑌤𑌤𑌿𑌕𑌰𑌾𑌲𑌂 𑌦𑌿𑌵𑍍𑌯𑌦𑌾𑌰𑌾𑌯𑌿𑌤𑍇𑌲𑌮𑍍 ।
𑌮𑍃𑌦𑍁𑌮𑌧𑍁𑌰𑌵𑌚𑌃𑌶𑍍𑌰𑍀 𑌦𑍂𑌰𑌿𑌤𑌶𑍍𑌰𑍀𑌰𑌸𑌾𑌲𑌂
𑌵𑌿𑌨𑌮𑌦𑌵𑌨𑌶𑍀𑌲𑌂 𑌵𑍇𑌣𑍁𑌗𑍋𑌪𑌾𑌲𑌮𑍀𑌡𑍇 ॥ 4 ॥
𑌮𑍃𑌗𑌮𑌦𑌤𑌿𑌲𑌕𑌶𑍍𑌰𑍀𑌮𑍇𑌦𑍁𑌰𑌸𑍍𑌵𑍀𑌯𑌫𑌾𑌲𑌂
𑌜𑌗𑌦𑍁𑌦𑌯𑌲𑌯𑌸𑍍𑌥𑌿𑌤𑍍𑌯𑌾𑌤𑍍𑌮𑌕𑌾𑌤𑍍𑌮𑍀𑌯𑌖𑍇𑌲𑌮𑍍 ।
𑌸𑌕𑌲𑌮𑍁𑌨𑌿𑌜𑌨𑌾𑌳𑍀𑌮𑌾𑌨𑌸𑌾𑌂𑌤𑌰𑍍𑌮𑌰𑌾𑌳𑌂
𑌵𑌿𑌨𑌮𑌦𑌵𑌨𑌶𑍀𑌲𑌂 𑌵𑍇𑌣𑍁𑌗𑍋𑌪𑌾𑌲𑌮𑍀𑌡𑍇 ॥ 5 ॥
𑌅𑌸𑍁𑌰𑌹𑌰𑌣𑌖𑍇𑌲𑌨𑌂 𑌨𑌂𑌦𑌕𑍋𑌤𑍍𑌕𑍍𑌷𑍇𑌪𑌲𑍀𑌲𑌂
𑌵𑌿𑌲𑌸𑌿𑌤𑌶𑌰𑌕𑌾𑌲𑌂 𑌵𑌿𑌶𑍍𑌵𑌪𑍂𑌰𑍍𑌣𑌾𑌂𑌤𑌰𑌾𑌳𑌮𑍍 ।
𑌶𑍁𑌚𑌿𑌰𑍁𑌚𑌿𑌰𑌯𑌶𑌶𑍍𑌶𑍍𑌰𑍀𑌧𑌿𑌕𑍍𑌕𑍃𑌤 𑌶𑍍𑌰𑍀𑌮𑍃𑌣𑌾𑌲𑌂
𑌵𑌿𑌨𑌮𑌦𑌵𑌨𑌶𑍀𑌲𑌂 𑌵𑍇𑌣𑍁𑌗𑍋𑌪𑌾𑌲𑌮𑍀𑌡𑍇 ॥ 6 ॥
𑌸𑍍𑌵𑌪𑌰𑌿𑌚𑌰𑌣𑌲𑌬𑍍𑌧 𑌶𑍍𑌰𑍀𑌧𑌰𑌾𑌶𑌾𑌧𑌿𑌪𑌾𑌲𑌂
𑌸𑍍𑌵𑌮𑌹𑌿𑌮𑌲𑌵𑌲𑍀𑌲𑌾𑌜𑌾𑌤𑌵𑌿𑌧𑍍𑌯𑌂𑌡𑌗𑍋𑌳𑌮𑍍 ।
𑌗𑍁𑌰𑍁𑌤𑌰𑌭𑌵𑌦𑍁𑌃𑌖𑌾𑌨𑍀𑌕 𑌵𑌾𑌃𑌪𑍂𑌰𑌕𑍂𑌲𑌂
𑌵𑌿𑌨𑌮𑌦𑌵𑌨𑌶𑍀𑌲𑌂 𑌵𑍇𑌣𑍁𑌗𑍋𑌪𑌾𑌲𑌮𑍀𑌡𑍇 ॥ ॥
𑌚𑌰𑌣𑌕𑌮𑌲𑌶𑍋𑌭𑌾𑌪𑌾𑌲𑌿𑌤 𑌶𑍍𑌰𑍀𑌪𑍍𑌰𑌵𑌾𑌳𑌂
𑌸𑌕𑌲𑌸𑍁𑌕𑍃𑌤𑌿𑌰𑌕𑍍𑌷𑌾𑌦𑌕𑍍𑌷𑌕𑌾𑌰𑍁𑌣𑍍𑌯 𑌹𑍇𑌲𑌮𑍍 ।
𑌰𑍁𑌚𑌿𑌵𑌿𑌜𑌿𑌤𑌤𑌮𑌾𑌲𑌂 𑌰𑍁𑌕𑍍𑌮𑌿𑌣𑍀𑌪𑍁𑌣𑍍𑌯𑌮𑍂𑌲𑌂
𑌵𑌿𑌨𑌮𑌦𑌵𑌨𑌶𑍀𑌲𑌂 𑌵𑍇𑌣𑍁𑌗𑍋𑌪𑌾𑌲𑌮𑍀𑌡𑍇 ॥ ॥
𑌶𑍍𑌰𑍀𑌵𑍇𑌣𑍁𑌗𑍋𑌪𑌾𑌲 𑌕𑍃𑌪𑌾𑌲𑌵𑌾𑌲𑌾𑌂
𑌶𑍍𑌰𑍀𑌰𑍁𑌕𑍍𑌮𑌿𑌣𑍀𑌲𑍋𑌲𑌸𑍁𑌵𑌰𑍍𑌣𑌚𑍇𑌲𑌾𑌮𑍍 ।
𑌕𑍃𑌤𑌿𑌂 𑌮𑌮 𑌤𑍍𑌵𑌂 𑌕𑍃𑌪𑌯𑌾 𑌗𑍃𑌹𑍀𑌤𑍍𑌵𑌾
𑌸𑍍𑌰𑌜𑌂 𑌯𑌥𑌾 𑌮𑌾𑌂 𑌕𑍁𑌰𑍁 𑌦𑍁𑌃𑌖𑌦𑍂𑌰𑌮𑍍 ॥ ॥
𑌇𑌤𑌿 𑌶𑍍𑌰𑍀 𑌵𑍇𑌣𑍁𑌗𑍋𑌪𑌾𑌲𑌾𑌷𑍍𑌟𑌕𑌮𑍍 ।
