ওং ভ॒দ্রং কর্ণে॑ভিঃ শৃণু॒য়াম॑ দেবাঃ । ভ॒দ্রং প॑শ্য়েমা॒ক্ষভি॒-র্যজ॑ত্রাঃ । স্থি॒রৈরংগৈ᳚স্তুষ্টু॒বাগ্​ম্ স॑স্ত॒নূভিঃ॑ । ব্যশে॑ম দে॒বহি॑তং॒-য়ঁদায়ুঃ॑ । স্ব॒স্তি ন॒ ইংদ্রো॑ বৃ॒দ্ধশ্র॑বাঃ । স্ব॒স্তি নঃ॑ পূ॒ষা বি॒শ্ববে॑দাঃ । স্ব॒স্তি ন॒স্তার্ক্ষ্য়ো॒ অরি॑ষ্টনেমিঃ । স্ব॒স্তি নো॒ বৃহ॒স্পতি॑-র্দধাতু ॥
ওং শাংতিঃ॒ শাংতিঃ॒ শাংতিঃ॑ ॥

॥ অথ মাংডূক্য়োপনিষত্ ॥

হরিঃ ওম্ ।
ওমিত্য়েতদক্ষরমিদগ্​ম্ সর্বং তস্য়োপব্য়াখ্য়ানং
ভূতং ভবদ্ ভবিষ্যদিতি সর্বমোংকার এব
যচ্চান্যত্ ত্রিকালাতীতং তদপ্য়োংকার এব ॥ 1 ॥

সর্বগ্​ম্ হ্য়েতদ্ ব্রহ্মাযমাত্মা ব্রহ্ম সোঽযমাত্মা চতুষ্পাত্ ॥ 2 ॥

জাগরিতস্থানো বহিষ্প্রজ্ঞঃ সপ্তাংগ একোনবিংশতিমুখঃ
স্থূলভুগ্বৈশ্বানরঃ প্রথমঃ পাদঃ ॥ 3 ॥

স্বপ্নস্থানোঽংতঃপ্রজ্ঞঃ সপ্তাংগ একোনবিংশতিমুখঃ
প্রবিবিক্তভুক্তৈজসো দ্বিতীয়ঃ পাদঃ ॥ 4 ॥

যত্র সুপ্তো ন কংচন কামং কামযতে ন কংচন স্বপ্নং
পশ্যতি তত্ সুষুপ্তম্ । সুষুপ্তস্থান একীভূতঃ প্রজ্ঞানঘন
এবানংদময়ো হ্য়ানংদভুক্ চেতোমুখঃ প্রাজ্ঞস্তৃতীয়ঃ পাদঃ ॥ 5 ॥

এষ সর্বেশ্বরঃ এষ সর্বজ্ঞ এষোঽংতর্য়াম্য়েষ যোনিঃ সর্বস্য়
প্রভবাপ্যয়ৌ হি ভূতানাম্ ॥ 6 ॥

নাংতঃপ্রজ্ঞং ন বহিষ্প্রজ্ঞং নোভযতঃপ্রজ্ঞং ন প্রজ্ঞানঘনং
ন প্রজ্ঞং নাপ্রজ্ঞম্ । অদৃষ্টমব্যবহার্যমগ্রাহ্যমলক্ষণং
অচিংত্যমব্যপদেশ্যমেকাত্মপ্রত্যযসারং প্রপংচোপশমং
শাংতং শিবমদ্বৈতং চতুর্থং মন্য়ংতে স আত্মা স বিজ্ঞেয়ঃ ॥ 7 ॥

সোঽযমাত্মাধ্যক্ষরমোংকারোঽধিমাত্রং পাদা মাত্রা মাত্রাশ্চ পাদা
অকার উকারো মকার ইতি ॥ 8 ॥

জাগরিতস্থানো বৈশ্বানরোঽকারঃ প্রথমা মাত্রাঽঽপ্তেরাদিমত্ত্বাদ্
বাঽঽপ্নোতি হ বৈ সর্বান্ কামানাদিশ্চ ভবতি য এবং-বেঁদ ॥ 9 ॥

স্বপ্নস্থানস্তৈজস উকারো দ্বিতীয়া মাত্রোত্কর্​ষাত্
উভযত্বাদ্বোত্কর্​ষতি হ বৈ জ্ঞানসংততিং সমানশ্চ ভবতি
নাস্য়াব্রহ্মবিত্কুলে ভবতি য এবং-বেঁদ ॥ 10 ॥

সুষুপ্তস্থানঃ প্রাজ্ঞো মকারস্তৃতীয়া মাত্রা মিতেরপীতের্বা
মিনোতি হ বা ইদং সর্বমপীতিশ্চ ভবতি য এবং-বেঁদ ॥ 11 ॥

অমাত্রশ্চতুর্থোঽব্যবহার্য়ঃ প্রপংচোপশমঃ শিবোঽদ্বৈত
এবমোংকার আত্মৈব সং​বিঁশত্য়াত্মনাঽঽত্মানং-য়ঁ এবং-বেঁদ ॥ 12 ॥

॥ ইতি মাংডূক্য়োপনিষত্ সমাপ্তা ॥