উদ্গচ্ছতস্তব করাদমৃতং হরত্সু
দৈত্য়েষু তানশরণাননুনীয় দেবান্ ।
সদ্যস্তিরোদধিথ দেব ভবত্প্রভাবা-
দুদ্যত্স্বয়ূথ্যকলহা দিতিজা বভূবুঃ ॥1॥
শ্য়ামাং রুচাঽপি বযসাঽপি তনুং তদানীং
প্রাপ্তোঽসি তুংগকুচমংডলভংগুরাং ত্বম্ ।
পীয়ূষকুংভকলহং পরিমুচ্য় সর্বে
তৃষ্ণাকুলাঃ প্রতিযয়ুস্ত্বদুরোজকুংভে ॥2॥
কা ত্বং মৃগাক্ষি বিভজস্ব সুধামিমামি-
ত্য়ারূঢরাগবিবশানভিয়াচতোঽমূন্ ।
বিশ্বস্যতে ময়ি কথং কুলটাঽস্মি দৈত্য়া
ইত্য়ালপন্নপি সুবিশ্বসিতানতানীঃ ॥3॥
মোদাত্ সুধাকলশমেষু দদত্সু সা ত্বং
দুশ্চেষ্টিতং মম সহধ্বমিতি ব্রুবাণা ।
পংক্তিপ্রভেদবিনিবেশিতদেবদৈত্য়া
লীলাবিলাসগতিভিঃ সমদাঃ সুধাং তাম্ ॥4॥
অস্মাস্বিয়ং প্রণয়িণীত্যসুরেষু তেষু
জোষং স্থিতেষ্বথ সমাপ্য় সুধাং সুরেষু ।
ত্বং ভক্তলোকবশগো নিজরূপমেত্য়
স্বর্ভানুমর্ধপরিপীতসুধং ব্যলাবীঃ ॥5॥
ত্বত্তঃ সুধাহরণয়োগ্যফলং পরেষু
দত্বা গতে ত্বয়ি সুরৈঃ খলু তে ব্যগৃহ্ণন্ ।
ঘোরেঽথ মূর্ছতি রণে বলিদৈত্যমায়া-
ব্য়ামোহিতে সুরগণে ত্বমিহাবিরাসীঃ ॥6॥
ত্বং কালনেমিমথ মালিমুখাংজঘংথ
শক্রো জঘান বলিজংভবলান্ সপাকান্ ।
শুষ্কার্দ্রদুষ্করবধে নমুচৌ চ লূনে
ফেনেন নারদগিরা ন্যরুণো রণং ত্বম্ ॥7॥
যোষাবপুর্দনুজমোহনমাহিতং তে
শ্রুত্বা বিলোকনকুতূহলবান্ মহেশঃ ।
ভূতৈস্সমং গিরিজয়া চ গতঃ পদং তে
স্তুত্বাঽব্রবীদভিমতং ত্বমথো তিরোধাঃ ॥8॥
আরামসীমনি চ কংদুকঘাতলীলা-
লোলাযমাননযনাং কমনীং মনোজ্ঞাম্ ।
ত্বামেষ বীক্ষ্য় বিগলদ্বসনাং মনোভূ-
বেগাদনংগরিপুরংগ সমালিলিংগ ॥9॥
ভূয়োঽপি বিদ্রুতবতীমুপধাব্য় দেবো
বীর্যপ্রমোক্ষবিকসত্পরমার্থবোধঃ ।
ত্বন্মানিতস্তব মহত্ত্বমুবাচ দেব্য়ৈ
তত্তাদৃশস্ত্বমব বাতনিকেতনাথ ॥10॥
